5 Mose

21 “Ke a na nɔ ko nɛ a gbe lɛ ngɛ nga mi ngɛ zugba nɛ Yehowa o Mawu ɔ kɛ ngɛ mo hae kaa o nɔ́ ɔ nɔ, nɛ a li nɔ nɛ gbe lɛ ɔ, 2 nikɔtɔma amɛ kɛ kojoli ɔmɛ nɛ a je kpo nɛ a ya susu kɛ je he nɛ gbogboe ɔ ngɛ ɔ kɛ ya pi mahi nɛ bɔle lɛ ɔ. 3 Kɛkɛ ɔ, ma nɛ kɛ gbogboe ɔ he kɛ we kulaa a mi nikɔtɔma amɛ nɛ a ngɔ na wayo nɛ a kɛ tsu we ní hyɛ, nɛ a kɛ kuɛpã tso wui lɛ hyɛ ngɛ na amɛ a kpɛti, 4 nɛ jamɛ a ma a mi nikɔtɔma amɛ nɛ a ngɔ na wayo ɔ kɛ kple kɛ ho dɔgba* nɛ́ nyu ngɛ bee ngɛ mi mi ya, ngɛ he nɛ a hu we hyɛ aloo a du we ní ngɛ hyɛ, nɛ a ku na wayo ɔ kuɛ ngɛ lejɛ ɔ, ngɛ dɔgba a mi.

5 “Nɛ osɔfo ɔmɛ, nɛ ji Levi bi ɔmɛ nɛ a hɛ mɛ kɛ ba, ejakaa Yehowa o Mawu ɔ hla mɛ kaa a sɔmɔ lɛ, nɛ a jɔɔ nihi ngɛ Yehowa biɛ mi. Mɛ lɛ a maa tsɔɔ bɔ nɛ e sa kaa a tsu pɛ fɛɛ pɛ nɛ kɔɔ basabasa peemi he ɔ he ní ha. 6 Kɛkɛ ɔ, ma a mi nikɔtɔmahi nɛ a kɛ gbogboe ɔ he kɛ we kulaa a tsuo nɛ a fɔ a dɛ kɛ pue na wayo nɛ a ku e kuɛ ngɛ dɔgba a mi ɔ nɔ, 7 nɛ́ a de ke, ‘Pi wɔ nɛ wa pue muɔ nɛ ɔ si,* nɛ be nɛ a ngɛ muɔ nɛ ɔ si pue ɔ hu wa hɛngmɛ nɛ. 8 Yehowa, koo bu o ma Israel nɛ o kpɔ̃ lɛ ɔ fɔ ngɛ enɛ ɔ he, nɛ ko ha nɛ nɔ nɛ pee we nɔ ko ɔ e muɔ he fɔ yemi ɔ nɛ hi o ma Israel mi.’ Kɛkɛ ɔ, a be mɛ fɔ bue ngɛ muɔ nɛ ɔ he. 9 Enɛ ɔ ma ha nɛ o maa sa Yehowa hɛ mi, nɛ o ma je nɔ nɛ pee we nɔ ko ɔ muɔ he fɔ yemi ɔ kɛ je nyɛ kpɛti.

10 “Ke o kɛ o he nyɛli ya hwu ta, nɛ Yehowa o Mawu ɔ ye a nɔ kunimi ha mo, nɛ o ngɔ mɛ nyɔguɛ, 11 nɛ o na yo ko nɛ he ngɛ fɛu ngɛ nyɔguɛ ɔmɛ a kpɛti, nɛ o ná e he suɔmi, nɛ o suɔ kaa o maa ngɔ lɛ kaa o yo ɔ, 12 o ma nyɛ maa ngɔ lɛ kɛ ya o we mi. Lɔ ɔ se ɔ, é sɛ e yi bwɔmi, nɛ e je e nguɛ nya, 13 nɛ e je tade nɛ ngɛ e he benɛ a nu lɛ nyɔguɛ ɔ, nɛ e hi o we ɔ mi. É fo e tsɛ kɛ e nyɛ a he ya nyɔhiɔ kake, nɛ lɔ ɔ se ɔ, o ma nyɛ nɛ o kɛ lɛ nɛ ná bɔmi; o maa pee e huno, nɛ lɛ hu e maa pee o yo. 14 Se ke o bua jɔɛ e he hu ɔ, lɛɛ ha nɛ e ho hɛ fɛɛ he nɛ e suɔ ya.* Koo jua lɛ, nɛ koo pee lɛ basabasa hulɔ akɛnɛ o pue e hɛ mi si ɔ he je.

15 “Ke nyumu ko ngɛ yihi enyɔ, nɛ e suɔ nɔ kake pe nɔ kake,* nɛ mɛ ni enyɔ ɔmɛ tsuo a fɔ binyumuhi kɛ ha lɛ, nɛ yo nɛ e sume lɛ ɔ binyumu ɔ ji kekle bi ɔ, 16 ligbi nɛ e maa ngɔ e weto ní kɛ ha e binyumu ɔmɛ ɔ, a be lɛ blɔ ngmɛe nɛ e ngɔ nɔ nɛ e suɔ lɛ ɔ binyumu ɔ kɛ pee kekle bi ngɛ nɔ nɛ e sume lɛ ɔ binyumu ɔ, nɛ ji kekle bi ɔ nane mi. 17 E sa nɛ e bu nɔ nɛ e sume lɛ ɔ binyumu ɔ kaa kekle bi, nɛ ke e ngɛ e weto ní gbae ɔ, e sa nɛ e ha lɛ totoe enyɔ, ejakaa jamɛ a bi ɔ ji e fɔmi he wami sisije. E nɔ́ ji kekle bi blɔ nya a nɛ.

18 “Ke nyumu ko ngɛ binyumu nɛ́ e tue wa, nɛ e tsɔɔ atuã, nɛ e bui e tsɛ aloo e nyɛ, nɛ a bɔ mɔde kaa a ma tsɔse lɛ, se e bui mɛ tue ɔ, 19 e tsɛ ɔ kɛ e nyɛ ɔ nɛ a nu lɛ, nɛ́ a je lɛ kpo kɛ ba ha ma nikɔtɔma amɛ ngɛ ma a agbo ɔ nya, 20 nɛ a de e ma a mi nikɔtɔma amɛ ke, ‘Wa binyumu nɛ ɔ tue wa, nɛ e tsɔɔ atuã, nɛ e kua kaa e maa bu wɔ tue. E ji jiklɔɔtsɛ kɛ dã delɔ.’ 21 Kɛkɛ ɔ, nyumuhi tsuo nɛ a ngɛ ma a mi ɔ nɛ a fiaa lɛ tɛ nɛ e gbo. Nyɛɛ pee jã kɛ je nɔ́ yaya kɛ je nyɛ kpɛti, nɛ Israel bi ɔmɛ tsuo maa nu, nɛ a maa ye gbeye.

22 “Ke nɔ ko pee yayami nɛ e sa kaa a bu lɛ gbenɔ fɔ, nɛ a gbe lɛ, nɛ a sɛu lɛ ngɛ tso nɔ ɔ, 23 e gbogboe ɔ nɛ ko hi tso ɔ nɔ nyɔ mi tsuo. Mohu ɔ, moo hyɛ nɛ a pu lɛ jamɛ a ligbi ɔ, ejakaa nɔ nɛ a sɛu lɛ ɔ ji nɔ ko nɛ Mawu gbiɛ lɛ. Koo wo zugba nɛ Yehowa o Mawu ɔ kɛ ngɛ mo hae kaa weto ní ɔ he mu.