Hiob
39 “Anɛ o le be nɛ yoku nɔ apletsihi kɛ fɔɔ lo?
Anɛ o na afugbɛ nɛ e ngɛ fɔe hyɛ lo?
2 Anɛ o kane nyɔhiɔhi abɔ nɛ a kɛ hɛɛɔ mi lo?
Anɛ o le be nɛ a kɛ fɔɔ lo?
3 A buɔ si ke a ngɛ fɔe,
Nɛ a kɔɔmi ɔ se poɔ.
4 A bimɛ ɔmɛ waa ngɛ nga a nɔ nɛ a he ba waa;
A jeɔ nɛ a kpale we a se kɛ bɛ hu.
5 Mɛnɔ lɛ ha nɛ nga mi teji ye e he ɔ,
Nɛ mɛnɔ lɛ pɛne nga mi teji kpa amɛ ɔ?
6 I ngɔ nga kplanaa a kɛ pee e we mi
Nɛ i ngɔ ngo zugba a kɛ pee e hi he.
7 E sume ma a mi he nɛ huhui ngɛ;
E nui nɔ nɛ kpakaa lohwehi ɔ ngmlaa.
8 E kpaa si ngɛ yoku ɔmɛ a nɔ kɛ hlaa niye ní,
E hlaa nga mumu fɛɛ nga mumu.
9 Anɛ nga mi na ku maa suɔ nɛ e sɔmɔ mo lo?
Anɛ e maa hwɔ o lohwehi a tsu mi* kɛ ya si mɔtu lo?
10 Anɛ o ma nyɛ maa wo nga mi na ku kpa nɛ́ e ya gba nyu dɔ ngɛ o ngmɔ mi ha mo lo,
Aloo e maa nyɛɛ o se kɛ ya hu dɔgba a mi lo?
11 Anɛ o maa ngɔ o hɛ kɛ fɔ e he wami ngua a nɔ
Konɛ o ha nɛ e tsu o ní tsumi kpakpataa a ha mo lo?
12 Anɛ o maa ngɔ o hɛ kɛ fɔ e nɔ kaa e ngɔ o ní nɛ o kpa a* kɛ ba we mi ha mo,
Nɛ́ e bua nya kɛ ya o ngma fiaami he ɔ lo?
13 Duguma kɛ bua jɔmi fiaa e pɛli ɔmɛ,
Se anɛ a ma nyɛ nɛ a ngɔ e pɛli ɔmɛ kɛ to aklawa pɛlihi a he lo?
14 Ejakaa e jeɔ e hlui ɔmɛ a he ngɛ zugba,
Nɛ e haa nɛ a he dɔɔ la ngɛ zu mi.
15 E hɛ jeɔ nɔ kaa nane ko ma nyɛ maa ywia mɛ
Loo lohwe awi yelɔ ko ma ba naa a nɔ.
16 E waa e bimɛ ɔmɛ yi mi kaa nɔ́ nɛ pi e bimɛ ji mɛ;
E hɛwi lɛ kaa e kɔɔmi ɔ maa pee yaka.
17 Ejakaa Mawu ha nɛ juɛmi bɔ lɛ*
Nɛ e ha we lɛ nɔ́ sisi numi ko kulaa.
18 Se ke e te da si nɛ e fia e pɛli ɔmɛ a mi ɔ,
E muɔɔ okpɔngɔ kɛ e nɔ hilɔ ɔ.
19 Mo lɛ o ha okpɔngɔ e he wami ɔ lo?
Mo lɛ o kɛ bwɔmihi wo e kuɛ he ɔ lo?
20 Anɛ o ma nyɛ nɛ o ha nɛ e tuu kaa baalɛ lo?
E gugwɔ mi flimi nɛ nya wa a ngɛ gbeye wawɛɛ.
21 E siɔ si glɛi glɛi glɛi ngɛ dɔgba a mi nɛ e bua jɔɔ ngɛ he wami nɛ e ngɛ ɔ he;
E kɛ hɛdɔ gbɔɔ fo kɛ yaa ta.*
22 Gbeye yemi he peeɔ lɛ muɔ nɛ e yi nɔ́ ko nɔ́ ko gbeye.
E tui fo ngɛ klaate nya.
23 Kɛ̃ɛ̃ mi bi gbaja a hii hosoe ngɛ e nɔ,
Akplɔhi hii kpɛe nylamnylam kɛ woɔ lɛ.
24 E kɛ he domi blibliibli saa fo kɛ yaa e hɛ mi,*
25 Ke titimati ɔ pɛ ɔ, e deɔ ke, ‘Ɛhɛɛ!’
E nuɔ ta he fu ngɛ tsitsaa
Nɛ e nuɔ tatsɛmɛ a ngmlaa kɛ ose nɛ ngɛ pɛe ngɛ ta mi ɔ.
26 O nɔ́ sisi numi nya lɛ kayo teɔ,
Nɛ e gbɛɔ e pɛli ɔmɛ a mi kɛ yaa woyi je lo?
27 Aloo o fami nya lɛ kɔle teɔ kɛ yaa hiɔwe
Nɛ e peeɔ e tsuhi ngɛ hiɔwe lokoo,
28 Nɛ e hwɔɔ tɛsahi a nɔ ke je jɔ,
Nɛ e hiɔ e he piɛ pomi he ɔ ngɛ tɛsa amɛ a nɔ ɔ lo?*
29 Ke e ngɛ lejɛ ɔ, e hɛngmɛ hyɛɔ nɔ́ kɛ yaa tsitsaa;
Kaa e maa na lohwe ko nɛ e ye lo.
30 E bimɛ ɔmɛ nuɔ muɔ;
Nɛ he fɛɛ he nɛ gbogboe ngɛ ɔ, o maa na lɛ ngɛ lejɛ ɔ.”