Yesaya
12 Jamɛ a ligbi ɔ, bɔ fɛɛ bɔ nɛ ji ɔ, o ma de ke:
“Oo Yehowa, i naa mo si,
Ejakaa e ngɛ mi kaa o mi mi fu mi mohu lɛɛ,
Se bɔɔbɔɔbɔɔ ɔ, o we abofu ɔ nya ba si, nɛ o wo ye bua.
2 Hyɛ! Mawu ji ye yi wami helɔ.
Ma ngɔ ye hɛ kɛ fɔ e nɔ, nɛ i be gbeye yee;
Ejakaa Yah* Yehowa lɛ haa mi he wami kɛ nyɛmi,
Nɛ e ba pee ye yi wami helɔ.”
3 Nyɛɛ kɛ nyami ma sa nyu
Kɛ je yi wami hemi nyu hɛngmɛ ɔmɛ a mi.
4 Nɛ jamɛ a ligbi ɔ, nyɛ ma de ke:
“Nyɛɛ na Yehowa si, nyɛɛ wo e biɛ ta,
Nyɛ ha nɛ a le níhi nɛ e pee ɔ ngɛ ni ɔmɛ a kpɛti!
Nyɛ ha nɛ a le kaa a wo e biɛ ɔ nɔ gojoo.
5 Nyɛ la yi jemi lahi* kɛ ha Yehowa, ejakaa e pee ní nguanguahi.
Nyɛ ha nɛ a le nɔ́ nɛ ɔ ngɛ zugba a nɔ tsuo.
6 Nyɛ nihi* nɛ́ nyɛ ngɛ Zion, nyɛ kpa ngmlaa nɛ nyɛ nya,
Ejakaa Israel Nɔ Klɔuklɔu ɔ nɛ ngɛ nyɛ kpɛti ɔ kle.”