Yeremia
13 Nɔ́ nɛ Yehowa de mi ji nɛ ɔ nɛ: “Yaa nɛ o ya he mlɛmi fimi nɔ́ nɛ a kɛ klala pee kɛ ha o he, nɛ o kɛ fĩ o mlɛmi se o ko ngɔ kɛ sɔ nyu mi.” 2 Lɔ ɔ he ɔ, i ya he mlɛmi fimi nɔ́ ɔ kaa bɔ nɛ Yehowa de ɔ, nɛ i kɛ fĩ ye mlɛmi. 3 Nɛ Yehowa kɛ mi tu munyu si enyɔne ke: 4 “Ngɔɔ mlɛmi fimi nɔ́ ɔ nɛ o he nɛ e ngɛ o mlɛmi ɔ, nɛ́ o te si nɛ o ya Yufrate Pa a nya nɛ o kɛ ya laa ngɛ tɛsa ko kpɛ ngɛ lejɛ ɔ. 5 Lɔ ɔ he ɔ, i kɛ ya laa ngɛ Yufrate Pa a nya kaa bɔ nɛ Yehowa fã mi ɔ.
6 Se ligbi babauu se ɔ, Yehowa de mi ke: “Tee si nɛ o ya Yufrate Pa a nya nɛ o ya ngɔ mlɛmi fimi nɔ́ ɔ nɛ i fã mo ke o kɛ ya laa ngɛ lejɛ ɔ kɛ ba.” 7 Lɔ ɔ he ɔ, i ho Yufrate Pa a nya ya, nɛ i ya tsua mlɛmi fimi nɔ́ ɔ kɛ je he nɛ i ngɔ kɛ laa ngɛ ɔ, nɛ i na kaa mlɛmi fimi nɔ́ ɔ puɛ; e be hie kɛ nɔ́ ko peemi hu.
8 Kɛkɛ nɛ Yehowa kɛ mi tu munyu nɛ e de mi ke: 9 “Nɔ́ nɛ Yehowa de ji nɛ ɔ nɛ, ‘Kikɛ ji bɔ nɛ ma pee Yuda he nɔ womi ɔ kɛ Yerusalem he nɔ womi babauu ɔ nɛ. 10 Nimli yiwutsotsɛmɛ nɛ ɔmɛ nɛ́ a bui ye munyu tue, nɛ́ a kɛ tue mi timi nyɛɛ mɛ nitsɛmɛ a tsui se, nɛ́ a ngɛ mawu kpahi a se nyɛɛe, nɛ́ a ngɛ mɛ sɔmɔe nɛ́ a ngɛ si kplãe ha mɛ ɔ, maa pee kaa mlɛmi fimi nɔ́ nɛ ɔ nɛ e hí kɛ nɔ́ ko peemi ɔ.’ 11 ‘Ejakaa kaa bɔ nɛ mlɛmi fimi nɔ́ mɛtɛɔ nɔ mlɛmi kpɛii ɔ, jã nɛ i kɛ Israel we ɔ tsuo kɛ Yuda we ɔ tsuo mɛtɛ ye he, bɔ nɛ pee nɛ a pee ye we bi, ye biɛ, ye yi jemi kɛ nɔ́ ko nɛ ngɛ fɛu ha mi. Se a bui mi tue.’ Yehowa lɛ de.
12 “Moo ngɔ sɛ gbi nɛ ɔ hu kɛ ha mɛ ke, ‘Nɔ́ nɛ Yehowa Israel Mawu ɔ de ji nɛ ɔ nɛ: “Nyɛ ha nɛ buɛ nguahi tsuo nɛ a hyi kɛ wai.”’ Se a ma de mo ke, ‘Anɛ wɔɔ lɛɛ wa li kaa e sa nɛ wa ha nɛ buɛ nguahi tsuo nɛ a hyi kɛ wai lo?’ 13 Kɛkɛ ɔ, mo de mɛ ke, ‘Nɔ́ nɛ Yehowa de ji nɛ ɔ nɛ: “Ma ha nɛ nihi tsuo nɛ a ngɛ zugba nɛ ɔ nɔ, matsɛmɛ nɛ a hi David matsɛ sɛ ɔ nɔ, osɔfo ɔmɛ, gbali ɔmɛ kɛ nihi tsuo nɛ a ngɛ Yerusalem ma a mi ɔ nɛ́ a de dã kpɔtɔɔ. 14 Nɛ ma nuu mɛ kɛ fiaa a sibi, ma pee tsɛmɛ kɛ bimɛ jã nɔuu, ye mi mi be mi sãe ngɛ a he, i be aywilɛho yee nɛ i be mɛ mɔbɔ nae; nɔ́ ko nɔ́ ko be nyɛe maa tsi ye nya nɛ ma ko kpata a hɛ mi,” Yehowa lɛ de.
15 Nyɛ ta tue nɛ nyɛɛ nu.
Nyɛ ko wo nyɛ he nɔ, ejakaa Yehowa munyu ji nɛ ɔ nɛ.
16 Nyɛɛ kɛ hɛ mi nyami nɛ ha Yehowa nyɛ Mawu ɔ
Loko e ha nɛ diblii nɛ wo
Loko nyɛ nane nɛ tɛ nɔ́ ngɛ yoku ɔmɛ a nɔ benɛ je ngɛ jɔe.
Nyɛ maa hyɛ la blɔ,
Se e kɛ diblii lɛ maa ba;
E ma ha nɛ e pee diblii kpii.
17 Se ke nyɛ bui tue ɔ,
Ma fo ya ngɛ laami mi ngɛ nyɛ he nɔ womi ɔ he je.
Ma fo ya* wawɛɛ, nɛ vonyu maa be ngɛ ye hɛ mi,
Ejakaa a nuu Yehowa to kuu ɔ nyɔguɛ kɛ je.
18 Mo de matsɛ ɔ kɛ manyɛ ɔ ke, ‘Nyɛɛ hi si ngɛ he nɛ ba si,
Ejakaa nyɛ jlasi nɛ ngɛ fɛu ɔ maa je nyɛ yi kɛ nɔ si.’
19 A nga woyi je ma amɛ a nya,* nɛ nɔ ko be nɛ ma bli a nya.
A nuu Yudabi ɔmɛ tsuo kɛ ho nyɔguɛ tso mi ya, a nuu mɛ tsuo kɛ ho.
20 Mo wo o hɛngmɛ nɔ nɛ o hyɛ nihi nɛ a je yiti je kɛ ma a.
To kuu ɔ nɛ a kɛ wo o dɛ ɔ, o jijɔ nɛ he ngɛ fɛu ɔ, jije a ngɛ?
21 O huɛmɛ nɛ o kɛ mɛ wa, nɛ nyu bi ngɛ nyɛ kpɛti ɔ
Ke a gbla o tue ɔ, mɛni o ma de?
Anɛ o he mi be mo kɔ̃ɔe kaa yo nɛ nu kɔɔmi nɛ e piɛ bɔɔ nɛ e ma fɔ lo?
22 Nɛ ke o de ngɛ o tsui mi ke, ‘Mɛni he je lɛ ní nɛ ɔmɛ ba ye nɔ ɔ?’
Mo ná nɛ o le kaa, o yayami babauu ɔ he je lɛ a je tade ngɛ o he
Nɛ o nane se ja* hu ngɛ mo yee ɔ nɛ.
23 Anɛ Kushno* ma nyɛ ma tsake e he womi nɔ su lo, aloo ngatsɛ ma nyɛ ma tsake bɔ nɛ e he pee tuubɛtuubɛ* ɔ lo?
Ke jã a, lɛɛ nyɛ hu nyɛ ma nyɛ maa pee kpakpa,
Nyɛ nɛ a tsɔse nyɛ kaa nyɛɛ pee yayami ɔ.
24 Enɛ ɔ he ɔ, ma gbɛ mɛ kɛ fĩa kaa nga nɛ nga kplanaa nɔ kɔɔhiɔ fia kɛ yaa.
25 O blɔ fa mi nɔ́ ji nɛ ɔ nɛ, o blɔ fa mi nɔ́ nɛ i susu ha mo,
Ejakaa o hɛ je ye nɔ nɛ o he lakpa munyuhi ye,” Yehowa lɛ de.
26 “Enɛ ɔ he ɔ, ma wo o tade ɔ nɔ kɛ bu o yi,
Nɛ a maa na o hɛ mi si puemi ɔ,
27 O gba puɛmi ní peepee ɔmɛ kɛ o akɔnɔ yaya a ngɛ kaa okpɔngɔ nɛ ngɛ pɛe kɛ ngɛ eyo hlae nɛ e kuɔ,
Kɛ o we ajuama bɔmi nɛ ngɛ tai* ɔ.
I na o subai yaya a
Ngɛ kpongu ɔmɛ kɛ ngmɔ ɔmɛ a nɔ.
Oo Yerusalem, kpoo ha mo!
Kɛ yaa si mɛni be lɛ o maa ya nɔ maa wo o he mu?”