Yesaya
14 Ejakaa Yehowa maa na Yakob mɔbɔ, nɛ e maa kpale hla Israel. E maa to mɛ si* ngɛ a zugba a nɔ, nɛ ma se bi maa piɛɛ a he, nɛ a kɛ a he maa mɛtɛ Yakob we ɔ he. 2 Nɛ nihi nɛ a ngɛ ma kpahi a mi ɔ maa ngɔ mɛ, nɛ a kɛ mɛ maa ba mɛ nitsɛmɛ a hi he ɔ, nɛ Israel we ɔ maa ngɔ mɛ kɛ pee a sɔmɔli kɛ a mawayihi ngɛ Yehowa zugba a nɔ; nɛ a maa ngɔ nihi nɛ ngɔ mɛ nyɔguɛ ɔ hu nyɔguɛ, nɛ a maa ye nihi nɛ nyɛ a nɔ nɛ a tsu ní ɔ hu a nɔ.
3 Ligbi nɛ Yehowa ma ha nyɛ he mi maa jɔ nyɛ ngɛ nyɛ piimi ɔ kɛ nyɛ haomi ɔ kɛ nyɔguɛ si himi nɛ mi wa nɛ nyɛ ya je mi ɔ mi ɔ, 4 nyɛ maa bu abɛ* nɛ ɔ kɛ si Babilon matsɛ ɔ:
“Nɔ nɛ nyɛɔ nihi a nɔ konɛ a tsu ní ɔ, hyɛ bɔ nɛ e nyagbe ba ha!
Hyɛ bɔ nɛ yi mi nɛ e waa nihi ɔ ba nyagbe ha!
5 Yehowa ku yiwutsotsɛmɛ a tso ɔ,
E ku nɔ yeli ɔmɛ a dɛma tso ɔ,
6 Nɔ nɛ e kɛ abofu fiaa mahi kɔ̃ nɛ e kpa we ɔ,
Nɔ nɛ e kɛ abofu kɛ yi mi wami yeɔ je mahi a nɔ nɛ he jɔɔmi be mi ɔ.
7 Amlɔ nɛ ɔ, zugba a tsuo he jɔ lɛ, nɔ́ ko hɛwi lɛ.
Nihi kɛ bua jɔmi ngɛ ose hee.
8 Junipa tso ɔmɛ kɛ Lebanon seda tso ɔmɛ po
Ngɛ nyae ngɛ nɔ́ nɛ ba o nɔ ɔ he je.
A ke, ‘Kɛ je be nɛ o nɔ si ɔ,
Tso polɔ ko ba tua we wɔ.’
9 Yɔkɔ* nɛ ngɛ zugba a sisi ɔ po pee klaalo
Konɛ e kɛ mo nɛ ba kpe ke o ba a.
O he je ɔ, e tsɛ̃ɛ̃ nihi nɛ a gbo nɛ a be he wami ko ɔ,
Zugba a nɔ hɛ mi nyɛɛli nɛ a yi mi wa a* tsuo.
E ha nɛ matsɛmɛ tsuo nɛ a ngɛ je ma amɛ a mi ɔ te si ngɛ a matsɛ sɛ ɔmɛ a nɔ.
10 Mɛ tsuo a tu munyu nɛ a bi mo ke,
‘Anɛ mo hu o gbɔjɔ kaa wɔ lo?
Anɛ o ba pee kaa wɔ lo?
11 A ha nɛ o he nɔ womi ɔ kple kɛ ba Yɔkɔ* mi,
O kpa saku ɔmɛ a pɛmi ɔ.
Gɔgɔhi ha si ngɛ o sisi kaa sa,
Nɛ pɔpɔlihi ji o heha nɔ́.’
12 Hyɛ bɔ nɛ o je hiɔwe kɛ ba nɔ si ha,
Oo mo nɛ o ngɛ kpɛe, mo makɛ bi!
Hyɛ bɔ nɛ a po mo kɛ fɔ zugba a nɔ ha,
Mo nɛ o yeɔ je ma amɛ a nɔ kunimi!
13 O de ngɛ o tsui mi ke, ‘Ma kuɔ kɛ ya hiɔwe.
Ma wo ye matsɛ sɛ ɔ nɔ kɛ ya Mawu dodoe ɔmɛ a yi nɔ,
Nɛ ma hi si ngɛ yoku nɛ a kpeɔ ngɛ nɔ ɔ nɔ,
Ngɛ yiti je hehi nɛ kɛ pe kulaa a.
14 Ma kuɔ kɛ be bɔku ɔmɛ a he;
Ma pee ye he kaa Nɔ Nɛ E Nɔ Kuɔ Pe Kulaa a.’
15 Se a ma kple mo si kɛ ya Yɔkɔ* mi,
Kɛ ya muɔ ɔ mi hehi nɛ a mi kuɔ pe kulaa a.
16 Nihi nɛ a maa na mo ɔ maa hyɛ mo gaa;
A maa hyɛ mo totooto nɛ a ma bi ke,
‘Anɛ nyumu ɔ nɛ hosoɔ zugba a ji nɛ ɔ,
Nɔ nɛ e ha nɛ matsɛ yemi ɔmɛ a he do blibliibli,
17 Nɛ́ e ha nɛ zugba nɛ nihi ngɛ nɔ ɔ pee kaa nga nɔ,
Nɛ́ e kpata mahi nɛ a ngɛ nɔ ɔ hɛ mi,
Nɛ́ e kua ke e be hae nɛ nihi nɛ e wo mɛ tsu ɔ nɛ a ya we mi ɔ ji nɛ ɔ lo?’
18 Je ma amɛ a matsɛmɛ kpa amɛ tsuo,
Ee, mɛ tsuo a hwɔɔ si ngɛ hɛ mi nyami mi,
Nɔ fɛɛ nɔ ngɛ lɛ nitsɛ e yɔkɔ* mi,
19 Se moo lɛɛ o be yɔkɔ, a sake mo ngɔ fɔ he,
Kaa tso nɛ e tsɛ̃ ngɛ tso he* nɛ a kpɔ lɛ fɔ si,
A ngɔ nihi nɛ a kɛ klaate gbe mɛ pue si ɔ kɛ ha o he,
Nihi nɛ a sake mɛ kɛ wo muɔ kɛ e mi tɛhi mi,
Kaa gbogboe nɛ a naa e nɔ.
20 O ya be a he piɛɛe ngɛ yɔkɔ mi,
Ejakaa o kpata mo nitsɛ o zugba a hɛ mi,
O gbe mo nitsɛ o we bi ɔmɛ.
A be yayami peeli a nina biɛ ta woe hu gblegbleegble.
21 Nyɛ dla he ko nɛ nyɛ maa gbe e bimɛ ɔmɛ ngɛ,
Ngɛ a nɛmɛ ɔmɛ a fɔ yemi ɔ he je,
Konɛ a ko te si nɛ a ngɔ zugba a,
Nɛ́ a ko ha nɛ a ma amɛ nɛ hyi zugba a nɔ tɔ.”
22 “Ma te si kɛ wo mɛ,” Yehowa tabohiatsɛ ɔ lɛ de.
“Nɛ ma je biɛ, kɛ nihi nɛ a maa piɛ, kɛ ninahi, kɛ sisi bimɛ kɛ je Babilon,” Yehowa lɛ de.
23 “Nɛ ma ha nɛ e ma plɛ pee kɔtɔkɔhi* a hi he kɛ he nɛ mɔsɔ ngɛ, nɛ ma ngɔ hɛ mi kpatami bɛ kɛ bɛɛ lɛ,” Yehowa tabohiatsɛ ɔ lɛ de.
24 Yehowa tabohiatsɛ ɔ kã kita ke:
“Bɔ nɛ i to ye yi mi ɔ, jã nɛ e maa ba,
Nɛ bɔ nɛ i mwɔ ye yi mi kpɔ ɔ, jã pɛpɛɛpɛ lɛ e maa ba mi.
25 Ma ywia Asiriano ɔ ngɛ ye zugba a nɔ,
Nɛ ma naa e nɔ ngɛ ye yoku ɔmɛ a nɔ.
A ma je e kuɛpã tso ɔ ngɛ a nɔ,
Nɛ a ma je e tlomi ɔ ngɛ a konɔ.”
26 Enɛ ɔ ji yi mi kpɔ nɛ a mwɔ kɛ si zugba a tsuo,
Nɛ enɛ ɔ ji nine nɛ a wo nɔ kɛ si je ma amɛ tsuo.*
27 Ejakaa Yehowa tabohiatsɛ ɔ mwɔ e yi mi kpɔ,
Nɛ mɛnɔ ma nyɛ ma puɛ lɛ?
E kpa e nine mi,
Nɛ mɛnɔ ma nyɛ maa dɔ mi?
28 Jeha nɛ Matsɛ Ahaz gbo ɔ, a fiɛɛ munyu nɛ ɔ:
29 “Filistia, nyɛ ti nɔ ko nɛ ko nya
Akɛnɛ nɔ nɛ fiaa nyɛ nɔ́ ɔ dɛma tso ɔ ku ɔ he je.
Ejakaa sinɔ duɔtsɛ ko maa je sinɔ ɔ sipoku ɔ mi kɛ ba,
Nɛ e nina maa pee la sinɔ nɛ e tsɛ̃ɔ.*
30 Be mi nɛ nihi nɛ a ní ngɛ mɔbɔ ɔ a kekleekle bimɛ maa ye ní,
Nɛ́ ohiatsɛmɛ maa hwɔ si slɔkee ɔ,
Ma ha nɛ hwɔ maa gbe o sipoku ɔ,
Nɛ a maa gbe nɔ́ nɛ maa piɛ ha mo ɔ.
31 Oo agbo, fo ya boboobo! Oo ma, kpa ngmlaa!
Oo Filistia, nyɛ tsuo nyɛ tsui maa po!
Ejakaa lasuku ko je yiti je kɛ ma,
Nɛ e tabuli ɔmɛ a kpɛti nɔ ko be nɛ e gblaa e nane si.”
32 Kɛ e sa kaa a ha je ma amɛ a tsɔli ɔmɛ heto kɛɛ?
A ma ha mɛ heto kaa Yehowa fia Zion sisi tomi ɔ,
Nɛ e we bi ɔmɛ a kpɛti nihi nɛ a ní ngɛ mɔbɔ ɔ ma ya sa we ngɛ e mi.