Yohane Sane Kpakpa a

13 Loko Hetsɔmi gbijlɔ ɔ maa su ɔ, Yesu le kaa ngmlɛfia nɛ e kɛ maa je je nɛ ɔ mi kɛ ya Tsɛ ɔ ngɔ ɔ su. Akɛnɛ e suɔ lɛ nitsɛ e nihi nɛ a ngɛ je ɔ mi ɔ he je ɔ, e suɔ mɛ hluu kɛ ya si nyagbe. 2 Benɛ a ngɛ gbɔkuɛ ní ɔ yee ɔ, Abosiami ngɔ kɛ wo Yuda Iskariot, Simon binyumu ɔ tsui mi momo kaa e tsɔɔ Yesu se blɔ. 3 Enɛ ɔ he ɔ, akɛnɛ Yesu le kaa Tsɛ ɔ ngɔ níhi tsuo kɛ wo e dɛ, nɛ Mawu ngɔ e je kɛ ba nɛ e kpale kɛ yaa Mawu ngɔ he je ɔ, 4 e te si ngɛ gbɔkuɛ niye ní ɔ se, nɛ e je tadehi nɛ e wo ngɛ e tade ɔ nɔ ɔ ngɔ fɔ si. Nɛ e ngɔ papahu kɛ mwɔ e mlɛmi.* 5 Lɔ ɔ se ɔ, e ngɔ nyu kɛ wo tsesi mi nɛ e bɔni kaseli ɔmɛ a nane he fɔmi, nɛ e ngɔ papahu ɔ nɛ e kɛ mwɔ e mlɛmi* ɔ kɛ tsu a nane ɔmɛ a he. 6 Kɛkɛ nɛ e ba su Simon Petro ngɔ. Petro de lɛ ke: “Nyɔmtsɛ, o ma ye nane he fɔmi lo?” 7 Yesu ha lɛ heto ke: “Nɔ́ nɛ i ngɛ pee ɔ, amlɔ nɛ ɔ, o nui sisi, se pee se ɔ, o ma ba nu ní nɛ ɔmɛ a sisi.” 8 Petro de lɛ ke: “Ngɛ anɔkuale mi ɔ, o be ye nane he fɔe gblegbleegble.” Yesu de lɛ ke: “Ke i fɔ we o nane he ɔ, lɛɛ o be blɔ fa mi nɔ́ ko ngɛ ye ngɔ.” 9 Simon Petro de lɛ ke: “Nyɔmtsɛ, lɛɛ pi ye nane ɔmɛ a he pɛ nɛ o ma fɔ, mohu ɔ, mo fɔ ye nine ɔmɛ a he kɛ ye yi mi hulɔ.” 10 Yesu de lɛ ke: “Nɔ fɛɛ nɔ nɛ e du momo ɔ, e he tsɔ kɛ pi si nɛ e hia we nɔ́ kpa ko hu pe e nanehi a he pɛ nɛ a ma fɔ. Nɛ nyɛɛ lɛɛ nyɛ he tsɔ, se tsa pi nyɛ tsuo.” 11 Ejakaa e le nɔ nɛ ngɛ e se blɔ tsɔɔe ɔ. Enɛ ɔ he je nɛ e de ke: “Tsa pi nyɛ tsuo nɛ nyɛ he tsɔ” ɔ nɛ.

12 Jehanɛ ɔ, benɛ e fɔ a nane ɔmɛ a he ta nɛ e wo tadehi nɛ e wo ngɛ e tade ɔ nɔ ɔ ekohu ɔ, e kpale kɛ ya hi si ngɛ okplɔɔ ɔ he, nɛ e de mɛ ke: “Anɛ nyɛ nu nɔ́ nɛ i pee ha nyɛ ɔ sisi lo? 13 Nyɛ tsɛɔ mi ke ‘Tsɔɔlɔ’ kɛ ‘Nyɔmtsɛ,’ nɛ e sa jã, ejakaa Tsɔɔlɔ kɛ Nyɔmtsɛ ji mi. 14 Enɛ ɔ he ɔ, ke imi nɛ i ji Nyɔmtsɛ kɛ Tsɔɔlɔ ɔ, i fɔ nyɛ nane he ɔ, lɛɛ e sa nɛ* nyɛ hu nyɛ fɔ nyɛ sibi a nane he. 15 Ejakaa i pee nɔ hyɛmi nɔ́ kɛ ha nyɛ, konɛ kaa bɔ nɛ i pee kɛ ha nyɛ ɔ, nyɛ hu nyɛɛ pee jã. 16 I ngɛ nyɛ dee ngɛ anɔkuale mi ke, nyɔguɛ nɔ kuɔ we pi e nyɔmtsɛ, nɛ jã kɛ̃ nɛ nɔ nɛ a tsɔ lɛ ɔ hu nɔ kuɔ we pi nɔ nɛ e tsɔ lɛ ɔ. 17 Ke nyɛ le ní nɛ ɔmɛ nɛ nyɛ peeɔ ɔ, nyɛ ngɛ bua jɔmi. 18 Pi nyɛ tsuo nyɛ he munyu nɛ i ngɛ tue ɔ; i le ni nɛmɛ nɛ i hla a. Se enɛ ɔ ba mi konɛ nɔ́ nɛ ngmami ɔ de ɔ nɛ e ba mi. Ngmami ɔ de ke: ‘Nɔ nɛ e yeɔ ye niye ní ɔ te si kɛ wo mi.’* 19 Kɛ je piɔ kɛ yaa a, i ngɛ nyɛ dee loko e ba mi, konɛ ke e ba mi ɔ, nyɛ he ye kaa imi ji lɛ. 20 Niinɛ, ngɛ anɔkuale mi ɔ, i ngɛ nyɛ dee ke, nɔ fɛɛ nɔ nɛ e ma ha nɔ nɛ i tsɔ lɛ ɔ hɛ mi ɔ, e ha imi hu hɛ mi, nɛ nɔ fɛɛ nɔ nɛ e ma ha mi hɛ mi ɔ, e ha nɔ nɛ e tsɔ mi ɔ hu hɛ mi.”

21 Benɛ Yesu de ní nɛ ɔmɛ ta a, e hao ngɛ mumi mi, nɛ e ye odase ke: “Niinɛ, i ngɛ nyɛ dee ngɛ anɔkuale mi ke, nyɛ ti nɔ kake maa tsɔɔ ye se blɔ.” 22 Kaseli ɔmɛ bɔni a sibi hyɛmi, nɛ a li a ti nɔ nɛ he munyu nɛ e ngɛ tue ɔ. 23 Kaseli ɔmɛ a kpɛti nɔ kake, nɔ nɛ Yesu suɔ lɛ ɔ hii si ngɛ Yesu kasa nya haa.* 24 Enɛ ɔ he ɔ, Simon Petro ma lɛ hɛngmɛ nɛ e de lɛ ke: “De wɔ nɔ nɛ e ngɛ e he munyu tue ɔ.” 25 Lɔ ɔ he ɔ, nɔ nɛ e hii si ngɛ Yesu kasa nya a hɛ lɛ kɛ su Yesu gugue mi haa nɛ e bi lɛ ke: “Nyɔmtsɛ, mɛnɔ?” 26 Yesu ha lɛ heto ke: “Nɔ nɛ ma po abolo ɔ kɛ sɔ kã a mi nɛ ma ngɔ kɛ ha lɛ ɔ, lɛ ji nɔ ɔ nɛ.” Enɛ ɔ he ɔ, benɛ e ngɔ abolo ɔ kɛ sɔ kã a mi ɔ, e ngɔ kɛ ha Yuda, Simon Iskariot binyumu ɔ. 27 Benɛ Yuda sɔle abolo popoe ɔ, kɛkɛ nɛ Satan sɛ e mi. Enɛ ɔ he ɔ, Yesu de lɛ ke: “Nɔ́ nɛ o ngɛ pee ɔ, pee lɛ esɔesɔ.” 28 Se nihi nɛ a kɛ lɛ ngɛ okplɔɔ ɔ he ɔ, a ti nɔ ko nɔ ko li nɔ́ he je nɛ e de lɛ jã a. 29 Ngɛ anɔkuale mi ɔ, a ti ni komɛ susu kaa akɛnɛ sika daka a ngɛ Yuda dɛ he je ɔ, Yesu ngɛ lɛ dee ke, “Ya he níhi nɛ maa hia wɔ kɛ ha gbijlɔ ɔ,” aloo kaa é ngɔ nɔ́ ko kɛ ya ha ohiatsɛmɛ ɔmɛ. 30 Enɛ ɔ he ɔ, benɛ e sɔle abolo popoe ɔ, oya nɔuu nɛ e je kpo. Jamɛ a be ɔ mi ɔ, je jɔ.

31 Enɛ ɔ he ɔ, benɛ e je kpo kɛ ho ɔ, Yesu de ke: “Amlɔ nɛ ɔ, a wo nɔmlɔ Bi ɔ hɛ mi nyami, nɛ a gu nɔmlɔ Bi ɔ nɔ kɛ wo Mawu hɛ mi nyami. 32 Mawu nitsɛ maa wo nɔmlɔ Bi ɔ hɛ mi nyami, nɛ e maa wo e hɛ mi nyami amlɔ nɔuu. 33 Bimɛ tsɔwi, be bɔɔ kɛkɛ lɛ e piɛ nɛ i kɛ nyɛ maa hi si. Nyɛ ma hla mi; nɛ kaa bɔ nɛ i de Yudabi ɔmɛ ke, ‘He nɛ i yaa a, nyɛ be nyɛe maa ba’ a, amlɔ nɛ ɔ, nyɛ hu i ngɛ nyɛ dee jã nɔuu. 34 I ngɛ nyɛ mlaa ehe woe kaa nyɛɛ suɔ nyɛ sibi; kaa bɔ nɛ i suɔ nyɛ ɔ, nyɛ hu nyɛɛ suɔ nyɛ sibi jã nɔuu. 35 Ke suɔmi ngɛ nyɛ kpɛti ɔ, lɔ ɔ ma ha nɛ nihi tsuo maa le kaa ye kaseli ji nyɛ.”

36 Simon Petro de lɛ ke: “Nyɔmtsɛ, jije o yaa?” Yesu ha lɛ heto ke: “He nɛ i yaa a, o be nyɛe maa nyɛɛ ye se amlɔ nɛ ɔ, se o maa ba pee se.” 37 Petro de lɛ ke: “Nyɔmtsɛ, mɛni he je nɛ i be nyɛe nɛ ma nyɛɛ o se amlɔ nɛ ɔ? Ma ngɔ ye wami* kɛ fɔ si ngɛ o he.” 38 Yesu ha lɛ heto ke: “O maa ngɔ o wami* kɛ fɔ si ngɛ ye he lo? Niinɛ, ngɛ anɔkuale mi ɔ, i ngɛ mo dee ke, kungwɔ ku be nɔ́ kpae nɛ́ o ma kua mi si etɛ.”