Yesaya

39 Jamɛ a be ɔ mi ɔ, Babilon Matsɛ Merodak Baladan, nɛ ji Baladan binyumu ɔ tsɔ nɛ a kɛ sɛ womihi kɛ nike ní ya ha Hezekia, ejakaa e nu kaa Hezekia ba be he wami nɛ e ná tsami. 2 Hezekia kɛ bua jɔmi he mɛ atuu,* nɛ e tsɔɔ mɛ e juetli to he ɔ, nɛ ji sika hiɔ ɔ, sika tsu ɔ, balsam nu ɔ, kɛ nu kpahi nɛ a he jua wa a, e ta hwumi ní ɔmɛ tsuo, kɛ nɔ́ fɛɛ nɔ́ nɛ ngɛ e juetli to he ɔmɛ ɔ. Nɔ́ ko be Hezekia nitsɛ we* ɔ kɛ e matsɛ yemi ɔ tsuo mi nɛ́ e kɛ tsɔɔ we mɛ.

3 Lɔ ɔ se ɔ, gbalɔ Yesaya ba Matsɛ Hezekia ngɔ, nɛ e ba bi lɛ ke: “Nyumu nɛ ɔmɛ ke mɛni, nɛ jije a je kɛ ba?” Nɛ Hezekia he nɔ ke: “A je he ko tsitsaa, a je Babilon.” 4 Lɔ ɔ se ɔ, e bi lɛ ke: “Mɛni a na ngɛ o we* ɔ mi?” Hezekia he nɔ ke: “A na nɔ́ fɛɛ nɔ́ nɛ ngɛ ye we* ɔ mi ɔ. Nɔ́ ko be ye juetli to he ɔmɛ nɛ i kɛ tsɔɔ we mɛ.”

5 Kɛkɛ nɛ Yesaya de Hezekia ke: “Moo bu nɔ́ nɛ Yehowa tabohiatsɛ ɔ de ɔ tue, 6 ‘Hyɛ! Be ma nɛ a ma ba muɔɔ níhi tsuo nɛ ngɛ o we* ɔ, kɛ níhi tsuo nɛ o nɛmɛ ɔmɛ ngɔ kɛ to kɛ ba si mwɔnɛ ligbi nɛ ɔ kɛ ho Babilon ya. A be nɔ́ ko nɔ́ ko sie,’ Yehowa lɛ de. 7 ‘Nɛ a maa nuu mo nitsɛ o binyumuhi nɛ o ma fɔ ɔ a kpɛti ni komɛ kɛ ho, nɛ a ma ya pee nikɔtɔmahi ngɛ Babilon matsɛ ɔ we ɔ mi.’”

8 Kɛkɛ nɛ Hezekia de Yesaya ke: “Yehowa sɛ gbi nɛ o kɛ ha mi ɔ hi.” Nɛ e de hu ke: “Ejakaa tue mi jɔmi kɛ slɔkee si himi* maa hi si ngɛ ye wami be ɔ mi.”*