Hiob
8 Kɛkɛ nɛ Bildad nɛ e je Shua a de ke:
2 “O maa hi munyuhi kaa kikɛ nɛ ɔ tue kɛ ya si mɛni be?
O nya mi munyuhi ngɛ kaa kɔɔhiɔ nɛ nya wa!
3 Anɛ Mawu ma plɛ dami sane hɛ mi kɛ bu si lo,
Aloo Ope ɔ ma plɛ nɔ́ nɛ da hɛ mi kɛ bu si lo?
4 Ke o bimɛ ɔmɛ pee yayami kɛ si lɛ ɔ,
E ma ha nɛ a gbla a tue ngɛ atuã nɛ a tsɔ ɔ he je;*
5 Se ke o kɛ o hɛ maa fɔ Mawu nɔ
Nɛ o ma kpa Ope ɔ pɛɛ nɛ́ e na mo mɔbɔ,
6 Nɛ ke o he tsɔ nɛ o da ngɛ anɔkuale mi ɔ,
Lɛɛ e maa gbla e juɛmi kɛ ba o nɔ
Nɛ e maa kpale mo kɛ to o blɔ he nɛ sa mo.
7 E ngɛ mi kaa o sisije ɔ klee we mohu lɛɛ,
Se o nyagbe ma ba kle.
8 I kpa mo pɛɛ, mo bi yinɔ nɛ be ɔ,
Nɛ o bu níhi nɛ a tsɛmɛ kpa si nɛ́ a na a tue.
9 Wɔɔ lɛɛ, hiɛ pɛ lɛ a fɔ wɔ nɛ wa lí nɔ́ ko,
Ejakaa wa ligbi ɔmɛ ngɛ́ zugba a nɔ ngɛ kaa nini.
10 Anɛ a be mo ní tsɔɔe
Nɛ́ a de mo nɔ́ nɛ a le lo?*
11 Ke ngɔwu ná we zugba nɛ nyu daa si ngɛ nɔ ɔ, anɛ e maa puɛ nɛ́ e ka gagaaga lo?
Anɛ glã maa ka gagaaga ke e nɛ́ nyu lo?
12 Benɛ e je we mɔmɔ lolo, nɛ́ a ná we nɛ a po ɔ,
E ma gbli loko tso kpa amɛ ma gbli.
13 Nihi tsuo nɛ a hɛ jeɔ Mawu nɔ ɔ, nɔ́ nɛ baa a nɔ ji nɛ ɔ nɛ,*
Ejakaa nihi nɛ a li Mawu ɔ,* a hɛnɔkami ɔ maa laa.
14 A hɛnɔkami ɔ maa pee yaka
Nɛ níhi hu nɛ a ngɔ a hɛ kɛ fɔ nɔ ɔ he wɛ kaa anani ya.*
15 E ma kpasa e we ɔ, se e be si dae;
E maa bɔ mɔde kaa e maa pɛtɛ he wawɛɛ, se e maa hule.
16 E ngɛ kaa tso nɛ nyu ngɛ mi nɛ́ e ngɛ pu nɔ,
E kɔni ɔmɛ gbaa kɛ woɔ abɔɔ mi tsuo.
17 E sisi poku ɔmɛ sɛɔ a sibi a mi ngɛ tɛhi nɛ a bua nya a kpɛ.
E hlaa tsu ngɛ tɛ ɔmɛ a kpɛ.*
18 Se ke a hia* lɛ kɛ je e sihi he ɔ,
E sihi he ɔ ma kua lɛ nɛ e ma de ke, ‘i nɛ mo hyɛ.’
19 Ee, kikɛ ji bɔ nɛ e maa laa a nɛ;*
kɛkɛ ɔ, ekpahi maa puɛ kɛ je zu mi.
20 Ngɛ anɔkuale mi ɔ, Mawu be nihi nɛ a hɛɛ a we anɔkuale yemi ɔ mi ɔ* kuae;
Nɛ e be yiwutsotsɛmɛ hu ye buae,*
21 E ma ha nɛ o muɔ
Nɛ o kɛ bua jɔmi ma kpa ngmlaa ekohu.
22 Nihi nɛ nyɛɔ mo ɔ, a maa ha zo ha mɛ kaa bo,
Nɛ yiwutsotsɛmɛ a bo tsu ɔ be si hie hu.