La
Kɛ ha la nɔ hyɛlɔ ɔ; a kɛ fɔ̃ “Ko Kpata Hɛ Mi.” David la. Miktam.* Benɛ Saul tsɔ nihi kaa a ya hwɔɔ David we* ɔ nɛ́ a gbe lɛ ɔ.
59 Ao ye Mawu, mo kpɔ̃ mi ngɛ ye he nyɛli ɔmɛ a dɛ mi;
Moo po ye he piɛ ngɛ nihi nɛ teɔ si kɛ woɔ mi ɔ a he.
2 Mo kpɔ̃ mi ngɛ nihi nɛ a peeɔ yi wu tso ní ɔ a dɛ mi,
Nɛ́ o he ye yi wami kɛ je yiwutsotsɛmɛ* a dɛ.
3 Hyɛ! A woɔ ye* he ka;
Oo Yehowa, nihi nɛ a he wa tuaa mi,
Be mi nɛ i tsɔ we atuã nɛ́ i pee we yayami ko hulɔ.
4 E ngɛ mi kaa i pee we yayami ko mohu lɛɛ, se a he sɔɔ, nɛ a peeɔ klaalo kaa a ma tua mi.
Ke i tsɛ mo ɔ, moo te si nɛ o hyɛ nɔ́ nɛ a ngɛ mi pee ɔ.
5 Ejakaa mo ji Israel Mawu, Oo Yehowa, Mawu tabohiatsɛ.
O hɛ nɛ tsɛ̃ konɛ o ngɔ o juɛmi kɛ ya je ma amɛ tsuo a nɔ.
Koo na yiwutsotsɛmɛ nɛ a tsɔɔ nɔ se blɔ ɔ a ti nɔ ko nɔ ko mɔbɔ. (Sela)
6 Gbɔkuɛ fɛɛ gbɔkuɛ ɔ, a kpaleɔ a se kɛ baa;
A huãã* kaa gbehi, nɛ a nyɛɛɔ blɛuu kɛ bɔleɔ ma a.
7 Hyɛ, nɔ́ yaya jeɔ* a nya mi kɛ baa;
A nya mi munyu* ngɛ kaa klaate,
Ejakaa a deɔ ke: “Mɛnɔ ngɛ tue bue?”
8 Se mo Yehowa, o maa muɔ mɛ;
O maa ye je ma amɛ tsuo a he fɛu.
9 Oo ye Mawu, mo ji ye He Wami, ma ya nɔ nɛ ma hyɛ mo blɔ;
Ejakaa mo ji ye wesa he* nɛ ngɛ slɔkee.
10 Mawu ɔ nɛ jeɔ suɔmi nɛ se pui kpo kɛ tsɔɔ mi ɔ maa ye bua mi;
Mawu ma ha nɛ ma na ye he nyɛli ɔmɛ a nɔ kunimi nɛ a maa ye ɔ.
11 Ko kpata a hɛ mi, bɔ nɛ pee nɛ ye we bi ɔmɛ a hɛ nɛ ko je nɔ.
Mo ha nɛ a wo lalaalo ngɛ o he wami ɔ nya;
Oo Yehowa, wa tsɛ̃i, mo ha nɛ a nɔ si.
12 Ngɛ yayami nɛ a kɛ a nya peeɔ, kɛ a nya mi munyu he je ɔ,
Ha nɛ a he nɔ womi ɔ nɛ pee klama nɛ e du mɛ,
Ngɛ gbiɛmi kɛ nɔ sisimi munyuhi nɛ a tuɔ ɔ he je.
13 Mo kpata a hɛ mi ngɛ o we abofu ɔ mi;
Mo kpata a hɛ mi konɛ a laa gbidigbidi;
Ha nɛ a le kaa Mawu lɛ ngɛ Yakob nɔ yee, nɛ e ngɛ nɔ yee kɛ yaa su zugba a nyagbe he ɔmɛ. (Sela)
14 Ha nɛ a kpale a se kɛ ba gbɔkuɛ;
Ha nɛ a huã* kaa gbehi, nɛ́ a nyɛɛ blɛuu kɛ bɔle ma a.
15 Ha nɛ a wo lalaalo kɛ hla niye ní;
Ko ha nɛ a tɔ loo a ná hi he.
16 Se imi lɛɛ, ma la la nɛ kɔɔ o he wami ɔ he;
Mɔtu ɔ, i kɛ bua jɔmi maa tu o suɔmi nɛ se pui ɔ he munyu.
Ejakaa mo ji ye wesa he nɛ ngɛ slɔkee,
Kɛ he nɛ i tuɔ fo kɛ yaa ngɛ ye haomi be mi.
17 Oo Mawu, mo ji ye He Wami, ma la yi jemi lahi* ha mo,
Ejakaa Mawu ji ye wesa he nɛ ngɛ slɔkee, Mawu ɔ nɛ jeɔ suɔmi nɛ se pui kpo kɛ tsɔɔ mi ɔ.