Yesaya
62 Zion he je ɔ, i be ye nya mae,
Nɛ Yerusalem he je ɔ, i be dii pee,
Kɛ yaa si be nɛ e dami ɔ ma kpɛ kaa la
Nɛ́ e yi wami hemi ɔ maa tso kaa kane.
2 “Oo yo, je ma amɛ maa na o dami ɔ,
Nɛ matsɛmɛ ɔmɛ tsuo maa na o hɛ mi nyami ɔ.
Nɛ a kɛ biɛ ehe ma tsɛ mo,
Biɛ nɛ Yehowa nitsɛ nya maa tsɔɔ.
3 O maa pee jlasi nɛ ngɛ fɛu ngɛ Yehowa dɛ mi,
O maa pee matsɛmɛ a yi fimi nɔ́ ngɛ o Mawu ɔ dɛ mi.
4 A be mo tsɛe ke yo nɛ a kua lɛ hu,
Nɛ a be o zugba a tsɛe ke zugba nɛ a kua lɛ hu.
Mohu ɔ, a ma tsɛ mo ke, Ye Bua Jɔ E He,
Nɛ a ma tsɛ o zugba a ke Nɔ Nɛ E Sɛ Gba Si Himi Mi.
Ejakaa Yehowa bua maa jɔ o he,
Nɛ o zugba a maa pee kaa nɔ nɛ e sɛ gba si himi mi.
5 Ejakaa kaa bɔ nɛ niheyo kɛ yomiyo sɛɔ gba si himi mi ɔ,
Jã nɛ o binyumu ɔmɛ kɛ mo maa sɛ gba si himi mi.
Nɛ kaa bɔ nɛ ayɛflo huno bua jɔɔ e we ayɛflo he ɔ,
Jã nɛ o Mawu ɔ bua maa jɔ o he.
6 Oo Yerusalem, i ngɔ buli kɛ to o gbogbo ɔmɛ a nɔ.
Daa nɛ ɔ, nyɔ kɛ pia tsuo ɔ, a ko ma a nya.
Nyɛ nihi nɛ nyɛ woɔ Yehowa ta a,
Nyɛ ko jɔɔ nyɛ he,
7 Nɛ ko ha nɛ e jɔɔ e he kɛ yaa si e ma ha nɛ Yerusalem maa ma si kpɛii,
Ee, kɛ yaa si e ma ha nɛ nihi nɛ a ngɛ je ɔ mi tsuo ɔ ma je e yi.”
8 Yehowa kɛ e hiɔ nine kã kita, e kɛ e kɔni nɛ he wa a kã kita ke:
“I kɛ o ngma* be o he nyɛli hae hu kaa a niye ní,
Nɛ ma se bi be o wai ehe nɛ o gbo dengme kɛ ná a nue hu.
9 Se nihi nɛ a ngɛ ngma nya buae ɔ maa ye nɛ a ma je Yehowa yi;
Nɛ nihi nɛ a ngɛ wai yiblii mwɔɔe ɔ maa nu wai ngɛ ye yale klɔuklɔu ɔ mi.”
10 Nyɛɛ gu mi kɛ be, nyɛɛ gu agbo ɔ mi kɛ be,
Nyɛ dla blɔ ɔ nɔ kɛ ha ni ɔmɛ.
Nyɛ gba blɔ, Nyɛ gba blɔ ngua a.
Nyɛ je tɛhi tsuo ngɛ blɔ ɔ mi.
Nyɛ wo okadi* ɔ nɔ kɛ ha ma amɛ.
11 Hyɛ! Yehowa jaje kɛ su zugba a nyagbe he ɔmɛ ke:
“De Zion biyo ɔ ke,
‘Hyɛ! O yi wami hemi ma.
Hyɛ! Hiɔwo ɔ ngɛ e dɛ,
Nɛ hiɔwo ɔ ngɛ e hɛ mi.’”
12 A ma tsɛ mɛ ke ni klɔuklɔuhi, nihi nɛ Yehowa kpɔ̃ mɛ,
Nɛ a ma tsɛ mo ke, Ma Nɛ A Hla E Se Blɔ, Ma Nɛ A Kua We Lɛ.