Yesaya
19 Munyu nɛ a tu kɛ si Egipt ji nɛ ɔ nɛ:
Hyɛ! Yehowa hi bɔku nɛ he sɔɔ nɔ, nɛ e ma Egipt.
Egipt mawuhi nɛ a he be se nami ɔ a he maa do blibliibli ngɛ e hɛ mi,
Nɛ Egiptbi ɔmɛ a tsui maa sile ngɛ a mi.
2 “Ma ha nɛ Egiptbi ɔmɛ maa te si kɛ wo mɛ nitsɛmɛ a he,
Nɛ a kɛ a sibi maa hwu,
Nɔ kɛ e nyɛmi maa hwu, nɔ kɛ e kpɔ mi no maa hwu,
Ma maa hwu kɛ si ma, matsɛ yemi maa hwu kɛ si matsɛ yemi.
3 Nɛ Egipt juɛmi maa gbɛ,
Nɛ ma puɛ e yi mi tomi ɔmɛ.
E maa ya mawuhi nɛ se nami be a he ɔ a ngɔ,
E maa ya kunya yeli ɔmɛ, ní peeli ɔmɛ kɛ klamɔ ɔmɛ a ngɔ.
4 Ma ngɔ Egipt kɛ wo nyɔmtsɛ ko nɛ e yi mi wa dɛ mi,
Nɛ matsɛ yiwutsotsɛ ko maa ye a nɔ,” anɔkuale Nyɔmtsɛ ɔ, Yehowa tabohiatsɛ ɔ lɛ de.
5 Wo ɔ mi nyu ɔ maa si,
Nɛ pa a maa si nɛ e mi ma gbli.
6 Pa amɛ maa je fu wawɛɛ;
Nilo nyu dɔ ɔmɛ maa fa nɛ a maa si.
Glã amɛ kɛ go ɔmɛ maa sa.
7 Níhi tsuo nɛ a du ngɛ Nilo Pa a tue ɔ, ngɛ Nilo Pa a he ɔ ma ngla,
Nɛ zugba nɛ ngɛ Nilo Pa a he nɛ a du ní ngɛ nɔ ɔ tsuo nɔ ma gbli.
Kɔɔhiɔ maa muɔ mɛ kɛ ho nɛ a be si hie hu.
8 Nɛ pa gbeli nɛ a ngɛ Egipt ɔ maa ye aywilɛho,
Nihi nɛ a fɔɔ gbowe ngɛ Nilo Pa a mi ɔ maa ye kɔmɔ,
Nɛ nihi nɛ a woɔ ya ngɛ pa a nɔ ɔ a he be hiɛe hu.
9 Nihi nɛ a tsuɔ flaks* he ní
Kɛ nihi nɛ a loɔ klala a, zo maa gbe mɛ.
10 E bo loli ɔmɛ maa hao;
E we apaatsɛmɛ ɔmɛ tsuo* maa ye aywilɛho.
11 Zoan ma nikɔtɔma amɛ ji kuasiahi.
Farao ga woli nɛ a le ní ɔ woɔ ga nɛ juɛmi be mi.
Kɛ ba kɛɛ nɛ o deɔ Farao ke:
“Ní leli a nina ji mi,
Matsɛmɛ nɛ a hi si blema a nina ji mi ɔ”?
12 Ke jã a, jije o ní leli ɔmɛ ngɛ mɔ?
Ha nɛ a de mo ke ji a le yi mi nɛ Yehowa tabohiatsɛ ɔ to ngɛ Egipt he.
14 Yehowa ha nɛ Egipt juɛmi gbɛ;
Nɛ a ha nɛ Egipt tla blɔ ngɛ nɔ́ fɛɛ nɔ́ nɛ e peeɔ ɔ mi,
Kaa dã delɔ nɛ ngɛ si tatae ngɛ lɛ nitsɛ e vie mi.
15 Egipt be ní tsumi ko nae ma tsu,
Yi jio, hlemi jio, tso kɔni jio, go* jio.
16 Jamɛ a ligbi ɔ, Egiptbi ɔmɛ maa pee kaa yihi, a he maa do blibliibli nɛ sawale maa nu mɛ ngɛ Yehowa tabohiatsɛ ɔ nine nɛ ngɛ gbeye nɛ e wo nɔ kɛ si mɛ ɔ he je. 17 Nɛ Yuda zugba a maa pee gbeye nɔ́ kɛ ha Egipt. Ke a wo Yuda ta a, sawale maa nu mɛ ngɛ yi mi nɛ Yehowa tabohiatsɛ ɔ to ngɛ a he ɔ he je.
18 Jamɛ a ligbi ɔ, Egipt mahi enuɔ maa tu Kanaan gbi, nɛ a ma kã Yehowa tabohiatsɛ ɔ kita kaa a maa ye lɛ anɔkuale. A ma tsɛ ma a kake ke Hɛ Mi Kpatami Ma.
19 Jamɛ a ligbi ɔ, a maa ma afɔle sami latɛ kɛ ha Yehowa ngɛ Egipt zugba a kpɛti, kɛ titima ngɛ e huzu ɔ nya kɛ ha Yehowa. 20 E maa pee okadi kɛ odase kɛ ha Yehowa tabohiatsɛ ɔ ngɛ Egipt zugba a nɔ; ejakaa a ma kpa ngmlaa kɛ tsɛ Yehowa ngɛ nihi nɛ ngɛ mɛ yi mi wae ɔ he je, nɛ e maa tsɔ kpɔlɔ kɛ ya a ngɔ, kpɔlɔ ngua nɛ́ e ma kpɔ̃ mɛ. 21 Nɛ Yehowa ma je e he si kɛ tsɔɔ Egiptbi ɔmɛ, nɛ jamɛ a ligbi ɔ, Egiptbi ɔmɛ ma ba le Yehowa. A maa ngɔ afɔlehi kɛ nike níhi kɛ ba, nɛ a ma kã Yehowa kita, nɛ a maa ye nɔ. 22 Yehowa maa fia Egipt nɔ́, e maa fia lɛ nɔ́ nɛ e ma tsa lɛ. A maa kpale kɛ ba Yehowa ngɔ, nɛ e maa nu a ní bimi ɔ nɛ e ma tsa mɛ.
23 Jamɛ a ligbi ɔ, blɔ ngua ko maa je Egipt kɛ ya Asiria. Kɛkɛ ɔ, Asiria maa ba Egipt, nɛ Egipt hu maa ya Asiria, nɛ Egipt kɛ Asiria ma bla kɛ ja Mawu. 24 Jamɛ a ligbi ɔ, Israel maa piɛɛ Egipt kɛ Asiria a he kaa ma etɛne, nɛ e maa pee jɔɔmi ngɛ zugba a kpɛti, 25 ejakaa Yehowa tabohiatsɛ ɔ jɔɔ mɛ ke: “A jɔɔ ye ma Egipt, kɛ Asiria ye nine nya ní tsumi ɔ, kɛ Israel ye weto ní ɔ.”