Yesaya

59 Hyɛ! Yehowa nine be kpiti tsɔ nɛ e kɛ be nyɛe ma he nyɛ yi wami,

Nɛ e tue hu tsi we* nɛ e be nyɛe maa nu nɔ́.

Nyɛ yayami ɔmɛ a he je ɔ, e ngɔ e hɛ mi kɛ laa nyɛ,

Nɛ e bui nyɛ tue.

 3 Ejakaa muɔ ngɛ nyɛ dɛ mi

Nɛ tɔmihi ngɛ nyɛ nine nguɛhi a he.

 4 Nɔ ko nɔ ko hla we dami se blɔ,

Nɛ nɔ ko nɔ ko yɛ kojomi he nɛ e ya tuɔ anɔkuale.

 5 A ga yayami ɔmɛ ngɛ kaa sinɔ duɔtsɛ hlui nɛ pɛ,

Nɛ a loɔ anani ya.

Nɔ fɛɛ nɔ nɛ maa ye a hlui ɔ ma gbo,

Nɛ hlui ɔ nɛ a pɛ ɔ, sinɔ duɔtsɛ lɛ je mi.

 6 Anani ya nɛ a loɔ be nyɛe maa pee tade ha mɛ,

Nɛ a kɛ nɔ́ nɛ a pee ɔ hu be nyɛe maa ha a he.

A ní tsumi ɔmɛ yeɔ nɔ awi,

Nɛ yiwutso ní peepee ngɛ a dɛ mi.

 7 A nane he sɔɔ kɛ peeɔ yayami,

Nɛ a he sɔɔ kɛ pueɔ nɔ nɛ pee we nɔ́ ko muɔ si.

Nɔ́ yaya sɔuu lɛ hyi a juɛmi mi;

Hɛ mi kpatami kɛ haomi ngɛ a blɔ ɔmɛ a nɔ.

 8 A li tue mi jɔmi blɔ ɔ,

Nɛ dami sane yemi be a blɔ ɔmɛ a nɔ.

A ha nɛ a blɔ ɔmɛ kpɛ̃;

Nɔ fɛɛ nɔ nɛ maa nyɛɛ nɔ ɔ be tue mi jɔmi náe.

 9 Lɔ ɔ he je nɛ dami sane yemi kɛ wa he kɛ,

Nɛ dami ná we wɔ ɔ nɛ.

Wa ya nɔ nɛ wa hyɛ la blɔ, se hyɛ! diblii mohu lɛ ngɛ;

Wa hyɛ blɔ kaa la ma kpɛ, se loloolo ɔ, wa ngɛ diblii mi nyɛɛe.

10 Wa tataa si kɛ hlaa gbogbo kaa hɛ yuyuili;

Wa yaa nɔ nɛ wa tataa si kaa nihi nɛ a be hɛngmɛ.

Wa tɛɔ si piani katakata kaa nɔ́ nɛ nyɔ mi;

Wa ngɛ kaa gbogboehi ngɛ he wali a kpɛti.

11 Wɔ tsuo wa ngɛ huãe kaa osisiblisihi

Nɛ wa yeɔ aywilɛho kaa beleku lahuɛhi.

Wa hyɛ dami sane yemi blɔ, se eko bɛ;

Wa hyɛ yi wami hemi blɔ, se e kɛ wa he kɛ wawɛɛ.

12 Ejakaa wa we atuã tsɔmi ɔmɛ hiɛ babauu ngɛ o hɛ mi;

Wa he yayami ɔmɛ eko fɛɛ eko yeɔ odase kɛ siɔ wɔ.

Ejakaa wa we atuã tsɔmi ɔmɛ kɛ wɔ ngɛ;

Wa le wa tɔmi ɔmɛ saminya.

13 Wa pee yayami nɛ wa kua Yehowa;

Wa plɛ wa se kɛ wo wa Mawu ɔ;

Wa tu yi mi wami kɛ atuã tsɔmi he munyu;

Wa ngɔ lakpa hɔ, nɛ wa tu lakpa munyuhi kɛ je wa tsui mi.

14 A fiee dami sane yemi kɛ ho se ya,

Nɛ dami ngɛ se lokoo;

Ejakaa anɔkuale yemi* nɔ si ngɛ ma a he nya buami he ɔ,

Nɛ nɔ́ nɛ da nyɛ we nɛ e sɛ lejɛ ɔ.

15 Anɔkuale yemi* laa,

Nɛ nɔ fɛɛ nɔ nɛ jeɔ e he kɛ jeɔ nɔ́ yaya he ɔ, a haa e ní.

Yehowa na nɔ́ nɛ ɔ nɛ e bua jɔɛ he,*

Ejakaa dami sane yemi ko be.

16 E na kaa nyumu ko be,

Nɛ e pee lɛ nyakpɛ kaa nɔ ko nɔ ko pee we he nɔ́ ko,

Lɔ ɔ he ɔ, lɛ nitsɛ e kɔni ngɔ yi wami hemi kɛ ba,*

Nɛ lɛ nitsɛ e dami ye bua lɛ.

17 Kɛkɛ nɛ e wo dami kaa dade tade,

Nɛ e bu yi wami hemi dade pɛɛ.*

E wo lue yemi tade kaa he hami nɔ́

Nɛ e kɛ hɛdɔ ha e he kaa tade.*

19 A maa ye Yehowa biɛ ɔ gbeye kɛ je pusinɔ he,

Nɛ a maa wo e hɛ mi nyami kɛ je puje he,

Ejakaa e maa ba kaa pa nɛ hia,

Nɛ́ Yehowa mumi ɔ ngɛ lɛ tsitsɛɛe.

20 “Kpɔlɔ ɔ maa ba Zion,

E maa ba nihi nɛ a ngɛ Yakob mi nɛ a kpa yayami peemi ɔ a ngɔ,” Yehowa lɛ de.