RUT

1 E ba mi kaa benɛ manyadali ɔmɛ ngɛ nɔ yee ɔ,* hwɔ ba zugba a nɔ; nɛ nyumu ko je Betlehem ngɛ Yuda, nɛ e kɛ e yo kɛ e binyumuhi enyɔ ya to nubwɔ ngɛ Moab kpokpa* a nɔ. 2 A tsɛɛ nyumu ɔ ke Elimelek,* nɛ a tsɛɛ e yo ɔ ke Naomi,* nɛ a tsɛɛ e binyumu enyɔ ɔmɛ ke Malon* kɛ Kilion.* A ji Efrata bi nɛ a je Betlehem ngɛ Yuda, nɛ a ba Moab kpokpa a nɔ nɛ a ba hi lejɛ ɔ.

3 Be komɛ a se ɔ, Naomi huno Elimelek ba gbo, nɛ e piɛ e kɛ e binyumu enyɔ ɔmɛ. 4 Pee se ɔ, e binyumu ɔmɛ ngɔ Moab yihi; a tsɛɛ nɔ kake ke Orpa, nɛ a tsɛɛ nɔ kake hu ke Rut. A hi lejɛ ɔ maa pee jeha nyɔngma. 5 Kɛkɛ nɛ e binyumu enyɔ ɔmɛ, nɛ ji Malon kɛ Kilion hu ba gbo, nɛ e ba piɛ Naomi pɛ, nɛ́ e be huno aloo binyumu ko. 6 Enɛ ɔ he ɔ, e je Moab kpokpa a nɔ nɛ e pue nɔ kɛ yaa e ma a mi ekohu, ejakaa benɛ e ngɛ Moab ɔ, e nu kaa Yehowa jɔɔ e we bi ɔmɛ ekohu,* nɛ e ha mɛ niye ní.* Benɛ e yaa a, e nganyɛmɛ ɔmɛ piɛɛ e he.

7 E kɛ e nganyɛmɛ enyɔ ɔmɛ je he nɛ a ngɛ ɔ. Benɛ a kpale a se kɛ yaa Yuda zugba a nɔ nɛ a ngɛ nyɛɛe ngɛ blɔ ɔ nɔ ɔ, 8 Naomi de e nganyɛmɛ enyɔ ɔmɛ ke: “Nyɛɛ ho, nyɛ ti nɔ fɛɛ nɔ nɛ kpale kɛ ho e nyɛ we mi ya. Yehowa nɛ je suɔmi nɛ se pui kpo kɛ tsɔɔ nyɛ kaa bɔ nɛ nyɛ je kpo kɛ tsɔɔ nyɛ huno ɔmɛ nɛ a gbo ɔ kɛ imi ɔ. 9 Yehowa nɛ ha nɛ nyɛ ti nɔ fɛɛ nɔ nɛ ná huno konɛ e ná si himi kpakpa.”* Kɛkɛ nɛ e fĩɔ a nya he,* nɛ a fo ya wawɛɛ. 10 A de lɛ si abɔ ke: “Dɛbi, waa kɛ mo maa ya o we bi ɔmɛ a ngɔ.” 11 Se Naomi de ke: “Ye biyihi, nyɛɛ kpale. Mɛni he je nɛ nyɛ ngɛ hlae nɛ nyɛɛ kɛ mi nɛ ya a? Anɛ ma nyɛ ma fɔ binyumuhi ekohu nɛ́ a ma ba pee nyɛ hunomɛ lo? 12 Ye biyihi, nyɛɛ kpale. Nyɛɛ ho, ejakaa i bwɔ pe bɔ nɛ ma sɛ gba si himi mi. Ke ma nyɛ ma ná huno gbɔkuɛ nɛ ɔ, nɛ ma nyɛ ma fɔ binyumuhi po ɔ, 13 anɛ nyɛ maa mlɛ mɛ kɛ ya si be nɛ a maa wa lo? Anɛ nyɛ maa hi si nɛ nyɛ be gbae hu ngɛ a he je lo? Dɛbi, ye biyihi, e ngɛ mi dɔe wawɛɛ kaa nɔ́ nɛ ɔ ba nyɛ nɔ, ejakaa Yehowa te si* kɛ wo mi.”

14 A fo ya wawɛɛ ekohu, nɛ lɔ ɔ se ɔ, Orpa fĩɔ e nganyɛ ɔ nya he, nɛ e je. Se Rut lɛɛ e mɛtɛ e he. 15 Enɛ ɔ he ɔ, Naomi de ke: “Hyɛ! O huno ɔ nyɛminyumu ɔ yo ɔ kpale kɛ ho e we bi ɔmɛ kɛ e mawu ɔmɛ a ngɔ ya. O kɛ lɛ nɛ kpale kɛ ho.”

16 Se Rut de ke: “Koo nyɛ ye nɔ doo kaa ma je o he, nɛ́ ma kpale ngɛ o se; ejakaa he nɛ o maa ya a, lejɛ ɔ ma ya, nɛ he nɛ o maa hwɔ ɔ, lejɛ ɔ ma hwɔ. O ma maa pee ye ma, nɛ o Mawu maa pee ye Mawu. 17 He nɛ o ma gbo ngɛ ɔ, lejɛ ɔ ma gbo ngɛ, nɛ lejɛ ɔ nɛ a maa pu mi ngɛ. Gbenɔ pɛ lɛ ma gba i kɛ mo wa kpɛti, ke pi jã a, lɛɛ Yehowa nɛ gbla ye tue wawɛɛ nitsɛ.”

18 Benɛ Naomi na kaa Rut fia e pɛɛ si kaa e kɛ lɛ maa ya a, e de we nɔ́ ko hu. 19 Nɛ mɛ ni enyɔ ɔmɛ tsuo tsa a nyɛɛmi ɔ nɔ kɛ ya si benɛ a ya su Betlehem. Benɛ a su Betlehem pɛ ɔ, ma a mi tsuo pee hoo ngɛ a he je, nɛ yi ɔmɛ bi ke: “Naomi ji nɛ ɔ lo?” 20 E de yi ɔmɛ ke: “Nyɛ ko tsɛ mi ke Naomi.* Nyɛ tsɛ mi ke Mara,* ejakaa Ope ɔ ha nɛ i na nɔ́ wawɛɛ.* 21 Benɛ i yaa a, ye he su, se Yehowa ha nɛ i kpale kɛ ba dɛ gu. Mɛni he je nɛ e sa nɛ nyɛ tsɛ mi ke Naomi, be mi nɛ Yehowa Mawu Ope ɔ ji nɔ nɛ te si kɛ wo mi, nɛ́ e ha nɛ amanehlu ba ye nɔ ɔ?”

22 Bɔ nɛ Naomi kpale kɛ je Moab kpokpa a nɔ, nɛ́ e kɛ e nganyɛ Rut, Moab no ɔ ba a ji nɛ ɔ nɛ. A ba su Betlehem ngɛ barli* kpami be ɔ sisije.

2 Naomi huno ɔ ngɛ weku no ko nɛ́ e ji niatsɛ kpanaa; a tsɛɛ lɛ ke Boaz, nɛ e je Elimelek weku ɔ mi.

2 Rut, Moab no ɔ de Naomi ke: “I kpa mo pɛɛ, ha nɛ ma je kpo kɛ ya ngmɔ ɔmɛ a mi konɛ ma ya kpɛte ngma ngɛ nɔ fɛɛ nɔ nɛ ye ní maa pee lɛ mɔbɔ ɔ se.” Lɔ ɔ he ɔ, Naomi de lɛ ke: “Moo ya, ye biyo.” 3 Kɛkɛ nɛ e je kpo nɛ e ya bɔni ní kpɛtemi ngɛ ngmɔ ɔ mi ngɛ ní kpali ɔmɛ a se. E ba mi kaa, e ya je kpo ngɛ Boaz, Elimelek weku no ɔ ngmɔ mi. 4 E kɛ we nɛ Boaz je Betlehem kɛ ba, nɛ e de ní kpali ɔmɛ ke: “Yehowa nɛ piɛɛ nyɛ he.” Nɛ a he nɔ ke: “Yehowa nɛ jɔɔ mo.”

5 Lɔ ɔ se ɔ, Boaz bi niheyo ɔ nɛ ngɛ ní kpali ɔmɛ a nɔ hyɛe ɔ ke: “Mɛnɔ weku mi yiheyo nɛ ɔ je?” 6 Niheyo ɔ nɛ ngɛ ní kpali ɔmɛ a nɔ hyɛe ɔ ha heto ke: “Yiheyo nɛ ɔ ji Moab no nɛ́ e kɛ Naomi kpale kɛ je Moab kpokpa a nɔ kɛ ba a nɛ. 7 Yiheyo ɔ ba bi mi ke, ‘I kpa mo pɛɛ, ma nyɛ ma kpɛte ní ngɛ ngma nɛ ní kpali ɔmɛ poo* nɛ a si ngɛ a se ɔ mi nɛ́ ma bua nya lo?’ Nɛ kɛ je mɔtu nɛ e ba a, e ngɛ ní tsue nɛ́ he jɔɔmi be mi. Kpaako e ya hi si ngɛ gba a sisi nɛ e ngɛ e he jɔɔe bɔɔ.”

8 Kɛkɛ nɛ Boaz de Rut ke: “Ye biyo, bu tue. Koo je kɛ ya kpɛte ní ngɛ ngmɔ kpa mi, nɛ koo ya he kpa ko hulɔ; hii ye yihewi ɔmɛ a kasa nya haa. 9 O hɛngmɛ nɛ hi ngmɔ ɔ nɛ a ngɛ ní kpae ngɛ mi ɔ nɔ, nɛ o nyɛɛ a se. I wo nihewi ɔmɛ si kaa a ko doo o nya.* Ke kuma ngɛ mo yee ɔ, yaa nyu buɛ ɔmɛ a he nɛ o ya nu nyu nɛ nihewi ɔmɛ yɛ ɔ eko.”

10 Kɛkɛ nɛ e kplã si nɛ e kɛ e hɛ mi bu si, nɛ e bi Boaz ke: “Imi ma se no ɔ, mɛni he je nɛ ye hɛ mi ba nyami ngɛ o hɛ mi ɔ, nɛ mɛni he je nɛ o tsɔ o hɛ mi ha mi kikɛ nɛ ɔ?” 11 Boaz ha lɛ heto ke: “A bɔ mi níhi tsuo nɛ o pee kɛ ha o nganyɛ ɔ be mi nɛ o huno ɔ gbo ɔ, kɛ bɔ nɛ o je o tsɛ kɛ o nyɛ a he, kɛ o weku li a zugba nɔ kɛ ba nihi nɛ o li mɛ gblee a kpɛti ɔ. 12 Yehowa nɛ jɔɔ mo ngɛ níhi nɛ o pee ɔ a he, nɛ Yehowa, Israel Mawu ɔ, nɔ nɛ o ba sa we ngɛ e pɛli sisi ɔ nɛ ha mo hiɔwo nɛ hi kɛ pi si.”* 13 Kɛkɛ nɛ e de ke: “Ye nyɔmtsɛ, mo ha nɛ ye hɛ mi nɛ ba nyami ngɛ o hɛ mi, ejakaa o wo ye bua, nɛ o tu munyu nɛ e ta o sɔmɔlɔ ɔ tsui he,* pohu pi o sɔmɔli ɔmɛ a kpɛti nɔ kake ji mi.”

14 Benɛ ní yemi be su ɔ, Boaz de lɛ ke: “Moo ba hiɛ ɔ nɛ o ba ye abolo ɔ eko, nɛ́ o ngɔ nɔ́ nɛ o po ɔ kɛ sɔ wai nɛ kuã a mi.”* Lɔ ɔ he ɔ, Rut hi si ngɛ ní kpali ɔmɛ a kasa nya. Kɛkɛ nɛ Boaz ha lɛ ngma nɛ a sĩ ɔ eko, nɛ e ye nɛ e tɔ, nɛ eko piɛ. 15 Benɛ e te si konɛ e ya kpɛte ní ɔ, Boaz fã e nihewi ɔmɛ ke: “Nyɛ ha nɛ e kpɛte ní ngɛ ngma nɛ a poo ɔ po mi,* nɛ nyɛ ko doo e nya. 16 Jehanɛ se hu ɔ, nyɛɛ hyɛ nɛ nyɛɛ ngmɛɛ ngma a eko he kɛ pue si, nɛ́ nyɛɛ je he kɛ ha lɛ konɛ e kpɛte, nɛ nyɛ ko de nɔ́ ko kɛ tsi e nya.”

17 Lɔ ɔ he ɔ, Rut ya nɔ nɛ e kpɛte ní ngɛ ngmɔ ɔ mi kɛ ya si gbɔkuɛ. Benɛ e gbee nɔ́ nɛ e kpɛte ɔ, e ná barli* maa pee efa kake.* 18 Kɛkɛ nɛ e wó, nɛ e je kɛ ho ma a mi ya, nɛ e nganyɛ ɔ na nɔ́ nɛ e kpɛte ɔ. Jehanɛ hu ɔ, Rut je ní nɛ e ye nɛ e piɛ ɔ kɛ ha e nganyɛ ɔ.

19 Kɛkɛ nɛ e nganyɛ ɔ de lɛ ke: “Jije o ya kpɛte ní ngɛ mwɔnɛ ɔ? Jije o ya tsu ní ngɛ? Á jɔɔ nɔ nɛ e tsɔ e hɛ mi ha mo ɔ.” Lɔ ɔ he ɔ, e tsɔɔ e nganyɛ ɔ he nɛ e ya tsu ní ngɛ ɔ, nɛ e de ke: “A tsɛɛ nyumu ɔ nɛ i ya tsu ní ngɛ e ngmɔ mi mwɔnɛ ɔ ke Boaz.” 20 Kɛkɛ nɛ Naomi de e nganyɛ ɔ ke: “Yehowa, nɔ nɛ ha we nɛ e suɔmi ɔ se nɛ po ngɛ nihi nɛ a hɛ ngɛ kɛ nihi nɛ a gbo ɔ a nɔ ɔ nɛ jɔɔ lɛ.” Naomi tsa nɔ ke: “Nyumu ɔ ji wa weku no. E ji wa kpɔli ɔmɛ a kpɛti nɔ kake.”* 21 Kɛkɛ nɛ Rut, Moab no ɔ de ke: “Jehanɛ se hu ɔ, e de mi ke, ‘Hii ye ní tsuli ɔmɛ a kasa nya haa kɛ ya si be nɛ a maa gbe ye ní kpami ɔ tsuo nya.’” 22 Naomi de e nganyɛ Rut ke: “Ye biyo, e hi kaa o kɛ yihewi ɔmɛ ma tsu ní ngɛ Boaz ngmɔ ɔ mi pe nɛ o maa ya nɔ kpa ko ngmɔ mi nɛ a ma ya doo o nya.”

23 Lɔ ɔ he ɔ, e hi Boaz yihewi ɔmɛ a kasa nya haa, nɛ e kpɛte ní kɛ ya si be nɛ barli* kpami kɛ hwiit kpami ɔ ba nyagbe. Nɛ e ya nɔ nɛ e kɛ e nganyɛ ɔ hi si.

3 Jehanɛ ɔ, e nganyɛ Naomi de lɛ ke: “Ye biyo, anɛ e sɛ nɛ ma hla hi he* kɛ ha mo konɛ níhi a mi nɛ hi ha mo lo? 2 Anɛ pi wa weku no ji Boaz lo? Lɛ ji nɔ nɛ o ya piɛɛ e yihewi ɔmɛ a he ɔ nɛ. Gbɔkuɛ nɛ ɔ, e ma ya sa barli* mi ngɛ ngma gbeemi he ɔ. 3 Lɔ ɔ he ɔ, moo du o he, nɛ o kpa nu nɛ jeɔ via; nɛ o dla o he* nɛ o kple kɛ ya ngma gbeemi he ɔ. Ko ha nɛ nyumu ɔ nɛ le kaa o ba lejɛ ɔ kɛ yaa si be nɛ e maa ye ní nɛ e maa nu ní ta. 4 Ke e ya hwɔ si ɔ, moo to he nɛ e ya hwɔ ɔ he hɛ; lɔ ɔ se ɔ, yaa nɛ o ya je bo ngɛ e nane he nɛ o hwɔ si. E maa tsɔɔ mo nɔ́ nɛ e sa kaa o pee.”

5 Kɛkɛ nɛ Rut he nɔ ke: “Níhi tsuo nɛ o de mi ɔ, ma pee.” 6 Lɔ ɔ he ɔ, e kple kɛ ho ngma gbeemi he ɔ ya, nɛ e ya pee níhi tsuo nɛ e nganyɛ ɔ de lɛ ke e pee ɔ. 7 Jamɛ a be ɔ mi ɔ, Boaz ye ní nɛ e nu ní, nɛ e bua jɔ e he. Kɛkɛ nɛ e ho nɛ e ya hwɔ si ngɛ ngma nɛ a bua nya a kasa nya. Lɔ ɔ se ɔ, Rut pee blɛuu nɛ e ba je bo ɔ ngɛ Boaz nane he nɛ e hwɔ si. 8 Nyɔ mi kpɛti ɔ, nyumu ɔ he bɔni domi blibliibli, nɛ e wo e yi nɔ nɛ e na yo ko nɛ e hwɔɔ si ngɛ e nane si. 9 E bi ke: “Mo mɛnɔ?” E he nɔ ke: “Imi Rut, o sɔmɔlɔ ɔ. Mo bli o bo ɔ* mi kɛ ha o sɔmɔlɔ ɔ nɔ, ejakaa kpɔlɔ ji mo.” 10 Kɛkɛ nɛ Boaz de ke: “Ye biyo, Yehowa nɛ jɔɔ mo. Suɔmi nɛ o je kpo nyagbe nɛ ɔ pã kekle nɔ́ ɔ, ejakaa o ya nyɛɛ we nihewi niatsɛmɛ aloo ohiatsɛmɛ a se. 11 Enɛ ɔ he ɔ, ye biyo, koo ye gbeye. Nɔ́ fɛɛ nɔ́ nɛ o de ɔ, ma pee ha mo, ejakaa ma a mi bi ɔmɛ tsuo le kaa o ji yo nɛ se be. 12 E ngɛ mi kaa i ngɛ he blɔ kaa i kpɔ̃ɔ mo mohu lɛɛ, se kpɔlɔ kpa ko ngɛ nɛ e su nyɛ he haa pe mi. 13 Hwɔ hiɛ ɔ gbɔkuɛ nɛ ɔ, nɛ ke je na nɛ e ba mi kaa e ma kpɔ̃ mo ɔ, lɛɛ saminya! Ha nɛ e kpɔ̃ mo. Se ke e sume kaa e ma kpɔ̃ mo ɔ, lɛɛ be abɔ nɛ Yehowa ngɛ nɛ ɔ, imi nitsɛ ma kpɔ̃ mo. Moo hwɔ hiɛ ɔ kɛ ya si mɔtu.”

14 Lɔ ɔ he ɔ, Rut hwɔ e nane si kɛ ya si mɔtu, nɛ e te si benɛ je mi tsɔ we lolo konɛ nɔ ko nɛ kó na lɛ. Kɛkɛ nɛ Boaz de lɛ ke: “Ko ha nɛ nɔ ko nɛ le kaa yo ko ba ngma gbeemi he ɔ.” 15 E de hu ke: “Je nɔ hami tade ɔ nɛ ngɛ o he ɔ kɛ ba, nɛ o bli mi.” Lɔ ɔ he ɔ, e bli mi, nɛ Boaz ka barli* susumi nɔ́* ekpa kɛ wo mi, nɛ e kɛ tloo lɛ, lɔ ɔ se ɔ, Boaz je kɛ ho ma a mi ya.

16 Rut pue nɔ kɛ ho e nganyɛ ɔ ngɔ ya, nɛ e nganyɛ ɔ bi lɛ ke: “Kɛ níhi ya lɛ kɛɛ ha mo,* ye biyo?” E de e nganyɛ ɔ nɔ́ fɛɛ nɔ́ nɛ nyumu ɔ pee ha lɛ ɔ. 17 E de lɛ hu ke: “E ka barli* susumi nɔ́ ekpa nɛ ɔ kɛ ha mi, nɛ e de mi ke, ‘Koo ya o nganyɛ ɔ ngɔ kɛ o dɛ gu.’” 18 Kɛkɛ nɛ Naomi de ke: “Ye biyo, moo hi si ngɛ hiɛ ɔ kɛ ya si be nɛ o maa na bɔ nɛ sane ɔ maa ba nyagbe ha, ejakaa ja nyumu ɔ tsu sane ɔ he ní mwɔnɛ ɔ loko e maa jɔɔ e he.”

4 Jehanɛ ɔ, Boaz ho ma a agbo ɔ nya ya, nɛ e ya hi si ngɛ lejɛ ɔ. Nɛ hyɛ! kpɔlɔ ɔ nɛ Boaz wo e ta a bee. Kɛkɛ nɛ Boaz de ke: “Asimasi, moo ba hiɛ ɔ nɛ o ba hi si.” Nɛ e ya nɛ e ya hi si. 2 Lɔ ɔ se ɔ, Boaz tsɛ ma nikɔtɔma amɛ a kpɛti nihi nyɔngma, nɛ e de mɛ ke: “Nyɛ ba hi si ngɛ hiɛ ɔ.” Lɔ ɔ he ɔ, a ya hi si.

3 Jehanɛ ɔ, Boaz de kpɔlɔ ɔ ke: “E biɔ nɛ Naomi, nɔ nɛ e kpale kɛ je Moab kpokpa a nɔ kɛ ba a nɛ e jua wa nyɛminyumu Elimelek zugba a. 4 Lɔ ɔ he ɔ, i susu kaa e sa nɛ ma wó o tue nɔ, nɛ ma de mo ke, ‘Mo he ngɛ ma mi bi ɔmɛ, kɛ ye ma mi nikɔtɔma amɛ a hɛ mi. Ke o ma kpɔ̃ ɔ, mo kpɔ̃. Se ke o be kpɔ̃e ɔ, lɛɛ mo de mi konɛ ma le, ejakaa mo lɛ e sa kaa o kpɔ̃, nɛ o se loko imi.’” E he nɔ ke: “I suɔ nɛ ma kpɔ̃.” 5 Kɛkɛ nɛ Boaz de ke: “Ligbi nɛ o ma he zugba a ngɛ Naomi dɛ ɔ, e sa nɛ o he ngɛ Rut, Moab no ɔ, nɛ ji nyumu ɔ nɛ e gbo ɔ yo ɔ hu dɛ, bɔ nɛ pee nɛ nyumu ɔ nɛ gbo ɔ biɛ nɛ hi e gbosi ní ɔ he.” 6 Kɛkɛ nɛ kpɔlɔ ɔ de ke: “I be nyɛe ma kpɔ̃, ejakaa jã nɛ ma pee ɔ ma nyɛ ma kpata imi nitsɛ ye gbosi ní ɔ hɛ mi. Ngɔɔ he blɔ nɛ i ngɛ kaa kpɔlɔ ɔ kɛ kpɔ̃ ha mo nitsɛ o he, ejakaa i be nyɛe ma kpɔ̃.”

7 Ngɛ blema Israel ɔ, ke nɔ ko kɛ he blɔ nɛ e ngɛ kaa kpɔlɔ ɔ ma kpɔ̃ nɔ́ ko, aloo e kɛ jamɛ a he blɔ ɔ ma ha nɔ kpa a, nɔ́ nɛ a peeɔ kɛ maa nɔ mi ji nɛ ɔ nɛ: E sa nɛ nɔ ɔ nɛ je e tokota nɛ́ e ngɔ kɛ ha nɔ kpa a. Enɛ ɔ ji blɔ nɛ a guɔ nɔ kɛ maa sane ko nɔ mi kaa e ji anɔkuale* ngɛ Israel. 8 Lɔ ɔ he ɔ, benɛ kpɔlɔ ɔ de Boaz ke, “He kɛ ha mo nitsɛ o he ɔ,” e je e tokota a. 9 Kɛkɛ nɛ Boaz de nikɔtɔma amɛ kɛ ni ɔmɛ tsuo ke: “Mwɔnɛ ɔ, nyɛ ji odasehi kaa i ngɛ Elimelek níhi tsuo, kɛ Kilion kɛ Malon a níhi tsuo hee ngɛ Naomi dɛ. 10 Jehanɛ se hu ɔ, i ngɛ Rut, Moab no ɔ, nɛ ji Malon yo ɔ ngɔe kaa ye yo, konɛ nyumu ɔ nɛ gbo ɔ biɛ nɛ hi e gbosi ní ɔ he, bɔ nɛ pee nɛ e nyɛminyumu ɔmɛ kɛ e ma a mi bi ɔmɛ a hɛ nɛ ko je nyumu ɔ nɛ gbo ɔ biɛ nɔ. Mwɔnɛ ɔ, nyɛ ji odasehi.”

11 Kɛkɛ nɛ ni ɔmɛ tsuo nɛ a ngɛ ma a agbo ɔ nya kɛ nikɔtɔma amɛ de ke: “Odasehi ji wɔ! Yehowa nɛ ha nɛ yo ɔ nɛ ngɛ o we ɔ mi sɛe ɔ nɛ pee kaa Rahel kɛ Lea, nɛ ji yi enyɔ ɔmɛ nɛ Israel ma a je a mi ɔ. Moo ye manye ngɛ Efrata, nɛ́ o ná biɛ kpakpa* ngɛ Betlehem. 12 Nina nɛ Yehowa ma ha mo kɛ gu yiheyo nɛ ɔ nɔ ɔ nɛ ha nɛ o we ɔ nɛ pee kaa Perez we ɔ, nɔ nɛ Tamar fɔ kɛ ha Yuda a.”

13 Lɔ ɔ he ɔ, Boaz ngɔ Rut, nɛ e ba pee e yo. E kɛ lɛ ná bɔmi, nɛ Yehowa ha nɛ e ngɔ hɔ, nɛ e fɔ binyumu. 14 Kɛkɛ nɛ yi ɔmɛ de Naomi ke: “Á je Yehowa, nɔ nɛ ha nɛ o ná kpɔlɔ mwɔnɛ ɔ yi. Á jaje e biɛ ngɛ Israel! 15 Lɛ* nɛ e ha nɛ o ná wami* ekohu, nɛ e maa hyɛ o nɔ ngɛ o bwɔmi si, ejakaa o nganyɛ ɔ nɛ́ e suɔ mo, nɛ́ e he jua wa ha mo pe binyumuhi kpaago ɔ lɛ fɔ lɛ.” 16 Naomi ngɔ jokuɛ ɔ, nɛ e wo lɛ kɛ fɔ e gugue mi, nɛ e hyɛ e nɔ. 17 Kɛkɛ nɛ yi ɔmɛ nɛ a ngɛ kpɔ ɔ mi ɔ wo jokuɛ ɔ biɛ. A de ke, “A fɔ binyumu ha Naomi,” nɛ a wo lɛ biɛ ke Obed. Lɛ nɛ e fɔ Yese, nɛ ji David tsɛ ɔ.

18 Jehanɛ ɔ, Perez weku kpa* ji nɛ ɔ nɛ: Perez fɔ Hezron; 19 Hezron fɔ Ram; Ram fɔ Aminadab; 20 Aminadab fɔ Nashon; Nashon fɔ Salmon; 21 Salmon fɔ Boaz; Boaz fɔ Obed; 22 Obed fɔ Yese;* nɛ Yese fɔ David.