Yesaya
16 Nyɛɛ ngɔ agbosu kɛ ya ha zugba a nɔ yelɔ ɔ,
Nyɛɛ ngɔ kɛ je Sela kɛ gu nga a nɔ
Kɛ ya Zion biyo ɔ yoku ɔ nɔ.
2 Kaa bɔ nɛ lohwe pɛlitsɛ nɛ a fiee lɛ ngɛ e tsu he ngɛ ɔ,
Jã nɛ Moab biyi ɔmɛ maa pee ngɛ Arnon pa pomi he ɔmɛ.
3 “Nyɛɛ wo ga, nɛ nyɛ tsu yi mi kpɔ mwɔmi ɔ he ní.
Piani katakata a, nyɛ ha nɛ nyɛ hɔ̃ ɔ nɛ pee kaa nyɔ mi.
Nihi nɛ a gbɛ fĩa a, nyɛɛ laa a nɔ, nɛ nyɛ ko tsɔɔ nihi nɛ a ngɛ fo tue ɔ a se blɔ.
4 Oo Moab, ha nɛ ye nihi nɛ a gbɛ fĩa a nɛ a hi o mi.
Moo pee a laami he ngɛ hɛ mi kpatalɔ ɔ he je.
Yi mi walɔ ɔ nyagbe maa ba,
Hɛ mi kpatami ɔ maa ba nyagbe,
Nɛ nihi nɛ a naa ni kpahi a nɔ ɔ, a hɛ mi ma kpata kɛ je zugba a nɔ.
5 Kɛkɛ ɔ, a maa ngɔ matsɛ sɛ kɛ ma si kpɛii ngɛ suɔmi nɛ se pui mi.
Nɔ nɛ hii si ngɛ nɔ ngɛ David bo tsu ɔ mi ɔ maa ye anɔkuale;
E kɛ dami sane yemi maa kojo, nɛ e kɛ oya yemi ma tsu dami he ní.”
6 Wa nu Moab he nɔ womi ɔ he, e woɔ e he nɔ wawɛɛ.
Wa nu e pupuupu peemi ɔ, kɛ e he nɔ womi ɔ, kɛ e we abofu ɔ he;
Se munyu puu nɛ e tuɔ ɔ maa pee yaka.
7 Lɔ ɔ he ɔ, Moab maa ye aywilɛho ngɛ e we amanehlu he;
Mɛ tsuo a maa ye aywilɛho.
Nihi nɛ a fiaa mɛ ní ɔ ma fo ya ngɛ Kir Hareset wai yiblii keeki ɔmɛ a he.
8 Ejakaa Heshbon kpongu ɔmɛ a nɔ gbli,
Sibma wai tso ɔmɛ gbli,
Je ma amɛ a nɔ yeli ɔmɛ naa e kɔnihi nɛ a wo wai yiblii tsutsu ɔ nɔ;
E kɔni ɔmɛ ya su Yazer tɔɔ;
E kɔni ɔmɛ ka kɛ ya su nga a nɔ.
Kɔnihi nɛ e tsɛ̃ ɔ ya su wo ɔ nya tɔɔ.
9 Lɔ ɔ he je nɛ ma fo Sibma wai tso ɔ he ya kaa bɔ nɛ i fo Yazer he ya a nɛ.
Oo Heshbon kɛ Eleale, ma ngɔ ye vonyu kɛ pɔ nyɛ,
Ejakaa ngmlaa nɛ a kpaa ngɛ nyɛ mawulɛ be mi tso yiblii he kɛ ngmlaa nɛ a kpaa ngɛ nyɛ ní kpami he ɔ se po.*
10 A ha nɛ bua jɔmi kɛ nyami se po ngɛ zugba kɛ e nɔ tsohi nɛ woɔ yiblii ɔ nɔ,
Nɛ a la we bua jɔmi lahi ngɛ wai ngmɔ ɔmɛ a mi, nɛ jã kɛ̃ nɛ a kpa we ngmlaa ngɛ a mi hulɔ.
Nɔ nɛ naa wai nɔ ɔ naa we wai nɔ ngɛ wai ngami he ɔmɛ hu,
Ejakaa i ha nɛ ngmlaa kpami ɔ se po.
11 Lɔ ɔ he je nɛ ye mi mi ngɛ pɛe ngɛ Moab he,
Kaa kpa saku nɛ a ngɛ fiae ɔ nɛ,
Nɛ i hao ngɛ Kir Hareset he ngɛ ye mi tɔɔ ɔ nɛ.
12 Ke Moab hao e he nɛ e ya sɔmɔ ngɛ he nɛ ya hiɔwe ɔ, nɛ e ya sɔle ngɛ e jami he ɔ po, e be nɔ́ ko náe.
13 Yehowa tu munyu nɛ ɔ ngɛ Moab he be ko nɛ be. 14 Nɛ amlɔ nɛ ɔ, nɔ́ nɛ Yehowa ngɛ dee ji nɛ ɔ nɛ: “Ngɛ jeha etɛ mi, kaa bɔ nɛ apaatsɛ buɔ jeha a,* a kɛ haomi slɔɔtohi fuu ma pue Moab hɛ mi si, nɛ nihi nɛ maa piɛ ɔ a he be hiɛe kulaa, nɛ a he hu be wae.”