Yesaya

36 Ngɛ Matsɛ Hezekia nɔ yemi jeha nɛ ji 14 ɔ mi ɔ, Asiria Matsɛ Senakerib kuɔ kɛ ba tua Yuda mahi tsuo nɛ a fia gbogbo wo a he ɔ, nɛ e ngɔ ma amɛ. 2 Asiria matsɛ ɔ tsɔ Rabshake ɔ* kɛ tabuli babauu kɛ je Lakish kɛ ya Matsɛ Hezekia ngɔ ngɛ Yerusalem. A ya da yiti je taku ɔ nyu dɔ ɔ nɛ ngɛ blɔ ngua a nɛ yaa níhi a he fɔli a zugba a nɔ ɔ he. 3 Kɛkɛ nɛ Eliakim, Hilkia binyumu ɔ nɛ hyɛɛ we* ɔ nɔ ɔ, Shebna, nɛ ji womi ngmalɔ ɔ, kɛ Yoa, Asaf binyumu ɔ nɛ ji sane ngmalɔ ɔ je kpo kɛ ba e ngɔ.

4 Lɔ ɔ he ɔ, Rabshake ɔ de mɛ ke: “I kpa nyɛ pɛɛ, nyɛ ya de Hezekia ke, ‘Nɔ́ nɛ matsɛ ngua a, nɛ ji Asiria matsɛ ɔ ngɛ dee ji nɛ ɔ nɛ: “Mɛni nɔ nɛ o ngɔ o hɛ kɛ fɔ ɔ? 5 O ngɛ dee ke, ‘I le ga, nɛ i ngɛ he wami nɛ ma kɛ hwu ta,’ se munyu nɛ ɔmɛ ji nya puu munyuhi. Mɛnɔ nɔ o ngɔ o hɛ kɛ fɔ loko o ngɛ ye hɛ mi atuã tsɔe ɔ? 6 Hyɛ! O kɛ o hɛ fɔ Egipt nɛ ji glã nɛ ku ta nɛ ɔ nɔ kaa e maa ye bua mo, glã nɛ ke nɔ ko kɛ pee dɛma tso ɔ, e maa gbɔ e dɛ mi ɔ. Jã nɛ Farao, Egipt matsɛ ɔ ngɛ kɛ ha nihi tsuo nɛ a ngɔɔ a hɛ kɛ fɔɔ e nɔ ɔ. 7 Nɛ ke nyɛ de ke, ‘Waa kɛ wa hɛ fɔ Yehowa, wa Mawu ɔ nɔ’ ɔ, anɛ pi e hehi nɛ ya hiɔwe, kɛ e we afɔle sami latɛhi nɛ Hezekia je, nɛ e de Yuda kɛ Yerusalem ke, ‘Nyɛ kplã si ngɛ afɔle sami latɛ nɛ ɔ hɛ mi ngɛ Yerusalem’ ɔ lo?”’ 8 Jehanɛ ɔ, ke o suɔ ɔ, o kɛ ye nyɔmtsɛ ɔ, nɛ ji Asiria matsɛ ɔ nɛ po nga:* Ma ha mo okpɔngɔhi 2,000 nɛ waa hyɛ kaa o ma ná okpɔngɔ nɔ hili kɛ ha mɛ tsuo lo. 9 Mo nɛ́ o ngɔ o hɛ kɛ fɔ Egipt nɔ kaa e ha mo ta zugba lɛhi kɛ okpɔngɔ nɔ hili ɔ, anɛ o ma nyɛ maa ye amlaalo kake nɛ e ji nɔ nyafii kulaa ngɛ ye nyɔmtsɛ ɔ sɔmɔli ɔmɛ a kpɛti ɔ nɔ kunimi lo? 10 Anɛ pi Yehowa fami nya nɛ i kuɔ kɛ ba tua zugba nɛ ɔ kaa ma kpata hɛ mi ɔ lo? Yehowa nitsɛ de mi ke, ‘Kuɔɔ kɛ ya tua zugba nɛ ɔ nɛ o kpata hɛ mi.’”

11 Kɛkɛ nɛ Eliakim, kɛ Shebna, kɛ Yoa de Rabshake ɔ ke: “Wa kpa mo pɛɛ nɛ o kɛ o sɔmɔli ɔmɛ nɛ tu munyu ngɛ Aram gbi* mi, ejakaa wa maa nu sisi; o kɛ wɔ nɛ ko tu munyu ngɛ Yudabi ɔmɛ a gbi mi nɛ́ ni ɔmɛ nɛ a ngɛ gbogbo ɔ yi mi ɔ nɛ a ba nu.” 12 Se Rabshake ɔ de ke: “Nyɛ bu kaa nyɛɛ kɛ nyɛ nyɔmtsɛ ɔ nyɛ ngɔ pɛ nɛ ye nyɔmtsɛ ɔ tsɔ mi kɛ munyu nɛ ɔmɛ lo? Anɛ nyumuhi nɛ a hii si ngɛ gbogbo ɔ yi mi ɔ hu piɛɛ we he lo? A maa ye mɛ nitsɛmɛ a fĩ, nɛ a maa nu mɛ nitsɛmɛ a zami kaa nyɛ nɔuu.”

13 Kɛkɛ nɛ Rabshake ɔ te da si, nɛ e kpa ngmlaa wawɛɛ ngɛ Yudabi ɔmɛ a gbi ɔ mi, nɛ e de ke: “Nyɛɛ bu nɔ́ nɛ matsɛ ngua a, nɛ ji Asiria matsɛ ɔ ngɛ dee ɔ tue. 14 Nɔ́ nɛ matsɛ ɔ ngɛ dee ji nɛ ɔ nɛ, ‘Nyɛ ko ha nɛ Hezekia nɛ sisi nyɛ, ejakaa e be nyɛe ma kpɔ̃ nyɛ. 15 Nɛ nyɛ ko ha nɛ Hezekia nɛ ha nɛ nyɛɛ ngɔ nyɛ hɛ kɛ fɔ Yehowa nɔ kɛ demi nɛ e ngɛ dee ke: “Bɔ fɛɛ bɔ nɛ ji ɔ, Yehowa ma kpɔ̃ wɔ, nɛ a be ma nɛ ɔ ngɔe kɛ wo Asiria matsɛ ɔ dɛ mi.” 16 Nyɛ ko bu Hezekia tue, ejakaa nɔ́ nɛ Asiria matsɛ ɔ ngɛ dee ji nɛ ɔ nɛ: “Nyɛɛ kɛ mi nɛ ba kpata, nɛ́ nyɛ ba nu ye nane,* nɛ nyɛ ti nɔ fɛɛ nɔ maa ye lɛ nitsɛ e wai kɛ e fig tso nɔ ní, nɛ e maa nu lɛ nitsɛ e muɔ nɛ e toɔ nyu ngɛ mi ɔ mi nyu, 17 kɛ yaa si be nɛ ma ba nɛ ma ba ngɔ nyɛ kɛ ho zugba nɛ ngɛ kaa nyɛ nitsɛmɛ nyɛ zugba, nɛ ji zugba nɛ ngma* kɛ wai ehe ngɛ nɔ, zugba nɛ niye ní kɛ wai ngmɔhi ngɛ nɔ ɔ nɔ ya. 18 Nyɛ ko ha nɛ Hezekia nɛ sisi nyɛ kɛ demi nɛ e ngɛ nyɛ dee ke, ‘Yehowa ma kpɔ̃ wɔ’ ɔ. Anɛ je ma amɛ a mawu ɔmɛ eko nyɛ nɛ e kpɔ̃ e zugba ngɛ Asiria matsɛ ɔ dɛ mi hyɛ lo? 19 Jije Hamat kɛ Arpad mawu ɔmɛ ngɛ? Jije Sefarvaim mawu ɔmɛ ngɛ? Anɛ a nyɛ kpɔ̃ Samaria ngɛ ye dɛ mi lo? 20 Zugba nɛ ɔmɛ a nɔ mawu ɔmɛ tsuo a kpɛti mɛnɔ lɛ e nyɛ kpɔ̃ e zugba ngɛ ye dɛ, loko Yehowa lɛɛ, e ma kpɔ̃ Yerusalem ngɛ ye dɛ ɔ?”’”

21 Se ni ɔmɛ pee kɔ̃, nɛ a ha we lɛ heto, ejakaa matsɛ ɔ fã mɛ ke, “Nyɛ ko ha lɛ heto.” 22 Se Eliakim, nɛ ji Hilkia binyumu ɔ nɛ hyɛɛ we* ɔ nɔ ɔ, kɛ Shebna, nɛ ji womi ngmalɔ ɔ, kɛ Yoa, Asaf binyumu ɔ nɛ ji sane ngmalɔ ɔ gba a tade ɔmɛ nɛ a ba Hezekia ngɔ, nɛ a ba de lɛ níhi nɛ Rabshake ɔ de ɔ.