Yesaya
63 Mɛnɔ lɛ e je Edom kɛ ma,
Nɛ́ e wo tade nɛ ngɛ hleii* kɛ je Bozra kɛ ma,
Nɛ e tade ɔ he ngɛ fɛu,
Nɛ e kɛ he wami ngɛ kɔsɔe nɛ ɔ?
“Lɛ ji imi, nɔ nɛ tuɔ munyu ngɛ dami mi ɔ,
Nɔ nɛ ngɛ he wami ngua nɛ e kɛ heɔ nɔ yi wami ɔ.”
2 Mɛni he je nɛ o tade ɔ ngɛ tsutsuutsu ɔ?
Nɛ mɛni he je nɛ o tade ɔ pee kaa nɔ ko nɛ ngɛ wai yiblii naae ngɛ wai ngami he ɔ?
3 “Imi nɔ kake too pɛ lɛ i naa wai yiblii nɔ ngɛ wai muɔ mi.
Ni ɔmɛ a kpɛti nɔ ko piɛɛ we ye he.
I ya nɔ nɛ i naa nɔ kɛ abofu,
I ya nɔ nɛ i naa nɔ kɛ mi mi la.
A muɔ ɔ fĩa kɛ pue ye tade ɔ mi,
Nɛ e sɛ ye tade ɔ mi tsuo.
4 Ejakaa lue yemi ligbi ɔ ngɛ ye tsui mi,
Nɛ jeha nɛ ma kɛ kpɔ̃ ye we bi ɔmɛ ɔ su si ta.
5 I hyɛ, se nɔ ko be nɛ e maa ye bua mi;
E pee mi nyakpɛ kaa nɔ ko ba yi bua mi.
Lɔ ɔ he ɔ, ye kɔni he ye yi wami,*
Nɛ ye we abofu ɔ ye bua mi.
6 I naa je mahi a nɔ ngɛ ye we abofu ɔ mi,
I ha nɛ a nu ye mi mi la a, nɛ a de,
Nɛ i kpa a muɔ ɔ ngɔ pue zugba.”
7 Ma jaje suɔmi nɛ se pui nɛ Yehowa je kpo kɛ tsɔɔ mi ɔ,
Ma jaje níhi nɛ Yehowa pee nɛ sa yi jemi ɔ,
Ngɛ níhi tsuo nɛ Yehowa pee kɛ ha wɔ ɔ he je ɔ,
Ma jaje ní kpakpahi babauu nɛ e pee kɛ ha Israel we ɔ,
Ngɛ e mɔbɔ nami ɔ kɛ e suɔmi agbo nɛ se pui ɔ nya.
8 Ejakaa e de ke: “Ngɛ anɔkuale mi ɔ, a ji ye ma, ye bimɛ nɛ a be ye se jee.”*
Lɔ ɔ he ɔ, e ba pee a Kpɔlɔ.
9 Benɛ a ngɛ haoe ɔ, lɛ hu e hao,
Nɛ lɛ nitsɛ e tsɔlɔ ɔ* he a yi wami.
Nɛ e suɔmi ɔ kɛ e mɔbɔ nami ɔ he je ɔ, e kpɔ̃ mɛ,
Nɛ e wo a nɔ, nɛ e hɛɛ mɛ ngɛ blema be ɔmɛ tsuo a mi.
10 Se a tsɔ atuã nɛ a ha nɛ e mumi klɔuklɔu ɔ ye aywilɛho.
Kɛkɛ nɛ e ba plɛ pee a he nyɛlɔ,
Nɛ e hwu kɛ si mɛ.
11 Nɛ a kaii blema be ɔ,
E sɔmɔlɔ Mose be ɔ, nɛ a de ke:
“Jije nɔ nɛ e je a kɛ nihi nɛ hyɛɔ e to ɔmɛ a nɔ kɛ je wo ɔ mi ɔ ngɛ?
Jije nɔ nɛ e ngɔ e mumi klɔuklɔu ɔ kɛ wo e mi ɔ ngɛ?
12 Jije nɔ nɛ ha nɛ e kɔni nɛ hɛ mi ngɛ nyami ɔ piɛɛ Mose hiɔ nine he,
Nɛ́ e gba nyu ɔ mi ngɛ a hɛ mi
Nɛ e kɛ he biɛ nɛ ngɛ kɛ yaa neneene ɔ ngɛ?
13 Nɔ nɛ e ha nɛ a nyɛɛ nyu nɛ pee hamahama a mi,*
Nɛ a nɔɛ si
Kaa bɔ nɛ okpɔngɔ nyɛɛɔ nga nɔ ɔ, jije e ngɛ?
14 Kaa bɔ nɛ lohwe lɛlɛɛhi kpleɔ kɛ yaa dɔgba mi nɛ a ya jɔɔ a he ɔ,
Jã nɛ Yehowa mumi ɔ ha nɛ a jɔɔ a he.”
Jã ji bɔ nɛ o nyɛɛ o ma a hɛ mi,
Nɛ o kɛ ná biɛ ngua* kɛ ha o he.
15 Moo ma o yi si kɛ je hiɔwe nɛ o hyɛ,
Moo hyɛ kɛ je o hi he klɔuklɔu nɛ hɛ mi ngɛ nyami ɔ.*
Jije o kã kɛ o he wami ɔ ngɛ?
Jije o mi mi sami kɛ o mɔbɔ nami ɔ ngɛ?
A kpɔ̃ mɛ ngɛ ye dɛ.
16 Mo ji wa Tsɛ;
E ngɛ mi kaa Abraham be wɔ lee,
Nɛ Israel be wɔ yɔsee mohu lɛɛ,
Se mo Yehowa, mo ji wa tsɛ.
O biɛ ji wa Kpɔlɔ kɛ je blema lokoo.
17 Oo Yehowa, mɛni he je nɛ o ha nɛ wa gba kɛ je o blɔ ɔmɛ a nɔ ɔ?
Mɛni he je nɛ o ha nɛ wa tsui wa* nɛ wa yi mo gbeye ɔ?
Moo kpale kɛ ba ngɛ o sɔmɔli ɔmɛ a he je,
Ngɛ wɛtsohi nɛ a ji o weto ní ɔ he je.
18 O ma klɔuklɔu ɔ nine su nɔ be bɔɔ pɛ.
Wa he nyɛli ɔmɛ naa o jami he ɔ nɔ.
19 Be babauu ji nɛ ɔ nɛ wa pee kaa nihi nɛ o yi a nɔ hyɛ,
Kaa nihi nɛ a kɛ o biɛ tsɛ we mɛ hyɛ.