La
David la.
2 Ha nɛ ma* je Yehowa yi;
Ye hɛ nɛ ko je níhi tsuo nɛ e pee ɔ nɔ.
3 E ngɔɔ o tɔmi ɔmɛ tsuo kɛ keɔ mo,
Nɛ e tsaa o hiɔ ɔmɛ tsuo;
4 E kpɔ̃ɔ o wami kɛ jeɔ muɔ* mi,
Nɛ e kɛ e suɔmi nɛ se pui ɔ kɛ e mɔbɔ nami ɔ buɔ mo matsɛ pɛɛ.
5 O wami ligbi ɔmɛ tsuo ɔ, e haa nɛ o tɔɔ kɛ ní kpakpahi,
Konɛ o ya nɔ nɛ o pee niheyo, nɛ o hi he wami kaa kɔle.
6 Yehowa peeɔ nɔ́ nɛ da nɛ e yeɔ dami sane
Kɛ haa nihi tsuo nɛ a waa mɛ yi mi ɔ.
7 E ha nɛ Mose le e blɔ ɔmɛ,
Nɛ Israelbi ɔmɛ le níhi nɛ e pee ɔmɛ.
8 Yehowa naa nɔ mɔbɔ nɛ e mi mi sãã lɛ ngɛ nɔ he,*
E mi mi fu we mla, nɛ e suɔmi nɛ se pui ɔ hiɛ babauu.
9 E be wa tɔmi ɔmɛ ngɔe kɛ to ngɛ e juɛmi mi daa,
Nɛ e be abofu mi hɛɛe kɛ ya neneene hulɔ.
10 E kɛ wɔ yi ngɛ wa yayami ɔmɛ a nya,
Nɛ wa tɔmi ɔmɛ hu, e wui wɔ a he hiɔ bɔ nɛ sa wɔ.
11 Kaa bɔ nɛ blɔ nɛ ngɛ hiɔwe kɛ zugba a kpɛti ɔ hí kalemi ɔ,
Jã kɛ̃ nɛ suɔmi nɛ se pui nɛ e ngɛ kɛ ha nihi nɛ a yeɔ lɛ gbeye ɔ hu hí kalemi.
12 Kaa bɔ nɛ puje he kɛ pusinɔ he a kpɛti kɛ ɔ,
Jã kɛ̃ nɛ e ha nɛ waa kɛ wa tɔmi ɔmɛ a kpɛti kɛ.
13 Kaa bɔ nɛ tsɛ naa e bimɛ mɔbɔ ɔ,
Jã kɛ̃ nɛ Yehowa naa nihi nɛ a yeɔ lɛ gbeye ɔ mɔbɔ.
14 Ejakaa e le bɔ nɛ e bɔ wɔ ha a saminya,
E kaiɔ kaa zu ji wɔ.
15 Nɔmlɔ adesa* wami se kɛ we kaa bɔ nɛ nga se kɛ we ɔ;
E ngɛ kaa nga nɔ mɔmɔ nɛ gba hleii.
16 Se ke kɔɔhiɔ fia a, kɛkɛ e laa,
Kaa nɔ́ nɛ e hí lejɛ ɔ gblee.*
17 Se Yehowa suɔmi nɛ se pui ɔ ngɛ kɛ je neneene kɛ yaa neneene
Kɛ ha nihi nɛ a yeɔ lɛ gbeye ɔ,
Nɛ e dami ɔ ngɛ kɛ ha a bimɛ ɔmɛ a bimɛ,
18 Kɛ nihi nɛ a yeɔ e somi ɔ nɔ,
Kɛ nihi nɛ a yeɔ e fami ɔmɛ a nɔ sisiisi ɔ.
19 Yehowa ngɔ e matsɛ sɛ ɔ kɛ ma si kpɛii ngɛ hiɔwe;
Nɛ e nɔ yemi ɔ yeɔ nɔ́ fɛɛ nɔ́ nɔ.
20 Nyɛ je Yehowa yi, nyɛ e bɔfohi tsuo nɛ nyɛ ngɛ he wami wawɛɛ nitsɛ;
Nyɛ nihi nɛ nyɛ yeɔ e munyu ɔmɛ a nɔ, nɛ nyɛ buɔ e gbi tue ɔ.*
21 Nyɛ je Yehowa yi, nyɛ e tabo ɔmɛ tsuo;
Nyɛ e sɔmɔli nɛ nyɛ peeɔ e suɔmi nya ní.
22 Nyɛ je Yehowa yi, nyɛ e nibɔ níhi tsuo,
Ngɛ e nɔ yemi he ɔmɛ tsuo.
Ha nɛ ma* je Yehowa yi.