La
135 Nyɛ je Yah yi!*
Nyɛ je Yehowa biɛ ɔ yi;
Nyɛ Yehowa sɔmɔli, nyɛ je e yi,
2 Nyɛ nihi nɛ nyɛ daa si ngɛ Yehowa we ɔ,
Ngɛ wa Mawu ɔ we ɔ yale ɔ mi ɔ.
3 Nyɛ je Yah yi, ejakaa Yehowa hi.
Nyɛ la yi jemi lahi* kɛ ha e biɛ ɔ, ejakaa e biɛ ɔ ngɔ.
4 Ejakaa Yah hla Yakob kɛ ha e he,
E hla Israel kaa e weto ní klɛdɛɛ.*
5 I le wawɛɛ kaa Yehowa kle;
Wa Nyɔmtsɛ ɔ kle pe mawu kpahi tsuo.
6 Yehowa peeɔ nɔ́ fɛɛ nɔ́ nɛ e suɔ kaa e maa pee
Ngɛ hiɔwe kɛ zugba a nɔ, ngɛ wo ɔ kɛ muɔ voo ɔmɛ tsuo a mi.
7 E haa nɛ bɔku* teɔ si kɛ jeɔ zugba a nyagbe he ɔmɛ;
E pee oslabai* kɛ ha hiɔmi;
E jeɔ kɔɔhiɔ kpo kɛ jeɔ e nito he ɔmɛ.
8 E gbe kekleekle bimɛ tsuo ngɛ Egipt,
Nimli kɛ lohwehi tsuo.
9 Oo Egipt, e tsɔ okadihi kɛ nyakpɛ níhi kɛ ba o mi,
Kɛ si Farao kɛ e sɔmɔli ɔmɛ tsuo.
10 E kpata je mahi fuu a hɛ mi,
Nɛ e gbe matsɛmɛ nɛ a he wa
11 E gbe Amorbi ɔmɛ a matsɛ Sihon,
Bashan matsɛ Og,
Nɛ e kpata Kanaan matsɛ yemi ɔmɛ tsuo a hɛ mi.
12 E ngɔ a zugba a kɛ ha kaa weto ní,
Kaa e ma Israel weto ní.
13 Oo Yehowa, o biɛ ɔ ngɛ kɛ yaa neneene.
Oo Yehowa, biɛ nɛ o he* ɔ ngɛ yi nɔhi tsuo.
14 Ejakaa Yehowa ma fã e we bi a he,
Nɛ e mi mi maa sã lɛ* ngɛ e sɔmɔli ɔmɛ a he.
15 Je ma amɛ a we amaga amɛ ji sika hiɔ kɛ sika tsu,
A ji adesa nine nya ní tsumihi.
16 A ngɛ nya, se a tui munyu;
A ngɛ hɛngmɛ, se a hyɛ we nɔ́;
17 A ngɛ tue, se a nui nɔ́.
Mumi ko hu a wui.
18 Nihi nɛ pee amaga amɛ ɔ ma ba pee kaa amaga amɛ nɔuu,
Nɛ nihi nɛ a ngɔɔ a hɛ kɛ fɔɔ amaga amɛ a nɔ ɔ hu, maa pee kaa amaga amɛ kɛ̃.
19 Oo Israel we, nyɛ je Yehowa yi.
Oo Aaron we, nyɛ je Yehowa yi.
20 Oo Levi we, nyɛ je Yehowa yi.
Nyɛ nihi nɛ nyɛ yeɔ Yehowa gbeye, nyɛ je Yehowa yi.
21 Á je Yehowa yi kɛ je Zion,
Á je nɔ nɛ ngɛ Yerusalem ɔ yi.
Nyɛ je Yah yi!