5 Mose
32 “Oo hiɔwe, moo bu tue, nɛ ma tu munyu,
Nɛ zugba a nɛ nu ye nya mi munyu.
2 Ye blɔ tsɔɔmi maa nɛ kaa hiɔmi;
Ye munyuhi maa nɛ kaa bɔ́,
Kaa hiɔmi nɛ ngɛ nɛɛ blɛuu kɛ ngɛ nga nɔ puee,
Kaa hiɔmi nɛ ngɛ nɛɛ babaaba kɛ ngɛ tsohi a nɔ puee.
3 Ejakaa ma jaje Yehowa biɛ ɔ.
Nyɛɛ tu wa Mawu ɔ we agboje ɔ he munyu!
4 Tɛ Sa a, e ní tsumihi tsuo hi kɛ pi si,
Ejakaa nɔ́ fɛɛ nɔ́ nɛ e peeɔ ɔ da.
E ji Mawu nɛ yeɔ anɔkuale nɛ e pee we nɔ́ nɛ dɛ kɔkɔɔkɔ;
Dalɔ ji lɛ, nɛ e peeɔ nɔ́ nɛ da.
5 Mɛ lɛ a pee yayami.
Tsa pi e bimɛ ji mɛ, tɔ̃tɔ̃mi ɔ je mɛ nitsɛmɛ.
A ji yi nɔ nɛ kpɛ̃ nɛ e be hanɔ!
6 Ma kuasia nɛ nyɛ be juɛmi
Bɔ nɛ e sa kaa nyɛɛ pee Yehowa ji nɛ ɔ lo?
Nɔ nɛ e pee nyɛ nɛ e kɛ nyɛ ma si kpɛii ɔ,
Pi lɛ ji nyɛ Tsɛ nɛ ha nɛ nyɛ ba wami mi lo?
7 Mo kai blema ligbi ɔmɛ;
Nyɛ susu yi nɔhi nɛ be ɔ a jeha amɛ a he.
Mo bi o tsɛ, nɛ e ma de mo;
Mo bi o nikɔtɔma amɛ, nɛ a maa gba mo.
8 Benɛ Nɔ Nɛ E Nɔ Kuɔ Pe Kulaa a ha je ma amɛ a weto ní ɔ,
Benɛ e gba Adam bimɛ ɔmɛ a* mi kɛ je a sibi a he ɔ,
E wo huzu ha ma amɛ
Ngɛ Israel bi ɔmɛ a hiɛmi nya.
9 Ejakaa Yehowa we bi ji e blɔ fa mi nɔ́;
Yakob ji e weto ní.
10 E na lɛ ngɛ nga zugba nɔ,
Ngɛ nga kplanaa nɛ nɔ́ ko nɔ́ ko be nɔ, nɛ huhui ngɛ nɔ ɔ nɔ.
E bɔle lɛ kɛ kpe nɛ e kɛ po e he piɛ, e hyɛ e nɔ,
Nɛ e bu e he kaa e hɛngmɛ nɔ anani.*
11 Kaa bɔ nɛ kɔle hwanyaa e tsu,
Nɛ e teɔ ngɛ e bimɛ a yi nɔ,
Nɛ e gbɛɛ e pɛlihi a mi, nɛ e woɔ mɛ,
Nɛ e hɛɛɔ mɛ ngɛ e tsɛli ɔmɛ a nɔ ɔ,
12 Jã kɛ̃ nɛ Yehowa pɛ lɛ e ya nɔ nɛ e nyɛɛ Yakob hɛ mi;
Ma se mawu ko piɛɛ we e he.
13 E ha nɛ e nyɛɛ ngɛ zugba a nɔ hehi nɛ ya hiɔwe,*
Nɛ e ye ngmɔ mi niba ní.
E ha nɛ e ye tɛ sa mi hwo
Kɛ tɛ sa nɛ he wa mi nu.
14 E ha lɛ bɔta nɛ a kɛ nahi a nyɔ nyu pee kɛ tohi a nyɔ nyu,
Kɛ jijɔhi nɛ a hi pe kulaa a,*
Kɛ Bashan agbosuhi, kɛ akpakpohi,
Kɛ hwiit nɛ hi pe kulaa;
Nɛ o nu dã nɛ a kɛ wai yiblii mi nyu* pee.
15 Benɛ Yeshurun* ba kle ɔ, e tsɔ atuã.
Yeshurun, o ba kle, o fufuu, nɛ o pee tɔjɔɔ.
Lɔ ɔ he ɔ, e kua Mawu, nɔ nɛ pee lɛ ɔ,
Nɛ e bui e yi wami hemi Tɛ Sa a.
16 A ngɔ ma se mawuhi kɛ wo e mi mi la wawɛɛ;
A pee ní hiemi ní* kɛ wo e mi mi la.
17 A sã afɔle kɛ ha daimoniohi, se pi Mawu,
Kɛ ha mawuhi nɛ a li mɛ,
Mawuhi nɛ a ba lingmi nɛ ɔ pɛ,
Kɛ ha mawuhi nɛ nyɛ nɛmɛ ɔmɛ li mɛ.
18 O hɛ je Tɛ Sa nɛ e ji o tsɛ ɔ nɔ,
Nɛ o kaii we Mawu nɛ fɔ mo ɔ.
19 Benɛ Yehowa na a, e kua mɛ,
Ejakaa e binyumu ɔmɛ kɛ e biyi ɔmɛ ha nɛ e mi mi fu.
20 Lɔ ɔ he ɔ, e de ke, ‘Ma ngɔ ye hɛ mi kɛ laa mɛ;
Ma hyɛ nɔ́ nɛ maa ba a nɔ.
Ejakaa a ji yi nɔ nɛ tue mi ti,
Bimɛ nɛ anɔkuale yemi be a mi.
21 A ngɔ lakpa mawu kɛ wo ye mi mi la wawɛɛ;
A ngɔ a we amagahi nɛ se nami be a he ɔ kɛ wo ye mi mi la.
Lɔ ɔ he ɔ, ma ngɔ ma gu ko kɛ wo a mi mi la;
Ma ngɔ je ma kuasia ko kɛ wo a mi mi la.
22 Ejakaa ye we abofu ɔ mle kɛ la
Nɛ́ maa sã kɛ ya si Yɔkɔ* mi tɔ̃ɔ,
Nɛ e maa sã zugba a kɛ e nɔ niba ní,
Nɛ e ma ha nɛ yoku ɔmɛ a sisi tomi ɔmɛ ma mle kɛ la.
23 Ma ha nɛ a we amanehlu ɔmɛ a nya maa wa;
Ma tsɛ̃ mɛ ye kɛ̃ɛ̃ mi bi ɔmɛ tsuo.
24 Hwɔ ma ha nɛ a maa pee gbedee,
Nɛ asla nɛ nya wa maa mii mɛ, nɛ a hɛ mi ma kpata pɛsɛpɛsɛ.
Ma tsɔ lohwe awi yeli a lungu
Kɛ lohwehi nɛ a sãã si ngɛ zu mi a duɔ kɛ ba a nɔ.
25 Klaate maa gbe mɛ ngɛ magbɛ nɔ;
Gbeye maa hi a we ɔmɛ a mi
Kɛ ha niheyo kɛ yomiyo,
Bimwɔyo kɛ nyumu nɛ e yi mi hɛ mua tsuo.
26 Jinɛ i ko de ke: “Ma gbɛ mɛ kɛ fĩa;
Ma ha nɛ adesahi a hɛ maa je a nɔ,”
27 Se i ye gbeye ngɛ nɔ́ nɛ ye he nyɛlɔ ɔ ma de ɔ he,
Ejakaa eko ɔ, he nyɛli ɔmɛ ma plɛ sane ɔ hɛ mi.
Eko ɔ, a ma de ke: “Wa he wami ɔ ye kunimi;
Tsa pi Yehowa nɛ e pee nɔ́ nɛ ɔ tsuo.”
28 Ejakaa a ji ma nɛ a be juɛmi,*
Nɛ a be nɔ́ sisi numi.
29 I ná nɛ a ngɛ juɛmi! Jinɛ a ko susu nɔ́ nɛ ɔ he.
A ko susu bɔ nɛ a nyagbe maa pee ha a he.
30 Kɛ nɔ kake ma plɛ kɛ fiee nimli 1,000
Nɛ́ ni enyɔ nɛ fiee nimli 10,000 ha kɛɛ?
Ja a Tɛ Sa a jua mɛ,
Nɛ Yehowa je mɛ kɛ ha.
31 Ejakaa a tɛ sa a be kaa wa Tɛ Sa a,
Wa he nyɛli ɔmɛ po nu nɔ́ nɛ ɔ sisi.
32 Ejakaa a wai tso ɔ je Sodom wai tso ɔ mi,
E je Gomora kpongu ɔmɛ a nɔ.
A wai yiblii ɔmɛ ji wai yiblii nɛ duɔ ngɛ mi,
A wai yiblii ɔmɛ dooɔ.
33 A wai ɔ ji sinɔ duɔ,
Blika* duɔ nɛ yeɔ awi.
34 Níhi tsuo nɛ a pee ɔ, i sɔu nya,
Nɛ i ngɔ kɛ to ngɛ ye nito he ɔ.
35 Imi pɛ lɛ i ngɛ he blɔ kaa i yeɔ lue, lɔ ɔ he ɔ, ma gbla a tue
Ngɛ be nɛ a to ɔ mi, be mi nɛ a nane sane si,
Ejakaa a we amanehlu ligbi ɔ su si ta,
Nɛ nɔ́ nɛ ngɛ mɛ mlɛe ɔ maa ba kɛfokɛfo.’
36 Ejakaa Yehowa maa kojo e we bi,
Nɛ e sɔmɔli ɔmɛ a ní maa pee lɛ mɔbɔ*
Ke e na kaa a he wami nɔ gbɔ,
Nɛ e piɛ nɔ nɛ be yemi kɛ bualɔ kɛ nɔ nɛ gbɔjɔ pɛ ɔ.
37 Kɛkɛ ɔ, e ma de ke, ‘Jije a mawu ɔmɛ ngɛ,
Tɛ sa nɛ a ya sa we ngɛ e ngɔ ɔ,
38 Nɔ nɛ jinɛ e yeɔ a we afɔle ɔmɛ a zɔ ɔ,
Nɛ e nuɔ wai nɛ a kɛ sãã dã afɔle ɔmɛ?
Ha nɛ a te si nɛ a ye bua mo.
Ha nɛ a pee o wesa he.
39 Amlɔ nɛ ɔ, nyɛ na kaa imi—imi ji lɛ,
Nɛ ye se ɔ, mawu kpahi be.
I gbeɔ nɔ, nɛ i haa nɔ wami.
I plaa nɔ, nɛ i tsaa nɔ,
Nɛ nɔ ko nɔ ko be nyɛe ma kpɔ̃ nɔ ko kɛ je ye dɛ.
40 Ejakaa i wo ye nine nɔ kɛ ya hiɔwe,
Nɛ i kã kita ke: “Be abɔ nɛ i ngɛ wami mi kɛ yaa neneene nɛ ɔ,”
41 Ke i duɔ ye klaate nɛ ngɛ kpɛe nylamnylam ɔ nya,
Nɛ i dla ye he kɛ ha kojomi ɔ,
Ma ye lue ngɛ ye he nyɛli ɔmɛ a nɔ,
Nɛ ma gbla ni nɛmɛ nɛ a nyɛɔ mi ɔ a tue.
42 Ma ha nɛ ye kɛ̃ɛ̃ mi bi ɔmɛ maa de kɛ muɔ,
Nɛ ye klaate ɔ maa ye lo
Kɛ nihi nɛ a gbe, kɛ nihi nɛ a nuu mɛ nyɔguɛ a muɔ,
Nɛ e maa ye he nyɛlɔ ɔ hɛ mi nyɛɛli ɔmɛ a yi he lo.’
43 Nyɛ je mahi, nyɛɛ kɛ e we bi nɛ nya,
Ejakaa e maa ye e sɔmɔli a muɔ he lue,
Nɛ e maa ye lue ngɛ e he nyɛli a nɔ,
Nɛ e ma kpata kɛ ha e we bi ɔmɛ a zugba a.”*
44 Lɔ ɔ he ɔ, Mose ba nɛ e ba de la nɛ ɔ mi munyu ɔmɛ tsuo, nɛ ni ɔmɛ nu, e kɛ Nun binyumu Hoshea.* 45 Benɛ Mose tu munyu nɛ ɔmɛ tsuo kɛ tsɔɔ Israel ma a tsuo ta a, 46 e de mɛ ke: “Nyɛɛ ngɔ ye kɔkɔ bɔmi munyu ɔmɛ tsuo kɛ wo nyɛ tsui mi mwɔnɛ ɔ, konɛ nyɛ fã nyɛ bimɛ ɔmɛ nɛ a hyɛ nɛ hi nɛ a ye Mlaa nɛ ɔ mi munyu ɔmɛ tsuo a nɔ. 47 Ejakaa munyu nɛ ɔ, pi munyu gu ko kɛkɛ ha nyɛ, se mohu ɔ, e maa pee wami ha nyɛ, nɛ munyu nɛ ɔ ma ha nɛ nyɛ se maa kɛ ngɛ zugba nɛ nyɛ ngɛ Yordan Pa a poe kɛ ya ngɔ ɔ nɔ.”
48 Yehowa kɛ Mose tu munyu jamɛ a ligbi ɔ nɔuu, nɛ e de lɛ ke: 49 “Kuɔɔ kɛ ya Abarim yoku nɛ ɔ, nɛ ji Nebo Yoku ɔ nɛ ngɛ Moab zugba a nɔ, nɛ e hɛ mi tsɔɔ Yeriko ɔ nɔ, nɛ o hyɛ Kanaan zugba a nɛ i kɛ ngɛ Israel bi ɔmɛ hae kaa a nɔ́ ɔ. 50 Lɔ ɔ se ɔ, o ma gbo ngɛ yoku nɛ o ma kuɔmi ɔ nɔ, nɛ a ma bua o nya kɛ ya piɛɛ o we bi ɔmɛ a he,* kaa bɔ nɛ o nyɛmi Aaron gbo ngɛ Hor Yoku ɔ nɔ nɛ a bua e nya kɛ ya piɛɛ e we bi ɔmɛ a he ɔ, 51 ejakaa nyɛ ni enyɔ ɔmɛ tsuo nyɛ yi mi anɔkuale ngɛ Israel bi ɔmɛ a kpɛti ngɛ Meriba nyu nɛ ngɛ Kadesh ngɛ Zin nga a nɔ ɔ he, ejakaa nyɛ pee we mi klɔuklɔu ngɛ Israel bi ɔmɛ a hɛ mi. 52 O maa na zugba a ngɛ tsitsaa, se o be zugba nɛ i kɛ ngɛ Israel bi ɔmɛ hae ɔ nɔ yae.”