Yesaya
51 “Nyɛɛ bu mi tue, nyɛ nihi nɛ nyɛ hlaa dami se blɔ ɔ,
Nyɛ nihi nɛ nyɛ ngɛ Yehowa se blɔ hlae ɔ.
Nyɛɛ hyɛ tɛsa a nɛ a je nyɛ kɛ je mi ɔ
Kɛ tɛ tsuami he ɔ, he nɛ a tsua nyɛ ngɛ ɔ.
2 Nyɛɛ hyɛ nyɛ tsɛ Abraham
Kɛ nyɛ nyɛ Sara, nɔ nɛ e fɔ nyɛ ɔ.*
Ejakaa benɛ ma tsɛ Abraham ɔ, lɛ nɔ kake pɛ,
Se i jɔɔ lɛ nɛ i ha nɛ e he ba hiɛ.
3 Yehowa maa wo Zion bua.
E maa wo e níhi nɛ a hɛ mi kpata a tsuo a bua,
E ma ha nɛ e nga a nɔ maa pee kaa Eden,
Nɛ e nga kplanaa a nɔ maa pee kaa Yehowa abɔɔ ɔ.
Bua jɔmi kɛ nyami
Kɛ sina kɛ la ngɔngɔɛ maa hi e mi.
4 Oo ye we bi, nyɛɛ bu mi tue,
Ye ma, nyɛ ta tue ha mi.
Ejakaa i kɛ mlaa ko ma ha,
Nɛ i kɛ ye dami ɔ maa ma si kaa kane kɛ ha je ma amɛ.
5 Ye dami ɔ su si ta.
Ye yi wami hemi ɔ maa je kpo,
Nɛ ye kɔni maa kojo je ma amɛ.
Ye nɔ lɛ zugba kpɔhi nɛ nyu bɔle mɛ ɔ maa ngɔ a hɛ kɛ fɔ,
Nɛ a maa mlɛ ye kɔni ɔ.*
6 Nyɛ wo nyɛ yi nɔ nɛ nyɛɛ hyɛ hiɔwe,
Nɛ nyɛɛ hyɛ zugba a nɛ ngɛ hiɔwe sisi ɔ.
Ejakaa hiɔwe ɔ maa laa kaa lasuku;
Zugba a ma puplee kaa tako,
Nɛ nihi nɛ a ngɛ nɔ ɔ ma gbo kaa pwɔmihi.*
Se ye yi wami hemi ɔ maa hi si kɛ ya daa,
Nɛ ye dami ɔ se be poe gblegbleegble.*
7 Nyɛɛ bu tue nyɛ nihi nɛ nyɛ le nɔ́ nɛ da,
Nyɛ nihi nɛ ye mlaa a* ngɛ nyɛ tsui mi.
Munyu nɛ nimli adesahi ngɛ tue kɛ ngɛ mi sie ɔ nɛ ko wo nyɛ he gbeye,
Nɛ a jɛmi munyu ɔmɛ hu nɛ ko wo nyɛ he gbeye.
8 Ejakaa wɔyewɔye maa ye mɛ kaa tade;
Wɔyewɔye* maa ye mɛ kaa bo nɛ a kɛ lohwe he bwɔmi pee.
Se ye dami ɔ maa hi si kɛ maa ya neneene,
Nɛ ye yi wami hemi ɔ maa hi si yi nɔhi tsuo.”
9 Oo Yehowa kɔni!
Moo tee si! Tee si nɛ o ngɔ he wami kɛ ha o he kaa bo,
Tee si kaa bɔ nɛ o pee blema a, kaa bɔ nɛ o pee yi nɔhi nɛ be ɔ.
Anɛ pi mo nɛ o ywia Rahab* wɔtsɔwɔtsɔ ɔ lo?
Anɛ pi mo nɛ o gbɔ wo mi lohwe ngua a nɔ́ ɔ lo?
10 Anɛ pi mo nɛ o ha nɛ wo nɛ mi kuɔ ɔ mi nyu ɔ si ɔ lo?
Anɛ pi mo nɛ o je blɔ kɛ gu wo nɛ mi kuɔ ɔ mi kɛ ha nihi nɛ o kpɔ̃ mɛ ɔ nɛ a nyɛɛ nɔ kɛ po wo ɔ lo?
11 Nihi nɛ Yehowa kpɔ̃ mɛ ɔ maa kpale kɛ ba.
A kɛ bua jɔmi ma he ose kɛ ba Zion,
Nɛ bua jɔmi nɛ se pui maa hi a yi kaa jlasi.*
A ma nya, nɛ a bua maa jɔ wawɛɛ,
Nɛ aywilɛho kɛ kɔmɔ yemi maa be kɛ ho.
12 “Imi nitsɛ lɛ i ngɛ o bua woe.
Mɛni he je nɛ e sa kaa o ye nɔmlɔ adesa nɛ ma gbo ɔ gbeye?
Mɛni he je nɛ e sa kaa o ye nɔmlɔ bi nɛ e ma ngla kaa bɔ nɛ nga mumu nglaa a gbeye?
13 Mɛni he je nɛ o hɛ je Yehowa o Bɔlɔ ɔ,
Nɔ nɛ e bli hiɔwe ɔ mi nɛ e fia zugba a sisi tomi ɔ nɔ ɔ?
Daa ligbi ɔ, o yeɔ nɔ nɛ e ngɛ mo yi mi wae* ɔ we abofu ɔ gbeye,
Kaa nɔ́ nɛ e ma nyɛ ma kpata o hɛ mi.
Amlɔ nɛ ɔ, jije yi mi walɔ ɔ we abofu ɔ ngɛ?
14 E be kɛe nɛ a maa ngmɛɛ nɔ nɛ a wo lɛ kɔsɔkɔsɔ nɛ e mi dɔ ɔ he.
E be gboe, e be muɔ mi yae,
Nɛ e nya mi ngma be lɛ bɔe.
15 Se imi ji Yehowa o Mawu ɔ nɛ,
Nɔ nɛ e klɛɔ wo ɔ mi nɛ e haa nɛ e we oslɔke ɔmɛ peeɔ hamahama a,
—e biɛ ji Yehowa tabohiatsɛ.
16 Ma ngɔ ye munyu ɔ kɛ wo o nya mi,
Nɛ ma ngɔ ye nine hɔ̃ ɔ kɛ ha o nɔ,
Bɔ nɛ pee nɛ ma ngɔ hiɔwe ɔ kɛ ma si, nɛ ma fia zugba a sisi tomi ɔ
Nɛ ma de Zion ke, ‘Ye ma ji mo.’
17 O hɛ nɛ tsɛ̃! O hɛ nɛ tsɛ̃! Tee si, O Yerusalem,
Mo nɛ o nu nɔ́ nɛ ngɛ Yehowa we abofu kplu nɛ e hɛɔ mi ɔ.
O nu nɔ́ nɛ ngɛ e kɔnkɔ ɔ mi;
Kplu nɛ haa nɛ nɔ dedeɔ ɔ, o lɔ mi tsuo.
18 E bimɛ nɛ e fɔ ɔ, a kpɛti nɔ ko be nɛ maa tsɔɔ lɛ blɔ,
Nɛ bimɛ nɛ e tsɔse ɔ, a kpɛti nɔ kake po be nɛ maa ta e dɛ mi.
19 Níhi enyɔ nɛ ɔ lɛ maa ba o nɔ.
Hɛ mi kpatami kɛ puɛmi, hwɔ kɛ klaate!
Mɛnɔ lɛ e maa ye o he kɔmɔ?
Mɛnɔ lɛ e maa wo o bua?
20 O bimɛ ɔmɛ hɛli.
A pueɔ si ngɛ blɔ ɔmɛ a he*
Kaa nga mi jijɔhi nɛ a du ya.
Yehowa we abofu ɔ kɛ o Mawu tue gblami ɔ hyi mɛ tɔ.”
21 Lɔ ɔ he ɔ, i kpa mo pɛɛ nɛ o bu nɔ́ nɛ ɔ tue,
Mo yo nɛ o hao nɛ o de, pohu pi wai nɛ o nu.
22 Nɔ́ nɛ Yehowa o Nyɔmtsɛ ɔ, o Mawu ɔ nɛ fãa e we bi a he ɔ ngɛ dee ji nɛ ɔ nɛ:
“Hyɛ! Ma kpɔ̃ kplu nɛ haa nɛ nɔ dedeɔ ɔ ngɛ o dɛ,
Nɛ ji kɔnkɔ ɔ, ye we abofu kplu ɔ;
O be nɔ́ nɛ ngɛ mi ɔ nue hu.
23 Ma ngɔ kɛ wo nihi nɛ a waa mo yi mi ɔ a dɛ,
Nihi nɛ a de mo* ke, ‘Ba si nɛ waa nyɛɛ kɛ be ngɛ o nɔ ɔ!’
Lɔ ɔ he ɔ, o ngɔ o se mi kɛ pee zugba,
O ngɔ kɛ pee blɔ kɛ ha mɛ konɛ a nyɛɛ nɔ.”