Hiob
1 Nyumu ko hi Uz zugba a nɔ; e biɛ ji Hiob.* E ji nɔmlɔ nɛ da nɛ́ e yeɔ anɔkuale;* e yeɔ Mawu gbeye nɛ e pee we nɔ́ nɛ dɛ blɔ kɔkɔɔkɔ. 2 A fɔ binyumuhi kpaago kɛ biyihi etɛ ha lɛ. 3 E ngɛ lohwe nɛ ɔmɛ: jijɔ 7,000, afukpɔngɔ 3,000, na 1,000,* teji* 500 kɛ sɔmɔli babauu. Enɛ ɔ he ɔ, e ba pee nɔmlɔ ngua pe kulaa ngɛ nihi nɛ a ngɛ puje he blɔ ɔ a kpɛti.
4 E binyumu ɔmɛ a ti nɔ fɛɛ nɔ ngmɛɔ okplɔɔ ngɛ e we mi ngɛ ligbi nɛ lɛ nitsɛ e to ɔ nɔ.* A tsɛɔ a nyɛmiyihi etɛ ɔmɛ konɛ a kɛ mɛ nɛ ba ye ní nɛ a nu ní. 5 Ke mɛ tsuo a ngmɛ okplɔɔ ɔ ta a, Hiob tsɔɔ nɛ a ya tsɛɔ mɛ kɛ baa konɛ e tsu a he. E teɔ si mɔtu mla nɛ e sãã sami afɔlehi kɛ haa a ti nɔ fɛɛ nɔ, ejakaa Hiob deɔ ke: “Eko ɔ, ye bimɛ ɔmɛ pee yayami nɛ a gbiɛ Mawu ngɛ a tsui mi.” Jã nɛ Hiob peeɔ be fɛɛ be.
6 Ligbi ko ɔ, anɔkuale Mawu ɔ bimɛ ɔmɛ* ba da si ngɛ Yehowa hɛ mi, nɛ Satan hu piɛɛ a he kɛ ba.
7 Kɛkɛ nɛ Yehowa bi Satan ke: ”Jije o je?” Satan ha Yehowa heto ke: “I ya kpa zugba a nɔ nɛ i slaa si ngɛ nɔ.” 8 Nɛ Yehowa bi Satan ke: “Anɛ o to ye sɔmɔlɔ Hiob he hɛ lo?* Nɔ ko nɔ ko be zugba a nɔ nɛ ngɛ kaa lɛ. E ji nɔmlɔ nɛ da nɛ́ e yeɔ anɔkuale,* e yeɔ Mawu gbeye nɛ e pee we nɔ́ nɛ dɛ blɔ kɔkɔɔkɔ. 9 Kɛkɛ nɛ Satan ha Yehowa heto ke: “O susu kaa yaka gu lɛ Hiob yeɔ mo gbeye ɔ lo? 10 Anɛ o pui piɛ kɛ wui lɛ nitsɛ, e weku ɔ kɛ nɔ́ fɛɛ nɔ́ nɛ e ngɛ ɔ he lo? O jɔɔ e ní tsumi nɔ, nɛ o ha nɛ e lohwehi hiɛ babauu. 11 Se moo lɛɛ, moo kpa o nine mi nɛ o ta nɔ́ fɛɛ nɔ́ nɛ e ngɛ ɔ he, nɛ bɔ fɛɛ bɔ nɛ ji ɔ, e maa gbiɛ mo ngɛ o hɛ mi.” 12 Kɛkɛ nɛ Yehowa de Satan ke: “Hyɛ! Nɔ́ fɛɛ nɔ́ nɛ e ngɛ ɔ, i kɛ wo o dɛ. Se lɛ nɔmlɔ ɔ lɛɛ o ko ta e he!” Lɔ ɔ he ɔ, Satan je Yehowa hɛ mi kɛ ho.
13 Ligbi ko benɛ e binyumu ɔmɛ kɛ e biyi ɔmɛ ngɛ ní yee nɛ a ngɛ wai nue ngɛ a nyɛminyumu nɔkɔtɔma a we ɔ mi ɔ, 14 tsɔlɔ ko ba Hiob ngɔ nɛ e ba de lɛ ke: “Na amɛ ngɛ hue, nɛ teji ɔmɛ ngɛ ní yee ngɛ a kasa nya, 15 kɛkɛ nɛ Sebabi ɔmɛ ba tua mɛ, nɛ a nuu mɛ kɛ ho, nɛ a kɛ klaate gbe tsɔli ɔmɛ. Imi pɛ lɛ i je mi, nɛ i ba konɛ ma ba de mo.”
16 Benɛ e ngɛ munyu tue nɛ e nya ná we nɛ e ma si lolo ɔ, nɔ kpa ba nɛ e ba de lɛ ke: “La nɛ je Mawu ngɔ* je hiɔwe kɛ ba nɛ e ba sã jijɔ ɔmɛ kɛ tsɔli ɔmɛ nɛ e kpata a hɛ mi! Imi pɛ lɛ i je mi, nɛ i ba konɛ ma ba de mo.”
17 Benɛ lɛ hu e ngɛ munyu tue nɛ e nya ná we nɛ e ma si lolo ɔ, nɔ kpa ba nɛ e ba de ke: “Kaldeabi ɔmɛ gba a mi kɛ wo kuu etɛ mi nɛ a ba tua afukpɔngɔ ɔmɛ nɛ a nuu mɛ kɛ ho, nɛ a kɛ klaate gbe tsɔli ɔmɛ. Imi pɛ lɛ i je mi, nɛ i ba konɛ ma ba de mo.”
18 Benɛ e ngɛ munyu tue nɛ e nya ná we nɛ e ma si lolo ɔ, nɔ kpa hu ba nɛ e ba de ke: “O binyumu ɔmɛ kɛ o biyi ɔmɛ ngɛ ní yee nɛ a ngɛ wai nue ngɛ a nyɛminyumu nɔkɔtɔma a we ɔ mi. 19 Tlukaa a, kɔɔhiɔ nɛ nya wa fia kɛ je nga a nɔ kɛ ba ná we ɔ kɔnya eywiɛ ɔmɛ, nɛ e hule pue o bimɛ ɔmɛ a nɔ nɛ a gbo. Imi pɛ lɛ i je mi, nɛ i ba konɛ ma ba de mo.”
20 Kɛkɛ nɛ Hiob te si nɛ e gba e tade ɔ nɛ e sɛ e yi ɔ; e kplã si nɛ e ngɔ e hɛ mi kɛ bu zugba, 21 nɛ e de ke:
“Yayo fɔ mi kɛ ba kɛ he gu,
Nɛ ma kpale kɛ ya kɛ he gu.
Yehowa lɛ ha, nɛ Yehowa lɛ ba ngɔ kɛ ho.
A je Yehowa biɛ ɔ yi daa.”
22 Enɛ ɔ tsuo mi ɔ, Hiob pee we yayami ko, nɛ e pia we Mawu kaa lɛ nɛ e pee yayami ko.*