1 Samuel

26 Pee se ɔ, Zif nyumu ɔmɛ ba Saul ngɔ ngɛ Gibea nɛ a ba de lɛ ke: “David laa ngɛ Hakila kpongu ɔ nɛ e hɛ mi tsɔɔ Yeshimon ɔ* nɔ.” 2 Lɔ ɔ he ɔ, Saul te si nɛ e kɛ Israel nyumuhi 3,000 nɛ a hla mɛ ɔ kple kɛ ho Zif nga a nɔ ya konɛ a ya hla David ngɛ Zif nga a nɔ. 3 Saul ya to si ngɛ Hakila kpongu ɔ nɛ e hɛ mi tsɔɔ Yeshimon ɔ nɔ ngɛ gbɛjegbɛ ɔ he. Jamɛ a be ɔ, David ngɛ nga a nɔ, nɛ e nu kaa Saul ba konɛ e ba hla lɛ ngɛ nga a nɔ. 4 Lɔ ɔ he ɔ, David tsɔ nihi konɛ a ya hyɛ kaa Saul ba niinɛ lo. 5 Pee se ɔ, David ho he nɛ Saul ya to si ngɛ ɔ ya, nɛ David na he nɛ Saul kɛ Ner binyumu Abner nɛ ji e tabo ɔ nya dalɔ ɔ hwɔ mahe ngɛ ɔ; Saul hwɔ mahe ngɛ ta buli ɔmɛ a kpɛti, nɛ ta buli ɔmɛ bɔle lɛ kɛ kpe. 6 Kɛkɛ nɛ David de Ahimelek, Hit no ɔ kɛ Zeruya binyumu Abishai, Yoab nyɛminyumu ɔ ke: “Mɛnɔ lɛ e kɛ mi ma kple kɛ ya Saul ngɔ ngɛ sito he ɔ?” Abishai ha heto ke: “I kɛ mo ma kple kɛ ya.” 7 Enɛ ɔ he ɔ, nyɔ ɔ mi ɔ, David kɛ Abishai ho he nɛ ta buli ɔmɛ ngɛ ɔ ya, nɛ a na Saul nɛ hwɔ mahe ngɛ ta buli ɔmɛ a kpɛti kɛ e we akplɔ ɔ nɛ a kɛ gbɔ si ngɛ e yi tetle mi; Abner kɛ ta buli ɔmɛ hwɔɔ si kɛ bɔle lɛ kɛ kpe.

8 Kɛkɛ nɛ Abishai de David ke: “Mwɔnɛ ɔ, Mawu je o he nyɛlɔ ɔ kɛ wo o dɛ mi. Amlɔ nɛ ɔ, i kpa mo pɛɛ, ha nɛ ma ngɔ akplɔ ɔ kɛ gbɔ lɛ kɛ wo zu mi si kake pɛ, nɛ e he be hiae kaa ma gbɔ lɛ si enyɔne.” 9 Se David de Abishai ke: “Koo ye lɛ awi, ejakaa mɛnɔ ma nyɛ ma wo e nine nɔ ngɛ nɔ nɛ Yehowa pɔ lɛ nu ɔ nɔ nɛ e be fɔ yee?” 10 David tsa nɔ ke: “Be abɔ nɛ Yehowa ngɛ nɛ ɔ, Yehowa nitsɛ maa gbe lɛ, aloo e be maa su nɛ e ma gbo, aloo e ma kple kɛ ya ta nɛ e hɛ mi ma ya kpata. 11 Kpaoo, ngɛ Yehowa hɛ mi ɔ, e sɛ nɛ ma wo ye nine nɔ ngɛ nɔ nɛ Yehowa pɔ lɛ nu ɔ nɔ! Lɔ ɔ he ɔ, amlɔ nɛ ɔ, i kpa mo pɛɛ, hiaa akplɔ ɔ nɛ ngɛ e yi tetle mi ɔ nɛ o wo nyu tɔ ɔ nɛ waa ho.” 12 Enɛ ɔ he ɔ, David hia akplɔ ɔ nɛ e wo nyu tɔ ɔ nɛ ngɛ Saul yi tetle mi ɔ, nɛ a je. Nɔ ko nɔ ko nɛ mɛ, nɔ ko nɔ ko tui a he hɛ, nɛ nɔ ko nɔ ko hɛ tsɛ̃ hulɔ, ejakaa mɛ tsuo a hwɔ mahe, akɛnɛ Yehowa ha nɛ mahe vii nɔ a nɔ ɔ he je. 13 Kɛkɛ nɛ David po mi kɛ ho fã kake ya, nɛ e ya da yoku ɔ yi mi ngɛ tsitsaa, nɛ blɔ saii ngɛ a kpɛti.

14 David kpa ngmlaa kɛ tsɛ ta buli ɔmɛ kɛ Abner, Ner binyumu ɔ, nɛ e de ke: “Abner, o be nɔ hee lo?” Abner he nɔ ke: “Mo mɛnɔ lɛ o ngɛ matsɛ ɔ tsɛe ɔ?” 15 David de Abner ke: “Anɛ pi nyumu ji mo lo? Nɛ mɛnɔ ngɛ kaa mo ngɛ Israel? Lɛɛ mɛni he je nɛ o bui o nyɔmtsɛ matsɛ ɔ he ɔ? Ejakaa jinɛ ta buli ɔmɛ a kpɛti nɔ kake ba konɛ e ba gbe o nyɔmtsɛ matsɛ ɔ. 16 Nɔ́ nɛ o pee ɔ hí. Be abɔ nɛ Yehowa ngɛ nɛ ɔ, o sa gbenɔ, ejakaa o bui o nyɔmtsɛ ɔ, nɔ nɛ Yehowa pɔ lɛ nu ɔ he. Amlɔ nɛ ɔ, moo hyɛ lejɛ ɔ kɛ kpe! Jije matsɛ ɔ we akplɔ ɔ kɛ nyu tɔ ɔ nɛ ngɛ e yi tetle mi ɔ ngɛ?”

17 Kɛkɛ nɛ Saul yɔse David gbi, nɛ e bi ke: “Ye bi David, o gbi ji nɛ ɔ lo?” David he nɔ ke: “Ye nyɔmtsɛ matsɛ, ye gbi ji nɛ ɔ nɛ.” 18 E de hu ke: “Mɛni he je nɛ ye nyɔmtsɛ ɔ ngɛ e sɔmɔlɔ ɔ se fiee ɔ, mɛni i pee, nɛ mɛni tɔmi i tɔ̃? 19 Ye nyɔmtsɛ matsɛ, i kpa mo pɛɛ, moo bu o sɔmɔlɔ ɔ munyu ɔmɛ tue: Ke Yehowa ji nɔ nɛ e su mo kɛ wo ye he ɔ, lɛɛ e ngɔ ye ngma afɔle ɔ.* Se ke adesahi lɛ a su mo ɔ, lɛɛ a gbiɛ mɛ ngɛ Yehowa hɛ mi, ejakaa mwɔnɛ ɔ, a fiee mi kɛ je konɛ i kɛ Yehowa we bi* nɛ ko pee kake, nɛ a de ke, ‘Yaa nɛ o ya sɔmɔ mawu kpahi!’ 20 Nɛ amlɔ nɛ ɔ, ko ha nɛ ye muɔ ɔ nɛ pue si ngɛ zugba a nɔ ngɛ he ko nɛ pi Yehowa hɛ mi, ejakaa Israel matsɛ ɔ je kpo ya ngɛ malɛɛ kake ngmelu hlae, kaa nɔ nɛ e ngɛ bebee* se fiee ngɛ yoku ɔmɛ a nɔ.”

21 Kɛkɛ nɛ Saul de ke: “I pee yayami. Ye bi David, moo kpale kɛ ba, ejakaa i be mo awi yee, akɛnɛ o bu ye wami* kaa e he jua wa mwɔnɛ ligbi nɛ ɔ he je. Ee, i je kuasia, nɛ i tɔ̃ tɔmi ngua.” 22 David he nɔ ke: “Matsɛ ɔ we akplɔ ɔ ji nɛ ɔ nɛ. Ha nɛ nihewi ɔmɛ a kpɛti nɔ kake nɛ e ba nɛ e ba ngɔ. 23 Yehowa ji nɔ nɛ maa wo nɔ fɛɛ nɔ hiɔ ngɛ lɛ nitsɛ e dami kɛ lɛ nitsɛ e we anɔkuale yemi he, ejakaa mwɔnɛ ɔ, Yehowa ngɔ mo kɛ wo ye dɛ mi se i sume nɛ ma wo ye nine nɔ ngɛ nɔ nɛ Yehowa pɔ lɛ nu ɔ nɔ. 24 Hyɛ! Kaa bɔ nɛ o wami* he jua wa ha mi mwɔnɛ ɔ, jã nɔuu nɛ ye wami* he jua nɛ́ wa ngɛ Yehowa hɛ mi, nɛ́ e kpɔ̃ mi kɛ je haomi tsuo mi.” 25 Saul ha David heto ke: “Á jɔɔ mo, ye bi David. Bɔ fɛɛ bɔ nɛ ji ɔ, o maa pee ní nguanguahi, nɛ bɔ fɛɛ bɔ nɛ ji ɔ, o maa ye manye.” Kɛkɛ nɛ David ma e blɔ nɔ, nɛ Saul kpale kɛ ho e hi he ya.