Yesaya
22 Munyu nɛ a tu kɛ si Nina Dɔgba* a ji nɛ ɔ nɛ:
Mɛni lɛ pee mo nɛ́ lɔ ɔ he je ɔ, o we bi ɔmɛ tsuo kuɔ kɛ ho tsu yi mi ya a?
2 Ma nɛ o mi tsuo pee hoo kɛ ngmlaa,
Ma nɛ o mi ngɛ gidigidi, nɛ a ngɛ ose hee ngɛ mi.
Tsa pi klaate nɛ a kɛ gbe o we bi ɔmɛ,
Nɛ a gbo we ngɛ ta mi hulɔ.
3 O nɔ yeli nɛ a yi mi wa a tsuo pee kake kɛ tu fo.
Nihi nuu mɛ nyɔguɛ be mi nɛ a hɛɛ we tsɛ̃i po.
A nuu ni nɛmɛ nɛ a na a tsuo nyɔguɛ
E ngɛ mi kaa a tu fo kɛ ho se tsitsaa ya.
4 Lɔ ɔ he je nɛ i de ke: “Nyɛ je nyɛ he ngɛ ye he,
Nɛ́ ma fo ya wawɛɛ ɔ nɛ.
Nyɛ ko de ke doo nyɛ maa wo ye bua
Ngɛ ye we bi ɔmɛ a biyo ɔ* hɛ mi kpatami ɔ he je.
5 Ejakaa e ji basabasa peemi, kunimi yemi, kɛ tsui pomi ligbi
Nɛ je Nyɔmtsɛ Matsɛ Yehowa tabohiatsɛ ɔ ngɔ,
Ngɛ Nina Dɔgba a mi.
A ku gbogbo ɔ
Nɛ ni ɔmɛ a ya fomi ɔ ya su yoku ɔ nɔ.
6 Elambi ɔmɛ wo a kɛ̃ɛ̃ mi bi gbaja a
Nɛ a ma kɛ ta zugba lɛhi kɛ okpɔngɔhi,*
Nɛ Kir je nɔ́ nɛ ha e tsɛ̃i ɔ he ɔ.*
7 Nɛ o dɔgbahi nɛ a se be ɔmɛ
A mi ma hyi tɔ kɛ ta zugba lɛhi,
Nɛ okpɔngɔ* ɔmɛ ma ba da o we agbo ɔ nya,
8 Nɛ a ma je Yuda hɛ mi hami nɔ́ ɔ.*
“Jamɛ a ligbi ɔ, o ma plɛ o hɛ kɛ tsɔɔ ta hwumi níhi a to he nɛ ngɛ Hue Tso We ɔ mi ɔ, 9 Nɛ o maa na kaa David Ma a gbogbo ɔ hehi fuu gba. Nɛ o ma sa nyu ngɛ taku nɛ ngɛ sisi ɔ mi. 10 Nyɛ maa kane wehi nɛ a ngɛ Yerusalem ɔ, nɛ nyɛ maa hule we ɔmɛ konɛ nyɛ kɛ dla gbogbo ɔ. 11 Nɛ nyɛ maa pee nyu tomi nɔ́ agbo ko ngɛ gbogbo enyɔ ɔmɛ a kpɛti kɛ ha nyu nɛ ngɛ taku momo ɔ mi ɔ, se nyɛ be e Bɔlɔ* Ngua a hyɛe, nɛ nyɛ be nɔ nɛ e pee blema lokoo ɔ nae.
12 Jamɛ a ligbi ɔ, Nyɔmtsɛ Matsɛ Yehowa tabohiatsɛ ɔ
Ma tsɛ nihi konɛ a ba fo ya nɛ a ye aywilɛho,
A ma kpa a yi, nɛ a maa ha kpekpe.
13 Se nyɛ ngɛ nyae nɛ nyɛ ngɛ nyɛ hɛja jee,
Nyɛ gbeɔ nahi, nɛ nyɛ gbeɔ jijɔhi,
Nyɛ yeɔ lo, nɛ nyɛ nuɔ wai
Nyɛ deɔ ke, ‘nyɛ ha nɛ waa ye ní nɛ waa nu ní, ejakaa hwɔɔ pɛ wa ma gbo.
14 Kɛkɛ nɛ Yehowa tabohiatsɛ ɔ wo ye tue nɔ ke: “‘A be yayami nɛ ɔ kpatae ha nyɛ kɛ ya si be nɛ nyɛ ma gbo,’ Nyɔmtsɛ Matsɛ Yehowa tabohiatsɛ ɔ lɛ de.”
15 Nɔ́ nɛ Nyɔmtsɛ Matsɛ Yehowa tabohiatsɛ ɔ de ji nɛ ɔ nɛ: “Yaa we nɔ hyɛlɔ Shebna, nɔ nɛ e hyɛɔ we* ɔ nɔ ɔ ngɔ, nɛ o de lɛ ke, 16 Mɛni o ngɛ hlae ngɛ hiɛ ɔ, nɛ o mɛnɔ lɛ ngɛ hiɛ ɔ nɛ lɔ ɔ he je o kpɛ nɔ pumi he ha o he ngɛ hiɛ ɔ?’ E ngɛ e pumi he kpɛe ngɛ he nɛ ya hiɔwe; e ngɛ e he jɔɔmi he* kpɛe ngɛ tɛ puɔ mi. 17 Oo adesa, hyɛ, Yehowa maa nu mo kɛ fia si, nɛ e maa tsi o nya pani nya. 18 E maa fi mo lokotoo kaa bɔɔlu, nɛ e ma sake mo ngɔ fɔ zugba gbajaa ko nɔ. Lejɛ ɔ o ma gbo ngɛ, nɛ lejɛ ɔ o ta zugba lɛhi nɛ a hɛ mi ngɛ nyami ɔ maa hi, nɛ e maa pee hɛ mi si puemi kɛ ha o nyɔmtsɛ ɔ we ɔ. 19 Nɛ ma je mo kɛ je o blɔ he ɔ, nɛ ma kpɔ̃ o ní tsumi ɔ ngɛ o dɛ.
20 “‘Jamɛ a ligbi ɔ, ma tsɛ ye sɔmɔlɔ Eliakim, Hilkia binyumu ɔ, 21 nɛ ma ngɔ o tade klɔii ɔ kɛ wo lɛ, nɛ ma ngɔ o mlɛmi fimi nɔ́ ɔ kɛ fi e mlɛmi wawɛɛ, nɛ ma ngɔ o he wami ɔ kɛ wo e dɛ. Nɛ e maa pee tsɛ kɛ ha Yerusalembi ɔmɛ kɛ Yuda we ɔ. 22 Nɛ ma ngɔ David we ɔ safe ɔ kɛ fɔ e konɔ. E ma bli nɛ nɔ ko be ngae; e ma nga nɛ nɔ ko be blie. 23 Ma ka lɛ kaa tso plɛɛko kɛ wo he ko nɛ nɔ ko be nyɛe ma hia, nɛ e ma ba pee matsɛ sɛ nɛ e hɛ mi ngɛ nyami kɛ ha e tsɛ we ɔ. 24 Nɛ a maa ngɔ e tsɛ we ɔ hɛ mi nyami ɔ,* sisi bimɛ ɔmɛ kɛ nina a,* kplu wawi ɔmɛ tsuo, tsesi ɔmɛ, kɛ buɛ ngua amɛ tsuo kɛ kpla e he.
25 “Yehowa tabohiatsɛ ɔ ke, ‘jamɛ a ligbi ɔ, a maa hia tso plɛɛko ɔ nɛ a ka kɛ wo he ko nɛ be hie jemi ɔ, a maa po kɛ fɔ si, nɛ e maa nɔ si, nɛ níhi tsuo nɛ a kɛ kpla heɔ maa je pue si nɛ a hɛ mi ma kpata, ejakaa Yehowa nitsɛ lɛ de.’”