La
Kɛ ha la nɔ hyɛlɔ ɔ; ngɛ Gitit nɔ.* La nɛ Kora binyumu ɔmɛ po.
84 Oo Yehowa tabohiatsɛ,
Hyɛ bɔ nɛ i suɔ* o bo tsu ngua a ha.
Ye tsui kɛ ye he lo kɛ bua jɔmi laa kɛ jeɔ Mawu hɛ kalɔ ɔ yi.
3 Oo Yehowa tabohiatsɛ,
Ye Matsɛ kɛ ye Mawu!
Lohwe pɛlitsɛ po náa hi he ngɛ o we afɔle sami latɛ ngua a kasa nya,
Nɛ odangmɔdangmɔ peeɔ tsu kɛ haa e he ngɛ lejɛ ɔ,
Nɛ e hyɛɔ e bimɛ a nɔ ngɛ lejɛ ɔ.
4 Nihi nɛ a ngɛ o we ɔ ngɛ bua jɔmi!
A yaa nɔ nɛ a jeɔ o yi. (Sela)
5 Nihi nɛ a náa he wami ngɛ o ngɔ,
Nɛ́ a tsui ngɛ blɔ ngua amɛ a nɔ ɔ ngɛ bua jɔmi.
6 Ke a gu Baka Dɔgba a* mi ɔ,
A haa nɛ lejɛ ɔ peeɔ kaa he nɛ nyu hɛngmɛhi ngɛ;
Nɛ kekleekle hiɔmi nɛmi ɔ ngɔɔ jɔɔmihi kɛ baa lejɛ ɔ.*
7 A maa ya nɔ maa nyɛɛ nɛ a he wami nɔ be gbɔe;*
A ti nɔ fɛɛ nɔ yaa Mawu hɛ mi ngɛ Zion.
8 Oo Yehowa Mawu tabohiatsɛ, bu ye sɔlemi tue;
Oo Yakob Mawu, moo bu mi tue. (Sela)
9 Wa tsɛ̃i kɛ wa Mawu, hyɛ,*
Hyɛ nɔ nɛ o pɔ lɛ nu ɔ hɛ mi.
10 Ejakaa ligbi kake nɛ ma ye ngɛ o we ɔ hi pe ligbi akpe nɛ ma ye ngɛ he kpa ko!
I hla kaa ma da si ngɛ ye Mawu ɔ we ɔ sinya kpoku ɔ nɔ
Mohu pe nɛ ma hi yiwutsotsɛmɛ a bo tsuhi a mi.
11 Ejakaa Yehowa Mawu ji wa pu kɛ wa tsɛ̃i;
E naa nɔ mɔbɔ, nɛ e woɔ nɔ hɛ mi nyami.
Yehowa be hae nɛ nɔ́ kpakpa ko nɛ bɔ
Nihi nɛ nyɛɛɔ ngɛ anɔkuale yemi mi ɔ.
12 Oo Yehowa tabohiatsɛ,
Nɔ nɛ ngɔɔ e hɛ kɛ fɔɔ o nɔ ɔ ngɛ bua jɔmi.