Manyadali

10 Ngɛ Abimelek se ɔ, Pua binyumu Tola, Dodo bibi ɔ nɛ e je Isakar wɛtso ɔ mi ɔ te si, nɛ e he Israel yi wami. E hi Shamir ngɛ Efraim yoku ɔmɛ a nɔ. 2 E kojo Israel jeha 23. Lɔ ɔ se ɔ, e gbo nɛ a pu lɛ ngɛ Shamir.

3 Ngɛ e se ɔ, Yair, Gilead no ɔ te si nɛ e kojo Israel jeha 22. 4 E ngɛ binyumuhi 30 nɛ a hiɔ teji 30 nɔ, nɛ a ngɛ mahi 30 nɛ a tsɛɛ mɛ ke Havot Yair kɛ ba si mwɔnɛ ligbi nɛ ɔ; a ngɛ Gilead zugba a nɔ. 5 Lɔ ɔ se ɔ, Yair gbo nɛ a pu lɛ ngɛ Kamon.

6 Israel bi ɔmɛ kpale pee ní yayamihi ngɛ Yehowa hɛ mi ekohu, nɛ a bɔni Baal amaga amɛ, Ashtoret amaga amɛ, Aram* mawu ɔmɛ, Sidon mawu ɔmɛ, Moab mawu ɔmɛ, Amon bi ɔmɛ a mawu ɔmɛ, kɛ Filisti bi ɔmɛ a mawu ɔmɛ sɔmɔmi. A kua Yehowa, nɛ a sɔmɔ we lɛ. 7 Kɛkɛ nɛ Yehowa mi mi fu Israel wawɛɛ, nɛ e jua mɛ kɛ wo Filisti bi ɔmɛ kɛ Amon bi ɔmɛ a dɛ mi. 8 Enɛ ɔ he ɔ, a hao Israel bi ɔmɛ, nɛ a wa mɛ yi mi wawɛɛ ngɛ jamɛ a jeha a mi. A wa Israel bi ɔmɛ tsuo yi mi jeha 18 ngɛ Yordan Pa a se, he nɛ jinɛ e ji Amor bi ɔmɛ a zugba ngɛ Gilead ɔ. 9 Jehanɛ hu ɔ, Amon bi ɔmɛ poɔ Yordan Pa a nɛ a kɛ Yuda kɛ Benyamin kɛ Efraim we ɔ ya hwuɔ ta; nɛ Israel hao wawɛɛ. 10 Kɛkɛ nɛ Israel bi ɔmɛ tsɛ Yehowa konɛ e ba ye bua mɛ, nɛ a de ke: “Wa pee yayami kɛ si mo, ejakaa wa kua wa Mawu ɔ nɛ wa ya sɔmɔ Baal amaga amɛ.”

11 Se Yehowa de Israel bi ɔmɛ ke: “Anɛ i he we nyɛ yi wami kɛ ji Egipt, kɛ Amor bi ɔmɛ, Amon bi ɔmɛ, Filisti bi ɔmɛ, 12 Sidon bi ɔmɛ, Amalek bi ɔmɛ, kɛ Midian bi ɔmɛ a dɛ mi benɛ a ngɛ nyɛ yi mi wae ɔ lo? Benɛ nyɛ kpa ngmlaa kɛ tsɛ mi ɔ, i he nyɛ yi wami kɛ je a dɛ mi. 13 Se nyɛ kua mi nɛ nyɛ ya sɔmɔ mawu kpahi. Enɛ ɔ he je nɛ i be nyɛ yi wami hee hu ɔ nɛ. 14 Nyɛɛ ya mawu ɔmɛ nɛ nyɛ hla a, a ngɔ nɛ́ nyɛ ya bi yemi kɛ buami. Nyɛ ha nɛ a he nyɛ yi wami ngɛ nyɛ haomi be ɔ mi.” 15 Se Israel bi ɔmɛ de Yehowa ke: “Wa pee yayami. Moo pee wɔ nɔ́ fɛɛ nɔ́ nɛ sa o hɛ mi. Wa kpa mo pɛɛ, mo he wa yi wami mwɔnɛ ligbi nɛ ɔ kɛkɛ.” 16 Nɛ a je ma se mawu ɔmɛ kɛ je a kpɛti, nɛ a sɔmɔ Yehowa, nɛ lɔ ɔ ha nɛ e nyɛ we nɛ e hyɛ Israel nɔ́ nami ɔ hu.

17 Pee se ɔ, Amon bi ɔmɛ bua a he nya, nɛ a ya to si ngɛ Gilead. Lɔ ɔ he ɔ, Israel bi ɔmɛ hu bua a he nya nɛ a ya to si ngɛ Mizpa. 18 Gilead bi ɔmɛ kɛ ma nikɔtɔma amɛ bi a sibi ke: “Mɛnɔ maa nyɛɛ wa hɛ mi konɛ waa kɛ Amon bi ɔmɛ nɛ ya hwu ta? Jamɛ a nɔ ɔ maa ye nihi nɛ a ngɛ Gilead ɔ tsuo a nɔ.”