Hiob
4 Kɛkɛ nɛ Elifaz nɛ je Teman ɔ de ke:
2 “Ke nɔ ko bɔ mɔde kaa e kɛ mo maa tu munyu ɔ, anɛ o mi mi ma fu lo?
Ejakaa mɛnɔ lɛ ma ma e nya nɛ́ e be munyu tue?
3 E ji anɔkuale kaa o tsɔɔ nihi fuu ní,
Nɛ o wo ninehi nɛ a mi jɔ ɔmɛ a mi he wami.
4 O munyu ɔ wo nihi nɛ yaa nɔ si ɔ nɔ kɛ da si ekohu,
Nɛ o wo nakutsohi nɛ a mi gbɔjɔ ɔ he wami.
5 Se amlɔ nɛ ɔ, e ba o nɔ, nɛ o kɔni mi jɔ̃;*
E sa o he nɛ o nɛ́ nya.
6 Anɛ gbeye nɛ o yeɔ Mawu ɔ ha we nɛ o ná hɛ kɛ nɔ fɔmi lo?
Anɛ anɔkuale nɛ o yeɔ ɔ ha we nɛ o ná hɛnɔkami lo?
7 I kpa mo pɛɛ, mo susu he nɛ o hyɛ: Anɛ o na nɔ ko nɛ pee we yayami ko nɛ e hɛ mi kpata hyɛ lo?
Mɛni be nɛ o na nɛ́ a kpata nɔ ko nɛ peeɔ nɔ́ nɛ da hɛ mi hyɛ?
8 Nɔ́ nɛ i na ji kaa, nihi nɛ a huɔ yayami ngmɔ*
Nɛ a duɔ haomi ɔ, lɔ ɔ nɔuu lɛ a ma kpa.
9 Ke Mawu wo mumi pue a nɔ ɔ, kɛkɛ a hɛ mi kpata.
Nɛ ke e mi mi fumi ɔ pɛ́ ɔ, kɛkɛ a hɛ mi kpata kulaa.
10 Jatahi huãã, nɛ jata wayo pɛɛɔ,
Se jatahi nɛ a he wa* po, a lunguhi kuɔ.
11 Ke jata nɛ lo nɛ́ e ye ɔ, e gboɔ,
Nɛ jata bi ɔmɛ gbɛɔ kɛ fĩa a.
12 A kɛ munyu ko ha mi ngɛ laami mi,
A de lɛ zaa kɛ wo ye tue mi.
13 Nyɔ mi kpɛti benɛ nimli hwɔ mahe vii ɔ,
I na nina komɛ nɛ gba ye juɛmi nya.
14 Ye he kpokpo wawɛɛ nitsɛ,
Nɛ i nu he ngɛ ye wu ɔmɛ a mi tɔɔ.
15 Mumi ko ba be ngɛ ye hɛ mi;
Nɛ e ha nɛ fĩɛ ngmangu pue ye nɔ.
16 Kɛkɛ nɛ e da si,
Se i li e mi tso.
Nɔ́ ko ba da si ngɛ ye hɛ mi;
Lejɛ ɔ jɔ dii, kɛkɛ nɛ i nu gbi ko nɛ de ke:
17 ‘Anɛ nɔmlɔ adesa ma nyɛ maa da pe Mawu lo?
Anɛ nɔmlɔ he ma nyɛ ma tsɔ pe e Bɔlɔ* ɔ lo?’
19 Lɛɛ nihi nɛ a hii zu tsuhi a mi,
Nɛ́ a to a sisi ngɛ bunyuku mi,
Nɛ́ a pɔtɔɔ mɛ kaa bɔ nɛ a pɔtɔɔ wɔyewɔye ɔ, mɛɛ lɛɛ e ma ná hemi kɛ yemi ko ngɛ a mi lo?
20 A pɔtɔɔ mɛ kulaa kɛ jeɔ mɔtu kɛ ya siɔ gbɔkuɛ;
A hɛ mi kpataa kɛ yaa neneene nɛ nɔ ko nɔ ko po to we he hɛ.
21 A ngɛ kaa bo tsu nɛ nɔ si ejakaa a gbla e mi kpa.
A gboɔ nɛ́ a be juɛmi ko.