Yesaya
28 Musu tloo Efraim dã tɔli a matsɛ pɛɛ* ngua a*
Kɛ e hɛ mi nyami nɛ ngɛ fɛu ɔ nɛ ngɛ nglae kaa mɔmɔ nɛ ngɛ gboe,
Nɛ́ e maa si ngɛ ma nɛ ya hiɔwe ɔ nɔ, he nɛ nihi nɛ wai ye a nɔ kunimi ngɛ ɔ!
2 Hyɛ! Yehowa ngɛ nɔ ko nɛ e he wa nɛ e ji katsɛ.
E kɛ he wami ma sake lɛ kɛ ba fia zugba a nɔ
Kaa gbiɛ ngo ngu nɛ ngɛ nɛe kɛ e mi hiɔwe simi, kaa kɔɔhiɔ nɛ puɛɔ ní,
Kaa hiɔwe simi kɛ hiɔmi nɛ ngɛ nɛe nɛ nyu ɔ ha zugba a nɔ.
3 A maa naa
Efraim dã tɔli a matsɛ pɛɛ* ngua a nɔ.
4 Nɛ e hɛ mi nyami nɛ ngɛ fɛu ɔ nɛ ngɛ nglae kaa mɔmɔ nɛ ngɛ gboe
Nɛ́ e maa si ngɛ ma nɛ ya hiɔwe ɔ nɔ ɔ
Maa pee kaa kekleekle fig yiblii ngɛ ahlabata be mi.
Ke nɔ ko na a, e tsɔɔ, nɛ e miɔ oya nɔuu.
5 Jamɛ a ligbi ɔ, Yehowa tabohiatsɛ ɔ ma ba pee matsɛ pɛɛ nɛ hɛ mi ngɛ nyami, kɛ yi fimi nɔ́ nɛ ngɛ fɛu kɛ ha e we bi ɔmɛ a kpɛti nihi nɛ piɛ ɔ. 6 Nɛ e maa pee dami sane yemi mumi kɛ ha nɔ nɛ maa kojo ɔ, kɛ nɔ nɛ e ma ha nihi nɛ a ngɛ ma agbo nya bue ɔ he wami.
7 Nɛ ni nɛ ɔmɛ hu tla blɔ ngɛ wai he je;
A dã nɛ nya wa amɛ ha nɛ a dedeɔ.
Dã nɛ nya wa ha nɛ osɔfo ɔmɛ kɛ gbali ɔmɛ tla blɔ;
Wai haa nɛ a juɛmi gbɛɔ,
Nɛ dã nɛ nya wa nɛ a nuɔ ɔ haa nɛ a dedeɔ;
A hɛngmɛ nɛ yu ɔ haa nɛ a tlaa blɔ,
Nɛ a kojoɔ ngɛ blɔ nɛ dɛ nɔ.
8 Ejakaa a we okplɔɔ ɔmɛ a nɔ hyi kpɔtɔɔ kɛ vie
—He ko be nɛ o be vie nae ngɛ.
9 Mɛnɔ nɛ a maa tsɔɔ lɛ nile?
Nɛ mɛnɔ nɛ a maa tsɔɔ lɛ sɛ gbi ɔ sisi?
Nihi nɛ a po mɛ nyɔ kɛ we,
Nihi nɛ a je mɛ kɛ je nyɔ nya kɛ we ɔ lo?
10 Ejakaa “fami nyɛɛ fami se, fami nyɛɛ fami se,
Susumi kpa kɛ susumi kpa, susumi kpa kɛ susumi kpa,
Bɔɔ ngɛ hiɛ, bɔɔ ngɛ lejɛ.”
11 E maa gu nihi nɛ a bubuɔ* kɛ nihi nɛ a tuɔ ma se gbi a nɔ nɛ e kɛ e we bi ɔmɛ maa tu munyu. 12 E de mɛ hyɛ ke: “He jɔɔmi he ɔ ji nɛ ɔ nɛ. Nɔ nɛ pɔ tɔ e he ɔ nɛ e jɔɔ e he; hiɛ ɔ ji he jɔɔmi he,” se a bui tue. 13 Lɔ ɔ he ɔ, nyɛ naa Yehowa munyu ɔ kaa:
“Fami nyɛɛ fami se, fami nyɛɛ fami se,
Susumi kpa kɛ susumi kpa, susumi kpa kɛ susumi kpa,
Bɔɔ ngɛ hiɛ, bɔɔ ngɛ lejɛ,”
Bɔ nɛ pee nɛ ke a ngɛ nyɛɛe ɔ,
A tɛ nɔ́ nɛ a nɔɔ si se nya
Nɛ́ a kuɔ, nɛ́ a du klama, nɛ́ a nuu mɛ.
14 Lɔ ɔ he ɔ, nyɛɛ bu Yehowa munyu ɔ tue, nyɛ fĩali,
Nyɛ nɛ nyɛ yeɔ ma nɛ ɔ nɔ ngɛ Yerusalem,
15 Ejakaa nyɛ deɔ ke:
Ke nyu babauu ɔ bee ɔ,
E be wa he sae,
Ejakaa waa kɛ lakpa pee wa wesa he,
Nɛ waa kɛ lakpa yemi pee wa laami he.
16 Lɔ ɔ he je ɔ, nɔ́ nɛ Nyɔmtsɛ Matsɛ Yehowa ngɛ dee ji nɛ ɔ nɛ:
“I kɛ tɛ nɛ a ka nɛ a hyɛ maa fia sisi tomi ɔ ngɛ Zion,
Kɔ nya tɛ nɛ he jua wa nɛ́ a kɛ fia sisi tomi nɛ he wa a.
Nɔ fɛɛ nɔ nɛ e ngɛ hemi kɛ yemi ɔ be gbeye yee.
17 Nɛ ma ha dami sane yemi maa pee susumi kpa,
Nɛ dami maa pee nɔ́ nɛ a kɛ hyɛɛ kaa nɔ́ ko da tlɔmɔɔ.*
Gbiɛ ngo ngu maa bɛɛ lakpa laami he ɔ kɛ ho,
Nɛ nyu maa muɔ e laami he ɔmɛ kɛ ho.
18 A maa po somi nɛ o kɛ Gbenɔ so ɔ mi,
Nɛ kake peemi nɛ ngɛ o kɛ Yɔkɔ* nyɛ kpɛti ɔ be manye yee.
Ke nyu babauu ɔ bee ɔ,
E maa muɔ nyɛ kɛ ho.
19 Be fɛɛ be nɛ e maa be ɔ,
E maa muɔ nyɛ kɛ ho;
Ejakaa e maa be mɔtu fɛɛ mɔtu,
E maa be nyɔ kɛ pia.
Gbeye pɛ lɛ ma ha nɛ a nu nɔ́ nɛ a de ɔ sisi.”*
20 Ejakaa satso ɔ ka we bɔ nɛ a ma nyɛ maa kpa a he mi ngɛ nɔ,
Nɛ bo nɛ a lo ɔ hu bli we bɔ nɛ a ma nyɛ ma kɛ ha a he.
21 Ejakaa Yehowa maa te si kaa bɔ nɛ e pee ngɛ Perazim Yoku ɔ nɔ ɔ;
E ma maa te si kaa bɔ nɛ e pee ngɛ dɔgba nɛ kɛ Gibeon he kɛ we ɔ mi ɔ,
Konɛ e pee e ní ɔmɛ, e níhi nɛ ngɛ nyakpɛ ɔ,
Konɛ e tsu e ní tsumi ɔ, e ní tsumi nɛ ngɛ nyakpɛ ɔ.
22 Lɔ ɔ he ɔ, nyɛ ko ye e he fɛu,
Konɛ níhi nɛ fi nyɛ ɔ ko hi nyɛ miae wawɛɛ,
Ejakaa i nu kɛ je Nyɔmtsɛ Matsɛ Yehowa tabohiatsɛ ɔ ngɔ kaa
E mwɔ yi mi kpɔ kaa e ma kpata zugba a tsuo* hɛ mi.
23 Nyɛ ta tue, nɛ nyɛɛ bu ye gbi tue;
Nyɛɛ pee totooto nɛ nyɛɛ bu nɔ́ nɛ i ngɛ dee ɔ tue.
24 Anɛ ngmɔ hulɔ futuɔ zu mi ligbi ɔ tsuo loko e duɔ wu lo?
Anɛ e yaa nɔ nɛ e tsuaa zugba a mi nɛ e hii nɔ dlae lo?
25 Ke e dla zugba a hɛ mi ta a,
Anɛ e ya fĩa we kumin yumu nɛ́ e duɔ kumin lo?
Anɛ e ya du we hwiit kɛ ngma kɛ barli* ngɛ a blɔ he
Nɛ e duɔ spɛlt* ngɛ a kɔ nya amɛ lo?
27 Ejakaa a kɛ ngma fiaami tso* fiaa we kumin yumu,
Nɛ a kɛ zugba lɛ nane hu nyɛɛ we kumin nɔ.
Mohu ɔ, tso kpoti lɛ a kɛ fiaa kumin yumu,
Nɛ kumin hu, tso lɛ a kɛ fiaa.
28 Anɛ nɔ ko fiaa ngma nɛ e peeɔ bukɔbukɔ kaa nɔ́ nɛ a kɛ yaa pee abolo lo?
Dɛbi, e fiaa we lɛ hluu;
Nɛ ke e ngɔ e zugba lɛ nɛ okpɔngɔ ngɛ gblae kɛ nyɛɛ nɔ ɔ,
E ha we nɛ e pee bukɔbukɔ.