Abɛ
22 Biɛ kpakpa hi pe ní nami babauu;
Bumi* hi pe sika hiɔ kɛ sika tsu.
2 Niatsɛ kɛ ohiatsɛ sɔ ngɛ blɔ nɛ ɔ nɔ:*
Yehowa ji nɔ nɛ pee mɛ ni enyɔ ɔmɛ tsuo.
3 Nɔ nɛ e hɛ mi tɛ naa haomi nɛ ma, nɛ e laa e he,
Se nɔ nɛ be níhi a si kpami ɔ kɛ lɛ ya kpeɔ, nɛ e naa mi nɔ́.*
4 Nɔ́ nɛ jeɔ he si bami kɛ Yehowa gbeye yemi mi kɛ baa ji,
Ní nami kɛ hɛ mi nyami kɛ wami.
5 Miohi kɛ klamahi ngɛ adesa nɛ e yi anɔkuale ɔ blɔ nɔ,
Se nɔ fɛɛ nɔ nɛ e wami* he jua wa ha lɛ ɔ yuɔ e he kulaa kɛ jeɔ a he.
7 Niatsɛ yeɔ ohiatsɛ nɔ,
Nɛ nɔ nɛ paa nɔ́ ngɛ nɔ dɛ ɔ, e ji nyɔguɛ kɛ ha nɔ nɛ paa lɛ nɔ́ ɔ.
8 Nɔ nɛ duɔ yayami ɔ ma kpa haomi,
Nɛ tso nɛ e kɛ gblaa nihi a tue ngɛ e mi mi fumi mi ɔ maa ku.
9 A maa jɔɔ nɔ nɛ haa nɔ nɔ́ faa,*
Ejakaa e kɛ ohiatsɛ gbaa e niye ní.
11 Nɔ nɛ e tsui mi tsɔ nɛ́ e munyu hɛ mi ngɛ nyami ɔ,
E kɛ matsɛ maa bɔ huɛ.
12 Yehowa buɔ nile he,
Se e plɛɔ nɔ sisili a munyuhi a hɛ mi kɛ buɔ si.
13 Hejɔtsɛ deɔ ke: “Jata ngɛ kpo ɔ nya!
E maa gbe mi ngɛ magbɛ ɔ nɔ!”*
14 Yihi nɛ a wo blɔ yaya a,* a nya mi ngɛ kaa muɔ nɛ mi kuɔ.
Nɔ nɛ Yehowa bu lɛ fɔ ɔ maa nɔ mi.
15 Kuasia jemi mɛtɛ jokuɛ* tsui he,
Se tsɔsemi tso ma je lɛ kɛ je jokuɛ ɔ he kɛ ya se kulaa.
16 Nɔ nɛ fiaa ohiatsɛ ojo konɛ e ná ní babauu kɛ piɛɛ nɔ́ nɛ e ngɛ ɔ he,
Kɛ nɔ nɛ keɔ niatsɛ ní ɔ
Maa ye ohia.
17 Tã tue nɛ o bu juɛmitsɛmɛ a munyuhi tue,
Konɛ o kplɛɛ ye nile ɔ nɔ kɛ o tsui tsuo,
18 Ejakaa e hi kaa o maa ngɔ mɛ kɛ to o tsui mi tɔɔ,
Bɔ nɛ pee nɛ mɛ tsuo a hi o nya be fɛɛ be.
19 Bɔ nɛ pee nɛ o kɛ o hɛ nɛ fɔ Yehowa nɔ ɔ,
I ngɛ mo nile hae mwɔnɛ ɔ.
20 I ngma mo womi momo
Kɛ wo mo ga, womi nɛ ma ha mo nile,
21 Nɛ́ maa tsɔɔ mo anɔkuale munyuhi nɛ a ma nyɛ maa fĩa kɛ fɔ a nɔ,
Konɛ o nyɛ nɛ o kpale o se kɛ ya nɔ nɛ e tsɔ mo ɔ ngɔ kɛ amaniɛ bɔmi nɛ da.
22 Koo sisi ohiatsɛ akɛnɛ e ji ohiatsɛ ɔ he je,
Nɛ koo naa nɔ nɛ e ní ngɛ mɔbɔ ɔ nɔ ngɛ ma agbo ɔ nya,*
23 Ejakaa Yehowa nitsɛ maa fã a he,
Nɛ e maa ngɔ nihi nɛ fiaa mɛ ojo ɔ a wami.*
24 O kɛ abofutsɛ nɛ ko bɔ,
Nɛ o kɛ nɔ ko nɛ e mi mi pɔɔ fumi hu nɛ ko nyɛɛ,
25 Bɔ nɛ pee nɛ o ko kase e blɔ ɔmɛ kɔkɔɔkɔ,
Nɛ́ o ba tsɔ̃ o he* klama.
26 Ko ya piɛɛ nihi nɛ a saa* nɔ dɛ kɛ woɔ si,
Nɛ́ a daa nɔ se kɛ paa sika a, a he.
27 Ke o be nɔ́ ko nɛ o kɛ maa wo hiɔ ɔ,
A ma je o sa ngɛ o sisi!
28 Koo hɛ blema buna*
Nɛ o nɛmɛ ɔmɛ ma a.
29 Anɛ o na nɔ ko nɛ e he be ngɛ e ní tsumi mi lo?
Jamɛ a nɔ ɔ maa da si ngɛ matsɛmɛ a hɛ mi;
E be si dae ngɛ nimli guhi a hɛ mi.