Mika
4 Ngɛ nyagbe ligbi ɔmɛ a mi ɔ,*
Yehowa we ɔ yoku ɔ
Maa ma si kpɛii ngɛ yoku ɔmɛ a nɔ,
Nɛ a ma wo nɔ kɛ be yoku wawi ɔmɛ a he,
Nɛ je ma amɛ tsuo ma bu yuu kɛ ya he.
2 Nɛ nihi babauu maa ya, nɛ a ma de ke:
“Nyɛɛ ba, nyɛ ha nɛ waa kuɔ kɛ ya Yehowa yoku ɔ nɔ,
Kɛ ya Yakob Mawu ɔ we ɔ.
E maa tsɔɔ wɔ e blɔ ɔmɛ,
Nɛ wa maa nyɛɛ e blɔ ɔmɛ a nɔ.”
Ejakaa mlaa* maa je Zion,
Nɛ Yehowa munyu ɔ maa je Yerusalem.
3 E maa kojo ngɛ je mahi babauu a kpɛti,
Nɛ e ma dla sanehi kɛ ha je mahi nɛ a he wa nɛ a ngɛ tsitsaa a.
A kɛ a klaate ɔmɛ maa sɔ̃ kpakplaahi,
Nɛ a kɛ a we akplɔ ɔmɛ maa sɔ̃ tso he suami hahi.
Je ma ko be klaate nɔ woe kɛ si je ma ko,
Nɛ a be ta hwumi kasee hulɔ.
4 Nɔ fɛɛ nɔ maa hi si ngɛ lɛ nitsɛ e wai tso kɛ e fig tso sisi,
Nɛ nɔ ko nɔ ko be a he gbeye woe,
Ejakaa Yehowa tabohiatsɛ ɔ lɛ de.*
5 Je ma fɛɛ je ma maa nyɛɛ ngɛ e mawu ɔ biɛ mi,
Se wɔɔ lɛɛ, wa maa nyɛɛ ngɛ Yehowa wa Mawu ɔ biɛ mi kɛ ya neneene.
6 Yehowa de ke, “jamɛ a ligbi ɔ,
Ma bua nihi nɛ a ngɛ kpɛ̃ɛe ɔ a* nya,
Nɛ ma bua nihi nɛ a gbɛ fĩa,
Kɛ nihi nɛ i wa mɛ yi mi ɔ a nya.
7 Ma ha nɛ nihi nɛ a ngɛ kpɛ̃ɛe ɔ* maa piɛ,
Nɛ ma ha nɛ nihi nɛ a je mɛ kɛ ho tsitsaa lokoo ya a nɛ́ a pee je ma nɛ he wa;
Nɛ Yehowa maa ye a nɔ matsɛ ngɛ Zion Yoku ɔ nɔ,
Kɛ je amlɔ nɛ ɔ, kɛ yaa neneene.
8 Se mo, mɔ nɛ o poɔ to kuu ɔ he piɛ,
Zion biyo ɔ kpongu ɔ,
O ngɔ lɛ e maa ba, ee, o ngɔ lɛ kekleekle* nɔ yemi ɔ maa ba,
Yerusalem biyo ɔ nɔ́ ji matsɛ yemi ɔ.
9 Nɛ mɛni he je nɛ o ngɛ ngmlaa kpae wawɛɛ jã a?
Anɛ o be matsɛ lo
Aloo o ga woli ɔmɛ tsuo a hɛ mi kpata
Nɛ lɔ ɔ he je nɛ o ngɛ piie wawɛɛ kaa yo nɛ e ngɛ fɔe ɔ?
10 Oo Zion biyo, wuwlua si nɛ o kɛmɛ,
Kaa yo nɛ e ngɛ fɔe,
Ejakaa jehanɛ lɛɛ, o maa je ma a mi nɛ o ma ya hi nga nɔ.
O maa ya Babilon tɔɔ,
Nɛ lejɛ ɔ lɛ a ma kpɔ̃ mo ngɛ;
Lejɛ ɔ lɛ Yehowa ma kpɔ̃ mo ngɛ kɛ je o he nyɛli ɔmɛ a dɛ mi.
11 Amlɔ nɛ ɔ, je mahi babauu ma bua a he nya kɛ wo mo;
A ma de ke, ‘Ha nɛ a ble lɛ,
Nɛ ha nɛ wa hɛngmɛ nɛ e na kaa nɔ́ nɛ ɔ ba Zion nɔ.’
12 Se a li Yehowa juɛmi ɔ,
A nui e yi mi tomi ɔ sisi;*
Ejakaa e ma bua a nya kaa ngma nɛ a poo lɛ ehe nɛ a kɛ yaa ngma fiaami he.
13 Oo Zion biyo, moo te si nɛ o fiaa ngma;
Ejakaa ma tsake o koli ɔmɛ kɛ pee dade,
Nɛ ma tsake o nane kokloto ɔmɛ kɛ pee akɔblee,
O maa ywia nihi babauu,
O maa ngɔ a ní nɛ a gu sisimi blɔ nɔ kɛ ná a kɛ ha Yehowa,
Nɛ o maa ngɔ a níhi tsuo kɛ ha zugba a tsuo nɔ anɔkuale Nyɔmtsɛ ɔ.”