Ezekiel

36 Nɛ mo, nɔmlɔ bi, moo gba kɛ kɔ Israel yoku ɔmɛ a he, nɛ o de ke, ‘Oo Israel Yokuhi, nyɛɛ bu Yehowa munyu ɔ tue. 2 Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “He nyɛlɔ ɔ tu munyu kɛ si nyɛ nɛ e de ke, ‘Ɛhɛɛ! Blema kpongu ɔmɛ po ba pee wa níhi!’”’

3 Lɔ ɔ he ɔ, moo gba nɛ o de ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Akɛnɛ a ha nɛ nyɛ pee ma doku nɛ a tua nyɛ kɛ je he fɛɛ he, bɔ nɛ pee nɛ nyɛ ba pee nihi nɛ a yi ná wami ɔ* a weto ní ngɛ je ma amɛ a kpɛti, nɛ́ nihi yaa nɔ nɛ a tuɔ nyɛ he munyu nɛ a gbeɔ nyɛ he guɛ he je ɔ, 4 Israel yokuhi, nyɛɛ bu Nyɔmtsɛ Matsɛ Yehowa munyu ɔ tue! Yoku ɔmɛ kɛ kpongu ɔmɛ, pa amɛ kɛ dɔgba amɛ, hehi nɛ a kpata a hɛ mi nɛ a pee ma doku, kɛ mahi nɛ a fɔɔ si gu nɛ a ha ní ngɛ a mi nɛ́ nihi nɛ a yi ná wami ngɛ je ma amɛ nɛ a bɔle mɛ ɔ a mi ye a he fɛu ɔ, nɔ́ nɛ Nyɔmtsɛ Matsɛ Yehowa ngɛ nyɛ dee ji nɛ ɔ nɛ; 5 Nyɔmtsɛ Matsɛ Yehowa ngɛ nyɛ dee ke: ‘I kɛ abofu nɛ nya wa maa tu munyu kɛ si nihi nɛ a yi ná wami ngɛ je ma amɛ a mi ɔ kɛ Edom tsuo, nihi nɛ a kɛ bua jɔmi kɛ he guɛ gbemi* ngɔ ye zugba a kaa mɛ nitsɛmɛ a weto ní, nɛ́ a ngɔ e lohwehi a ní yemi he ɔmɛ nɛ a ha ní ngɛ mi ɔ.’”’

6 Lɔ ɔ he ɔ, moo gba kɛ tsɔɔ Israel zugba a, nɛ o de yoku ɔmɛ kɛ kpongu ɔmɛ, pa amɛ kɛ dɔgba amɛ ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Hyɛ! I kɛ hɛdɔ kɛ abofu nɛ nya wa maa tu munyu, ejakaa nyɛ tloo je ma amɛ a hɛ mi si puemi ɔ.”’

7 “Enɛ ɔ he ɔ, nɔ́ nɛ Nyɔmtsɛ Matsɛ Yehowa de ji nɛ ɔ nɛ: ‘Imi nitsɛ i wo ye nine nɔ kɛ kã kita kaa je ma amɛ nɛ bɔle nyɛ ɔ maa tloo mɛ nitsɛmɛ a hɛ mi si puemi ɔ. 8 Se nyɛ Israel yokuhi, nyɛ ma gba kɔnihi nɛ nyɛ maa wo yiblii kɛ ha ye ma Israel, ejakaa e be kɛe nɛ a maa kpale kɛ ba. 9 I kɛ nyɛ ngɛ, nɛ ma ngɔ ye juɛmi kɛ ma nyɛ nɔ, a ma dla nyɛ nɔ, nɛ a ma du ní ngɛ nyɛ nɔ. 10 Ma ha nɛ nyɛ we bi ɔmɛ, nɛ ji Israel we ɔ tsuo he maa hiɛ, nɛ nihi maa hi ma amɛ a mi nɛ nyɛ maa kpale po ma doku ɔmɛ ekohu. 11 Ma ha nɛ nyɛ we bi ɔmɛ kɛ nyɛ lohwe ɔmɛ a he maa hiɛ, nyɛ he maa hiɛ babauu nɛ nyɛ lohwe ɔmɛ ma fɔ fuu. Ma ha nɛ nihi maa hi nyɛ nɔ kaa bɔ nɛ e ji be ko nɛ be ɔ, nɛ ma ha nɛ níhi a mi maa hi ha nyɛ pe kekle ɔ po; nɛ nyɛ ma ná le kaa imi ji Yehowa. 12 Ma ha nɛ nihi, nɛ ji ye ma Israel ɔ maa nyɛɛ ngɛ o zu ɔ nɔ, nɛ a kɛ nyɛ maa pee a nɔ́. Nyɛ ma ba pee a weto ní, nɛ nyɛ be hae nɛ a bimɛ nɛ gbo hu.’”

13 “Nɔ́ nɛ Nyɔmtsɛ Matsɛ Yehowa de ji nɛ ɔ nɛ: ‘Akɛnɛ a ngɛ nyɛ dee ke, “Nyɛ ji zugba nɛ yeɔ nimli nɛ nyɛ gbeɔ jokuɛwi ngɛ nyɛ ma a mi” he je ɔ,’ 14 ‘nyɛ be nimli yee hu nɛ nyɛ be jokuɛwi nɛ a ngɛ ma a mi ɔ gbee hu,’ Nyɔmtsɛ Matsɛ Yehowa lɛ de. 15 I be hae nɛ je ma amɛ nɛ a jɛ nyɛ hu, nɛ a be nyɛ ahlua bɔe hu, nɛ nyɛ be hae nɛ nyɛ ma amɛ a nane nɛ tɔ̃tɔ̃ hu,’ Nyɔmtsɛ Matsɛ Yehowa lɛ de.”

16 Yehowa kɛ mi tu munyu ekohu nɛ e de mi ke: 17 “Nɔmlɔ bi, benɛ Israel we ɔ ngɛ a zugba a nɔ ɔ, a kɛ a ní peepee wo zugba a nɔ mu. A ní peepee ɔ ha nɛ a he tsɔ we ngɛ ye hɛ mi kaa yo nɛ ku nine. 18 Lɔ ɔ he ɔ, i plɛ ye abofu ɔ kɛ pue a nɔ ngɛ muɔ si nɛ a pue kɛ a we amagahi nɛ i hiɔ* nɛ a kɛ wo zugba a nɔ mu ɔ he je. 19 Lɔ ɔ he ɔ, i gbɛ mɛ kɛ fĩa je ma amɛ a mi nɛ i fiee mɛ kɛ ho zugba amɛ a nɔ ya. I kojo mɛ ngɛ a ní peepee ɔmɛ a nya. 20 Se benɛ a ya je ma nɛ ɔmɛ a mi ɔ, nihi gbe ye biɛ klɔuklɔu ɔ he guɛ nɛ a de ngɛ a he ke, ‘Yehowa we bi ji nɛ ɔ nɛ, se a je e zugba a nɔ.’ 21 Lɔ ɔ he ɔ, ma fã ye biɛ klɔuklɔu ɔ nɛ Israel we ɔ gbe he guɛ ngɛ je ma amɛ a mi hehi nɛ a ya a he.”

22 “Enɛ ɔ he ɔ, mo de Israel we ɔ ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Oo Israel we, pi nyɛ he je nɛ ma pee nɔ́ nɛ ɔ, se ye biɛ klɔuklɔu ɔ nɛ nyɛ gbe he guɛ ngɛ je ma amɛ a kpɛti hehi nɛ nyɛ ya a he je.”’ 23 Nɔ́ nɛ Nyɔmtsɛ Matsɛ Yehowa de ji nɛ ɔ nɛ, ‘Bɔ fɛɛ bɔ nɛ ji ɔ, ma tsu ye biɛ ngua a nɛ a gbe he guɛ ngɛ je ma amɛ a kpɛti ɔ he, nɔ́ nɛ nyɛ gbe he guɛ ngɛ a kpɛti ɔ; nɛ je ma amɛ ma ná le kaa imi ji Yehowa, nɛ kɛ gu blɔ nɛ ɔ nɔ ɔ, ma ha nɛ a na kaa imi ji Mawu klɔuklɔu ɔ nɛ. 24 Ma ngɔ nyɛ kɛ je je ma amɛ a kpɛti nɛ ma bua nyɛ nya kɛ je zugba amɛ tsuo a nɔ, nɛ ma ngɔ nyɛ kɛ ba nyɛ zugba a nɔ. 25 Ma fĩa nyu nɛ mi tsɔ kɛ pue nyɛ nɔ nɛ nyɛ he ma tsɔ; Ma tsu nyɛ he kɛ je níhi tsuo nɛ woɔ nyɛ he mu ɔ he, nɛ ma je nyɛ amagahi nɛ i hiɔ ɔ tsuo kɛ je. 26 Ma ha nyɛ tsui ehe nɛ ma ngɔ mumi ehe kɛ wo nyɛ mi. Ma je tsui nɛ ngɛ kaa tɛ ɔ kɛ je nyɛ nɔmlɔ tso ɔ mi, nɛ ma ha nyɛ tsui nɛ he jɔ.* 27 Ma ngɔ ye mumi ɔ kɛ wo nyɛ mi, nɛ ma ha nɛ nyɛɛ nyɛɛ ngɛ ye blɔ tsɔɔmi ɔmɛ a nya, nɛ nyɛ maa ye ye fami ɔmɛ a nɔ. 28 Kɛkɛ ɔ, nyɛ maa hi zugba nɛ i kɛ ha nyɛ nɛmɛ ɔ nɔ, nɛ nyɛ maa pee ye ma, nɛ ma pee nyɛ Mawu.’

29 “‘Ma je nyɛ kɛ je níhi tsuo nɛ woɔ nyɛ he mu ɔ he, nɛ ma ha nɛ ngma* maa ba fuu, nɛ i be hae nɛ hwɔ nɛ ye nyɛ. 30 Ma ha nɛ tsohi maa wo yiblii fuu nɛ ngmɔ ɔmɛ maa ba ní, konɛ hwɔ nɛ ko ye nyɛ ngɛ je ma amɛ a kpɛti nɛ lɔ ɔ nɛ ba ha nɛ zo nɛ gbe nyɛ. 31 Kɛkɛ ɔ, nyɛ ma kai nyɛ blɔ yaya amɛ kɛ nyɛ ní peepeehi nɛ a dɛ ɔ, nɛ nyɛ he mi maa nyɛɛ nyɛ ngɛ nyɛ yayami ɔmɛ kɛ nyɛ ní hiɔmi ní ɔmɛ a he je. 32 Se Israel we, nyɛ ná nɛ nyɛɛ le kaa, tsa pi nyɛ he je nɛ i ngɛ ní nɛ ɔmɛ pee ngɛ. Mohu ɔ, konɛ zo nɛ gbe nyɛ nɛ nyɛ hɛ mi nɛ pue si ngɛ nyɛ blɔ ɔmɛ a he je.’ Nyɔmtsɛ Matsɛ Yehowa lɛ de.

33 Nɔ́ nɛ Nyɔmtsɛ Matsɛ Yehowa de ji nɛ ɔ nɛ: ‘Ngɛ ligbi nɛ ma tsu nyɛ he ngɛ nyɛ yayami ɔmɛ a he ɔ nɔ ɔ, ma ha nɛ nihi ma ba hi ma amɛ a mi, nɛ a maa kpale ma wehi nɛ a pee we doku ɔ. 34 Zugba a nɛ fɔɔ si gu ɔ, a maa kpale dla nɔ ekohu, nɛ nihi tsuo nɛ a beɔ ngɛ lejɛ ɔ maa na kaa zugba a fɔ we si gu hu, se a kpale dla nɔ. 35 Nɛ nihi ma de ke: “Zugba a nɛ fɔɔ si gu ɔ ba pee kaa Eden abɔɔ ɔ, nɛ mahi nɛ a ku pue si nɛ a hɛ mi kpata nɛ a fɔɔ si gu ɔ ba pee mahi nɛ a fia gbogbo wo a he nɛ nihi ngɛ mi.” 36 Nɛ mahi nɛ piɛ nɛ a bɔle mo ɔ ma ná le kaa imi Yehowa nitsɛ lɛ i ma nɔ́ nɛ ku pue si ɔ ekohu, nɛ i du ní ngɛ zugba nɛ fɔɔ si gu ɔ nɔ ɔ nɛ. Imi Yehowa nitsɛ lɛ i de, nɛ i pee hulɔ.’

37 “Nɔ́ nɛ Nyɔmtsɛ Matsɛ Yehowa de ji nɛ ɔ nɛ: ‘Ma ha nɛ Israel we ɔ nɛ bi mi nɛ ma pee nɔ́ nɛ ɔ hu ha mɛ: Ma ha nɛ a he maa hiɛ babauu kaa to kuu. 38 Mahi nɛ a kpata a hɛ mi ɔ mi ma hyi tɔ kɛ nimli kaa to kuuhi, kaa ni klɔuklɔu ɔmɛ a to kuuhi, kaa to kuuhi nɛ a bua a he nya ngɛ Yerusalem* ngɛ e gbijlɔ yemi be mi; nɛ a ma ná le kaa imi ji Yehowa.’”