Yesaya
43 Amlɔ nɛ ɔ, nɔ́ nɛ Yehowa,
Nɔ nɛ e bɔ mo Yakob, nɔ nɛ e puɛ mo Israel ɔ ngɛ dee ji nɛ ɔ nɛ:
“Koo ye gbeye, ejakaa i kpɔ̃ mo.
I ngɔ o biɛ kɛ tsɛ mo.
Ye nɔ́ ji mo.
2 Ke o ngɛ nyu mi nyɛɛe ɔ, ma piɛɛ o he,
Nɛ ke o ngɛ pa mi nyɛɛe ɔ, e be o yi laae.
Ke o ngɛ la mi nyɛɛe ɔ, o be sãe,
Nɛ la lilɛ ɔ hu be mo sãe.
3 Ejakaa imi ji Yehowa o Mawu ɔ nɛ,
Israel Nɔ Klɔuklɔu ɔ, o Yi Wami Helɔ ɔ.
I ngɔ Egipt kɛ ha kaa kpɔmi nɔ́ ngɛ o he,
I ngɔ Etiopia kɛ Seba kɛ ha kɛ kpɔ̃ mo.
4 Ejakaa o he jua wa ngɛ ye hɛ mi,
I wo o hɛ mi nyami, nɛ i suɔ mo.
Lɔ ɔ he ɔ, ma ngɔ nihi kɛ ha ngɛ o nane mi
Nɛ ma ngɔ je mahi kɛ ha konɛ ma kɛ he o* yi wami.
5 Koo ye gbeye, ejakaa i kɛ mo ngɛ.
Ma ngɔ o nina* kɛ je puje he kɛ ba
Nɛ ma bua nyɛ tsuo nyɛ nya kɛ je pusinɔ he.
6 Ma de yiti je ke, ‘Ngmɛɛ a he!’
Nɛ ma de woyi je ke, ‘Koo tsi a nya.
Ngɔɔ ye binyumu ɔmɛ kɛ je tsitsaa lokoo kɛ ba, nɛ o ngɔ ye biyi ɔmɛ kɛ je zugba a nyagbe he ɔmɛ kɛ ba,
7 Nɔ fɛɛ nɔ nɛ a ngɔɔ ye biɛ kɛ tsɛɔ lɛ
Kɛ nɔ fɛɛ nɔ nɛ i bɔ lɛ kɛ wo ye hɛ mi nyami ɔ,
Nɔ nɛ i puɛ lɛ, nɛ i pee lɛ ɔ.’
8 Ngɔɔ nihi nɛ a ngɛ hɛngmɛ se a hyɛ we nɔ́,
Kɛ nihi nɛ a ngɛ tue se a tue nui nɔ́ ɔ kɛ ba.
9 Je ma amɛ tsuo nɛ́ a bua a he nya ngɛ he kake,
Nɛ ma amɛ nɛ a bua a he nya.
A kpɛti mɛnɔ ma nyɛ ma de nɔ́ nɛ ɔ?
Aloo anɛ a ma nyɛ ma ha nɛ waa nu kekle ní ɔmɛ lo?*
Á ngɔ a we odase yeli kɛ ba konɛ a kɛ ba tsɔɔ kaa a nɔ́ da,
Aloo nihi nɛ́ a nu nɛ a de ke, ‘E ji anɔkuale!’”
10 Yehowa ke, “Nyɛ ji ye we odasehi,
Ee, ye sɔmɔlɔ nɛ i hla,
Konɛ nyɛɛ le, nɛ nyɛ he mi nɛ nyɛɛ ye
Nɛ nyɛɛ nu sisi kaa i tsakee we.
A buɛ Mawu ko kɛ sɛ we ye hlami,
Nɛ ye se hu, eko be.
11 Imi—Imi ji Yehowa, nɛ ye se ɔ, kpɔlɔ ko be.”
12 “Imi lɛ i de to, imi lɛ i kpɔ̃ nyɛ, nɛ i ha nɛ a le
Be mi nɛ ma se mawu ko be nyɛ kpɛti.
Lɔ ɔ he ɔ, Yehowa ke, “Nyɛ ji ye we odasehi, nɛ imi ji Mawu.”
13 Jehanɛ se hu ɔ, i tsakee we;
Nɛ nɔ ko be nyɛe ma gblɔ nɔ́ ko kɛ je ye dɛ mi.
Ke i ngɛ nɔ́ ko pee ɔ, mɛnɔ ma nyɛ maa tsi ye nya?”
14 Nɔ́ nɛ Yehowa, nyɛ Kpɔlɔ ɔ, Israel Nɔ Klɔuklɔu ɔ ngɛ dee ji nɛ ɔ nɛ:
“Nyɛ he je ɔ, ma tsɔ kɛ ya Babilon nɛ a ma ya ku agbo se lami dade ɔmɛ tsuo kɛ pue si,
Nɛ Kaldeabi ɔmɛ ma fo ya boboobo ngɛ a mele ɔmɛ a mi.
15 Imi ji Yehowa, nyɛ Nɔ Klɔuklɔu ɔ, Israel Bɔlɔ ɔ, nyɛ Matsɛ ɔ.”
16 Nɔ́ nɛ Yehowa,
Nɔ nɛ e gba blɔ kɛ gu wo ɔ mi
Nɛ́ e gba blɔ kɛ gu nyu nɛ pee hamahama a mi,
17 Nɛ́ e jeɔ ta zugba lɛhi kɛ okpɔngɔhi kpo,
Nɛ́ e jeɔ tabo kɛ tatsɛmɛ nɛ a he wa tsuo kpo ɔ ngɛ dee ji nɛ ɔ nɛ:
“A maa hwɔ si nɛ a be si tee.
A maa gbe mɛ, a maa gbe mɛ kaa bɔ nɛ a gbeɔ kane mi tako nya la a.”
18 “Nyɛ ko kai blema ní ɔmɛ,
Nɛ nyɛ ko hi blema ní ɔmɛ a he susue.
19 Hyɛ! I ngɛ nɔ́ ehe ko pee;
Amlɔ nɛ ɔ po e ngɛ kpo jee.
Anɛ nyɛ tui he hɛ lo?
Ma ha nɛ blɔ maa fɔ si ngɛ nga a nɔ
Nɛ pahi maa be ngɛ nga kplanaa a nɔ.
20 Nga mi lohwehi maa wo ye hɛ mi nyami,
Nga mi gbehi kɛ dugumahi maa wo ye hɛ mi nyami,
Ejakaa ma ha nɛ nyu maa ba nga a nɔ,
Nɛ pahi maa hia ngɛ nga kplanaa a nɔ,
Kɛ ha ye ma a, ma nɛ i hla a, konɛ a nu,
21 Ma nɛ i to sisi kɛ ha ye he
Konɛ a je ye yi ɔ.
22 Se mo Yakob, o tsɛ we mi,
Ejakaa mo Israel ɔ, i gbe o nya.
23 O ngɔɛ jijɔ kɛ ba sɛ sami afɔlehi,
Nɛ o kɛ o we afɔle ɔmɛ wui ye hɛ mi nyami.
I nyɛ we o nɔ kaa o ngɔ nike ní ba ha mi,
Nɛ i doo we o nya kaa o ngɔ ohɛ ba ha mi.
24 O kɛ o sika he we glã nɛ jeɔ via ha mi,
Nɛ o ha we nɛ o we afɔle ɔ he zɔ ɔ nɛ́ e tɔ mi.
Mohu ɔ, o ha nɛ o he yayami ɔmɛ jiɔ ngɛ ye kuɛ nɔ
Nɛ pɔ tɔ ye he kɛ o tɔmi ɔmɛ.
25 Imi, imi nitsɛ lɛ i ngɛ o he yayami ɔmɛ* tsue ngɛ ye biɛ ɔ he je ɔ nɛ,
Nɛ i be o tɔmi ɔmɛ kaie hu.
26 Mo kai mi; ha nɛ waa kojo;
Moo bɔ o sane ɔ kɛ tsɔɔ kaa o nɔ́ da.
28 Lɔ ɔ he ɔ, ma ble nikɔtɔmahi nɛ a ngɛ he klɔuklɔu ɔ,
Nɛ ma ha nɛ a kpata Yakob hɛ mi
Nɛ ma ha nɛ a ma jɛ Israel.