La
Kɛ ha la nɔ hyɛlɔ ɔ; a kɛ fɔ̃ “Makɛ Afugbɛ Yo ɔ.”* La nɛ David po.
22 Ye Mawu, ye Mawu, mɛni he je nɛ o kua mi ɔ?
Mɛni he je nɛ o ba he we ye yi wami,
Nɛ o kɛ ye kɛmɛmi ɔ he kɛ ɔ?
2 Ye Mawu, i yaa nɔ nɛ i tsɛɛ mo piani, nɛ o he we nɔ;
Nɛ nyɔ mi hu, i ma we ye nya.
3 Se o ngɛ klɔuklɔu,
Israel yi jemi ɔ bɔle mo kɛ kpe.*
4 O nɔ lɛ wa tsɛmɛ ɔmɛ ngɔ a hɛ kɛ fɔ;
A ngɔ a hɛ kɛ fɔ o nɔ, nɛ o ya nɔ nɛ o kpɔ̃ mɛ.
5 A kpa ngmlaa kɛ tsɛ mo, nɛ o he a yi wami;
A ngɔ a hɛ kɛ fɔ o nɔ, nɛ a nine nyɛ we si.*
6 Se imi lɛɛ, gɔgɔ ji mi, pi nɔmlɔ ji mi,
Adesahi yeɔ ye he fɛu,* nɛ nihi pueɔ ye hɛ mi si.
7 Nihi tsuo nɛ a naa mi ɔ yeɔ ye he fɛu;
A muɔɔ mi, nɛ a huanyaa a yi nɛ a yeɔ ye he fɛu ke:
8 “E ngɔ e hɛ kɛ fɔ Yehowa nɔ. É kpɔ̃ lɛ koo!
É he e yi wami, ejakaa e he jua wa ha lɛ!”
9 Mo ji nɔ nɛ je mi kɛ je fɔmi kotoku mi,
Benɛ i ngɛ ye nyɛ nyɔ nya a, o ha nɛ i ngɛ slɔkee.
10 Kɛ je ye fɔmi mi tɔɔ nɛ a ngɔ mi kɛ wo o dɛ;*
Kɛ je ye nyɛ fɔmi kotoku mi tɔɔ ɔ, mo ji ye Mawu.
11 Koo je ye he kɛ ya tsitsaa, ejakaa haomi ngɛ ye kasa nya haa,
Nɛ i be yemi kɛ bualɔ kpa ko.
12 Na ku wawi babauu bɔle mi kɛ kpe;
Bashan na kuhi nɛ a he wa a bɔle mi kɛ kpe.
13 A gbɛ a nya mi hatoo kɛ wo mi,
Kaa jata nɛ e ngɛ huãe kɛ ngɛ lohwe nɛ e nu ɔ mi tsɔtslɔɔe.
14 A plɛ mi pue si kaa nyu;
Ye wu ɔmɛ tsuo je a kpɔji nya amɛ.
Ye tsui pee kaa hwo gbaku;
E ngɛ silee ngɛ ye mi tɔɔ.
15 Ye he wami ta, i pee kaa buɛ nɛ ywia;
Ye lilɛ du ye tɛlo ɔmɛ a he;
O ngɔ mi kɛ yaa zu mi nɛ ma gbo.
16 Ejakaa gbehi bɔle mi kɛ kpe;
A sa ye yi kaa bɔ nɛ yayami peeli a kuu peeɔ ɔ,
A ngɛ ye ninehi kɛ ye nanehi kɔɔe kaa bɔ nɛ jatahi peeɔ ɔ.
17 Ma nyɛ ma kane ye wu ɔmɛ tsuo.
A muɔɔ a hɛngmɛ ngɔ pue ye nɔ, nɛ a ngɛ mi hyɛe.
18 A gba ye tade ɔmɛ ha a he,
Nɛ a fɔ ye tade ɔ nɔ sɔ.
19 Oo Yehowa, koo hi se tsitsaa.
Mo ji ye he wami; mo ba ye bua mi esɔ.
20 Mo he ye* yi wami ngɛ klaate nya,
Mo kpɔ̃ ye wami nɛ he jua wa a* ngɛ gbe ɔmɛ a nguɛ nya;*
21 Mo he ye yi wami ngɛ jata nya mi, kɛ nga mi na ku ɔmɛ a koli ɔmɛ a kpɛ;
Mo ha mi heto, nɛ o he ye yi wami.
22 Ma jaje o biɛ ɔ kɛ tsɔɔ ye nyɛmimɛ ɔmɛ;
Ma je o yi ngɛ asafo ɔ mi.
23 Nyɛ nihi nɛ nyɛ yeɔ Yehowa gbeye, nyɛ je e yi!
Nyɛ Yakob nina* tsuo, nyɛɛ wo e hɛ mi nyami!
Nyɛ Israel nina* tsuo, nyɛɛ kɛ gbeye yemi nɛ da e hɛ mi.
24 Ejakaa e ma we e hɛ kɛ fɔɛ nɔ nɛ a waa lɛ yi mi ɔ nɔ́ nami ɔ nɔ, nɛ e pee we lɛ tai hulɔ;
E kɛ e hɛ mi laa we lɛ.
Benɛ e fo ya pue e nɔ kɛ bi yemi kɛ buami ɔ, e nu.
25 Ma je o yi ngɛ asafo ngua a mi;
Ma ye ye kita amɛ a nɔ ngɛ ni nɛmɛ nɛ a yeɔ lɛ gbeye ɔ a hɛ mi.
26 Nihi nɛ a he jɔ ɔ maa ye ní nɛ a maa tɔ;
Nihi nɛ hlaa Yehowa se blɔ ɔ ma je e yi.
Nyɛ ná bua jɔmi ngɛ si himi mi* kɛ ya neneene.
27 Zugba a nyagbe he ɔmɛ tsuo ma kai, nɛ a maa kpale kɛ ba Yehowa ngɔ.
Wekuhi tsuo nɛ a ngɛ je ma amɛ a mi ɔ ma ba kplã si ngɛ o hɛ mi.
28 Ejakaa Yehowa nɔ́ ji matsɛ yemi ɔ nɛ;
E yeɔ je ma amɛ a nɔ.
29 Zugba a nɔ niatsɛmɛ ɔmɛ* tsuo maa ye ní nɛ a ma kplã si;
Nihi tsuo nɛ a yaa zu mi ɔ ma kplã si ngɛ e hɛ mi;
A kpɛti nɔ ko nɔ ko be nyɛe nɛ e baa e wami* yi.
30 A sisi bimɛ* ma sɔmɔ lɛ;
A maa sɛɛ Yehowa he ní ha yi nɔ nɛ maa ba a.
31 A maa ba nɛ a ma ba sɛɛ dami níhi nɛ e pee ɔ.
A maa sɛɛ nɔ́ nɛ e pee ɔ kɛ ha nihi nɛ a ná we nɛ a fɔ mɛ lolo ɔ.