Yesaya
48 Oo Yakob we, nyɛɛ bu tue,
Nyɛ nɛ nyɛ ngɔɔ Israel biɛ kɛ tsɛɔ nyɛ he
Nɛ nyɛ je Yuda nyu ɔmɛ a mi,*
Nyɛ nɛ nyɛ ngɔɔ Yehowa biɛ kɛ kãa kita
Nɛ nyɛ tsɛɔ Israel Mawu ɔ,
Se pi ngɛ anɔkuale kɛ dami mi ɔ.
2 A kɛ ma klɔuklɔu ɔ biɛ tsɛɔ a he,
Nɛ a biɔ Israel Mawu ɔ kaa e ye bua mɛ,
Nɔ nɛ e biɛ ji Yehowa tabohiatsɛ ɔ.
3 “Blema* ní ɔmɛ ɔ, i de nyɛ blema lokoo.
A je imi nitsɛ ye nya,
Nɛ i ha nɛ nyɛ le.
I tsu he ní oya nɔuu, nɛ a ba mi.
4 Akɛnɛ i le bɔ nɛ o kuɛ wa ha he je ɔ,
—O kuɛ pani ngɛ kaa dade, nɛ o yi nya ngɛ kaa akɔɔble—
5 I de mo blema lokoo.
I ha nɛ o nu he loko e ba mi,
Bɔ nɛ pee nɛ o ko nyɛ nɛ o de ke, ‘Ye amaga amɛ lɛ a pee nɔ́ nɛ ɔ;
Ye amagahi nɛ a hlɔ ɔ kɛ ye dade amaga amɛ lɛ a fã nɛ nɔ́ nɛ ɔ ba.’
6 Nyɛ nu, nɛ nyɛ na ní nɛ ɔmɛ tsuo.
Anɛ nyɛ be jajee lo?
Kɛ je amlɔ nɛ ɔ kɛ yaa, i ngɛ nyɛ ní ehehi dee,
Laami sanehi nɛ nyɛ nui hyɛ.
7 Kpaako a ngɛ mɛ bɔe, a be kɛ je blema,
Níhi nɛ mwɔnɛ ɔ pɛ lɛ o ngɛ a he nue,
Bɔ nɛ pee nɛ o ko nyɛ nɛ o de ke, ‘Hyɛ! I le ní nɛ ɔmɛ momo.’
8 Dɛbi, o nui hyɛ, nɛ o li,
Nɛ kɛ je blema lokoo ɔ, o tue tsi.
Ejakaa i le kaa o sisiɔ nɔ wawɛɛ,
Nɛ a tsɛɔ mo ke yayami peelɔ kɛ je fɔmi mi tɔɔ.
9 Se ye biɛ ɔ he je ɔ, ma tsi ye mi mi la a nya;
Ye yi je mi ɔ he je ɔ, ma ye ye he nɔ ngɛ o he,
Nɛ i be o hɛ mi kpatae.
10 Hyɛ! I tsu o he, se pi kaa bɔ nɛ a tsuɔ sika hiɔ he ɔ.
I ka mo nɛ i hyɛ* ngɛ haomi nɛ ngɛ kaa flɔɔnɔɔ kɛ e mi la mi.
11 Imi nitsɛ, imi nitsɛ ye he je ɔ, ma pee nɔ́ nɛ ɔ,
Mɛni he je nɛ e sa kaa ma ngmɛ blɔ nɛ a wo ye he mu?
I kɛ ye hɛ mi nyami ɔ be nɔ ko hae.*
12 Mo Yakob kɛ mo Israel, mo nɛ i hla, bu mi tue.
I ngɛ kaa bɔ nɛ i ngɛ ɔ. Imi ji kekleekle nɔ; nɛ imi nɔuu ji nyagbe nɔ.
13 Imi nitsɛ ye nine lɛ fia zugba a sisi tomi ɔ,
Nɛ ye hiɔ nine ɔ lɛ bli hiɔwe ɔ mi.
Ke i tsɛ mɛ ɔ, mɛ tsuo a teɔ si.
14 Nyɛ tsuo nyɛ bua nyɛ he nya, nɛ nyɛɛ bu tue.
A kpɛti mɛnɔ lɛ fia ní nɛ ɔmɛ a he adafi?
Yehowa suɔ lɛ.
E maa pee Babilon nɔ́ nɛ e suɔ,
Nɛ e ma wo e nine nɔ ngɛ Kaldeabi ɔmɛ a nɔ.
15 Imi nitsɛ lɛ i tu munyu, nɛ i tsɛ lɛ.
I ngɔ lɛ kɛ ba, nɛ e blɔ ɔmɛ maa ye manye.
16 Nyɛɛ hɛ nyɛ kɛ su ye he, nɛ nyɛɛ bu nɔ́ nɛ ɔ tue.
Kɛ je sisi je tɔɔ ɔ, i tui munyu ngɛ laami mi.
Kɛ je benɛ e bɔni mi ba mi ɔ, i ngɛ lejɛ ɔ.”
Nɛ amlɔ nɛ ɔ, Nyɔmtsɛ Matsɛ Yehowa tsɔ i kɛ e mumi ɔ.*
17 Nɔ́ nɛ Yehowa, o Kpɔlɔ ɔ, Israel Nɔ Klɔuklɔu ɔ ngɛ dee ji nɛ ɔ nɛ:
“Imi Yehowa, imi ji o Mawu,
Nɔ nɛ e ngɛ mo ní tsɔɔe konɛ o ná he se,*
Nɔ nɛ e ngɛ mo blɔ nɛ e sa nɛ o gu nɔ ɔ tsɔɔe.
18 Ke o maa ye ye mlaa amɛ a nɔ ɔ,
Lɛɛ o tue mi jɔmi ɔ maa pee kaa pa
Nɛ o dami ɔ maa pee kaa wo oslɔke.
19 O nina* kɛ o sisi bimɛ
Maa hiɛ kaa zia.
A biɛ be lae kɔkɔɔkɔ, nɛ a hɛ mi be kpatae ngɛ ye hɛ mi gblegbleegble.”
20 Nyɛɛ je Babilon!
Nyɛɛ tu fo kɛ je Kaldeabi ɔmɛ a kpɛti!
Nyɛɛ tu he munyu kɛ bua jɔmi! Nyɛɛ jaje!
Nyɛ ha nɛ a nu ngɛ zugba a nyagbe he ɔmɛ.
Nyɛ de ke: “Yehowa kpɔ̃ e sɔmɔlɔ Yakob.
21 Benɛ e nyɛɛ a hɛ mi kɛ be ngɛ nga kplanaa a nɔ ɔ, kuma yi mɛ.
E ha nɛ nyu je tɛsa mi kɛ ha mɛ;
E gba tɛsa mi, nɛ nyu je mi babaaba.”
22 Yehowa ke, “Tue mi jɔmi ko be kɛ ha yiwutsotsɛ.”