HIOB

“Yayo fɔ mi kɛ ba kɛ he gu,

Nɛ ma kpale kɛ ya kɛ he gu.

 3 “Ha nɛ ligbi nɛ a fɔ mi ɔ hɛ mi nɛ kpata,

Kɛ jehanɛ se hu ɔ, nyɔ mi nɛ nɔ ko de ke: ‘A ngɔ binyumu hɔ ɔ!’

Mawu nɛ ngɛ hiɔwe ɔ nɛ ko susu jamɛ a ligbi ɔ he;

La nɛ ko kpɛ ngɛ nɔ.

 6 Ha nɛ diblii kpii nɛ ngɔ jamɛ a nyɔ ɔ.

E ko nya kɛ piɛɛ ligbi ɔmɛ a he ngɛ jeha a mi.

Nɛ e ko piɛɛ ligbi ɔmɛ a he ngɛ nyɔhiɔ ɔ mi.

 7 Ee! Ha nɛ jamɛ a nyɔ ɔ nɛ pee yosa;

A ko nu bua jɔmi gbi ngɛ jamɛ a nyɔ ɔ mi.

 8 Ha nɛ nihi nɛ a gbiɛɔ ligbi ɔ nɛ a gbiɛ jamɛ a nyɔ ɔ,

Nɛ ha nɛ nihi nɛ́ a nyɛɔ tsɛ̃ɛ̃ɔ Leviatan* ɔ nɛ́ a gbiɛ jamɛ a nyɔ ɔ.

 9 Ha nɛ dodoehi nɛ a ngɛ jamɛ a gbɔkuɛ enyɔ ɔmɛ a kpɛti ɔ nɛ wo diblii;

Ha nɛ e mlɛ jamɛ a ligbi ɔ la a yaka gu.

Nɛ ko ha nɛ e na mɔtu la a.

10 Ejakaa e nga we ye yayo fɔmi kotoku ɔ nya sinya a;

Nɛ e ngɔɛ haomi kɛ laa konɛ ye hɛngmɛ nɛ ko na.

12 Mɛni he je yayo ngɔ mi kɛ fɔ e tɛ nɔ

Nɛ e ha mi nyɔ nɛ i pupɔ ɔ?

13 Kaa i gbo jamɛ a be ɔ, jinɛ be nɛ ɔ mi ɔ, i hwɔɔ si nɛ ye tue mi jɔ mi;

Jinɛ i hwɔɔ si nɛ ye he mi jɔ mi

14 Jinɛ i kɛ zugba a nɔ matsɛmɛ kɛ a ga woli,

Nihi nɛ a po mahi kɛ ha a he nɛ́ amlɔ nɛ ɔ a hɛ mi kpata,*

15 Aloo i kɛ ma nikɔtɔmahi nɛ a ngɛ sika tsu,

Nɛ a we ɔmɛ a mi hyi kɛ sika hiɔ ɔ hwɔɔ si nɛ ye he mi jɔ mi.

16 Aloo mɛni he je nɛ i gbo we ngɛ ye nyɛ mi mi loko a fɔ mi,

Kaa bimɛ nɛ a nɛ pu la gblee ɔ?

17 Ngɛ lejɛ ɔ, yiwutsotsɛmɛ po a haomi se poɔ;

Nihi nɛ pɔ tɔ mɛ ɔ jɔɔ a he.

18 Ngɛ lejɛ ɔ, nihi tsuo nɛ a wo mɛ tsu ɔ a he mi jɔɔ mɛ;

Nɛ nɔ ko nyɛ we a nɔ kaa a tsu ní.

19 Ngɛ lejɛ ɔ, slɔɔto ko be nimli nguahi kɛ nimli guhi a kpɛti,

Nɛ nyɔguɛhi yeɔ a he ngɛ a nyɔmtsɛmɛ a dɛ mi.

20 Mɛni he je nɛ e haa nɔ nɛ ngɛ nɔ́ nae ɔ la

Nɛ e haa nihi nɛ a ngɛ aywilɛho yee wawɛɛ* ɔ wami ɔ?

A tsuaa si kɛ hlaa lɛ wawɛɛ pe bɔ nɛ a hlaa juetli po,

22 Nihi nɛ a nyaa wawɛɛ,

Nɛ́ a bua jɔɔ ke a na yɔkɔ.

23 Mɛni he je lɛ nɔmlɔ nɛ laa blɔ ɔ, e haa lɛ la a,

Nɔ nɛ Mawu po piɛ kɛ wo e he ɔ?

24 Kɔmɔ yemi ba pee kaa ye niye ní,

Nɛ ye kɛmɛmi ɔ pueɔ si kaa nyu.

25 Nɔ́ nɛ sawale nuɔ mi ngɛ he ɔ nɔuu lɛ ba ye nɔ ɔ nɛ,

Nɛ nɔ́ nɛ i ngɛ gbeye yee ɔ ba ye nɔ.

26 I ná we tue mi jɔmi, he mi jɔmi kɛ mumi womi he,

Nɛ ye haomi ɔmɛ hu a se pui.”

 3 E ji anɔkuale kaa o tsɔɔ nihi fuu ní,

Nɛ o wo ninehi nɛ a mi jɔ ɔmɛ a mi he wami.

 4 O munyu ɔ wo nihi nɛ yaa nɔ si ɔ nɔ kɛ da si ekohu,

Nɛ o wo nakutsohi nɛ a mi gbɔjɔ ɔ he wami.

 5 Se amlɔ nɛ ɔ, e ba o nɔ, nɛ o kɔni mi jɔ̃;*

E sa o he nɛ o nɛ́ nya.

 8 Nɔ́ nɛ i na ji kaa, nihi nɛ a huɔ yayami ngmɔ*

Nɛ a duɔ haomi ɔ, lɔ ɔ nɔuu lɛ a ma kpa.

 9 Ke Mawu wo mumi pue a nɔ ɔ, kɛkɛ a hɛ mi kpata.

Nɛ ke e mi mi fumi ɔ pɛ́ ɔ, kɛkɛ a hɛ mi kpata kulaa.

10 Jatahi huãã, nɛ jata wayo pɛɛɔ,

Se jatahi nɛ a he wa* po, a lunguhi kuɔ.

11 Ke jata nɛ lo nɛ́ e ye ɔ, e gboɔ,

Nɛ jata bi ɔmɛ gbɛɔ kɛ fĩa a.

12 A kɛ munyu ko ha mi ngɛ laami mi,

A de lɛ zaa kɛ wo ye tue mi.

13 Nyɔ mi kpɛti benɛ nimli hwɔ mahe vii ɔ,

I na nina komɛ nɛ gba ye juɛmi nya.

14 Ye he kpokpo wawɛɛ nitsɛ,

Nɛ i nu he ngɛ ye wu ɔmɛ a mi tɔɔ.

15 Mumi ko ba be ngɛ ye hɛ mi;

Nɛ e ha nɛ fĩɛ ngmangu pue ye nɔ.

16 Kɛkɛ nɛ e da si,

Se i li e mi tso.

Nɔ́ ko ba da si ngɛ ye hɛ mi;

Lejɛ ɔ jɔ dii, kɛkɛ nɛ i nu gbi ko nɛ de ke:

18 Hyɛ! E sɔmɔli ɔmɛ po e be hemi kɛ yemi ngɛ a mi,

Nɛ e naa tɔmi ngɛ e bɔfo ɔmɛ* a he.

19 Lɛɛ nihi nɛ a hii zu tsuhi a mi,

Nɛ́ a to a sisi ngɛ bunyuku mi,

Nɛ́ a pɔtɔɔ mɛ kaa bɔ nɛ a pɔtɔɔ wɔyewɔye ɔ, mɛɛ lɛɛ e ma ná hemi kɛ yemi ko ngɛ a mi lo?

20 A pɔtɔɔ mɛ kulaa kɛ jeɔ mɔtu kɛ ya siɔ gbɔkuɛ;

A hɛ mi kpataa kɛ yaa neneene nɛ nɔ ko nɔ ko po to we he hɛ.

 2 Ejakaa mi mi la maa gbe kuasia,

Nɛ hɛkɔ maa gbe nɔ nɛ e sisimi yi ɔ.

 3 I na kuasia ko nɛ e ye manye kaa tso nɛ sipoku ngɛ zu mi sɛe.

Se tlukaa, a gbiɛ e sihi he ɔ.

 4 E bimɛ be slɔkee,

A pueɔ a hɛ mi si ngɛ ma agbo ɔ nya, nɛ nɔ ko be nɛ ma he a yi wami.

 5 Ní nɛ e kpa a hu, nɔ nɛ hwɔ ngɛ lɛ yee ɔ ba yeɔ,

E ba woɔ ní nɛmɛ nɛ a ngɛ mio ɔmɛ a kpɛ po kɛ piɛɔ he,

Nɛ a kpɔ̃ɔ̃ níhi nɛ kuasia kɛ e bimɛ ɔmɛ ngɛ ɔ ngɛ a dɛ.

 6 Ejakaa pi bunyuku mi nɛ ní yayahi puɛɔ kɛ jeɔ,

Nɛ pi zu mi hu nɛ haomi puɛɔ kɛ jeɔ.

 7 Kaa bɔ nɛ la lilɛ teɔ kɛ yaa hiɔwe ɔ,

Jã nɔuu kɛ̃ nɛ nɔmlɔ adesa hu, bɔ fɛɛ bɔ nɛ ji ɔ, haomi maa ba e nɔ.

 8 Se kaa imi ji mo ɔ, jinɛ i ko kpa Mawu pɛɛ,

Nɛ i ko tu ye sane ɔ kɛ ko wo Mawu dɛ.

 9 Nɔ nɛ peeɔ ní nguanguahi nɛ wa juɛmi sui he,

Nyakpɛ níhi nɛ wa be nyɛe maa kane ɔ.

10 E haa nɛ hiɔmi nɛɔ kɛ pueɔ zugba a nɔ,

Nɛ e haa nɛ ngmɔ ní ɔmɛ náa nyu.

11 E woɔ nimli guhi a nɔ,

Nɛ e heɔ nihi nɛ a hao ɔ a yi wami.

12 E haa nɛ nihi nɛ a toɔ ga a, a ga tsɔmi ɔ peeɔ yaka,

Enɛ ɔ haa nɛ a nine nya ní tsumi ɔmɛ yi manye.

13 E haa nɛ nihi nɛ a ngɛ juɛmi ɔ nɔɔ klama nɛ mɛ nitsɛmɛ a tsɔ̃ ɔ mi.

Bɔ nɛ pee nɛ a yi mi tomi ɔmɛ nɛ a pee yaka.

14 Ke je na po, mɛɛ lɛɛ diblii bɔle mɛ kɛ kpe,

Piani nɛ la ngɛ po, a hii si tataae kaa nɔ́ nɛ diblii mi lɛ a ngɛ nyɛɛe.

15 E heɔ nihi a yi wami kɛ jeɔ a lilɛ nɛ ngɛ kaa klaate ɔ nya,

E heɔ ohiatsɛ yi wami kɛ jeɔ nɔ nɛ e he wa a dɛ mi,

16 Bɔ nɛ pee nɛ nimli guhi nɛ́ a ná hɛnɔkami,

Se nihi nɛ a pee we nɔ́ nɛ da a lɛɛ, e ma má a nya.

17 Hyɛ! Nɔ nɛ Mawu kãa e hɛ mi ɔ ngɛ bua jɔmi;

Enɛ ɔ he ɔ, ke Ope ɔ ngɛ mo tsɔsee ɔ, ko kua!

18 E plaa nɔ, se lɛ nɔuu kɛ̃ e fĩɔ pa amɛ a nɔ;

E kuɔ nɔ, se lɛ nɔuu kɛ̃ e kɛ e nine tsaa.

19 E ma he o yi wami kɛ je amanehluhi ekpa mi,

Nɛ kpaagone ɔ po lɛɛ, e be mo awi yee.

20 Ke hwɔ ba a, e ma kpɔ̃ mo kɛ je gbenɔ dɛ mi,

Nɛ ke ta ba a, e ma kpɔ̃ mo kɛ je klaate he wami nya.

21 E maa bu o he kɛ je lilɛ nɛ fiaa nɔ kaa kpa a he,

Nɛ o be gbeye yee ke hɛ mi kpatami ba.

22 Hɛ mi kpatami kɛ hwɔ a he maa pee mo muɔ,

Nɛ o be lohwe awi yeli nɛ a ngɛ zugba a nɔ gbeye yee.

23 Ejakaa tɛhi nɛ a ngɛ nga mi ɔ be mo awi yee,*

Nɛ nga mi lohwe awi yeli kɛ mo maa hi si ngɛ tue mi jɔmi mi.

24 O maa na kaa o bo tsu ɔ ngɛ slɔkee,*

Nɛ ke o ya hyɛ o lohwehi a ní yemi he ɔ, o maa na kaa nɔ́ ko nɔ́ ko laa we.

25 O bimɛ maa hiɛ babauu,

Nɛ o sisi bimɛ maa hiɛ kaa nga ngɛ zugba a nɔ.

26 Loko o ma gbo ɔ, o maa hi he wami loloolo,

Kaa ngma* nɛ́ a bua nya nɛ́ a fĩ yi tlomi nya ngɛ ngma kpami be mi.

 2 “I ná nɛ a ngmɛ ye haomi ɔmɛ

Kɛ ye amanehlu ɔ tsuo ngɛ sɛni nɔ!

 4 Ejakaa Ope ɔ kɛ̃ɛ̃ mi bi ɔmɛ gbɔɔ mi,

Nɛ ye mumi ɔ ngɛ a nya duɔ ɔmɛ nue;

Gbeye níhi nɛ je Mawu ngɔ ɔ bua a he nya kɛ wo ye he.

 5 Ke nga mi teji na nga a, anɛ e pa hii pɛe lo?

Aloo ke na ku na niye ní ɔ, e pa hii pɛe lo?

 6 Anɛ a yeɔ niye ní muɛtɛ nɛ a wui mi ngo lo?

Aloo ngɔɔmi ko ngɛ nyu nɛ́ ngɛ malo tso* mi ɔ mi lo?

 8 I ná jinɛ a tsu ye ní bimi ɔ he ní ha mi

Nɛ́ Mawu ha mi nɔ́ nɛ i ngɛ hlae ɔ.

 9 I ná jinɛ Mawu maa suɔ nɛ́ e kpata ye hɛ mi,

Nɛ e kɛ e nine maa gbe mi!

10 Jinɛ lɔ ɔ po ko wo ye bua;

I ko tuu kɛ bua jɔmi ngɛ nɔ́ nɛ i ngɛ nae ɔ tsuo se,

Ejakaa i kua we Nɔ Klɔuklɔu ɔ munyu ɔmɛ.

13 Anɛ blɔ ko ngɛ nɛ ma gu nɔ kɛ ye bua ye he lo

Be mi nɛ nɔ ko be nɛ maa ye bua mi ɔ?

14 Nɔ fɛɛ nɔ nɛ je we suɔmi nɛ se pui kpo kɛ tsɔɔ we e nyɛmi nɔmlɔ ɔ

E ma kpa Mawu gbeye yemi.

15 Imi nitsɛ ye nyɛmimɛ sisi mi kaa pa ngɛ fĩɛ be mi,

Kaa fĩɛ be mi pa nɛ gbli.

16 Nyu tɛ* ha nɛ pa a yu tuu,

Nɛ snoo nɛ ngɛ fɔe ɔ laa ngɛ mi.

17 Se ke be su ɔ, a mi nyu tãa nɛ a baa nyagbe;

Ke je mi dɔ la a, a mi gbliɔ.

18 A blɔ gbaa kɛ guɔ he kpa;

A beɔ kɛ sɛɔ nga kplanaa nɔ, nɛ a laa.

19 Blɔ hiali nɛ a je Tema a hlaa mɛ;

Blɔ hiali nɛ a je Sheba a* mlɛɔ mɛ.

20 Zo gbe mɛ ngɛ nɔ́ nɛ a kɛ a hɛ fɔ nɔ ɔ he je;

Benɛ a ba su lejɛ ɔ, a nine nyɛ si.

21 Ejakaa jã ji bɔ nɛ nyɛ ji kɛ ha mi;

Nyɛ na bɔ nɛ ye amanehlu ɔ nya wa ha, nɛ nyɛ ye gbeye.

23 Anɛ i bi nyɛ ke nyɛ kpɔ̃ mi kɛ je he nyɛlɔ dɛ mi

Aloo nyɛ he ye yi wami* kɛ je yiwutsotsɛmɛ a dɛ mi lo?

24 Nyɛɛ tsɔɔ mi, nɛ ma má ye nya;

Nyɛɛ ye bua mi nɛ́ ma na ye tɔmi ɔ.

26 Anɛ nyɛ ngɛ ga toe nɛ́ nyɛ kã ye hɛ mi ngɛ munyuhi nɛ i tu ɔmɛ a he lo,

Nyumu nɛ e hao ɔ munyuhi nɛ́ kɔɔhiɔ muɔɔ kɛ hoɔ ɔ lo?

27 E ngɛ heii kaa nyɛ ma nyɛ maa fɔ̃ awusa nɔ sɔ*

Nɛ nyɛ maa jua nyɛ huɛ!*

28 Amlɔ nɛ ɔ, nyɛ plɛ nɛ nyɛɛ hyɛ mi,

Ejakaa i be lakpa yee ngɛ nyɛ hɛ mi kɔkɔɔkɔ.

29 I kpa nyɛ pɛɛ, nyɛ susu he ekohu, nyɛ ko kojo mi,

Ee, nyɛ susu he ekohu, ejakaa loloolo ɔ, i ngmɛɛ we ye dami ní peemi ɔ he.

7 Nɔmlɔ adesa wami ngɛ zugba a nɔ ngɛ kaa nɔ ko nɛ́ a nyɛɔ e nɔ kaa e tsu ní wawɛɛ.

Nɛ e ligbi ɔmɛ ngɛ kaa apaatsɛ ligbihi.

 2 E ngɛ kaa nyɔguɛ, e ná nɛ ligbi ɔ ba nyagbe,

Nɛ e mlɛɔ e hiɔwo kaa bɔ nɛ apaatsɛ peeɔ ɔ.

 3 Jã nɔuu kɛ̃ nɛ nyɔhiɔhi babauu ji nɛ ɔ nɛ́ se nami ko be ye wami he,

A ha mi nyɔ mi babauu nɛ haomi hyi lɛ tɔ.

 5 Ye he womi tsuo wo gɔgɔ nɛ ye he tsuo pee kɛ mu kpɔbikpɔbi.

Ye he tsuo pee kɛ pahi nɛ a hɛ mi gbli nɛ́ a mi ngɛ nyu jee.

 6 Ye ligbi ɔmɛ ngɛ bee mlamlaamla kaa bo lolɔ kplɛ,

Nɛ a baa nyagbe nɛ́ hɛnɔkami ko be.

 7 Kai kaa ye wami ngɛ kaa kɔɔhiɔ,

Nɛ ye hɛngmɛ be bua jɔmi* nae hu.

 8 Hɛngmɛ nɛ́ ngɛ mi nae mwɔnɛ ɔ be mi nae hu;

O ma hla mi, se jamɛ a be ɔ mi ɔ, i je.

 9 Kaa bɔ nɛ bɔku gbɛɔ bɔɔbɔɔbɔɔ nɛ e laa a,

Jã nɔuu nɛ nɔ nɛ yaa Yɔkɔ* mi ɔ kpale we kɛ bɛ hu.

10 E be kpalee kɛ ba e we mi hu,

Nɛ e hi he ɔ be lɛ kaie hu.

Ma tu munyu akɛnɛ ye tsui* ngɛ mi yee ɔ he je;

Ma tu munyu ngɛ ye amanehlu ɔ mi!*

12 Anɛ wo ji mi aloo wo mi lohwe ngua ko ji mi,

Nɛ lɔ ɔ he je e sa nɛ o to bulɔ ngɛ ye he lo?

13 Ke i de ke, ‘Ye satso maa wo ye bua;

Nɛ he nɛ i hwɔɔ ɔ ma ha nɛ ye haomi ɔ maa ba si ɔ,’

14 Kɛkɛ o ha i nla nlamihi gbeyegbeye

Nɛ o kɛ ninahi hu woɔ ye he gbeye,

15 Enɛ ɔ he ɔ, i ná nɛ i gbo* ejakaa ye mumi nya ta,

Ee, i suɔ gbenɔ mohu pe ye nɔmlɔ tso nɛ ɔ.*

17 Mɛnɔ ji nɔmlɔ adesa nɛ o susuɔ e he

Nɛ o kɛ o juɛmi* maa e nɔ?

18 Mɛni he je nɛ o kɛ o hɛ maa e nɔ daa mɔtu

Nɛ o kaa lɛ be fɛɛ be ɔ?

19 O be o hɛ jee kɛ je ye he

Nɛ́ o ngmɛɛ ye he bɔɔ nɛ ma mi ye kuɔ mi nyu lo?

21 Mɛni he je nɛ o kɛ ye yayami ɔmɛ ki mi

Nɛ o ma we o hɛ kɛ fɔ ye tɔmi ɔmɛ a nɔ ɔ?

Ejakaa e be kɛe nɛ ma ya hwɔ si ngɛ zu mi,

Nɛ o ma hla mi, se jamɛ a be ɔ mi ɔ, i je.

 3 Anɛ Mawu ma plɛ dami sane hɛ mi kɛ bu si lo,

Aloo Ope ɔ ma plɛ nɔ́ nɛ da hɛ mi kɛ bu si lo?

 4 Ke o bimɛ ɔmɛ pee yayami kɛ si lɛ ɔ,

E ma ha nɛ a gbla a tue ngɛ atuã nɛ a tsɔ ɔ he je;*

 5 Se ke o kɛ o hɛ maa fɔ Mawu nɔ

Nɛ o ma kpa Ope ɔ pɛɛ nɛ́ e na mo mɔbɔ,

 6 Nɛ ke o he tsɔ nɛ o da ngɛ anɔkuale mi ɔ,

Lɛɛ e maa gbla e juɛmi kɛ ba o nɔ

Nɛ e maa kpale mo kɛ to o blɔ he nɛ sa mo.

 7 E ngɛ mi kaa o sisije ɔ klee we mohu lɛɛ,

Se o nyagbe ma ba kle.

 8 I kpa mo pɛɛ, mo bi yinɔ nɛ be ɔ,

Nɛ o bu níhi nɛ a tsɛmɛ kpa si nɛ́ a na a tue.

 9 Wɔɔ lɛɛ, hiɛ pɛ lɛ a fɔ wɔ nɛ wa lí nɔ́ ko,

Ejakaa wa ligbi ɔmɛ ngɛ́ zugba a nɔ ngɛ kaa nini.

10 Anɛ a be mo ní tsɔɔe

Nɛ́ a de mo nɔ́ nɛ a le lo?*

12 Benɛ e je we mɔmɔ lolo, nɛ́ a ná we nɛ a po ɔ,

E ma gbli loko tso kpa amɛ ma gbli.

13 Nihi tsuo nɛ a hɛ jeɔ Mawu nɔ ɔ, nɔ́ nɛ baa a nɔ ji nɛ ɔ nɛ,*

Ejakaa nihi nɛ a li Mawu ɔ,* a hɛnɔkami ɔ maa laa.

14 A hɛnɔkami ɔ maa pee yaka

Nɛ níhi hu nɛ a ngɔ a hɛ kɛ fɔ nɔ ɔ he wɛ kaa anani ya.*

15 E ma kpasa e we ɔ, se e be si dae;

E maa bɔ mɔde kaa e maa pɛtɛ he wawɛɛ, se e maa hule.

16 E ngɛ kaa tso nɛ nyu ngɛ mi nɛ́ e ngɛ pu nɔ,

E kɔni ɔmɛ gbaa kɛ woɔ abɔɔ mi tsuo.

17 E sisi poku ɔmɛ sɛɔ a sibi a mi ngɛ tɛhi nɛ a bua nya a kpɛ.

E hlaa tsu ngɛ tɛ ɔmɛ a kpɛ.*

18 Se ke a hia* lɛ kɛ je e sihi he ɔ,

E sihi he ɔ ma kua lɛ nɛ e ma de ke, ‘i nɛ mo hyɛ.’

19 Ee, kikɛ ji bɔ nɛ e maa laa a nɛ;*

kɛkɛ ɔ, ekpahi maa puɛ kɛ je zu mi.

20 Ngɛ anɔkuale mi ɔ, Mawu be nihi nɛ a hɛɛ a we anɔkuale yemi ɔ mi ɔ* kuae;

Nɛ e be yiwutsotsɛmɛ hu ye buae,*

21 E ma ha nɛ o muɔ

Nɛ o kɛ bua jɔmi ma kpa ngmlaa ekohu.

22 Nihi nɛ nyɛɔ mo ɔ, a maa ha zo ha mɛ kaa bo,

Nɛ yiwutsotsɛmɛ a bo tsu ɔ be si hie hu.

 3 Ke nɔ ko suɔ kaa e kɛ Mawu maa hua nɔ́ ko he ɔ,*

Jamɛ a nɔ ɔ be nyɛe ma ha lɛ sane akpehi nɛ e ma bi lɛ ɔ kake po heto.

 5 E hiaa* yokuhi nɛ́ nɔ ko li he nɔ́ ko;

E kɛ abofu plɛɔ mɛ kɛ buɔ si?

 6 E mimiɛɔ zugba a kɛ jeɔ e blɔ he.

Nɛ e titima amɛ hosoɔ.

 7 E fãa pu ɔ nɛ́ e ko tso

Nɛ e tsiɔ dodoe ɔmɛ a la a nya;

 8 Lɛ nitsɛ e bliɔ hiɔwe ɔ mi,

Nɛ e nyɛɛɔ ngɛ wo oslɔke ɔmɛ nɛ́ a ya hiɔwe ɔmɛ a nɔ.

 9 Lɛ nɛ e pee Ash dodoehi a kuu* ɔ, Kesil dodoehi a kuu* ɔ kɛ Kima dodoehi a kuu* ɔ nɛ,

Kɛ dodoehi a kuu nɛ ngɛ woyi je hiɔwe ní ɔmɛ a mi ɔ hulɔ.

10 E peeɔ ní nguahi kɛ níhi nɛ wa juɛmi sui he,

Nyakpɛ níhi nɛ a be nyɛe maa kane.

11 E beeɔ ye he nɛ i nɛ lɛ;

E guɔ ye kasa nya kɛ beeɔ se i li e mi tso.

13 Mawu be e we abofu ɔ nya tsie;

Nihi nɛ a ye bua Rahab* ɔ po ma kplã si ha lɛ.

14 Lɛɛ ke ma ha lɛ heto ɔ,

E sa nɛ ma hla ye munyu ɔmɛ saminya loko ma ha heto!

I he we yi kaa e maa bu ye gbi tue,

17 E haa nɛ ahumi fiaa mi

Nɛ e haa nɛ ye pa amɛ hiɛɛ babauu yaka gu.

18 E ha we nɛ ma wo mumi po;

E yaa nɔ nɛ e kɛ níhi nɛ dooɔ woɔ ye mi tɔ.

20 Ke ye nɔ da po ɔ, imi nitsɛ ye nya nɔuu maa bu mi fɔ;

Ke i hɛɛ ye we anɔkuale yemi mi* po ɔ, e maa bu mi fɔ.*

21 Ke i hɛɛ ye we anɔkuale yemi ɔ mi* po ɔ, i li nɔ́ nɛ maa ba ye nɔ;

I sume* ye wami nɛ ɔ kulaa.

22 Lɛ tsuo nɔ́ kake ɔ nɔuu. Enɛ ɔ he je nɛ i deɔ ke,

‘E kpataa nɔ nɛ sane ko be e he* kɛ yiwutsotsɛ hɛ mi kɛ bla a nɛ.’

23 Ke nyu kpekpemi ba tlukaa nɛ e gbe nihi po,

E maa muɔ nihi nɛ sane ko be a he nɛ a hao ɔ.

24 A ngɔ je ɔ kɛ ha yiwutsotsɛmɛ;

E ha e kojoli ɔmɛ a hɛ mi.*

25 Jehanɛ ɔ, ye ligbi ɔmɛ ngɛ fo tue mlamlaamla pe fo tulɔ;

A tuɔ fo kɛ hoɔ nɛ́ a nɛ nɔ́ kpakpa ko.

26 A beɔ kɛ hoɔ kaa lɛ nɛ a kɛ glã pee,

Kaa kɔle nɛ́ sa kɛ yaa nu lohwe ko.

27 Ke i de ke, ‘Ma ha nɛ ye hɛ nɛ je ye haomi ɔmɛ a nɔ,

Ma ha nɛ muɔ nɛ hi ye hɛ mi nɛ́ ma ná bua jɔmi ɔ,’

28 Ye nɔ́ nami ɔ he je ɔ, ma ya nɔ ma ye gbeye,

Nɛ i le kaa o be mi nae kaa nɔ ko nɛ sane ko be e he.

30 Ke i kɛ snoo nɛ sile du ye he,

Nɛ i kɛ jale* fɔ ye dɛ po ɔ,

31 O kɛ mi maa wo muɔ kɛ e mi mɔsɔ mi,

Nɛ imi nitsɛ ye tadehi po maa hie mi.

32 Ejakaa pi nɔmlɔ ji lɛ kaa imi nɛ́ ma ha lɛ heto,

Nɛ́ wɔ tsuo wa maa ya kojomi he.

33 Nɔ ko be nɛ maa ye wa kpɛti sane,*

Nɛ e maa pee wa kojolɔ.*

34 Ke e maa jɔɔ mi gbemi*

Nɛ e maa jɔɔ ye he gbeye womi ɔ,

35 Lɛɛ i kɛ lɛ maa tu munyu nɛ i be gbeye yee,

Ejakaa pi nɔ ko nɛ ke e ngɛ munyu tue nɛ e yeɔ gbeye ji mi.

 3 Ke o ngɛ mi yi mi wae ɔ, o náa he se lo,

Anɛ o maa gbe mo nitsɛ o nine nya ní tsumi ɔ he guɛ,

Nɛ o maa suɔ nimli yayamihi a ga womihi mohu lo?

 4 Anɛ o hɛngmɛ ngɛ kaa adesa hɛngmɛ lo,

Aloo o hyɛɔ nɔ́ kaa bɔ nɛ nɔmlɔ adesa hyɛɔ nɔ́ ɔ lo?

 5 Anɛ o ligbi ɔmɛ ngɛ kaa adesa ligbihi lo?

Aloo o jeha amɛ ngɛ kaa adesa jehahi lo?

 6 Nɛ lɔ ɔ he je ɔ, o maa hi ye tɔmi ɔmɛ hlae

Nɛ o maa ya nɔ maa hi ye he yayami ɔmɛ hlae ɔ?

 7 O le kaa i yi fɔ;

Nɛ nɔ ko be nyɛe ma kpɔ̃ mi kɛ je o dɛ mi.

 8 Mo nɔuu lɛ o kɛ o ninehi puɛ mi nɛ o bɔ mi,

Se amlɔ nɛ ɔ, o ngɛ hlae nɛ o kpata ye hɛ mi kulaa lo?

 9 I kpa mo pɛɛ, mo kai kaa zu lɛ o kɛ puɛ mi,

Se amlɔ nɛ ɔ, o ngɛ hlae nɛ ma kpale kɛ ya zu mi lo?

10 Anɛ o plɛ we mi pue we si kaa nyɔ nyu kɛ wui ye yayo muklii mi

Nɛ́ o puɛ mi ngɛ lejɛ ɔ lo?*

11 O kɛ he womi kɛ lo ha ye he,

Nɛ o kɛ wu kɛ pani pee ye nɔmlɔ tso ɔ.

12 O ha mi wami nɛ o je suɔmi nɛ se pui kpo kɛ tsɔɔ mi;

O hyɛ ye nɔ nɛ o po ye he piɛ.*

14 Ke i pee yayami ɔ, o maa na mi,

Nɛ o kɛ ye he yayami ɔ be mi kee.

Nɛ ke sane ko be ye he po ɔ, i be nyɛe ma wo ye yi nɔ,

Ejakaa zo gbe mi wawɛɛ nɛ i ngɛ nɔ́ nae

16 Ke i wo ye yi nɔ ɔ, o hlaa mi kaa bɔ nɛ jata hlaa niye ní ɔ

Nɛ jehanɛ hu ɔ, o ngɔɔ o he wami ɔ kɛ yeɔ mi awi.

17 O ngɔɔ odasefohi ehehi kɛ baa nɛ a ba yeɔ odase kɛ siɔ mi,

Nɛ o haa nɛ o mi mi fumi ɔ nya waa ngɛ ye nɔ,

Nɛ si himi nɛ mi wa nɛ́ eko nyɛɛ eko se baa ye nɔ.

19 Jinɛ e ko pee kaa nɔ́ nɛ i bɛ si himi mi gblee.

Jinɛ a ko ngɔ mi kɛ je ye yayo muklii mi nɔuu kɛ ko ho yɔkɔ mi ya.’

20 Ye wami ligbi ɔmɛ ɔ, pi bɔɔ pɛ nɛ piɛ lo? Ha nɛ Mawu nɛ ngmɛɛ ye he;

Ha nɛ e je e hɛngmɛ kɛ je ye nɔ nɛ ye he nɛ jɔ mi bɔɔ ko*

21 Loko ma je, nɛ́ i be ye se kpalee kɛ ba hu ɔ

Ma je kɛ ho zugba nɛ e nɔ wo diblii kpii* ɔ nɔ ya,

22 Kɛ ho zugba nɛ e nɔ wo diblii tuu nɔ ya,

Zugba nɛ e nɔ wo diblii kpii nɛ basabasa peemi ngɛ nɔ,

He nɛ la nɛ ngɛ lejɛ ɔ po ngɛ kaa diblii ɔ.”

 2 “Anɛ nɔ ko be munyuhi babauu nɛ ɔmɛ a heto hae lo,

Aloo munyu fuu nɛ nɔ ko maa tu ɔ lɛ maa pee lɛ dalɔ lo?*

 4 Ejakaa o deɔ ke, ‘Ye ní tsɔɔmi ɔ da,

Nɛ ye he tsɔ ngɛ o hɛ mi.’

 5 I ná jinɛ Mawu maa tu munyu

Nɛ́ e ma bli e nya mi kɛ tsɔɔ mo!

 6 Jinɛ e ma je laami níhi nɛ ma ha nɛ o pee juɛmitsɛ ɔ kpo kɛ tsɔɔ mo,

Ejakaa juɛmi he níhi hiɛ babauu.

 7 Anɛ o ma nyɛ maa nu Mawu níhi nɛ a mi kuɔ ɔmɛ a sisi,

Aloo o ma nyɛ maa nu nɔ́ fɛɛ nɔ́ nɛ kɔɔ Ope ɔ he ɔ sisi lo?*

 9 E ka pe zugba a

Nɛ e bli pe wo ɔ.

10 Ke e nu nɔ ko nɛ e kɛ lɛ ba kojomi he ɔ,

Mɛnɔ ma nyɛ maa tsi e nya?

12 Se ke nga mi teji ma nyɛ ma fɔ nɔmlɔ ɔ,*

Lɛɛ nɔ ko nɛ́ e be juɛmi hu maa nu nɔ́ sisi.

13 I ná jinɛ o dla o tsui

Nɛ́ o bli o dɛ mi kɛ tsɔɔ lɛ.

14 Ke o nine ngɛ yayami pee ɔ, je kɛ ya se kulaa.

Nɛ ko ha nɛ nɔ́ ko nɛ dɛ nɛ hi o bo tsu ɔmɛ a mi.

15 Kɛkɛ ɔ, o ma nyɛ ma wo o yi nɔ nɛ́ zo be mo pee;

O ma nyɛ maa da si kpɛii nɛ́ o be gbeye yee.

16 O hɛ maa je o haomi ɔ nɔ;

O be kaie hu kaa bɔ nɛ o be nyu nɛ be kɛ ho ɔ kaie hu ɔ.

17 O si himi ma kpɛ kaa piani katakata;

Nɛ diblii po ma kpɛ kaa mɔtu.

18 O ma ná nɔ mi mami ejakaa hɛnɔkami ngɛ,

Nɛ o maa hyɛ o he kɛ kpe nɛ o maa hwɔ si slɔkee.

19 O maa hwɔ si nɛ nɔ ko be o he gbeye woe,

Nɛ nihi fuu maa ba o ngɔ kaa o pee mɛ kpakpa.

20 Se yiwutsotsɛmɛ a hɛngmɛ ma yu;

Nɛ a be he ko nae nɛ́ a tu fo kɛ ya,

Nɛ gbenɔ* maa pee hɛnɔkami pɛ nɛ a ngɛ.”

 2 “Niinɛ, nyɛ lɛ nyɛ le,*

Ke nyɛ gbo kɛkɛ juɛmi hu ta!

 4 I plɛ pee muɔ nɔ́ kɛ ha ye huɛmɛ,

Ejakaa i tsɛ Mawu, nɛ i ngɛ blɔ hyɛe kaa ma ná heto kɛ je e ngɔ.

 5 Nɔ nɛ e tue mi jɔ lɛ ɔ bui nihi nɛ a kɛ haomihi ngɛ kpee ɔ,

E susuɔ kaa ní yayamihi baa nihi nɛ a kɛ haomihi ngɛ kpee ɔ pɛ a nɔ.

 6 Tue mi jɔmi ngɛ juli a bo tsu ɔmɛ a mi,

Nihi nɛ a woɔ Mawu mi mi la a ngɛ slɔkee,

Kaa nihi nɛ a hɛɛ a mawu ɔmɛ ngɛ a dɛ mi ɔ.

 7 Se i kpa mo pɛɛ, mo bi lohwe ɔmɛ nɛ a maa tsɔɔ mo ní;

Jehanɛ hu, mo bi hiɔwe lohwe pɛlitsɛmɛ nɛ a ma de mo.

 8 Aloo moo to níhi nɛ a ngɛ zugba a nɔ ɔ a he hɛ,* nɛ a maa tsɔɔ mo ní;

Nɛ lohi nɛ a ngɛ wo mi ɔ ma de mo anɔkuale ɔ.

 9 A kpɛti mɛnɔ lɛ e li

Kaa Yehowa nine lɛ pee nɔ́ nɛ ɔ?

10 Níhi tsuo nɛ wami ngɛ a mi ɔ, a wami* ngɛ e dɛ mi

Nɛ adesahi* tsuo a mumi* hu ngɛ e dɛ mi.

11 Tue lɛ a kɛ buɔ munyu tue saminya konɛ a kɛ le nɔ́ nɛ hi kɛ nɔ́ nɛ hí

Kaa bɔ nɛ a kɛ lilɛ hu saa niye ní nya hyɛɔ ɔ.

12 Anɛ pi nihi nɛ a bwɔ nɛ a ngɛ juɛmi lo,

Nɛ pi nihi nɛ a se kɛ ɔ nɛ a ngɛ nɔ́ sisi numi lo?

13 Mawu ngɛ juɛmi kɛ he wami,

E nɔ́ ji ga womi kɛ nɔ́ sisi numi.

14 Ke e ku nɔ́ ko pue si ɔ, nɔ ko be nyɛe maa ma ekohu;

Nɔ́ nɛ e nga a, adesa ko be nyɛe ma bli.

15 Ke e tsi nyu ɔmɛ a nya a, nɔ́ fɛɛ nɔ́ gbliɔ;

Ke e je mɛ kpo ɔ, a haa zugba a nɔ tsuo.

16 E ngɛ he wami kɛ juɛmi;

E nɔ́ ji nɔ nɛ laa blɔ kɛ nɔ nɛ haa nɛ nihi laa blɔ ɔ tsuo;

17 E haa nɛ ga woli hɛɛɔ a nane si gu,*

Nɛ e haa kojoli plɛɔ peeɔ kuasiahi.

18 E kpɔ̃ɔ matsɛmɛ a he wami ngɛ a dɛ,

Nɛ e peeɔ mɛ nyɔguɛhi.

19 E haa nɛ osɔfohi nyɛɛɔ kɛ a nane si gu,

Nɛ e jeɔ nihi nɛ a ngɛ blɔ nya nɛ pi si ɔ kɛ jeɔ a blɔ hehi.

20 E haa nɛ ga woli nɛ a he mɛ ye ɔ, a munyu tlɔɔ a nya mi.

Nɛ e ngɔɔ nihi nɛ a bwɔ ɔ* a juɛmi ngɛ a dɛ.

21 E pueɔ nɔ yeli a hɛ mi si,

Nɛ e haa nɛ nihi nɛ a he wa a gbɔjɔɔ;*

22 E jeɔ níhi nɛ a mi kuɔ ɔ kpo kɛ jeɔ diblii mi,

Nɛ e kɛ diblii kpii baa he nɛ la ngɛ.

23 E haa nɛ mahi a he waa, bɔ nɛ pee nɛ e kpata a hɛ mi;

E bliɔ mahi a mi bɔ nɛ pee nɛ e kpaka mɛ kɛ ho nyɔguɛ tso mi ya.

24 E ngɔɔ ma bi ɔmɛ a nɔ́ sisi numi* ngɛ a dɛ

E haa nɛ a woɔ lalaalo ngɛ nga kplanaa nɔ he nɛ blɔ ko be.

25 A hii si tataae ngɛ diblii mi, he nɛ kane be;

E haa nɛ a hii dedee kaa nihi nɛ a tɔ dã.

13 “Ee, ye hɛngmɛ na ní nɛ ɔmɛ tsuo,

Ye tue nu, nɛ e nu sisi.

 2 Nɔ́ nɛ nyɛ le ɔ, imi hu i le;

Nyɛ pã we mi ngɛ blɔ ko nɔ.

 3 Imi lɛɛ, i suɔ kaa i kɛ Ope ɔ nitsɛ mohu maa tu munyu;

I suɔ nɛ i kɛ Mawu nɛ hla níhi a nya.

 4 Nyɛɛ lɛɛ, nyɛɛ kɛ lakpa ngɛ ye he kpae;

Nyɛ tsuo nyɛ ngɛ kaa tsopatsɛmɛ nɛ a he be se nami.

 5 I ná nɛ nyɛ ma nyɛ nya mohu,

Jinɛ lɔ ɔ ko tsɔɔ kaa nyɛ ji juɛmitsɛmɛ.

 6 I kpa nyɛ pɛɛ nɛ nyɛɛ bu ye sane ɔ tue,

Nɛ nyɛɛ bu ye nya mi munyu tue.

 7 Anɛ nyɛ maa da Mawu nane mi kɛ tu munyuhi nɛ dɛ lo,

Aloo nyɛ maa tu sisimi munyuhi kɛ ha lɛ lo?

 8 Anɛ nyɛ ma fĩ e se lo,*

Aloo nyɛ maa suɔ kaa nyɛ maa ye anɔkuale Mawu ɔ sane ha lɛ lo?

10 Ke nyɛ bɔ mɔde kaa nyɛ maa hyɛ nɔ hɛ mi ngɛ laami mi ɔ,

E ma kã nyɛ hɛ mi kokooko.

11 Anɛ e we agboje ɔ be nyɛ he gbeye woe lo,

Nɛ e he gbeye be nyɛ nɔ puee lo?

12 Nyɛ juɛmi munyu ɔmɛ a he be se nami kaa lazu.

Nɛ munyuhi nɛ nyɛɛ kɛ ngɛ nyɛ he fae ɔ* a he wɛ kaa he piɛ pomi níhi nɛ a kɛ zu pee.

14 Mɛni he je nɛ i kɛ ye he wo oslaa mi*

Nɛ i ngɔ ye wami* kɛ wo ye dɛ mi ɔ?

15 Ke e maa gbe mi po, ma ya nɔ nɛ ma mlɛ;

Ma fã ye he ngɛ e hɛ mi.

16 Kɛkɛ ɔ, e ma ba pee ye yi wami helɔ,

Ejakaa nɔ ko nɛ li Mawu* be nyɛe maa ba e hɛ mi.

17 Nyɛɛ bu ye munyu ɔ tue saminya;

Nyɛɛ bu nɔ́ nɛ i ngɛ dee ɔ tue.

18 Hyɛ, amlɔ nɛ ɔ, i dla ye sane ɔ kɛ fɔ si.

I le kaa ye nɔ́ da.

20 Ye Mawu, moo pee níhi enyɔ ko pɛ ha mi,*

Konɛ ma ko laa ye he ngɛ o hɛ mi:

21 Mo je o nine nɛ jiɔ ɔ ngɛ ye nɔ kɛ ya se kulaa,

Nɛ mo ko ha nɛ o he gbeye nɛ ha nɛ sawale nɛ nu mi.

22 Ke e maa hi ɔ, moo tu munyu, nɛ ma he nɔ́,

Aloo mo ha nɛ imi mohu ma tu munyu, konɛ o ha mi heto.

24 Mɛni he je nɛ o kɛ o hɛ mi laa mi

Nɛ o bu mi kaa o he nyɛlɔ ɔ?

25 Anɛ o maa wo ba nɛ kɔɔhiɔ ngɛ lɛ fiae ɔ he gbeye lo

Aloo o maa fiee nga gbigbli se lo?

26 O yaa nɔ nɛ o ngmaa sanehi nɛ dɛ nɛ o po kɛ fɔ ye nɔ ɔ kɛ fɔɔ si,

Nɛ o haa nɛ i woɔ yayamihi nɛ i pee ngɛ ye nihe be mi ɔ he hiɔ.

27 O bɔ ye nanehi pã,

O hyɛɔ he fɛɛ he nɛ i yaa totooto,

Nɛ o kadiɔ ye nane mami he ɔmɛ tsuo.

28 Enɛ ɔ he ɔ, adesa* puɛɔ kaa nɔ́ ko nɛ sa.

Kaa tade nɛ wɔyewɔye ye.

14 Nɔmlɔ adesa nɛ yo fɔ lɛ ɔ,

E wami ngɛ kpiti, se e mi haomi* hiɛ babauu.

 2 E puɛɔ kaa mɔmɔ kɛkɛ e ngla;*

E tuɔ fo kaa nini nɛ e laa.

 3 Ee, o ngɔ o hɛngmɛ kɛ ma e nɔ,

Nɛ mo nitsɛ o kɛ lɛ* ngɛ sane yee.

 5 Ke a to e ligbi ɔmɛ kɛ fɔ si ɔ,

Nyɔhiɔ abɔ nɛ e maa ye ɔ ngɛ o dɛ mi;

O to huzu ha lɛ nɛ e be nyɛe maa be he.

 6 Mo je o hɛngmɛ ngɛ e nɔ konɛ e ná he jɔmi bɔɔ,

Kɛ ya si be nɛ e maa gbe e ligbi ɔmɛ a nya, kaa bɔ nɛ apaatsɛ peeɔ ɔ.

Ke a po fɔ si ɔ, e ma tsɛ̃ ekohu,

Nɛ e kɔnihi nɛ tsɛ̃ ɔ maa ya nɔ maa wa.

 8 Ke e sipoku ɔ se kɛ ngɛ zu mi

Nɛ tso kpoku ɔ gbo ngɛ zu mi,

 9 Nɛ e ná nɛ e nu nyu he pɛ, kɛkɛ e tsɛ̃;

Nɛ e ma tsɛ̃ kɔnihi kaa tso ehe.

10 Se nɔmlɔ gboɔ, nɛ e fɔɔ si nɛ e nyɛ we nɔ́ ko nɔ́ ko peemi;

Ke nɔmlɔ gbo ɔ, jije e ngɛ?

11 Nyu laa ngɛ wo mi,

Nɛ pahi a mi nyu miiɔ nɛ a gbliɔ

Kɛ yaa si be nɛ hiɔwe be hu ɔ, mɛ hu a be si tee hu,

Loo kaa a maa tsɛ̃ɛ mɛ kɛ je a mahe ɔ mi.

13 Ao, i ná jinɛ o maa laa ye nɔ ngɛ Yɔkɔ* mi,

Nɛ o maa laa ye nɔ kɛ ya si o we abofu ɔ maa be,

I ná jinɛ o maa to be ha mi nɛ́ o kɛ ma kai mi!

Be abɔ nɛ i ngɛ nyɔguɛ tso mi nɛ ɔ,

Ma mlɛ kɛ ya si be nɛ a maa ngmɛɛ ye he.

16 Se amlɔ nɛ ɔ lɛɛ, o yaa nɔ nɛ o kaneɔ ye nane hiami ɔmɛ tsuo;

Ye he yayami ɔ pɛ lɛ o hyɛɔ.

17 O nga ye tɔmi ɔmɛ a nya kɛ wo baagi mi.

Nɛ o kɛ gluu sɔu ye tɔmi ɔmɛ a nya.

18 Kaa bɔ nɛ yokuhi huleɔ kɛ pueɔ si nɛ́ a jeɔ a blɔhehi

Nɛ́ tɛsa amɛ kpɛneɔ kɛ jeɔ a blɔhehi,

19 Nɛ́ nyu haa nɛ tɛ he yeɔ

Nɛ nyu nɛ ngɛ bee wawɛɛ fɔɔ zugba a nɔ zu kɛ jeɔ ɔ,

Jã kɛ nɛ o puɛɔ nɔmlɔ adesa hɛnɔkami.

20 O yaa nɔ nɛ o yeɔ e nɔ kunimi kɛ ya siɔ benɛ e hɛ mi kpataa;

O tsakeɔ bɔ nɛ e ngɛ ha kɛkɛ o wo lɛ blɔ.

21 A woɔ e bimɛ a hɛ mi nyami se e li;

A pueɔ a hɛ mi si se e yɔse we.

22 Ke e ngɛ wami mi pɛ loko e naa nɔ́;

Nɛ ke e ngɛ wami mi pɛ loko e* yeɔ kɔmɔ.

 2 Anɛ juɛmitsɛ ma je e nya kɛ munyuhi nɛ juɛmi be mi* lo,

Aloo e ma ha nɛ puje he kɔɔhiɔ ma hyi e muklii mi tɔ lo?

 3 Munyu kɛkɛ nɛ a kɛ kãa nɔ hɛ mi ɔ, se nami ko be he,

Nɛ munyu puu tumi hu, se nami ko be he.

 4 Ejakaa o nɛ Mawu gbeye yemi kaa nɔ́ ko nɛ hɛdɔ ngɛ he,

Nɛ o haa nɛ e he waa kɛ haa ni kpahi kaa a ma susu Mawu he.

 5 Ejakaa o tɔmi ɔ he je nɛ o ngɛ munyu tue jã a nɛ,*

Nɛ o kɛ nya dɔkɔɔ sisiɔ nihi.

 6 Mo nitsɛ o nya lɛ kojoɔ mo, se pi imi;

Mo nitsɛ o munyuhi yeɔ odase kɛ siɔ mo.

 7 Anɛ mo ji adesa nɛ a fɔ kekle lo,

Aloo a fɔ mo loko yoku ɔmɛ ba lo?

 8 Anɛ o buɔ laami munyuhi nɛ Mawu tuɔ ɔmɛ tue lo,

Aloo mo pɛ lɛ o ngɛ juɛmi lo?

10 Nihi nɛ mua ngɛ a yi mi kɛ nihi nɛ a bwɔ ngɛ wa kpɛti,

Nyumuhi nɛ a wa kulaa pe o tsɛ.

11 Anɛ Mawu bua womi ɔmɛ pi ha mo lo,

Aloo munyuhi blɛuu nɛ waa kɛ mo ngɛ tue ɔ hu pi ha mo lo?

12 Mɛni he je nɛ o ha nɛ o tsui ngɛ mo kudɔe,

Nɛ o hɛngmɛ tsuɔ kɛ abofu kikɛ ɔ?

13 O mi mi fu Mawu,*

Nɛ o ha nɛ munyuhi kaa kikɛ ɔ je o nya mi.

14 Kɛ nɔmlɔ adesa he ma plɛ kɛ tsɔ kɛɛ,

Aloo nɔmlɔ nɛ yo fɔ lɛ ɔ, kɛ e ma plɛ kɛ pee dalɔ kɛɛ?

15 Hyɛ! E nihi klɔuklɔu ɔmɛ po e be hemi kɛ yemi ngɛ a mi,

Nɛ hiɔwe ɔ po he tsɔ we ngɛ e hɛ mi.

16 Nɛ nɔmlɔ adesa nɛ́ e sa, nɛ́ e puɛ,

Nɛ e nuɔ níhi nɛ dɛ kaa a nuɔ nyu ɔ, lɛɛ lɛɛ kɛ e maa na lɛ kɛɛ?

Ma gba mo nɔ́ nɛ i na,

18 Níhi nɛ juɛmitsɛmɛ nu kɛ je a tsɛmɛ a ngɔ nɛ́ a de,

Níhi nɛ a kɛ laa we.

19 Mɛ pɛ lɛ a kɛ zugba a ha,

Nɛ nubwɔ ko bi ngɛ a kpɛti.

20 Yiwutsotsɛ naa nɔ wawɛɛ e ligbi ɔmɛ tsuo,

E kɛ haomi kpeɔ e wami be ɔ tsuo.

21 E nuɔ níhi a pɛmihi nɛ́ ngɛ gbeye ngɛ e tue mi;

Ngɛ tue mi jɔmi be mi ɔ, ojo fiali ya tuaa lɛ.

22 E he we yi kaa e ma nyɛ tu fo kɛ je diblii mi;

A je lɛ kɛ to ha klaate.

24 Haomi kɛ nɔ́ nami yaa nɔ nɛ a woɔ e he gbeye;

A yeɔ e nɔ kunimi kaa matsɛ ko nɛ e pee klaalo kɛ ha ta.

25 Ejakaa e woɔ e nine nɔ kɛ siɔ Mawu

Nɛ e peeɔ e he kaa e nɔ kuɔ pe Ope ɔ nitsɛ;

26 E kɛ kuɛ mi timi saa fo kɛ yaa e nɔ,

Kɛ e tsɛ̃i nɛ ti nɛ ngɛ he wami ɔ.*

27 Zɔ ha e hɛ mi tsuo,

Nɛ e gbongu hyi tɔ kɛ zɔ sɔuu;

28 E hiɔ mahi nɛ a ma kpata a hɛ mi ɔ a mi,

Ngɛ wehi nɛ nɔ ko be a mi hie

Nɛ́ a ma ba pee tɛhi nɛ a bua nya glekuglekuu ɔ mi.

29 E be niatsɛ pee, nɛ níhi nɛ e ná a hu be hiɛe babauu,

Nɛ e weto níhi hu be gbɛe kɛ fĩa zugba a nɔ.

30 E be nyɛe maa tu fo kɛ je diblii mi;

La lilɛ maa sã e kɔni nɛ tsɛ̃ ɔ,*

Nɛ kɔɔhiɔ nɛ je Mawu nya mi* ɔ maa muɔɔ lɛ kɛ ho.

31 E sɛ nɛ e sisi e he nɛ e ngɔ e hɛ kɛ fɔ níhi nɛ a he be se nami ɔ a nɔ,

Ejakaa e be nɔ́ ko náe kɛ je mi;

32 E be kɛe kulaa nɛ e maa ba e nɔ,

E maa pee kaa tso nɛ e kɔnihi pee we flɔflɔɔflɔ.

33 E maa pee kaa wai tso nɛ kplɔɔ e yiblii ngmlikiti kɛ pueɔ si,

Kaa oliv tso nɛ kplɔɔ e mɔmɔhi kɛ pueɔ si.

34 Nihi nɛ a li Mawu ɔ* a he nya buami ɔ be yiblii woe,

Nɛ la maa sã nyɔ mi ní heli a bo tsuhi.

35 A ngɔɔ haomi hɔ, nɛ a fɔɔ yiwutso ní,

Nɛ nɔ sisimi hyi a muklii mi tɔ.”

Kaa nyɛ ngɛ ye si fɔfɔɛ ɔ mi ɔ,

Jinɛ imi hu i ko nyɛ ko tu munyu kɛ si nyɛ

Nɛ ma mimiɛ ye yi kɛ wo nyɛ.

 5 Mohu ɔ, i kɛ ye nya mi munyu maa wo nyɛ he wami,

Nɛ bua womi munyu nɛ maa je ye nya a ma ha nɛ́ nyɛ he mi nɛ jɔ nyɛ.

 6 Ke i tu munyu ɔ, ye nɔ́ nami ɔ se pui,

Nɛ ke i kpa munyu tumi hu, ye nɔ́ nami ɔ bɛ si.

 7 Se amlɔ nɛ ɔ, e ha nɛ pɔ tɔ mi;

E kpata ye we ɔ tsuo hɛ mi.*

 8 O nu mi, nɛ lɔ ɔ ba pee odase,

Nɛ i ta he lo hluu po kaa ye si fɔfɔɛ ɔ yeɔ odase kɛ siɔ mi.

10 A bli a nya mi hatoo kɛ wo mi,

A gba ye tue mi ma kɛ ye ye he fɛu;

A bua a he nya babauu kɛ wo mi.

11 Mawu ngɔ mi kɛ wo jokuɛ nyumuwi a dɛ mi,

Nɛ e ha nɛ yiwutsotsɛmɛ pee mi nɔ́ nɛ a suɔ.

12 Jinɛ i ngɛ he mi jɔmi, se e ku mi pue si;

E nu ye kuɛ se nɛ e ywia mi wɔtsɔwɔtsɔ;

Nɛ e je e hɛ kɛ pi mi.

13 E kɛ̃ɛ̃ tsɛ̃li ɔmɛ bɔle mi;

E gbɔɔ ye se tso mi ngmɛ ɔmɛ ní nɛ́ e mi mi sɛ lɛ;

E plɛɔ ye duɔ ɔ kɛ pueɔ zugba.

14 I pee kaa gbogbo nɛ e gbuu* puɔhi ngɛ ye mi nɔtonɔto;

E saa fo kɛ baa ye nɔ kaa tatsɛ.

15 I kpɛ kpekpe ngɔ ha ye he,

Nɛ i pu ye hɛ mi nyami* ɔ ngɛ zu mi.

16 Ya fomi sɔuu ha nɛ ye hɛngmɛ tsuɔ kɔu,

Nɛ ye hɛngmɛ se yu tuu,*

17 Se pohu, ye nine pee we yiwutso nɔ́ ko

Nɛ ye sɔlemi he tsɔ.

19 Amlɔ nɛ ɔ po ɔ, ye we odase ɔ ngɛ hiɔwe;

Nɔ nɛ ma nyɛ maa fã ye he ɔ ngɛ hiɔwe lokoo.

20 Ye huɛmɛ yeɔ ye he fɛu

Be mi nɛ ye hɛngmɛ wɔleɔ vo nyu kɛ pueɔ Mawu nɔ ɔ.*

21 Ha nɛ nɔ ko nɛ ye adesa kɛ Mawu a kpɛti sane,

Kaa bɔ nɛ nɔ ko maa ye adesa kɛ e nyɛmi adesa a kpɛti sane ɔ.

22 Ejakaa jeha nɛ piɛ ɔ pi hu,

Nɛ ma je kɛ ho blɔ nɛ nɔ ko be nyɛe maa kpale e se ngɛ nɔ ɔ nɔ ya.

17 “Ye he wami tsuo ta, ye ligbi ɔmɛ ba nyagbe;

Nɔ́ nɛ ngɛ mi mlɛe pɛ ji gɔ ɔ mi.

 2 He fɛu yeli bɔle mi kɛ kpe,

Nɛ ye hɛngmɛ ngɛ a we atuã tsɔmi ní peepee ɔmɛ hyɛe.*

 4 Ejakaa o kɛ nɔ́ se kɔmi laa a tsui;

Lɔ ɔ he je nɛ o wui a hɛ mi nyami ɔ nɛ.

 5 Nimli nɛ ɔmɛ deɔ a huɛmɛ kaa a kɛ mɛ ma gba níhi nɛ a ngɛ ɔ,

Be mi nɛ a bimɛ nyɛ we nɛ a hyɛ nɔ́ saminya ejakaa hwɔ ngɛ mɛ yee ɔ.

 6 E ha nɛ i pee he guɛ gbemi nɔ́* ngɛ nihi a kpɛti,

Nɛ i ba pee nɔ nɛ a laa lada kɛ pueɔ e hɛ mi.

 7 Aywilɛho yemi ha nɛ ye hɛngmɛ ɔmɛ pee sulii,

Nɛ ye kɔnihi, kɛ ye nanehi pee legelege kaa nini.

 8 Dali hyɛɔ nɔ́ nɛ ɔ nɛ e peeɔ mɛ nyakpɛ,

Nɛ nɔ nɛ sane ko be e he ɔ haoɔ ngɛ nihi nɛ a li Mawu ɔ* a he.

 9 Dalɔ yaa nɔ nɛ e nyɛɛɔ ngɛ e blɔ nɔ,

Nɛ nɔ nɛ e nine he tsɔ ɔ yaa nɔ nɛ e náa he wami.

10 Se nyɛ tsuo nyɛɛ ba nɛ nyɛ ba tsa nyɛ munyu ɔ nɔ,

Ejakaa i nɛ ní lelɔ kake ngmelu po ngɛ nyɛ kpɛti.

11 Ye ligbi ɔmɛ a nya ta;

Ye yi mi tomihi, nɛ ji níhi nɛ a ngɛ ye tsui nɔ ɔ tsuo puɛ.

12 A yaa nɔ nɛ a kɛ nyɔ mi peeɔ piani,

A deɔ ke, ‘Nɛ́ diblii wo nɛ ɔ lɛɛ e be kɛe nɛ la maa ba.’

13 Ke i mlɛ po ɔ, Yɔkɔ* ma ba pee ye we mi;

Ma ngmɛ ye sa a ngɛ diblii mi.

16 E* ma kple kɛ ya Yɔkɔ* agbo ɔmɛ nɛ a la a se ɔ mi

Nɛ i kɛ ye hɛnɔkami ɔ tsuo ma kple kɛ ya zu mi.”

 3 Mɛni he je a buɔ wɔ kaa lohwehi

Nɛ a naa wɔ kaa wa be juɛmi ɔ?*

 4 Ke o tsɔtslɔɔ o* mi ngɛ abofu he je po ɔ,

Anɛ o susu kaa o he je ɔ, a ma kua zugba a lo,

Aloo tɛsa maa je he nɛ e ngɛ ɔ lo?

 5 Ee, yiwutsotsɛ kane ɔ ma gbo,

Nɛ e la lilɛ ɔ be kpɛe.

 6 La nɛ ngɛ e bo tsu ɔ mi ɔ ma plɛ pee diblii,

Nɛ kane nɛ kpla si ngɛ e bo tsu ɔ mi ɔ ma gbo.

 7 He wami nɛ e kɛ hiaa e nane kam, kam, kam ke e ngɛ nyɛɛe ɔ nɔ ma gbɔ,

Nɛ lɛ nitsɛ e ga womi ma ha nɛ e nɔ si.

 8 Lɛ nitsɛ e nane maa ngɔ lɛ kɛ ya du ya,

Nɛ e maa dede kɛ ya sɛ ya puɔ ɔmɛ a mi.

 9 E nane se ja* ma ya sɛ klama mi;

Nɛ klama a maa nu lɛ.

10 A kɛ kpa laa ngɛ zu mi kɛ ngɛ lɛ mlɛe,

A tsɔ̃ klama ngɛ e blɔ mi.

11 Gbeye níhi woɔ e he gbeye ngɛ he fɛɛ he

Nɛ a kɛ fo nyɛɛɔ e se haa.

12 E he wami maa ta,

Nɛ amanehlu ma ha nɛ e dede.*

13 Hiɔ ma puɛ e he womi ɔ tsuo;

Hiɔ yaya* maa ye e ninehi kɛ e nanehi.

14 A ma je lɛ kɛ je e bo tsu nɛ ngɛ slɔkee ɔ mi

Nɛ a maa gbla lɛ kɛ ho níhi nɛ a ngɛ gbeye ɔ a matsɛ* ɔ ngɔ ya.

15 Nibwɔhi* maa hi e bo tsu ɔ mi;

A ma fĩa sɔlfa kɛ pue e we ɔ nɔ.

16 E sipokuhi ma gbli ngɛ e sisi,

Nɛ e kɔni ɔmɛ ma ngla ngɛ e yi nɔ.

17 Nihi a hɛ maa je e nɔ kulaa ngɛ zugba a nɔ,

Nɛ a be e biɛ po lee* ngɛ gbɛjegbɛ ɔmɛ a nɔ.

18 A maa fiee lɛ kɛ je la nya kɛ ho diblii mi ya

Nɛ a maa fiee lɛ kɛ je zugba a nɔ.

19 E nina loo e sisi bi ko be e we bi ɔmɛ a kpɛti hie,

Nɛ nɔ ko be nɛ e yi ma ná wami ngɛ he nɛ e hi ɔ.*

20 Ke e ligbi ɔ su ɔ, nihi nɛ a ngɛ pusinɔ he ɔ a nya maa kpɛ a he

Nɛ nihi nɛ a ngɛ puje he ɔ maa ye gbeye.

21 Nɔ́ nɛ baa yayami peelɔ bo tsu ɔ nɔ ji nɛ ɔ nɛ

Nɛ nɔ́ nɛ baa nɔ nɛ li Mawu ɔ hu e hi he ɔ nɔ ji nɛ ɔ nɛ.”

 2 “Kɛ yaa si mɛni be nɛ nyɛ maa hi ye klaa mi mi la woe,*

Nɛ nyɛɛ kɛ munyuhi maa hi mi haoe kikɛ ɔ?

 3 Si nyɔngma sɔuu ji nɛ ɔ nɛ nyɛ ngɛ ye hɛ mi kãe;*

E pee we nyɛ zo kaa nyɛɛ kɛ mi ngɛ yee wawɛɛ kikɛ.

 4 Ke e ngɛ mi niinɛ kaa i tɔ̃ po ɔ,

Imi nitsɛ ye sane ji lɔ ɔ nɛ.

 5 Ke nyɛ ngɛ hlae doo kaa nyɛ ma wo nyɛ he nɔ ngɛ ye nɔ,

Nɛ nyɛ ngɛ dee ke hɛ mi si puemi nɛ ba ye nɔ ɔ sa mi ɔ,

 6 Lɛɛ, nyɛ ná nɛ nyɛɛ le kaa Mawu lɛ sisi mi,

Nɛ e ngɔ e de yami ya a kɛ nu mi.

 7 Hyɛ! I hii ngmlaa kpae ke, ‘A plaa mi oo!’ se nɔ ko he we nɔ;

I foɔ ya kɛ biɔ yemi kɛ buami, se nɔ ko yi dami sane ha mi.

 8 E ngɔ tɛ gbogbo kɛ tsi mi blɔ, nɛ i nyɛ we nɛ ma be;

E ha nɛ ye blɔ ɔmɛ a nɔ wo diblii.

 9 E je ye hɛ mi nyami ɔ ngɛ ye he

Nɛ e je jlasi ɔ ngɛ ye yi.

10 E ku mi pue si kɛ ya si be nɛ ye hɛ mi kpata;

E hia ye hɛnɔkami ɔ kɛ fɔ si kaa tso.

11 E mi mi fu mi wawɛɛ nitsɛ,

Nɛ e na mi kaa e he nyɛlɔ.

12 E tabuli ɔmɛ bua a he nya kɛ ba nɛ a ba sa ye yi,

Nɛ a bɔle ye bo tsu ɔ kɛ kpe.

13 E fiee imi nitsɛ ye nyɛmimɛ ɔmɛ kɛ je ye he kɛ ho tsitsaa ya,

Nɛ nihi nɛ a le mi ɔ hu kua mi.

14 Ye huɛmɛ* nɛ nyu bi ngɛ i kɛ mɛ wa kpɛti ɔ je ye he,

Nɛ nihi nɛ i le mɛ saminya a hu a hɛ je ye nɔ.

15 Nihi nɛ a ba to ye we ɔ mi kɛ ye mawayihi buɔ mi kaa nubwɔ;

I pee kaa ma se no ngɛ a hɛ mi.

16 I tsɛ ye sɔmɔlɔ ɔ;

I kpa lɛ pɛɛ kaa e na mi mɔbɔ, se e pui ye nya mi.

17 Ye mumi po jeɔ fu kɛ haa ye yo,

Nɛ imi nitsɛ ye nyɛmimɛ* sume nɛ a maa ba ye kasa nya ejakaa ye he ngɛ fu jee.

18 Jokuɛ tsɔwi po hiee mi;

Ke i te si pɛ kɛkɛ a bɔni mi muɔmi.

19 Ye huɛmɛ tsuo kua mi,

Nɛ nihi nɛ i suɔ mɛ ɔ te si kɛ wo mi.

20 Ye wuhi mɛtɛ ye he womi kɛ ye he lo he,

Nɛ i kɛ gbenɔ kpe hɛ mi kɛ hɛ mi.

21 Nyɛɛ na mi mɔbɔ, ye huɛmɛ, nyɛɛ na mi mɔbɔ,

Ejakaa Mawu nitsɛ nine ta ye he.

22 Mɛni he je nɛ nyɛ yaa nɔ nɛ nyɛ waa mi yi mi kaa bɔ nɛ Mawu peeɔ ɔ,

Nɛ nyɛ tuaa mi nɛ́ nyɛ kpa we ɔ?*

23 I ná jinɛ a ngma ye munyu ɔmɛ kɛ fɔ si,

I ná jinɛ a ngma kɛ wo womi mi!

24 I ná jinɛ a kɛ dade ningma tso kpɛ́ ngɛ tɛsa nɔ

Nɛ́ a sile sumui kɛ wo mi konɛ e hi lejɛ ɔ daa!

25 Ejakaa i le kaa ye kpɔlɔ ɔ hɛ ngɛ;

E maa ba pee se, nɛ e maa te kɛ da si ngɛ zugba a* nɔ.

26 Ke a kpata ye he lo ɔ hɛ mi ta,

Nɛ ye he lo ɔ ngɛ ye nɔ loloolo ɔ, ma na Mawu,

27 Imi nitsɛ ma na lɛ,

Imi nitsɛ ye hɛngmɛ maa na lɛ, se pi nɔ ko nɔ́.

29 Nyɛ hu nyɛɛ ye klaate ɔ gbeye,

Ejakaa klaate ɔ kɛ tue gblami baa nihi nɛ a tɔ̃ ɔ a nɔ;

Nyɛ ná nɛ nyɛɛ le kaa kojolɔ ko ngɛ.”

 2 “Enɛ ɔ he je nɛ ye susumi nɛ haoɔ mi ɔ nyɛɔ ye nɔ kaa ma tu munyu ɔ nɛ

Ejakaa i pee basaa.

 3 I nu jɛmi munyuhi nɛ o kɛ kã ye hɛ mi ɔ;

Se ma ha mo heto ejakaa i ngɛ juɛmi.*

 4 E ngɛ heii kaa o le nɔ́ nɛ i ma demi nɛ ɔ kɛ je blema lokoo,

Ejakaa jã nɛ e ji kɛ je benɛ a bɔ adesa* ngɛ zugba a nɔ,

 5 Kaa yiwutsotsɛmɛ a bua jɔmi se kɛ we

Nɛ nihi nɛ a li Mawu ɔ* a nyami se kɛ we.

 6 E ngɛ mi kaa e we agboje ɔ kuɔɔ kɛ yaa hiɔwe

Nɛ e yi suɔ bɔku ɔmɛ a he mohu lɛɛ,

 7 Se e hɛ mi ma kpata kɛ ya neneene kaa lɛ nitsɛ e fĩ;

Nihi nɛ a naa lɛ be ko nɛ be ɔ ma bi ke, ‘Jije e ngɛ?’

 8 E maa te kɛ ho kaa nlami, nɛ a be lɛ nae hu;

A maa fiee lɛ kɛ ho kaa nina nɛ a na nyɔ mi.

 9 Hɛngmɛ nɛ na lɛ be ko nɛ be ɔ be lɛ nae hu,

Nɛ a be lɛ nae hu ngɛ e we ɔ mi.

10 Lɛ nitsɛ e bimɛ ma kpa ohiatsɛmɛ pɛɛ kaa a ye bua mɛ,

Nɛ níhi nɛ́ e kpɔ̃ ngɛ nihi a dɛ ɔ, lɛ nitsɛ e maa kpale kɛ ha mɛ.

11 E wuhi a mi hyi tɔ kɛ nihewi a he wami,

Se e kɛ lɔ ɔ* tsuo maa ya zu mi.

12 Ke nɔ́ yaya ngɔɔ ngɛ e nya mi,

Nɛ e kɛ laa ngɛ e lilɛ sisi,

13 Nɛ e lɔɔ he nɛ e ngmɛɛ we he

Mohu ɔ, e yaa nɔ nɛ e hiɔ e nya mi ɔ,

14 Lɛɛ e niye ní ɔ maa dooɔ ke e su e mi mi pɛ;

E maa pee kaa blikahi* a duɔ ngɛ e mi.

15 E mi ní nami, se e maa vie lɛ tsuo pue si;

Mawu ma je lɛ tsuo kɛ je e mi mi.

16 E maa pupɔ blikahi* a duɔ;

Sinɔ duɔtsɛ maa kɔ lɛ nɛ e maa gbe lɛ.

17 E be pahi nɛ a bee nae gblegbleegble,

Nɛ e be hwo kɛ bɔta nɛ hiɛ babauu kaa pa nɛ bee ɔ hu nae.

18 E kɛ níhi nɛ e ngɛ ɔ tsuo ma ha nɛ lɛ nitsɛ e be eko yee;*

E be ní nɛ e ná kɛ je e jua yemi mi ɔ eko yee.

19 E ku ohiatsɛmɛ, nɛ e kua mɛ;

E kpɔ̃ we nɛ́ pi lɛ nɛ́ e ma.

20 Se e ná we tue mi jɔmi ko kulaa;

E ní nami ɔ be nyɛe ma he e yi wami.

21 Nɔ́ ko be ha lɛ hu nɛ e maa mi;

Lɔ ɔ he je nɛ e ní nami ɔ se be kɛe ɔ nɛ.

22 Ke e ní nami ɔ hiɛ kɛ be nɔ po, e maa ye e tsui wawɛɛ;

Ní yayahi tsuo maa ba e nɔ.

23 Be mi nɛ e ngɛ ní yee ɔ,*

Mawu ma ha nɛ e we abofu ɔ maa ba e nɔ,

E maa nɛ kɛ pue e nɔ kɛ ya sɛ e mini ɔmɛ a mi.

24 Ke e tu fo kɛ je ta hwumi dade nya po,

Kɛ̃ɛ̃ mi bi nɛ a kɛ akɔblee pee maa gbɔ lɛ.

25 E maa gbla kɛ̃ɛ̃ mi bi kɛ je e se mi,

E maa gbla ta hwumi nɔ́ ko nɛ ngɛ kpɛe kɛ je e duɔ mi,

Nɛ gbeye maa nu lɛ.

26 E juetli ɔmɛ tsuo maa laa ngɛ diblii kpii mi;

La nɛ pi nɔ ko nɛ ngɛ mi hwue maa sã lɛ;

Haomi maa ba nihi tsuo nɛ a maa piɛ ngɛ e bo tsu ɔ mi ɔ a nɔ.

27 Hiɔwe ma je e tɔmi ɔmɛ tsuo kpo;

Zugba a maa te si kɛ wo lɛ.

28 Nyu kpekpemi maa bɛɛ e we ɔ kɛ ho;

E maa pee kaa pa nɛ hia lalaala kɛ bee ngɛ Mawu mi mi fumi ligbi ɔ nɔ.

29 Yiwutsotsɛ blɔ fa mi nɔ́ nɛ e ma ná kɛ je Mawu dɛ mi ji nɛ ɔ nɛ,

Weto ní nɛ Mawu kɛ fɔ si ha lɛ ji nɛ ɔ nɛ.”

 2 “Nyɛɛ bu nɔ́ nɛ ma de nɛ ɔ tue saminya;

Nɛ nyɛɛ ngɔ lɔ ɔ kɛ wo ye bua.

 3 Nyɛ ná tsui ha mi nɛ ma tu munyu;

Ke i tu munyu tã a, nyɛ ma nyɛ maa ye ye he fɛu.

 5 Nyɛɛ hyɛ mi nɛ́ ye he nɛ pee nyɛ nyakpɛ.

Nyɛɛ ngɔ nyɛ nine kɛ to nyɛ nya he.

 6 Ke i susu he ɔ, i haoɔ,

Nɛ ye nɔmlɔ tso ɔ tsuo doɔ blibliibli.

 7 Mɛni he je nɛ yiwutsotsɛmɛ a se kɛɔ,

A bwɔɔ kotokoto nɛ a peeɔ niatsɛmɛ ɔ?*

 8 A bimɛ ngɛ a hɛ mi be fɛɛ be,

Nɛ a naa a sisi bimɛ po.

 9 A wehi ngɛ slɔkee, nɔ́ ko wui a he gbeye,

Nɛ Mawu kɛ e kpa a gblɛ a tue.

10 Ke a na ku ɔmɛ kuɔ na yi ɔmɛ pɛ kɛkɛ a ná mi;

A na amɛ fɔɔ nɛ́ a mi sane we.

11 A binyumu ɔmɛ tuɔ fo ngɛ kpo ɔ nɔ kaa to kuuhi,

Nɛ a bimɛ ɔmɛ tuɔ kɛ yaa kɛ baa.

12 A laa nɛ a fiaa akasawa kɛ saku kɛ toɔ he,

Nɛ ke a nu nɛ a ngɛ bɛ kpae pɛ kɛkɛ a bua jɔ.

13 A yeɔ a be ɔ ngɛ kplɔkɔtɔ mi

Nɛ a yaa Yɔkɔ* mi ngɛ tue mi jɔmi mi.*

18 Anɛ a pee kaa nga gbigbli nɛ́ kɔɔhiɔ muɔɔ kɛ yaa

Aloo kaa tsakati* nɛ ahumi muɔɔ kɛ yaa lo?

20 Lɛ nitsɛ e hɛngmɛ nɛ́ na e hɛ mi kpatami ɔ,

Nɛ lɛ nɔuu é nu Ope ɔ mi mi fumi ɔ.

21 Ke a po e wami nɔ kpiti ɔ

E susuu we nɔ́ nɛ maa ba e sisi bimɛ a nɔ ɔ he hu ngɛ e se.

22 Anɛ nɔ ko ma nyɛ maa tsɔɔ Mawu nile lo,*

Be mi nɛ lɛ ji nɔ nɛ e kojoɔ nihi nɛ a nɔ kuɔ ɔ?

23 Nɔ ko gboɔ be mi nɛ e ngɛ he wami wawɛɛ

Benɛ e be nyagba ko nɛ e he mi jɔ lɛ,

24 Benɛ e fiɔhi pee agbo

Nɛ e wuhi a he wa.*

25 Se nɔ kpa hu gboɔ kɛ aywilɛho,*

Nɛ́ e sɛ e nya nɔ́ kpakpa ko gblee.

26 Mɛ tsuo a maa hwɔ si ngɛ zu mi,

Nɛ gɔgɔhi maa ha mɛ tsuo a nɔ.

27 Hyɛ! I le nɔ́ tutuutu nɛ nyɛ ngɛ susue

Kɛ gahi nɛ nyɛ ngɛ toe nɛ́ nyɛ kɛ pee mi nɔ́ nɛ dɛ ɔ.*

28 Ejakaa nyɛ deɔ ke, ‘Jije niatsɛ we ɔ ngɛ,

Nɛ jije bo tsu nɛ yiwutsotsɛ hiɔ mi ɔ ngɛ?’

Anɛ nyɛ kase we níhi nɛ a kpa si nɛ a na a* saminya lo?

30 Kaa a haa nɛ yiwutsotsɛ yeɔ e he ngɛ amanehlu be mi

Nɛ a kpɔ̃ɔ̃ lɛ ngɛ mi mi fumi be ɔ mi lo?

31 Mɛnɔ maa su e he nɛ e ma de lɛ ke e ní peepee ɔmɛ hí,

Nɛ mɛnɔ maa wo lɛ hiɔ ngɛ nɔ́ nɛ e pee ɔ he?

32 Ke a ngɔ lɛ kɛ ho gɔ ɔ mi ya a,

A maa bu e gɔ ɔ he.

33 Zu kpɔhi nɛ a ngɛ dɔgba mi ɔ maa ngɔ há lɛ,

Nɛ adesahi tsuo maa nyɛɛ e se*

Kaa nihi babauu nɛ a be nyɛe maa kane nɛ a sɛ e hlami.

 3 Anɛ Ope ɔ kɔmɔ ji kaa* o peeɔ nɔ́ nɛ da lo,

Aloo ke o yeɔ anɔkuale ɔ, e náa nɔ́ ko kɛ jeɔ mi lo?

 4 Anɛ e maa gbla o tue

Nɛ e kɛ mo maa ya kojomi he akɛnɛ o yeɔ lɛ gbeye ɔ lo?

 5 Anɛ pi mo nitsɛ o yayami peemi ɔ nɛ hiɛ babauu

Kɛ tɔmihi nɛ o yaa nɔ nɛ o tɔ̃ɔ he je nɛ e ba jã lo?

 6 Ke o pa sika kɛ ha nihi ɔ, o ngɔɔ níhi ngɛ a dɛ yaka gu.

Nɛ o kpɔɔ bo ngɛ nihi a he nɛ a hɛɔ a he gu.*

 7 O ha we nɔ nɛ pɔ tɔ lɛ ɔ nyu nɛ́ e nu,

Nɛ o ha we nɔ nɛ hwɔ ngɛ lɛ yee ɔ niye ní nɛ́ e ye.

 8 Nyumu nɛ he wa nɔ́ ji zugba a nɛ,

Nɛ nɔ nɛ hɛ mi ngɛ nyami ɔ lɛ hiɔ nɔ.

 9 Se o haa nɛ yalɔyihi hoɔ kɛ a dɛ mi gu,

Nɛ o kuɔ awusa bimɛ* a nine.

10 Enɛ ɔ he je nɛ klamahi* bɔle mo kɛ kpe ɔ nɛ,

Nɛ gbeye níhi woɔ o he gbeye tlukaa nɛ;

11 Enɛ ɔ he je nɛ diblii wo nɛ o nyɛ we nɛ o hyɛ nɔ́ ɔ nɛ,

Nɛ nyu kpekpemi ha o nɔ ɔ nɛ.

14 Bɔkuhi ha e hɛ mi bɔ nɛ pee nɛ e ko hyɛ nɔ́

Benɛ e ngɛ nyɛɛe ngɛ hiɔwe tsitsaa lokoo ɔ.’

15 Anɛ o maa nyɛɛ blema blɔ

Nɛ́ nimli yayahi nyɛɔ nɔ ɔ nɔ lo?

16 Blɔ nɛ nihi nɛ́ a sa mɛ kɛ ho loko e su a be,

Nɛ́ nyu kpekpemi fɔ a sisi tomi ɔ kɛ je ɔ nɔ lo?

19 Nihi nɛ a da a maa na nɔ́ nɛ ɔ nɛ a ma nya,

Nɛ nɔ nɛ sane ko be e he ɔ maa ye a he fɛu nɛ e ma de ke:

20 ‘A kpata wa he nyɛli ɔmɛ a hɛ mi,

Nɛ la ma kpata a níhi nɛ piɛ ɔ hɛ mi.’

21 Moo le Lɛ, nɛ o ma ná tue mi jɔmi;

Kɛkɛ ɔ, o ma ná ní kpakpahi.

22 Moo kplɛɛ mlaa nɛ je e nya mi ɔ nɔ,

Nɛ o ngɔ e munyu ɔmɛ kɛ to o tsui mi.

23 Ke o kpale kɛ ba Ope ɔ ngɔ ɔ, o ma ná ní ekohu;

Ke o je nɔ́ nɛ dɛ kɛ je o bo tsu ɔ mi,

24 Nɛ o sake o sika tsu* ɔ kɛ fɔ zugba

Nɛ o sake sika tsu nɛ je Ofir kɛ pue tɛsahi a kpɛ ɔ,

25 Kɛkɛ ɔ, Ope ɔ ma ba pee o sika tsu,*

Nɛ e maa pee o sika hiɔ nɛ hi pe kulaa.

26 Kɛkɛ ɔ, o bua maa jɔ ngɛ Ope ɔ mi,

Nɛ o ma wo o hɛ nɔ kɛ tsɔɔ Mawu.

27 O ma kpa lɛ pɛɛ, nɛ e maa bu mo tue;

Nɛ o maa ye o si womi ɔmɛ a nɔ.

28 Nɔ́ fɛɛ nɔ́ nɛ o to o yi mi kaa o maa pee ɔ maa ye manye,

Nɛ la ma kpɛ kɛ pue o blɔ ɔ nɔ.

29 Ejakaa ke o kɛ he nɔ womi tu munyu ɔ, o hɛ mi ma pue si,

Se nɔ nɛ baa e he si* lɛɛ, e ma he e yi wami.

30 E ma he nihi nɛ sane ko be a he ɔ a yi wami;

Lɔ ɔ he ɔ, ke o nine he tsɔ ɔ, lɛɛ bɔ fɛɛ bɔ nɛ ji ɔ, e ma he o yi wami.”

 2 “Mwɔnɛ ɔ hu ɔ, ma tu munyu wawɛɛ;

Ye he wami ta ejakaa i ngɛ kɛmɛe.

 4 Nɛ i kɛ ye sane ɔ ma ya pue e hɛ mi

Nɛ ma tu munyuhi fuu nɛ́ ma kɛ fã ye he;

 5 Ma hyɛ bɔ nɛ e ma ha mi heto ha

Nɛ ma bu nɔ́ nɛ e ma de mi ɔ tue.

 7 Lejɛ ɔ lɛ nɔ nɛ da a kɛ lɛ ma dla a kpɛti sane ngɛ,

Nɛ ye Kojolɔ ɔ maa wo mi nguɔ si kake nyɔngloo.

 8 Se ke i ya puje he ɔ, e be lejɛ ɔ;

Nɛ ke i kpale ye se hu, i nɛ lɛ.

 9 Ke e ngɛ ní tsue ngɛ muɔ nɔ ɔ, i nɛ lɛ;

Ke e plɛ e he kɛ ya hiɔ nɔ hu, loloolo ɔ, i nɛ lɛ.

11 I nyɛɛ e nane mami he ɔmɛ a se haa;

I nyɛɛ e blɔ ɔmɛ a nɔ pɛpɛɛpɛ nɛ i gba we kɛ ji nɔ.

14 Ejakaa nɔ́ nɛ e to e yi mi* kaa e maa pee ha mi ɔ, e maa pee kɛ pi si,

Nɛ e ngɛ jamɛ a ní ɔmɛ fuu.

15 Enɛ ɔ he je nɛ i ngɛ haoe ngɛ e he ɔ nɛ;

Ke i susu e he ɔ, i yeɔ lɛ gbeye wawɛɛ.

16 Mawu ha nɛ ye tsui po,

Nɛ Ope ɔ ha nɛ i ye gbeye.

17 Se kɛ̃ ɔ, diblii ha we nɛ ma ma ye nya

Nɛ jã nɔuu nɛ diblii kpii nɛ ha ye hɛ mi ɔ ha we nɛ ma ma ye nya.

 2 Nihi hiaa ni komɛ a bunahi kɛ yaa se;

A juɔ jijɔhi kɛ yaa a lohwehi a ní yemi he ɔmɛ.

 3 A kpɔ̃ɔ bimɛ nɛ a be tsɛ ɔ a tejihi ngɛ a dɛ

Nɛ a kpɔ̃ɔ yalɔyihi hu a nahi nɛ a kɛ ya toɔ awaba.

 4 A tsitsɛɛɔ ohiatsɛ kɛ jeɔ blɔ ɔ nɔ pani nya;

Zugba a nɔ nihi nɛ a be yemi kɛ bualɔ ko ɔ ya laa a he ke a na mɛ ɔ.

 5 Ohiatsɛmɛ hlaa niye ní kaa nga mi teji ngɛ nga a nɔ;

A hlaa niye ní ngɛ nga kplanaa nɔ kɛ haa a bimɛ.

 6 A kpaa ní ngɛ ni kpahi a ngmɔ mi*

Nɛ a ya kpɛteɔ ní ngɛ yiwutsotsɛmɛ a wai ngmɔ mi.

 7 A hwɔɔ si kɛ a he gu nɛ́ a wui nɔ́ ko nɔ́ ko;

A be nɔ́ ko nɛ a kɛ maa ha a he ngɛ fĩɛ be mi.

 8 Yokuhi a nɔ nyu fɔɔ mɛ kɛ hoɔ;

A kplaa tɛsahi a he ejakaa a be wehi.

 9 A kpɔ̃ɔ awusa* kɛ jeɔ nyɔ nya;

Nɛ a ngɔɔ ohiatsɛmɛ a bohi ngɛ a dɛ kɛ ya toɔ awaba,

10 Enɛ ɔ haa nɛ a nyɛɛɔ kɛ a he gu nɛ́ a wui nɔ́ ko nɔ́ ko,

Nɛ hwɔ yeɔ mɛ, be nɛ a ngɛ ngma nɛ a fĩ yi tlomi nya yi tlomi nya amɛ tlooe ɔ.

11 A gboɔ dengme ngɛ tɛ gbogbohi nɛ a ngɛ yokuhi a he ɔ a kpɛ piani katakata;*

A ngãa wai kɛ jeɔ wai yiblii ɔmɛ a mi, se loloolo ɔ, kuma yeɔ mɛ.

12 Nihi nɛ a ngɛ gboe ɔ hii kɛmɛe ngɛ ma a mi;

Nihi nɛ a plaa wawɛɛ ɔ* foɔ ya kɛ biɔ yemi kɛ buami,

Se Mawu nɛ́ enɛ ɔ kaa nɔ́ nɛ sɛ.*

13 Ni komɛ ngɛ nɛ a tsɔɔ atuã kɛ siɔ la;

A yɔse we e blɔ ɔmɛ,

Nɛ a nyɛɛ we e blɔ ɔmɛ a nɔ.

14 Nɔ gbelɔ ɔ teɔ si mɔtu mla;

E gbeɔ nihi nɛ a be yemi kɛ bualɔ ɔ kɛ ohiatsɛmɛ,

Nɛ ke je jɔ ɔ, e ya juɔ.

15 Nɔ́ nɛ gba puɛlɔ hɛngmɛ ngɛ mlɛe pɛ ji kaa du nɛ bu,

E deɔ ke, ‘Nɔ ko nɔ ko be mi nae!

16 Ke diblii wo ɔ, a ywiaa* nihi a sinya nɛ a sɛɔ mi;

Ke je na a, a ngaa sinya kɛ woɔ a yi ngɛ tsu mi.

17 Ejakaa mɔtu ngɛ kaa diblii kpii kɛ ha mɛ;

A le gbeye níhi nɛ yaa nɔ ngɛ diblii kpii mi ɔ.

19 Kaa bɔ nɛ sapu kɛ je mi la dɔmi haa nɛ snoo sileɔ ɔ,

Jã kɛ nɛ Yɔkɔ* ngɔɔ yayami peeli kɛ hoɔ!

21 E peeɔ yosa basabasa,

Nɛ e waa yalɔyo yi mi.

22 Mawu maa ngɔ e he wami ɔ kɛ kpata nɔ nɛ he wa a hɛ mi;

A maa te si kɛ da si mohu lɛɛ, se a be nɔ mi mami ko kaa a maa hi wami mi.

23 Mawu haa nɛ a náa kã nɛ a hiɔ slɔkee,

Se e hɛngmɛ ngɛ nɔ́ fɛɛ nɔ́ nɛ a peeɔ he.

A baa mɛ si nɛ a buaa a nya kaa bɔ nɛ a peeɔ nɔ fɛɛ nɔ ɔ;

A poɔ mɛ kɛ pueɔ he kaa bɔ nɛ a poɔ ngma* a.

25 Jehanɛ ɔ, mɛnɔ ma nyɛ ma de ke lakpatsɛ ji mi

Aloo nɔ́ nɛ i ngɛ dee ɔ pi anɔkuale?”

 2 “Mawu yeɔ nɔ, nɛ e ngɛ he wami nɛ se be;

E ha nɛ tue mi jɔmi ba hiɔwe.*

 4 Lɔ ɔ he ɔ, kɛ e maa pee kɛɛ nɛ nɔmlɔ nɛ yo fɔ lɛ ɔ maa da ngɛ Mawu hɛ mi,

Aloo nɔmlɔ nɛ yo fɔ lɛ ɔ maa pee nɔ ko nɛ sane ko be e he ɔ?*

 5 Nyɔhiɔ ɔ po kpɛ we

Nɛ dodoe ɔmɛ hu a he tsɔ we ngɛ e hɛ mi,

 6 Lɛɛ nɔmlɔ adesa nɛ e ji gɔgɔ,

Kɛ nɔmlɔ bi nɛ e ji pɔpɔli ɔ, kɛ e maa na lɛ kɛɛ!”

 4 Mɛnɔ lɛ o kɛ ngɛ munyu tue ɔ,

Nɛ mɛnɔ wo mo ga ke o tu jamɛ a munyu ɔmɛ?*

 5 Nihi nɛ a gbo nɛ a be he wami ko ɔ kpokpoɔ;

A ba si pe wo ɔ kɛ níhi nɛ a ngɛ mi ɔ po.

 6 Yɔkɔ* ɔ fɔɔ si paa ngɛ Mawu hɛ mi,

Nɛ hɛ mi kpatami muɔ* ɔ fɔɔ si nɛ a kɛ nɔ́ ko hɛ nɔ.

 7 E gbla yiti je hiɔwe ɔ mi kɛ ha kɔɔhiɔ mi,*

Nɛ e ngɔ zugba a kɛ kpla si nɛ nɔ́ ko hɛɛ we lɛ;

 8 E fĩ nyu ɔmɛ a nya kɛ wo bɔku ɔmɛ a mi,

Bɔ nɛ pee nɛ nyu ɔmɛ a mi jiɔmi ɔ nɛ ko ha nɛ bɔku ɔ nɛ pɛ́;

 9 E tsiɔ e matsɛ sɛ ɔ hɛ mi,

Nɛ e ngɔɔ e bɔku ɔ kɛ haa nɔ.

10 E po kla ngɛ nyu ɔmɛ a nɔ;

E po huzu ngɛ la kɛ diblii a kpɛti.

11 Hiɔwe titima amɛ po mimiɛ;

E hɛ mi kami ɔ ha nɛ a he mi po.

12 E kɛ e he wami ɔ klɛɔ wo ɔ mi,

Nɛ e kɛ e nɔ́ sisi numi ɔ kuɔ wo mi lohwe ngua a* dukuduku.

13 E kɛ e mumi* ɔ haa nɛ hiɔwe ɔ tsɔɔ;

E kɛ e nine gbuɔ sinɔ nɛ e he sɔɔ ɔ.

14 Hyɛ! E blɔ ɔmɛ a he nɔ́ ko bɔɔ pɛ ji nɛ ɔ nɛ;

Nɔ́ ko nyafii pɛ lɛ wa nu kɛ kɔ e he!

 2 “Be abɔ nɛ Mawu, nɔ nɛ e yi dami sane ha mi ɔ ngɛ nɛ ɔ,

Be abɔ nɛ Ope ɔ, nɔ nɛ kɛ mi* ye wawɛɛ ɔ ngɛ nɛ ɔ,

 3 Be abɔ nɛ ye mumi ngɛ ye mi

Nɛ́ Mawu mumi ngɛ ye gugwɔ mi nɛ ɔ,

 4 I kɛ ye nya be lakpa munyu tue kɔkɔɔkɔ;

Nɛ i kɛ ye lilɛ hu be nɔ ko sisie!

 6 Ma hɛɛ ye dami ní peemi ɔ mi nɛ i be he ngmɛɛe kɔkɔɔkɔ;

Be abɔ nɛ i ngɛ wami mi nɛ ɔ,* ye tsui be mi fɔ bue.*

 7 Á gbla ye he nyɛlɔ ɔ tue kaa yiwutsotsɛ,

Nɛ á gbla nihi nɛ a tuaa mi ɔ hu a tue kaa nihi nɛ a dɛ.

 8 Mɛni hɛnɔkami nɛ nɔ nɛ li Mawu ɔ* ngɛ ke a kpata e hɛ mi,

Ke ji Mawu ngɔ e wami* ngɛ e dɛ?

 9 Ke haomi ba e nɔ ɔ

Anɛ Mawu maa nu ya nɛ e ngɛ foe kɛ ngɛ yemi kɛ buami bie ɔ lo?

11 Ma tsɔɔ nyɛ Mawu he wami ɔ he ní.*

I be nyɛ nɔ́ ko nɔ laae kɛ kɔɔ Ope ɔ he.

12 Hyɛ! Ke nyɛ tsuo nyɛ na ninahi ɔ,

Lɛɛ mɛni he je nɛ se nami ko be nyɛ munyu ɔmɛ a he ɔ?

13 Yiwutsotsɛ blɔ fa mi nɔ́ nɛ e ma ná kɛ je Mawu dɛ mi ji nɛ ɔ nɛ,

Weto ní nɛ e ma ná kɛ je Ope ɔ dɛ mi ji nɛ ɔ nɛ.

14 Ke e bimɛ a he hiɛ ɔ, mɛ tsuo a ma gbo ngɛ klaate nya,

Nɛ e sisi bimɛ be niye ní nae nɛ maa su mɛ.

15 Nihi nɛ a maa piɛ ngɛ e se ɔ, gbenɔ hiɔ maa pu mɛ,

Nɛ a yalɔyi ɔmɛ be ya foe ha mɛ.

16 Ke e bua sika hiɔ nya kaa bunyuku

Nɛ e bua tade kpakpahi a nya kɛ to kaa zu po,

17 Ee, ke e bua nya kɛ to po,

Dalɔ ɔ ma ba wo mɛ ha lɛ,

Nɛ nihi nɛ sane ko be a he ɔ ma gba e sika hiɔ ɔ kɛ ha a he.

18 E tsu ɔ he wɛ kaa wɔyewɔye tsu,

E ngɛ kaa gba nɛ bulɔ ma.

19 E ma ya hwɔ si kaa niatsɛ se e be nɔ́ ko nya buae;

Ke e bli e hɛngmɛ ɔ, e be nɔ́ ko nɔ́ ko nae.

20 Gbeye níhi woɔ lɛ kɛ hoɔ kaa nyu kpekpemi;

Ahumi saa lɛ kɛ hoɔ nyɔ mi.

21 Puje he kɔɔhiɔ maa ngɔ lɛ kɛ ho, nɛ a be lɛ nae hu;

E maa bɛɛ lɛ kɛ je e sihi he ɔ kɛ ho.

22 Nɛ benɛ e ngɛ mɔde bɔe kaa e maa tu fo kɛ je e he wami ɔ nya a

E ma ba fia lɛ nɛ e be lɛ mɔbɔ nae.

23 E maa gbɔ e dɛ mi kɛ wo lɛ

Nɛ e ma kpa nyagba kɛ je he nɛ e ngɛ ɔ kɛ wo lɛ.*

28 “He ko ngɛ nɛ a tsuaa sika hiɔ ngɛ

Nɛ he ko ngɛ nɛ a tsuaa sika tsu nɛ a maa tsu he ɔ ngɛ;

 2 A tsuaa dade ngɛ zu mi,

Nɛ a sileɔ* akɔblee kɛ jeɔ tɛsahi a mi.

 3 Adesa yeɔ diblii nɔ kunimi;

E sɛɔ diblii kɛ diblii kpii mi,

Nɛ e ya hlaa tɛ nɛ he jua wa.*

 4 E tsuaa muɔ nɛ mi kuɔ ngɛ hehi nɛ nihi be,

Ngɛ hehi nɛ nihi a hɛ je nɔ, nɛ e kɛ he nɛ nihi beɔ ngɛ ɔ kɛ;

Ni komɛ kɛ kpa kpleɔ kɛ yaa mi.

 5 Wa náa niye ní ngɛ zugba a nɔ;

Se zugba a sisi lɛɛ, e tsake kulaa kaa nɔ́ nɛ a kɛ la sã.*

 6 Safiro ngɛ tɛ ɔmɛ a mi ngɛ lejɛ ɔ,

Nɛ sika tsu ngɛ zu ɔ mi.

 7 Lohwe pɛlitsɛ nɛ nuɔ lohwe kpahi ɔ li blɔ nɛ yaa lejɛ ɔ;

Nɛ papalotsui yumu hɛngmɛ hu nɛ.

 8 Lohwe awi yelɔ ko bi ngɛ lejɛ ɔ;

Jata wayo ko hu bi ngɛ lejɛ ɔ.

 9 Nɔmlɔ kɛ e nine ywiaa tɛsa nɛ he wa wawɛɛ ɔ;

E plɛɔ yoku ɔmɛ ngɛ a sisi tomi nɔ kɛ buɔ si.

10 E gbaa nyu dɔhi ngɛ tɛsa amɛ a mi;

E hɛngmɛ naa níhi nɛ a he jua wa amɛ tsuo.

11 E tsiɔ hehi nɛ pa a jeɔ kɛ ba a

Nɛ e ngɔɔ níhi nɛ a ngɔ kɛ laa a kɛ baa la nya.

12 Se jije a maa na juɛmi ngɛ,

Nɛ nɔ́ sisi numi hu, jije ji e je he?

13 Adesa ko li bɔ nɛ e he jua wa ha,

Nɛ a be nae ngɛ hɛ kali a zugba a nɔ hulɔ.

15 A be nyɛe ma he kɛ sika tsu ngmingmiingmi;

Nɛ a be nyɛe maa ngmɛ sika hiɔ hu kɛ tsake lɛ.

16 A kɛ sika tsu nɛ je Ofir be nyɛe ma he

Nɛ a kɛ oniks* kɛ safiro nɛ a he jua wa hu be nyɛe ma he.

17 A be nyɛe maa ngɔ sika tsu kɛ ahuhuɛ kɛ to he;

Nɛ a kɛ buɛ nɛ a kɛ sika tsu ngmingmiingmi* pee hu be nyɛe ma tsake.

18 Kora tɛ kɛ kristalo po bɛ he kulaa,

Ejakaa baagi nɛ hyi tɔ kɛ juɛmi ɔ he jua wa kulaa pe baagi nɛ hyi tɔ kɛ adiagba.

19 A be nyɛe maa ngɔ Topaz nɛ a kɛ je Kush kɛ to he;

Nɛ a be nyɛe ma he kɛ sika tsu ngmingmiingmi po.

20 Se jije juɛmi je kɛ ba,

Nɛ nɔ́ sisi numi hu, jije ji e je he?

21 A ngɔ kɛ laa níhi tsuo nɛ a ngɛ wami mi ɔ a hɛngmɛ

Nɛ a ngɔ kɛ laa hiɔwe lohwe pɛlitsɛmɛ hulɔ.

22 Hɛ mi kpatami kɛ gbenɔ de ke,

‘Nɔ́ nɛ a de kɛ kɔ e he pɛ lɛ wa nu kɛ wa tue.’

23 Mawu lɛ le blɔ nɔ nɛ a maa gu kɛ na;

Lɛ pɛ lɛ e le he nɛ e ngɛ,

24 Ejakaa e hyɛɔ je ɔ nyagbe he ɔmɛ tsuo,

Nɛ e naa nɔ́ fɛɛ nɔ́ nɛ ngɛ hiɔwe sisi ɔ.

25 Benɛ e ha kɔɔhiɔ he wami*

Nɛ e susu nyu ɔmɛ,

26 Benɛ e wo mlaa kɛ ha hiɔmi nɛmi

Nɛ́ e gba blɔ kɛ ha oslabai kɛ hiɔmi nɛ nya wa a,

27 Kɛkɛ nɛ e na juɛmi nɛ e tsɔɔ mi;

E to lɛ si nɛ e ka nɛ e hyɛ.

‘Hyɛ! Yehowa gbeye yemi ɔ, lɔ ɔ ji juɛmi,

Nɛ ke nɔ ko yuɔ e he ngɛ yayami he ɔ, lɔ ɔ ji nɔ́ sisi numi ɔ nɛ.’”

 2 “I na nɛ i ngɛ kaa bɔ nɛ i ngɛ nyɔhiɔhi nɛ be ɔ,

Nɛ́ Mawu buɔ ye he ɔ,

 3 Benɛ e haa nɛ e kane ɔ kpɛɔ kɛ pueɔ ye yi nɔ,

Nɛ́ i kɛ e la a nyɛɔ ngɛ diblii mi ɔ,

 4 Benɛ i ngɛ ye nane nya,

Nɛ́ i nuɔ he ngɛ ye bo tsu ɔ mi kaa huɛ bɔmi kpakpa ngɛ i kɛ Mawu wa kpɛti,

 5 Benɛ Ope ɔ kɛ mi ngɛ,

Nɛ́ ye bimɛ ɔmɛ* bɔle mi kɛ kpe,

 6 Benɛ ye to ɔmɛ haa mi nyɔ nyu fuu,

Nɛ́ i náa oliv nu babauu ɔ.*

 7 Benɛ i yaa ma a agbo ɔ nya

Nɛ́ i ya hiɔ ma a he nya buami he ɔ,

 8 Ke nihewi ɔmɛ na mi ɔ, a jeɔ blɔ ɔ mi,*

Nɛ nimowi po teɔ si nɛ a yaa nɔ nɛ a daa si.

 9 Ganɔhi po kpaa munyu tumi;

Nɛ a ngɔɔ a nine kɛ toɔ a nya he.

10 Nihi nɛ a he biɛ ɔmɛ peeɔ dii;

A lilɛ mɛtɛɔ a nya mi.

11 Nɔ fɛɛ nɔ nɛ nu ye he ɔ tuɔ ye he munyu kpakpa,

Nɛ nihi nɛ a na mi ɔ yeɔ odase ha mi.

12 Ejakaa i kpɔ̃ɔ ohiatsɛmɛ nɛ a kpaa ngmlaa kɛ biɔ yemi kɛ buami ɔ,

Nɛ i kpɔ̃ɔ awusa* kɛ nɔ fɛɛ nɔ nɛ be yemi kɛ bualɔ ko ɔ.

13 Nɔ nɛ e hɛ mi miɔ nɛ e ma kpata a jɔɔ mi,

Nɛ i haa nɛ yalɔyihi a tsui nyaa.

14 I woɔ dami ní peemi kaa ye tade;

Nɛ ye dami sane yemi ngɛ kaa tade klɔii* kɛ yi fimi nɔ́.

15 I ba plɛ pee hɛngmɛ kɛ ha hɛ yuyuili

Nɛ i ba plɛ pee nane kɛ ha glɔtsɛmɛ.

16 I pee tsɛ kɛ ha ohiatsɛmɛ;

I hlaa sanehi a mi kɛ haa nihi nɛ i li mɛ po.

17 I kuɔ yayami peelɔ tsitsahi

Nɛ i kpɔ̃ɔ nihi nɛ e nu mɛ ɔ kɛ jeɔ e nya mi.

18 I deɔ ke, ‘Ma gbo ngɛ imi nitsɛ ye we mi,*

Nɛ ye ligbi ɔmɛ maa hiɛ babauu kaa zia.

19 Ye sipoku ɔmɛ ma gba kɛ wo nyu ɔmɛ a mi,

Nɛ bɔ maa hi ye tso kɔni ɔmɛ a nɔ nyɔ ɔ mi tsuo.

20 Ye hɛ mi nyami ɔ peeɔ ehe be fɛɛ be,

Nɛ ma ya nɔ ma tsɛ̃ kɛ̃ɛ̃ nɛ ngɛ ye dɛ mi ɔ.’

21 Nihi hyɛɔ blɔ kaa a maa bu mi tue,

Nɛ a peeɔ dii kɛ mlɛɔ ye ga womi ɔ.

22 Ke i tu munyu ta a, a nyɛ we nɔ́ ko demi hu;

Ye munyu ɔmɛ sɛɔ a tue mi blɛuu.

23 A mlɛɔ mi kaa bɔ nɛ a mlɛɔ hiɔmi ɔ;

A gbɛɔ a nya mi hatoo kaa nɔ́ nɛ a ngɛ gbiɛ be mi hiɔmi mlɛe.

24 Ke i muɔ hɛlii kɛ tsɔɔ mɛ ɔ, a nya kpɛɔ a he;

Ke a na bɔ nɛ ye hɛ mi ngɛ bua jɔmi ha a, kɛkɛ a tsui nɔ a mi.*

25 I ha mɛ blɔ tsɔɔmi kaa a nya dalɔ,

Nɛ i pee kaa matsɛ ngɛ e tabuli ɔmɛ a kpɛti,

Kaa nɔ nɛ woɔ nihi nɛ a ngɛ aywilɛho yee ɔ a bua.

30 “Se amlɔ nɛ ɔ, a ngɛ mi muɔe

Nihi nɛ i wa pe mɛ,

Nɛ́ a tsɛmɛ po i kɛ mɛ be

Gbehi nɛ a buɔ ye to ɔmɛ a he ɔ he piɛe ɔ.

 3 Ohia kɛ hwɔ ha nɛ a ta he lo;

A kɔ̃ɔ̃ nɔ́ fɛɛ nɔ́ nɛ a na ngɛ zugba gbigbli nɔ

Zugba nɛ hɛ mi kpata nɛ e pee ma doku ɔ.

 4 A buaa ngo ba nya kɛ jeɔ nga amɛ a mi;

A niye ní ji nga nɔ tsohi a sipoku.

 5 A fieeɔ mɛ kɛ jeɔ nimli a kpɛti;

Nihi hwɔɔ a yi kaa bɔ nɛ a hwɔɔ julɔ yi ɔ.

 6 A hiɔ dɔgbahi a mi,*

Kɛ muɔhi nɛ a ngɛ zugba a kɛ tɛsahi a mi ɔ mi.

 7 A kpaa ngmlaa kɛ jeɔ nga amɛ a mi

Nɛ a buaa a he nya ngɛ tsohi nɛ miohi ngɛ a he ɔ a kpɛti.

 8 A fiee mɛ* kɛ je zugba a nɔ,

Kaa kuasiahi kɛ nihi nɛ a be biɛ a bimɛ.

 9 Se amlɔ nɛ ɔ, a yeɔ ye he fɛu ngɛ a lahi a mi po;

I ba plɛ pee he guɛ gbemi nɔ́* kɛ ha mɛ.

10 A hiee mi nɛ a hɛɛ mɛ kɛ jeɔ ye kasa nya kulaa;

A kɛ oya yemi laa lada kɛ pueɔ ye hɛ mi.

11 Akɛnɛ Mawu ha nɛ i gbɔjɔ* nɛ e ba mi si he je ɔ,

A bui mi fɛɛ, nɛ a deɔ nɔ́ fɛɛ nɔ́ nɛ a suɔ ngɛ ye hɛ mi.*

12 A teɔ si ngɛ ye hiɔ nɔ kaa ojo fiali;

A haa nɛ i tuɔ fo

Nɛ a kɛ blɔ tsimi níhi nɛ kpataa nɔ hɛ mi ɔ fɔɔ ye blɔ ɔ mi.

13 A puɛ blɔhi nɛ i nyɛɛɔ nɔ ɔ

Nɛ a ha nɛ ye haomi ɔ mi wa,

Nɛ nɔ ko be nɛ maa tsi a nya.*

14 A baa ye nɔ kaa nɔ́ nɛ a gu gbogbo nɛ́ puɔ agbo ko ngɛ mi ɔ mi kɛ ba;

A kpɛneɔ kɛ baa ngɛ ye haomi be mi.

15 Gbeye nuɔ mi;

A fiee ye hɛ mi nyami ɔ kɛ je kaa kɔɔhiɔ,

Nɛ ye yi wami hemi ɔ laa kaa bɔku.

16 Amlɔ nɛ ɔ, ye gbenɔ be su ta;

Amanehlu behi ba ná mi.

17 Ye wuhi a mi kpeɔ mi* nyɔ mi.

Nɛ yeyee ɔ nya bɛ si gblee.

18 A kɛ he wami gbla ye tade ɔ;*

Nɛ e mia mi kaa ye tade kuɛmi.

19 Mawu sake mi kɛ fɔ mɔsɔ mi;

I pee kaa bunyuku kɛ lazu.

20 I fo ya kɛ tsɛ mo, se o he we nɔ;

I te da si, se o hyɛ mi gaa.

21 O kɛ yi mi wami te si kɛ wo mi;

O kɛ he wami tsuo nɛ ngɛ o nine mi ɔ tua mi.

22 O wo ye nɔ, nɛ o ha nɛ kɔɔhiɔ wo mi kɛ ho;

Kɛkɛ nɛ o fɔ mi kɛ ya kɛ ba ngɛ kɔɔhiɔ nɛ nya wa mi.*

23 Ejakaa i le kaa o maa ngɔ mi kɛ wo gbenɔ dɛ mi,

O maa ngɔ mi kɛ ya we nɛ nihi tsuo nɛ a ngɛ wami mi ɔ ma ya kpe ngɛ mi ɔ mi.

24 Se nɔ ko be nyumu nɛ e kuɔ* nɔ́ fiae

Benɛ e ngɛ ya foe kɛ ha yemi kɛ buami ngɛ e haomi be mi ɔ.

26 E ngɛ mi kaa i ngɛ nɔ́ kpakpa blɔ hyɛe mohu lɛɛ, se nɔ́ yaya mohu lɛ ba;

I hyɛ blɔ kaa ma na la, se diblii mohu lɛ ba.

27 Ye tsui hao ngɛ ye mi;

Amanehlu behi ba ná mi.

29 I plɛ pee nga mi gbehi a nyɛmi

Kɛ duguma biyihi a huɛ.

30 Ye he womi yu tuu nɛ e kpɔ ngɛ ye he;

Ye hiɔ ɔ* ha nɛ ye wu ɔmɛ dɔ la.

31 Aywilɛho pɛ lɛ a fiaa ye saku ɔ kɛ yeɔ,

Nɛ ye bɛ ɔ ngɛ kɛ ha nihi nɛ a ngɛ ya foe ɔ.

 2 Jinɛ mɛni lɛ ma ná kɛ je Mawu nɛ ngɛ hiɔwe ɔ ngɔ,

Jinɛ mɛni weto ní lɛ ma ná kɛ je Ope ɔ nɛ ngɛ hiɔwe ɔ ngɔ?

 3 Amanehlu fɔɔ si ha yayami peelɔ

Nɛ haomi ngɛ kɛ ha nihi nɛ a yeɔ nɔ awi.

 4 Anɛ e nɛ́ ye blɔ ɔmɛ lo

Nɛ e kane we ye nane mami he ɔmɛ tsuo lo?

 6 Mawu nɛ́ e ngmɛ mi ngɛ sɛni nɛ da nɔ;

Kɛkɛ e maa na ye anɔkuale yemi ɔ.

 7 Ke ye nane gba kɛ je blɔ ɔ nɔ

Aloo ye tsui nyɛɛ ye hɛngmɛ se

Aloo ye ninehi a he wo mu ɔ,

 8 Lɛɛ ha nɛ ma du wu nɛ nɔ kpa nɛ ba ye,

Nɛ́ a hiaa níhi nɛ i du ɔ kɛ pue si.*

 9 Ke yo ko he pee mi akɔnɔ ngɛ ye tsui mi

Nɛ i ya mlɛ lɛ ngɛ ye nyɛmi ɔ sinya a nya a,

10 Lɛɛ ye yo ɔ nɛ wɛɛ ngma* kɛ ha nyumu kpa,

Nɛ́ nyumu kpahi nɛ a kɛ lɛ nɛ ná bɔmi.*

11 Ejakaa lɔ ɔ maa pee hɛ mi si puemi nɔ́,

Kɛ yayami nɛ e sa kaa kojoli ɔmɛ nɛ a gbla nɔ tue ngɛ he.

12 E maa pee la nɛ maa sã nɔ́, nɛ́ ma kpata nɔ́ hɛ mi,*

Nɛ́ maa sã* níhi nɛ i du ɔ sipokuhi tsuo.

13 Ke ye nyɔguɛ nyumuhi aloo ye nyɔguɛ yihi kɛ mi ná sane

Nɛ i yi dami sane ha mɛ ɔ,

14 Mɛni ma pee ke ji kaa Mawu bi mi he sane?*

16 Ke i ha we ohiatsɛmɛ níhi nɛ a hia

Aloo i ha nɛ yalɔyihi ye aywilɛho;*

17 Ke imi nɔ kake too i ye ní

Nɛ i ha we awusahi eko;

18 (Ejakaa kɛ je ye nihe mi tɔɔ, awusa nɛ ɔmɛ naa mi kaa a tsɛ,

Nɛ i yeɔ buaa yalɔyihi kɛ je ye jokuɛwi a si.*)

19 Ke i na nɛ nɔ ko hɛ mi ngɛ kpatae akɛnɛ e be tade

Aloo ohiatsɛ nɛ́ e be nɔ́ ko nɛ e ma kɛ ha e he;

20 Ke i ha we lɛ ye jijɔ he bwɔmi ɔ eko nɛ e kɛ ha e he konɛ e he nɛ dɔ la

Nɛ́ e* jɔɔ mi;

21 Ke i ma kɔ̃, nɛ i huanya kɛ wo awusa

Be mi nɛ e hia yemi kɛ buami ngɛ ma agbo ɔ nya a;*

22 Lɛɛ ha nɛ ye kɔni* nɛ kpɔ kɛ je ye konɔ,

Nɛ́ ye kɔni nɛ ku ngɛ ye kɔni si.*

23 Ejakaa i ye amanehlu nɛ je Mawu ngɔ ɔ gbeye,

Nɛ i nyɛ we nɛ ma da e hɛ mi nyami ɔ hɛ mi.

24 Ke i ngɔ ye hɛ kɛ fɔ sika tsu nɔ

Aloo i de sika tsu ngmingmiingmi ke, ‘O nɔ lɛ i ngɔ ye hɛ kɛ fɔ!’

25 Ke i náa ye bua jɔmi ɔ kɛ jeɔ ní babauu nɛ i ná a mi

Kɛ níhi babauu nya nɛ i buaa he je;

26 Ke i na pu ɔ* nɛ ngɛ kpɛe

Aloo i na nyɔhiɔ ɔ nɛ ngɛ nyɛɛe ngɛ e we anunyami ɔ mi;

27 Nɛ ye tsui sisi mi nigii,

Nɛ ye nya fĩɔ ye nine he kɛ ja mɛ ɔ;

28 Lɛɛ, lɔ ɔ maa pee yayami nɛ e sa kaa kojoli ɔmɛ nɛ a gbla nɔ tue ngɛ he,

Ejakaa lɔ ɔ maa tsɔɔ kaa i kua Mawu nɛ ngɛ hiɔwe ɔ.

29 Anɛ i nya hyɛ ngɛ ye he nyɛlɔ ko hɛ mi kpatami he je lo

Aloo ye bua jɔ akɛnɛ nɔ́ yaya ko ba e nɔ ɔ he je lo?

30 I gbíɛ ye he nyɛlɔ hyɛ kaa é gbo

I pee we jamɛ a yayami ɔ hyɛ.

31 Anɛ nyumuhi nɛ a ngɛ ye bo tsu ɔ mi ɔ de we ke,

‘Mɛnɔ po lɛ e yi Hiob niye ní* nɛ e tɔ lo?’

32 Nubwɔ* ko hwɔ we kpo nɔ nyɔ mi;

I bliɔ ye sinya a kɛ haa blɔ hialɔ.

33 Anɛ i bɔ mɔde hyɛ kaa ma laa ye yayami nɔ kaa bɔ nɛ nyumu kpa amɛ peeɔ lo,

Nɛ́ ma ngɔ ye he yayami ɔ kɛ laa ngɛ ye tade ɔ kotoku ɔ mi lo?

34 Anɛ i yeɔ bɔ nɛ nihi babauu maa pee a ní ha a gbeye,

Aloo i haa nɛ bɔ nɛ weku komɛ ma pue ye hɛ mi si ha a woɔ ye he gbeye,

Nɛ́ lɔ ɔ nɛ ba ha nɛ ma ma ye nya konɛ ma ko je kpo lo?

36 Jinɛ i ko tloo ngɛ ye konɔ,

Nɛ i ko fĩ kɛ bɔle ye yi kaa jlasi.

37 Jinɛ i ko bu ye nane hiami tsuo he akɔtaa kɛ ko ha lɛ;

Nɛ i kɛ kã maa hɛ kɛ su e he kaa ganɔ.

38 Ke imi nitsɛ ye zugba a fo ya kɛ pue ye nɔ

Nɛ e nɔ nyu dɔ ɔmɛ nɛ a gba a tsuo fo ya kɛ bla;

39 Ke i ye e nɔ yiblii nɛ i wui he hiɔ,

Aloo i ha nɛ nɔtsɛmɛ ɔmɛ* hao ɔ;

40 Lɛɛ hwiit nane mi ɔ, miohi nɛ a puɛ ha mi

Nɛ ngɛ barli* nane mi ɔ, hu* nɛ ngɛ fu jee nɛ puɛ.”

“Niheyo kɛkɛ ji mi*

Se nyɛ lɛɛ nikɔtɔmahi ji nyɛ.

Enɛ ɔ he ɔ, bumi nɛ i ngɛ kɛ ha nyɛ he je ɔ, i ma ye nya,

Nɛ i ye gbeye kaa ma de nyɛ nɔ́ nɛ i le.

 7 I de ke, ‘Ha nɛ nihi nɛ a wa a nɛ a tu munyu,*

Nɛ ha nɛ nihi nɛ a jeha ya hɛ mi ɔ nɛ a tu munyu kaa juɛmitsɛmɛ.’

 8 Se mumi nɛ ngɛ nihi a mi,

Ee, Ope ɔ mumi nɛ e woɔ ɔ lɛ haa nɛ a náa nɔ́ sisi numi.

 9 Tsa pi wami pɛ* kɛkɛ nɛ peeɔ nɔ ní lelɔ,

Nɛ tsa pi nyumuhi nɛ a wa ngɛ jeha mi ɔ pɛ nɛ a le nɔ́ nɛ da.

10 Enɛ ɔ he ɔ, i ngɛ dee ke, ‘Moo bu mi tue,

Nɛ imi hu ma de mo nɔ́ nɛ i le.’

11 Hyɛ! I mlɛ konɛ nyɛ de níhi nɛ nyɛ ma de ɔ;

I ya nɔ nɛ i bu nyɛ níhi a he susumi ɔmɛ tue

Be mi nɛ nyɛ ngɛ nɔ́ nɛ nyɛ ma de ɔ he susue ɔ.

12 I bu nyɛ tue saminya,

Se nyɛ ti nɔ ko nɔ ko nyɛ we nɛ e tsɔɔ kaa Hiob sane dɛ*

Aloo é ha e sane ɔmɛ a heto.

13 Enɛ ɔ he ɔ, nyɛ ko de ke, ‘Wa ngɛ juɛmi;

Mawu ji nɔ nɛ maa tsɔɔ kaa e sane dɛ, pi adesa ko.’

14 Pi imi nɛ e tu munyu kɛ si,

Enɛ ɔ he ɔ, pi munyuhi nɛ nyɛ tu ɔ nɛ́ ma kɛ ha lɛ heto.

15 A pee yaa, a be heto ko nɛ a ma ha hu;

A be nɔ́ ko nɛ a ma de hu.

16 I mlɛ mɛ hluu, se a pa de we nɔ́ ko hu;

A daa si kɛkɛ, a be heto ko nɛ a ma ha hu.

17 Enɛ ɔ he ɔ, imi hu ma de ye nɔ́;

Imi hu ma de nɔ́ nɛ i le,

18 Ejakaa munyu hyi ye mi tɔ;

Mumi nɛ ngɛ ye mi ɔ ngɛ mi tsitsɛɛe.

19 Ye mi mi blɔ pee kaa wai nɛ a nga nya kpɛkpɛtɛɛ,

Kaa wai tɔ ehehi nɛ a miɔ nɛ a ma pɛ́.

21 I be nɔ ko nɔ ko hɛ mi hyɛe;

Nɛ i be munyu dɔkɔɔ tue ngɛ adesa ko he hulɔ,*

22 Ejakaa i li bɔ nɛ a tuɔ munyu dɔkɔɔ ha;

Ke i pee nɔ́ ko kaa jã a, ye Bɔlɔ* ɔ kɛ oya yemi ma kpata ye hɛ mi.

33 “Amlɔ nɛ ɔ, Hiob, i kpa mo pɛɛ nɛ o bu nɔ́ nɛ ma de mo ɔ tue saminya;

Moo bu nɔ́ fɛɛ nɔ́ nɛ ma de mo ɔ tue.

 2 Hyɛ, i kpa mo pɛɛ! E sa nɛ ma bli ye nya mi;

E sa nɛ ye lilɛ nɛ tu munyu.

 3 Ye munyu ɔmɛ tsɔɔ bɔ nɛ ye tsui da ha,

Nɛ nɔ́ nɛ i le ɔ, lɔ ɔ pɛpɛɛpɛ i deɔ ɔ nɛ.

 4 Mawu nitsɛ mumi ɔ lɛ pee mi,

Nɛ Ope ɔ nitsɛ mumi nɛ́ e woɔ ɔ lɛ ngɔ mi kɛ ba wami mi.

 5 Ke o ma nyɛ ɔ, ha mi heto;

Mo de mi o sane ɔ; moo pee klaalo.

 6 Hyɛ! I ngɛ kaa mo nɔuu ngɛ anɔkuale Mawu ɔ hɛ mi;

Imi hu zu kɛ̃ lɛ a kɛ puɛ mi.

 7 Enɛ ɔ he ɔ, e sɛ nɛ o ye mi gbeye,

Nɛ nɔ́ nɛ ma de mo ɔ he be wae ha mo.

 8 Se o de nɛ i nu,

Ee, i nu nɛ o de si abɔ ke,

 9 ‘Ye he tsɔ, nɛ tɔmi ko be ye he;

Mu ko be ye he, nɛ i pee we yayami ko.

10 Se Mawu na nɔ́ nɛ e maa da nɔ kɛ te si kɛ wo mi;

E bu mi kaa e he nyɛlɔ.

11 E bɔ ye nane ɔmɛ pã;

Nɛ e hyɛɔ he fɛɛ he nɛ i yaa a totooto.’

14 Ejakaa Mawu tu munyu si kake, nɛ e kpale de ekohu,

Se nɔ ko nɔ ko bui tue,

15 E peeɔ jã ngɛ nlami mi, ngɛ nyɔ mi nina mi,

Benɛ mahe vii nɔ nimli a nɔ

Nɛ a hwɔɔ si ngɛ a sahi a nɔ ɔ.

16 E bliɔ a tue

Nɛ e nyɛɔ e blɔ tsɔɔmi ɔmɛ a nɔ* kɛ woɔ mi,

17 Konɛ e kɛ ha nɛ adesa nɛ kpa yayami peemi

Nɛ e kɛ bu nɔmlɔ he konɛ e ko wo e he nɔ.

18 Mawu ha we nɛ e klaa* nɛ ya muɔ mi,*

E buɔ e wami he konɛ klaate* nɛ ko kpata e hɛ mi.

19 Adesa ma nyɛ maa kase nɔ́ ko ke e ngɛ yeyee he nue benɛ e hwɔɔ si ngɛ e sa nɔ

Kɛ jehanɛ ɔ se hu, ke e wuhi a mi ngɛ lɛ kpee be fɛɛ be ɔ,

20 Enɛ ɔ haa nɛ e* nyɛɔ niye ní,

Nɛ e* kuaa niye ní nɛ́ e suɔ wawɛɛ ɔ po.

21 E tãã he lo kanyakanya nɛ hí hyɛmi,

Nɛ e wuhi nɛ a nɛ be ko nɛ be ɔ jeɔ kpo.*

22 E klaa* hɛɔ kɛ suɔ muɔ ɔ he;*

E wami hɛɔ kɛ suɔ nihi nɛ a kɛ gbenɔ baa a he.

23 Ke e ngɛ tsɔlɔ* ko,

Nɔ nɛ fĩɔ nɔ se ngɛ nihi akpehi a kpɛti,

Nɛ́ e maa tsɔɔ adesa nɔ́ nɛ da a,

24 Lɛɛ Mawu dloo lɛ nɛ e de ke,

‘Ko há nɛ e ya muɔ mi!*

25 Ha nɛ e he lo ɔ nɛ pee tlotlootlo* pe jokuɛyo nɔ́;

Ha nɛ e ná he wami ekohu kaa bɔ nɛ e ná ngɛ e nihe mi ɔ.

26 E ma kpa Mawu pɛɛ, nɛ e maa kplɛɛ e nɔ,

E maa na Mawu hɛ mi nɛ e bua maa jɔ wawɛɛ,

Nɛ e kɛ e dami ɔ maa kpale ha nɔmlɔ adesa ekohu.

27 Jamɛ a nɔ ɔ ma de* nihi ke,

‘I pee yayami, nɛ nɔ́ nɛ da a, i kpɛ̃ lɛ,

Se i nɛ mi nɔ́.*

28 E kpɔ̃ ye klaa* konɛ e ko ya muɔ mi,*

Nɛ ye wami maa na la.’

29 Niinɛ, Mawu peeɔ ní nɛ ɔmɛ

Si enyɔ kɛ si etɛ kɛ haa nɔmlɔ,

30 Konɛ e kɛ je lɛ* kɛ je muɔ mi,*

Bɔ nɛ pee nɛ wami la a nɛ kpɛ kɛ ha lɛ.

33 Ke o be nɔ́ ko nɛ o ma de ɔ, lɛɛ bu mi tue;

Pee dii, nɛ ma tsɔɔ mo juɛmi.”

 2 “Nyɛ nihi nɛ nyɛ ngɛ juɛmi, nyɛɛ bu ye munyu ɔmɛ tue;

Nyɛ nihi nɛ nyɛ le ní wawɛɛ, nyɛɛ bu mi tue.

 3 Ejakaa tue lɛ a kɛ buɔ munyu tue saminya

Kaa bɔ nɛ a kɛ lilɛ hu saa niye ní nya hyɛɔ ɔ.

 4 Nyɛ ha nɛ wɔ nitsɛmɛ wa hla mi nɛ waa hyɛ nɔ́ nɛ da;

Nyɛ ha nɛ wɔ nitsɛmɛ waa mwɔ wa yi mi kpɔ ngɛ nɔ́ nɛ da he.

 5 Ejakaa Hiob de ke, ‘Ye nɔ́ da,

Se Mawu yi dami sane ha mi.

 7 Mɛnɔ po lɛ ngɛ kaa Hiob,

Nɛ́ e nuɔ jɛmi munyuhi kaa a nuɔ nyu ɔ?

 8 E kɛ yayami peeli bɔɔ

Nɛ e kɛ yiwutsotsɛmɛ peeɔ kake.

 9 Ejakaa e de ke, ‘Ke adesa ko ngɛ mɔde bɔe kaa e maa sa Mawu hɛ mi ɔ

E be he se ko náe.’

E be bae kɔkɔɔkɔ kaa anɔkuale Mawu ɔ maa pee yiwutso ní,

Aloo kaa Ope ɔ maa pee nɔ́ nɛ dɛ blɔ!

11 Ejakaa nɔ́ nɛ adesa tsuɔ ɔ, lɔ ɔ nɔ lɛ e maa da kɛ wo lɛ hiɔ

Nɛ e maa ngɔ nɔ́ nɛ jeɔ e ní peepee ɔ mi kɛ baa a kɛ ba e nɔ.

12 Ngɛ anɔkuale mi ɔ, Mawu pee we yiwutso ní;

Ope ɔ plɛ we dami sane hɛ mi kɛ bu si.

13 Mɛnɔ ngɔ zugba kɛ wo e dɛ,

Nɛ mɛnɔ lɛ hla lɛ kɛ da je ɔ tsuo nya?*

14 Ke e ngɔ e juɛmi* kɛ ma adesahi a nɔ,

Ke e bua a wami kɛ a mumi nya kɛ ha e he ɔ,

15 Nimli tsuo* a hɛ mi ma kpata,

Nɛ adesahi maa kpale kɛ ho zu mi ya ekohu.

16 Lɔ ɔ he ɔ, ke o ngɛ nɔ́ sisi numi ɔ, lɛɛ moo bu nɔ́ nɛ ɔ tue;

Moo bu nɔ́ nɛ ma de ɔ tue saminya.

17 Anɛ e sa kaa nɔ ko nɛ e hiɔ dami sane yemi nɛ e ye nihi a nɔ lo,

Aloo o maa bu nɔ nɛ he wa nɛ e da a fɔ lo?

19 Nɔ ko ngɛ nɛ́ e hyɛ we ganɔhi a hɛ mi

Nɛ e bui niatsɛmɛ pe ohiatsɛmɛ,*

Ejakaa e nine nya ní tsumi ji mɛ tsuo.

20 A gboɔ tlukaa nyɔ mi kpɛti;

A he doɔ blibliibli kɛkɛ a gbo;

Nihi nɛ a he wa po, a jeɔ mɛ kɛ je ɔ, se pi adesa ninehi nɛ a kɛ jeɔ mɛ.

21 Ejakaa Mawu hɛngmɛ ngɛ nɔmlɔ adesa blɔ ɔmɛ a nɔ,

Nɛ e naa adesa nane hiamihi tsuo.

22 Diblii aloo diblii kpii ko be

Nɛ́ yayami peeli ma nyɛ maa laa a he ngɛ mi.

23 Ejakaa Mawu tui be pɔtɛɛ kɛ ha adesa ko

Nɛ e ba e ngɔ konɛ e kojo lɛ.

24 E kuɔ nihi nɛ a he wa a nɛ́ e he hia we nɛ e hla a sane ko mi

Nɛ e ngɔɔ ni kpahi kɛ daa a nane mi.

25 Ejakaa e le nɔ́ nɛ a ngɛ pee ɔ;

E yeɔ a nɔ kunimi nyɔ mi, nɛ a hɛ mi kpataa.

26 E fiaa mɛ ní ngɛ a yiwutso ɔ he je,

Ngɛ he nɛ nɔ fɛɛ nɔ maa na mɛ ngɛ.

27 Ejakaa a kpa e se nyɛɛmi

Nɛ a be bumi kɛ ha e blɔ ɔmɛ kulaa;

28 A haa nɛ ohiatsɛmɛ foɔ ya kɛ tsɛɔ lɛ,

Nɛ e nuɔ nihi nɛ a be yemi kɛ bualɔ ko ɔ a ya fomi.

Ke e ngɔ e hɛ mi kɛ laa je ma ko aloo nɔmlɔ ko jio, jã nɔuu,

30 Bɔ nɛ pee nɛ nɔ ko nɛ li Mawu ɔ* nɛ ko ye nɔ

Aloo e ko tsɔ̃ nihi klama.

31 Ke o hyɛ ɔ, nɔ ko ma nyɛ ma de Mawu ke,

‘I pee we yayami ko, se kɛ̃ ɔ, a gbla ye tue lo’?

32 Ke o hyɛ ɔ, nɔ ko ma nyɛ ma de ke, ‘Moo tsɔɔ mi nɔ́ nɛ e sa kaa i ko na se i nɛ ɔ;

Nɛ ke i pee nɔ́ ko nɛ hí ɔ, i be pee hu lo’?

34 Nyumuhi nɛ a ngɛ nɔ́ sisi numi* kɛ juɛmi nɛ́ a ngɛ mi tue bue ɔ

Ma de mi ke,

35 ‘Hiob li nɔ́ nɛ e ngɛ dee ɔ,

Nɛ nile be e munyu ɔmɛ a mi.’

36 Ha nɛ a ka Hiob* kɛ ya si nyagbe

Ejakaa hetohi nɛ e haa a ngɛ kaa yiwutsotsɛmɛ a munyuhi!

37 E ngɔɔ atuã tsɔmi kɛ piɛɛɔ e yayami ɔ he;

E gbɔɔ e dɛ mi ngɛ wa hɛ mi kɛ yeɔ wa he fɛu

Nɛ e tuɔ munyu babauu kɛ siɔ anɔkuale Mawu ɔ!”

 2 Anɛ o ngɛ nɔ mi mami wawɛɛ kaa o da hluu nɛ o ma de po ke,

‘I da pe Mawu lo’?

 4 Ma ha mo heto

Nɛ ma o huɛmɛ ɔmɛ nɛ a piɛɛ o he ɔ hu heto.

 5 Mo wo o yi nɔ nɛ o hyɛ hiɔwe,

Moo hyɛ bɔku ɔmɛ nɛ a ngɛ o yi nɔ tsitsaa a.

 7 Ke dalɔ ji mo ɔ, mɛni o haa lɛ;

Mɛni lɛ e náa kɛ jeɔ o dɛ?

 8 Ke o pee yayami ɔ, o nyɛmi nɔmlɔ adesa lɛ naa nɔ,

Nɛ ke o peeɔ nɔ́ nɛ da a, nɔmlɔ bi lɛ náa he se.

 9 Ke a ngɛ nimli adesahi yi mi wae ɔ, a kpaa ngmlaa kɛ biɔ yemi kɛ buami;

A foɔ ya konɛ a je mɛ kɛ je nihi nɛ a he wa a, a nɔ yemi sisi.*

10 Se nɔ ko bi we ke, ‘Jije Mawu, ye Bɔlɔ* Ngua a,

Nɔ nɛ haa nɛ a laa nyɔ mi ɔ ngɛ?’

11 E tsɔɔ wɔ ní pe lohwe awi yeli nɛ a ngɛ zugba a nɔ ɔ,

Nɛ e haa nɛ wa leɔ ní pe lohwe pɛlitsɛmɛ nɛ a ngɛ hiɔwe ɔ.

12 Nihi kpaa ngmlaa kɛ biɔ yemi kɛ buami, se e pui a nya mi,

Ngɛ yiwutsotsɛmɛ a he nɔ womi ɔ he je.

13 Niinɛ, Mawu bui yaka ngmlaa* tue;

Ope ɔ kɛ e juɛmi yɛ nɔ po.

15 Ejakaa e kɛ abofu gblɛ o tue;

Nɛ e kɛ e juɛmi mɛ bɔ nɛ o tuɔ munyu basabasa haa nɔ.

16 Hiob bliɔ e nya mi yaka gu;

E tuɔ munyu fuu nɛ́ e li nɔ́ nɛ e ngɛ dee ɔ.

 2 “Moo to o tsui si ha mi bɔɔ nɛ ma tsɔɔ mo níhi a nya,

Ejakaa loloolo ɔ, i ngɛ níhi fuu nɛ ma de mo ngɛ Mawu nane mi.

 3 Ma tu nɔ́ nɛ i le ɔ he munyu fitsofitso,

Nɛ ma bu nɔ nɛ pee mi ɔ dalɔ.

 4 Ngɛ anɔkuale mi ɔ, ye munyu ɔmɛ pi lakpa;

Nɔ nɛ ye mluku ngɛ nile mi ɔ ngɛ o hɛ mi ngɛ hiɛ ɔ.

 5 Niinɛ, Mawu kle nɛ e kua we nɔ ko;

E nɔ́ sisi numi* mi kuɔ.

 6 E be yayami peeli a yi baae,

Mohu ɔ, e maa ye nihi nɛ a ngɛ nɔ́ nae ɔ a sane ha mɛ.

 7 E je we e hɛngmɛ ngɛ dali a he kɔkɔɔkɔ;

E haa nɛ a kɛ matsɛmɛ hiɔ matsɛ sɛhi a nɔ,* nɛ e woɔ a hɛ mi nyami kɛ yaa neneene.

 8 Se ke a wo mɛ kɔsɔkɔsɔhi

Nɛ amanehlu kpa a nu mɛ ɔ,

 9 E jeɔ nɔ́ nɛ a pee ɔ kpo kɛ tsɔɔ mɛ,

E tsɔɔ mɛ kaa a tɔ̃, akɛnɛ a woɔ a he nɔ ɔ he je.

10 E bliɔ a tue konɛ e dla mɛ

Nɛ e deɔ mɛ ke a yu a he ngɛ yayami peemi he.

11 Ke a bu lɛ tue nɛ a sɔmɔ lɛ ɔ,

A maa ye a wami be ɔ ngɛ kplɔkɔtɔ mi,

Nɛ a wami si himi maa pee bua jɔmi.

12 Se ke a bui tue ɔ, klaate* ma kpata a hɛ mi

Nɛ a ma gbo nɛ́ a li nɔ́ ko nɔ́ ko.

14 A kɛ nyumuhi nɛ a poɔ tuutuu ɔ* lɛ bɔɔ be fɛɛ be,*

Nɛ a gboɔ* ngɛ a nihe mi.

15 Mawu jeɔ nihi nɛ a ngɛ nɔ́ nae ɔ kɛ jeɔ a nɔ́ nami ɔ mi;

E bliɔ a tue ɔmɛ ke nihi ngɛ mɛ yi mi wae ɔ.

16 E jeɔ mo kɛ jeɔ haomi nya

Kɛ yaa he ko nɛ e kle nɛ́ nɔ́ ko nɔ́ ko be lejɛ ɔ nɛ e maa tsi mo blɔ,

Nɛ e kɛ niye ní kpakpahi maa o we okplɔɔ ɔ nɔ kaa bua womi nɔ́.

17 Kɛkɛ ɔ, o tsui maa nɔ o mi ngɛ kojomi nɛ a kɛ ba yiwutsotsɛmɛ a nɔ ɔ he,

Ke a kojo mɛ nɛ a ye dami sane ɔ.

18 Se o hyɛ nɛ hi nɛ abofu nɛ nya wa nɛ ko ha nɛ o ye nɔ ko awi,*

Nɛ ko ha nɛ nyɔ mi ní ngua hemi nɛ sisi mo.

19 Anɛ o ma kpa ngmlaa kɛ bi yemi kɛ buami lo

Aloo o mɔde bɔmi wawɛɛ ɔ eko ma nyɛ maa bu o he kɛ je haomi he lo?

20 Ko de ke o ná jinɛ je jɔ,

Benɛ nihi laa kɛ jeɔ a sihi he ɔ.

21 O hyɛ nɛ hi nɛ o ko pee yayami,

Moo hla amanehlu mohu pe nɛ o maa pee yayami.

22 Hyɛ! A wo Mawu hɛ mi nyami ngɛ e he wami ɔ he je;

Tsɔɔlɔ te nɛɛ lɛ ngɛ kaa lɛ?

23 Mɛnɔ lɛ e tsɔɔ lɛ blɔ*

Aloo e de lɛ hyɛ ke, ‘Nɔ́ nɛ o pee ɔ dɛ’?

24 Mo kai nɛ o je e nine nya ní tsumi ɔmɛ,

Nɛ́ nihi laa la ngɛ he ɔ a yi.

25 Adesahi tsuo na,

Nɔmlɔ adesa hyɛɔ kɛ jeɔ tsitsaa.

26 Ee, Mawu he kle pe bɔ nɛ wa ma nyɛ maa le;

Jeha abɔ nɛ e ye ɔ hu, wa juɛmi kpi he.*

27 Mawu gblaa nyu nɛ dɛɔ ɔ kɛ pueɔ si ɔ kɛ yaa hiɔwe;

E haa nɛ e plɛɔ peeɔ bɔkuhi nɛ́ nyu ngɛ a mi;

28 Kɛkɛ ɔ, bɔku ɔmɛ plɛɔ nyu ɔ kɛ pueɔ si;

Nɛ e nɛɔ kɛ pueɔ adesahi a nɔ.

29 Anɛ nɔ ko ma nyɛ maa nu bɔ nɛ bɔku haa si ha,

Kɛ bɔ nɛ hiɔwe siɔ kɛ jeɔ e bo tsu ɔ* mi ha a sisi lo?

30 Hyɛ bɔ nɛ e ha nɛ oslabai* ha bo tsu ɔmɛ a nɔ ha

Nɛ hyɛ bɔ nɛ e ha wo ɔ sisi ɔ* ha.

31 E guɔ enɛ ɔmɛ a nɔ kɛ haa nɛ adesahi hiɔ wami mi;*

E haa mɛ niye ní babauu.

32 E kɛ e nine haa oslabai ɔ nɔ,

Nɛ e tsɔɔ lɛ he nɛ e gba kɛ ya.

33 Hiɔwe simi tuɔ munyu kɛ kɔɔ e he,

Lohwe ɔmɛ po haa nɛ wa leɔ nɔ* nɛ ma a.

37 “Amlɔ nɛ ɔ ye tsui ngɛ sie

Nɛ e ngɛ tuue kɛ ngɛ e blɔ he jee.

 2 Nyɛɛ bu e gbi nɛ ngɛ pɛe wawɛɛ ɔ

Kɛ oslabai nɛ ngɛ kpo jee ngɛ e nya mi ɔ tue saminya.

 3 E ngmɛɔ he kɛ jeɔ hiɔwe

Nɛ e tsɔɔ e we oslabai ɔ kɛ yaa jeɔ nyagbe he ɔ tsuo.

 4 Lɔ ɔ se ɔ, a nuɔ pɛmi ko nɛ nya wa wawɛɛ he;

E siɔ kɛ gbi nɛ nya wa,

Nɛ ke e ngɛ munyu tue ɔ, oslabai ɔ yaa nɔ nɛ e gbaa.

 5 Ke Mawu wo gbi ɔ, e ngɛ nyakpɛ wawɛɛ;

E peeɔ ní nguanguahi nɛ wa juɛmi kpi he.

 7 Mawu haa nɛ adesahi kpaa ní tsumihi tsuo nɛ a ngɛ tsue ɔ*

Konɛ nɔmlɔ adesa nɛ le e* ní tsumi ɔmɛ.

 8 Lohwe awi yeli ya sɛɔ a muɔhi a mi

Nɛ a hiɔ a hi he ɔmɛ.

 9 Ahumi fiaa kɛ jeɔ lɛ nitsɛ e tsu ɔ mi,

Nɛ fĩɛ hu jeɔ yiti je kɔɔhiɔ ɔ mi kɛ baa.

10 Mumu nɛ Mawu woɔ ɔ haa nɛ nyu tɛ baa,

Nɛ e haa nɛ nyu ɔmɛ wluaa gaganii.

11 Ee, e haa nɛ bɔku ɔmɛ a mi jiɔ kɛ nyu;

E gbɛɔ e we oslabai ɔ kɛ woɔ bɔku ɔmɛ a mi;

12 A bɔleɔ si ngɛ he nɛ e tsɔɔ mɛ blɔ ke a ya a;

Nɛ a yeɔ níhi tsuo nɛ e fã mɛ ɔ nɔ ngɛ zugba a nɔ tsuo.*

13 Ke ji e kɛ maa gbla nihi a tue jio,* e kɛ maa pee zugba a saminya jio

Aloo e kɛ ma je e suɔmi nɛ se pui ɔ kpo jio ɔ, e haa nɛ e baa mi jã.

14 Hiob, bu tue;

Pee dii, nɛ o susu Mawu nyakpɛ ní tsumi ɔmɛ a he.

15 Anɛ o le bɔ nɛ Mawu kudɔɔ* bɔku ɔmɛ

Kɛ bɔ nɛ e haa nɛ oslabai gbaa kɛ jeɔ e bɔku ɔ mi ha a lo?

17 Mɛni he je nɛ o tade ɔ mi dɔ la

Be mi nɛ woyi je kɔɔhiɔ ɔ ha nɛ zugba a nɔ jɔ dii ɔ?

18 Anɛ o kɛ lɛ ma nyɛ maa gbla hiɔwe ɔ mi

Nɛ́ e pee kaa dade ahuhuɛ lo?

19 Moo tsɔɔ wɔ nɔ́ nɛ wa de lɛ;

Wa be nyɛe ma ha heto ejakaa wa ngɛ diblii mi.

21 E ngɛ mi kaa la a ngɛ kpɛe ngɛ hiɔwe mohu lɛɛ,

Se a nyɛ we nɛ a na la a,*

Kɛ ya si be nɛ kɔɔhiɔ muɔɔ bɔku ɔmɛ kɛ ho.

22 Hɛ mi nyami nɛ kpɛɔ kaa sika tsu jeɔ yiti je kɛ baa;

Mawu agboje ɔ ngɛ nyakpɛ.

23 Wa be nyɛe maa nu Ope ɔ sisi kɔkɔɔkɔ;

E ngɛ he wami wawɛɛ,

E yeɔ dami sane be fɛɛ be nɛ e dami ní peemi hiɛ babauu.

 2 Mɛnɔ ji nɛ ɔ nɛ e ngɛ ye yi mi tomi ɔ nya tsie

Nɛ e ngɛ munyuhi nɛ nile be mi tue ɔ?

 3 I kpa mo pɛɛ, dla o he nɛ o da si kaa nyumu;

Ma bi mo sane nɛ́ o ha mi heto.

 5 Mɛnɔ lɛ tsɔɔ bɔ nɛ je ɔ klemi maa hi ha, anɛ o le lo,

Aloo mɛnɔ lɛ ngɔ kpa kɛ susu?

 6 Mɛni nɔ a fia e sisi tomi ɔmɛ kɛ ma,

Aloo mɛnɔ lɛ to e kɔ̃ nya tɛ ɔ,

 7 Benɛ mɔtu dodoe ɔmɛ tsuo nya wawɛɛ,

Nɛ Mawu bimɛ ɔmɛ* tsuo kɛ bua jɔmi he ose ɔ?

 8 Mɛnɔ lɛ ngɔ sinya kɛ tsi wo ɔ blɔ

Benɛ e hia kɛ je fɔmi kotoku mi kɛ ma a,

 9 Benɛ i ngɔ bɔkuhi kɛ ha e he kaa tade

Nɛ́ i kɛ diblii kpii blaa lɛ ɔ,

10 Benɛ i po huzu kɛ wo e he

Nɛ́ i ngɔ sinya kɛ sinya se lami dadehi kɛ to a blɔ he,

11 Nɛ́ i de ke, ‘Moo fia kɛ ba su hiɛ ɔ pɛ, koo be he;

Hiɛ ɔ ji he nɛ o we oslɔke nguangua amɛ ma ta a’?

12 Anɛ o fã hyɛ* ke je nɛ na lo

Aloo o ha nɛ makɛ le e blɔ he lo,

13 Konɛ e nu zugba a nyagbe he ɔmɛ

Nɛ́ e huanya yiwutsotsɛmɛ kɛ je nɔ lo?

14 Zugba a tsakeɔ kaa zu ngɛ nɔ́ nya sɔumi nɔ́ sisi,

Nɛ níhi nɛ ngɛ nɔ ɔ tsuo jeɔ kpo heii kaa tade nɛ ngɛ fɛu.

15 A kpɔ̃ɔ yiwutsotsɛmɛ a kane ɔ ngɛ a dɛ,

Nɛ a kuɔɔ a nine nɛ a wo nɔ ɔ.

16 Anɛ o kple kɛ ya hehi nɛ wo ɔ jeɔ kɛ baa a hyɛ lo

Aloo o ya be ngɛ hehi nɛ nyuhi nɛ a mi kuɔ ɔ ngɛ ɔ hyɛ lo?

17 Anɛ a je gbenɔ agbo ɔmɛ kɛ tsɔɔ mo hyɛ lo?

Aloo o na diblii kpii agbo ɔmɛ* hyɛ lo?

Nɛ diblii hu, jije e hi he ngɛ,

20 Nɛ́ o maa ngɔ lɛ kɛ ya e zugba kpɔ ɔ mi

Nɛ́ o nu blɔhi nɛ yaa e hi he ɔ sisi ɔ?

21 I he ye kaa o le ejakaa jamɛ a be ɔ mi ɔ a fɔ mo

Nɛ jeha* abɔ nɛ o ye ɔ hiɛ babauu?

22 Anɛ o ya hehi nɛ a toɔ snoo ngɛ ɔ hyɛ lo?

Aloo o na hehi nɛ a toɔ gbiɛ ngo ngu ngɛ ɔ lo?

23 I ngɔ mɛ kɛ to kɛ ha haomi be,

Kɛ jehanɛ hu, kɛ ha ta.

24 Jije la* jeɔ kɛ gbɛɔ fĩaa,

Nɛ jije puje he kɔɔhiɔ jeɔ kɛ fiaa ngɛ zugba a nɔ?

25 Mɛnɔ lɛ gba dɔ kɛ ha nyu kpekpemi ɔ

Nɛ e gba blɔ kɛ ha oslabai kɛ hiɔmi nɛ nya wa,

26 Konɛ e kɛ ha nɛ hiɔmi nɛ e nɛ ngɛ he nɛ nɔmlɔ ko be,

Kɛ jehanɛ hu, ngɛ nga nɔ he nɛ adesa ko be,

27 Konɛ e ha nɛ zugba nɛ e puɛ kulaa a nɛ pee zugba kpakpa

Nɛ́ e ha nɛ ngahi nɛ a puɛ ɔ?

28 Anɛ hiɔmi ngɛ tsɛ lo,

Nɛ bɔ́ hu, mɛnɔ ji e tsɛ?

29 Mɛnɔ fɔmi kotoku mi lɛ nyu tɛ je kɛ ba,

Nɛ mɛnɔ lɛ fɔ snoo* nɛ ngɛ hiɔwe ɔ

30 Benɛ nyu ɔmɛ a hɛ mi wlua kaa tɛ,

Nɛ nyuhi nɛ a mi kuɔ ɔ a hɛ mi wlua gaganii ɔ?

31 O ma nyɛ maa fĩ Kima dodoehi a kuu* ɔ kpa amɛ lo

Aloo o ma nyɛ maa pɛne Kesil dodoehi a kuu* ɔ kpa amɛ lo?

32 Anɛ o ma nyɛ maa nyɛɛ dodoehi a kuu* hɛ mi kɛ je kpo ngɛ be nɛ sa mi lo

Aloo o ma nyɛ maa tsɔɔ Ash dodoehi a kuu* ɔ kɛ e bimɛ ɔmɛ blɔ lo?

33 Anɛ o le mlaahi nɛ kudɔɔ hiɔwe ɔ lo,

Aloo o ma nyɛ ma ha nɛ jamɛ a mlaa amɛ* nɛ a tsu ní ngɛ zugba a nɔ lo?

34 Anɛ o ma nyɛ ma fã bɔku ɔmɛ

Konɛ nyu kpekpemi nɛ ba ha o nɔ lo?

36 Mɛnɔ lɛ ngɔ juɛmi kɛ wo bɔku ɔmɛ a mi*

Aloo e ha nyakpɛ níhi nɛ a ngɛ hiɔwe ɔ* nɔ́ sisi numi?

37 Mɛnɔ lɛ e le ní saminya nɛ e ma nyɛ maa kane bɔku ɔmɛ,

Aloo mɛnɔ ma nyɛ ma plɛ nyu buɛhi nɛ a ngɛ hiɔwe ɔ a nya kɛ ká si

38 Benɛ bunyuku ɔ pee mɔsɔ

Nɛ́ zu kpɔ longolongohi nɛ a ngɛ zugba a nɔ ɔ mɛtɛ a sibi a he ɔ?

39 Anɛ o ma nyɛ ma hla niye ní ha jata

Aloo o ma nyɛ ma ha jata wawi niye ní nɛ a tɔ,

40 Benɛ a buu si ngɛ a hi he ɔmɛ

Aloo benɛ a wo ka ngɛ a muɔ ɔmɛ a mi ɔ?

41 Mɛnɔ lɛ toɔ niye ní he blɔ nya kɛ haa kuakualabite

Ke e bimɛ fo ya kɛ bi Mawu yemi kɛ buami

Nɛ a ngɛ si kpae akɛnɛ a nɛ nɔ́ ko nɛ a maa ye ɔ?

 3 A buɔ si ke a ngɛ fɔe,

Nɛ a kɔɔmi ɔ se poɔ.

 4 A bimɛ ɔmɛ waa ngɛ nga a nɔ nɛ a he ba waa;

A jeɔ nɛ a kpale we a se kɛ bɛ hu.

 5 Mɛnɔ lɛ ha nɛ nga mi teji ye e he ɔ,

Nɛ mɛnɔ lɛ pɛne nga mi teji kpa amɛ ɔ?

 6 I ngɔ nga kplanaa a kɛ pee e we mi

Nɛ i ngɔ ngo zugba a kɛ pee e hi he.

 7 E sume ma a mi he nɛ huhui ngɛ;

E nui nɔ nɛ kpakaa lohwehi ɔ ngmlaa.

 8 E kpaa si ngɛ yoku ɔmɛ a nɔ kɛ hlaa niye ní,

E hlaa nga mumu fɛɛ nga mumu.

10 Anɛ o ma nyɛ maa wo nga mi na ku kpa nɛ́ e ya gba nyu dɔ ngɛ o ngmɔ mi ha mo lo,

Aloo e maa nyɛɛ o se kɛ ya hu dɔgba a mi lo?

11 Anɛ o maa ngɔ o hɛ kɛ fɔ e he wami ngua a nɔ

Konɛ o ha nɛ e tsu o ní tsumi kpakpataa a ha mo lo?

12 Anɛ o maa ngɔ o hɛ kɛ fɔ e nɔ kaa e ngɔ o ní nɛ o kpa a* kɛ ba we mi ha mo,

Nɛ́ e bua nya kɛ ya o ngma fiaami he ɔ lo?

13 Duguma kɛ bua jɔmi fiaa e pɛli ɔmɛ,

Se anɛ a ma nyɛ nɛ a ngɔ e pɛli ɔmɛ kɛ to aklawa pɛlihi a he lo?

14 Ejakaa e jeɔ e hlui ɔmɛ a he ngɛ zugba,

Nɛ e haa nɛ a he dɔɔ la ngɛ zu mi.

15 E hɛ jeɔ nɔ kaa nane ko ma nyɛ maa ywia mɛ

Loo lohwe awi yelɔ ko ma ba naa a nɔ.

16 E waa e bimɛ ɔmɛ yi mi kaa nɔ́ nɛ pi e bimɛ ji mɛ;

E hɛwi lɛ kaa e kɔɔmi ɔ maa pee yaka.

17 Ejakaa Mawu ha nɛ juɛmi bɔ lɛ*

Nɛ e ha we lɛ nɔ́ sisi numi ko kulaa.

18 Se ke e te da si nɛ e fia e pɛli ɔmɛ a mi ɔ,

E muɔɔ okpɔngɔ kɛ e nɔ hilɔ ɔ.

21 E siɔ si glɛi glɛi glɛi ngɛ dɔgba a mi nɛ e bua jɔɔ ngɛ he wami nɛ e ngɛ ɔ he;

E kɛ hɛdɔ gbɔɔ fo kɛ yaa ta.*

23 Kɛ̃ɛ̃ mi bi gbaja a hii hosoe ngɛ e nɔ,

Akplɔhi hii kpɛe nylamnylam kɛ woɔ lɛ.

24 E kɛ he domi blibliibli saa fo kɛ yaa e hɛ mi,*

Ke e nu titimati* pɛmi he ɔ, e nyɛ we nɛ e daa si dii.*

E nuɔ ta he fu ngɛ tsitsaa

Nɛ e nuɔ tatsɛmɛ a ngmlaa kɛ ose nɛ ngɛ pɛe ngɛ ta mi ɔ.

26 O nɔ́ sisi numi nya lɛ kayo teɔ,

Nɛ e gbɛɔ e pɛli ɔmɛ a mi kɛ yaa woyi je lo?

27 Aloo o fami nya lɛ kɔle teɔ kɛ yaa hiɔwe

Nɛ e peeɔ e tsuhi ngɛ hiɔwe lokoo,

28 Nɛ e hwɔɔ tɛsahi a nɔ ke je jɔ,

Nɛ e hiɔ e he piɛ pomi he ɔ ngɛ tɛsa amɛ a nɔ ɔ lo?*

29 Ke e ngɛ lejɛ ɔ, e hɛngmɛ hyɛɔ nɔ́ kɛ yaa tsitsaa;

Kaa e maa na lohwe ko nɛ e ye lo.

30 E bimɛ ɔmɛ nuɔ muɔ;

Nɛ he fɛɛ he nɛ gbogboe ngɛ ɔ, o maa na lɛ ngɛ lejɛ ɔ.”

 5 I tu munyu si kake, se i be munyu tue hu;

I tu munyu si enyɔ, se i pa be nɔ́ ko dee hu.”

 7 “I kpa mo pɛɛ, dla o he nɛ o da si kaa nyumu;

Ma bi mo sane nɛ́ o ha mi heto.

 9 Anɛ o ngɛ nine nɛ he wa kaa anɔkuale Mawu ɔ nine lo,

Aloo o ma nyɛ maa wo gbi kaa lɛ lo?

10 I kpa mo pɛɛ, moo ngɔ hɛ mi nyami kɛ agboje kɛ dla o he;

Moo ngɔ bumi kɛ anunyami kɛ ha o he.

11 Je abofu nɛ nya wa nɛ ngɛ o mi ɔ tsuo kpo kɛ ba;

Moo hyɛ nɔ fɛɛ nɔ nɛ woɔ e he nɔ ɔ, nɛ o ba lɛ si.

12 Moo hyɛ nɔ fɛɛ nɔ nɛ woɔ e he nɔ ɔ, nɛ o pue e hɛ mi si,

Nɛ́ o naa yiwutsotsɛmɛ a nɔ ngɛ he nɛ a daa si ngɛ ɔ.

13 Moo ngɔ mɛ tsuo kɛ laa ngɛ zu mi;

Moo fĩ mɛ* ngɛ laami he ɔ,

14 Kɛkɛ ɔ, imi nitsɛ po ma kplɛɛ nɔ*

Kaa o hiɔ nine ma nyɛ ma he o yi wami.

16 Hyɛ he wami sɔuu nɛ ngɛ e gbongu ɔmɛ a mi

Kɛ he wami nɛ ngɛ panihi nɛ a ngɛ e mi mi ɔ ha!

17 E haa nɛ e hlemi wluaa gaganii kaa seda tso;

A lo panihi nɛ a ngɛ e fiɔ ɔmɛ a mi ɔ kɛ bla.

18 Akɔblee a kɛ pee e wu ɔmɛ;

Nɛ a kɛ dade pee e nane ɔmɛ.

19 E ye kekleekle blɔ he* ngɛ Mawu nine nya ní tsumi ɔmɛ a kpɛti;

E Bɔlɔ* ɔ pɛ lɛ ma nyɛ maa su e he kɛ e klaate ɔ.

20 Yoku ɔmɛ a nɔ lɛ e náa niye ní ngɛ,

Lejɛ ɔ lɛ lohwe awi yeli tsuo fiɛɔ ngɛ.

21 E buɔ si ngɛ lotus tso ɔmɛ a sisi,

Ngɛ glãhi nɛ a ngɛ hehi nɛ nyu ngɛ ɔ a hɔ̃ ɔ mi.

22 Lotus tso ɔmɛ peeɔ hɔ̃ kɛ haa lɛ,

Nɛ tsohi* nɛ a ngɛ dɔgba a mi ɔ* bɔleɔ lɛ kɛ kpeɔ.

24 Anɛ nɔ ko ma nyɛ maa nu lɛ be mi nɛ e ngɛ nɔ ɔ hyɛe lo,

Aloo mɛnɔ lɛ e kɛ gbowe* ma nyɛ maa gbu e gugwɔ?

41 “Anɛ o ma nyɛ maa ngɔ gbowe kɛ kpa kɛ nu Leviatan* lo

Aloo o kɛ kpa ma nyɛ maa fĩ e lilɛ kɛ muɔ si lo?

 2 Anɛ o ma nyɛ maa wo e gugwɔ mi kpa* lo

Aloo o kɛ gbowe* ma nyɛ maa wo e tsitsa mi lo?

 3 Anɛ e ma kpa mo pɛɛ si abɔ lo,

Aloo e kɛ mo maa tu munyu blɛuu lo?

 4 Anɛ e kɛ mo maa so,

Konɛ o ngɔ lɛ kɛ pee o nyɔguɛ kɛ ya neneene lo?

 5 Anɛ o kɛ lɛ ma fiɛ kaa bɔ nɛ a kɛ lohwe pɛlitsɛ fiɛɔ ɔ lo

Aloo o kɛ kpa maa fĩ lɛ kɛ ha o biyihi tsɔwi ɔmɛ lo?

 7 Anɛ o kɛ akplɔ ma nyɛ maa gbɔɔgbɔɔ e he womi ɔ lo

Aloo o kɛ lo gbemi akplɔhi ma nyɛ maa gbɔɔgbɔɔ e yi lo?

 8 Moo ngɔ o nine kɛ ta e he;

O ma kai ta nɛ ya nɔ ɔ, nɛ o be jã pee hu kɔkɔɔkɔ!

12 Ma ya nɔ ma tu e nanehi,

E he wami ngua a kɛ e nɔmlɔ tso ɔ nɛ a pee lɛ saminyayoo ɔ he munyu.

15 E ngɛ totohi ngɛ e se mi nɛ a to mɛ ngɛ zãhi a mi*

Nɛ a sɔu a nya kɛ bla.

16 A tsa a sibi kpɛkpɛtɛɛ

Bɔ nɛ kɔɔhiɔ po be nyɛe maa gu a kpɛti.

17 A mɛtɛ a sibi a he wawɛɛ;

A du a sibi a he saminya nɛ́ a be nyɛe ma gba a kpɛti.

18 Ke e fli e gugwɔ mi ɔ, e kpɛɔ la,

Nɛ e hɛngmɛhi ngɛ kaa mɔtu la.

19 Oslabai gbami jeɔ e nya mi;

Nɛ la lilɛhi jeɔ kpo ngɛ mi.

20 Lasuku jeɔ kpo ngɛ e gugwɔ mi,

Kaa flɔɔnɔɔ nɛ a kɛ go slɛ la ngɛ mi.

21 Ke e wo mumu ɔ, e haa nɛ hã sɛɔ,*

nɛ la lilɛhi tuɔ kɛ jeɔ e nya mi.

22 He wami ngɛ e kuɛ mi wawɛɛ,

Nihi tsuo nɛ a kɛ lɛ kpeɔ ɔ, gbeye pueɔ a nɔ.

23 E he lo ɔ nɛ kuu kɛ fɔ a sibi a nɔ ɔ mɛtɛ a sibi wawɛɛ;

A he wa wawɛɛ kaa nɔ́ nɛ dade a kɛ pee nɛ́ be hie kpɔmi.

24 E tsui he wa kaa tɛ,

Ee, e he wa kaa wɛ tɛ.

25 Ke e wó e he nɔ ɔ, katsɛmɛ tete po yeɔ gbeye;

Bɔ nɛ e hosoɔ e he ha a, haa nɛ nihi nuɔ sawale.

26 Klaate fɛɛ klaate nɛ maa sa e he ɔ be nyɛe maa pee lɛ nɔ́ ko;

Nɛ akplɔ loo kɛ̃ɛ̃ mi bi loo ta hwumi nɔ́ ko be nyɛe maa pee lɛ nɔ́ ko nɔ́ ko.

27 Dade ngɛ kaa nga ha lɛ,

Nɛ akɔblee hu ngɛ kaa tso nɛ sa kɛ ha lɛ.

28 Kɛ̃ɛ̃ mi bi ko be nyɛe maa wo lɛ fo;

Amlami tɛ ngɛ kaa nga gbigbli kɛ ha lɛ.

29 Tsokpoti ngɛ kaa nga gbigbli ha lɛ,

Nɛ ke e nu akplɔ pɛmi he ɔ, e muɔɔ.

30 Totohi nɛ ngɛ e mi si ɔ ngɛ kaa buɛ kokoehi nɛ a nya ba;

E guɔ mɔsɔ mi nɛ e siɔ okadi ngɛ e se kaa ngma fiaami tso.

31 E haa nɛ nyu nɛ mi kuɔ fiaa kaa nyu ngɛ buɛ mi;

E klɛɔ wo ɔ mi kaa nu buɛ.

33 Nɔ́ ko nɔ́ ko be je nɛ ɔ mi nɛ ngɛ kaa lɛ,

Bɔ nɛ a bɔ lɛ ha a, e yi nɔ́ ko nɔ́ ko gbeye.

 2 “Jehanɛ ɔ lɛɛ, i na kaa o nyɛɔ peeɔ nɔ́ fɛɛ nɔ́

Nɛ nɔ́ ko nɔ́ ko be nɛ o to o yi mi kaa o maa pee nɛ́ o be nyɛe maa pee.

Niinɛ, níhi nɛ i de ɔ, i nui sisi

I tu níhi nɛ a ngɛ nyakpɛ tsɔ kɛ ha mi nɛ́ i li ɔ a he munyu.

 5 Ye tue nu o he sane,

Se amlɔ nɛ ɔ lɛɛ i na mo paa kɛ ye hɛngmɛ.

 6 Enɛ ɔ he je nɛ i kpale ye nya se ngɛ nɔ́ nɛ i de ɔ he

Nɛ i tsake ye tsui ngɛ tabo zu kɛ lazu mi ɔ nɛ.