Hiob
11 Zofar nɛ́ je Naama a de ke:
2 “Anɛ nɔ ko be munyuhi babauu nɛ ɔmɛ a heto hae lo,
Aloo munyu fuu nɛ nɔ ko maa tu ɔ lɛ maa pee lɛ dalɔ lo?*
3 Anɛ o susu kaa munyu puu nɛ o ngɛ tue ɔ ma ha nɛ nihi nɛ a ma a nya lo?
Anɛ nɔ ko be o hɛ mi kãe ngɛ he fɛu yemi munyuhi nɛ o ngɛ tue ɔ a he lo?
4 Ejakaa o deɔ ke, ‘Ye ní tsɔɔmi ɔ da,
Nɛ ye he tsɔ ngɛ o hɛ mi.’
5 I ná jinɛ Mawu maa tu munyu
Nɛ́ e ma bli e nya mi kɛ tsɔɔ mo!
6 Jinɛ e ma je laami níhi nɛ ma ha nɛ o pee juɛmitsɛ ɔ kpo kɛ tsɔɔ mo,
Ejakaa juɛmi he níhi hiɛ babauu.
Kɛkɛ ɔ, o ma yɔse kaa Mawu ma e hɛ kɛ fɔ o tɔmi ɔmɛ ekomɛ a nɔ.
7 Anɛ o ma nyɛ maa nu Mawu níhi nɛ a mi kuɔ ɔmɛ a sisi,
Aloo o ma nyɛ maa nu nɔ́ fɛɛ nɔ́ nɛ kɔɔ Ope ɔ he ɔ sisi lo?*
8 E ya hiɔwe pe hiɔwe. Mɛni o ma nyɛ maa pee?
E mi kuɔ pe Yɔkɔ.* Mɛni o ma nyɛ maa le?
9 E ka pe zugba a
Nɛ e bli pe wo ɔ.
10 Ke e nu nɔ ko nɛ e kɛ lɛ ba kojomi he ɔ,
Mɛnɔ ma nyɛ maa tsi e nya?
11 Ejakaa ke adesahi ngɛ lakpa ye ɔ, e le.
Ke e na nɔ́ yayami ko ɔ, anɛ e be yɔsee lo?
12 Se ke nga mi teji ma nyɛ ma fɔ nɔmlɔ ɔ,*
Lɛɛ nɔ ko nɛ́ e be juɛmi hu maa nu nɔ́ sisi.
13 I ná jinɛ o dla o tsui
Nɛ́ o bli o dɛ mi kɛ tsɔɔ lɛ.
14 Ke o nine ngɛ yayami pee ɔ, je kɛ ya se kulaa.
Nɛ ko ha nɛ nɔ́ ko nɛ dɛ nɛ hi o bo tsu ɔmɛ a mi.
15 Kɛkɛ ɔ, o ma nyɛ ma wo o yi nɔ nɛ́ zo be mo pee;
O ma nyɛ maa da si kpɛii nɛ́ o be gbeye yee.
16 O hɛ maa je o haomi ɔ nɔ;
O be kaie hu kaa bɔ nɛ o be nyu nɛ be kɛ ho ɔ kaie hu ɔ.
17 O si himi ma kpɛ kaa piani katakata;
Nɛ diblii po ma kpɛ kaa mɔtu.
18 O ma ná nɔ mi mami ejakaa hɛnɔkami ngɛ,
Nɛ o maa hyɛ o he kɛ kpe nɛ o maa hwɔ si slɔkee.
19 O maa hwɔ si nɛ nɔ ko be o he gbeye woe,
Nɛ nihi fuu maa ba o ngɔ kaa o pee mɛ kpakpa.
20 Se yiwutsotsɛmɛ a hɛngmɛ ma yu;
Nɛ a be he ko nae nɛ́ a tu fo kɛ ya,
Nɛ gbenɔ* maa pee hɛnɔkami pɛ nɛ a ngɛ.”