La
Kɛ ha la nɔ hyɛlɔ ɔ; ngɛ Yedutun* nya. La nɛ David po.
39 I de ke: “Ma hyɛ ye nane nya
Konɛ i kɛ ye lilɛ nɛ ko pee yayami.
Be abɔ nɛ yiwutsotsɛ ngɛ ye hɛ mi ɔ,
Ma fĩ ye nya kɛ po ye nya he piɛ.”
2 I ma ye nya nɛ i pee dii;
I tui nɔ́ kpakpa po he munyu,
Se ye piimi ɔ nya wa.
3 Ye tsui dɔ la ngɛ ye mi.
Benɛ i ngɛ níhi a he susue ɔ,* la a ya nɔ nɛ e tso.
Kɛkɛ nɛ ye lilɛ de ke:
4 “Ao Yehowa, moo ye bua mi konɛ ma le bɔ nɛ ye nyagbe maa hi ha,
Kɛ ligbi abɔ nɛ ma ye,
Konɛ ma le bɔ nɛ ye wami ngɛ kpiti* ha.
5 Niinɛ, o ha nɛ ye ligbi ɔmɛ pi kulaa;*
Nɛ ye wami ligbi ɔmɛ ɔ, pi nɔ́ ko kulaa ngɛ o hɛ mi.
Niinɛ, ke adesa fɛɛ adesa ngɛ slɔkee po ɔ, gugwɔ mi kɔɔhiɔ kɛkɛ ji lɛ. (Sela)
6 Ngɛ anɔkuale mi ɔ, adesa wami beɔ kaa nini.
Adesa yaa nɛ e baa gidigidi* yaka gu.
E buaa níhi a nya, se e li nɔ nɛ ma ba ye.
7 Oo Yehowa, mɛni i pa ngɛ blɔ hyɛe mɔ?
Mo pɛ o nɔ lɛ i ngɔ ye hɛ kɛ fɔ.
8 Mo kpɔ̃ mi kɛ je ye tɔmi ɔmɛ tsuo a mi.
Ko ha nɛ kuasia nɛ gbe ye he guɛ.
9 I pee dii;
I nyɛ we nɛ ma bli ye nya,
Ejakaa mo lɛ o ha nɛ e ba jã.
10 Mo je o haomi ɔ ngɛ ye nɔ.
I gbɔjɔ, ejakaa o nine fia mi nɔ́.
11 O gblaa adesa tue kɛ tsɔseɔ lɛ ngɛ e tɔmi he je;
O kpataa e níhi nɛ a he jua wa a hɛ mi kaa bɔ nɛ wɔyewɔye puɛɔ nɔ́ ɔ.
Niinɛ, adesa fɛɛ adesa a, gugwɔ mi kɔɔhiɔ kɛkɛ ji lɛ. (Sela)
12 Ao Yehowa, moo bu ye sɔlemi ɔ tue,
Moo nu ya nɛ i ngɛ foe kɛ ngɛ yemi kɛ buami bie ɔ.
Ko ma o hɛ kɛ fɔ ye vonyu ɔ nɔ.
Ejakaa nubwɔ kɛkɛ ji mi ngɛ o hɛ mi,
I ngɛ kaa blɔ hialɔ nɛ bee kɛ yaa* kaa ye nɛmɛ ɔmɛ.
13 Mo je o we abofu hɛngmɛ ɔ ngɛ ye nɔ konɛ ye bua nɛ jɔ,
Loko ma ba gbo, nɛ́ a be mi nae hu.”