Yesaya

20 Jeha nɛ Asiria matsɛ Sargon tsɔ Tartan* kɛ ya Ashdod ɔ, e kɛ Ashdod hwu nɛ e ngɔ ma a. 2 Jamɛ a be ɔ, Yehowa tu munyu kɛ gu Amoz binyumu Yesaya nɔ ke: “Ya je kpekpe ɔ ngɛ o mlɛmi, nɛ́ o je tokota nɛ ngɛ o nane si ɔ.” Nɛ e pee jã, e hɛɛ e he gu* kɛ ngɛ nyɛe nɛ e wui tokota.

3 Kɛkɛ nɛ Yehowa de ke: “Kaa bɔ nɛ ye sɔmɔlɔ Yesaya hɛɛ e he gu nɛ e nyɛɛ nane si gu jeha etɛ kaa okadi, kɛ tsɔɔ nɔ́ nɛ maa ba Egipt kɛ Etiopia nɔ ɔ, 4 Jã kɛ̃ nɛ Asiria matsɛ ɔ maa nyɛɛ nihi nɛ e nuu mɛ nyɔguɛ kɛ je Egipt kɛ Etiopia a hɛ mi, nihewi kɛ nimowi tsuo maa hɛɛ a he gu nɛ a maa nyɛɛ nane si gu, nɛ a supa nya maa fɔ si gu, Egipt maa hɛɛ e he gu.* 5 Nɛ a maa ye gbeye nɛ a hɛ mi ma pue si ngɛ a hɛ nɛ a kɛ fɔ Etiopia nɔ, kɛ Egipt nɛ a kɛ woɔ a he nɔ ɔ he je.* 6 Jamɛ a ligbi ɔ, nihi nɛ a ngɛ wo nɛ ɔ nya a ma de ke, ‘Hyɛ nɔ́ nɛ ba nɔ nɛ wa ngɔ wa hɛ kɛ fɔ e nɔ, nɛ wa tu fo kɛ ya e ngɔ konɛ e ye bua wɔ nɛ e kpɔ̃ wɔ kɛ je Asiria matsɛ ɔ dɛ mi ɔ nɔ! Amlɔ nɛ ɔ, kɛ wa ma plɛ kɛ je e dɛ ha kɛɛ?’”