La
Kɛ ha la nɔ hyɛlɔ ɔ. La nɛ David po.
31 Oo Yehowa, o ngɔ nɛ i sa we ngɛ.
Ko ha nɛ ye hɛ mi nɛ pue si.
Mo kpɔ̃ mi ngɛ o dami ɔ he je.
2 Mo ta tue ha mi.*
Mo ba kpɔ̃ mi esɔ.
Moo pee yoku nɛ poɔ ye he piɛ,
Ma nɛ he wa, konɛ o he ye yi wami.
3 Ejakaa mo ji ye tɛsa kɛ ye he piɛ pomi he;
O biɛ ɔ he je ɔ, o maa nyɛɛ ye hɛ mi, nɛ o ma kudɔ mi.
4 O ma je mi kɛ je ya nɛ a wo kɛ tsɔ mi klama ngɛ laami mi ɔ mi,
Ejakaa mo ji ye gbogbo nɛ he wa.
5 I tu ye mumi ɔ ngɔ wo o dɛ mi.
Oo Yehowa ye Mawu anɔkualetsɛ, mo lɛ o kpɔ̃ mi.
6 I sume nihi nɛ a jaa amagahi nɛ a he be se nami,
Se imi lɛɛ, i ngɔ ye hɛ kɛ fɔ Yehowa nɔ.
8 O ngɔɛ mi kɛ wui ye he nyɛlɔ ɔ dɛ mi,
Mohu ɔ, o ha nɛ i da he ko nɛ ngɛ slɔkee.*
9 Ao Yehowa, naa mi mɔbɔ, ejakaa i ngɛ haomi mi.
Nɔ́ nami ha nɛ ye hɛngmɛ nɔ pee kusuu, nɛ ye nɔmlɔ tso ɔ tsuo hu gbɔjɔ.*
10 Ye si himi mi hyi tɔ kɛ aywilɛho yemi sɔuu,
Nɛ ye jeha amɛ hyi tɔ kɛ kɛmɛmi sɔuu.
Ye he wami nɔ ngɛ gbɔe ngɛ ye tɔmi ɔ he je;
Ye wu ɔmɛ gbɔjɔ.
11 Ye he nyɛli tsuo yeɔ ye he fɛu,
Titli ɔ, ye kpɔ mi bi ɔmɛ.
Nɛ ye huɛmɛ yeɔ mi gbeye;
Ke a na mi ngɛ ma mi ɔ, kɛkɛ a tu fo.
12 A je mi kɛ je a tsui* mi, nɛ a hɛ je ye nɔ, e ngɛ kaa nɔ́ nɛ i gbo;
I pee kaa buɛ nɛ ywia.
13 I nu munyu yayahi fuu nɛ nihi tu kɛ kɔ ye he;
Gbeye níhi bɔle mi kɛ kpe.
Ke a bua a he nya, nɛ a pee kake kɛ wo ye he ɔ,
A soɔ ye yi nɔ konɛ a gbe mi.*
14 Se i ngɔ ye hɛ kɛ fɔ o nɔ, Oo Yehowa.
I jajeɔ ke: “Mo ji ye Mawu.”
15 Ye ligbi* ɔmɛ ngɛ o dɛ mi.
Mo kpɔ̃ mi kɛ je ye he nyɛli ɔmɛ kɛ nihi nɛ a waa mi yi mi ɔ a dɛ mi.
16 Ha nɛ o hɛ mi nɛ kpɛ ngɛ o sɔmɔlɔ ɔ nɔ.
Ngɔɔ o suɔmi nɛ se pui ɔ kɛ he ye yi wami.
17 Ao Yehowa, ke i tsɛ mo ɔ, ko ha nɛ ye hɛ mi nɛ pue si.
Yiwutsotsɛmɛ a hɛ mi nɛ pue si;
Á ma a nya ngɛ Yɔkɔ* mi.
18 Nyahi nɛ yeɔ lakpa a nɛ a pee dii,
Nyahi nɛ a tuɔ he nɔ womi, fĩami, kɛ nɔ buimi munyuhi kɛ siɔ dalɔ ɔ.
19 Hyɛ bɔ nɛ o kpakpa peemi ɔ hiɛ babauu ha!
O kɛ to ha nihi nɛ yeɔ mo gbeye ɔ, nihi nɛ saa we ngɛ o ngɔ ɔ,
Nɛ o je lɛ kpo ngɛ adesahi tsuo a hɛ mi.
20 O maa ngɔ mɛ kɛ laa ngɛ laami he ɔ ngɛ o hɛ mi,
Kɛ je adesahi a nɛ a soɔ a yi nɔ ɔ a he;
O maa ngɔ mɛ kɛ laa ngɛ o gba a sisi,
Kɛ je nihi nɛ a jɛɔ nɔ ɔ a he.*
21 Á je Yehowa yi,
Ejakaa e je e suɔmi nɛ se pui ɔ kpo kɛ tsɔɔ mi ngɛ nyakpɛ blɔ nɔ ngɛ ma nɛ a sa yi ko mi.
22 Imi lɛɛ, ye tsui po, nɛ i de ke:
“Ye hɛ mi ma kpata ngɛ o hɛ mi.”
Se benɛ i fo ya kɛ pue o nɔ ɔ, o nu pɛɛ nɛ i kpa mo kɛ bi yemi kɛ buami ɔ.
23 Nyɛɛ suɔ Yehowa, nyɛ nihi tsuo nɛ nyɛ yeɔ lɛ anɔkuale ɔ!
Yehowa poɔ anɔkualetsɛmɛ a he piɛ,
Se e gblaa nɔ fɛɛ nɔ nɛ woɔ e he nɔ ɔ tue wawɛɛ nitsɛ.
24 Nyɛ nihi tsuo nɛ nyɛ ngɛ Yehowa mlɛe,
Nyɛɛ pee kã nɛ nyɛ tsui nɛ ná he wami.