Hiob
6 Kɛkɛ nɛ Hiob de ke:
2 “I ná nɛ a ngmɛ ye haomi ɔmɛ
Kɛ ye amanehlu ɔ tsuo ngɛ sɛni nɔ!
3 Jinɛ a ko jiɔ pe wo nya zia.
Enɛ ɔ he je nɛ i ngɛ munyu tue basabasa a nɛ.*
4 Ejakaa Ope ɔ kɛ̃ɛ̃ mi bi ɔmɛ gbɔɔ mi,
Nɛ ye mumi ɔ ngɛ a nya duɔ ɔmɛ nue;
Gbeye níhi nɛ je Mawu ngɔ ɔ bua a he nya kɛ wo ye he.
5 Ke nga mi teji na nga a, anɛ e pa hii pɛe lo?
Aloo ke na ku na niye ní ɔ, e pa hii pɛe lo?
6 Anɛ a yeɔ niye ní muɛtɛ nɛ a wui mi ngo lo?
Aloo ngɔɔmi ko ngɛ nyu nɛ́ ngɛ malo tso* mi ɔ mi lo?
7 I sume kulaa nɛ ma ta* níhi kaa kikɛ ɔ a he.
A ngɛ kaa niye ní nɛ puɛ.
8 I ná jinɛ a tsu ye ní bimi ɔ he ní ha mi
Nɛ́ Mawu ha mi nɔ́ nɛ i ngɛ hlae ɔ.
9 I ná jinɛ Mawu maa suɔ nɛ́ e kpata ye hɛ mi,
Nɛ e kɛ e nine maa gbe mi!
10 Jinɛ lɔ ɔ po ko wo ye bua;
I ko tuu kɛ bua jɔmi ngɛ nɔ́ nɛ i ngɛ nae ɔ tsuo se,
Ejakaa i kua we Nɔ Klɔuklɔu ɔ munyu ɔmɛ.
11 Anɛ i ngɛ he wami ɔ nɛ ma kɛ ya nɔ nɛ ma mlɛ lo?
Anɛ nɔ́ kpakpa ko pa ngɛ ha mi nɛ lɔ ɔ he nɛ ma ya nɔ nɛ ma hi wami mi ɔ?*
12 Anɛ ye he wami ɔ ngɛ kaa tɛsa lo?
Aloo akɔblee lɛ a kɛ pee ye he lo ɔ lo?
13 Anɛ blɔ ko ngɛ nɛ ma gu nɔ kɛ ye bua ye he lo
Be mi nɛ nɔ ko be nɛ maa ye bua mi ɔ?
14 Nɔ fɛɛ nɔ nɛ je we suɔmi nɛ se pui kpo kɛ tsɔɔ we e nyɛmi nɔmlɔ ɔ
E ma kpa Mawu gbeye yemi.
15 Imi nitsɛ ye nyɛmimɛ sisi mi kaa pa ngɛ fĩɛ be mi,
Kaa fĩɛ be mi pa nɛ gbli.
16 Nyu tɛ* ha nɛ pa a yu tuu,
Nɛ snoo nɛ ngɛ fɔe ɔ laa ngɛ mi.
17 Se ke be su ɔ, a mi nyu tãa nɛ a baa nyagbe;
Ke je mi dɔ la a, a mi gbliɔ.
18 A blɔ gbaa kɛ guɔ he kpa;
A beɔ kɛ sɛɔ nga kplanaa nɔ, nɛ a laa.
19 Blɔ hiali nɛ a je Tema a hlaa mɛ;
Blɔ hiali nɛ a je Sheba a* mlɛɔ mɛ.
20 Zo gbe mɛ ngɛ nɔ́ nɛ a kɛ a hɛ fɔ nɔ ɔ he je;
Benɛ a ba su lejɛ ɔ, a nine nyɛ si.
21 Ejakaa jã ji bɔ nɛ nyɛ ji kɛ ha mi;
Nyɛ na bɔ nɛ ye amanehlu ɔ nya wa ha, nɛ nyɛ ye gbeye.
22 Anɛ i de ke: ‘Nyɛ ha mi nɔ́ ko’ lo,
Aloo i bi nyɛ ke nyɛɛ ke mi nɔ́ ko ngɛ ní babauu nɛ nyɛ ná a mi lo?
23 Anɛ i bi nyɛ ke nyɛ kpɔ̃ mi kɛ je he nyɛlɔ dɛ mi
Aloo nyɛ he ye yi wami* kɛ je yiwutsotsɛmɛ a dɛ mi lo?
24 Nyɛɛ tsɔɔ mi, nɛ ma má ye nya;
Nyɛɛ ye bua mi nɛ́ ma na ye tɔmi ɔ.
25 Anɔkuale munyu dɔɛ nɔ!
Se mɛni se nami lɛ ngɛ ye hɛ mi nɛ́ nyɛ ngɛ kãe ɔ he?
26 Anɛ nyɛ ngɛ ga toe nɛ́ nyɛ kã ye hɛ mi ngɛ munyuhi nɛ i tu ɔmɛ a he lo,
Nyumu nɛ e hao ɔ munyuhi nɛ́ kɔɔhiɔ muɔɔ kɛ hoɔ ɔ lo?
28 Amlɔ nɛ ɔ, nyɛ plɛ nɛ nyɛɛ hyɛ mi,
Ejakaa i be lakpa yee ngɛ nyɛ hɛ mi kɔkɔɔkɔ.
29 I kpa nyɛ pɛɛ, nyɛ susu he ekohu, nyɛ ko kojo mi,
Ee, nyɛ susu he ekohu, ejakaa loloolo ɔ, i ngmɛɛ we ye dami ní peemi ɔ he.
30 Anɛ nyɛ susu kaa nɔ́ nɛ i de ɔ dɛ lo?
Anɛ nyɛ susu kaa ke i na haomi nɛ́ ma a, i be lee lo?