Yesaya
53 Mɛnɔ lɛ e he nɔ́ nɛ e nu kɛ je wa ngɔ ɔ ye?*
Nɛ Yehowa kɔni ɔ, mɛnɔ lɛ a je kpo kɛ tsɔɔ?
2 E ma tsɛ̃ kaa tso kɔni ngɛ e* hɛ mi, kaa tso sipoku nɛ je kpo ngɛ zugba gbigbli nɔ.
Pi nɔ ko ji lɛ, nɛ hɛ mi nyami ko hu e be;
Nɛ ke wa na lɛ ɔ, nɔ́ ko nɔ́ ko be e he nɛ gblaa wɔ kɛ suɔ e he.*
E ngɛ kaa nɔ́ nɛ a ngɔ e hɛ mi kɛ laa wɔ.*
Nihi bui lɛ, nɛ wa nɛ lɛ kaa se nami ko ngɛ e he.
4 Niinɛ, lɛ nitsɛ lɛ e tloo wa hiɔ ɔmɛ,
Nɛ e wo wa nɔ́ nami ɔmɛ.
Se wa bu lɛ kaa nɔ ko nɛ Mawu gbla e tue, nɛ e fia lɛ nɔ́, nɛ e ha nɛ e na nɔ́.
5 Se a gbɔ̃ lɛ nɔ́ ngɛ wa yayami ɔmɛ a he je;
A wa lɛ yi mi wawɛɛ ngɛ wa tɔmi ɔmɛ a he je.
A gbla e tue bɔ nɛ pee nɛ wa tue mi nɛ jɔ wɔ,
Nɛ e pa amɛ a he je ɔ, wa ná tsami.
6 Wɔ tsuo wa laa blɔ kaa tohi,
Nɔ fɛɛ nɔ ngɔ lɛ nitsɛ e blɔ,
Nɛ Yehowa ha nɛ wɔ tsuo wa yayami ɔmɛ ba tloo lɛ.
7 A nyɛ e nɔ, nɛ e ngmɛ blɔ nɛ a wa lɛ yi mi,
Se e kpɛ we e kuɛ si.
A ngɔ lɛ kɛ ho kaa jijɔ nɛ a yaa gbe lɛ,
Kaa bɔ nɛ jijɔ eyo peeɔ kpoo ngɛ e he bwɔmi sãlɔ hɛ mi ɔ,
Nɛ e kpɛ we e kuɔ si.
8 A nyɛ e nɔ,* nɛ a kɛ lɛ ho be mi nɛ a kojo we lɛ ngɛ dami nya;
Nɛ mɛnɔ lɛ e ma gba e he nya kaa e maa le e yi nɔ ɔ he sane?*
Ejakaa a po lɛ kɛ je hɛ kali a zugba a nɔ;
A fiaa lɛ nɔ́* ngɛ ye ma a tɔmi ɔ he je.
9 Nɛ a to yɔkɔ ha lɛ ngɛ yayami peeli a kpɛti,
Nɛ benɛ e gbo ɔ, a pu lɛ kɛ piɛ niatsɛmɛ a he,*
Pohu e pee we yayami ko,*
Nɛ sisimi munyu ko hu ji e nya hyɛ.
10 Se e ji Yehowa suɔmi nya* kaa a fiaa lɛ ní, nɛ e ngmɛ blɔ nɛ e nu hiɔ.
Ke o maa ngɔ e wami* kɛ ha kaa fɔ yemi afɔle ɔ,
E maa na e nina a,* e ma ha nɛ e wami se maa kɛ,
Nɛ kɛ gu e nɔ ɔ, Yehowa suɔmi nya ní peemi maa ye manye.
11 Akɛnɛ e* ngɛ haoe he je ɔ, e maa na, nɛ e tsui maa nɔ e mi.
Ngɛ e nile ɔ nya a, dalɔ ɔ, nɛ ji ye sɔmɔlɔ ɔ
Ma ha nɛ nihi babauu ma ba pee dali,
Nɛ e maa tloo a tɔmi ɔmɛ.
12 Lɔ ɔ he je ɔ, ma ha lɛ he ko ngɛ nihi babauu a kpɛti,
Nɛ e kɛ he wali maa dla ta yibu ní
Ejakaa e kɛ e wami* fɔ si kɛ ya si gbenɔ mi
Nɛ a kane lɛ kɛ piɛɛ yayami peeli a he;
E tloo nihi babauu a he yayami,
Nɛ e da mi kɛ ha yayami peeli.