Hiob
28 “He ko ngɛ nɛ a tsuaa sika hiɔ ngɛ
Nɛ he ko ngɛ nɛ a tsuaa sika tsu nɛ a maa tsu he ɔ ngɛ;
2 A tsuaa dade ngɛ zu mi,
Nɛ a sileɔ* akɔblee kɛ jeɔ tɛsahi a mi.
4 E tsuaa muɔ nɛ mi kuɔ ngɛ hehi nɛ nihi be,
Ngɛ hehi nɛ nihi a hɛ je nɔ, nɛ e kɛ he nɛ nihi beɔ ngɛ ɔ kɛ;
Ni komɛ kɛ kpa kpleɔ kɛ yaa mi.
5 Wa náa niye ní ngɛ zugba a nɔ;
Se zugba a sisi lɛɛ, e tsake kulaa kaa nɔ́ nɛ a kɛ la sã.*
6 Safiro ngɛ tɛ ɔmɛ a mi ngɛ lejɛ ɔ,
Nɛ sika tsu ngɛ zu ɔ mi.
7 Lohwe pɛlitsɛ nɛ nuɔ lohwe kpahi ɔ li blɔ nɛ yaa lejɛ ɔ;
Nɛ papalotsui yumu hɛngmɛ hu nɛ.
8 Lohwe awi yelɔ ko bi ngɛ lejɛ ɔ;
Jata wayo ko hu bi ngɛ lejɛ ɔ.
9 Nɔmlɔ kɛ e nine ywiaa tɛsa nɛ he wa wawɛɛ ɔ;
E plɛɔ yoku ɔmɛ ngɛ a sisi tomi nɔ kɛ buɔ si.
10 E gbaa nyu dɔhi ngɛ tɛsa amɛ a mi;
E hɛngmɛ naa níhi nɛ a he jua wa amɛ tsuo.
11 E tsiɔ hehi nɛ pa a jeɔ kɛ ba a
Nɛ e ngɔɔ níhi nɛ a ngɔ kɛ laa a kɛ baa la nya.
12 Se jije a maa na juɛmi ngɛ,
Nɛ nɔ́ sisi numi hu, jije ji e je he?
13 Adesa ko li bɔ nɛ e he jua wa ha,
Nɛ a be nae ngɛ hɛ kali a zugba a nɔ hulɔ.
14 Nyuhi nɛ a mi kuɔ ɔ ke, ‘E be ye mi!’
Nɛ wo ɔ hu ke, ‘E be ye ngɔ!’
15 A be nyɛe ma he kɛ sika tsu ngmingmiingmi;
Nɛ a be nyɛe maa ngmɛ sika hiɔ hu kɛ tsake lɛ.
16 A kɛ sika tsu nɛ je Ofir be nyɛe ma he
Nɛ a kɛ oniks* kɛ safiro nɛ a he jua wa hu be nyɛe ma he.
17 A be nyɛe maa ngɔ sika tsu kɛ ahuhuɛ kɛ to he;
Nɛ a kɛ buɛ nɛ a kɛ sika tsu ngmingmiingmi* pee hu be nyɛe ma tsake.
18 Kora tɛ kɛ kristalo po bɛ he kulaa,
Ejakaa baagi nɛ hyi tɔ kɛ juɛmi ɔ he jua wa kulaa pe baagi nɛ hyi tɔ kɛ adiagba.
19 A be nyɛe maa ngɔ Topaz nɛ a kɛ je Kush kɛ to he;
Nɛ a be nyɛe ma he kɛ sika tsu ngmingmiingmi po.
20 Se jije juɛmi je kɛ ba,
Nɛ nɔ́ sisi numi hu, jije ji e je he?
21 A ngɔ kɛ laa níhi tsuo nɛ a ngɛ wami mi ɔ a hɛngmɛ
Nɛ a ngɔ kɛ laa hiɔwe lohwe pɛlitsɛmɛ hulɔ.
22 Hɛ mi kpatami kɛ gbenɔ de ke,
‘Nɔ́ nɛ a de kɛ kɔ e he pɛ lɛ wa nu kɛ wa tue.’
23 Mawu lɛ le blɔ nɔ nɛ a maa gu kɛ na;
Lɛ pɛ lɛ e le he nɛ e ngɛ,
24 Ejakaa e hyɛɔ je ɔ nyagbe he ɔmɛ tsuo,
Nɛ e naa nɔ́ fɛɛ nɔ́ nɛ ngɛ hiɔwe sisi ɔ.
25 Benɛ e ha kɔɔhiɔ he wami*
Nɛ e susu nyu ɔmɛ,
26 Benɛ e wo mlaa kɛ ha hiɔmi nɛmi
Nɛ́ e gba blɔ kɛ ha oslabai kɛ hiɔmi nɛ nya wa a,
27 Kɛkɛ nɛ e na juɛmi nɛ e tsɔɔ mi;
E to lɛ si nɛ e ka nɛ e hyɛ.
28 Kɛkɛ nɛ e de nɔmlɔ adesa ke:
‘Hyɛ! Yehowa gbeye yemi ɔ, lɔ ɔ ji juɛmi,
Nɛ ke nɔ ko yuɔ e he ngɛ yayami he ɔ, lɔ ɔ ji nɔ́ sisi numi ɔ nɛ.’”