Yesaya
29 Musu tloo Ariel,* Ariel, ma nɛ David ya to si ngɛ mi ɔ!
Nyɛɛ ya nɔ nɛ nyɛɛ ye gbijlɔhi nɛ nyɛ yeɔ daa jeha a;
Nyɛɛ ye jeha fɛɛ jeha.
2 Se ma ngɔ haomi kɛ ba Ariel nɔ,
E maa ye aywilɛho nɛ e maa ye kɔmɔ,
Nɛ e maa pee kaa Mawu afɔle sami latɛ kɛ ha mi.
4 A ma je mo ngɔ fia si;
Nɛ o maa tu munyu kɛ je zugba,
Nɛ bunyuku ma ha nɛ munyu nɛ o tuɔ ɔ be kpo jee.
A maa nu o gbi kɛ je zugba
Kaa ní peelɔ gbi,
Nɛ o gbi maa pɛ kɛ je bunyuku ɔ mi kaa lohwe pɛlitsɛ pɛmi.
5 O he nyɛli ɔmɛ* a he maa hiɛ babauu kaa bunyuku,
Nɛ nihi nɛ a waa mo yi mi ɔ maa hiɛ babauu kaa tsakati* nɛ kɔɔhiɔ muɔɔ kɛ yaa.
Nɛ e maa ba tlukaa, e maa ba si kake too.
6 Yehowa tabohiatsɛ ɔ maa ngɔ
Hiɔwe simi kɛ zugba mimiɛmi kɛ ngmlaa nɛ nya wa,
Kɛ kɔɔhiɔ nɛ nya wa kɛ ahumi kɛ la nɛ kpataa nɔ́ hɛ mi kɛ kpɔ̃ mo.”
7 Kɛkɛ ɔ, je mahi babauu nɛ a kɛ Ariel ngɛ ta hwue ɔ
—Nihi tsuo nɛ a kɛ lɛ ngɛ ta hwue ɔ,
Ma yi sami mɔhi nɛ a fia kɛ wo e he ɔ,
Kɛ nihi nɛ a kɛ haomi ngɛ e nɔ bae ɔ—
Maa pee kaa nlami, kaa nina nɛ a na nyɔ mi.
8 Ee, e maa pee kaa nɔ ko nɛ e ngɛ nlae nɛ e ngɛ ní yee,
Se e hɛ tsɛ̃ kɛ hwɔ,*
Nɛ e maa pee kaa nɔ ko nɛ kuma ngɛ lɛ yee, nɛ́ e nla nɛ e ngɛ nyu nue,
Se e hɛ tsɛ kɛ pɔtɔtɔɛ, nɛ kuma ngɛ lɛ yee kɛ mwɔɔ.*
Jã nɛ e maa ba ngɛ je mahi babauu
Nɛ a kɛ Zion Yoku ɔ ngɛ hwue ɔ a blɔ fa mi.
9 O he mi nɛ po, nɛ e pee mo nyakpɛ
Nyɛɛ ngɔ nɔ́ kɛ ha nyɛ hɛngmɛ nɔ, nɛ nyɛ hɛngmɛ nɛ yu.
A de, se pi wai nɛ ngɛ mɛ dee
A ngɛ dedee, se pi dã nɛ nya wa nɛ ha nɛ a ngɛ dedee.
10 Ejakaa Yehowa plɛ mahe vii mumi kɛ pue o nɔ;
E ma nyɛ hɛngmɛ, nɛ ji nyɛ gbali ɔmɛ,
Nɛ e ngɔ nɔ́ kɛ ha nyɛ yi nɔ, nɛ ji nyɛ ní nali ɔmɛ.
11 Nina fɛɛ nina ba peeɔ kaa munyu nɛ ngɛ womi nɛ a sɔu nya mi kɛ ha nyɛ. Ke a kɛ ha nɔ ko nɛ e le ní kanemi, nɛ a de lɛ ke: “I kpa mo pɛɛ nɛ o kane nɔ́ nɛ ɔ nɛ e je kpo ɔ,” e ma de ke “I be nyɛe, ejakaa a sɔu nya.” 12 nɛ ke a kɛ womi ɔ ha nɔ ko nɛ e li ní kanemi, nɛ a de lɛ ke: “I kpa mo pɛɛ nɛ o kane nɔ́ nɛ ɔ,” e ma de ke: “I li ní kanemi kulaa.”
13 Yehowa ke: “Nimli nɛ ɔmɛ kɛ a nya deɔ ke a jaa mi
Nɛ a kɛ a nya woɔ ye hɛ mi nyami,
Se a tsui lɛɛ, e je ye he kɛ ho se ya tsitsaa;
Nɛ a daa nimli a mlaa nɛ a tsɔɔ mɛ ɔ nɔ kɛ yeɔ mi gbeye.
14 Enɛ ɔ he ɔ, ma ha nɛ nyakpɛ nɔ́ ko maa ba ma nɛ ɔ nɔ ekohu,
Nyakpɛ ní maa nyɛɛ nyakpɛ ní se;
Nɛ juɛmitsɛmɛ ɔmɛ a juɛmi ɔ maa pee yaka,
Nɛ ní leli ɔmɛ a nɔ́ sisi numi ɔ maa laa.”
15 Musu tloo nihi nɛ a peeɔ nɔ́ fɛɛ nɔ́ nɛ a ma nyɛ kaa a kɛ a ga tomi ɔmɛ maa laa Yehowa.
A peeɔ a ní ɔmɛ ngɛ diblii mi,
Nɛ a deɔ ke: Mɛnɔ lɛ na wɔ?
Mɛnɔ le nɔ́ nɛ wa ngɛ pee ɔ?
16 Nyɛ plɛɔ níhi a yi ngɔ kaa si!*
Anɛ e sa kaa a bu buɛ puɛlɔ kaa bɔ nɛ a buɔ zu ɔ lo?
Anɛ e sa kaa nɔ́ nɛ a puɛ ɔ nɛ́ e de nɔ nɛ puɛ lɛ ɔ ke:
“Tsa pi lɛ nɛ e puɛ mi lo?”
Anɛ e sa kaa nɔ́ nɛ a pee ɔ, nɛ e de nɔ nɛ e pee lɛ ɔ ke:
“E li nɔ́ ko nɔ́ ko lo”?
17 E piɛ bɔɔ nɛ Lebanon ma plɛ pee abɔɔ,
Nɛ a maa bu abɔɔ ɔ kaa hue tso.
18 Jamɛ a ligbi ɔ, tuekpokutsɛmɛ maa nu womi ɔ mi munyuhi,
Nɛ hɛ yuyuili nɛ a ngɛ diblii kpii mi ɔ a hɛngmɛ maa hyɛ nɔ́.
19 Nihi nɛ a he jɔ ɔ ma nya wawɛɛ ngɛ Yehowa mi,
Nɛ ohiatsɛmɛ nɛ a ngɛ ni ɔmɛ kpɛti ɔ ma nya ngɛ Israel Nɔ Klɔuklɔu ɔ mi.
20 Ejakaa nɔ nɛ yi mi wa be si hie hu,
Nɛ fialɔ nyagbe maa ba,
Nɛ nihi tsuo nɛ a peeɔ klaalo kaa a maa ye awi ɔ, a hɛ mi ma kpata,
21 Nihi nɛ a tuɔ lakpa munyu kɛ haa nɛ nihi yeɔ fɔ,
Nɛ a tsɔɔ nɔ nɛ fãa lɛ nitsɛ e he* ngɛ ma a agbo ɔ nya a klama,
Nɛ a guɔ nya sami nɛ se nami be he nɔ kɛ buɔ dalɔ fɔ ɔ.
22 Lɔ ɔ he ɔ, nɔ́ nɛ Yehowa, nɔ nɛ e kpɔ̃ Abraham ɔ ngɛ Yakob we ɔ dee ji nɛ ɔ nɛ:
Zo be Yakob gbee hu,
Nɛ e hɛ mi be si puee hu.*
23 Ejakaa ke e na e bimɛ ɔmɛ
Nɛ a ji ye nine nya ní tsumi ɔ ngɛ e mi ɔ,
A maa wo ye biɛ ɔ hɛ mi nyami;
Ee, a maa wo Yakob Nɔ Klɔuklɔu ɔ hɛ mi nyami,
Nɛ a maa ye Israel Mawu ɔ gbeye.
24 Nihi nɛ a tla blɔ ngɛ a juɛmi mi ɔ maa nu nɔ́ sisi,
Nɛ nihi nɛ a tuɔ nɔ́ he munyu ɔ maa kplɛɛ blɔ tsɔɔmi nɔ.”