BƆFO ƆMƐ A NÍ TSUMI

1 Oo Teofilo, ngɛ kekle womi ɔ mi ɔ, i ngma níhi tsuo nɛ Yesu je sisi nɛ e pee, kɛ níhi nɛ e tsɔɔ 2 hluu kɛ ya si ligbi ɔ nɛ a ngɔ lɛ kɛ ho hiɔwe ya a. Loko a maa ngɔ lɛ kɛ ho ɔ, e gu mumi klɔuklɔu ɔ nɔ nɛ e kɛ blɔ tsɔɔmihi ha bɔfo ɔmɛ nɛ e hla a. 3 Benɛ e na amanehlu se ɔ, e gu blɔhi fuu a nɔ kɛ je e he kpo kɛ tsɔɔ mɛ kɛ ma nɔ mi ha mɛ kaa e ngɛ wami mi. A na lɛ ngɛ ligbi 40 ɔ tsuo mi, nɛ e tu Mawu Matsɛ Yemi ɔ he munyu. 4 Benɛ e kɛ mɛ ba kpe ɔ, e fã mɛ ke: “Nyɛ ko je Yerusalɛm, mohu ɔ, nyɛɛ ya nɔ nɛ nyɛɛ mlɛ nɔ́ nɛ Tsɛ ɔ wo he si nɛ nyɛ nu kɛ je ye nya a; 5 ejakaa ngɛ anɔkuale mi ɔ, Yohane ngɔ nyu kɛ baptisi nihi, se nyɛɛ lɛɛ ngɛ ligbi bɔɔ komɛ a se ɔ, a kɛ mumi klɔuklɔu maa baptisi nyɛ.”

6 Enɛ ɔ he ɔ, benɛ a bua a he nya a, a bi lɛ ke: “Nyɔmtsɛ, anɛ o kɛ Matsɛ Yemi ɔ ngɛ Israel bi ɔmɛ hae ekohu ngɛ be nɛ ɔ mi lo?” 7 E de mɛ ke: “Pi nyɛ blɔ nya ji kaa nyɛ maa le be ɔmɛ aloo ligbi ɔmɛ nɛ Tsɛ ɔ to ngɛ lɛ nitsɛ e he wami nya a. 8 Se ke mumi klɔuklɔu ɔ ná ba nyɛ nɔ ɔ, nyɛ ma ná he wami nɛ nyɛ maa pee ye we odasefohi ngɛ Yerusalɛm, kɛ Yudea tsuo, kɛ Samaria, kɛ yaa su zugba a nɔ hehi nɛ a kɛ wawɛɛ ɔ.”* 9 Benɛ e de ní nɛ ɔmɛ se ɔ, a ngɛ lɛ hyɛe, kɛkɛ nɛ a wo e nɔ nɛ bɔku ko ba sa lɛ, nɛ a nɛ lɛ hu. 10 Nɛ benɛ e yaa nɛ a ngɛ hiɔwe hyɛe totooto ɔ, tlukaa a, nyumuhi enyɔ kɛ a he tade hiɔhi ba da si ngɛ a kasa nya 11 nɛ a de mɛ ke: “Galilea nyumuhi, mɛni he je nɛ nyɛ daa si nɛ nyɛ ngɛ hiɔwe hyɛe kikɛ nɛ ɔ? Yesu nɛ ɔ nɛ a ngɔ lɛ kɛ je nyɛ he kɛ ho hiɔwe ya a, blɔ nɔ nɛ e gu kɛ ho hiɔwe ya nɛ nyɛ na lɛ ɔ, jamɛ a blɔ ɔ nɔ nɔuu nɛ e maa gu kɛ ba.”

12 Kɛkɛ nɛ a kpale a se kɛ je yoku ko nɛ a tsɛɔ ke Oliv Yoku ɔ nɔ kɛ ho Yerusalɛm ya. Lejɛ ɔ kɛ Yerusalɛm he kɛ we, maa pee he jɔɔmi ligbi blɔ nyɛɛmi. 13 Benɛ a ya su ɔ, a kuɔ kɛ ya hiɔwe tsu ɔ nɛ a ngɛ mi ɔ mi. Nihi nɛ a ngɛ lejɛ ɔ ji Petro kɛ Yohane kɛ Yakobo kɛ Andrea, Filipo kɛ Toma, Batolomeo kɛ Mateo, Alfeo bi Yakobo, kɛ Simon nɛ ji kãtsɛ ɔ, kɛ Yakobo bi Yudas. 14 Ni nɛ ɔmɛ tsuo, kɛ yi komɛ, kɛ Maria nɛ ji Yesu nyɛ ɔ, kɛ Yesu nyɛminyumu ɔmɛ ngɔ juɛmi kake kɛ hɛɛ sɔlemi mi.

15 Ngɛ jamɛ a ligbi ɔmɛ a mi ɔ, Petro te si kɛ da si ngɛ nyɛmimɛ ɔmɛ a kpɛti (nihi* tsuo nɛ a bua a he nya a, a yibɔ maa pee 120), nɛ e de ke: 16 “Nyumuhi, nyɛmimɛ, mumi klɔuklɔu ɔ gu David nɔ kɛ gba kɛ fɔ si ngɛ Yudas, nɔ nɛ e tsɔɔ nihi blɔ nɛ a ya nu Yesu ɔ he, nɛ e he hia nɛ jamɛ a ngmami ɔ nɛ ba mi. 17 Ejakaa jinɛ e piɛɛ wa he, nɛ e ná he blɔ ngɛ sɔmɔmi nɛ ɔ mi. 18 (Se kikɛmɛ a nyumu nɛ ɔ ngɔ nɔ́ nɛ e dɛ he hiɔwo ɔ kɛ he ngmɔ ko, nɛ benɛ e yaa nɔ si ɔ, e yi ya ma si kekle, nɛ e nɔmlɔ tso ɔ pɛ́* nɛ e mi mi níhi tsuo pã ngɔ pue si. 19 Nihi tsuo nɛ a ngɛ Yerusalɛm ɔ nu nɔ́ nɛ ɔ he, enɛ ɔ he ɔ, a tsɛɔ jamɛ a ngmɔ ɔ ngɛ a gbi ɔ mi ke Akeldama, nɛ e sisi ji, “Muɔ Ngmɔ.”) 20 Ejakaa a ngma ngɛ La Womi ɔ mi ke, ‘Ha nɛ e sihi he ɔ nɛ e pee we doku, nɛ nɔ ko nɔ ko nɛ e ko hi mi,’ nɛ a ngma hu ke, ‘E nɔ hyɛmi ní tsumi ɔ, ha nɛ nɔ kpa nɛ e ngɔ.’ 21 Enɛ ɔ he ɔ, e he ba hia nɛ waa hla nyumuhi nɛ a kɛ wɔ nyɛɛ be mi nɛ Nyɔmtsɛ Yesu ngɛ e ní tsumi ɔmɛ tsuo tsue* ngɛ wa kpɛti ɔ, 22 kɛ je be nɛ Yohane baptisi lɛ ɔ hluu kɛ ya si be nɛ a ngɔ lɛ kɛ je wa he kɛ ho hiɔwe ya a, a kpɛti nɔ kake kɛ piɛɛ wa he. E sa nɛ nɔ ɔ nɛ e pee nɔ ko nɛ e ye Yesu si tlemi ɔ he odase kaa bɔ nɛ wɔ hu wa ye he odase ɔ.”

23 Enɛ ɔ he ɔ, a je nihi enyɔ, mɛ ji Yosɛf nɛ a tsɛɛ lɛ ke Basaba, nɛ e biɛ kpa hu ji Yusto ɔ, kɛ Matias. 24 Enɛ ɔ se ɔ, a sɔle nɛ a de ke : “Oo, Yehowa,* mo nɛ o le nihi tsuo a tsui mi, moo tsɔɔ nyumu enyɔ nɛ ɔmɛ a kpɛti nɔ nɛ o hla 25 konɛ e ngɔ sɔmɔmi kɛ bɔfo ní tsumi nɛ ɔ nɛ Yudas gba kɛ je he nɛ e ya ngɔ lɛ nitsɛ e blɔ ɔ.” 26 Enɛ ɔ he ɔ, a fɔ a nɔ sɔ, nɛ sɔ ɔ ya nɔ Matias nɔ, nɛ a bu* lɛ ngɔ piɛɛ bɔfo 11 ɔmɛ a he.

2 Jehanɛ ɔ, ngɛ ligbi nɛ a yeɔ Pentekoste Gbijlɔ ɔ nɔ ɔ, mɛ tsuo a bua a he nya ngɛ he kake. 2 Si kake too ɔ, nɔ́ ko bɔni pɛmi kɛ je hiɔwe kaa kɔɔhiɔ nɛ nya wa nɛ ngɛ fiae, nɛ e hyi we ɔ mi he nɛ a hii si ngɛ ɔ. 3 Nɛ a na lilɛhi nɛ a ngɛ kaa la, nɛ lilɛ ɔmɛ a mi gbɛ, nɛ kakaaka ba ma a ti nɔ fɛɛ nɔ yi mi, 4 nɛ mumi klɔuklɔu hyi mɛ tsuo tɔ, nɛ a bɔni gbi* slɔɔtoslɔɔtohi tumi kaa bɔ nɛ mumi ɔ ngɔ kɛ wo a nya a.

5 Jamɛ a be ɔ mi ɔ, Yuda bi nɛ a yeɔ Mawu gbeye nɛ a je je ma fɛɛ je ma nɛ e ngɛ hiɔwe sisi ɔ mi ɔ ngɛ Yerusalɛm. 6 Enɛ ɔ he ɔ, benɛ nɔ́ nɛ ɔ pɛ ɔ, nihi babauu ba bua a he nya nɛ a nya kpɛ a he, ejakaa a ti nɔ fɛɛ nɔ nu nɛ a ngɛ lɛ nitsɛ e je gbi tue. 7 Ngɛ anɔkuale mi ɔ, a nya kpɛ a he wawɛɛ nitsɛ, nɛ a de ke: “Nyɛɛ hyɛ ha, anɛ pi Galilea bi ji nihi nɛ a ngɛ munyu tue ɔ lo? 8 Lɛɛ kɛ e pee kɛɛ nɛ wa ti nɔ fɛɛ nɔ ngɛ lɛ nitsɛ e je gbi* nue ɔ? 9 Patia bi, kɛ Media bi, kɛ Elam bi, kɛ nihi nɛ a je Mɛsopotaamia, Yudea, Kapadokia, Ponto, kɛ Asia kpokpa a nɔ, 10 ni komɛ hu je Frigia kɛ Pamfilia, kɛ Ijipt, kɛ Libia kpokpa amɛ nɛ́ a kɛ Kirene he kɛ we ɔmɛ a mi, nibwɔhi hu je Roma kɛ ba, a ti ni komɛ ji Yuda bi nɛ ni komɛ hu ji nihi nɛ a tsake kɛ ba Yuda bi ɔmɛ a jami ɔ mi, 11 Kreta bi, kɛ Arabia bi—wa nu kaa a ngɛ Mawu ní nguangua amɛ a he munyu tue ngɛ wa gbi ɔmɛ a mi.” 12 Ee, mɛ tsuo a nya kpɛ a he nɛ a dɛ yaa, nɛ a ngɛ a sibi bie ke: “Mɛni enɛ ɔ tsɔɔ?” 13 Se ni komɛ ye a he fɛu nɛ a de ke: “A nu wai ngɔngɔɛ* nɛ a tɔ.”

14 Se Petro kɛ Ni Nyɔngma Kɛ Kake ɔmɛ te si kɛ da si, nɛ e kɛ gbi nɛ nya wa tu munyu kɛ tsɔɔ mɛ nɛ e de ke: “Yudea nyumuhi kɛ nyɛ nihi tsuo nɛ nyɛ ngɛ Yerusalɛm, nyɛ ná nɛ nyɛɛ le enɛ ɔ nɛ nyɛɛ bu ye munyu ɔ tue saminya. 15 Ngɛ anɔkuale mi ɔ, pi nɛ nimli nɛ ɔmɛ tɔ dã kaa bɔ nɛ nyɛ susu ɔ, ejakaa ngmlɛfia etɛne* ɔ mi wa ngɛ nɛ ɔ nɛ. 16 Mohu ɔ, enɛ ɔ ji nɔ́ nɛ Mawu de kɛ gu gbalɔ Yoɛl nɔ ɔ nɛ. E de ke: 17 ‘Mawu de ke, “Nɛ ngɛ nyagbe ligbi ɔmɛ a mi ɔ, ma plɛ ye mumi ɔ eko ngɔ pue he lo fɛɛ he lo nɔ, nɛ nyɛ binyumu ɔmɛ kɛ nyɛ biyi ɔmɛ maa gba, nɛ nyɛ nihewi ɔmɛ maa na ninahi, nɛ nyɛ nimowi ɔmɛ maa nla nlamihi, 18 nɛ ngɛ jamɛ a ligbi ɔmɛ a mi ɔ, ma plɛ ye mumi ɔ eko ngɔ pue ye nyɔguɛ ɔmɛ kɛ ye mawayi ɔmɛ a nɔ, nɛ a maa gba. 19 Nɛ ma pee nyakpɛ níhi* ngɛ hiɔwe kɛ okadihi ngɛ zugba a nɔ—muɔ kɛ la kɛ la su ku kpii. 20 Pu ɔ maa tsɔ diblii, nɛ nyɔhiɔ ɔ maa plɛ pee muɔ loko Yehowa* ligbi ngua a nɛ e ngɛ nyami ɔ maa ba. 21 Nɛ nɔ fɛɛ nɔ nɛ e tsɛɔ Yehowa* biɛ ɔ, a ma he e yi wami.”’

22 “Israel nyumuhi, nyɛɛ bu munyu nɛ ɔmɛ tue. Yesu, Nazarɛt no ɔ ji nyumu ko nɛ Mawu je lɛ kpo ngɔ tsɔɔ nyɛ ngɛ ma hɛ mi, kɛ gu he wami ní tsumihi kɛ nyakpɛ níhi* kɛ okadihi nɛ Mawu gu e nɔ kɛ pee ngɛ nyɛ kpɛti ɔ nɔ kaa bɔ nɛ nyɛ nitsɛmɛ nyɛ le ɔ. 23 Mawu suɔmi nya,* kɛ níhi nɛ e le kɛ sɛ hlami ɔ he je nɛ a ngɔ nyumu nɛ ɔ kɛ ha, nɛ nyɛ gu nyumuhi nɛ a yi mlaa nɔ ɔmɛ a nine nɔ, nɛ nyɛ ka lɛ kɛ wo tso he, nɛ nyɛ tane e yi ɔ nɛ. 24 Se Mawu tle lɛ si kɛ je gbeje nɛ e kɛ je lɛ kɛ je gbenɔ piimi ɔ mi,* ejakaa gbenɔ nyɛ we nɛ e tsi e nya. 25 Ejakaa David de ngɛ e he ke: ‘I ngɔ Yehowa* kɛ ma ye hɛ mi be fɛɛ be, ejakaa e ngɛ ye hiɔ nɔ, nɛ i be mimiɛɛe gblegbleegble. 26 Enɛ ɔ ha nɛ ye bua jɔ ngɛ ye tsui mi, nɛ ye lilɛ nya wawɛɛ. Nɛ ma* hi si ngɛ hɛ kɛ nɔ fɔmi mi; 27 ejakaa o be mi* sie ngɛ Gbeje,* nɛ jã kɛ̃ nɛ o be nɔ nɛ e fĩɔ o se ɔ hyɛe nɛ e puɛ. 28 O ha nɛ i le wami blɔ ɔmɛ; o ma ha nɛ ma ná bua jɔmi babauu ngɛ o hɛ mi.’

29 “Nyumuhi, nyɛmimɛ, nyɛ ha nɛ ma tu wekuyi David he munyu faa ngɔ tsɔɔ nyɛ, kaa e gbo nɛ a pu lɛ, nɛ e yɔkɔ ɔ ngɛ wa kpɛti kɛ ba si mwɔnɛ ɔ. 30 Ejakaa gbalɔ ji lɛ, nɛ e le kaa Mawu kã kita kɛ wo lɛ si kaa e ma ha nɛ e nina* amɛ a kpɛti nɔ kake nɛ e hi e matsɛ sɛ ɔ nɔ, 31 e na kɛ sɛ hlami nɛ e tu Kristo ɔ si tlemi ɔ he munyu kaa a si we lɛ ngɛ Gbeje,* nɛ jã kɛ̃ nɛ e he lo ɔ hu puɛ we.* 32 Kikɛmɛ a Yesu nɛ ɔ, Mawu tle lɛ si kɛ je gbeje, nɛ wɔ tsuo wa ji enɛ ɔ he odasefohi. 33 Enɛ ɔ he ɔ, akɛnɛ a wo e nɔ kɛ ya Mawu hiɔ nɔ nɛ e nine su mumi klɔuklɔu ɔ nɛ Tsɛ ɔ wo he si ɔ nɔ he je ɔ, e plɛ nɔ́ nɛ nyɛ na kɛ nɔ́ nɛ nyɛ nu nɛ ɔ ngɔ pue si. 34 Ejakaa David kuɛ kɛ yɛ hiɔwe mohu lɛɛ, se lɛ nitsɛ e de ke, ‘Yehowa* de ye Nyɔmtsɛ ɔ ke: “Hii si ngɛ ye hiɔ nɔ 35 kɛ yaa si ma ngɔ o he nyɛli ɔmɛ kɛ pee nɔ́ nɛ o kɛ o nane maa ma nɔ.”’ 36 Enɛ ɔ he ɔ, nyɛ ha Israel we ɔ tsuo nɛ le ngɛ anɔkuale mi kaa Yesu nɛ ɔ nɛ nyɛ gbe lɛ ngɛ tso nɔ ɔ, Mawu pee lɛ Nyɔmtsɛ kɛ Kristo tsuo.”

37 Jehanɛ ɔ, benɛ a nu nɔ́ nɛ ɔ, e gbɔ a tsui mi, nɛ a bi Petro kɛ bɔfo kpa amɛ ke: “Nyumuhi, nyɛmimɛ, mɛni e sa kaa waa pee?” 38 Petro de mɛ ke: “Nyɛ tsake nyɛ tsui, nɛ nyɛ ti nɔ fɛɛ nɔ nɛ e ha nɛ a baptisi lɛ ngɛ Yesu Kristo biɛ mi konɛ a ngɔ nyɛ he yayamihi kɛ pa nyɛ, nɛ nyɛ ma ná nike ní nɛ a kɛ haa faa nɛ ji mumi klɔuklɔu ɔ. 39 Ejakaa si womi ɔ ngɛ kɛ ha nyɛɛ kɛ nyɛ bimɛ, kɛ nihi tsuo nɛ a ngɛ tsitsaa lokoo, kɛ nihi tsuo nɛ Yehowa* wa Mawu ɔ ma tsɛ mɛ kɛ ba lɛ nitsɛ e ngɔ ɔ.” 40 Nɛ e tu munyu kpahi fuu nɛ e kɛ ye mɛ odase kɛ pi si, nɛ e ya nɔ nɛ e wo mɛ he wami ke: “Nyɛ ha nɛ a he nyɛ yi wami kɛ je yi nɔ kpɛ̃kpɛ̃ɛ nɛ ɔ mi.” 41 Kɛkɛ nɛ a baptisi nihi nɛ a kɛ bua jɔmi kplɛɛ e munyu ɔ nɔ ɔ, nɛ ngɛ jamɛ a ligbi ɔ nɔ ɔ, nihi* maa pee 3,000 ba piɛɛ a he. 42 Nɛ a ya nɔ nɛ a tu a he kɛ ha bɔfo ɔmɛ a tsɔɔmi ɔ, a kɛ a sibi bɔ huɛ,* nɛ a ya nɔ nɛ a ye ní, nɛ a hɛɛ sɔlemi mi.

43 Ngɛ anɔkuale mi ɔ, nɔ fɛɛ nɔ* bɔni gbeye yemi, nɛ bɔfo ɔmɛ bɔni nyakpɛ níhi* babauu kɛ okadihi peemi. 44 Nihi tsuo nɛ a ba he ye ɔ pee kake, nɛ nɔ́ fɛɛ nɔ́ nɛ nɔ ko ngɛ ɔ peeɔ mɛ tsuo a nɔ́, 45 nɛ a juaa níhi nɛ a ngɛ ɔ kɛ a weto níhi, nɛ a gbaa nɔ́ nɛ a náa a kɛ haa mɛ tsuo ngɛ nɔ fɛɛ nɔ hiami níhi a nya. 46 Nɛ daa ligbi ɔ, a kɛ juɛmi kake kpeɔ ngɛ sɔlemi we ɔ, nɛ a yeɔ ní ngɛ we ekpaekpahi a mi, nɛ a kɛ bua jɔmi kɛ tsui nɛ e mi tsɔ gbaa a niye ní ɔmɛ kɛ haa a sibi, 47 nɛ a jeɔ Mawu yi, nɛ ni ɔmɛ tsuo bua jɔ a he. Ngɛ jamɛ a be ɔ mi nɔuu ɔ, daa ligbi ɔ, Yehowa* yaa nɔ nɛ e ngɔɔ nihi nɛ a ngɛ a yi wami hee ɔ kɛ ba piɛɛɔ a he.

3 Jehanɛ ɔ, Petro kɛ Yohane ngɛ kuɔe kɛ yaa sɔlemi we ɔ ngɛ ngmlɛfia nɛ a kɛ sɔleɔ nɛ ji ngmlɛfia nɛɛne* ɔ mi, 2 nɛ nihi tloo nyumu ko nɛ a fɔ lɛ libɔɔ. Daa ligbi ɔ, a kɛ lɛ ya fɔɔ sɔlemi we ɔ sinya nɛ a tsɛɔ ke Saminyayoo ɔ nya konɛ e nyɛ nɛ e kpa nihi nɛ a ngɛ sɔlemi we ɔ sɛe ɔ pɛɛ nɛ a na lɛ mɔbɔ nɛ a ke lɛ ní. 3 Benɛ e hɛ ngmɛ gba Petro kɛ Yohane a nɔ nɛ a yaa sɛ sɔlemi we ɔ, e bɔni mɛ pɛɛ kpami kaa a na lɛ mɔbɔ nɛ a ke lɛ nɔ́ ko. 4 Se Petro kɛ Yohane hyɛ e hɛ mi too nɛ a de lɛ ke: “Hyɛ wɔ.” 5 Enɛ ɔ he ɔ, e hyɛ mɛ gaa, nɛ e ngɛ blɔ hyɛe kaa a ma ha lɛ nɔ́ ko. 6 Se Petro de lɛ ke: “Sika hiɔ kɛ sika tsu lɛɛ i be eko, se nɔ́ nɛ i ngɛ ɔ, lɔ ɔ nɛ ma ngɔ kɛ ha mo. Ngɛ Yesu Kristo, Nazarɛt no ɔ biɛ mi ɔ, moo nyɛɛ!” 7 Kɛkɛ nɛ Petro pɛtɛ e hiɔ nine he nɛ e wo e nɔ kɛ da si. Amlɔ nɔuu nɛ e nane ɔmɛ kɛ e nane si kpawo he ɔmɛ a mi wa; 8 nɛ benɛ e te si kɛ da e nane ɔmɛ a nɔ ɔ, e bɔni nyɛɛmi nɛ e kɛ mɛ ho sɔlemi we ɔ ya, nɛ e ngɛ nyɛɛe nɛ e ngɛ tuue nɛ e ngɛ Mawu yi jee. 9 Nɛ ni ɔmɛ tsuo na lɛ nɛ e ngɛ nyɛɛe nɛ e ngɛ Mawu yi jee. 10 Nɛ a yɔse kaa lɛ ji nyumu ɔ nɛ e hiɔ si ngɛ sɔlemi we ɔ Agbo Saminyayoo ɔ nya nɛ e hii mlɛe kaa nihi maa na lɛ mɔbɔ nɛ́ a ke lɛ ní ɔ nɛ. Enɛ ɔ pee mɛ nyakpɛ wawɛɛ nitsɛ nɛ a bua jɔ ngɛ nɔ́ nɛ ba e nɔ ɔ he.

11 Benɛ nyumu ɔ kpla Petro kɛ Yohane a he loloolo ɔ, ni ɔmɛ tsuo tu fo kɛ ya a ngɔ ngɛ he nɛ a tsɛɔ ke Solomon Ablanaa a nɔ ɔ, nɛ a nya kpɛ a he wawɛɛ nitsɛ. 12 Benɛ Petro na nɔ́ nɛ ɔ, e bi ni ɔmɛ ke: “Israel nyumuhi, mɛni he je nɛ enɛ ɔ pee nyɛ nyakpɛ ɔ, nɛ mɛni he je nɛ nyɛ ngɛ wɔ hyɛe gaa kaa nɔ́ nɛ wɔ nitsɛmɛ wa he wami nya aloo Mawu nɛ wa jaa saminya a he je nɛ wa ha nɛ e nyɛɛ ɔ? 13 Abraham kɛ Isak kɛ Yakɔb a Mawu ɔ, wa nɛmɛ ɔmɛ a Mawu ɔ wo e Sɔmɔlɔ Yesu hɛ mi nyami, nɔ nɛ nyɛ ngɔ lɛ kɛ ha nɛ nyɛ kua lɛ ngɛ Pilato hɛ mi, be mi nɛ Pilato pee e juɛmi po kaa e maa ngmɛɛ e he ɔ. 14 Ee, nyɛ kua jamɛ a nɔ klɔuklɔu kɛ dalɔ ɔ, nɛ nyɛ bi kaa a ngmɛɛ nyumu ko nɛ e ji nɔmlɔ gbelɔ ɔ mohu he ngɔ ha nyɛ, 15 nɛ nyɛ gbe wami Hɛ Mi Nyɛɛlɔ Kpanaa a. Se Mawu tle lɛ si kɛ je gbeje, nɛ wɔ ji anɔkuale munyu nɛ ɔ he odasefohi. 16 Nɛ kɛ gu e biɛ ɔ nɔ, kɛ jehanɛ se hu kɛ gu hemi kɛ yemi nɛ wa ngɛ ngɛ e biɛ ɔ mi ɔ nɔ nɛ nyumu nɛ ɔ nɛ nyɛ ngɛ lɛ hyɛe nɛ nyɛ le lɛ ɔ ba ná he wami ɔ nɛ. Hemi kɛ yemi nɛ wa ná kɛ gu e nɔ ɔ lɛ ha nɛ nyumu nɛ ɔ ná he wami kɛ pi si ngɛ nyɛ tsuo nyɛ hɛ mi ɔ nɛ. 17 Nɛ amlɔ nɛ ɔ, nyɛmimɛ, i le kaa nɔ́ nɛ nyɛ pee ɔ, pe nyɛ li nɛ nyɛ pee kaa bɔ nɛ e ji ngɛ nyɛ nɔ yeli ɔmɛ hu a blɔ fa mi ɔ. 18 Se kɛ gu blɔ nɛ ɔ nɔ ɔ, Mawu ha nɛ níhi nɛ e fia a he adafi kɛ sɛ hlami kɛ gu gbali ɔmɛ tsuo a nya mi munyu nɔ kaa e Kristo ɔ maa na nɔ́ ɔ ba mi.

19 “Enɛ ɔ he ɔ, nyɛ tsake nyɛ tsui, nɛ nyɛɛ kpale nyɛ se konɛ a tsu nyɛ he yayami ɔmɛ, bɔ nɛ pee nɛ he jɔmi behi nɛ́ a je Yehowa nitsɛ* ngɔ kɛ ba, 20 nɛ e maa tsɔ Kristo nɛ a hla lɛ ha nyɛ, nɛ ji Yesu ɔ, kɛ ba. 21 Nɔ nɛ ɔ ji nɔ nɛ e sa kaa hiɔwe nɛ ngɔ lɛ kɛ to lɛ nitsɛ e mi kɛ yaa si be nɛ a maa pee níhi tsuo ehe kaa bɔ nɛ Mawu ngɔ kɛ wo e gbali klɔuklɔu ɔmɛ nɛ a hi si blema a, a nya mi nɛ a de ɔ. 22 Ngɛ anɔkuale mi ɔ, Mose de ke: ‘Yehowa* nyɛ Mawu ɔ ma tle gbalɔ ko nɛ e ngɛ kaa imi si ngɛ nyɛ nyɛmimɛ ɔmɛ a kpɛti kɛ ha nyɛ. E sa nɛ nyɛɛ bu nɔ́ fɛɛ nɔ́ nɛ e ma de nyɛ ɔ tue. 23 Niinɛ, nɔ fɛɛ nɔ* nɛ e be jamɛ a Gbalɔ ɔ tue bue ɔ, a ma kpata e hɛ mi kulaa kɛ je ni ɔmɛ a kpɛti.’ 24 Nɛ gbali ɔmɛ tsuo nɛ a hi si kɛ je Samuɛl nɔ kɛ ya si ni nɛmɛ nɛ a ba ngɛ e se ɔmɛ a nɔ ɔ, nimli abɔ nɛ a tu munyu ɔ, mɛ hu a jaje ligbi nɛ ɔmɛ ngɔ tsɔɔ heii. 25 Nyɛ ji gbali ɔmɛ kɛ somi ɔ nɛ Mawu kɛ nyɛ nɛmɛ ɔmɛ so ɔ bimɛ, benɛ e de Abraham ke: ‘Nɛ kɛ gu o nina a* nɔ ɔ, a maa jɔɔ wekuhi tsuo nɛ a ngɛ zugba a nɔ ɔ.’ 26 Benɛ Mawu tle e Sɔmɔlɔ ɔ si se ɔ, e tsɔ lɛ kɛ ba nyɛ ngɔ kekle, konɛ e jɔɔ nyɛ kɛ gu kpalemi nɛ e maa kpale nyɛ ti nɔ fɛɛ nɔ kɛ je nyɛ ní peepee yayami ɔmɛ a he ɔ nɔ.”

4 Benɛ mɛ ni enyɔ ɔmɛ a kɛ ni ɔmɛ ngɛ munyu tue ɔ, osɔfo nikɔtɔma amɛ, sɔlemi we ɔ nɔ hyɛlɔ ɔ, kɛ Saduki bi ɔmɛ ba a ngɔ. 2 Nimli nɛ ɔmɛ a mi mi fu, ejakaa bɔfo ɔmɛ ngɛ ni ɔmɛ ní tsɔɔe nɛ a ngɛ jajee kɛ ngɛ mɛ tsɔɔe heii kaa a tle Yesu si kɛ je gbeje. 3 Enɛ ɔ he ɔ, a nuu mɛ nɛ a wo mɛ tsu kɛ ya si e nɔ jena, ejakaa jamɛ a be ɔ mi ɔ, je jɔ momo. 4 Se nihi nɛ a bu munyu ɔ tue ɔ, a kpɛti nihi fuu he ye, nɛ nyumu ɔmɛ a yibɔ ba su maa pee 5,000.

5 E nɔ jena a, a nɔ yeli ɔmɛ, nikɔtɔma amɛ, kɛ womi ngmali ɔmɛ ya kpe ngɛ Yerusalɛm, 6 Anas, nɛ ji osɔfo nɔkɔtɔma a, Kayafa, Yohane, Alɛksanda, kɛ osɔfo nɔkɔtɔma a weku li ɔmɛ tsuo hu piɛɛ a he. 7 A ngɔ Petro kɛ Yohane kɛ ba da si ngɛ a kpɛti nɛ a bɔni mɛ sane bimi ke: “Mɛnɔ he wami nya, aloo ngɛ mɛnɔ biɛ mi nɛ nyɛ tsu nɔ́ nɛ ɔ?” 8 Kɛkɛ nɛ Petro nɛ mumi klɔuklɔu ɔ hyi lɛ tɔ ɔ de ke:

“Ma nɔ yeli kɛ nikɔtɔmahi, 9 ke mwɔnɛ ɔ, nyɛ ngɛ wɔ sanehi bie ngɛ kpakpa nɛ a pee kɛ ha libɔɔ nɛ ɔ he, nɛ nyɛ ngɛ hlae nɛ nyɛɛ le nɔ nɛ e ha nɛ nyumu nɛ ɔ ná he wami ɔ, 10 lɛɛ wa suɔ nɛ nyɛ tsuo kɛ Israel bi ɔmɛ tsuo nɛ a le kaa Yesu Kristo, Nazarɛt no ɔ, nɔ nɛ nyɛ gbe lɛ ngɛ tso nɔ, se Mawu tle lɛ si kɛ je gbeje ɔ, e biɛ mi lɛ nyumu nɛ ɔ ná he wami kɛ daa si ngɛ nyɛ hɛ mi ngɛ hiɛ ɔ nɛ. 11 Nɔ nɛ ɔ ji ‘tɛ ɔ nɛ nyɛ nɛ nyɛ ji tsu mali ɔmɛ nyɛ bui lɛ kaa se nami ko ngɛ e he nɛ́ e ba pee kɔ̃ nya tɛ titli* ɔ’ nɛ. 12 Jehanɛ se hu ɔ, yi wami hemi be nɔ kpa ko mi, ejakaa biɛ kpa ko be hiɔwe sisi nɛ a ngɔ kɛ ha ngɛ nimli a kpɛti nɛ e sa kaa a gu nɔ kɛ he wa yi wami.”

13 Jehanɛ ɔ, benɛ a na bɔ nɛ Petro kɛ Yohane a nya mi tsɔ kɛ* ngɛ munyu tue, nɛ a yɔse hu kaa a yɛ sukuu* nɛ a ji nimli guhi kɛkɛ ɔ, e pee mɛ nyakpɛ. Nɛ a kɔ se kaa a kɛ Yesu lɛ hi si. 14 Benɛ a ngɛ nyumu ɔ nɛ a tsa lɛ nɛ e kɛ mɛ daa si ɔ hyɛe ɔ, a li nɔ́ nɛ a ma de. 15 Enɛ ɔ he ɔ, a fã mɛ ke a je kpo ngɛ Sanhedri asa a nɔ kɛ ho kpo ɔ nya ya, nɛ a bɔni nɔ́ nɛ a maa pee mɛ ɔ he susumi, 16 a de ke: “Mɛni e sa kaa waa pee nyumu nɛ ɔmɛ? Ejakaa, ngɛ anɔkuale mi ɔ, a gu a nɔ kɛ pee okadi ngua ko, nɛ nihi tsuo nɛ a ngɛ Yerusalɛm ɔ na, nɛ wa be nyɛe ma kua. 17 Se bɔ nɛ pee nɛ enɛ ɔ nɛ e ko gbɛ kɛ fĩa ni ɔmɛ a kpɛti ɔ, nyɛ ha nɛ waa wo a he gbeye nɛ wa de mɛ ke a kɛ nɔ ko nɛ ko tu munyu ngɛ biɛ nɛ ɔ mi hu.”

18 Kɛkɛ nɛ a tsɛ mɛ kɛ ba, nɛ a wo mɛ mlaa kaa a ko tu munyu ko, nɛ a ko tsɔɔ ní ngɛ Yesu biɛ mi hu. 19 Se Petro kɛ Yohane he nɔ nɛ a de mɛ ke: “Ke e da blɔ ngɛ Mawu hɛ mi kaa a bu nyɛ mohu tue pe Mawu ɔ, nyɛ nitsɛmɛ nyɛɛ kojo. 20 Se wɔɔ lɛɛ wa be nyɛe ma kpa níhi nɛ wa na kɛ níhi nɛ wa nu ɔ he munyu tumi.” 21 Lɔ ɔ he ɔ, a wo a he gbeye ekohu nɛ a ngmɛɛ a he akɛnɛ a nɛ nɔ́ ko nɛ a maa da nɔ kɛ gbla a tue ɔ he je, nɛ a ngɛ ni ɔmɛ hu gbeye yee, ejakaa ni ɔmɛ tsuo ngɛ Mawu hɛ mi nyami woe ngɛ nɔ́ nɛ e ba a he. 22 Ejakaa nyumu ɔ nɛ a tsa lɛ ngɛ nyakpɛ blɔ nɛ ɔ nɔ ɔ ye pe jeha 40.

23 Benɛ a ngmɛɛ a he ɔ, a je kɛ ho mɛ nitsɛmɛ a we bi ɔmɛ a ngɔ ya, nɛ a ya bɔ mɛ níhi nɛ osɔfo nikɔtɔma amɛ kɛ nikɔtɔma amɛ de mɛ ɔ. 24 Benɛ a nu nɔ́ nɛ ɔ, mɛ tsuo a pee a nya kake nɛ a wo a gbi nɔ nɛ a de Mawu ke:

“Nyɔmtsɛ Matsɛ, mo ji Nɔ nɛ e bɔ hiɔwe kɛ zugba kɛ wo kɛ níhi tsuo nɛ ngɛ a mi, 25 nɛ mo lɛ o gu mumi klɔuklɔu ɔ nɔ nɛ o ha nɛ wa nɛnɛ David, o sɔmɔlɔ ɔ kɛ e nya de ke: ‘Mɛni he je nɛ je ma amɛ pee hoo nɛ a ngɛ a yi mi tɛ puee ngɛ yaka níhi a he ɔ? 26 Zugba a nɔ matsɛmɛ ɔmɛ te si da si, nɛ nɔ yeli ɔmɛ bua a he nya nɛ a pee kake ngɔ wo Yehowa* kɛ nɔ nɛ e pɔ lɛ nu ɔ* a he.’ 27 Ejakaa ngɛ anɔkuale mi ɔ, Hɛrode, kɛ Pontio Pilato, kɛ nyumuhi nɛ a je je ma amɛ a mi, kɛ Israel bi ɔmɛ bua a he nya ngɛ ma nɛ ɔ mi ngɔ wo o sɔmɔlɔ klɔuklɔu Yesu, nɔ nɛ o pɔ lɛ nu ɔ he, 28 konɛ a pee níhi nɛ o nine kɛ o yi mi tomi ɔ to ngɔ fɔ si ke a pee ɔ. 29 Nɛ amlɔ nɛ ɔ, Yehowa,* hyɛ wa he gbeye nɛ a ngɛ woe ɔ, nɛ o ha nɛ wɔ o nyɔguɛ ɔmɛ waa ya nɔ nɛ waa kɛ kã nɛ tu o munyu ɔ, 30 be mi nɛ o kpãa o nine mi konɛ a tsa hiɔhi, kɛ be mi nɛ okadihi kɛ nyakpɛ níhi* hu ngɛ nɔ yae kɛ gu o sɔmɔlɔ klɔuklɔu Yesu biɛ ɔ mi ɔ.”

31 Nɛ benɛ a gbe pɛɛ kpami nɛ mi wa nɛ ɔ nya a,* he nɛ a bua a he nya ngɛ ɔ mimiɛɛ, nɛ mumi klɔuklɔu ɔ hyi mɛ tsuo tɔ, nɛ a kɛ kã ngɛ Mawu munyu ɔ tue.

32 Jehanɛ se hu ɔ, nihi babauu nɛ a he ye ɔ hɛɛ tsui kake kɛ susuma* kake, nɛ a ti nɔ ko nɔ ko be nɛ e deɔ ke níhi nɛ e ngɛ ɔ, lɛɛ e nɔ́, mohu ɔ, níhi tsuo nɛ nɔ ko ngɛ ɔ peeɔ mɛ tsuo a nɔ́. 33 Nɛ bɔfo ɔmɛ ngɔ he wami ngua kɛ ya nɔ nɛ a ye Nyɔmtsɛ Yesu si tlemi ɔ he odase, nɛ dloomi babauu nitsɛ ngɛ mɛ tsuo a nɔ. 34 Ngɛ anɔkuale mi ɔ, nɔ ko nɔ ko be a kpɛti nɛ nɔ́ ko he hia lɛ, ejakaa nihi tsuo nɛ a ngɛ ngmɔhi aloo wehi ɔ, a juaa, nɛ a ngɔɔ nɔ́ nɛ a náa ngɛ mi ɔ kɛ baa, 35 nɛ a ngɔɔ kɛ ba pueɔ bɔfo ɔmɛ a nane nya. Nɛ a gbaa kɛ haa nɔ fɛɛ nɔ kaa bɔ nɛ e he hia lɛ ɔ. 36 Enɛ ɔ he ɔ, Yosɛf nɛ bɔfo ɔmɛ tsɛɔ lɛ hu ke Banaba (nɛ e sisi ji, “Bua Womi Bi”), nɛ e ji Levi no nɛ e je Kipro ɔ 37 ngɛ zugba ko, nɛ e ya jua nɛ e ngɔ sika a kɛ ba pue bɔfo ɔmɛ a nane nya.

5 Se nyumu ko nɛ a tsɛɛ lɛ ke Anania kɛ e yo Safira ya jua weto ní ko. 2 Se e ngɔ sika a eko kɛ laa, nɛ e yo ɔ hu le he nɔ́ ko, nɛ e kɛ fã nɛ e piɛ ɔ ba nɛ e kɛ ba pue bɔfo ɔmɛ a nane nya. 3 Se Petro bi lɛ ke: “Anania, mɛni he je nɛ Satan kplii o tsui nɛ o ye mumi klɔuklɔu ɔ lakpa, nɛ o ngɔ sika nɛ o ná ngɛ ngmɔ ɔ nɛ o jua a mi ɔ eko kɛ laa a? 4 Be abɔ nɛ e ngɛ o dɛ ɔ, anɛ pi mo nitsɛ o nɔ́ lo? Nɛ benɛ o jua a hu ɔ, tse mo nɔuu lɛ o ngɛ nɔ he wami? Mɛni he je nɛ o susu nɔ́ ko kaa kikɛ nɛ ɔ ngɛ o tsui mi ɔ? Pi adesahi nɛ o ye lakpa a, se mohu Mawu.” 5 Benɛ Anania nu munyu nɛ ɔ, e tsɔ fia si nɛ e gbo. Nɛ gbeye nu nihi tsuo nɛ a nu he ɔ. 6 Kɛkɛ nɛ nihewi ɔmɛ te si, nɛ a ngɔ bohi kɛ blaa lɛ, nɛ a tloo lɛ kɛ je kpo, nɛ a ya pu lɛ.

7 Jehanɛ ɔ, maa pee ngmlɛfia etɛ se ɔ, e yo ɔ hu ba, e li nɔ́ nɛ ya nɔ ɔ. 8 Petro bi lɛ ke: “Mo de mi, anɛ bɔ nɛ nyɛ jua ngmɔ ɔ ha a ji nɛ ɔ lo?” E ha heto ke: “Ee, jã nɛ wa jua lɛ.” 9 Lɔ ɔ he ɔ, Petro bi lɛ ke: “Mɛni he je nɛ nyɛ ni enyɔ ɔmɛ nyɛ pee kake kaa nyɛ maa ka Yehowa* mumi ɔ? Hyɛ! Nihi nɛ a ya pu o huno ɔ, a nanehi lɛ ngɛ sinya a nya a nɛ, nɛ a maa tloo mo hu kɛ je kpo.” 10 Amlɔ nɔuu nɛ lɛ hu e tsɔ fia si ngɛ Petro nane nya nɛ e gbo. Benɛ nihewi ɔmɛ ba a, a ba na kaa e gbo nɛ a tloo lɛ kɛ je kpo kɛ ho nɛ a ya pu lɛ ngɛ e huno ɔ kasa nya. 11 Enɛ ɔ he ɔ, gbeye nu asafo ɔ tsuo, kɛ nihi tsuo nɛ a nu ní nɛ ɔmɛ a he ɔ.

12 Jehanɛ se hu ɔ, a gu bɔfo ɔmɛ a nine nɔ kɛ ngɛ okadihi kɛ nyakpɛ níhi* fuu pee ngɛ ni ɔmɛ a kpɛti; nɛ mɛ tsuo a kpeɔ ngɛ Solomon Ablanaa a nɔ. 13 Ngɛ anɔkuale mi ɔ, ni kpa amɛ a ti nɔ ko nɔ ko ná we kã nɛ e ba piɛɛ a he; se kɛ̃ ɔ, ni ɔmɛ ngɛ a he munyu kpakpa tue. 14 Nɔ́ nɛ e pe kulaa a, nyumuhi kɛ yihi babauu nɛ a he Nyɔmtsɛ ɔ ye ɔ ya nɔ nɛ a ba ngɛ a he piɛɛe. 15 A ngɔ hiɔtsɛmɛ po kɛ je kpo kɛ ba gbɛjegbɛ ngua amɛ a he nɛ a kɛ mɛ ba fɔ sa tsɔwitsɔwihi a nɔ ngɛ lejɛ ɔ konɛ ke Petro bee nɛ e hí kulaa a, e nini nɛ nɔ a ti ni komɛ a nɔ. 16 Jehanɛ se hu ɔ, nimli asafo kuuhi je mahi nɛ a bɔle Yerusalɛm ɔ a mi kɛ ngɛ bae. A ngɛ hiɔtsɛmɛ, kɛ nihi nɛ mumi yayami ngɛ mɛ haoe ɔ ngɔe* kɛ ngɛ bae, nɛ a tsa mɛ tsuo.

17 Se osɔfo nɔkɔtɔma pe kulaa a kɛ nihi tsuo nɛ a piɛɛ e he nɛ a ji Saduki kuu ɔ mi bimɛ ɔmɛ te si kɛ da si, nɛ hunga hyi mɛ tɔ. 18 Nɛ a nu bɔfo ɔmɛ nɛ a wo mɛ tsu ngɛ he nɛ a woɔ ma bi ɔmɛ tsu ngɛ ɔ. 19 Se nyɔ ɔ mi ɔ, Yehowa* bɔfo ba bli tsu ɔ nya sinya amɛ, nɛ e ngɔ mɛ kɛ je kpo, nɛ e de mɛ ke: 20 “Nyɛɛ ya nɛ nyɛ ya da sɔlemi we ɔ, nɛ nyɛɛ ya nɔ nɛ nyɛɛ tu wami nɛ ɔ he munyu ɔmɛ tsuo kɛ tsɔɔ ni ɔmɛ.” 21 Benɛ a nu nɔ́ nɛ ɔ, a sɛ sɔlemi we ɔ benɛ je na a, nɛ a bɔni ní tsɔɔmi.

Benɛ osɔfo nɔkɔtɔma pe kulaa a kɛ nihi nɛ a piɛɛ e he ɔ ba a, a tsɛ Sanhedri bi ɔmɛ kɛ Israel ma nikɔtɔma amɛ tsuo kpe, nɛ a tsɔ kɛ ya tsu womi he ɔ konɛ a ya ngɔ bɔfo ɔmɛ kɛ ba ha mɛ. 22 Se benɛ tsɔli ɔmɛ su lejɛ ɔ, a nɛ mɛ ngɛ tsu ɔ mi. Lɔ ɔ he ɔ, a kpale a se kɛ ba nɛ a ba bɔ amaniɛ. 23 A de ke: “Wa na kaa a ngmɛ tsu ɔ nya sinya amɛ a mi saminya, nɛ buli ɔmɛ daa si ngɛ sinya amɛ a nya, se benɛ wa bli ɔ, wa nɛ nɔ ko nɔ ko ngɛ mi.” 24 Benɛ sɔlemi we ɔ nɔ hyɛlɔ ɔ kɛ osɔfo nikɔtɔma amɛ nu munyu nɛ ɔ, a hɛ mi pee mɛ yaa, nɛ a li nɔ́ nɛ maa je enɛ ɔ mi kɛ ba. 25 Se nɔ ko ba nɛ e ba bɔ mɛ amaniɛ ke: “Nyɛɛ hyɛ! Nyumu ɔmɛ nɛ nyɛ wo mɛ tsu ɔ ngɛ sɔlemi we ɔ, a daa si nɛ a ngɛ ni ɔmɛ ní tsɔɔe.” 26 Kɛkɛ nɛ sɔlemi we ɔ nɔ hyɛlɔ ɔ kɛ e tsɔli ɔmɛ pue nɔ kɛ ho nɛ a ya ngɔ mɛ kɛ ba, se a pee we mɛ gidigidi, ejakaa a ngɛ gbeye yee kaa ni ɔmɛ maa fiaa mɛ tɛ.

27 Enɛ ɔ he ɔ, a ngɔ mɛ kɛ ba nɛ a kɛ mɛ ba da si ngɛ Sanhedri bi ɔmɛ a hɛ mi. Lɔ ɔ se ɔ, osɔfo nɔkɔtɔma pe kulaa a kɛ mɛ tu munyu 28 nɛ e de mɛ ke: “Wa wo nyɛ si veveeve kaa nyɛ ko ya nɔ nɛ nyɛɛ tsɔɔ ní ngɛ biɛ nɛ ɔ mi hu, se nyɛɛ hyɛ! nyɛ ha nɛ Yerusalɛm hyi tɔ kɛ nyɛ tsɔɔmi ɔ, nɛ nyɛ fia nyɛ pɛɛ si kaa nyɛ maa ngɔ nyumu nɛ ɔ muɔ kɛ ba wa nɔ.” 29 Petro kɛ bɔfo kpa amɛ he nɔ nɛ a de ke: “E sa nɛ waa bu Mawu tue kaa nɔ yelɔ mohu pe adesahi. 30 Wa nɛmɛ ɔmɛ a Mawu ɔ tle Yesu, nɔ nɛ nyɛ sɛu lɛ ngɛ tso nɔ nɛ nyɛ gbe lɛ ɔ si. 31 Mawu wo nɔ nɛ ɔ nɔ kɛ ya e hiɔ nɔ kaa Hɛ Mi Nyɛɛlɔ Kpanaa kɛ Yi Wami Helɔ, konɛ e ha nɛ Israel nɛ e ná tsui tsakemi kɛ yayami pami. 32 Nɛ wɔ ji sane nɛ ɔmɛ a he odasefohi, nɛ jã kɛ̃ nɛ e ji ngɛ mumi klɔuklɔu ɔ nɛ Mawu kɛ ha nihi nɛ a buɔ lɛ tue kaa nɔ yelɔ ɔ hu a blɔ fa mi.”

33 Benɛ a nu nɔ́ nɛ ɔ, a mi mi wo la,* nɛ a hla kaa a maa tane a yi. 34 Se Farisi no ko nɛ a tsɛɛ lɛ ke Gamaliɛl ɔ te si kɛ da si ngɛ Sanhedri bi ɔmɛ a kpɛti; e ji Mlaa tsɔɔlɔ, nɛ ni ɔmɛ tsuo buɔ lɛ wawɛɛ, nɛ e fã ke a je nyumu ɔmɛ kpo be bɔɔ. 35 Lɔ ɔ se ɔ, e de mɛ ke: “Israel nyumuhi, nyɛɛ hyɛ nɛ hi ngɛ nɔ́ nɛ nyɛ to kaa nyɛ maa pee nyumu nɛ ɔmɛ ɔ he. 36 Kaa nɔ hyɛmi nɔ́ ɔ, be ko nɛ be ɔ, Teuda te si nɛ e de ke nɔ ko ji lɛ, nɛ nyumuhi maa pee 400 kɛ a he ya bɔ e kuu ɔ. Se a gbe lɛ, nɛ nihi tsuo nɛ a nyɛɛ e se ɔ gbɛ fĩa nɛ e kuu ɔ gu. 37 Ngɛ e se ɔ, Yudas, Galilea no ɔ hu te si ngɛ biɛ ngmami be ɔ mi, nɛ e gbla nihi babauu kɛ nyɛɛ e se. Jamɛ a nyumu ɔ hu hɛ mi kpata, nɛ nihi tsuo nɛ a nyɛɛ e se ɔ gbɛ fĩa. 38 Enɛ ɔ he ɔ, ngɛ sane nɛ wa ngɛ he susue piɔ nɛ ɔ mi ɔ, i ngɛ nyɛ dee ke, nyɛ ko pee nyumu nɛ ɔmɛ nɔ́ ko, mohu ɔ, nyɛɛ ngmɛɛ a he. Ejakaa ke yi mi tomi nɛ ɔ loo ní tsumi nɛ ɔ je adesahi a ngɔ ɔ, e maa gu; 39 Se ke Mawu ngɔ nɛ e je ɔ, lɛɛ nyɛ be nyɛe maa gu lɛ. Ke nyɛ pee kaa nyɛ maa gu lɛ ɔ, lɛɛ e ma nyɛ maa ba po kaa nyɛɛ kɛ Mawu nitsɛ lɛ ngɛ hwue ɔ nɛ.” 40 Kɛkɛ nɛ a kplɛɛ e ga womi ɔ nɔ, nɛ a tsɛ bɔfo ɔmɛ kɛ ba nɛ a guao mɛ,* nɛ a wo mɛ mlaa ke a kpa munyu tumi ngɛ Yesu biɛ ɔ mi, nɛ a ngmɛɛ a he nɛ a ho.

41 Lɔ ɔ se ɔ, a je Sanhedri bi ɔmɛ a hɛ mi kɛ ho, nɛ a ngɛ nyae kaa ngɛ e biɛ ɔ he je ɔ, a bu mɛ kaa a ji nihi nɛ a sa hɛ mi si puemi. 42 Nɛ daa ligbi ɔ, a yaa sɔlemi we ɔ, nɛ a jeɔ wehi a mi kɛ yaa wehi a mi nɛ a yaa nɔ nɛ a hii ní tsɔɔe, nɛ a hii sane kpakpa a nɛ e kɔɔ Kristo ɔ, nɛ ji Yesu he ɔ jajee nɛ a kpa we.

6 Jehanɛ ɔ, jamɛ a be ɔ mi benɛ kaseli ɔmɛ a he ngɛ hiɛe ɔ, Yuda bi nɛ a tuɔ Hela gbi ɔ bɔni munyu tumi kɛ bɔni Yuda bi nɛ a tuɔ Hebri gbi ɔ simi, ejakaa Yuda bi nɛ a tuɔ Hebri gbi ɔ ma a hɛ ngɔ fɔ a yalɔyi ɔmɛ a nɔ ngɛ níhi nɛ a gbaa kɛ haa mɛ daa ligbi ɔ mi. 2 Enɛ ɔ he ɔ, Ni Nyɔngma Kɛ Enyɔ ɔmɛ tsɛ kaseli babauu ɔ tsuo kpe, nɛ a de mɛ ke: “E sɛ* kaa wa maa je Mawu munyu ɔ he nɛ wa ya gba niye ní ngɔ pue okplɔɔhi a nɔ. 3 Lɔ ɔ he ɔ, nyɛmimɛ, nyɛ nitsɛmɛ nyɛɛ hla nyumuhi kpaago ngɛ nyɛ kpɛti nɛ a ngɛ biɛ kpakpa,* nɛ mumi hyi mɛ tɔ, nɛ a ngɛ juɛmi saminya, konɛ waa ngɔ mɛ kɛ da ní tsumi nɛ e he hia nɛ ɔ nya; 4 se wɔɔ lɛɛ wa maa tu wa he kɛ ha sɔlemi kɛ munyu ɔ he sɔmɔmi ɔ.” 5 Nimli babauu ɔ tsuo a bua jɔ nɔ́ nɛ a de ɔ he, nɛ a hla Steven, nyumu ko nɛ hemi kɛ yemi kɛ mumi klɔuklɔu hyi lɛ tɔ ɔ, kɛ Filipo, Prokoro, Nikanɔ, Timon, Pamena, kɛ Nikolao, nɛ ji Antiokia no ko nɛ e tsake kɛ ba Yuda bi ɔmɛ a jami ɔ mi ɔ. 6 A ngɔ mɛ kɛ ba bɔfo ɔmɛ a ngɔ, nɛ benɛ bɔfo ɔmɛ sɔle ta a, a ngɔ a ninehi kɛ pue a nɔ.

7 Enɛ ɔ ha nɛ Mawu munyu ɔ ya nɔ nɛ e gbɛ fĩa, nɛ kaseli ɔmɛ a yibɔ ngɛ hɛ mi yae wawɛɛ nitsɛ ngɛ Yerusalɛm; nɛ osɔfohi babauu bɔni hemi kɛ yemi ɔ he pɛtɛmi.

8 Jehanɛ ɔ, Steven nɛ Mawu dloomi kɛ he wami hyi lɛ tɔ ɔ ngɛ nyakpɛ ní nguanguahi* kɛ okadihi pee ngɛ ni ɔmɛ a kpɛti. 9 Se nyumu komɛ nɛ a je he ko nɛ a ke a tsɛɔ ke Nyumu He Yeli A Kpe He ɔ ba hɛ mi, nɛ Kirene bi kɛ Alɛksandria bi komɛ, kɛ ni komɛ nɛ a je Kilikia kɛ Asia hu piɛɛ a he kɛ ba konɛ a kɛ Steven nɛ ba sã nya. 10 Se a nyɛ we nɛ a da juɛmi kɛ mumi nɛ e kɛ ngɛ munyu tue ɔ nya. 11 Enɛ ɔ he ɔ, a ya plɛ ni komɛ a yi mi ngɛ laami mi kaa a ba de ke: “Wa nu nɛ e ngɛ musu bɔmi munyuhi tue kɛ ngɛ Mose kɛ Mawu sie.” 12 Nɛ a su ni ɔmɛ, nikɔtɔma amɛ, kɛ womi ngmali ɔmɛ ngɔ wo e he, nɛ a ba e nɔ tlukaa, nɛ a ba nu lɛ pani nya, nɛ a ngɔ lɛ kɛ ho Sanhedri bi ɔmɛ a ngɔ ya. 13 Nɛ a ngɔ lakpa odase yeli kɛ ba, nɛ a ba de ke: “Nɔmlɔ nɛ ɔ ngɛ munyuhi tue kɛ ngɛ he klɔuklɔu nɛ ɔ kɛ Mlaa a sie, nɛ e kpa we. 14 Kaa nɔ hyɛmi nɔ́ ɔ, wa nu nɛ e ngɛ dee ke Yesu, Nazarɛt no ɔ maa ku hiɛmɛ nɛ ɔ ngɔ pue si, nɛ e ma tsake kusumihi nɛ Mose si kɛ ha wɔ ɔ.”

15 Nɛ benɛ ni ɔmɛ nɛ a hii si ngɛ Sanhedri kpe ɔ mi ɔ tsuo muɔɔ a hɛ ngmɛ ngɔ pue e nɔ ɔ, a na kaa e hɛ mi pee kaa Mawu bɔfo ko hɛ mi.

7 Se osɔfo nɔkɔtɔma pe kulaa a bi ke: “Anɛ ní nɛ ɔmɛ ngɛ mi jã lo?” 2 Steven ha heto ke: “Nyumuhi, nyɛmimɛ kɛ tsɛmɛ, nyɛɛ bu tue. Loko wa nɛnɛ Abraham maa hia kɛ ya hi Haran ɔ, Mawu nɛ e hɛ mi ngɛ nyami ɔ je e he kpo ngɔ tsɔɔ lɛ ngɛ Mɛsopotaamia, 3 nɛ e de lɛ ke: ‘Moo je o zugba a nɔ kɛ o weku li ɔmɛ a he, nɛ o ba zugba nɛ ma tsɔɔ mo ɔ nɔ.’ 4 Kɛkɛ nɛ e hia kɛ je Kaldea bi ɔmɛ a zugba a nɔ, nɛ e ya hi Haran. Nɛ ngɛ e tsɛ ɔ gbenɔ se ɔ, e hia kɛ je lejɛ ɔ, nɛ Mawu ha nɛ e ba hi zugba nɛ nyɛ ngɛ nɔ amlɔ nɛ ɔ nɔ. 5 Se kɛ̃ ɔ, Mawu ha we lɛ weto ní ko ngɛ nɔ, dɛbi, e ha we lɛ nane mami he kake po; se e wo lɛ si kaa e maa ngɔ kɛ ha lɛ kaa e weto ni, nɛ ngɛ e se ɔ, e maa ngɔ kɛ ha e nina,* pohu jamɛ a be ɔ mi ɔ, e be bi ko lolo. 6 Jehanɛ se hu ɔ, Mawu de lɛ kaa e nina* maa pee nibwɔhi ngɛ zugba ko nɛ pi a nɔ́ ɔ nɔ, nɛ ni ɔmɛ maa pee mɛ nyɔguɛ, nɛ a maa wa mɛ yi mi* jeha 400. 7 Mawu de ke: ‘Nɛ ma kojo jamɛ a ma a nɛ a ma ya sɔmɔ ɔ, nɛ ngɛ ní nɛ ɔmɛ a se ɔ, a maa je jamɛ a ma a mi, nɛ a ma ba sɔmɔ mi ngɛ blɔ klɔuu nɔ ngɛ hiɛ ɔ.’

8 “Jehanɛ se hu ɔ, e kɛ lɛ so nɔ pomi somi, nɛ e ba fɔ Isak nɛ e po lɛ ngɛ ligbi nɛ ji kpaanyɔ ɔ nɔ, nɛ Isak hu ba fɔ* Yakɔb, nɛ Yakɔb hu ba fɔ wekuyi* 12 ɔmɛ. 9 Nɛ wekuyi ɔmɛ a hɛ kɔ̃ Yosɛf nɔ nɛ a jua lɛ kɛ ho Ijipt ya. Se Mawu piɛɛ e he, 10 nɛ e kpɔ̃ lɛ ngɛ e we amanehlu ɔmɛ tsuo a mi, nɛ e ha nɛ e hɛ mi ba nyami ngɛ Ijipt matsɛ Farao hɛ mi, nɛ e ha lɛ juɛmi hulɔ. Nɛ Farao ngɔ Ijipt kɛ e we ɔ tsuo ngɔ wo e dɛ. 11 Se hwɔ ba Ijipt kɛ Kaanan tsuo, ee, amanehlu ngua, nɛ wa nɛmɛ ɔmɛ nɛ nɔ́ ko nɛ a maa ye. 12 Se Yakɔb nu kaa niye ní* ngɛ Ijipt, nɛ e tsɔ wa nɛmɛ ɔmɛ kɛ ya lejɛ ɔ kekleekle. 13 Benɛ e tsɔ mɛ si enyɔne ɔ, Yosɛf je e he si ha e nyɛminyumu ɔmɛ, nɛ Farao ba le Yosɛf weku ɔ. 14 Enɛ ɔ he ɔ, Yosɛf ngɔ sɛ gbi kɛ mane nɛ a ya ngɔ e tsɛ Yakɔb kɛ e weku li ɔmɛ tsuo kɛ je lejɛ ɔ, mɛ* tsuo a yibɔ ji 75. 15 Enɛ ɔ he ɔ, Yakɔb kple kɛ ho Ijipt ya, nɛ e ya gbo ngɛ lejɛ ɔ, nɛ jã kɛ̃ nɛ e ba ngɛ wa nɛmɛ ɔmɛ hu a blɔ fa mi. 16 A tloo mɛ kɛ ba Shekem nɛ a ba to mɛ ngɛ yɔkɔ ɔ nɛ Abraham ngɔ sika hiɔ fuu kɛ he ngɛ Hamɔ binyumu ɔmɛ a dɛ ngɛ Shekem ɔ mi.

17 “Benɛ e piɛ bɔɔ nɛ Mawu maa ye si womi ɔ nɛ e fia he adafi kɛ tsɔɔ Abraham ɔ nɔ ɔ, ni ɔmɛ a he ba hiɛ babauu nitsɛnitsɛ ngɛ Ijipt 18 hluu kɛ ya si be nɛ matsɛ kpa ba te si ngɛ Ijipt nɛ lɛɛ lɛɛ e li Yosɛf. 19 Nɔ nɛ ɔ lɛɛ e ye wa ma mi bi ɔmɛ a nɔ ngɛ ga blɔ nɔ, nɛ e nyɛ wa nɛmɛ ɔmɛ a nɔ ngɛ blɔ nɛ dɛ nɔ kaa a kua a bimwɔwi ɔmɛ konɛ a ko baa a yi. 20 Jamɛ a be ɔ mi nɛ a fɔ Mose, nɛ e he ngɛ fɛu saminya ngɛ Mawu hɛ mi. Nɛ a hyɛ e nɔ* ngɛ e tsɛ we ɔ nyɔhiɔ etɛ. 21 Se benɛ a ya ngmɛɛ e he kɛ fɔ he ko* ɔ, Farao biyo ɔ ngɔ lɛ nɛ e ya tsɔse lɛ kaa lɛ nitsɛ e binyumu. 22 Enɛ ɔ he ɔ, a tsɔɔ Mose Ijipt juɛmi ɔ tsuo. Ngɛ anɔkuale mi ɔ, he wami ngɛ e munyuhi kɛ e ní peepeehi a mi.

23 “Jehanɛ ɔ, benɛ e ye jeha 40 ɔ, e ba e tsui mi* kaa e ma ya slaa* e nyɛmimɛ, Israel bi ɔmɛ. 24 Benɛ e hɛ ngmɛ gba a kpɛti nɔ kake nɔ nɛ a ngɛ lɛ yi mi wae ɔ, e ya fã e he, nɛ e gbe Ijipt no ɔ kɛ ye lue ha nɔ nɛ a ngɛ lɛ níhi nɛ sɛ pee ɔ. 25 E susu kaa e nyɛmimɛ ɔmɛ maa nu sisi kaa Mawu ngɛ e nine nɔ gue kɛ he a yi wami, se a ya nui sisi jã. 26 E nɔ jena a, e ya je kpo ngɛ a ngɔ nɛ e na mɛ nɛ a ngɛ kunɔ nɔe, nɛ e bɔ mɔde kaa e ma kpata mɛ, nɛ e de mɛ ke: ‘Nyumuhi, nyɛmimɛ ji nyɛ. Mɛni he je nɛ nyɛ ngɛ nyɛ sibi yi mi wae ɔ?’ 27 Se nɔ nɛ e ngɛ e nyɛmi ɔ yi mi wae ɔ tsitsɛɛ lɛ kɛ ya se, nɛ e bi lɛ ke: ‘Mɛnɔ wo mo wa nɔ yelɔ kɛ wa kojolɔ? 28 Anɛ o ngɛ hlae nɛ o maa gbe mi kaa bɔ nɛ o gbe Ijipt no ɔ hiɛ ɔ lo?’ 29 Benɛ Mose nu nɔ́ nɛ ɔ, e tu fo nɛ e ya hi si kaa nubwɔ ngɛ Midian zugba a nɔ, nɛ e fɔ binyumuhi enyɔ ngɛ lejɛ ɔ.

30 “Jeha 40 se ɔ, bɔfo ko je e he kpo ngɔ tsɔɔ lɛ ngɛ la lilɛ mi ngɛ mio tso ko nɛ e ngɛ sãe ɔ mi, ngɛ nga a nɔ ngɛ Sinai Yoku ɔ he. 31 Benɛ Mose na nɔ́ nɛ ɔ, e pee lɛ nyakpɛ. Se benɛ e ngɛ nɔ́ ɔ he sue konɛ e kpa lɛ si ɔ, e nu Yehowa* gbi nɛ e de ke: 32 ‘Imi ji o nɛmɛ ɔmɛ a Mawu ɔ nɛ, imi ji Abraham kɛ Isak kɛ Yakɔb a Mawu ɔ nɛ.’ Mose he bɔni domi blibliibli nɛ e jlo we lɛ kaa e ma kpa nɔ́ ɔ si hu. 33 Yehowa* de lɛ ke: ‘Mo je tokota amɛ ngɛ o nane, ejakaa zugba klɔuklɔu nɔ nɛ o daa si ngɛ ɔ nɛ. 34 Ngɛ anɔkuale mi ɔ, amanehlu nɛ ye we bi ɔmɛ ngɛ nae ngɛ Ijipt ɔ, i na, nɛ kɛmɛmi nɛ a ngɛ kɛmɛe ɔ hu, i nu, nɛ i kple si kɛ ba konɛ ma ba kpɔ̃ mɛ. Amlɔ nɛ ɔ, ba nɛ ma tsɔ mo kɛ ya Ijipt.’ 35 Mose nɛ ɔ nɔuu nɛ a kua lɛ nɛ a bi lɛ ke: ‘Mɛnɔ wo mo nɔ yelɔ kɛ kojolɔ?’ ɔ, lɛ nɔuu nɛ Mawu gu bɔfo ɔ nɛ e je e he kpo ngɔ tsɔɔ lɛ ngɛ mio tso ɔ he ɔ nɔ kɛ tsɔ lɛ kaa nɔ yelɔ kɛ kpɔlɔ tsuo ɔ nɛ. 36 Nyumu nɛ ɔ nyɛɛ a hɛ mi kɛ je kpo, e pee nyakpɛ níhi* kɛ okadihi ngɛ Ijipt, kɛ Wo Tsu ɔ he, kɛ nga a nɔ jeha 40.

37 “Mose nɛ ɔ lɛ e de Israel bi ɔmɛ ke: ‘Mawu ma tle gbalɔ ko nɛ e ngɛ kaa imi si ngɛ nyɛ nyɛmimɛ ɔmɛ a kpɛti kɛ ha nyɛ’ ɔ nɛ. 38 Nɔ nɛ ɔ ji nɔ nɛ e piɛɛ asafo ɔ he ngɛ nga a nɔ, nɛ bɔfo ɔ kɛ lɛ kɛ wa nɛmɛ ɔmɛ tu munyu ngɛ Sinai Yoku ɔ nɔ, nɛ e nine su munyuhi nɛ a ngɛ klɔuklɔu nɛ a hɛ ngɛ ɔ nɔ, nɛ e kɛ ha wɔ ɔ nɛ. 39 Wa nɛmɛ ɔmɛ bui lɛ tue, mohu ɔ, a tsɛ̃ lɛ kɛ ya se, nɛ ngɛ a tsui mi ɔ, a kpale a se kɛ ho Ijipt ya, 40 nɛ a de Aaron ke: ‘Pee mawuhi ha wɔ konɛ a nyɛɛ wa hɛ mi. Ejakaa wa li nɔ́ nɛ ba Mose nɛ ɔ nɛ e nyɛɛ wa hɛ mi kɛ je Ijipt zugba a nɔ ɔ nɔ.’ 41 Enɛ ɔ he ɔ, a pee na bi ko ngɛ jamɛ a be ɔ mi, nɛ a sã afɔlehi kɛ ha amaga a, nɛ a bɔni mɛ nitsɛmɛ a nine nya ní tsumihi a he bua jɔmi nami. 42 Enɛ ɔ ha nɛ Mawu je a se, nɛ e ngmɛɛ a he nɛ a sɔmɔ hiɔwe tabo ɔ ngɛ blɔ klɔuu nɔ kaa bɔ nɛ a ngma ngɛ gbali ɔmɛ a womi ɔ mi ɔ. A ngma ke: ‘Oo Israel we, anɛ imi nɛ nyɛ ngɔ níhi kɛ ha nɛ nyɛ sã afɔlehi kɛ ha jeha 40 ngɛ nga a nɔ ɔ lo? 43 Molok bo tsu ɔ kɛ mawu Refan dodoe ɔ, nɛ ji amagahi nɛ nyɛ pee nɛ nyɛ ja mɛ ɔ mohu nɛ nyɛ ngɔ. Enɛ ɔ he ɔ, ma fia nyɛ nane si tu kɛ ya Babilon se lokoo.’

44 Wa nɛmɛ ɔmɛ a nine su odase yemi bo tsu ɔ nɔ ngɛ nga a nɔ, nɛ a pee lɛ kaa bɔ nɛ Nɔ nɛ e kɛ Mose tu munyu ɔ tsɔɔ lɛ ke e pee ɔ, nɛ e pee nɔ́ nɛ e na a henɔ pɛpɛɛpɛ. 45 Nɛ e ba pee wa nɛmɛ ɔmɛ a nɔ́, nɛ Yoshua piɛɛ a he nɛ a ngɔ kɛ ba je ma amɛ nɛ Mawu fiee mɛ kɛ je wa nɛmɛ ɔmɛ a hɛ mi ɔmɛ a zugba a nɔ. Hiɛ ɔ nɛ e hi hluu kɛ ba su David ligbi ɔmɛ a mi. 46 David hɛ mi ba nyami ngɛ Mawu hɛ mi, nɛ e bi ke a ha lɛ he blɔ nɛ e pee sihi he ko kɛ ha Yakɔb Mawu ɔ. 47 Se Solomon mohu ji nɔ nɛ e ma we kɛ ha lɛ. 48 Se Hiɔwe Lokoo No ɔ hí wehi nɛ a kɛ nine ma a mi, kaa bɔ nɛ gbalɔ ɔ de ɔ, e de ke: 49 ‘Yehowa* de ke, hiɔwe ɔ ji ye matsɛ sɛ, nɛ zugba a ji nɔ́ nɛ i kɛ ye nane maa nɔ. Lɛɛ mɛni we nɛ nyɛ ma nyɛ maa ma ha mi mɔ? Aloo jije ji ye he jɔɔmi he? 50 Anɛ pi imi nitsɛ ye nine nɛ i kɛ pee ní nɛ ɔmɛ tsuo lo?’

51 “Nyumuhi nɛ nyɛ tue mi ti, tsui kɛ tue mɔmlɔtɔtsɛmɛ, be fɛɛ be ɔ, nyɛ ngɛ mumi klɔuklɔu ɔ nya tsie; kaa bɔ nɛ nyɛ nɛmɛ ɔmɛ pee ɔ, jã kɛ̃ nɛ nyɛ hu nyɛ ngɛ pee. 52 Gbali ɔmɛ a kpɛti mɛnɔ lɛ nyɛ nɛmɛ ɔmɛ wɛ lɛ yi mi? Ee, a gbe nihi nɛ a sɛ hlami nɛ a fia dalɔ ɔ nɛ ma a he adafi ɔ, nɛ amlɔ nɛ ɔ, nyɛ ba plɛ jamɛ a nɔ ɔ se blɔ tsɔɔli kɛ e gbeli, 53 nyɛ nihi nɛ nyɛ nine su Mlaa a nɔ kaa bɔ nɛ a gu hiɔwe bɔfohi a nɔ kɛ ha a, se nyɛ yi nɔ.”

54 Benɛ a nu ní nɛ ɔmɛ ɔ, a tsui wo la,* nɛ a bɔni a lungu nya kpemi kɛ bɔni e he womi. 55 Se lɛɛ lɛɛ mumi klɔuklɔu ɔ hyi lɛ tɔ nɛ e hyɛ hiɔwe too, nɛ e na Mawu hɛ mi nyami ɔ kɛ Yesu nɛ e daa si ngɛ Mawu hiɔ nɔ, 56 nɛ e de ke: “Hyɛ! i na nɛ hiɔwe nya bli, nɛ i na nɔmlɔ Bi ɔ nɛ e daa si ngɛ Mawu hiɔ nɔ.” 57 Enɛ ɔ ha nɛ a kpa ngmlaa wawɛɛ, nɛ a ngɔ a ninehi kɛ tsi a tue nɛ mɛ tsuo a bu kɛ ya e nɔ. 58 Benɛ a tsitsɛɛ lɛ kɛ je kpo kɛ ya ma a se ɔ, a bɔni lɛ tɛ fiami. Odase yeli ɔmɛ ngɔ tadehi nɛ a wo ngɛ a tade ɔmɛ a nɔ ɔ kɛ pue niheyo ko nɛ a tsɛɛ lɛ ke Saulo ɔ nane nya. 59 Benɛ a ngɛ Steven tɛ ɔ fiae ɔ, e kpa pɛɛ ke: “Nyɔmtsɛ Yesu, mo hee ye mumi ɔ.” 60 Kɛkɛ nɛ e kpla si, nɛ e kɛ gbi nɛ he wa kpa ngmlaa ke: “Yehowa,* o kɛ mɛ nɛ ko ye ngɛ yayami nɛ ɔ he.” Nɛ benɛ e de nɔ́ nɛ ɔ ta a, e nɔ gbenɔ mahe mi.

8 Saulo lɛɛ, e fĩ gbemi nɛ a gbe lɛ ɔ se.

Jamɛ a ligbi ɔ, yi mi wami nɛ nya wa te si ngɛ asafo ɔ nɛ ngɛ Yerusalɛm ɔ nɔ; mɛ tsuo a gbɛ fĩa Yudea kɛ Samaria kpokpa amɛ a nɔ, bɔfo ɔmɛ pɛ nɛ a piɛ. 2 Se nyumu komɛ nɛ a yeɔ Mawu gbeye ɔ tloo Steven gbogboe ɔ kɛ ho nɛ a ya pu, nɛ a fo e he ya wawɛɛ. 3 Se Saulo lɛɛ, e bɔni asafo ɔ tuami. E jeɔ we kake mi kɛ yaa we kpa mi, nɛ e ya gblaa nyumuhi kɛ yihi tsuo, nɛ e ya haa nɛ a woɔ mɛ tsu.

4 Se nihi nɛ a gbɛ fĩa a ya kpa zugba a tsuo nɔ, nɛ a ngɛ munyu ɔ he sane kpakpa a jajee. 5 Jehanɛ ɔ, Filipo kple kɛ ya Samaria ma* a mi, nɛ e bɔni Kristo ɔ fiɛɛmi ha mɛ. 6 Asafo kuu ɔmɛ pee kake nɛ a ngɛ Filipo munyu ɔ tue bue benɛ a nu nɛ a na okadihi nɛ e ngɛ pee ɔ. 7 Ejakaa mumihi nɛ a he tsɔ we ngɛ a ti nihi fuu a mi, nɛ mumi nɛ ɔmɛ kɛ gbi nɛ nya wa kpaa ngmlaa kɛkɛ a je a mi. Jehanɛ hu ɔ, e tsa nihi nɛ a hule kɛ glɔtsɛmɛ babauu. 8 Enɛ ɔ he ɔ, bua jɔmi babauu ba jamɛ a ma a mi.

9 Jamɛ a be ɔ mi ɔ, nyumu ko nɛ a tsɛɛ lɛ ke Simon ngɛ jamɛ a ma a mi, nɛ loko nɔ́ nɛ ɔ maa ba a, e tsuɔ kunya, nɛ e haa nɛ Samaria bi ɔmɛ a nya kpɛɔ a he, nɛ e tsɔɔ kaa nɔmlɔ ngua ko ji lɛ. 10 Mɛ tsuo, kɛ je nɔ nyafii pe kulaa nɔ kɛ ya si nɔ ngua pe kulaa nɔ ɔ, a buɔ lɛ tue nɛ a deɔ ke: “Nyumu nɛ ɔ ji Mawu He Wami ɔ nɛ a tsɛɔ ke Ngua a nɛ.” 11 Enɛ ɔ he ɔ, a buɔ lɛ tue, ejakaa e ha nɛ a nya kpɛ a he be saii kɛ gu e kunya tsumi ɔ nɔ. 12 Se benɛ a he Filipo, nɔ nɛ e ngɛ Mawu Matsɛ Yemi ɔ he sane kpakpa a kɛ Yesu Kristo biɛ ɔ jajee ɔ ye ɔ, nyumuhi kɛ yihi tsuo ha nɛ a baptisi mɛ. 13 Simon nitsɛ hu ba he ye, nɛ benɛ a baptisi lɛ se ɔ, e ya nɔ nɛ e piɛɛ Filipo he; nɛ e nya kpɛ e he ngɛ okadihi kɛ he wami ní tsumi nguanguahi nɛ ngɛ nɔ yae ɔ he.

14 Benɛ bɔfo ɔmɛ nɛ a ngɛ Yerusalɛm ɔ nu kaa Samaria bi ɔmɛ pɛtɛ Mawu munyu ɔ he ɔ, a tsɔ Petro kɛ Yohane kɛ ya a ngɔ; 15 nɛ ni nɛ ɔmɛ kple kɛ ya nɛ a ya sɔle ha mɛ konɛ a ná mumi klɔuklɔu. 16 Ejakaa mumi klɔuklɔu ɔ bɛ a ti nɔ ko nɔ ko nɔ lolo, se baptisimi pɛ nɛ a baptisi mɛ ngɛ Nyɔmtsɛ Yesu biɛ ɔ mi. 17 Kɛkɛ nɛ a ngɔ a ninehi kɛ pue a nɔ, nɛ a bɔni mumi klɔuklɔu ɔ nami.

18 Jehanɛ ɔ, benɛ Simon na kaa bɔfo ɔmɛ a ninehi nɛ́ a kɛ pue a nɔ ɔ lɛ ha nɛ a ná mumi ɔ, e je sika nɛ e kɛ ma ha mɛ, 19 nɛ e de ke: “Imi hu nyɛ ha mi he wami nɛ ɔ eko, konɛ nɔ fɛɛ nɔ nɛ ma ngɔ ye ninehi kɛ pue e nɔ ɔ, e ná mumi klɔuklɔu.” 20 Se Petro de lɛ ke: “O kɛ o sika hiɔ ɔ tsuo nyɛ hɛ mi nɛ kpata, ejakaa o susu kaa o ma nyɛ maa ngɔ sika kɛ he nike ní nɛ Mawu kɛ haa faa a. 21 O be blɔ nya loo blɔ fa mi nɔ́ ko ngɛ sane nɛ ɔ mi, ejakaa o tsui dɛ ngɛ Mawu hɛ mi. 22 Lɔ ɔ he ɔ, tsake o tsui ngɛ o yayami nɛ ɔ he, nɛ o kpa Yehowa* pɛɛ wawɛɛ kaa ke e maa hi ɔ, e ngɔ o tsui mi susumi yayami nɛ ɔ kɛ pa mo; 23 ejakaa i na kaa o ji duɔ nɛ dooɔ kɛ yayami nyɔguɛ.” 24 Simon he nɔ nɛ e de mɛ ke: “Nyɛ kpa Yehowa* pɛɛ wawɛɛ ha mi konɛ níhi nɛ nyɛ de nɛ ɔ ekoeko nɛ e ko ba ye nɔ.”

25 Enɛ ɔ he ɔ, benɛ a ye odase kɛ pi si nɛ a tu Yehowa* munyu ɔ ta a, a kpale ma blɔ nɔ kɛ yaa Yerusalɛm, nɛ a ya ngɛ sane kpakpa a jajee ngɛ Samaria kɔpe ɔmɛ fuu a mi.

26 Se Yehowa* bɔfo ko kɛ Filipo tu munyu, nɛ e de lɛ ke: “Tee si nɛ o ya wo yi je ngɛ gbɛjegbɛ nɛ e kple kɛ je Yerusalɛm kɛ yaa Gaza a nɔ.” (E ji zia zugba nɔ gbɛjegbɛ.) 27 Kɛkɛ nɛ e te si, nɛ e pue nɔ kɛ ho, nɛ hyɛ! e ya na Itiopia puɛ ko,* nyumu nɛ e hɛɛ blɔ nya ngɛ Itiopia manyɛ Kandake sisi, nɛ e ji manyɛ ɔ juetlihi tsuo a nɔ hyɛlɔ. E ya Yerusalɛm nɛ e ya ja Mawu, 28 nɛ e kpale kɛ yaa, nɛ e hii si ngɛ e zugba lɛ mi, nɛ e wo e gbi nɔ kɛ ngɛ gbalɔ Yesaya womi ɔ kanee. 29 Enɛ ɔ he ɔ, mumi ɔ de Filipo ke: “Nyɛɛ zugba lɛ ɔ se nɛ o ya ná lɛ.” 30 Benɛ Filipo ngɛ fo tue ngɛ e kasa nya a, e nu nɛ e wo e gbi nɔ kɛ ngɛ gbalɔ Yesaya womi ɔ kanee, nɛ e bi lɛ ke: “Anɛ o ngɛ nɔ́ nɛ o ngɛ kanee ɔ sisi nue saminya lo?” 31 E de ke: “Ngɛ anɔkuale mi ɔ, ke nɔ ko yi bua we mi ɔ, kɛ ma plɛ kɛ nu sisi kɛɛ?” Enɛ ɔ he ɔ, e kpa Filipo pɛɛ kaa e kuɔ nɛ e ba hi si ngɛ e kasa nya. 32 Munyu nɛ e ngɛ kanee ngɛ Ngmami ɔ mi ɔ ji nɛ ɔ nɛ: “A ngɔ lɛ kɛ ho kaa jijɔ nɛ a yaa gbe lɛ, nɛ kaa bɔ nɛ jijɔ bi peeɔ kpoo ngɛ e he bwɔmi sãlɔ hɛ mi ɔ, jã nɔuu nɛ lɛ hu e pɛ e nya mi. 33 Benɛ a ngɛ e hɛ mi si puee ɔ, a yi dami sane ha we lɛ. Mɛnɔ maa tsɔɔ e weku kpa a mi fitsofitso? Ejakaa a ngɔ e wami kɛ je zugba a nɔ.”

34 Kɛkɛ nɛ puɛ* ɔ bi Filipo ke: “I kpa mo pɛɛ, mɛnɔ he munyu nɛ gbalɔ ɔ tu ɔ? Lɛ nitsɛ e he, aloo nyumu kpa ko?” 35 Filipo bɔni munyu tumi, nɛ e je sisi kɛ je ngmami nɛ ɔ nɔ, nɛ e jaje Yesu he sane kpakpa a kɛ tsɔɔ lɛ. 36 Jehanɛ ɔ, benɛ a ngɛ gbɛjegbɛ ɔ nɔ kɛ yaa a, a ba su nyu ko he; nɛ puɛ* ɔ de ke: “Hyɛ! Nyu ji nɛ ɔ nɛ; mɛni tsiɔ ye baptisimi nya?” 37 —— 38 Kɛkɛ nɛ e fã ke zugba lɛ ɔ nɛ e da si, nɛ Filipo kɛ puɛ* ɔ tsuo a kple si kɛ sɛ nyu ɔ mi, nɛ e baptisi lɛ. 39 Benɛ a je kpo kɛ je nyu ɔ mi ɔ, oya nɔuu nɛ Yehowa mumi ɔ ngɔ Filipo kɛ je, nɛ puɛ* ɔ nɛ lɛ hu, se e pue nɔ kɛ ho kɛ bua jɔmi. 40 Se Filipo lɛɛ, e ya je kpo ngɛ Ashdɔd, nɛ e jaje sane kpakpa a ngɛ mahi tsuo nɛ a ngɛ jamɛ a zugba kpɔ ɔ mi ɔmɛ a mi hluu kɛ ya si be nɛ e ya su Kaisarea.

9 Se loloolo ɔ, Saulo ngɛ Nyɔmtsɛ ɔ kaseli ɔmɛ a he gbeye woe kaa e maa gbe mɛ, nɛ e pue nɔ kɛ ho osɔfo nɔkɔtɔma pe kulaa a ngɔ ya 2 nɛ e ya bi kaa e ha lɛ sɛ womi nɛ e kɛ ya kpe he ɔmɛ nɛ a ngɛ Damasko ɔ, konɛ e nyɛ nɛ e fĩ nɔ fɛɛ nɔ, nyumuhi kɛ yihi tsuo nɛ a piɛɛ Blɔ ɔ he ɔ, nɛ e ngɔ mɛ kɛ ba Yerusalɛm.

3 Jehanɛ ɔ, benɛ e ngɛ blɔ nɔ kɛ yaa nɛ e piɛ bɔɔ nɛ e maa su Damasko ɔ, tlukaa a, la ko kpɛ kɛ je hiɔwe kɛ ba bɔle lɛ, 4 nɛ e nɔ si ngɛ zugba, nɛ e nu nɛ gbi ko de lɛ ke: “Saulo, Saulo, mɛni he je nɛ o ngɛ mi yi mi wae ɔ?” 5 E bi ke: “Nyɔmtsɛ, mo mɛnɔ?” E de ke: “Imi ji Yesu, nɔ nɛ o ngɛ lɛ yi mi wae ɔ nɛ. 6 Se tee si nɛ o ho ma a mi ya, nɛ a maa tsɔɔ mo nɔ́ nɛ e sa kaa o pee.” 7 Jehanɛ ɔ, nyumuhi nɛ a kɛ lɛ ngɛ blɔ ɔ hiae ɔ daa si nɛ a nyɛ we nɛ a tu munyu, ngɛ anɔkuale mi ɔ, a ngɛ gbi ɔ nue, se a nɛ nɔ ko. 8 Kɛkɛ nɛ Saulo te si ngɛ zugba. E ngɛ mi kaa e hɛ ngmɛ ɔmɛ bli mohu lɛɛ, se e nɛ nɔ́ ko nɔ́ ko. Enɛ ɔ he ɔ, a pɛtɛ e nine he nɛ a ngɔ lɛ kɛ ba Damasko. 9 Nɛ ligbi etɛ sɔuu ba be nɛ e hyɛ we nɔ́, nɛ e yi ní, nɛ e nui nɔ́ ko hulɔ.

10 Kaselɔ ko ngɛ Damasko nɛ a tsɛɛ lɛ ke Anania, nɛ Nyɔmtsɛ ɔ de lɛ ngɛ nina mi ke: “Anania!” Nɛ e he nɔ ke: “Nyɔmtsɛ, i ngɛ hiɛ ɔ.” 11 Nyɔmtsɛ ɔ de lɛ ke: “Tee si, yaa blɔ ɔ nɛ a tsɛɔ ke Tlɔmɔɔ ɔ nɔ, nɛ o ya hla nyumu ko nɛ a tsɛɛ lɛ ke Saulo nɛ e je Taaso ɔ, ngɛ Yudas we ɔ mi. Ejakaa hyɛ! e ngɛ sɔlee, 12 nɛ ngɛ nina ko mi ɔ, e na kaa nyumu ko nɛ a tsɛɛ lɛ ke Anania a ba e ngɔ, nɛ e ba ngɔ e ninehi kɛ pue e nɔ konɛ e hyɛ nɔ́ ekohu.” 13 Se Anania he nɔ nɛ e de lɛ ke: “Nyɔmtsɛ, i nu nyumu nɛ ɔ he sane ngɛ nihi fuu a nya kaa e pee o ni klɔuklɔu ɔmɛ nɛ a ngɛ Yerusalɛm ɔ yi wu tso níhi babauu. 14 Nɛ hiɛ ɔ hu e ná he wami kɛ je osɔfo nikɔtɔma amɛ a ngɔ konɛ e ba nuu* nihi tsuo nɛ a tsɛɔ o biɛ ɔ.” 15 Se Nyɔmtsɛ ɔ de lɛ ke: “Moo ya! Ejakaa nyumu nɛ ɔ ji buɛ nɛ a hla kɛ ha mi konɛ e ngɔ ye biɛ ɔ kɛ ya ha je ma amɛ, kɛ matsɛmɛ, kɛ Israel bi ɔmɛ. 16 Ejakaa ma tsɔɔ lɛ amanehlu babauu nɛ e sa kaa e na ngɛ ye biɛ ɔ he ɔ heii.”

17 Enɛ ɔ he ɔ, Anania pue nɔ kɛ ho nɛ e ya sɛ we ɔ mi, nɛ e ngɔ e ninehi kɛ pue e nɔ nɛ e de ke: “Saulo, ye nyɛmi, Nyɔmtsɛ Yesu, nɔ nɛ e je e he kpo kɛ tsɔɔ mo ngɛ gbɛjegbɛ ɔ nɔ benɛ o ma a tsɔ mi, bɔ nɛ pee nɛ o hyɛ nɔ́ ekohu konɛ mumi klɔuklɔu nɛ e hyi mo tɔ.” 18 Kɛkɛ nɛ amlɔ nɔuu ɔ, ní komɛ nɛ a ngɛ kaa pa mi lo he totohi kpɔ kɛ je e hɛ ngmɛ ɔmɛ a nɔ kɛ pue si, nɛ e bɔni nɔ́ hyɛmi ekohu. Lɔ ɔ se ɔ, e te si nɛ a baptisi lɛ, 19 nɛ e ye ní nɛ e ná he wami.

E kɛ kaseli ɔmɛ hi Damasko ligbi bɔɔ ko, 20 nɛ amlɔ nɔuu ɔ, e bɔni fiɛɛmi ngɛ kpe he ɔmɛ kaa Yesu ji Mawu Bi ɔ nɛ. 21 Se nihi tsuo nɛ a ngɛ lɛ tue bue ɔmɛ a nya kpɛ a he, nɛ a ngɛ bie ke: “Anɛ pi nyumu nɛ ɔ ji nɔ nɛ e tua nihi nɛ a ngɛ Yerusalɛm nɛ a tsɛɔ biɛ nɛ ɔ lo? Anɛ pi mɛ nɛ e ma numi konɛ e ngɔ* mɛ kɛ ya ha osɔfo nikɔtɔma amɛ ɔ he je nɛ e ba hiɛ ɔ ngɛ ɔ lo?” 22 Se Saulo ya nɔ nɛ e ná he wami babauu, nɛ e ha nɛ Yuda bi nɛ a ngɛ Damasko ɔ a he mi po, ejakaa e ma nɔ mi heii kɛ tsɔɔ mɛ kaa nɔ nɛ ɔ ji Kristo ɔ nɛ.

23 Jehanɛ ɔ, benɛ be pue mi ɔ, Yuda bi ɔmɛ pee kake nɛ a so kɛ wo e he kaa a maa tane e yi. 24 Se Saulo ná le kaa a so e yi nɔ. Jehanɛ hu ɔ, a ngɛ agbo ɔmɛ a nya hwɔɔe daa nyɔ kɛ pia konɛ a tane e yi. 25 Enɛ ɔ he ɔ, nyɔ mi ɔ, e kaseli ɔmɛ ngɔ lɛ kɛ wo kusii* mi, nɛ a ngmɛɛ e he bɔɔbɔɔbɔɔ kɛ gu puɔ ko nɛ a je ngɛ gbogbo ɔ mi ɔ mi kɛ ba zugba.

26 Benɛ e ba su Yerusalɛm ɔ, e bɔ mɔde si abɔ kaa e maa piɛɛ kaseli ɔmɛ a he, se mɛ tsuo a ngɛ gbeye yee, ejakaa a he we yi kaa kaselɔ ji lɛ. 27 Enɛ ɔ he ɔ, Banaba ba ye bua lɛ, nɛ e ngɔ lɛ kɛ ya bɔfo ɔmɛ a ngɔ, nɛ e ya de mɛ níhi tsuo nɛ ya nɔ ngɛ gbɛjegbɛ ɔ nɔ benɛ Saulo na Nyɔmtsɛ ɔ, kɛ bɔ nɛ Nyɔmtsɛ ɔ kɛ lɛ tu munyu ha, nɛ e kɛ kã tu munyu ngɛ Yesu biɛ ɔ mi ngɛ Damasko ɔ. 28 Lɔ ɔ he ɔ, e kɛ mɛ hi si, nɛ e yaa nɛ e baa faa ngɛ Yerusalɛm, nɛ e kɛ kã tuɔ munyu ngɛ Nyɔmtsɛ ɔ biɛ mi. 29 E kɛ Yuda bi nɛ a tuɔ Hela gbi ɔ tuɔ munyu nɛ e kɛ mɛ sãa nya, se ni nɛ ɔmɛ ngɛ hlae nɛ a maa tane e yi. 30 Benɛ nyɛmimɛ ɔmɛ ná le enɛ ɔ, a kɛ lɛ kple kɛ ya Kaisarea, nɛ a wo lɛ blɔ kɛ ho Taaso ya.

31 Lɔ ɔ se ɔ, ngɛ anɔkuale mi ɔ, asafo ɔ nɛ ngɛ Yudea, kɛ Galilea, kɛ Samaria ní ɔmɛ a mi ɔ tsuo sɛ tue mi jɔmi be ko mi, nɛ a he ngɛ wae; nɛ be abɔ nɛ asafo ɔ ngɛ nyɛɛe ngɛ Yehowa* gbeye yemi kɛ mumi klɔuklɔu ɔ bua womi mi ɔ, jã nɔuu nɛ e yi ngɛ blie.

32 Jehanɛ ɔ, benɛ Petro hia blɔ kɛ ngɛ kpokpa a mi tsuo nyɛɛe ɔ, e kple kɛ ba ni klɔuklɔu ɔmɛ nɛ a ngɛ Lida a hu a ngɔ. 33 Ngɛ lejɛ ɔ, e na nyumu ko nɛ a tsɛɛ lɛ ke Aenea nɛ e hule* kɛ fɔɔ si ngɛ sa nɔ jeha kpaanyɔ sɔuu. 34 Petro de lɛ ke: “Aenea, Yesu Kristo tsa mo. Tee si nɛ o dla o sa a.” Kɛkɛ nɛ e te si amlɔ nɔuu. 35 Benɛ nihi tsuo nɛ a ngɛ Lida kɛ Sharon Nga a nɔ ɔ na lɛ ɔ, a kpale kɛ ba Nyɔmtsɛ ɔ ngɔ.

36 Jehanɛ ɔ, kaselɔ ko ngɛ Yopa nɛ a tsɛɛ lɛ ke Tabita, nɛ e sisi ji “Dɔkas.”* Kpakpa peemi hyi lɛ tɔ, nɛ nihi a he peeɔ lɛ mɔbɔ nɛ e keɔ mɛ ní. 37 Se ngɛ jamɛ a be ɔ mi ɔ, e ba nu hiɔ nɛ e gbo. Enɛ ɔ he ɔ, a du ha lɛ, nɛ a ngɔ lɛ kɛ fɔ sa nɔ ngɛ hiɔwe tsu ko mi. 38 Akɛnɛ Lida kɛ Yopa a kpɛti kɛ we he je ɔ, benɛ kaseli ɔmɛ nu kaa Petro ngɛ jamɛ a ma a mi ɔ, a tsɔ nyumuhi enyɔ kɛ ya e ngɔ konɛ a kɛ hɛdɔ nɛ ya de lɛ ke: “Wa kpa mo pɛɛ nɛ o ba wa ngɔ oya nɔuu.” 39 Kɛkɛ nɛ Petro te si nɛ e kɛ mɛ ho. Nɛ benɛ e ya su ɔ, a ngɔ lɛ kɛ kuɔ kɛ ya hiɔwe tsu ɔ mi; nɛ yalɔyi ɔmɛ tsuo ba e ngɔ, a ngɛ ya foe nɛ a ngɔ tadehi kɛ tade klɔiihi* nɛ Dɔkas pee benɛ e kɛ mɛ ngɛ ɔ kɛ ba tsɔɔ lɛ. 40 Lɔ ɔ se ɔ, Petro je nɔ fɛɛ nɔ kpo, nɛ e kpla si nɛ e sɔle. Kɛkɛ nɛ e plɛ e hɛ mi kɛ tsɔɔ gbogboe ɔ, nɛ e de ke: “Tabita, tee si!” Yo ɔ bli e hɛ ngmɛ, nɛ benɛ e hɛ ngmɛ gba Petro nɔ ɔ, e hi si. 41 Petro pɛtɛ e nine he, nɛ e wo e nɔ, nɛ e tsɛ ni klɔuklɔu ɔmɛ kɛ yalɔyi ɔmɛ kɛ ba, nɛ e ngɔ lɛ kɛ ba da si ngɛ a hɛ mi hɛ ngmengmle. 42 A nu nɔ́ nɛ ɔ he ngɛ Yopa tsuo, nɛ nihi fuu ba he Nyɔmtsɛ ɔ ye. 43 Petro hi si be bɔɔ ngɛ Yopa ngɛ Simon, lohwe he womi tsopa wolɔ ɔ ngɔ.

10 Jehanɛ ɔ, nyumu ko ngɛ Kaisarea nɛ a tsɛɛ lɛ ke Konelio, e ji ta buli nɛ a tsɛɛ mɛ ke Italia tabo* ɔ, a nɔkɔtɔma.* 2 E ji nyumu nɛ e jaa Mawu, nɛ e kɛ e we mi bimɛ ɔmɛ tsuo a yeɔ Mawu gbeye, nɛ e naa nihi mɔbɔ nɛ e keɔ mɛ ní babauu, nɛ e yaa nɔ nɛ e kpaa Mawu pɛɛ wawɛɛ. 3 Jamɛ a ligbi ɔ maa pee ngmlɛfia nɛɛne* ɔ mi ɔ, e na Mawu bɔfo ko heii ngɛ nina mi nɛ e ba e ngɔ ba de lɛ ke: “Konelio!” 4 Konelio hyɛ lɛ too, nɛ e tsui po, nɛ e bi lɛ ke: “Nyɔmtsɛ, mɛni sane?” E de lɛ ke: “Sɔlemi nɛ o sɔleɔ kɛ nihi a he mɔbɔ nɛ e peeɔ mo nɛ o keɔ mɛ ní ɔ kuɔ kɛ ya su hiɔwe kaa kaimi nɔ́ ngɛ Mawu hɛ mi. 5 Enɛ ɔ he ɔ, amlɔ nɛ ɔ, moo tsɔ nyumuhi kɛ ya Yopa nɛ a ya tsɛ Simon nɛ a tsɛɛ lɛ ke Petro ɔ kɛ ba. 6 Nyumu nɛ ɔ ya to Simon nɛ e ji lohwe he womi tsopa wolɔ ɔ nɛ e we ngɛ wo ɔ nya a nubwɔ.” 7 Benɛ bɔfo ɔ nɛ e kɛ lɛ tu munyu ɔ je nɔuu pɛ ɔ, e tsɛ e sɔmɔli ɔmɛ a kpɛti ni enyɔ kɛ ta bulɔ ko nɛ e yeɔ Mawu gbeye kɛ je e tsɔli ɔmɛ a kpɛti, 8 nɛ e de mɛ nɔ́ fɛɛ nɔ́ nɛ e tsɔ mɛ kɛ ya Yopa.

9 E nɔ jena benɛ a ngɛ blɔ nɔ kɛ yaa nɛ e piɛ bɔɔ nɛ a maa su ma a mi ɔ, maa pee ngmlɛfia ekpane* ɔ mi ɔ, Petro kuɔ kɛ ya tsu ɔ yi mi konɛ e ya sɔle. 10 Se hwɔ ye lɛ wawɛɛ nɛ e ngɛ nɔ́ ko hlae nɛ e maa ye. Benɛ a ngɛ niye ní ɔ hooe ɔ, nɔ́ nɔ e nɔ 11 nɛ e na nɛ hiɔwe nya bli nɛ nɔ́ ko* ngɛ si kplee nɛ e ngɛ kaa klala ngua nɛ a hɛɛ e kɔnya eywiɛ ɔmɛ a mi nɛ́ a ngɛ he ngmɛɛe bɔɔbɔɔbɔɔ kɛ ma zugba; 12 nɛ zugba a nɔ lohwe nane eywiɛɛywiɛtsɛmɛ, kɛ akɔtɔku kɛ sinɔ a henɔhi,* kɛ hiɔwe lohwe pɛlitsɛmɛ slɔɔtoslɔɔto ɔmɛ tsuo eko ngɛ mi. 13 Kɛkɛ nɛ gbi ko de lɛ ke: “Petro, tee si nɛ o gbe nɛ o ye!” 14 Se Petro de ke: “Ohoo, Nyɔmtsɛ, i yi nɔ́ ko nɛ e bleɔ nɔ nɛ e he tsɔ we hyɛ.” 15 Nɛ gbi ɔ de lɛ ekohu si enyɔne ke: “Kpa níhi nɛ Mawu ha nɛ a he tsɔ ɔ tsɛmi ke níhi nɛ a he tsɔ we.” 16 Nɔ́ nɛ ɔ ya nɔ si etɛ, nɛ oya nɔuu nɛ a ngɔ nɔ́ ɔ* kɛ ho hiɔwe ya.

17 Benɛ Petro juɛmi gbɛ ngɛ nina a he nɛ e ngɛ he susue kaa mɛni e tsɔɔ lo ɔ, jamɛ a be ɔ mi nɔuu ɔ, nyumu ɔmɛ nɛ Konelio tsɔ mɛ ɔ bi he nɛ Simon we ɔ ngɛ, nɛ a ya da si ngɛ lejɛ ɔ, ngɛ agbo ɔ nya. 18 A tsɛ nɛ a bi si kaa Simon nɛ a tsɛɛ lɛ ke Petro ɔ ba to nubwɔ ngɛ lejɛ ɔ lo. 19 Benɛ Petro ngɛ nina a he susue loloolo ɔ, mumi ɔ de lɛ ke: “Hyɛ! Nyumuhi etɛ ngɛ mo hlae. 20 Enɛ ɔ he ɔ, tee si, kple kɛ ya sisi ɔ nɛ o ya a ngɔ, nɛ o yi mi ko pee mo enyɔɔnyɔ kulaa, ejakaa imi nɛ i tsɔ mɛ.” 21 Kɛkɛ nɛ Petro kple kɛ ya sisi ɔ nɛ e ya na nyumu ɔmɛ, nɛ e de ke: “Imi ji nɛ ɔ nɛ, imi ji nɔ nɛ nyɛ ngɛ hlae ɔ nɛ. Mɛni ji nyɛ we amaniɛ?” 22 A de ke: “Konelio, ta buli a nɔkɔtɔma ko, nyumu nɛ e ji dalɔ nɛ e yeɔ Mawu gbeye, nɛ́ Yuda ma a tsuo tuɔ e he munyu kpakpa a nine su Mawu blɔ tsɔɔmi ko nɔ kɛ gu bɔfo klɔuklɔu ko nɔ kaa e tsɔ kɛ ba tsɛ mo nɛ o ba e we ɔ mi konɛ e nu nɔ́ nɛ o ma de ɔ.” 23 Enɛ ɔ he ɔ, e fɔ mɛ nine kɛ ya we ɔ mi, nɛ e ha nɛ a hi e ngɔ kaa e nibwɔhi.

E nɔ jena a, e te si nɛ e kɛ mɛ pue nɔ kɛ ho, nɛ nyɛmimɛ ɔmɛ nɛ a je Yopa a, a ti ni komɛ piɛɛ e he kɛ ho. 24 E nɔ jena a, e sɛ Kaisarea ma a mi. Ngɛ anɔkuale mi ɔ, Konelio ngɛ mɛ blɔ hyɛe, nɛ e tsɛ e weku li ɔmɛ kɛ e huɛmɛ nɛ nyu bi ngɛ e kɛ mɛ a kpɛti ɔ tsuo kɛ ba kpe. 25 Benɛ Petro sɛ we ɔ mi ɔ, Konelio kɛ lɛ ba kpe, nɛ e kpla si ngɛ Petro nane nya, nɛ e ngɔ e hɛ mi kɛ bu si. 26 Se Petro wo e nɔ, nɛ e de ke: “Tee si; imi hu adesa kɛkɛ ji mi.” 27 Benɛ e kɛ lɛ sɛɛ ní kɛ ya sɛ we ɔ mi ɔ, e na nihi babauu nɛ a bua a he nya. 28 E de mɛ ke: “Ngɛ anɔkuale mi ɔ, nyɛ le kaa mlaa ngmɛ́ blɔ kaa Yuda no kɛ nɔ ko nɛ e je ma kpa mi nɛ a bɔ aloo e hɛ lɛ kɛ su e he, se kɛ̃ ɔ, Mawu ha nɛ i na kaa e sɛ nɛ ma tsɛ nɔ ko kaa e ji nɔ nɛ mu ngɛ e he loo e he tsɔ we. 29 Enɛ ɔ he ɔ, benɛ o tsɔ kɛ ba tsɛ mi ɔ, i kɛ nɔ́ ko je we ye nya kulaa, nɛ i ba. Lɔ ɔ he ɔ, nyɛ de mi nɔ́ he je nɛ nyɛ tsɔ kɛ ba tsɛ mi ɔ.”

30 Kɛkɛ nɛ Konelio de ke: “Mwɔnɛ ɔ ji ligbi eywiɛ maa pee ngmlɛfia nɛ ɔ mi ɔ, i ngɛ sɔlee ngɛ ye we ɔ mi ngɛ ngmlɛfia nɛɛne* ɔ mi; ngɛ jamɛ a be ɔ mi ɔ, nyumu ko kɛ e he tade nɛ e ngɛ kpɛe ba da si ngɛ ye hɛ mi 31 nɛ e de ke: ‘Konelio, a nu o sɔlemi ɔ nɛ a ha heto, nɛ nihi a he mɔbɔ nɛ e peeɔ mo nɛ o keɔ mɛ ní ɔ hu Mawu kai. 32 Enɛ ɔ he ɔ, moo tsɔ kɛ ya Yopa nɛ a ya tsɛ Simon nɛ a tsɛɛ lɛ ke Petro ɔ kɛ ba. Nyumu nɛ ɔ ya to nubwɔ ngɛ Simon nɛ ji lohwe he womi tsopa wolɔ ko nɛ e ngɛ wo ɔ nya a we ɔ mi.’ 33 Enɛ ɔ he ɔ, oya nɔuu nɛ i tsɔ ke a ba tsɛ mo kɛ ba, nɛ o bɔ mɔde kaa o ba hiɛ ɔ. Amlɔ nɛ ɔ, wɔ tsuo wa ba pue ngɛ Mawu hɛ mi konɛ waa nu níhi tsuo nɛ Yehowa* fã mo ke o de ɔ.”

34 Kɛkɛ nɛ Petro bɔni munyu tumi nɛ e de ke: “Amlɔ nɛ ɔ lɛɛ, i nu sisi nitsɛnitsɛ kaa Mawu hlɛ nɔ mi, 35 mohu ɔ, ngɛ ma fɛɛ ma mi ɔ, nɔ fɛɛ nɔ nɛ e yeɔ lɛ gbeye nɛ e peeɔ nɔ́ nɛ da a, e kplɛɛɔ e nɔ. 36 E tsɔ nɛ a ngɔ munyu ɔ kɛ ya ha Israel bi ɔmɛ konɛ a jaje tue mi jɔmi sane kpakpa a ngɔ tsɔɔ mɛ kɛ gu Yesu Kristo nɔ—nɔ nɛ ɔ ji nihi tsuo a Nyɔmtsɛ ɔ nɛ. 37 Nyɛ le sane ɔ nɛ a tu he munyu kɛ kpa Yudea tsuo, nɛ a je sisi kɛ je Galilea ngɛ baptisimi nɛ Yohane fiɛɛ ɔ se ɔ: 38 e kɔɔ Yesu nɛ e je Nazarɛt ɔ he, bɔ nɛ Mawu ngɔ mumi klɔuklɔu ɔ kɛ he wami kɛ pɔ lɛ nu, nɛ e ya kpa zugba a tsuo nɔ, nɛ e pee kpakpa, nɛ e tsa nihi tsuo nɛ Abosiami ngɛ mɛ yi mi wae ɔ, ejakaa Mawu piɛɛ e he. 39 Nɛ wɔ ji ní nɛ ɔmɛ tsuo nɛ e pee ngɛ Yuda bi ɔmɛ a ma a mi kɛ Yerusalɛm ɔ he odasefohi; se a sɛu lɛ ngɛ tso nɔ nɛ a gbe lɛ. 40 Mawu tle nyumu nɛ ɔ si ngɛ ligbi etɛne ɔ nɔ, nɛ e ngmɛ lɛ blɔ nɛ e je e he kpo,* 41 pi kɛ tsɔɔ ni ɔmɛ tsuo, se kɛ tsɔɔ odasefohi nɛ Mawu sɛ hlami nɛ e hla mɛ ɔ, kɛ wɔ nɛ waa kɛ lɛ ye ní nɛ wa nu ní benɛ a tle lɛ si kɛ je gbeje se ɔ. 42 Jehanɛ hu ɔ, e fã wɔ kaa waa fiɛɛ kɛ tsɔɔ ni ɔmɛ, nɛ waa ye odase kɛ pi si kaa nɔ nɛ ɔ ji nɔ nɛ Mawu fã lɛ konɛ e kojo nihi nɛ a hɛ ngɛ, kɛ ni nɛmɛ nɛ a gbo ɔ. 43 E he odase nɛ gbali ɔmɛ tsuo ye, kaa nɔ fɛɛ nɔ nɛ e ma ná hemi kɛ yemi ngɛ e mi ɔ, e ma ná yayami pami kɛ gu e biɛ ɔ nɔ.”

44 Benɛ Petro ngɛ sane nɛ ɔmɛ a he munyu tue nɛ e nya mɛ si lolo ɔ, mumi klɔuklɔu ɔ ba nihi tsuo nɛ a ngɛ munyu ɔ nue ɔmɛ a nɔ. 45 Nɛ e pee nihi nɛ a po mɛ nɛ a he ye* nɛ a piɛɛ Petro he kɛ ba a nyakpɛ, ejakaa a ngɛ nike ní nɛ a kɛ haa faa nɛ ji mumi klɔuklɔu ɔ plɛe kɛ ngɛ nihi nɛ a je je ma amɛ a mi ɔ hu a nɔ puee. 46 Ejakaa a nu nɛ a ngɛ munyu tue ngɛ ma se gbihi* a mi, nɛ a ngɛ Mawu we agboje ɔ jajee. Kɛkɛ nɛ Petro he nɔ ke: 47 “Anɛ nɔ ko ma nyɛ maa tsi nyu nya konɛ a ko nyɛ nɛ a baptisi ni nɛ ɔmɛ nɛ a nine su mumi klɔuklɔu ɔ nɔ kaa bɔ nɛ wɔ hu wa nine su nɔ ɔ lo?” 48 Kɛkɛ nɛ e fã ke a baptisi mɛ ngɛ Yesu Kristo biɛ mi. Lɔ ɔ se ɔ, a kpa lɛ pɛɛ kaa e kɛ mɛ nɛ e hi si be bɔɔ.

11 Jehanɛ ɔ, bɔfo ɔmɛ kɛ nyɛmimɛ ɔmɛ nɛ a ngɛ Yudea a nu kaa nihi nɛ a je je ma amɛ a mi ɔ hu pɛtɛ Mawu munyu ɔ he. 2 Enɛ ɔ he ɔ, benɛ Petro kuɔ kɛ ba Yerusalɛm ɔ, nihi nɛ a fĩ nɔ pomi se ɔ bɔni munyu tumi kɛ bɔni lɛ simi.* 3 A de ke: “O ya nyumuhi nɛ a pui mɛ ɔmɛ a we mi nɛ o kɛ mɛ ya ye ní.” 4 Kɛkɛ nɛ Petro tsɔɔ mɛ sane ɔ nya fitsofitso, nɛ e de ke:

5 “Jinɛ i ngɛ Yopa ma a mi nɛ i ngɛ sɔlee, nɛ benɛ nɔ́ nɔ ye nɔ ɔ, i na nina ko, i na nɛ nɔ́ ko* ngɛ si kplee nɛ e ngɛ kaa klala ngua nɛ a hɛɛ e kɔnya eywiɛ ɔmɛ a mi nɛ́ a ngɛ he ngmɛɛe bɔɔbɔɔbɔɔ kɛ je hiɔwe kɛ ma zugba, nɛ e ba ye ngɔ. 6 Benɛ i hyɛ nɔ́ ɔ mi too ɔ, i na zugba a nɔ lohwe nane eywiɛɛywiɛtsɛmɛ, lohwe awi yeli, akɔtɔku kɛ sinɔ a henɔhi,* kɛ hiɔwe lohwe pɛlitsɛmɛ. 7 Jehanɛ hu ɔ, i nu nɛ gbi ko de mi ke: ‘Petro, tee si nɛ o gbe nɛ o ye!’ 8 Se i de ke: ‘Ohoo, Nyɔmtsɛ, i yi nɔ́ ko nɛ e bleɔ nɔ nɛ e he tsɔ we hyɛ.’ 9 Gbi ɔ nɛ e je hiɔwe ɔ pɛ ekohu si enyɔne nɛ e he nɔ ke: ‘Kpa níhi nɛ Mawu ha nɛ a he tsɔ ɔ tsɛmi ke níhi nɛ a he tsɔ we.’ 10 Nɔ́ nɛ ɔ ya nɔ si etɛ, kɛkɛ nɛ a ngɔ nɔ́ ɔ tsuo kɛ ho hiɔwe ya ekohu. 11 Jamɛ a be ɔ mi nɔuu hu ɔ, nyumuhi etɛ nɛ a tsɔ mɛ kɛ je Kaisarea a ba nɛ a ba daa si ngɛ we ɔ nɛ wa ya to mi ɔ nya. 12 Kɛkɛ nɛ mumi ɔ de mi ke i kɛ mɛ nɛ ya nɛ ye yi mi nɛ e ko pee mi enyɔɔnyɔ kulaa. Se nyɛmimɛ nyumu ekpa nɛ ɔmɛ hu kɛ mi ya, nɛ wa ya sɛ nyumu ɔ we ɔ mi.

13 “E bɔ wɔ bɔ nɛ e na hiɔwe bɔfo nɛ e ba da si ngɛ e we ɔ mi nɛ e de ke: ‘Moo tsɔ kɛ ya Yopa nɛ a ya tsɛ Simon nɛ a tsɛɛ lɛ ke Petro ɔ kɛ ba, 14 nɛ e ma de mo níhi nɛ a maa gu nɔ kɛ he mo kɛ o we mi bimɛ ɔmɛ tsuo nyɛ yi wami.’ 15 Se benɛ i bɔni munyu tumi ɔ, mumi klɔuklɔu ɔ ba a nɔ kaa bɔ nɛ e ba wɔ hu wa nɔ sisije ɔ. 16 Kɛkɛ nɛ i kai munyu nɛ Nyɔmtsɛ ɔ tu ɔ, kaa bɔ nɛ e pɔɔ demi ke: ‘Yohane ngɔ nyu kɛ baptisi nihi, se nyɛɛ lɛɛ a maa ngɔ mumi klɔuklɔu kɛ baptisi nyɛ’ ɔ. 17 Enɛ ɔ he ɔ, ke Mawu ngɔ nike ní nɛ e kɛ haa faa nɛ e kɛ ha wɔ nihi nɛ wa he Nyɔmtsɛ Yesu Kristo ye ɔ nɔuu kɛ ha mɛ ɔ, lɛɛ mɛnɔ ji mi nɛ ma nyɛ ma tsi Mawu nya?”*

18 Benɛ a nu ní nɛ ɔmɛ ɔ, a ma a nya, nɛ a wo Mawu hɛ mi nyami, nɛ a de ke: “Ke jã a, lɛɛ Mawu ha nihi nɛ a je je ma amɛ a mi ɔ tsui tsakemi nɛ e kɛ nɔ yaa wami mi ɔ.”

19 Jehanɛ ɔ, nihi nɛ yi mi wami nɛ te si ngɛ Steven gbenɔ ɔ se ɔ ha nɛ a gbɛ fĩa a je kɛ ho Foinike, Kipro, kɛ Antiokia ya, se a tu munyu ɔ kɛ tsɔɔ Yuda bi ɔmɛ pɛ. 20 Se a kpɛti nyumu komɛ nɛ a je Kipro kɛ Kirene ɔ ba Antiokia nɛ a kɛ nihi nɛ a tuɔ Hela gbi ɔ bɔni munyu tumi, nɛ a ngɛ Nyɔmtsɛ Yesu he sane kpakpa a jajee. 21 Jehanɛ se hu ɔ, Yehowa* nine kɛ mɛ ngɛ, nɛ nihi babauu ba he ye nɛ a kpale kɛ ba Nyɔmtsɛ ɔ ngɔ.

22 A he sane ɔ ya su asafo ɔ nɛ ngɛ Yerusalɛm ɔ tue mi, nɛ a tsɔ Banaba kɛ ya Antiokia tɔɔ. 23 Benɛ e ya su nɛ e na Mawu dloomi ɔ, e nya nɛ e bɔni mɛ tsuo he wami womi kaa a ma nya si ngɛ a tsui mi kaa a maa ya nɔ ngɛ Nyɔmtsɛ ɔ mi; 24 ejakaa e ji nɔmlɔ kpakpa, nɛ mumi klɔuklɔu kɛ hemi kɛ yemi hyi lɛ tɔ. Nɛ a ngɔ nihi babauu kɛ ba piɛɛ Nyɔmtsɛ ɔ he. 25 Enɛ ɔ he ɔ, e je kɛ ho Taaso ya konɛ e ya hla Saulo saminya. 26 Benɛ e na lɛ ɔ, e ngɔ lɛ kɛ ba Antiokia. Lɔ ɔ he ɔ, jeha mluku ɔ, a kɛ mɛ bua a he nya ngɛ asafo ɔ mi, nɛ a tsɔɔ nihi babauu ní, nɛ Antiokia ji he nɛ Mawu ha nɛ a tsɛ kaseli ɔmɛ ngɛ kekleekle ke Kristofohi.

27 Ngɛ jamɛ a ligbi ɔmɛ a mi ɔ, gbali kple kɛ je Yerusalɛm kɛ ba Antiokia. 28 A kpɛti nɔ kake nɛ a tsɛɛ lɛ ke Agabo ɔ te si da si, nɛ kɛ gu mumi klɔuklɔu ɔ nɔ ɔ, e gba kɛ fɔ si kaa e be kɛe nɛ hwɔ ngua ko maa ba ngɛ zugba a nɔ hehi tsuo nɛ nimli ngɛ ɔ, nɛ ngɛ anɔkuale mi ɔ, e ba mi jã ngɛ Klaudio be ɔ mi. 29 Enɛ ɔ he ɔ, kaseli ɔmɛ mwɔ a yi mi kpɔ kaa a ti nɔ fɛɛ nɔ ma ha nɔ́ ko bɔ nɛ e ma nyɛ, konɛ a kɛ mane nyɛmimɛ ɔmɛ nɛ a ngɛ Yudea a nɛ́ a kɛ pɛne mɛ;* 30 nɛ a pee jã. A gu Banaba kɛ Saulo a nine nɔ nɛ a kɛ mane nikɔtɔma amɛ.

12 Maa pee jamɛ a be ɔ mi ɔ, Hɛrode nɛ e ji matsɛ ɔ bɔni ni komɛ nɛ a ngɛ asafo ɔ mi ɔ yi mi wami. 2 E ngɔ klaate kɛ gbe Yohane nyɛminyumu Yakobo. 3 Benɛ e na kaa Yuda bi ɔmɛ a bua jɔ he ɔ, e ya nu Petro hu nɛ e wo lɛ tsu. (Nɔ́ nɛ ɔ ya nɔ ngɛ Abolo Nɛ Masa Be Mi gbijlɔ be ɔ mi.) 4 E nu lɛ nɛ e wo lɛ tsu, nɛ e ngɔ lɛ kɛ ha ta buli eywiɛɛywiɛ a kuuhi eywiɛ nɛ a tsakeɔ a sibi ɔ konɛ a bu e he, kɛ yi mi tomi ɔ kaa ke a ye He Tsɔmi ɔ ta a, e ma je lɛ kpo kɛ ba ni ɔmɛ a hɛ mi.* 5 Enɛ ɔ he ɔ, a ngɔ Petro kɛ to ngɛ tsu ɔ mi, se asafo ɔ ngɛ sɔlee wawɛɛ kɛ ngɛ Mawu hae ngɛ e he.

6 Benɛ be ngɛ sue nɛ Hɛrode ma je lɛ kpo ɔ, jamɛ a nyɔ ɔ mi ɔ, Petro hwɔɔ si nɛ a ngɔ kɔsɔkɔsɔ enyɔ kɛ fi lɛ ngɛ ta buli enyɔ a kpɛti, nɛ buli ngɛ sinya a nya nɛ a ngɛ tsu ɔ he bue. 7 Se hyɛ! Yehowa* bɔfo ko ba da si ngɛ lejɛ ɔ, nɛ la kpɛ ngɛ tsu ɔ mi. E gba Petro kasa mi ma, nɛ e tsɛ̃ɛ lɛ, nɛ e de lɛ ke: “Tee si esɔ!” Nɛ kɔsɔkɔsɔ ɔmɛ kplɔ ngɛ e nine ɔmɛ a he kɛ pue si. 8 Hiɔwe bɔfo ɔ de lɛ ke: “Dla o he,* nɛ o wo o tokota amɛ.” E pee jã. Nyagbe ɔ, hiɔwe bɔfo ɔ de lɛ ke: “Wo tade nɛ o woɔ ngɛ o tade ɔ nɔ ɔ nɛ o ya nɔ nɛ o nyɛɛ ye se.” 9 Nɛ e je kpo nɛ e ya nɔ nɛ e nyɛɛ e se, se e li kaa nɔ́ nɛ ngɛ nɔ yae kɛ gu hiɔwe bɔfo ɔ nɔ ɔ ji nɔ́ nitsɛ. Ngɛ anɔkuale mi ɔ, e susu kaa nina lɛ e ngɛ nae ɔ nɛ. 10 Benɛ a be kekleekle buli ɔmɛ kɛ buli enyɔne ɔmɛ a he ɔ, a ba su dade agbo ɔ nɛ a kɛ yaa ma a mi ɔ he, nɛ lɔ ɔ nitsɛ hu bli kɛ ha mɛ. Benɛ a je kpo ɔ, a kple kɛ gu gbɛjegbɛ ko nɔ nɛ amlɔ nɔuu ɔ, bɔfo ɔ je e he. 11 Nɛ benɛ Petro yɔse nɔ́ nɛ ngɛ nɔ yae ɔ, e de ke: “Amlɔ nɛ ɔ lɛɛ i ba na heii kaa Yehowa* tsɔ e bɔfo nɛ e ba kpɔ̃ mi kɛ je Hɛrode dɛ mi, nɛ e kpɔ̃ mi kɛ je nɔ́ fɛɛ nɔ́ nɛ Yuda bi ɔmɛ ngɛ blɔ hyɛe kaa e maa ba a mi.”

12 Benɛ e yɔse enɛ ɔ se ɔ, e pue nɔ kɛ ho Yohane nɛ a tsɛɛ lɛ ke Maako ɔ yayo Maria we ɔ mi ya, he nɛ nihi saii bua a he nya ngɛ nɛ a ngɛ sɔlee ɔ. 13 Benɛ e si agbo ɔ, mawayo ko nɛ a tsɛɛ lɛ ke Roda a ba konɛ e ba hyɛ nɔ nɛ e ngɛ agbo ɔ sie ɔ. 14 Benɛ e yɔse Petro gbi ɔ, bua jɔmi sɔuu nɛ e ná he je ɔ, e bli we agbo ɔ, mohu ɔ, e tu fo kɛ ya mi nɛ e ya bɔ amaniɛ kaa Petro daa si ngɛ agbo ɔ se. 15 A de lɛ ke: “O yi ngɛ puɛe.” Se e ya nɔ nɛ e tsɔɔ kaa nɔ́ nɛ e ngɛ dee ɔ ngɛ mi. Nɛ a bɔni demi ke: “Lɛɛ e bɔfo mɔ.” 16 Se loloolo ɔ, Petro ngɛ lejɛ ɔ nɛ e ngɛ agbo ɔ sie. Benɛ a bli agbo ɔ, a na lɛ, nɛ e pee mɛ nyakpɛ. 17 Se e ngɔ e nine kɛ pee okadi kɛ tsɔɔ mɛ kaa a pee kɔ̃, nɛ e de mɛ bɔ nɛ Yehowa* plɛ kɛ je lɛ kɛ je tsu ɔ mi ha a fitsofitso, nɛ e de mɛ ke: “Nyɛɛ ya nɛ nyɛ ya sɛɛ ní nɛ ɔmɛ ngɔ ha Yakobo kɛ nyɛmimɛ ɔmɛ.” Kɛkɛ nɛ e je kpo nɛ e hia blɔ kɛ ho he kpa ya.

18 Jehanɛ ɔ, benɛ je na a, hoo peemi te si ngɛ ta buli ɔmɛ a kpɛti, ejakaa a li nɔ́ nɛ ba Petro nɔ. 19 Se benɛ Hɛrode hla lɛ saminya nɛ e nɛ lɛ ɔ, e kojo buli ɔmɛ nɛ e fã ke a ngɔ mɛ kɛ ho nɛ a ya gbla a tue; nɛ e je Yudea nɛ e kple kɛ ho Kaisarea ya, nɛ e ya ye be saii ngɛ lejɛ ɔ.

20 Jehanɛ ɔ, e mi mi fu Tiro kɛ Sidon bi ɔmɛ.* Enɛ ɔ he ɔ, a ba e ngɔ kɛ juɛmi kake, nɛ benɛ a ba plɛ Blasto, nɛ ji nyumu ɔ nɛ e hyɛɛ níhi nɛ yaa nɔ ngɛ matsɛ ɔ we ɔ mi* ɔ nɔ ɔ yi mi ta a, a kpa pɛɛ kɛ ha tue mi jɔmi, ejakaa matsɛ ɔ zugba a nɔ nɛ a ma a náa niye ní kɛ jeɔ. 21 Ngɛ ligbi ko nɛ a to ɔ nɔ ɔ, Hɛrode wo matsɛ tade, nɛ e ba hi si ngɛ kojomi sɛ ɔ nɔ, nɛ e bɔni munyu tumi kɛ bɔni mɛ tsɔɔmi. 22 Kɛkɛ nɛ ni ɔmɛ nɛ a bua a he nya a bɔni ngmlaa kpami ke: “Mawu ko gbi ji nɛ ɔ nɛ, pi adesa ko gbi!” 23 Amlɔ nɔuu nɛ Yehowa* bɔfo ɔ fia lɛ nɔ́, ejakaa e ngɔɛ hɛ mi nyami ɔ kɛ ha we Mawu, nɛ gɔgɔhi ye lɛ nɛ e gbo.

24 Se Yehowa* munyu ɔ ya nɔ nɛ e ngɛ wae nɛ e ngɛ gbɛe kɛ ngɛ fĩae.

25 Banaba kɛ Saulo lɛɛ, benɛ a ya tsu nɔ pɛnemi ní tsumi ɔ tsuo ngɛ Yerusalɛm ta a, a kpale a se, nɛ a ngɔ Yohane nɛ a tsɛɛ lɛ ke Maako hulɔ ɔ kɛ piɛɛ a he.

13 Jehanɛ ɔ, gbali kɛ tsɔɔli ngɛ Antiokia asafo ɔ mi. Mɛ ji: Banaba, Simeon nɛ a tsɛɛ lɛ ke Nija, Lusio nɛ e je Kirene ɔ, Manaen nɛ e kɛ Hɛrode nɛ ji kpokpa nɔ yelɔ ɔ ya sukuu ɔ, kɛ Saulo. 2 Benɛ a ngɛ Yehowa* sɔmɔe* nɛ a ngɛ hwɔ hae ɔ, mumi klɔuklɔu ɔ de ke: “Nyɛ je Banaba kɛ Saulo ngɔ ha mi kɛ ha ní tsumi nɛ lɔ ɔ he je i tsɛ mɛ ngɛ ɔ.” 3 Kɛkɛ nɛ benɛ a ha hwɔ nɛ a sɔle ta a, a ngɔ a ninehi kɛ pue a nɔ nɛ a wo mɛ blɔ.

4 Enɛ ɔ he ɔ, nyumu nɛ ɔmɛ nɛ mumi klɔuklɔu ɔ tsɔ mɛ ɔ kple kɛ ho Seleukia ya, nɛ a hi lɛ mi kɛ je lejɛ ɔ kɛ ho Kipro ya. 5 Benɛ a su Salamis ɔ, a bɔni Mawu munyu ɔ jajemi ngɛ Yuda bi ɔmɛ a kpe he ɔmɛ. Nɛ a kɛ Yohane hu nyɛɛ kaa a sɔmɔlɔ.*

6 Benɛ a kpa zugba kpɔ ɔ nɛ nyu bɔle lɛ ɔ tsuo nɔ hluu kɛ ya su Pafos ɔ, a kɛ nyumu ko nɛ e ji Yuda no nɛ a tsɛɛ lɛ ke Baa-Yesu, nɛ e ji kunya yelɔ kɛ lakpa gbalɔ ɔ ya kpe. 7 E kɛ amlaalo* Sɛgio Paulos nɛ e ji nyumu ní lelɔ ɔ lɛ ngɛ. Benɛ e tsɛ Banaba kɛ Saulo kɛ ba e ngɔ ɔ, nyumu nɛ ɔ suɔ wawɛɛ kaa e maa bu Mawu munyu ɔ tue. 8 Se Elimas nɛ ji kunya yelɔ ɔ (jã nɛ e biɛ ɔ sisi tsɔɔ) bɔni si temi kɛ bɔni mɛ womi, nɛ e ngɛ mɔde bɔe kaa e maa kpale amlaalo ɔ kɛ je hemi kɛ yemi ɔ he. 9 Kɛkɛ nɛ mumi klɔuklɔu hyi Saulo nɛ a tsɛɛ lɛ ke Paulo hulɔ ɔ tɔ, nɛ e hyɛ e hɛ mi totooto 10 nɛ e de ke: “Oo nyumu nɛ ojo fiami kɛ yayami slɔɔtohi tsuo hyi mo tɔ, mo Abosiami bi, mo nɛ o ji nɔ́ kpakpa fɛɛ nɔ́ kpakpa he he nyɛlɔ, Yehowa* blɔ ɔmɛ nɛ a da nɛ o ngɛ mɛ kpɛ̃e ɔ, o be kpae lo? 11 Hyɛ! Yehowa* nine fɔɔ si ngɛ o nɔ, nɛ o hɛ ngmɛ ma yu, nɛ o be pu la nae kɛ ma ya su be ko.” Amlɔ nɔuu nɛ afua nɛ e mi ti kɛ diblii nɔ e nɔ, nɛ e bɔni si tataami nɛ e ngɛ nɔ ko hlae nɛ e ta e dɛ mi nɛ e tsɔɔ lɛ blɔ. 12 Kɛkɛ nɛ benɛ amlaalo ɔ na nɔ́ nɛ ba a, e he ye, ejakaa e nya kpɛ e he ngɛ Yehowa* tsɔɔmi ɔ he.

13 Jehanɛ ɔ, Paulo kɛ nihi nɛ a piɛɛ e he ɔ je Pafos nɛ a gu wo ɔ nɔ kɛ ba Pɛga ngɛ Pamfilia. Se Yohane je a he nɛ e kpale kɛ ho Yerusalɛm ya. 14 Se mɛɛ lɛɛ a tsa nɔ kɛ je Pɛga kɛ ba Antiokia ngɛ Pisidia. Nɛ a ya kpe he ɔ ngɛ He Jɔɔmi ligbi ɔ nɔ, nɛ a ya hi si. 15 Benɛ a kane Mlaa a kɛ Gbali ɔmɛ ngɛ ni ɔmɛ a hɛ mi ta a, kpe he ɔ nɔ hyɛli ɔmɛ ngɔ sɛ gbi kɛ ya ha mɛ ke: “Nyumuhi, nyɛmimɛ, ke nyɛ ngɛ he wami womi munyu ko kɛ ha ni ɔmɛ ɔ, nyɛ de.” 16 Lɔ ɔ he ɔ, Paulo te si nɛ e fɔ e nine, nɛ e de ke:

“Nyumuhi, Israel bi, kɛ nyɛ ni kpahi nɛ nyɛ yeɔ Mawu gbeye, nyɛɛ bu tue. 17 Israel bi nɛ ɔmɛ a Mawu ɔ hla wa nɛmɛ ɔmɛ, nɛ e wo nimli ɔmɛ a nɔ benɛ a hi si ngɛ Ijipt zugba a nɔ kaa nibwɔhi ɔ, nɛ e kɛ e kɔni nɛ e wo nɔ ɔ je mɛ kɛ je lejɛ ɔ. 18 Nɛ e to e tsui si ha mɛ ngɛ nga a nɔ maa pee jeha 40. 19 Benɛ e kpata mahi kpaago nɛ a ngɛ Kaanan zugba a nɔ ɔmɛ a hɛ mi ɔ, e gba a zugba a kɛ ha mɛ kaa weto ní. 20 Enɛ ɔ tsuo ya nɔ maa pee jeha 450.

“Ngɛ enɛ ɔ se ɔ, e ha mɛ kojoli hluu kɛ ya su Samuɛl nɛ ji gbalɔ ɔ yi nɔ. 21 Se lɔ ɔ se ɔ, a bi ke a wo matsɛ ha mɛ, nɛ Mawu ngɔ Kish binyumu Sɔɔl nɛ e je Benyamin wɛtso ɔ mi ɔ kɛ ha mɛ jeha 40. 22 Benɛ e kpa lɛ ɔ, e tle David si kɛ ha mɛ kaa matsɛ, nɛ e ye e he odase ke: ‘I na David, Jɛse binyumu ɔ, nyumu nɛ ye tsui kplɛɛ e nɔ; e maa pee níhi tsuo nɛ i suɔ.’ 23 Kaa bɔ nɛ Mawu wo si ɔ, e ngɔ Yesu, yi wami helɔ ɔ kɛ je nyumu nɛ ɔ nina a* mi kɛ ba ha Israel. 24 Loko jamɛ a nɔ ɔ maa ba a, Yohane fiɛɛ baptisimi nɛ e peeɔ tsui tsakemi he okadi ɔ ngɛ ma hɛ mi kɛ tsɔɔ Israel bi ɔmɛ tsuo. 25 Se benɛ Yohane ngɛ e ní tsumi ɔ nya gbee ɔ, e deɔ ke: ‘Mɛnɔ lɛ nyɛ susu kaa i ji? Pi imi ji lɛ. Mohu ɔ, nyɛɛ hyɛ! Nɔ ko ma ngɛ ye se nɛ i sɛ nɔ nɛ e pɛneɔ tokota ngɛ e nane.’

26 “Nyumuhi, nyɛmimɛ, nyɛ Abraham weku ɔ mi bimɛ, kɛ ni kpahi nɛ a ngɛ nyɛ kpɛti nɛ a yeɔ Mawu gbeye, a wo yi wami hemi nɛ ɔ he munyu ɔ blɔ kɛ ba wa ngɔ. 27 Se nihi nɛ a ngɛ Yerusalɛm kɛ a nɔ yeli ɔmɛ a li nɔ nɛ ɔ mi tso, mohu ɔ, benɛ a ngɛ sɔmɔe kaa kojoli ɔ, a ha nɛ níhi nɛ Gbali ɔmɛ de nɛ a woɔ a gbi nɔ kɛ kaneɔ ngɛ he jɔɔmi ligbi fɛɛ he jɔɔmi ligbi nɔ ɔ ba mi. 28 E ngɛ mi kaa a nɛ nɔ́ ko nɛ e tsɔɔ kaa e sa gbenɔ mohu lɛɛ, se a kpa Pilato pɛɛ kaa e ha nɛ a gbe lɛ. 29 Nɛ benɛ a gbe nɔ́ fɛɛ nɔ́ nɛ a ngma ngɛ e he ɔ nya a, a je lɛ ngɛ tso ɔ nɔ nɛ a ya to lɛ ngɛ yɔkɔ* ko mi. 30 Se Mawu tle lɛ si kɛ je gbeje, 31 nɛ e je e he kpo kɛ tsɔɔ nihi nɛ a kɛ lɛ je Galilea kɛ kuɔ kɛ ya Yerusalɛm ɔ ligbihi fuu. Amlɔ nɛ ɔ, ni nɛ ɔmɛ ji e we odasefohi kɛ ha ni ɔmɛ.

32 “Enɛ ɔ he ɔ, wa ngɛ si nɛ a wo nɛmɛ ɔmɛ ɔ he sane kpakpa a jajee kɛ ngɛ nyɛ tsɔɔe. 33 Mawu ha nɛ e ba mi kɛ pi si ha wɔ a bimɛ ɔmɛ kɛ gu Yesu si nɛ e tle kɛ je gbeje ɔ nɔ; kaa bɔ nɛ a ngma ngɛ la enyɔne ɔ mi ke: ‘Ye bi ji mo; mwɔnɛ ɔ, i ba pee o tsɛ’ ɔ. 34 Mawu ma anɔkuale sane nɛ e tsɔɔ kaa e tle lɛ si kɛ je gbeje nɛ e be e se kpalee kɛ ya puɛmi mi hu kɔkɔɔkɔ ɔ nɔ mi benɛ e de ke: ‘Ma je suɔmi nɛ e se pui gblegbleegble ɔ nɛ i wo David si ngɛ he, nɛ e ji anɔkuale* ɔ kpo kɛ ha nyɛ’ ɔ. 35 Lɔ ɔ he ɔ, a de ekohu ngɛ la kpa ko mi ke: ‘O be nɔ nɛ e fĩɔ o se ɔ hyɛe nɛ e puɛ.’ 36 David lɛɛ, e sɔmɔ Mawu* ngɛ lɛ nitsɛ e yi nɔ, e nɔ gbenɔ mahe mi, nɛ a to lɛ kɛ piɛɛ e nɛmɛ ɔmɛ a he, nɛ e puɛ. 37 Se nɔ nɛ Mawu tle lɛ si ɔ lɛɛ e puɛ we.

38 “Enɛ ɔ he ɔ, nyɛmimɛ, nyɛ ná nɛ nyɛɛ le kaa kɛ gu nɔ nɛ ɔ nɔ ɔ, a ngɛ yayami pami jajee kɛ ngɛ nyɛ tsɔɔe, 39 nɛ ngɛ níhi tsuo nɛ a nyɛ we nɛ a gu Mose Mlaa a nɔ kɛ wo nyɛ nguɔ ngɛ he ɔ mi ɔ, kɛ gu nɔ nɛ ɔ lɛɛ e nɔ ɔ, a woɔ nɔ fɛɛ nɔ nɛ e heɔ yeɔ ɔ nguɔ. 40 Enɛ ɔ he ɔ, nyɛɛ hyɛ nɛ hi konɛ níhi nɛ a de ngɛ Gbali ɔmɛ a mi ɔ nɛ a ko ba nyɛ nɔ: 41 ‘Nyɛ nihi a he fɛu yeli, nyɛɛ hyɛ, nɛ e pee nyɛ nyakpɛ, nɛ nyɛ hɛ mi nɛ kpata, ejakaa i ngɛ ní tsumi ko tsue ngɛ nyɛ ligbi ɔmɛ a mi, ní tsumi ko nɛ ke nɔ ko de nyɛ bɔ nɛ e ngɛ ha fitsofitso po ɔ, nyɛ be hee maa ye gblegbleegble.’”

42 Jehanɛ ɔ, benɛ a ngɛ kpo jee ɔ, ni ɔmɛ kpa mɛ pɛɛ kaa a ba tu ní nɛ ɔmɛ a he munyu ngɛ He Jɔɔmi Ligbi nɛ e maa ba a nɔ. 43 Lɔ ɔ he ɔ, benɛ a kpa kpe ɔ nɛ a pee ngɛ kpe he ɔ, Yuda bi kɛ nihi nɛ a tsake kɛ ba Yuda bi ɔmɛ a jami ɔ mi ɔ, a kpɛti nihi fuu nɛ a jaa Mawu ɔ nyɛɛ Paulo kɛ Banaba a se, nɛ benɛ Paulo kɛ Banaba kɛ mɛ ngɛ munyu tue ɔ, a wo mɛ he wami kaa a ya nɔ nɛ a hi Mawu dloomi ɔ mi.

44 He Jɔɔmi Ligbi nɛ e nyɛɛ se ɔ nɔ ɔ, lɔ ɔ ji kaa ma a tsuo ba bua a he nya konɛ a bu Yehowa* munyu ɔ tue. 45 Benɛ Yuda bi ɔmɛ na asafo kuu ɔmɛ ɔ, hunga hyi mɛ tɔ, nɛ a bɔni musu bɔmi munyuhi tumi kɛ bɔni nɔ́ nɛ Paulo ngɛ dee ɔ simi. 46 Kɛkɛ nɛ Paulo kɛ Banaba tu munyu kɛ kã, nɛ a de mɛ ke: “Nyɛ ji kekleekle nihi nɛ e he hia kaa a tu Mawu munyu ɔ kɛ tsɔɔ. Akɛnɛ nyɛ ngɛ Mawu munyu ɔ kuae, nɛ nyɛ bui nyɛ he kaa nihi nɛ a sa kɛ ha neneene wami he je ɔ, nyɛɛ hyɛ! wa dɔ wa yi kɛ yaa je ma amɛ a ngɔ. 47 Ejakaa Yehowa* fã wɔ ke: “I ngɔ nyɛ kɛ pee la kɛ ha je ma amɛ, konɛ nyɛɛ pee yi wami hemi kɛ ya su zugba a nyagbe he ɔmɛ.’”

48 Benɛ nihi nɛ a ngɛ je ma amɛ a mi ɔ nu nɔ́ nɛ ɔ, a bɔni nyami nɛ a wo Yehowa* munyu ɔ hɛ mi nyami, nɛ nihi tsuo nɛ a ngɛ su kpakpa nɛ ma ha nɛ a ná neneene wami ɔ ba he ye. 49 Jehanɛ se hu ɔ, a ngɛ Yehowa munyu ɔ gbɛe kɛ ngɛ fĩae ngɛ ma a mi tsuo. 50 Se Yuda bi ɔmɛ wo yihi nɛ a he biɛ nɛ a yeɔ Mawu gbeye kɛ nyumuhi nɛ a hɛɛ blɔ nya ngɛ ma a mi ɔmɛ a yi mi, nɛ a ha yi mi wami te si ngɔ wo Paulo kɛ Banaba, nɛ a fiee mɛ kɛ ho a huzu ɔmɛ a se ya. 51 Enɛ ɔ he ɔ, a si a nane si nɛ bunyuku nɛ e ngɛ a nane he ɔ je kɛ pue si kɛ si mɛ, nɛ a pue nɔ kɛ ho Ikoniom ya. 52 Nɛ bua jɔmi kɛ mumi klɔuklɔu ya nɔ nɛ e hyi kaseli ɔmɛ tɔ.

14 Jehanɛ ɔ, ngɛ Ikoniom ɔ, a pee kake kɛ ya sɛ Yuda bi ɔmɛ a kpe he ɔ, nɛ bɔ nɛ a plɛ kɛ tu munyu ha a ha nɛ Yuda bi kɛ Hela bi babauu nitsɛ ba he ye. 2 Se Yuda bi ɔmɛ nɛ a he we yi ɔ wo nihi* nɛ a je je ma amɛ a mi ɔmɛ a yi mi, nɛ a su mɛ ngɔ wo nyɛmimɛ ɔmɛ a he. 3 Enɛ ɔ he ɔ, a ye be saii ngɛ lejɛ ɔ, nɛ a kɛ kã tu munyu ngɛ Yehowa* he wami ɔ nya, nɛ lɛ hu e gu a nɔ kɛ pee okadihi kɛ nyakpɛ níhi* kɛ ye e dloomi munyu ɔ he odase. 4 Se nihi babauu nɛ a ngɛ ma a mi ɔmɛ a mi gba; ni komɛ fĩ Yuda bi ɔmɛ a se, nɛ ni kpahi hu fĩ bɔfo ɔmɛ a se. 5 Benɛ nihi nɛ a je je ma amɛ a mi kɛ Yuda bi ɔmɛ kɛ a nɔ yeli ɔmɛ tsuo bɔ mɔde kaa a maa pee mɛ nisɛ níhi nɛ a maa fiaa mɛ tɛ ɔ, 6 a wo bɔfo ɔmɛ a tue nɔ nɛ a tu fo kɛ ho Likaonia, Listra, Dɛɛbe kɛ ma nɛ bɔle mɛ ɔ mi ya. 7 A ya nɔ nɛ a jaje sane kpakpa a ngɛ lejɛ ɔ.

8 Jehanɛ ɔ, benɛ a ngɛ Listra a, nyumu ko hii si ngɛ lejɛ ɔ nɛ e ji libɔɔ. A fɔ lɛ libɔɔ, nɛ e nyɛɛ we hyɛ. 9 Benɛ Paulo ngɛ munyu tue ɔ, nyumu nɛ ɔ ngɛ lɛ tue bue. Paulo hyɛ lɛ totooto, nɛ benɛ e na kaa nyumu ɔ ngɛ hemi kɛ yemi kaa a ma tsa lɛ ɔ, 10 e kɛ gbi nɛ nya wa de ke: “Tee si nɛ o da o nane nɔ.” Kɛkɛ nɛ nyumu ɔ hlu kɛ ma si, nɛ e bɔni nyɛɛmi. 11 Benɛ asafo kuu ɔmɛ na nɔ́ nɛ Paulo pee ɔ, a kpa ngmlaa ngɛ Likaonia gbi mi ke: “Mawu ɔmɛ plɛ a he nimli nɛ a kple si kɛ ba wa ngɔ!” 12 Nɛ a bɔni Banaba tsɛmi ke Zeo, se Paulo lɛɛ Hɛmes, ejakaa lɛ ji nɔ titli nɛ e ngɛ munyu ɔ tue. 13 Nɛ Zeo osɔfo ɔ nɛ e sɔlemi we ɔ ngɛ ma a nya a ngɔ na kuhi kɛ akekleehi kɛ ba agbo ɔmɛ a nya, nɛ e ngɛ hlae nɛ lɛ kɛ asafo kuu ɔmɛ nɛ a ngɔ kɛ sã afɔlehi.

14 Se benɛ bɔfo Banaba kɛ bɔfo Paulo nu he ɔ, a hia a tade ɔmɛ, nɛ a sa fo kɛ ya sɛ asafo kuu ɔ kpɛti, nɛ a kpa ngmlaa ke: 15 “Nyumuhi, mɛni he je nɛ nyɛ ngɛ ní nɛ ɔmɛ pee ɔ? Wɔ hu wa ji adesahi nɛ a ngɛ gbɔjɔmihi kaa nyɛ nɔuu. Nɛ wa ngɛ sane kpakpa a jajee kɛ ngɛ nyɛ tsɔɔe konɛ nyɛɛ kpale kɛ je ní nɛ ɔmɛ nɛ se nami be a he ɔmɛ a se kɛ ba Mawu hɛ kalɔ ɔ, nɔ nɛ e bɔ hiɔwe ɔ, kɛ zugba a, kɛ wo ɔ, kɛ níhi tsuo nɛ ngɛ a mi ɔ ngɔ. 16 Ngɛ yi nɔhi nɛ a be ɔmɛ a mi ɔ, e ngmɛ je ma amɛ tsuo blɔ nɛ a nyɛɛ ngɛ mɛ nitsɛmɛ a blɔhi a nɔ, 17 se kɛ̃ ɔ, e jɔɔ we lɛ nitsɛ e he odase yemi, ejakaa e pee kpakpa, e ha hiɔmi nɛ kɛ je hiɔwe ha nyɛ, nɛ e ha nyɛ be kpakpahi nɛ niye ní baa, nɛ e ha nyɛ ngma nɛ nyɛ tɔ, nɛ e ha nɛ bua jɔmi hyi nyɛ tsui tɔ.” 18 Se kɛ̃ ɔ, ngɛ ní nɛ ɔmɛ nɛ a de ɔ tsuo se ɔ, e piɛ bɔɔ jinɛ a ko nyɛ we asafo kuu ɔmɛ a nya tsimi konɛ a ko sã afɔle ɔ ha mɛ.

19 Se Yuda bi je Antiokia kɛ Ikoniom kɛ ba nɛ a ba plɛ asafo kuu ɔmɛ a yi mi, nɛ a fiaa Paulo tɛ nɛ a gbla lɛ si kɛ ya ma a se, nɛ a susu kaa e gbo. 20 Se benɛ kaseli ɔmɛ ba bɔle lɛ ɔ, e te si nɛ e sɛ ma a mi. E nɔ jena a, e kɛ Banaba a je kɛ ho Dɛɛbe ya. 21 Benɛ a ya jaje sane kpakpa a ngɛ jamɛ a ma a mi nɛ a pee nihi fuu kaseli se ɔ, a kpale kɛ ho Listra, Ikoniom, kɛ Antiokia ya. 22 A ya wo kaseli ɔmɛ* he wami ngɛ lejɛ ɔ. A wo mɛ he wami kaa a ya nɔ nɛ a hi hemi kɛ yemi ɔ mi, nɛ a de ke: “E sa nɛ waa gblee amanehlu babauu mi kɛ sɛ Mawu Matsɛ Yemi ɔ mi.” 23 Jehanɛ se hu ɔ, a hla nikɔtɔmahi kɛ ha mɛ ngɛ asafo fɛɛ asafo mi, a sɔle nɛ a ha hwɔ, nɛ a tu mɛ ngɔ wo Yehowa,* nɔ nɛ a ba he lɛ ye ɔ dɛ mi.

24 Lɔ ɔ se ɔ, a gu Pisidia nɛ a ba Pamfilia, 25 nɛ benɛ a jaje munyu ɔ ngɛ Pɛga ta a, a kple kɛ ho Atalia ya. 26 Benɛ a je lejɛ ɔ, a sɛ lɛ mi nɛ a pue nɔ kɛ yaa Antiokia, he nɛ a tu mɛ ngɔ wo Mawu dloomi ɔ dɛ mi ngɛ kɛ ha ní tsumi nɛ amlɔ nɛ ɔ a gbe nya a.

27 Benɛ a ba su nɛ a bua asafo ɔ nya a, a bɔ mɛ níhi fuu nɛ Mawu gu a nɔ kɛ pee, kɛ bɔ nɛ e bli sinya nɛ a kɛ yaa hemi kɛ yemi mi ɔ kɛ ha je ma amɛ ɔ. 28 Lɔ ɔ he ɔ, a kɛ kaseli ɔmɛ hi si be saii ngɛ lejɛ ɔ.

15 Jehanɛ ɔ, nyumu komɛ kple kɛ je Yudea kɛ ba nɛ a ba bɔni nyɛmimɛ ɔmɛ tsɔɔmi ke: “Ke a pui nyɛ ngɛ Mose kusumi ɔ nya a, a be nyɛe ma he nyɛ yi wami.” 2 Se benɛ Paulo kɛ Banaba kɛ mɛ sã nya nɛ a kɛ mɛ je atsinyɛ hluu ɔ, a to blɔ nya kaa Paulo, Banaba, kɛ ni ɔmɛ a kpɛti ni komɛ nɛ́ a kuɔ kɛ ya bɔfo ɔmɛ kɛ nikɔtɔma amɛ a ngɔ ngɛ Yerusalɛm, ngɛ sane* nɛ ɔ he.

3 Lɔ ɔ he ɔ, benɛ asafo ɔ ya je mɛ blɔ bɔɔ ɔ, nyumu nɛ ɔmɛ tsa nɔ kɛ gu Foinike kɛ Samaria tsuo, nɛ a ngɛ bɔ nɛ nihi nɛ a je je ma amɛ a mi ɔ tsake ha a he amaniɛ bɔe fitsofitso, nɛ enɛ ɔ ha nɛ nyɛmimɛ ɔmɛ tsuo ná bua jɔmi babauu. 4 Benɛ a ya su Yerusalɛm ɔ, asafo ɔ kɛ bɔfo ɔmɛ kɛ nikɔtɔma amɛ he mɛ atuu, nɛ a bɔ mɛ níhi fuu nɛ Mawu gu a nɔ kɛ pee ɔ. 5 Se nihi nɛ a ji Farisi kuu ɔ mi bimɛ nɛ a ba he ye ɔ, a kpɛti ni komɛ te si ngɛ a sɛhi a mi nɛ a de ke: “E he hia nɛ a po mɛ nɛ a fã mɛ nɛ a ye Mose Mlaa a nɔ.”

6 Enɛ ɔ he ɔ, bɔfo ɔmɛ kɛ nikɔtɔma amɛ kpe konɛ a hyɛ sane nɛ ɔ mi. 7 Benɛ a sɛsɛ he hluu ɔ, Petro te si kɛ da si nɛ e de mɛ ke: “Nyumuhi, nyɛmimɛ, nyɛ nitsɛmɛ nyɛ le saminya kaa sisije ɔ tɔɔ nɛ Mawu hla mi ngɛ nyɛ kpɛti kaa e sa kaa nihi nɛ a je je ma amɛ a mi ɔ nɛ a nu sane kpakpa a he munyu ɔ kɛ je ye nya konɛ a he ye. 8 Nɛ Mawu nɛ e le nɔ tsui mi ɔ ye odase kɛ gu mumi klɔuklɔu ɔ nɛ e ngɔ kɛ ha mɛ kaa bɔ nɛ wɔ hu e ngɔ kɛ ha wɔ ɔ nɔ. 9 Nɛ e tsɔɔ we slɔɔto ko kulaa ngɛ waa kɛ mɛ wa kpɛti, mohu ɔ, e ngɔ hemi kɛ yemi ɔ kɛ tsu a tsui he. 10 Lɛɛ amlɔ nɛ ɔ, mɛni he je mɔ nɛ nyɛ ngɛ Mawu kae, nɛ nyɛ ngɔ kuɛpã tso nɛ wa nɛmɛ ɔmɛ nyɛ we nɛ a tloo nɛ wɔ hu wa nyɛ we nɛ waa tloo ɔ kɛ ngɛ kaseli ɔmɛ a kuɛ woe ɔ? 11 Mohu ɔ, wa ngɛ hemi kɛ yemi kaa Nyɔmtsɛ Yesu dloomi ɔ nɔ nɛ a gu kɛ he wa yi wami kaa bɔ nɛ e ji ngɛ mɛ hu a blɔ fa mi ɔ.”

12 Kɛkɛ nɛ kuu ɔ tsuo pee dii, nɛ a bɔni Banaba kɛ Paulo tue bumi, nɛ a de okadihi kɛ nyakpɛ níhi* fuu nɛ Mawu gu a nɔ kɛ pee ngɛ je ma amɛ a kpɛti ɔ. 13 Benɛ a gbe a munyu ɔ nya a, Yakobo he nɔ nɛ e de ke: “Nyumuhi, nyɛmimɛ, nyɛɛ bu mi tue. 14 Simeon tu kekleekle be nɛ Mawu ngɔ e juɛmi kɛ ya je ma amɛ a nɔ, konɛ e ngɔ ni komɛ kɛ je a kpɛti kɛ ha e biɛ ɔ he munyu fitsofitso. 15 Nɛ enɛ ɔ kɛ Gbali ɔmɛ a munyu ɔ kɔ, kaa bɔ nɛ a ngma ke: 16 ‘Ngɛ ní nɛ ɔmɛ a se ɔ, ma kpale nɛ ma ya wo David bo tsu* ɔ nɛ e nɔ si ɔ nɔ kɛ ma si ekohu; ma fia e tsu nɛ e hule ɔ ekohu nɛ ma dla lɛ ekohu, 17 bɔ nɛ pee nɛ nihi nɛ a piɛ ɔ, kɛ nihi nɛ a je je ma amɛ tsuo a mi ɔ, kɛ nihi nɛ a kɛ ye biɛ ɔ tsɛɔ mɛ ɔ nɛ a hla Yehowa* se blɔ kɛ hɛdɔ, Yehowa* lɛ e de, lɛ ji nɔ nɛ e ngɛ ní nɛ ɔmɛ pee, 18 nɛ a le kɛ je blema lokoo.’ 19 Enɛ ɔ he ɔ, yi mi kpɔ nɛ i mwɔ* ji kaa a ko hao nihi nɛ a je je ma amɛ a mi nɛ a kpale kɛ ngɛ Mawu ngɔ bae ɔ, 20 mohu ɔ, a ngma kɛ ya ha mɛ kaa a yu a he ngɛ níhi nɛ wɔhi wo a he mu, ajuama bɔmi,* lohwehi nɛ a kika a kuɛ,* kɛ muɔ he. 21 Ejakaa kɛ je blema tɔɔ nɛ Mose ná nihi nɛ a tuɔ e he munyu kɛ jeɔ ma kake mi kɛ yaa ma kpa mi, ejakaa a woɔ a gbi nɔ kɛ kaneɔ níhi nɛ e ngma a ngɛ he jɔɔmi ligbi fɛɛ he jɔɔmi ligbi nɔ.”

22 Kɛkɛ nɛ bɔfo ɔmɛ kɛ nikɔtɔma amɛ kɛ asafo ɔ tsuo ma nya si kaa a maa hla nyumuhi ngɛ a kpɛti kɛ piɛɛ Paulo kɛ Banaba a he konɛ a tsɔ mɛ kɛ ya Antiokia; a tsɔ Yudas nɛ a tsɛɛ lɛ ke Basaba hulɔ ɔ kɛ Silas, a ji nyumuhi nɛ a nyɛɛ hɛ mi ngɛ nyɛmimɛ ɔmɛ a kpɛti. 23 Nɔ́ nɛ a ngma kɛ tsɔ mɛ ɔ ji nɛ ɔ nɛ:

“Nyɛ nyɛmimɛ bɔfo ɔmɛ kɛ nikɔtɔma amɛ, kɛ ya ha nyɛmimɛ nɛ a ngɛ Antiokia, Siria, kɛ Kilikia nɛ a je je ma amɛ a mi ɔ: Wa biɔ nyɛ! 24 Akɛnɛ wa nu kaa ni komɛ je wa kpɛti kɛ ba nyɛ ngɔ nɛ pohu waa kɛ blɔ tsɔɔmi ko ha we mɛ, nɛ́ a kɛ a nya mi munyu ba hao nyɛ, nɛ a ngɛ mɔde bɔe kaa a ma puɛ nyɛ* he je ɔ, 25 wa pee wa nya kake nɛ wa hla nyumuhi kɛ piɛɛ Banaba kɛ Paulo nɛ wa suɔ mɛ ɔ a he konɛ waa tsɔ mɛ nyɛ ngɔ, 26 a ji nyumuhi nɛ a ngɔ a wami* ngɔ ha ngɛ wa Nyɔmtsɛ Yesu Kristo biɛ ɔ he je. 27 Enɛ ɔ he ɔ, wa ngɛ Yudas kɛ Silas tsɔe konɛ mɛ hu a ngɔ a nya mi munyu kɛ jaje ní nɛ ɔmɛ nɔuu ngɔ tsɔɔ nyɛ. 28 Ejakaa mumi klɔuklɔu ɔ kɛ wɔ nitsɛmɛ hu wa sume kaa wa maa ngɔ tlomi kpa ko kɛ fɔ nyɛ nɔ kaa ja níhi nɛ a he hia nɛ ɔmɛ pɛ: 29 kaa nyɛɛ ya nɔ nɛ nyɛɛ hi nyɛ he yue ngɛ níhi nɛ a ngɔ kɛ sã afɔle ha wɔhi, muɔ, lohwehi nɛ a kika a kuɛ,* kɛ ajuama bɔmi* he. Ke nyɛ hyɛ nyɛ he nɔ saminya ngɛ ní nɛ ɔmɛ a he ɔ, níhi maa ya nɔ ha nyɛ saminya. Nyɛ ná nɔmlɔ tso mi he wami kpakpa!”*

30 Enɛ ɔ he ɔ, benɛ a wo nyumu nɛ ɔmɛ blɔ ɔ, nyumu ɔmɛ kple kɛ ho Antiokia ya, nɛ a ya bua kuu ɔ tsuo nya nɛ a ngɔ sɛ womi ɔ kɛ ha mɛ. 31 Benɛ a kane sɛ womi ɔ, a nya ngɛ he wami womi ɔ he. 32 Nɛ akɛnɛ gbali hu ji Yudas kɛ Silas he je ɔ, a tu he wami womi munyuhi fuu kɛ tsɔɔ nyɛmimɛ ɔmɛ, nɛ a wo a bua. 33 Benɛ a ye be saii ngɛ lejɛ ɔ, nyɛmimɛ ɔmɛ wo mɛ blɔ ngɛ tue mi jɔmi mi kɛ ho nihi nɛ a tsɔ mɛ kɛ ba amɛ a ngɔ ya. 34 —— 35 Se Paulo kɛ Banaba hi Antiokia, nɛ a tsɔɔ ní nɛ a jaje Yehowa* munyu ɔ he sane kpakpa a, nɛ ni kpahi fuu hu pee jã.

36 Ligbi komɛ a se ɔ, Paulo de Banaba ke: “Amlɔ nɛ ɔ,* ha nɛ waa kpale kɛ ya slaa nyɛmimɛ ɔmɛ nɛ a ngɛ ma fɛɛ ma nɛ wa jaje Yehowa* munyu ɔ ngɛ mi ɔ mi, konɛ wa ya hyɛ bɔ nɛ a ngɛ ha.” 37 Banaba fia e pɛɛ si kaa e maa ngɔ Yohane nɛ a tsɛɛ lɛ ke Maako ɔ kɛ piɛɛ a he kɛ ya. 38 Se Paulo lɛɛ e bua jɔɛ he kaa a maa ngɔ lɛ kɛ piɛɛ a he kɛ ya, akɛnɛ e kpale ngɛ a se ngɛ Pamfilia nɛ e kɛ mɛ yɛ nɛ a ya tsu ní ɔ he je. 39 Enɛ ɔ ngɔ abofu kɛ ba nɛ a sã nya wawɛɛ, lɔ ɔ he ɔ, a mi gba; nɛ Banaba ngɔ Maako kɛ piɛɛ e he nɛ a sɛ lɛ mi kɛ ho Kipro ya. 40 Paulo hla Silas, nɛ benɛ nyɛmimɛ ɔmɛ tu lɛ ngɔ wo Yehowa* dloomi ɔ dɛ mi ɔ, a pue nɔ kɛ ho. 41 E ya gu Siria kɛ Kilikia, nɛ e wo asafo ɔmɛ he wami.

16 Lɔ ɔ he ɔ, e ba su Dɛɛbe nɛ e tsa nɔ kɛ ya Listra. Nɛ kaselɔ ko ngɛ lejɛ ɔ nɛ a tsɛɛ lɛ ke Timoteo, Yuda yo ko nɛ e he ye ɔ binyumu ji lɛ, se e tsɛ ɔ lɛɛ Hela no, 2 nɛ nyɛmimɛ ɔmɛ nɛ a ngɛ Listra kɛ Ikoniom ɔ tuɔ e he munyu kpakpa. 3 Paulo suɔ nɛ Timoteo nɛ e ba piɛɛ e he, nɛ e ngɔ lɛ nɛ e po lɛ ngɛ Yuda bi nɛ a ngɛ lejɛ ɔ ní ɔmɛ a mi ɔmɛ a he je, ejakaa mɛ tsuo a le kaa e tsɛ ɔ ji Hela no. 4 Benɛ a ngɛ ma amɛ a nɔ kpae ɔ, a ngɔ mlaahi nɛ bɔfo ɔmɛ kɛ nikɔtɔma amɛ nɛ a ngɛ Yerusalɛm ɔ wo ɔ kɛ ngɛ mɛ hae konɛ a ye nɔ. 5 Enɛ ɔ he ɔ, ngɛ anɔkuale mi ɔ, asafo ɔmɛ ya nɔ nɛ a he wa ngɛ hemi kɛ yemi ɔ mi, nɛ daa ligbi ɔ, a he ngɛ hiɛe.

6 Jehanɛ se hu ɔ, a hia blɔ kɛ ya gu Frigia kɛ Galatia ma a mi, ejakaa mumi klɔuklɔu ɔ tsi a nya kaa a ko tu munyu ɔ ngɛ Asia kpokpa a nɔ. 7 Jehanɛ ɔ, benɛ a kple kɛ ba Misia a, a bɔ mɔde kaa a maa ya Bitinia, se Yesu mumi ɔ ha we mɛ blɔ. 8 Lɔ ɔ he ɔ, a be Misia he,* nɛ a kple kɛ ba Troya. 9 Nɛ nyɔ ɔ mi ɔ, a je nina ko kɛ tsɔɔ Paulo—Makedonia nyumu ko daa si ngɛ lejɛ ɔ, nɛ e ngɛ lɛ pɛɛ kpae ke: “Moo po mi kɛ ba Makedonia nɛ o ba ye bua wɔ.” 10 Benɛ e na nina a nɔuu pɛ ɔ, wa bɔ mɔde kaa wa maa ya Makedonia, ejakaa wa ma nya si kaa Mawu tsɛ wɔ konɛ wa ya jaje sane kpakpa a kɛ tsɔɔ mɛ.

11 Enɛ ɔ he ɔ, wa sɛ lɛ mi kɛ je Troya nɛ wa gu wo ɔ nɔ tɛɛ kɛ ho Samotrake ya, se e nɔ jena a, wa tsa nɔ kɛ ya Neapoli; 12 nɛ benɛ wa je lejɛ ɔ, wa ya nɔ yemi he ko nɛ a tsɛɛ ke Filipi nɛ́ e ji ma ngua ngɛ Makedonia kpokpa a nɔ ɔ. Wa hi lejɛ ɔ ligbi bɔɔ ko. 13 Ngɛ He Jɔɔmi ligbi ɔ nɔ ɔ, wa ya agbo ɔ se ngɛ pa a nya he nɛ wa susu kaa a sɔleɔ ngɛ ɔ, nɛ wa ya hi si, nɛ waa kɛ yihi nɛ a ba kpe ngɛ lejɛ ɔ bɔni munyu tumi. 14 Nɛ yo ko nɛ a tsɛɛ lɛ ke Lidia, nɛ e ji alamua tu su* jualɔ nɛ e je Tiatira, nɛ e ji Mawu jalɔ ɔ ngɛ tue bue, nɛ Yehowa* bli e tsui mi gbajaa konɛ e bu níhi nɛ Paulo ngɛ dee ɔ tue. 15 Jehanɛ ɔ, benɛ a baptisi e kɛ e we mi bimɛ ɔmɛ tsuo ɔ, e kpa wɔ pɛɛ wawɛɛ ke: “Ke nyɛ bu mi kaa i yeɔ Yehowa* anɔkuale ɔ, lɛɛ nyɛɛ ba nɛ nyɛ ba to ye we ɔ mi.” Nɛ e pee hluu nɛ wa ya.

16 Jehanɛ ɔ, e ba mi kaa benɛ wa yaa he nɛ a sɔleɔ ngɛ ɔ, mawayo ko nɛ mumi ko nɛ ji daimonio mumi nɛ e haa nɛ nɔ klaa ngɛ e mi ɔ kɛ wɔ ba kpe. E gu níhi nɛ maa ba hwɔɔ se nɛ e deɔ nihi ɔ* nɔ kɛ ha nɛ e nyɔmtsɛmɛ ɔmɛ ná ní babauu. 17 Yoyo nɛ ɔ ya nɔ nɛ e ngɛ waa kɛ Paulo wa se nyɛɛe, nɛ e ngɛ ngmlaa kpae ke: “Nyumu nɛ ɔmɛ ji Mawu Hiɔwe Lokoo No ɔ nyɔguɛhi, nɛ a ngɛ yi wami hemi blɔ ɔ jajee kɛ ngɛ nyɛ tsɔɔe.” 18 E ya nɔ nɛ e pee nɔ́ nɛ ɔ ligbihi fuu. Nyagbe ɔ, nɔ́ nɛ ɔ ba gbe Paulo nya,* nɛ e plɛ e he, nɛ e de mumi ɔ ke: “I ngɛ mo fãe ngɛ Yesu Kristo biɛ mi kaa o je kpo ngɛ e mi.” Nɛ e je kpo jamɛ a ngmlɛfia a mi nɔuu.

19 Jehanɛ ɔ, benɛ e nyɔmtsɛmɛ ɔmɛ na kaa a ní nami hɛ kɛ nɔ fɔmi ɔ je ɔ, a nu Paulo kɛ Silas, nɛ a gbla mɛ kɛ ya nɔ yeli ɔmɛ a ngɔ ngɛ jua a nɔ. 20 A ngɔ mɛ kɛ ya ma a mi kojoli ɔmɛ a ngɔ, nɛ a de ke: “Nyumu nɛ ɔmɛ ngɛ wa ma a nya gbae wawɛɛ nitsɛ. Yuda bi ji mɛ, 21 nɛ a ngɛ kusumihi nɛ mlaa ngmɛ́ blɔ kaa waa pɛtɛ he loo waa ngɔ kɛ tsu ní ɔ jajee, ejakaa Roma bi ji wɔ.” 22 Nɛ asafo kuu ɔ pee kake nɛ a te si kɛ wo mɛ, nɛ benɛ ma a mi kojoli ɔmɛ gba a tadehi ngɛ a he ta a, a fã ke a fiaa mɛ kpa. 23 Benɛ a fiaa mɛ kpa saminya a, a wo mɛ tsu, nɛ a fã nɔ nɛ e hyɛɔ nihi nɛ a wo mɛ tsu ɔ nɔ ɔ kaa e bu a he saminya. 24 Akɛnɛ e nine su fami kaa kikɛ nɛ ɔ nɔ he je ɔ, e ngɔ mɛ kɛ ya wo se tsu ɔ mi, nɛ e bɔ a nane ɔmɛ pã.

25 Se maa pee nyɔ mi kpɛti ɔ, Paulo kɛ Silas ngɛ sɔlee nɛ a ngɛ lae kɛ ngɛ Mawu yi jee, nɛ nihi nɛ mɛ hu a wo mɛ tsu ɔ ngɛ mɛ tue bue. 26 Si kake too ɔ, zugba mimiɛɛmi nɛ e nya wa ko ya nɔ, nɛ e mimiɛɛ tsu ɔ sisi tomi ɔ. Jehanɛ hu ɔ, amlɔ nɔuu nɛ sinya amɛ tsuo bli, nɛ pã nɛ a bɔ nɔ fɛɛ nɔ ɔ kplɔ. 27 Benɛ nɔ nɛ e hyɛɔ nihi nɛ a wo mɛ tsu ɔ nɔ ɔ hɛ tsɛ̃ nɛ e na kaa tsu ɔ nya sinya amɛ bli ɔ, e hia klaate nɛ́ jinɛ e yaa gbe e he, kɛ susumi ɔ kaa nihi nɛ a wo mɛ tsu ɔ tu fo. 28 Se Paulo kɛ gbi nɛ nya wa kpa ngmlaa ke: “Koo ye o he awi, ejakaa wɔ tsuo wa ngɛ hiɛ ɔ!” 29 Lɔ ɔ he ɔ, e de ke a ba ha lɛ kane, nɛ e sa fo kɛ sɛ tsu ɔ mi, nɛ e he ngɛ doe blibliibli, nɛ e kpla si ngɛ Paulo kɛ Silas a hɛ mi. 30 E ngɔ mɛ kɛ je kpo, nɛ e bi mɛ ke: “Awetsɛmɛ, mɛni e sa kaa ma pee konɛ a he ye yi wami?” 31 A de lɛ ke: “Mo he Nyɔmtsɛ Yesu nɛ o ye, nɛ a ma he mo kɛ o we mi bimɛ ɔmɛ tsuo nyɛ yi wami.” 32 Kɛkɛ nɛ a tu Yehowa* munyu ɔ kɛ tsɔɔ lɛ kɛ nihi tsuo nɛ a ngɛ e we ɔ mi ɔ. 33 Nɛ nyɔ ɔ mi ngɛ jamɛ a ngmlɛfia a mi nɔuu ɔ, e ngɔ mɛ kɛ ho nɛ e ya fɔ a pa amɛ a nɔ ha mɛ. Lɔ ɔ se ɔ, a baptisi lɛ kɛ e we ɔ tsuo amlɔ nɔuu. 34 E ngɔ mɛ kɛ ba e we ɔ mi, nɛ e ngmɛ okplɔɔ ha mɛ, nɛ e kɛ e we ɔ tsuo a nya wawɛɛ akɛnɛ amlɔ nɛ ɔ, e he Mawu ye ɔ he je.

35 Benɛ je na a, ma a mi kojoli ɔmɛ tsɔ ma he buli ɔmɛ nɛ a ya de ke: “Ngmɛɛ jamɛ a nyumu ɔmɛ a he.” 36 Nɔ nɛ e hyɛɔ nihi nɛ a wo mɛ tsu ɔ nɔ ɔ ba bɔ Paulo amaniɛ ke: “Ma a mi kojoli ɔmɛ tsɔ nihi kɛ ba kaa a ngmɛɛ nyɛ ni enyɔ ɔmɛ nyɛ he. Enɛ ɔ he ɔ, amlɔ nɛ ɔ, nyɛɛ je kpo, nɛ nyɛɛ ya ngɛ tue mi jɔmi mi.” 37 Se Paulo de mɛ ke: “E ngɛ mi kaa Roma bi ji wɔ mohu lɛɛ, se a fiaa wɔ tso ngɛ ma hɛ mi nɛ a wo wɔ tsu, be mi nɛ a bui wɔ fɔ.* Amlɔ nɛ ɔ, anɛ a ngɛ wa he ngmɛɛe ngɛ laami mi lo? Ohoo, wa be kpo jee! Ha nɛ mɛ nitsɛmɛ a ba nɛ a ba je wɔ kpo.” 38 Ma he buli ɔmɛ ya bɔ ma a mi kojoli ɔmɛ munyu nɛ ɔmɛ. Benɛ a nu kaa Roma bi ji nyumu ɔmɛ ɔ, a ye gbeye. 39 Lɔ ɔ he ɔ, a ba nɛ a ba kpa mɛ pɛɛ, nɛ benɛ a je mɛ kpo ɔ, a kpa mɛ pɛɛ kaa a je a ma a mi. 40 Se a je kpo kɛ je tsu ɔ mi nɛ a ho Lidia we ɔ mi ya; nɛ benɛ a na nyɛmimɛ ɔmɛ ɔ, a wo mɛ he wami nɛ a pue nɔ kɛ ho.

17 Jehanɛ ɔ, a hia blɔ kɛ ya gu Amfipoli kɛ Apolonia nɛ a ba Tɛsalonika, he nɛ Yuda bi ɔmɛ a kpe he ko ngɛ ɔ. 2 Kaa bɔ nɛ Paulo pɔɔ peemi ɔ, e sɛ mi kɛ ya a ngɔ nɛ e kɛ mɛ ya susu níhi nɛ a ngɛ Ngmami ɔ mi ɔmɛ a he he jɔɔmi ligbi etɛ sɔuu, 3 e tsɛ munyuhi a se kɛ tsɔɔ mi, nɛ e ma nɔ mi kaa e he hia nɛ Kristo ɔ nɛ na amanehlu nɛ a tle lɛ si kɛ je gbeje, nɛ e de ke: “Yesu nɛ ɔ nɛ́ i ngɛ e he sane jajee kɛ ngɛ nyɛ tsɔɔe ɔ ji Kristo ɔ nɛ.” 4 Enɛ ɔ ha nɛ a ti ni komɛ ba he ye nɛ a kɛ Paulo kɛ Silas bɔ, nɛ Hela bi babauu nitsɛ nɛ a jaa Mawu, kɛ yihi nɛ a he biɛ ɔmɛ a ti nihi fuu hu pee jã.

5 Se Yuda bi ɔmɛ ngɛ hunga jee nɛ a ya bua nyumu komɛ nɛ a ji yiwutsotsɛmɛ nɛ a ngɛ si kpae kɛkɛ ngɛ jua a nɔ ɔmɛ a nya, nɛ benɛ a he ba hiɛ fuu ɔ, a ha nɛ basabasa peemi ba ma a mi. A ya tua Yasin we ɔ, nɛ a ngɛ hlae nɛ a je Paulo kɛ Silas kpo kɛ ha basabasa peeli ɔmɛ. 6 Benɛ a nɛ mɛ ɔ, a gbla Yasin kɛ nyɛmimɛ ɔmɛ a ti ni komɛ kɛ ya ma nɔ yeli ɔmɛ a ngɔ, nɛ a ngɛ ngmlaa kpae ke: “Nyumu nɛ ɔmɛ nɛ a plɛ zugba a nɔ hehi nɛ nimli ngɛ ɔ hɛ mi ngɔ bu si* ɔ ba hiɛ ɔ hulɔ, 7 nɛ Yasin he mɛ ngɔ to kaa e nibwɔhi. Nyumu nɛ ɔmɛ tsuo teɔ si kɛ woɔ Kaisare mlaa amɛ, nɛ a ngɛ dee ke matsɛ kpa ko ngɛ, nɛ lɛ ji Yesu.” 8 Benɛ a nu ní nɛ ɔmɛ ɔ, asafo kuu ɔ kɛ ma nɔ yeli ɔmɛ a tsui po; 9 nɛ benɛ a he se dami ní nɛ hiɛ saii ngɛ Yasin kɛ ni kpa amɛ a dɛ se ɔ, a ngmɛɛ a he nɛ a ho.*

10 Oya nɔuu nɛ nyɛmimɛ ɔmɛ wo Paulo kɛ Silas blɔ nyɔ mi kɛ ho Beroya ya. Benɛ a ya su ɔ, a ya Yuda bi ɔmɛ a kpe he ɔ. 11 Ni nɛ ɔmɛ lɛɛ a susuɔ níhi a he kɛ yaa tsitsaa pe Tɛsalonika bi ɔmɛ, ejakaa a kɛ a juɛmi tsuo pɛtɛ munyu ɔ he, nɛ daa ligbi ɔ, a kpaa Ngmami ɔ mi saminya konɛ a hyɛ kaa ní nɛ ɔmɛ ngɛ mi jã niinɛ lo. 12 Enɛ ɔ he ɔ, a ti nihi babauu ba he ye, nɛ Hela yihi fuu nɛ a ngɛ biɛ kpakpa kɛ nyumu komɛ hu pee jã nɔuu. 13 Se benɛ Yuda bi nɛ a je Tɛsalonika a ná le kaa Paulo ngɛ Mawu munyu ɔ jajee ngɛ Beroya hulɔ ɔ, a ba lejɛ ɔ nɛ a ba wo asafo kuu ɔmɛ a yi mi, nɛ a pee basabasa. 14 Kɛkɛ nɛ amlɔ nɔuu ɔ, nyɛmimɛ ɔmɛ wo Paulo blɔ kɛ ho wo ɔ nya ya, se Silas kɛ Timoteo lɛɛ a hi lejɛ ɔ. 15 Se nihi nɛ a piɛɛ Paulo he ɔ ngɔ lɛ kɛ ba Atene tɔɔ, nɛ benɛ Paulo ngɔ sɛ kɛ ha mɛ kaa a ya de Silas kɛ Timoteo kaa a ba e ngɔ oya nɔuu ɔ, a je.

16 Jehanɛ ɔ, benɛ Paulo ngɛ mɛ mlɛe ngɛ Atene nɛ e na kaa wɔhi babauu ngɛ ma a mi ɔ, e mumi nɛ e ngɛ e mi ɔ wo la. 17 Enɛ ɔ he ɔ, e kɛ Yuda bi ɔmɛ kɛ ni kpahi nɛ a jaa Mawu ɔ bɔni níhi a he susumi ngɛ kpe he ɔ, nɛ daa ligbi ɔ, e kɛ nihi nɛ e naa mɛ ngɛ jua a nɔ ɔ susuɔ níhi a he. 18 Se Epikuro we bi kɛ Stoike we bi nɛ a ji je mi ní leli ɔ kɛ lɛ bɔni nya sami, nɛ a ti ni komɛ ngɛ dee ke: “Mɛni nyapuutsɛ nɛ ɔ ngɛ hlae nɛ e de?” Ni kpahi hu ngɛ dee ke: “E ngɛ kaa nɔ́ nɛ e ngɛ ma se mawuhi a he munyu jajee.” Ejakaa e ngɛ Yesu Kristo he sane kpakpa a kɛ gbogboehi a si tlemi ɔ jajee. 19 Enɛ ɔ he ɔ, a nu lɛ nɛ a ngɔ lɛ kɛ ho Areopago ɔ ya, nɛ a ngɛ lɛ bie ke: “Anɛ o ma nyɛ ma ha nɛ waa le tsɔɔmi ehe nɛ o ngɛ he munyu tue nɛ ɔ lo? 20 Ejakaa o ha nɛ wa tuehi ngɛ ní ehehi nue, nɛ wa suɔ nɛ waa le nɔ́ nɛ ní nɛ ɔmɛ tsɔɔ.” 21 Ngɛ anɔkuale mi ɔ, nɔ́ pɛ nɛ Atene bi ɔmɛ kɛ nihi nɛ a je ma se nɛ a ngɛ* lejɛ ɔ tsuo ngɔɔ a he jɔɔmi be kɛ peeɔ kɛkɛ ji kaa a maa hi nɔ́ ehe ko he munyu tue aloo a maa hi tue bue. 22 Jehanɛ ɔ, Paulo da si ngɛ Areopago ɔ kpɛti nɛ e de ke:

“Atene nyumuhi, i na kaa ngɛ nɔ́ fɛɛ nɔ́ mi ɔ, nyɛ yeɔ mawu ɔmɛ gbeye* wawɛɛ pe ni kpa amɛ. 23 Kaa nɔ hyɛmi nɔ́ ɔ, benɛ i bee nɛ i ngɛ níhi nɛ nyɛ jaa amɛ a he hɛ toe saminya a, i na afɔle sami la tɛ ko nɛ a ngma ngɛ he ke ‘Kɛ Ha Mawu Ko Nɛ A Li Lɛ ɔ.’ Enɛ ɔ he ɔ, nɔ nɛ nyɛ li lɛ se kɛ̃ ɔ, nyɛ ngɛ lɛ jae ɔ, jamɛ a nɔ ɔ he munyu nɛ i ngɛ jajee kɛ ngɛ nyɛ tsɔɔe ɔ nɛ. 24 Mawu ɔ nɛ e bɔ je ɔ kɛ níhi tsuo nɛ ngɛ mi ɔ, lɛ nɛ́ e ji hiɔwe kɛ zugba Nyɔmtsɛ ɔ, e hí sɔlemi wehi nɛ a kɛ nine pee mi; 25 nɛ jã kɛ̃ nɛ a kɛ adesahi a nine sɔmɔ we lɛ, kaa nɔ ko nɛ nɔ́ ko hia lɛ, ejakaa lɛ nitsɛ nɛ e haa nihi tsuo wami kɛ mumi kɛ níhi tsuo. 26 Nɛ nɔmlɔ kake mi nɛ e je kɛ pee ma fɛɛ ma kɛ e mi nimli konɛ a hi si ngɛ zugba a nɔ tsuo, nɛ e to behi nɛ e wo huzuhi kɛ wo hehi nɛ adesahi maa hi ɔ, 27 konɛ a hla Mawu se blɔ, kaa eko ɔ, ke a tataa si ɔ, a maa na lɛ niinɛ lo, pohu e kɛ wa ti nɔ fɛɛ nɔ he kɛ we 28 Ejakaa kɛ gu e nɔ nɛ wa ngɛ wami, nɛ wa yaa nɛ wa baa, nɛ wa ngɛ, kaa bɔ nɛ nyɛ nitsɛmɛ nyɛ asilɛte komɛ po de ɔ. A de ke, ‘Ejakaa wɔ hu e bimɛ ji wɔ.’

29 “Enɛ ɔ he ɔ, akɛnɛ Mawu bimɛ ji wɔ he je ɔ, e sɛ nɛ wa susu kaa Nɔ nɛ e ji Mawu ɔ ngɛ kaa sika tsu aloo sika hiɔ aloo tɛ, kaa nɔ́ ko nɛ adesahi kɛ ga pee. 30 Ngɛ anɔkuale mi ɔ, Mawu ma e hɛ ngɔ fɔ behi nɛ adesahi li níhi kaa kikɛ nɛ ɔmɛ a nɔ; se amlɔ nɛ ɔ lɛɛ, e ngɛ nimli tsuo nɛ a ngɛ he fɛɛ he ɔ dee kaa a tsake a tsui. 31 Ejakaa e to ligbi ko, nɛ e to e yi mi kaa ngɛ jamɛ a ligbi ɔ nɔ ɔ, e maa gu nyumu ko nɛ e hla lɛ ɔ nɔ kɛ kojo nihi tsuo nɛ a ngɛ zugba a nɔ* ɔ ngɛ dami nya, nɛ e gu si nɛ e tle lɛ kɛ je gbeje ɔ nɔ kɛ ma enɛ ɔ nɔ mi kɛ ha adesahi tsuo.”

32 Jehanɛ ɔ, benɛ a nu gbogboehi a si tlemi ɔ he ɔ, a kpɛti ni komɛ bɔni e he fɛu yemi, nɛ a kpɛti ni komɛ hu de ke: “Wa maa bu mo tue ngɛ sane nɛ ɔ he ekohu.” 33 Kɛkɛ nɛ Paulo je a he, 34 se nyumu ɔmɛ a ti ni komɛ ba piɛɛ e he nɛ a he ye. A kpɛti ni komɛ ji Dionisio nɛ e ji kojolɔ ngɛ Areopago kojomi he ɔ, kɛ yo ko nɛ a tsɛɛ lɛ ke Damaris ɔ, kɛ ni kpahi.

18 Ngɛ enɛ ɔ se ɔ, e je Atene nɛ e ba Korinto. 2 Nɛ e ba na Yuda no ko nɛ e je Ponto nɛ a tsɛɛ lɛ ke Akuila kɛ e yo Priskila nɛ a je Italia kɛ ba kɛ we, ejakaa Klaudio fã Yuda bi tsuo kaa a je Roma. Enɛ ɔ he ɔ, e ya a ngɔ, 3 nɛ akɛnɛ ní tsumi nɛ e tsuɔ ɔ nɔuu nɛ mɛ hu a tsuɔ he je ɔ, e hi a we ɔ mi nɛ e kɛ mɛ tsu ní, ejakaa a ní tsumi ji bo tsu peemi. 4 He jɔɔmi ligbi fɛɛ he jɔɔmi ligbi ɔ, e ya tuɔ munyu* ngɛ kpe he ɔ, nɛ e plɛɔ Yuda bi kɛ Hela bi a yi mi.

5 Jehanɛ ɔ, benɛ Silas kɛ Timoteo kple kɛ je Makedonia kɛ ba a, munyu ɔ bɔni Paulo be tsuo ngɔmi wawɛɛ, nɛ e ye Yuda bi ɔmɛ odase kɛ ma nɔ mi kaa Yesu ji Kristo ɔ nɛ. 6 Se benɛ a ya nɔ nɛ a te si kɛ wo lɛ nɛ a tu munyu yayahi kɛ si lɛ se ɔ, e huanya e tade ɔmɛ a mi, nɛ e de mɛ ke: “Nyɛ muɔ nɛ e tloo nyɛ nitsɛmɛ. Imi lɛɛ ye he tsɔ. Kɛ je amlɔ nɛ ɔ kɛ yaa a, ma ya nihi nɛ a ngɛ je ma amɛ a mi ɔmɛ a ngɔ.” 7 Enɛ ɔ he ɔ, e je lejɛ ɔ,* nɛ e ya nyumu ko nɛ a tsɛɛ lɛ ke Titio Yusto nɛ e ji Mawu jalɔ nɛ e we ɔ tsa kpe he ɔ nɔ ɔ we ɔ mi. 8 Se Krispo nɛ e ji kpe he ɔ nɔ hyɛlɔ ɔ ba he Nyɔmtsɛ ɔ ye, lɛ kɛ e we mi bimɛ ɔmɛ tsuo. Nɛ Korinto bi ɔmɛ a ti nihi fuu nɛ a nu ɔ he ye nɛ a baptisi mɛ. 9 Jehanɛ se hu ɔ, Nyɔmtsɛ ɔ de Paulo ngɛ nina ko mi nyɔ mi ke: “Koo ye gbeye, mohu ɔ, yaa nɔ nɛ o hi munyu tue, nɛ ko ma o nya, 10 ejakaa i kɛ mo ngɛ, nɛ adesa ko be mo tuae nɛ e ye mo awi; ejakaa i ngɛ nihi fuu ngɛ ma nɛ ɔ mi.” 11 Lɔ ɔ he ɔ, e hi lejɛ ɔ jeha kake kɛ nyɔhiɔ ekpa, nɛ e tsɔɔ Mawu munyu ɔ ngɛ a kpɛti.

12 Benɛ Galio ji amlaalo* ngɛ Akaya a, Yuda bi ɔmɛ pee kake nɛ a ya tua Paulo nɛ a ngɔ lɛ kɛ ho kojomi sɛ ɔ he ya, 13 nɛ a de ke: “Nyumu nɛ ɔ ngɛ nihi a yi mi plɛe ke a ja Mawu ngɛ blɔ nɛ e kɛ wa mlaa a kɔ we nɔ.” 14 Se benɛ Paulo ma munyu tumi ɔ, Galio de Yuda bi ɔmɛ ke: “Oo Yuda bi, ngɛ anɔkuale mi ɔ, kaa tɔmi ko aloo yayami ngua ko nɛ e pee ɔ, jinɛ sisi numi ngɛ he kaa ma to ye tsui si kɛ bo nyɛ tue. 15 Se ke nya sami nɛ e kɔɔ munyuhi kɛ biɛhi kɛ nyɛ nitsɛmɛ nyɛ mlaa a he ɔ, lɛɛ e sa nɛ nyɛ nitsɛmɛ nyɛɛ hyɛ mi. Imi lɛɛ i sume nɛ ma pee ní nɛ ɔmɛ a he kojolɔ.” 16 Kɛkɛ nɛ e fiee mɛ kɛ je kojomi sɛ ɔ hɛ mi. 17 Enɛ ɔ he ɔ, mɛ tsuo a nu Sostene nɛ e ji kpe he ɔ nɔ hyɛlɔ ɔ nɛ a bɔni lɛ kongomi ngɛ kojomi sɛ ɔ hɛ mi. Se Galio kɛ e he wui ní nɛ ɔmɛ a mi kulaa.

18 Se benɛ Paulo hi lejɛ ɔ ligbi bɔɔ komɛ a se ɔ, e kɛ nyɛmimɛ ɔmɛ ye sɛ, nɛ e hi lɛ mi kɛ yaa Siria, nɛ Priskila kɛ Akuila piɛɛ e he. E ha nɛ a sɛ e yi nɛ e ba si ngɛ Kenkrea, ejakaa e kã kita ko. 19 Jehanɛ ɔ, a ya su Efeso, nɛ e je a he ngɛ lejɛ ɔ; se e ya sɛ kpe he ɔ, nɛ e kɛ Yuda bi ɔmɛ ya susu níhi a he. 20 E ngɛ mi kaa a ya nɔ nɛ a kpa lɛ pɛɛ kaa e hi a ngɔ be bɔɔ, se e kplɛɛ we nɔ, 21 mohu ɔ, e kɛ mɛ ye sɛ nɛ e de mɛ ke: “Ke Yehowa* suɔ ɔ, ma kpale kɛ ba nyɛ ngɔ ekohu.” Nɛ e sɛ lɛ mi kɛ je Efeso 22 nɛ e kple kɛ ba Kaisarea. Nɛ e kuɔ kɛ ya* nɛ e ya fɔ asafo ɔ, nɛ ngɛ lɔ ɔ se ɔ, e kple kɛ ho Antiokia ya.

23 Benɛ e ye be saii ngɛ lejɛ ɔ se ɔ, e je lejɛ ɔ kɛ ho, nɛ e je mahi a mi kɛ ya mahi a mi ngɛ Galatia kɛ Frigia, nɛ e ngɛ kaseli ɔmɛ tsuo he wami woe.

24 Jehanɛ ɔ, Yuda no ko nɛ e je Alɛksandria nɛ a tsɛɛ lɛ ke Apolo ɔ ba Efeso; e ji nyumu nɛ e nya mi tsɔ, nɛ e le Ngmami ɔ mi saminya. 25 A tsɔɔ nyumu nɛ ɔ ní ngɛ Yehowa* blɔ ɔ nɔ,* nɛ mumi ɔ wo lɛ kã*, nɛ e ngɛ Yesu he munyu tue nɛ e ngɛ e he ní tsɔɔe pɛpɛɛpɛ, se Yohane baptisimi ɔ pɛ nɛ e le. 26 E kɛ kã bɔni munyu tumi ngɛ kpe he ɔ, nɛ benɛ Priskila kɛ Akuila nu e he ɔ, a ngɔ lɛ kɛ ya a ngɔ, nɛ a tsɔɔ lɛ Mawu blɔ ɔ fitsofitso pe bɔ nɛ e le ɔ. 27 Jehanɛ se hu ɔ, akɛnɛ e suɔ kaa e maa po mi kɛ ya Akaya he je ɔ, nyɛmimɛ ɔmɛ ngma kɛ ya ha kaseli ɔmɛ, nɛ a wo mɛ he wami kaa a he lɛ atuu. Enɛ ɔ he ɔ, benɛ e su lejɛ ɔ, e ye bua nihi nɛ a ba he ye kɛ gu Mawu dloomi ɔ nɔ ɔ wawɛɛ nitsɛ; 28 ejakaa e kɛ he wami ngua tsɔɔ Yuda bi ɔmɛ heii ngɛ ma hɛ mi kaa a susumi ɔ dɛ, nɛ e kɛ Ngmami ɔ tsɔɔ mɛ kaa Yesu ji Kristo ɔ nɛ.

19 E ba mi kaa benɛ Apolo ngɛ Korinto ɔ, Paulo ya kpa kpokpahi nɛ a kɛ wo he kɛ ɔmɛ a nɔ, nɛ e kple kɛ ba Efeso. E ba na kaseli komɛ ngɛ lejɛ ɔ, 2 nɛ e de mɛ ke: “Benɛ nyɛ ba he ye ɔ, anɛ nyɛ nine su mumi klɔuklɔu nɔ lo?” A ha lɛ heto ke: “Ei, wa nui hyɛ kaa mumi klɔuklɔu ko ngɛ.” 3 Lɔ ɔ he ɔ, e bi mɛ ke: “Lɛɛ mɛni mi nɛ a baptisi nyɛ ngɔ wo mɔ?” A de ke: “Yohane baptisimi ɔ mi.” 4 Paulo de mɛ ke: “Baptisimi nɛ Yohane baptisi ɔ lɛɛ e peeɔ tsui tsakemi he okadi, nɛ e de ni ɔmɛ kaa a he nɔ nɛ e ma ngɛ e se, nɛ ji Yesu ɔ nɛ a ye.” 5 Benɛ a nu nɔ́ nɛ ɔ, a baptisi mɛ ngɔ wo Nyɔmtsɛ Yesu biɛ ɔ mi. 6 Nɛ benɛ Paulo ngɔ e ninehi kɛ pue a nɔ ɔ, mumi klɔuklɔu ɔ ba a nɔ, nɛ a bɔni ma se gbihi tumi nɛ a bɔni gbami. 7 Nyumuhi maa pee 12 nɛ a ngɛ lejɛ ɔ.

8 Jehanɛ ɔ, e sɛ kpe he ɔ, nɛ e kɛ kã tu munyu ngɛ lejɛ ɔ nyɔhiɔ etɛ sɔuu, e tuɔ munyuhi kɛ tsɔɔ nihi nɛ e kɛ mɛ susuɔ Mawu Matsɛ Yemi ɔ he ngɛ blɔ nɛ e plɛɔ nɔ yi mi nɔ. 9 Se benɛ a kpɛti ni komɛ kplii a tsui nɛ a sume kaa a ma he ye,* nɛ a ngɛ Blɔ ɔ he munyu yayami tue ngɛ asafo kuu ɔ hɛ mi ɔ, e yu e he ngɛ a he nɛ e je kaseli ɔmɛ hu kɛ je a kpɛti, nɛ daa ligbi ɔ, e tuɔ munyu kɛ tsɔɔ mɛ ngɛ Tirano sukuu ɔ asa a nɔ. 10 Nɔ́ nɛ ɔ ya nɔ jeha enyɔ sɔuu, enɛ ɔ he ɔ, nihi tsuo nɛ a ngɛ Asia kpokpa a nɔ ɔ nu Nyɔmtsɛ ɔ munyu ɔ, Yuda bi kɛ Hela bi tsuo.

11 Nɛ Mawu ya nɔ nɛ e gu Paulo ninehi a nɔ kɛ tsu he wami ní tsumihi nɛ a nɛ eko hyɛ, 12 hluu po kaa a ngɔɔ bohi kɛ tade hɛ mi hami bohi nɛ sa e nɔmlɔ tso ɔ he ɔ kɛ yaa nihi nɛ a be he wami ɔmɛ a ngɔ, nɛ a hiɔ ɔmɛ jɔɔ nɛ mumi yayami ɔmɛ jeɔ a mi. 13 Se Yuda bi komɛ nɛ a kpaa si nɛ a hiaa daimoniohi ɔ hu bɔ mɔde kaa a maa ngɔ Nyɔmtsɛ Yesu biɛ ɔ kɛ tsu ní ngɛ nihi nɛ mumi yayamihi ngɛ a mi ɔmɛ a nɔ; a deɔ ke: “I ngɛ mo fãe ngɛ Yesu, nɔ nɛ Paulo ngɛ e he sane fiɛɛe ɔ biɛ mi.” 14 Jehanɛ ɔ, osɔfo nɔkɔtɔma ko nɛ e ji Yuda no nɛ a tsɛɛ lɛ ke Skeva a ngɛ binyumuhi kpaago nɛ a ngɛ jã pee. 15 Se mumi yayami ɔ he nɔ nɛ e de mɛ ke: “I le Yesu, nɛ Paulo hu i le lɛ; se nyɛɛ lɛɛ mɛnɔmɛ ji nyɛ?” 16 Kɛkɛ nɛ nyumu ɔ nɛ mumi yayami ɔ ngɛ e mi ɔ tu gblɔ mɛ, nɛ e nine ngɔ a he kakaaka, nɛ e ye a nɔ kunimi, nɛ a tu fo kɛ je jamɛ a we ɔ mi kɛ ho kɛ a he gu kɛ a he pahi. 17 Yuda bi kɛ Hela bi tsuo nɛ a ngɛ Efeso ɔ nu nɔ́ nɛ ɔ he; nɛ gbeye nu mɛ tsuo, nɛ a ya nɔ nɛ a wo Nyɔmtsɛ Yesu biɛ ɔ hɛ mi nyami wawɛɛ nitsɛ. 18 Nɛ nihi nɛ a he ye ɔ, a kpɛti nihi fuu baa nɛ a ba jajeɔ nɛ a deɔ níhi nɛ a pee ɔ ngɛ ma hɛ mi. 19 Ngɛ anɔkuale mi ɔ, nihi babauu nɛ jinɛ a tsuɔ kunya a ngɔ a womihi kɛ ba nɛ a bua a nya, nɛ a sã mɛ ngɛ nɔ fɛɛ nɔ hɛ mi. Nɛ a bu nya nɛ a na kaa a he jua su sika hiɔ 50,000. 20 Enɛ ɔ he ɔ, Yehowa* munyu ɔ ya nɔ nɛ e ngɛ wae nɛ e ngɛ hɛ mi yae ngɛ he wami nya.

21 Benɛ ní nɛ ɔmɛ ya nɔ se ɔ, Paulo ma nya si ngɛ e mumi mi kaa ke e ya gu Makedonia kɛ Akaya se ɔ, e maa hia blɔ kɛ ya Yerusalɛm. E de ke: “Ke i ya lejɛ ɔ, e sa nɛ ma ya su Roma hulɔ.” 22 Enɛ ɔ he ɔ, e tsɔ nihi nɛ a sɔmɔ lɛ ɔmɛ a kpɛti nihi enyɔ, Timoteo kɛ Erasto kɛ ya Makedonia, se lɛ nitsɛ lɛɛ e hi si be saii ngɛ Asia kpokpa a nɔ.

23 Jamɛ a be ɔ mi ɔ, basabasa peemi nɛ mi wa ko ba te si ngɛ Blɔ ɔ he. 24 Ejakaa nyumu ko nɛ a tsɛɛ lɛ ke Demetrio nɛ e ji sika hiɔ ga ní tsulɔ, nɛ e ngɔ sika hiɔ kɛ pee Atemis wɔ tsuhi ɔ ha nɛ ga ní tsuli ɔmɛ ná ní babauu. 25 E bua a kɛ ni kpahi nɛ a tsuɔ jamɛ a ní ɔmɛ a he ní ɔ nya, nɛ e de ke: “Nyumuhi, nyɛ le saminya kaa ní tsumi nɛ ɔ lɛ e wo wɔ ní. 26 Amlɔ nɛ ɔ, nyɛ na nɛ nyɛ nu kaa pi Efeso pɛ, se mohu ɔ, ngɛ Asia kpokpa a tsuo nɔ ɔ, Paulo nɛ ɔ plɛ nihi babauu a yi mi nɛ e ha nɛ a ná susumi kpa, nɛ a ngɛ dee ke mawuhi nɛ a kɛ ninehi pee ɔ, pi mawu nitsɛnitsɛmɛ ji mɛ. 27 Jehanɛ se hu ɔ, nyagba a ji kaa pi wa ní tsumi nɛ ɔ he guɛ kɛkɛ nɛ e ma gbo, se mohu ɔ, a be yo mawu Atemis sɔlemi we ɔ hu bue fɛɛ, nɛ lɛ nɛ a jaa lɛ ngɛ Asia kpokpa a tsuo nɔ kɛ zugba a nɔ hehi nɛ nimli ngɛ ɔ, e hɛ mi nyami ɔ hu ma bɔ lɛ.” 28 Benɛ nyumu ɔmɛ nu nɔ́ nɛ ɔ, a mi mi fu wawɛɛ nitsɛ nɛ a bɔni ngmlaa kpami ke: “Efeso bi ɔmɛ a we Atemis ɔ je agbo!”

29 Enɛ ɔ he ɔ, ma a mi pee gidigidi, nɛ mɛ tsuo a pee kake nɛ a sa fo kɛ ya fiɛmi he ɔ, nɛ a gbla Gayo kɛ Aristako nɛ a ji Makedonia bi nɛ a piɛɛ Paulo he kɛ ngɛ blɔ hiae ɔ ngɔ piɛɛ a he kɛ ya lejɛ ɔ. 30 Ngɛ Paulo blɔ fa mi ɔ, jinɛ e suɔ kaa e maa ya ni ɔmɛ a kpɛti, se kaseli ɔmɛ ngmɛ́ lɛ blɔ. 31 Gbijlɔhi kɛ fiɛmihi a he blɔ nya toli ɔmɛ a kpɛti ni komɛ nɛ a ji Paulo huɛmɛ ɔmɛ po ngɔ sɛ gbi kɛ ya ha lɛ, nɛ a kpa lɛ pɛɛ kaa e ko nla kaa e maa ya fiɛmi he ɔ. 32 Ngɛ anɔkuale mi ɔ, ni komɛ ngɛ ngmlaa kpae kikɛ nɛ ɔ nɛ ni komɛ hu ngɛ nɔ́ kpa dee; ejakaa ni ɔmɛ nɛ a kpe ɔ ngɛ gidigidi pee, nɛ a kpɛti nihi fuu li yi mi tomi he je nɛ a ba kpe ngɛ ɔ. 33 Enɛ ɔ he ɔ, a ngɔ Alɛksanda kɛ je asafo kuu ɔ mi kɛ ba, Yuda bi ɔmɛ ngɛ lɛ tsitsɛɛe, nɛ Alɛksanda fɔ e nine nɛ e suɔ kaa e ma je e nya ngɛ ni ɔmɛ a hɛ mi. 34 Se benɛ a yɔse kaa Yuda no ji lɛ ɔ, mɛ tsuo a kɛ gbi kake bɔni ngmlaa kpami maa pee ngmlɛfia enyɔ sɔuu, nɛ a ngɛ dee ke: “Efeso bi ɔmɛ a we Atemis ɔ je agbo!”

35 Nyagbenyagbe ɔ, benɛ ma a womi ngmalɔ ɔ ha nɛ asafo kuu ɔ pee kɔ̃ ɔ, e de ke: “Efeso nyumuhi, adesahi a kpɛti mɛnɔ lɛ e li kaa Efeso ma a ji Atemis ngua a kɛ amaga a nɛ e je hiɔwe kɛ ba nɔ si ɔ sɔlemi we ɔ yi baalɔ? 36 Akɛnɛ nɔ ko be nyɛe maa je ní nɛ ɔmɛ a he atsinyɛ he je ɔ, e sa nɛ nyɛɛ pee dii, nɛ nyɛ ko pee gidigidi ko. 37 Ejakaa nyɛ ngɔ nyumu nɛ ɔmɛ kɛ ba hiɛ ɔ, pi kaa a ya ju níhi ngɛ sɔlemi we ɔmɛ, aloo a bɔ musu kɛ si wa yo mawu ɔ. 38 Enɛ ɔ he ɔ, ke Demetrio kɛ ga ní tsuli ɔmɛ nɛ a piɛɛ e he ɔ kɛ nɔ ko ngɛ sane ko ɔ, ligbihi ngɛ nɛ a kɛ kojoɔ, nɛ amlaalohi* hu ngɛ; nyɛ ha nɛ a ba sama a sibi. 39 Se ke nyɛ ngɛ nɔ́ ko hlae ngɛ enɛ ɔ se ɔ, lɛɛ e sa nɛ ma a nɛ e kpe konɛ a ma nya si. 40 Ejakaa ke wa hyɛ we nɛ hi ɔ, a maa bu wɔ kaa wa ji ma nɔ yelɔ ɔ hɛ mi atua tsɔli ngɛ nɔ́ nɛ e ba mwɔnɛ ɔ he je, ejakaa wa be nɔ́ ko nɛ waa kɛ ma je wa nya kaa lɔ ɔ he je nɛ nimli babauu ɔ ngɛ basabasa nɛ ɔ pee ɔ.” 41 Nɛ benɛ e de enɛ ɔ se ɔ, e gbɛ kpe ɔ.

20 Se benɛ gidigidi peemi ɔ nya ba si ɔ, Paulo tsɔ kɛ ya tsɛ kaseli ɔmɛ, nɛ benɛ e wo mɛ he wami nɛ́ e kɛ mɛ ye sɛ ta a, e je e blɔ hiami ɔ sisi kɛ yaa Makedonia. 2 Benɛ e ya kpa lejɛ ɔ kpokpa amɛ a nɔ nɛ e tu he wami womi munyuhi fuu kɛ tsɔɔ nihi nɛ a ngɛ lejɛ ɔmɛ ɔ ta a, e ba su Hela. 3 E ye nyɔhiɔ etɛ ngɛ lejɛ ɔ, se akɛnɛ Yuda bi ɔmɛ so e yi nɔ benɛ e piɛ bɔɔ nɛ e maa sɛ lɛ mi kɛ ya Siria a he je ɔ, e pee e juɛmi kaa e maa kpale e se kɛ ya gu Makedonia. 4 Sopata, nɛ e ji Piro nɛ e je Beroya a binyumu ɔ, Aristako kɛ Sekundo nɛ a je Tɛsalonika a, Gayo nɛ e je Dɛɛbe ɔ, Timoteo, kɛ Tikiko kɛ Trofimo nɛ a je Asia kpokpa a nɔ ɔ piɛɛ e he. 5 Nyumu nɛ ɔmɛ sɛ wa hlami nɛ a ya ngɛ wɔ mlɛe ngɛ Troya; 6 se ngɛ Abolo Nɛ Masa Be Mi Gbijlɔ ɔ ligbi ɔmɛ a se ɔ, wa je Filipi nɛ wa gu wo ɔ nɔ, nɛ ngɛ ligbi enuɔ mi ɔ, wa ba su Troya, nɛ wa ye ligbi kpaago ngɛ lejɛ ɔ.

7 Ngɛ otsi ɔ we kekleekle ligbi ɔ nɔ benɛ wa bua wa he nya konɛ waa ye ní ɔ, Paulo bɔni munyu tumi kɛ ngɛ wɔ tsɔɔe akɛnɛ e nɔ jena e maa je ɔ he je; nɛ e tu munyu ɔ hluu kɛ su nyɔ mi kpɛti. 8 Enɛ ɔ he ɔ, kanehi fuu ngɛ hiɔwe tsu ɔ mi he nɛ wa bua wa he nya ngɛ ɔ. 9 Niheyo ko hii si ngɛ saflɛ ɔ nya nɛ a tsɛɛ lɛ ke Yutiko, nɛ benɛ Paulo ya nɔ nɛ e ngɛ munyu ɔ tue ɔ, e sɛ mahe mi vii nɛ e tsɔ kɛ je mɔ siaudo etɛne ɔ nɔ kɛ ba nɔ si, nɛ benɛ a ya wo e nɔ ɔ, e gbo momo. 10 Se Paulo kple atlakpe ɔ nɛ e ya bu e nɔ, nɛ e fua lɛ, nɛ e de ke: “Nyɛ kpa hoo ɔ peemi, ejakaa e ngɛ wami mi.”* 11 Kɛkɛ nɛ e kuɔ atlakpe ɔ kɛ ba nɛ e ba ku abolo ɔ nɛ e ye. E tsa ní sɛɛmi ɔ nɔ hluu kɛ ya si be nɛ je na, nɛ lɔ ɔ se ɔ, e pue nɔ kɛ ho. 12 Nɛ a ngɔ nyumuyo ɔ kɛ ho hɛ ngmengmle, nɛ a ná bua womi saminya.

13 Jehanɛ ɔ, wa sɛ hlami kɛ ya sɛ mele mi, nɛ wa pue nɔ kɛ yaa Asos, kɛ yi mi tomi ɔ kaa wa yaa ngɔ Paulo ngɛ lejɛ ɔ, ejakaa e kɛ blɔ tsɔɔmi ha wɔ ngɛ enɛ ɔ he momo, nɛ e to kaa e maa gu nane blɔ kɛ ya lejɛ ɔ. 14 Lɔ ɔ he ɔ, benɛ e ba ná wɔ ngɛ Asos ɔ, wa ha nɛ e sɛ mele ɔ mi, nɛ wa pue nɔ kɛ ho Mitilene ya. 15 Nɛ e nɔ jena benɛ wa je lejɛ ɔ, wa ba su Kiyo, se e nɔ jena ekohu ɔ, wa ba su Samos, nɛ e nɔ jena ekohu ɔ, wa ba su Mileto. 16 Paulo pee e juɛmi kaa e maa hi mele ɔ mi kɛ tsɔ Efeso he bɔ nɛ pee nɛ e se nɛ ko kɛ ngɛ Asia kpokpa a nɔ, ejakaa e ngɛ oya yee kaa ke e ma nyɛ ɔ, e ma ya su Yerusalɛm ngɛ Pentekoste Gbijlɔ ligbi ɔ nɔ.

17 Se benɛ e ngɛ Mileto ɔ, e tsɔ kɛ ya Efeso konɛ a ya tsɛ asafo ɔ mi nikɔtɔma amɛ kɛ ba. 18 Benɛ a ba e ngɔ ɔ, e de mɛ ke: “Nyɛ nitsɛmɛ nyɛ le bɔ nɛ i ba ye je mi ha benɛ i ngɛ nyɛ kpɛti ɔ, kɛ je kekleekle ligbi nɛ ye nane ma Asia kpokpa a nɔ ɔ, 19 nɛ i kɛ he si bami juɛmi sɔmɔ Nyɔmtsɛ ɔ kɛ vo nyu kɛ kahi nɛ i kɛ kpe ngɛ ye yi nɔ nɛ Yuda bi ɔmɛ so ɔ he je, 20 nɛ i laa we nyɛ níhi nɛ a he ngɛ se nami ha nyɛ* ɔ ekoeko nɔ, nɛ jã kɛ̃ nɛ i kpa we nyɛ ní tsɔɔmi ngɛ ma hɛ mi kɛ we fɛɛ we mi. 21 Se i ye tsui nɛ e sa kaa a tsake kɛ ba Mawu ngɔ kɛ wa Nyɔmtsɛ Yesu mi hemi kɛ yemi ɔ he odase kɛ pi si kɛ tsɔɔ Yuda bi kɛ Hela bi tsuo. 22 Nɛ amlɔ nɛ ɔ, hyɛ! a fi mi ngɛ mumi ɔ mi,* i ngɛ blɔ hiae kɛ yaa Yerusalɛm, e ngɛ mi kaa i li nɔ́ nɛ e ma ya ba ye nɔ ngɛ lejɛ ɔ mohu, 23 kaa ja nɔ́ nɛ mumi klɔuklɔu ɔ pɔɔ mi he odase yemi ke i je ma ko mi kɛ yaa ma kpa mi ɔ, e deɔ mi ke tsu womi kɛ amanehluhi ngɛ mi mlɛe. 24 Se kɛ̃ ɔ, i bui imi nitsɛ ye wami* ɔ kaa e he hia mi,* ke ma nyɛ ma gbe ye blɔ nɛ i hia kɛ sɔmɔmi nɛ ye nine su nɔ kɛ je Nyɔmtsɛ Yesu ngɔ kaa ma ye Mawu dloomi ɔ he odase kɛ pi si ɔ nya.

25 “Nɛ amlɔ nɛ ɔ, hyɛ! i le kaa nyɛ nihi nɛ i fiɛɛ Matsɛ Yemi ɔ ngɛ nyɛ kpɛti ɔ, nyɛ be ye hɛ mi nae hu. 26 Enɛ ɔ he ɔ, mwɔnɛ ɔ ligbi nɛ ɔ, i ngɛ nyɛ tsɛe nɛ nyɛ ba ye odase ha mi kaa i yi nɔ ko nɔ ko muɔ he fɔ, 27 ejakaa i de nyɛ Mawu ga womi ɔmɛ tsuo,* nɛ i laa we nyɛ ekoeko nɔ. 28 Nyɛ hɛ nɛ hi nyɛ nitsɛmɛ nyɛ he nɔ nɛ nyɛ hɛ nɛ hi to kuu ɔ tsuo hu nɔ, nihi nɛ mumi klɔuklɔu ɔ ngɔ nyɛ kɛ pee nɔ hyɛli ngɛ a kpɛti ɔ, konɛ nyɛɛ hyɛ Mawu asafo ɔ nɛ e ngɔ lɛ nitsɛ e Bi ɔ muɔ ɔ kɛ he ɔ nɔ. 29 I le kaa ke i je kɛ ho ɔ, ogbeteehi nɛ a yi mi wa ma ba sɛ nyɛ kpɛti, nɛ a be to kuu ɔ hɛɛe dɔdɔɔdɔ, 30 nɛ nyumuhi maa te si ngɛ nyɛ nitsɛmɛ nyɛ kpɛti, nɛ a maa tu munyu kpɛ̃kpɛ̃ɛhi konɛ a kɛ gbla kaseli ɔmɛ kɛ nyɛɛ mɛ nitsɛmɛ a se.

31 “Enɛ ɔ he ɔ, nyɛ ko hwɔ mahe, nɛ nyɛ ha nɛ e hi nyɛ juɛmi mi kaa jeha etɛ sɔuu ɔ, nyɔnyɔɔnyɔ kɛ piapiaapia a, i kɛ vo nyu kpa we nyɛ ti nɔ fɛɛ nɔ ga womi. 32 Nɛ amlɔ nɛ ɔ, i tu nyɛ ngɔ wo Mawu kɛ e dloomi munyu ɔ, nɛ ji munyu nɛ e ma nyɛ maa fia nyɛ kɛ ma si, nɛ e ma ha nɛ nyɛ nine maa su gbosi ní ɔ nɔ ngɛ nihi tsuo nɛ a tsu a he ɔmɛ a kpɛti ɔ dɛ mi. 33 Ye hɛ kɔɛ nɔ ko sika hiɔ loo sika tsu loo bo nɔ. 34 Nyɛ nitsɛmɛ nyɛ le kaa nine nɛ ɔmɛ nɛ i kɛ tsu imi nitsɛ ye hiami níhi kɛ nihi nɛ a piɛɛ ye he ɔmɛ a hiami níhi a he ní. 35 I ha nɛ nyɛ na kaa kɛ gu ní tsumi wawɛɛ kaa kikɛ nɛ ɔ nɔ ɔ, e sa nɛ nyɛɛ ye bua nihi nɛ a gbɔjɔ ɔ, konɛ nyɛ ha nɛ munyu nɛ Nyɔmtsɛ Yesu tu ɔ nɛ e hi nyɛ juɛmi mi, be mi nɛ lɛ nitsɛ e de ke: ‘Bua jɔmi babauu ngɛ nɔ́ hami mi pe nɔ́ ngɔmi’ ɔ.”

36 Nɛ benɛ e tu munyu nɛ ɔmɛ ta a, e kɛ mɛ tsuo a kpla si nɛ a sɔle. 37 Ngɛ anɔkuale mi ɔ, mɛ tsuo a wo ya nɛ a fo wawɛɛ nitsɛ, nɛ a fua Paulo,* nɛ a je suɔmi mi nɛ a fĩɔ e nya he, 38 ejakaa nɔ́ nɛ e hao mɛ wawɛɛ ji munyu nɛ e tu kaa a be e hɛ mi nae hu ɔ. Lɔ ɔ se ɔ, a piɛɛ e he kɛ ya mele ɔ he.

21 Benɛ waa kɛ mɛ wa mi gba nɛ wa nɔ wo ɔ nɔ ɔ, wa ya wa hɛ mi tɛ̃ɛ nɛ wa ba su Kos, nɛ e nɔ jena a, wa ba Rodos, nɛ benɛ wa je lejɛ ɔ, wa ba Patara. 2 Benɛ wa na mele ko nɛ e ngɛ mi poe kɛ yaa Foinike ɔ, wa ya sɛ mi nɛ wa pue nɔ kɛ ho. 3 Benɛ wa na zugba kpɔ ko nɛ nyu bɔle lɛ nɛ a tsɛɔ ke Kipro ɔ, wa po lɛ ngɔ fɔ wa muɔ nɔ, nɛ waa kɛ mele ɔ ba Siria, nɛ wa ba da si ngɛ Tiro, he nɛ a ma je mele ɔ mi tlomi ngɛ ɔ. 4 Wa hla kaseli ɔmɛ ngɛ lejɛ ɔ nɛ wa na mɛ, nɛ wa hi lejɛ ɔ ligbi kpaago. Se kɛ gu mumi ɔ nɔ ɔ, a de Paulo si abɔ kaa e nane nɛ e ko ma Yerusalɛm. 5 Enɛ ɔ he ɔ, benɛ ligbi nɛ wa maa ye ngɛ lejɛ ɔ ba nyagbe ɔ, wa je nɛ wa pue nɔ kɛ yaa, se mɛ tsuo nɛ yihi kɛ jokuɛwi hu piɛɛ a he ɔ je wɔ blɔ hluu kɛ ya si be nɛ wa je ma a mi. Nɛ wa kpla si ngɛ wo ɔ nya nɛ wa sɔle, 6 nɛ waa kɛ wa sibi ye sɛ. Lɔ ɔ se ɔ, wa ya sɛ mele ɔ mi, nɛ mɛ hu a kpale a se kɛ ho a wehi a mi ya.

7 Lɔ ɔ se ɔ, wa gbe wa wo nɔ blɔ hiami ɔ nya benɛ wa je Tiro nɛ wa ba su Pitolema a, nɛ wa fɔ nyɛmimɛ ɔmɛ, nɛ waa kɛ mɛ hi si ligbi kake. 8 E nɔ jena a, wa je kɛ ba Kaisarea, nɛ wa ba sɛ Filipo nɛ e ji sane kpakpa fiɛɛlɔ nɛ e piɛɛ nyumu kpaago ɔmɛ a he ɔ we ɔ mi, nɛ wa hi e ngɔ. 9 Nyumu nɛ ɔ ngɛ biyihi eywiɛ nɛ a li nyumu nɛ́ a gbaa. 10 Benɛ wa hi lejɛ ɔ ligbihi fuu se ɔ, gbalɔ ko nɛ a tsɛɛ lɛ ke Agabo ɔ kple kɛ je Yudea kɛ ba. 11 E ba wa ngɔ nɛ e ba ngɔ nɔ́ nɛ Paulo kɛ fi e mlɛmi ɔ nɛ e kɛ fi e nanehi kɛ e ninehi nɛ e de ke: “Nɔ́ nɛ mumi klɔuklɔu ɔ ngɛ dee ji nɛ ɔ nɛ, ‘Yuda bi ɔmɛ nɛ a ngɛ Yerusalɛm ɔ maa fi nɔ nɛ e nɔ́ ji mlɛmi fimi nɔ́ nɛ ɔ kaa kikɛ nɛ ɔ, nɛ a maa ngɔ lɛ kɛ wo nihi nɛ a je je ma amɛ a mi ɔmɛ a dɛ mi.’” 12 Jehanɛ ɔ, benɛ wa nu nɔ́ nɛ ɔ, waa kɛ nihi nɛ a ngɛ lejɛ ɔ tsuo bɔni lɛ pɛɛ kpami kaa e ko kuɔ kɛ ya Yerusalɛm. 13 Kɛkɛ nɛ Paulo he nɔ nɛ e de ke: “Mɛni he je nɛ nyɛ ngɛ ya foe nɛ nyɛ ngɛ mɔde bɔe kaa nyɛ ma jɔ̃ ye kɔni mi ɔ?* Nyɛ ná nɛ nyɛɛ le kaa pi fimi nɛ a maa fi mi ɔ kɛkɛ nɛ i dla ye he kɛ ha, se mohu i dla ye he kaa ma gbo ngɛ Yerusalɛm kɛ ha Nyɔmtsɛ Yesu biɛ ɔ.” 14 Benɛ wa nyɛ we nɛ wa plɛ e yi mi ɔ, wa ma wa nya, nɛ wa de ke: “Ha nɔ́ nɛ Yehowa suɔ ɔ nɛ e ba mi.”

15 Jehanɛ ɔ, ngɛ ligbi nɛ ɔmɛ a se ɔ, wa dla wa he kɛ ha blɔ hiami ɔ, nɛ wa pue nɔ kɛ yaa Yerusalɛm. 16 Kaseli ɔmɛ nɛ a ngɛ Kaisarea a, a kpɛti ni komɛ hu piɛɛ wa he kɛ ho, nɛ a ngɔ wɔ kɛ ya Minasin, Kipro no nɛ e ji kaselɔ kɛ je blema nɛ wa ma ya to e we ɔ mi ɔ ngɔ. 17 Benɛ wa su Yerusalɛm ɔ, nyɛmimɛ ɔmɛ kɛ bua jɔmi nya wa he. 18 Se e nɔ jena a, Paulo kɛ wɔ ya Yakobo ngɔ, nɛ nikɔtɔma amɛ tsuo hu ngɛ lejɛ ɔ. 19 Nɛ e fɔ mɛ, nɛ e bɔni mɛ níhi nɛ Mawu gu e sɔmɔmi ní tsumi ɔ nɔ kɛ pee ngɛ je ma amɛ a mi ɔ bɔmi fitsofitso.

20 Benɛ a nu nɔ́ nɛ ɔ, a bɔni Mawu hɛ mi nyami womi, se a de lɛ ke: “Nyɛminyumu, hyɛ, Yuda bi ɔmɛ a kpɛti nihi akpehi abɔ nɛ a he ye ɔ, mɛ tsuo a hɛ dɔɔ wawɛɛ ngɛ Mlaa a he. 21 Se a nu akeake munyu ngɛ o he kaa o ngɛ Yuda bi tsuo nɛ a ngɛ je ma amɛ a mi ɔ tsɔɔe kaa a kua Mose, nɛ o ngɛ mɛ dee kaa a ko po a bimɛ, nɛ a ko nyɛɛ kusumi ní peepee ɔmɛ hu a se. 22 Lɛɛ mɛni e sa kaa waa pee mɔ? Bɔ fɛɛ bɔ nɛ e ji ɔ, a maa nu kaa o ba. 23 Enɛ ɔ he ɔ, moo pee nɔ́ nɛ wa ma de mo nɛ ɔ: Wa ngɛ nyumuhi eywiɛ nɛ a kã kita. 24 Ngɔɔ nyumu nɛ ɔmɛ kɛ piɛɛ o he nɛ o kɛ mɛ nɛ ya nɛ nyɛ ya tsukɔ nyɛ he ngɛ kusumi nya, nɛ o wo hiɔ nɛ a maa bɔ ɔ ha mɛ, konɛ a ha nɛ a sɛ a yi ɔmɛ. Kɛkɛ ɔ, nɔ fɛɛ nɔ maa le kaa akeake munyu nɛ a ngɛ nue ngɛ o he ɔ be mi, mohu ɔ, o ngɛ nyɛɛe pɛpɛɛpɛ, nɛ o ngɛ Mlaa a hu nɔ yee. 25 Ngɛ nihi nɛ a je je ma amɛ a mi nɛ a he ye ɔmɛ a blɔ fa mi ɔ, wa ngma bɔ nɛ wa mwɔ wa yi mi kpɔ ha a kɛ ya ha mɛ kaa a ya nɔ nɛ a hi a he yue ngɛ níhi nɛ a ngɔ kɛ sã afɔle ha wɔhi kɛ muɔ, kɛ lohwehi nɛ a kika a kuɛ,* kɛ ajuama bɔmi* he.”

26 Kɛkɛ nɛ e nɔ jena a, Paulo ngɔ nyumu ɔmɛ nɛ e kɛ mɛ ya tsukɔ a he ngɛ kusumi nya a, nɛ e ya sɔlemi we ɔ nɛ e ya ha nɛ a le be nɛ he tsukɔmi ligbi ɔmɛ maa ba nyagbe kɛ be nɛ e sa kaa a sã afɔle ha a ti nɔ fɛɛ nɔ.

27 Jehanɛ ɔ, benɛ e piɛ bɔɔ nɛ ligbi kpaago ɔ maa ba nyagbe ɔ, Yuda bi nɛ a je Asia a na lɛ ngɛ sɔlemi we ɔ, nɛ a su asafo kuu ɔ tsuo ngɔ wo e he, nɛ a nu lɛ, 28 a ngɛ ngmlaa kpae ke: “Israel nyumuhi, nyɛ ba ye bua wɔ! Nyumu ɔ nɛ e ngɛ munyu tue kɛ ngɛ wa we bi ɔmɛ, kɛ wa Mlaa a, kɛ hiɛmɛ nɛ ɔ sie kɛ ngɛ nɔ fɛɛ nɔ tsɔɔe ngɛ he fɛɛ he ɔ ji nɛ ɔ nɛ. Nɛ nɔ́ nɛ pa hí pe kulaa ji kaa e ngɔ Hela bi po kɛ ba sɛ sɔlemi we ɔ, nɛ e ble he klɔuklɔu nɛ ɔ.” 29 Ejakaa a na Paulo kɛ Trofimo, nɛ ji Efeso no ɔ ngɛ ma a mi momo, nɛ a susu kaa e ngɔ lɛ kɛ ba sɛ sɔlemi we ɔ. 30 Ma a mi tsuo pee hoo, nɛ ni ɔmɛ tsuo pee kake nɛ a tu fo kɛ ba nɛ a ba nu Paulo, nɛ a gbla lɛ kɛ je sɔlemi we ɔ, nɛ amlɔ nɔuu nɛ a nga sinya amɛ. 31 Benɛ a ngɛ mɔde bɔe kaa a maa gbe lɛ ɔ, sɛ gbi ya su ta buli a nyatsɛ ngua a ngɔ kaa basabasa peemi ngɛ nɔ yae ngɛ Yerusalɛm tsuo; 32 nɛ amlɔ nɔuu ɔ, e ngɔ ta buli kɛ ta buli a nikɔtɔmahi kɛ piɛɛ e he nɛ a tu fo nɛ a kple kɛ ba a ngɔ. Benɛ a hɛ ngmɛ gba ta buli a nyatsɛ ngua a kɛ ta buli ɔmɛ a nɔ ɔ, a jɔɔ Paulo kongomi.

33 Kɛkɛ nɛ ta buli a nyatsɛ ngua a ba e hɛ mi nɛ e ba nu lɛ nɛ e fã ke a wo lɛ kɔsɔkɔsɔ enyɔ; lɔ ɔ se ɔ, e bi kaa mɛnɔ ji lɛ nɛ mɛni e pee. 34 Se asafo kuu ɔ mi ni komɛ bɔni ngmlaa kpami kɛ ngɛ dee kikɛ nɛ ɔ, nɛ ni kpahi hu ngɛ nɔ́ kpa dee. Akɛnɛ lɛ nitsɛ hu e nyɛ we nɛ e le sane ɔ mi tutuutu ngɛ basabasa peemi nɛ ngɛ nɔ yae ɔ he he je ɔ, e fã ke a ngɔ lɛ kɛ ba ta buli ɔmɛ a hi he ɔ. 35 Se benɛ e su atlakpe ɔ he ɔ, ta buli ɔmɛ wo e nɔ akɛnɛ asafo kuu ɔ ngɛ basabasa pee ɔ he je, 36 ejakaa asafo kuu ɔ ya nɔ nɛ a ngɛ ngmlaa kpae ke: “Tane e yi!”

37 Benɛ e piɛ bɔɔ nɛ a kɛ Paulo maa su ta buli ɔmɛ a hi he ɔ, e bi ta buli a nyatsɛ ngua a ke: “Anɛ ma nyɛ ma de mo nɔ́ ko lo?” E bi lɛ ke: “O tuɔ Hela gbi lo? 38 Lɛɛ anɛ pi mo ji Ijipt no ɔ nɛ be ko nɛ be ɔ, e ha nɛ nihi tsɔ atua nɛ e nyɛɛ nyumuhi 4,000 nɛ a hiaa ha amɛ a hɛ mi kɛ ho nga a nɔ ya a lo?” 39 Kɛkɛ nɛ Paulo de ke: “Ngɛ anɔkuale mi ɔ, Yuda no ji mi, i je Taaso ngɛ Kilikia, pi ma ko nɛ a nui e biɛ mi no ji mi. Enɛ ɔ he ɔ, i kpa mo pɛɛ, mo ha nɛ ma tu munyu kɛ tsɔɔ ni ɔmɛ.” 40 Benɛ e ngmɛ lɛ blɔ ɔ, Paulo da si ngɛ atlakpe ɔ nɔ nɛ e ngɔ e nine kɛ pee okadi. Benɛ lejɛ ɔ jɔ dii ɔ, e tu munyu kɛ tsɔɔ mɛ ngɛ Hebri gbi mi ke:

22 “Nyumuhi, nyɛmimɛ kɛ tsaatsɛmɛ, amlɔ nɛ ɔ, nyɛɛ bu ye nya nɛ i ma jemi ɔ tue.” 2 Ngɛ anɔkuale mi ɔ, benɛ a nu kaa e kɛ mɛ ngɛ munyu tue ngɛ Hebri gbi mi ɔ, a pee dii po pe kekle ɔ, nɛ e de ke: 3 “Yuda no ji mi, a fɔ mi ngɛ Taaso ngɛ Kilikia, se ma nɛ ɔ mi nɛ a tsɔse mi ngɛ ngɛ Gamaliɛl nane nya, a tsɔɔ mi ní kaa bɔ nɛ wa nɛmɛ ɔmɛ a Mlaa a tsɔɔ ɔ pɛpɛɛpɛ, nɛ i kplɛɛ we Mawu he nɔ́ kulaa kaa bɔ nɛ nyɛ tsuo nyɛ ngɛ pee mwɔnɛ ɔ. 4 I wa Blɔ nɛ ɔ yi mi hluu kɛ ya si gbenɔ mi tete po, i fĩɔ nyumuhi kɛ yihi tsuo, nɛ i ngɔɔ mɛ kɛ haa nɛ a ya woɔ mɛ tsu, 5 kaa bɔ nɛ osɔfo nɔkɔtɔma pe kulaa a kɛ nikɔtɔma amɛ a kpe ɔ tsuo ma nyɛ maa ye he odase ɔ. Jehanɛ hu ɔ, ye nine su sɛ womihi a nɔ kɛ je a ngɔ nɛ jinɛ i kɛ yaa ha nyɛmimɛ ɔmɛ nɛ a ngɛ Damasko ɔ, nɛ i ngɛ blɔ nɔ kɛ yaa konɛ ma ya fĩ nihi nɛ a ngɛ lejɛ ɔ kɛ ba Yerusalɛm nɛ a ba gbla a tue.

6 “Se benɛ i ngɛ blɔ hiami ɔ nɔ kɛ yaa nɛ e piɛ bɔɔ nɛ ma su Damasko ɔ, maa pee piani katakata a, tlukaa nɛ la ngua ko kpɛ kɛ je hiɔwe kɛ ba bɔle mi, 7 nɛ i nɔ si ngɛ zugba, nɛ i nu gbi ko nɛ e bi mi ke: ‘Saulo, Saulo, mɛni he je nɛ o ngɛ mi yi mi wae ɔ?’ 8 I bi ke: ‘Nyɔmtsɛ, mo mɛnɔ?’ Nɛ e de mi ke: ‘Imi ji Yesu, Nazarɛt no ɔ nɛ o ngɛ lɛ yi mi wae ɔ nɛ.’ 9 Jehanɛ ɔ, nyumu ɔmɛ nɛ a piɛɛ ye he ɔ na la a, se a nui nɔ nɛ e kɛ mi ngɛ munyu ɔ tue ɔ gbi ɔ. 10 Kɛkɛ nɛ i bi ke: ‘Nyɔmtsɛ, mɛni e sa kaa ma pee?’ Nyɔmtsɛ ɔ de mi ke: ‘Tee si, yaa Damasko, nɛ a maa tsɔɔ mo nɔ́ fɛɛ nɔ́ nɛ a to kɛ ha mo nɛ o maa pee ɔ ngɛ lejɛ ɔ.’ 11 Se akɛnɛ jamɛ a la a hɛ mi nyami ɔ ha nɛ i nyɛ we nɛ ma hyɛ nɔ́ he je ɔ, nihi nɛ a piɛɛ ye he ɔ ta ye dɛ mi kɛ ya Damasko.

12 “Lɔ ɔ se ɔ, nyumu ko nɛ a tsɛɛ lɛ ke Anania, nɛ e jaa Mawu saminya ngɛ Mlaa a nya, nɛ Yuda bi ɔmɛ tsuo nɛ a ngɛ lejɛ ɔ tuɔ e he munyu kpakpa a 13 ba ye ngɔ. E ba da si ngɛ ye kasa nya nɛ e de mi ke: ‘Saulo, ye nyɛmi, moo hyɛ nɔ́ ekohu!’ Nɛ amlɔ nɔuu nɛ i wo ye yi nɔ, nɛ i na lɛ. 14 E de ke: ‘Wa nɛmɛ ɔmɛ a Mawu ɔ hla mo konɛ o ba le e suɔmi nya ní, konɛ o na dalɔ ɔ, nɛ́ o nu e nya mi gbi, 15 ejakaa o ma ba pee e we odase kɛ ha adesahi tsuo ngɛ níhi nɛ o na nɛ o nu ɔmɛ a he. 16 Nɛ amlɔ nɛ ɔ, mɛni he je nɛ o ngɛ tsle toe ɔ? Tee si, ha nɛ a baptisi mo, nɛ o fɔ o he yayami ɔmɛ kɛ pue he kɛ gu e biɛ ɔ nɛ o ma tsɛ ɔ nɔ.’

17 “Se benɛ i kpale ye se kɛ ya Yerusalɛm nɛ i ngɛ sɔlee ngɛ sɔlemi we ɔ, nɔ́ nɔ ye nɔ, 18 nɛ i na lɛ nɛ e ngɛ mi dee ke: ‘O he nɛ sɔ nɛ o je Yerusalɛm mla, ejakaa a be ye he odase nɛ o maa ye ɔ nɔ kplɛɛe.’ 19 Nɛ i de ke: ‘Nyɔmtsɛ, mɛ nitsɛmɛ a le saminya kaa jinɛ i jeɔ kpe hehi kɛ yaa kpe hehi nɛ i ya woɔ nihi nɛ a he mo ye ɔ tsu nɛ i fiaa mɛ kpa; 20 nɛ benɛ a ngɛ o we odasefo no Steven muɔ si puee ɔ, i daa si ngɛ lejɛ ɔ, nɛ i kplɛɛ nɔ, nɛ i ngɛ tadehi nɛ nihi nɛ a tane e yi ɔ wo ngɛ a tade ɔmɛ a nɔ ɔ he bue.’ 21 Se kɛ̃ ɔ, e de mi ke: ‘Yaa, ejakaa ma tsɔ mo kɛ ya je mahi nɛ a ngɛ tsitsaa lokoo ɔmɛ a ngɔ.’”

22 A ya nɔ nɛ a ngɛ lɛ tue bue kɛ ba si munyu nɛ ɔ nɔ. Lɔ ɔ se ɔ, a wo a gbi nɔ nɛ a de ke: “Je nyumu kaa kikɛ nɛ ɔ kɛ je zugba a nɔ, ejakaa e sɛ kaa e hiɔ wami mi!” 23 Ejakaa a ngɛ ngmlaa kpae nɛ a ngɛ tadehi nɛ a wo ngɛ a tade ɔmɛ a nɔ ɔ fɔe, nɛ a ngɛ bunyuku woe puu, 24 Ta buli a nyatsɛ ngua a fã ke a ngɔ Paulo kɛ ba ta buli ɔmɛ a hi he ɔ, nɛ e de ke a fiaa lɛ kpa kɛ bi lɛ e nya mi, konɛ e nyɛ nɛ e le nɔ́ tutuutu he je nɛ ni ɔmɛ ngɛ ngmlaa kpae kɛ ngɛ Paulo woe kikɛ nɛ ɔ. 25 Se benɛ a kpã e mi nɛ a yaa fiaa lɛ kpa a, Paulo de ta buli a nɔkɔtɔma a nɛ e daa si ngɛ lejɛ ɔ ke: “Ke a bui Roma no ko fɔ* ɔ, anɛ mlaa ngmɛɔ blɔ kaa a fiaa lɛ kpa lo?” 26 Benɛ ta buli a nɔkɔtɔma a nu nɔ́ nɛ ɔ, e ya ta buli a nyatsɛ ngua a ngɔ nɛ e ya de lɛ ke: “Mɛni o to o yi mi kaa o maa pee ɔ? Ejakaa Roma no ji nyumu ɔ.” 27 Enɛ ɔ he ɔ, ta buli a nyatsɛ ngua a hɛ lɛ kɛ su Paulo he nɛ e bi lɛ ke: “Mo de mi, anɛ Roma no ji mo lo?” E ha heto ke: “Ee.” 28 Ta buli a nyatsɛ ngua a de lɛ ke: “I kɛ sika babauu nitsɛ nɛ he ma mi no peemi he blɔ nɛ ɔmɛ.” Paulo de ke: “Se imi lɛɛ a fɔ mi Roma no.”

29 Enɛ ɔ he ɔ, oya nɔuu nɛ nyumu ɔmɛ nɛ jinɛ a ma lɛ piimi konɛ a kɛ bi lɛ e nya mi ɔ ya senyasenya nɛ a je e he kɛ ho; nɛ ta buli a nyatsɛ ngua a ye gbeye benɛ e ná le kaa Roma no ji lɛ nɛ e wo lɛ kɔsɔkɔsɔ ɔ.

30 Enɛ ɔ he ɔ, e nɔ jena a, akɛnɛ e suɔ nɛ e le nɔ́ tutuutu he je nɛ Yuda bi ɔmɛ ngɛ Paulo nya poe he je ɔ, e je lɛ, nɛ e fã osɔfo nikɔtɔma amɛ kɛ Sanhedri bi ɔmɛ tsuo kaa a bua a he nya. Lɔ ɔ se ɔ, e ngɔ Paulo kɛ kple kɛ ba nɛ e ha nɛ e ya da si ngɛ a kpɛti.

23 Benɛ Paulo hyɛ Sanhedri bi ɔmɛ a hɛ mi kɛ kpe ɔ, e de ke: “Nyumuhi, nyɛmimɛ, i kɛ he nile nɛ bui mi fɔ kulaa ba ye je mi ngɛ Mawu hɛ mi kɛ ba si mwɔnɛ ɔ ligbi nɛ ɔ.” 2 Kɛkɛ nɛ Anania nɛ ji osɔfo nɔkɔtɔma pe kulaa a fã nihi nɛ a daa si ngɛ e kasa nya a ke a gba e nya nɔ ma. 3 Kɛkɛ nɛ Paulo de lɛ ke: “Mawu maa fia mo nɔ́, mo gbogbo nɛ a kpa he kalo. Mo nɛ́ o hii si nɛ o ngɛ mi kojoe ngɛ Mlaa a nya a, anɛ mo nɔuu o ngɛ Mlaa a nɔ tɔ̃e nɛ o ngɛ fãe ke a fia mi nɔ́ lo?” 4 Nihi nɛ a daa si ngɛ lejɛ ɔ de ke: “Anɛ o ngɛ Mawu we osɔfo nɔkɔtɔma pe kulaa a jɛe lo?” 5 Nɛ Paulo de ke: “Nyɛmimɛ, i li kaa osɔfo nɔkɔtɔma pe kulaa ji lɛ. Ejakaa a ngma ke, ‘E sɛ nɛ o tu o ma mi bi ɔmɛ a nɔ yelɔ ko he munyu yayami.’”

6 Jehanɛ ɔ, benɛ Paulo yɔse kaa fã kake ji Saduki bi, nɛ fã kake hu ji Farisi bi ɔ, e kpa ngmlaa kɛ de ngɛ Sanhedri bi ɔmɛ a hɛ mi ke: “Nyumuhi, nyɛmimɛ, Farisi no ji mi, nɛ Farisi bi a binyumu ji mi. Gbogboehi a si tlemi ɔ he hɛ kɛ nɔ fɔmi he je nɛ a ngɛ mi kojoe ngɛ nɛ ɔ nɛ.” 7 Enɛ ɔ nɛ e de ɔ he je ɔ, pɛ te si ngɛ Farisi bi ɔmɛ kɛ Saduki bi ɔmɛ a kpɛti, nɛ kpe ɔ mi gba. 8 Ejakaa Saduki bi ɔmɛ deɔ kaa gbogboehi a si tlemi ko be, nɛ jã kɛ̃ nɛ hiɔwe bɔfo ko aloo mumi ko hu be, se Farisi bi ɔmɛ lɛɛ a kplɛɛɔ ní nɛ ɔmɛ tsuo a nɔ.* 9 Lɔ ɔ he ɔ, hoo peemi nɛ nya wa te si, Farisi bi ɔmɛ a kuu ɔ mi womi ngmali komɛ te si nɛ a bɔni atsinyɛ jemi wawɛɛ ke: “Wa nɛ tɔmi ko ngɛ nyumu nɛ ɔ he, se ke mumi ko loo hiɔwe bɔfo ko kɛ lɛ tu munyu ɔ—.” 10 Jehanɛ ɔ, benɛ pɛ ɔ mi ba wa wawɛɛ ɔ, ta buli a nyatsɛ ngua a ye gbeye kaa eko ɔ, a ma tsɔtslɔɔ Paulo mi, nɛ e fã ta buli ɔmɛ kaa a kple si nɛ a ya sa lɛ ngɛ a kpɛti nɛ a ngɔ lɛ kɛ ba ta buli ɔmɛ a hi he ɔ.

11 Se jamɛ a nyɔ ɔ mi ɔ, Nyɔmtsɛ ɔ ba da si ngɛ e kasa nya nɛ e de lɛ ke: “Koo ye tsui! Ejakaa kaa bɔ nɛ o ngɛ ye he odase yee wawɛɛ ngɛ Yerusalɛm ɔ, jã kɛ̃ nɛ e sa nɛ o ya ye odase ngɛ Roma.”

12 Benɛ je na a, Yuda bi ɔmɛ so nɛ a kã a he kita kaa a be nɔ́ ko yee, nɛ a be nɔ́ ko hu nue kɛ yaa si be nɛ a maa gbe Paulo. 13 Nyumuhi nɛ a he hiɛ pe 40 lɛ a so nɛ a kã kita nɛ ɔ nɛ. 14 Nyumu nɛ ɔmɛ ya osɔfo nikɔtɔma amɛ kɛ nikɔtɔma amɛ a ngɔ, nɛ a ya de mɛ ke: “Wa so nɛ wa kã kita veveeve kaa wa be nɔ́ ko nɔ́ ko yee kɛ yaa si be nɛ wa maa gbe Paulo. 15 Lɔ ɔ he ɔ, amlɔ nɛ ɔ, nyɛɛ kɛ Sanhedri ɔ tsuo nyɛ de ta buli a nyatsɛ ngua a kaa e ngɔ lɛ kɛ kple kɛ ba nyɛ ngɔ kaa nɔ́ nɛ nyɛ suɔ nɛ nyɛ maa hyɛ e sane ɔ mi fitsofitso pe kekle ɔ. Se loko e maa su nyɛ ngɔ ɔ, wa maa pee klaalo kaa wa maa tane e yi.”

16 Se Paulo nyɛmiyo binyumu ko nu kaa a ngɛ blɔ nya toe nɛ a maa wo ka, nɛ e sɛ ta buli ɔmɛ a hi he ɔ, nɛ e ya bɔ Paulo amaniɛ. 17 Kɛkɛ nɛ Paulo tsɛ ta buli a nikɔtɔma amɛ a kpɛti nɔ kake, nɛ e de lɛ ke: “Moo ngɔ niheyo nɛ ɔ kɛ ya ta buli a nyatsɛ ngua a ngɔ, ejakaa e ngɛ nɔ́ ko nɛ e ma de lɛ.” 18 Enɛ ɔ he ɔ, e ngɔ niheyo ɔ kɛ ya ta buli a nyatsɛ ngua a ngɔ, nɛ e de lɛ ke: “Paulo, nɔ nɛ a wo lɛ tsu ɔ tsɛ mi nɛ e de mi ke ma ngɔ niheyo nɛ ɔ kɛ ba o ngɔ, ejakaa e ngɛ nɔ́ ko nɛ e ma de mo.” 19 Ta buli a nyatsɛ ngua a pɛtɛ e nine he nɛ e kɛ lɛ pɛ a tsɔ a he banee, nɛ e bi lɛ ke: “Mɛni o ngɛ nɛ o ma de mi?” 20 E de ke: “Yuda bi ɔmɛ pee a nya kake konɛ a bi mo nɛ o ngɔ Paulo kɛ kple kɛ ba Sanhedri ɔ hwɔɔ, kaa nɔ́ nɛ a juɛmi ji kaa a maa le e sane ɔ mi fitsofitso pe kekle ɔ. 21 Se mo ko ha nɛ a plɛ o yi mi, ejakaa nyumuhi nɛ a he hiɛ pe 40 ngɛ mlɛe nɛ a ma tua lɛ, nɛ a kã a he kita kaa a be nɔ́ ko yee, nɛ a be nɔ́ ko hu nue kɛ yaa si be nɛ a maa gbe lɛ; nɛ amlɔ nɛ ɔ, a pee klaalo, nɛ a ngɛ si nɛ o maa wo mɛ ɔ mlɛe.” 22 Enɛ ɔ he ɔ, ta buli a nyatsɛ ngua a ha nɛ niheyo ɔ ho, nɛ e fã lɛ ke: “Ko ya de nɔ ko nɔ ko kaa o ba bɔ mi amaniɛ nɛ ɔ.”

23 Nɛ e tsɛ ta buli a nikɔtɔma amɛ a kpɛti ni enyɔ nɛ e de mɛ ke: “Ngɛ gbɔkuɛ ngmlɛfia etɛne* ɔ mi ɔ, nyɛ ha nɛ ta buli 200 nɛ a dla a he nɛ a bɔ sala kɛ ya Kaisarea, kɛ okpɔngɔ nɔ hili 70 kɛ akplɔ hɛɛli 200 hulɔ. 24 Jehanɛ hu ɔ, nyɛ dla okpɔngɔhi kɛ ha Paulo nɛ e hi a nɔ, nɛ nyɛɛ ngɔ lɛ kɛ ya ha amlaalo Fɛlis slɔkee.” 25 Nɛ e ngma sɛ womi kɛ e mi munyu nɛ ɔmɛ:

26 “Klaudio Lisia kɛ ya ha Amlaalo Kpakpa Fɛlis: I biɔ mo! 27 Yuda bi ɔmɛ nu nyumu nɛ ɔ nɛ jinɛ a ma lɛ gbemi, se i kɛ ye ta buli ɔmɛ ba oya nɔuu nɛ wa ba kpɔ̃ lɛ, ejakaa i ná le kaa Roma no ji lɛ. 28 Nɛ benɛ i ngɛ hlae nɛ ma le nɔ́ he je nɛ a ngɛ e nya poe ɔ, i ngɔ lɛ kɛ kple kɛ ya a Sanhedri ɔ. 29 Nɛ i na kaa sanehi nɛ kɔɔ a Mlaa a he ɔ he je nɛ a po e nya a nɛ, se sanehi nɛ a po kɛ fɔ e nɔ ɔ ekoeko be nɛ e tsɔɔ kaa e sa gbenɔ loo tsu womi. 30 Se akɛnɛ i ná le kaa a so ngɔ wo e he he je ɔ, i ngɛ lɛ blɔ woe oya nɔuu kɛ ma o ngɔ, nɛ i ngɛ nihi nɛ a po e nya a fãe kaa a ba po e nya ngɛ o hɛ mi.”

31 Enɛ ɔ he ɔ, ta buli nɛ ɔmɛ ngɔ Paulo kaa bɔ nɛ a fã mɛ ɔ, nɛ a ngɔ lɛ kɛ ba Antipatris nyɔ ɔ mi. 32 E nɔ jena a, a ngmɛ okpɔngɔ nɔ hili ɔmɛ blɔ kaa a kɛ lɛ nɛ tsa nɔ kɛ ya, se mɛɛ lɛɛ a kpale kɛ ba ta buli ɔmɛ a hi he ɔ. 33 Okpɔngɔ nɔ hili ɔmɛ sɛ Kaisarea nɛ a ngɔ sɛ womi ɔ kɛ ya ha amlaalo ɔ, nɛ a ngɔ Paulo hu kɛ wo e dɛ mi. 34 Enɛ ɔ he ɔ, e kane sɛ womi ɔ nɛ e bi kaa mɛni kpokpa nɔ Paulo je, nɛ e ná le kaa e je Kilikia. 35 E de lɛ ke: “Ke nihi nɛ a ngɛ o nya poe ɔ ba a, ma bu mo tue saminya.” Nɛ e fã ke buli nɛ a bu e he ngɛ Hɛrode matsɛ we ɔ.*

24 Ligbi enuɔ se ɔ, Anania, nɛ ji osɔfo nɔkɔtɔma pe kulaa a kɛ nikɔtɔma komɛ kɛ nyumu ko nɛ e tuɔ munyu kɛ haa nihi ngɛ ma hɛ mi* nɛ a tsɛɛ lɛ ke Tɛtulo ɔ kple kɛ ba, nɛ a ba po Paulo nya ngɛ amlaalo ɔ hɛ mi. 2 Benɛ a tsɛ lɛ ɔ, Tɛtulo bɔni e nya pomi ke:

“Akɛnɛ wa ná tue mi jɔmi babauu kɛ gu o nɔ, nɛ níhi nɛ o hyɛɔ kɛ yaa tsitsaa a hu ngɔ tsakemihi kɛ ngɛ ma nɛ ɔ mi bae he je ɔ, 3 be fɛɛ be kɛ he fɛɛ he nɛ wa ngɛ ɔ, wa tuɔ nɔ́ nɛ ɔ he munyu, nɛ wa naa mo si wawɛɛ, Wa Nɔmo Fɛlis. 4 Se bɔ nɛ pee nɛ ma ko puɛ o be fuu he je ɔ, i kpa mo pɛɛ nɛ o bu wɔ tue kpiti ko ngɛ o mi mi himi ɔ nya. 5 Ejakaa wa na nyumu nɛ ɔ kaa e ji lohwe nɔ́ puɛlɔ,* nɛ e ngɛ atua tsɔmi si tlee ngɛ Yuda bi tsuo nɛ a ngɛ zugba a nɔ hehi tsuo nɛ nimli ngɛ ɔmɛ a kpɛti, nɛ e ji Nazarɛt bi ɔmɛ a jami kuu ɔ nya dalɔ. 6 Jehanɛ se hu ɔ, e ka kaa e ma ble sɔlemi we ɔ, enɛ ɔ he ɔ, wa nu lɛ. 7 —— 8 Ke mo nitsɛ o bi lɛ e nya mi ɔ, o maa na munyu nɛ ɔmɛ tsuo nɛ waa kɛ ngɛ e nya poe ɔ.”

9 Kɛkɛ nɛ Yuda bi ɔmɛ hu fĩ e se, nɛ a ngɛ dee ke ní nɛ ɔmɛ tsuo ngɛ mi niinɛ. 10 Benɛ amlaalo ɔ ngɔ e yi kɛ pee okadi kɛ tsɔɔ Paulo kaa e tu munyu ɔ, e he nɔ ke:

“Akɛnɛ i le wawɛɛ kaa o kojo ma nɛ ɔ jehahi babauu he je ɔ, e ngɔ ye nya kaa ma je imi nitsɛ ye nya. 11 Ke mo nitsɛ o hla mi ɔ, o maa na kaa benɛ i kuɔ kɛ ho Yerusalɛm ya nɛ ma ya ja Mawu ɔ, ligbi 12 bi lolo; 12 nɛ a nɛ kaa i kɛ nɔ ko ngɛ atsinyɛ jee ngɛ sɔlemi we ɔ, aloo i ngɛ nihi a yi mi woe konɛ a pee basabasa ngɛ kpe he ɔmɛ aloo ma a mi. 13 Jã kɛ̃ nɛ amlɔ nɛ ɔ, a be nyɛe maa ma munyuhi nɛ a kɛ ngɛ ye nya poe ɔmɛ a nɔ mi ha mo. 14 Se enɛ ɔ lɛɛ i kplɛɛ nɔ ngɛ o hɛ mi, kaa i baa ye je mi ngɛ nɔ́ nɛ a ngɛ tsɛe ke jami kuu ko ɔ nya, nɛ jamɛ a blɔ ɔ nɔ nɛ i guɔ kɛ jaa ye nɛmɛ ɔmɛ a Mawu ɔ ngɛ blɔ klɔuu nɔ, kaa bɔ nɛ i heɔ níhi tsuo nɛ a ngma ngɛ Mlaa a kɛ Gbali ɔmɛ a mi ɔ yeɔ ɔ. 15 Nɛ i ngɛ hɛ kɛ nɔ fɔmi ngɛ Mawu mi, nɛ jamɛ a hɛ kɛ nɔ fɔmi ɔ nɔuu nɛ nyumu nɛ ɔmɛ hu ngɛ blɔ hyɛe, kaa a ma tle nihi nɛ a da kɛ nihi nɛ a dɛ tsuo si kɛ je gbeje. 16 Enɛ ɔ he ɔ, be fɛɛ be ɔ, i bɔɔ mɔde wawɛɛ konɛ ye he nile nɛ e ko bu mi fɔ* ngɛ Mawu kɛ nimli a hɛ mi. 17 Jehanɛ ɔ, ngɛ jehahi fuu a se ɔ, i ba konɛ ma ngɔ mɔbɔ nami nike níhi kɛ ba ha ye ma a, konɛ ma ba sã afɔlehi. 18 Benɛ i ngɛ ní nɛ ɔmɛ a he ní tsue ɔ, a na mi ngɛ sɔlemi we ɔ nɛ ye he tsɔ ngɛ kusumi nya, se a nɛ i kɛ asafo kuu ko aloo kaa i ha nɛ nihi ngɛ basabasa pee. Mohu ɔ, Yuda bi komɛ nɛ a je Asia kpokpa a nɔ ɔ ngɛ lejɛ ɔ, 19 jinɛ mɛ lɛ e sa kaa a ko ba o hɛ mi konɛ ke a ngɛ nɔ́ ko kɛ si mi niinɛ ɔ, nɛ a ba de. 20 Aloo ha nɛ nyumu nɛ ɔmɛ nitsɛmɛ nɛ a ngɛ hiɛ ɔ nɛ a tsɔɔ tɔ̃mi nɛ a na benɛ i ya da Sanhedri ɔ hɛ mi ɔ, 21 lɛɛ nɔ́ kake pɛ nɛ a ma nyɛ ma de ji kaa benɛ i daa si ngɛ a kpɛti ɔ, i kpa ngmlaa kɛ de ke: ‘Gbogboehi a si tlemi ɔ he je nɛ a ngɛ mi kojoe ngɛ nyɛ hɛ mi ɔ nɛ!’”

22 Se akɛnɛ Fɛlis le Blɔ nɛ ɔ he sanehi fuu he je ɔ, e tsɛ̃ a munyu ɔ ngɔ to, nɛ e de ke: “Be fɛɛ be nɛ Lisia nɛ ji ta buli a nyatsɛ ngua a ma kple kɛ ba a, ma ma nyɛ sane nɛ ɔmɛ a nya si.” 23 Nɛ e fã ta buli a nɔkɔtɔma a kaa e ha nɛ a wo nyumu ɔ tsu, se a ha nɛ́ e ye e he bɔɔ, nɛ́ a ngmɛ e we bi ɔmɛ blɔ nɛ a ba tsu e hiami níhi ha lɛ.

24 Ligbi komɛ a se ɔ, Fɛlis kɛ e yo Drusila nɛ e ji Yuda no ɔ ba, nɛ e tsɔ nɛ a ya tsɛ Paulo kɛ ba, nɛ e bu Kristo Yesu mi hemi kɛ yemi ɔ he munyu nɛ e tu ɔ tue. 25 Se benɛ Paulo ngɛ dami kɛ he nɔ yemi kɛ kojomi nɛ ma a he munyu tue ɔ, Fɛlis ye gbeye nɛ e de lɛ ke: “Moo ya lolo, se ke i ná he blɔ ɔ, ma tsɔ nɛ a ba tsɛ mo kɛ ba ekohu.” 26 Jamɛ a be ɔ mi nɔuu ɔ, e ngɛ blɔ hyɛe kaa Paulo ma ha lɛ sika. Enɛ ɔ he ɔ, e tsɔɔ kɛ ya tsɛɔ lɛ kɛ baa kpitikpiti nɛ e kɛ lɛ ba sɛɛɔ ní. 27 Se jeha enyɔ se ɔ, Pɔkio Fɛsto ba ye Fɛlis se; nɛ akɛnɛ Fɛlis suɔ kaa e maa sa Yuda bi ɔmɛ a hɛ mi he je ɔ, e si Paulo ngɛ tsu ɔ mi.

25 Lɔ ɔ he ɔ, benɛ Fɛsto ba kpokpa a mi nɛ e bɔni nɔ yemi ɔ, ligbi etɛ se ɔ, e je Kaisarea nɛ e kuɔ kɛ ho Yerusalɛm ya. 2 Nɛ osɔfo nikɔtɔma amɛ kɛ Yuda bi ɔmɛ a kpɛti nyumuhi nɛ a hɛɛ blɔ nya a po Paulo nya kɛ ha lɛ. Enɛ ɔ he ɔ, a bɔni Fɛsto pɛɛ kpami 3 kaa e pee mɛ kpakpa* nɛ e tsɔ nɛ a ya ngɔ Paulo kɛ ba Yerusalɛm. Se a to a yi mi kaa a maa wo Paulo he ka, nɛ a maa gbe lɛ ngɛ blɔ ɔ nɔ. 4 Se Fɛsto he nɔ nɛ e tsɔɔ kaa a tsi Paulo nya ngɛ Kaisarea, ejakaa lɛ nitsɛ e maa kpale e se kɛ ya lejɛ ɔ ngɛ be kpiti mi. 5 E de ke: “Lɔ ɔ he ɔ, nyɛ ha nɛ nihi nɛ a hɛɛ blɔ nya ngɛ nyɛ kpɛti ɔ nɛ a ba nɛ wa kple kɛ ho, konɛ ke niinɛ nɛ nyumu ɔ pee nɔ́ yayami ko ɔ, nɛ a ba po e nya.”

6 Enɛ ɔ he ɔ, benɛ e ye maa pee ligbi kpaanyɔ aloo ligbi nyɔngma ngɛ a kpɛti ɔ, e kple kɛ ho Kaisarea ya, nɛ e nɔ jena a, e ya hi kojomi sɛ ɔ nɔ, nɛ e fã ke a ya ngɔ Paulo kɛ ba. 7 Benɛ e ba a, Yuda bi ɔmɛ nɛ a kple kɛ je Yerusalɛm kɛ ba a ba da si kɛ bɔle lɛ, nɛ a po munyu nguanguahi kɛ fɔ e nɔ, se a nyɛ we nɛ a ma nɔ mi.

8 Se Paulo de kɛ fã e he ke: “I pee we yayami ko kɛ si we Yuda bi ɔmɛ a Mlaa a aloo sɔlemi we ɔ aloo Kaisare.” 9 Akɛnɛ Fɛsto ngɛ hlae nɛ e sa Yuda bi ɔmɛ a hɛ mi he je ɔ, e he nɔ nɛ e bi Paulo ke: “Anɛ o suɔ kaa o maa kuɔ kɛ ya Yerusalɛm konɛ a ya kojo mo ngɛ ye hɛ mi ngɛ lejɛ ɔ ngɛ ní nɛ ɔmɛ a he lo?” 10 Se Paulo de ke: “I daa si ngɛ Kaisare kojomi sɛ ɔ hɛ mi, he nɛ e sa kaa a kojo mi ngɛ ɔ. I pee we Yuda bi ɔmɛ yayami ko kaa bɔ nɛ mo nitsɛ hu o le saminya a. 11 Ke niinɛ nɛ i pee yayami ko aloo i pee nɔ́ ko nɛ e sa gbenɔ ɔ, lɛɛ i de we ke a ko gbe mi; se ke nɔ mi mami ko be munyuhi nɛ nyumu nɛ ɔmɛ po kɛ fɔ ye nɔ ɔ mi ɔ, adesa ko be he blɔ kaa e maa ngɔ mi kɛ wo a dɛ mi konɛ e kɛ sa a hɛ mi. I ngɔ ye sane ɔ kɛ ha Kaisare!” 12 Kɛkɛ nɛ benɛ Fɛsto kɛ e ga woli ɔmɛ tu munyu ta a, e he nɔ ke: “Akɛnɛ o ngɔ o sane ɔ kɛ ha Kaisare he je ɔ, Kaisare ngɔ nɛ o maa ya.”

13 Ligbi komɛ a se ɔ, Agripa nɛ ji matsɛ ɔ kɛ Bɛnis ba Kaisarea nɛ a ba slaa Fɛsto konɛ a ha lɛ manye. 14 Akɛnɛ a se maa kɛ bɔɔ ngɛ lejɛ ɔ he je ɔ, Fɛsto ngɔ Paulo sane ɔ kɛ pue matsɛ ɔ hɛ mi, nɛ e de ke:

“Nyumu ko ngɛ hiɛ ɔ nɛ Fɛlis wo lɛ tsu nɛ e je e he, 15 nɛ benɛ i ngɛ Yerusalɛm ɔ, osɔfo nikɔtɔma amɛ kɛ Yuda bi ɔmɛ a nikɔtɔma amɛ ngɔ e he sane kɛ ba ha mi, nɛ a ngɛ bie kaa ma bu lɛ fɔ. 16 Se i he nɔ nɛ i de mɛ kaa ngɛ Roma bi a kusumi nya a, a be nyɛe maa ngɔ nɔ ko kɛ ha konɛ a kɛ sa nihi a hɛ mi kaa ja nɔ nɛ a po e nya a kɛ nihi nɛ a po e nya a kpe hɛ mi kɛ hɛ mi, nɛ nɔ ɔ ná he blɔ nɛ e je e nya ngɛ sane nɛ a po ngɔ fɔ e nɔ ɔ he. 17 Enɛ ɔ he ɔ, benɛ a ba hiɛ ɔ, i gbla we ye nane si kulaa, mohu ɔ, e nɔ jena a, i hi si ngɛ kojomi sɛ ɔ nɔ, nɛ i fã kaa a ya ngɔ nyumu ɔ kɛ ba. 18 Nihi nɛ a po e nya a ba da si, se pi munyu yayahi nɛ i susu ɔ ekoeko nɛ a kɛ po e nya. 19 Mɛ nitsɛmɛ a mawu jami he sane komɛ kɛ nyumu ko nɛ a tsɛɛ lɛ ke Yesu nɛ e gbo, se Paulo lɛɛ e tsɔɔ kaa e ngɛ wami mi ɔ he sanehi mohu nɛ a kɛ ba. 20 Akɛnɛ i li blɔ nɔ nɛ ma gu kɛ tsu sane nɛ ɔ he ní he je ɔ, i bi lɛ ke ji kaa e maa suɔ kaa e maa ya Yerusalɛm konɛ a ya kojo lɛ ngɛ sane nɛ ɔmɛ a he ngɛ lejɛ ɔ. 21 Se benɛ Paulo bi kaa a ha nɛ e hi tsu ɔ mi kɛ yaa si be nɛ Matsɛ Ngua a* maa hyɛ e sane ɔ mi ha lɛ ɔ, i fã ke a ngɔ lɛ kɛ to kɛ yaa si be nɛ ma wo lɛ blɔ kɛ ya ha Kaisare.”

22 Kɛkɛ nɛ Agripa de Fɛsto ke: “I suɔ nɛ imi nitsɛ ma bu nyumu ɔ tue.” E de ke: “O maa bu lɛ tue hwɔɔ.” 23 Enɛ ɔ he ɔ, e nɔ jena a, Agripa kɛ Bɛnis dla a he saminya, nɛ a ba sɛ tsu nɛ a yeɔ sane ngɛ mi ɔ mi, nɛ ta buli a nyatsɛ nguahi kɛ nyumuhi nɛ a he biɛ ngɛ ma a mi hu piɛɛ a he; nɛ Fɛsto fã nɛ a ya ngɔ Paulo kɛ ba. 24 Nɛ Fɛsto de ke: “Matsɛ Agripa kɛ nyɛ nihi tsuo nɛ waa kɛ nyɛ ngɛ hiɛ ɔ, nyɛ ngɛ nyumu nɛ ɔ hyɛe, ngɛ Yerusalɛm kɛ hiɛ ɔ tsuo ɔ, Yuda bi ɔmɛ tsuo ngɛ mi pɛɛ kpae nɛ a ngɛ ngmlaa kpae kaa e sɛ nɛ e hi wami mi hu. 25 Se imi lɛɛ i na kaa e pee we nɔ́ ko nɛ e sa gbenɔ. Lɔ ɔ he ɔ, benɛ nyumu nɛ ɔ ngɔ e sane ɔ kɛ ha Matsɛ Ngua a, i pee ye juɛmi kaa ma wo lɛ blɔ kɛ ho. 26 Se i li nɔ́ tutuutu nɛ ma ngma ngɛ e he kɛ ya ha ye Nyɔmtsɛ ɔ. Enɛ ɔ he ɔ, i ngɔ lɛ kɛ ba nyɛ tsuo nyɛ hɛ mi, titli ɔ, mo Matsɛ Agripa o hɛ mi, konɛ ke o bi lɛ e nya mi ta a, nɛ ma ná nɔ́ ko nɛ ma ngma. 27 Ejakaa e peeɔ mi kaa sisi numi be he kaa ma wo nɔ ko nɛ a wo lɛ tsu ɔ blɔ nɛ i be munyuhi nɛ a po kɛ fɔ e nɔ ɔ tsɔɔe.”

26 Agripa de Paulo ke: “A ngmɛ mo blɔ nɛ o tu munyu kɛ je o nya.” Kɛkɛ nɛ Paulo kpa e nine mi nɛ e bɔni e he fami ke:

2 “Matsɛ Agripa, ye bua jɔ kaa o hɛ mi nɛ i ma ye he fami ngɛ mwɔnɛ ɔ ligbi nɛ ɔ ngɛ níhi tsuo nɛ Yuda bi ɔmɛ ngɛ ye nya poe ngɛ a he ɔ he, 3 titli ɔ, akɛnɛ o le Yuda bi ɔmɛ a kusumi ɔmɛ kɛ níhi nɛ a jeɔ he atsinyɛ ɔ tsuo saminya a he je. Enɛ ɔ he ɔ, i kpa mo pɛɛ nɛ o to o tsui si nɛ o bu mi tue.

4 “Ngɛ anɔkuale mi ɔ, bɔ nɛ i ba ye je mi ha ngɛ ye we bi ɔmɛ a kpɛti* kɛ je ye nihe mi tɔɔ ɔ, Yuda bi ɔmɛ tsuo nɛ a le mi be ko nɛ be ɔ le enɛ ɔ saminya. 5 Ni nɛmɛ nɛ a le mi be ko nɛ be ɔ le wawɛɛ kaa i ba ye je mi ngɛ wa jami ɔ mi kuu nɛ e ngɛ veveeve pe kulaa a nya kaa Farisi no, nɛ ke a suɔ ɔ, a ma nyɛ maa ye enɛ ɔ he odase. 6 Se amlɔ nɛ ɔ, ngɛ si nɛ wa nɛmɛ ɔmɛ a Mawu ɔ wo ɔ he hɛ kɛ nɔ fɔmi ɔ he je ɔ, i daa si nɛ a ngɛ mi kojoe; 7 si womi nɛ ɔ nɔuu lɛ wa wɛtso 12 ɔmɛ ngɛ blɔ hyɛe kaa e maa ba mi, nɛ a ja lɛ wawɛɛ nyɔ kɛ pia ngɛ blɔ klɔuu nɔ ɔ nɛ. Oo Matsɛ, hɛ kɛ nɔ fɔmi nɛ ɔ he je nɛ Yuda bi ɔmɛ ngɛ ye nya poe ngɛ ɔ nɛ.

8 “Mɛni he je nɛ nyɛ susuɔ he* ngɛ nyɛ kpɛti kaa a be nyɛe ma he ye kaa Mawu tleɔ ni gbogboehi a si ɔ? 9 Imi hu i ná nɔ mi mami kaa e sa nɛ ma pee níhi fuu kɛ te si kɛ wo Yesu, Nazarɛt no ɔ biɛ ɔ. 10 Jã pɛpɛɛpɛ nɛ i pee ngɛ Yerusalɛm, nɛ i wo ni klɔuklɔu ɔmɛ a ti nihi fuu tsu, ejakaa i ná he wami ɔ kɛ je osɔfo nikɔtɔma amɛ a ngɔ; nɛ benɛ a maa gbe mɛ ɔ, i fĩ se. 11 Nɛ i pɔɔ a tue gblami ngɛ kpe he ɔmɛ tsuo, nɛ i bɔ mɔde kaa ma nyɛ a nɔ nɛ a ngmɛɛ a hemi kɛ yemi ɔ he; nɛ akɛnɛ ye mi mi fu mɛ wawɛɛ he je ɔ, i ya ma se mahi po a mi nɛ i ya wa mɛ yi mi ngɛ lejɛ ɔmɛ hulɔ.

12 “Be mi nɛ i ngɛ nɔ́ nɛ ɔ pee ɔ, i pue nɔ kɛ yaa Damasko ngɛ osɔfo nikɔtɔma amɛ a he wami kɛ a tsɔmi nya, 13 Oo Matsɛ, benɛ wa ngɛ blɔ ɔ nɔ kɛ yaa a, piani katakata a, la ko nɛ e nya wa pe pu la kpɛ kɛ je hiɔwe kɛ ba bɔle i kɛ nihi nɛ a piɛɛ ye he kɛ ngɛ blɔ ɔ hiae ɔ. 14 Nɛ benɛ wɔ tsuo wa nɔ si ngɛ zugba a, i nu gbi ko nɛ e de mi ngɛ Hebri gbi mi ke: ‘Saulo, Saulo, mɛni he je nɛ o ngɛ mi yi mi wae ɔ? Ke o ya nɔ nɛ o ngɛ lohwehi a tsɔ̃mi tso* ɔmɛ atia sie ɔ, o maa ye o he awi.’ 15 Se i bi ke: ‘Nyɔmtsɛ, mo mɛnɔ?’ Nɛ e de mi ke: ‘Imi ji Yesu, nɔ nɛ o ngɛ lɛ yi mi wae ɔ nɛ. 16 Se tee si kɛ da o nane nɔ. Enɛ ɔ he nɛ i je ye he kpo kɛ tsɔɔ mo ɔ nɛ, konɛ ma hla mo kaa níhi nɛ o na momo kɛ níhi nɛ ma ha nɛ o maa na ngɛ ye he ɔ tsuo a he sɔmɔlɔ kɛ odase yelɔ. 17 Nɛ ma kpɔ̃ mo ngɛ nimli nɛ ɔmɛ, kɛ je ma amɛ nɛ i ngɛ mo a ngɔ tsɔe ɔmɛ a dɛ mi 18 konɛ o bli a hɛ ngmɛ, nɛ o kpale mɛ kɛ je diblii mi kɛ ba la he, nɛ o je mɛ kɛ je Satan he wami ɔ sisi kɛ ba Mawu ngɔ, konɛ a ná yayami pami, kɛ gbosi ní ngɛ nihi nɛ a kɛ hemi kɛ yemi nɛ a ná ngɛ ye mi ɔ tsu a he ɔmɛ a kpɛti.’

19 “Enɛ ɔ he ɔ, Matsɛ Agripa, i gbo we hiɔwe nina a tue, 20 mohu ɔ, i ngɔ sɛ gbi ɔ nɛ tsɔɔ kaa e sa nɛ nihi nɛ a tsake a tsui, nɛ a kpale kɛ ba Mawu ngɔ kɛ gu níhi nɛ tsɔɔ kaa a tsake a tsui nɛ a maa pee ɔ nɔ ɔ kɛ ya ha nihi nɛ a ngɛ Damasko ɔ kekle, nɛ lɔ ɔ se ɔ, nihi nɛ a ngɛ Yerusalɛm, kɛ nihi nɛ a ngɛ mahi tsuo nɛ a ngɛ Yudea, kɛ je ma amɛ a mi ɔ hulɔ. 21 Enɛ ɔ he je nɛ Yuda bi ɔmɛ nu mi ngɛ sɔlemi we ɔ nɛ a bɔ mɔde kaa a maa gbe mi ɔ nɛ. 22 Se ngɛ Mawu yemi kɛ buami nya a, kɛ ba si mwɔnɛ ɔ ligbi nɛ ɔ, i ya nɔ nɛ i ngɛ nimli wawi kɛ nimli nguahi tsuo odase yee, nɛ i tu we munyu kpa ko kaa ja níhi nɛ gbali ɔmɛ kɛ Mose tsɔɔ kaa e maa ba a pɛ— 23 kaa Kristo ɔ maa na amanehlu, nɛ lɛ nɛ e maa pee kekleekle nɔ nɛ a ma tle lɛ si kɛ je gbeje, nɛ e maa jaje la kɛ ha nimli nɛ ɔmɛ kɛ je ma amɛ tsuo.”

24 Jehanɛ ɔ, benɛ Paulo ngɛ ní nɛ ɔmɛ dee kɛ ngɛ e he fãe ɔ, Fɛsto kɛ gbi nɛ nya wa de ke: “Paulo, o yi ngɛ puɛe! Womi kasemi sɔuu ha nɛ o yi ngɛ puɛe!” 25 Se Paulo de ke: “Wa Nɔmo Fɛsto, pi nɛ ye yi ngɛ puɛe, mohu ɔ, i ngɛ anɔkuale munyu tue kɛ juɛmi nɛ e mi tsɔ. 26 Ngɛ anɔkuale mi ɔ, matsɛ ɔ nɛ i ngɛ munyu tue faa kɛ ngɛ lɛ tsɔɔe ɔ le ní nɛ ɔmɛ tsuo kulaa; i ngɛ nɔ mi mami kaa ní nɛ ɔmɛ a kpɛti kake ngmelu po be nɛ e li, ejakaa a pee we ní nɛ ɔmɛ ekoeko ngɛ kɔkɔɔ mi. 27 Matsɛ Agripa, anɛ o heɔ gbali ɔmɛ yeɔ lo? I le kaa o heɔ mɛ yeɔ.” 28 Se Agripa de Paulo ke: “Ngɛ be kpiti mi ɔ, o ma plɛ ye yi mi nɛ ma ba pee Kristofo no.” 29 Kɛkɛ nɛ Paulo de ke: “Ngɛ be kpiti mi jio, ngɛ be gagaa mi jio, i ná nɛ Mawu ha nɛ pi mo pɛ kɛkɛ, se mohu nihi tsuo nɛ a ngɛ mi tue bue mwɔnɛ ɔ ma ba pee kaa imi, se tsu pɛ lɛ a ko wo mɛ.”

30 Kɛkɛ nɛ matsɛ ɔ te si, nɛ amlaalo ɔ kɛ Bɛnis kɛ nyumuhi nɛ a piɛɛ a he kɛ hii si ɔ hu te si. 31 Se benɛ a yaa a, a bɔni a sibi demi ke: “Nyumu nɛ ɔ pee we nɔ́ ko nɛ e sa gbenɔ aloo tsu womi.” 32 Kɛkɛ nɛ Agripa de Fɛsto ke: “Kaa pi nɛ nyumu nɛ ɔ ngɔ e sane ɔ kɛ ha Kaisare ɔ, jinɛ a ko nyɛ ko ngmɛɛ e he.”

27 Jehanɛ ɔ, benɛ a mwɔ a yi mi kpɔ kaa waa ngɔ mele kɛ ya Italia a, a ngɔ Paulo kɛ nihi nɛ a wo mɛ tsu ɔ a ti ni komɛ kɛ wo ta buli a nɔkɔtɔma ko nɛ a tsɛɛ lɛ ke Yulio nɛ e ngɛ Ɔgɛsto tabo ɔ mi ɔ dɛ mi. 2 Benɛ wa sɛ mele ko nɛ e je Adramitio nɛ e be kɛe nɛ e maa gu woɔ nɔ kɛ ya gu mele si dami hehi nɛ a ngɛ wo ɔ nya ngɛ Asia kpokpa a nɔ ɔ mi ɔ, wa hia; Makedonia no ko nɛ a tsɛɛ lɛ ke Aristako nɛ e je Tɛsalonika a piɛɛ wa he. 3 E nɔ jena a, wa ya su Sidon, nɛ Yulio je mi mi jɔmi kpo kɛ tsɔɔ Paulo, nɛ e ngmɛ lɛ blɔ kaa e ya e huɛmɛ ɔmɛ a ngɔ konɛ a ya hyɛ e nɔ.

4 Nɛ benɛ wa je lejɛ ɔ nɛ wa nɔ wo ɔ nɔ ɔ, wa ya gu he ko nɛ ma ha nɛ Kipro nɛ po wa he piɛ kɛ je kɔɔhiɔ ɔ he, ejakaa wa ngɛ kɔɔhiɔ kpee. 5 Lɔ ɔ se ɔ, wa nyɛɛ wo gbajaa a hɛ mi kɛ be ngɛ Kilikia kɛ Pamfilia kɛ ba melehi a si dami he nɛ e ngɛ Mira ngɛ Likia a. 6 Ta buli a nɔkɔtɔma a na mele ko ngɛ lejɛ ɔ nɛ e je Alɛksandria nɛ e yaa Italia, nɛ e ha nɛ wa ya sɛ mi. 7 Nɛ benɛ wa nyɛɛ wo ɔ nɔ blɛuu be saii ɔ, wa gbo dengme kɛ ba su Kenido. Akɛnɛ kɔɔhiɔ ɔ ngmɛ́ wɔ blɔ nɛ waa ya wa hɛ mi he je ɔ, wa ya gu he ko nɛ ma ha nɛ Salmone nɛ e ngɛ Kreta a nɛ e po wa he piɛ kɛ je kɔɔhiɔ ɔ he. 8 Nɛ benɛ wa gbo dengme kɛ nyɛɛ wo ɔ nɔ ngɛ wo ɔ nya a, wa ba su he ko nɛ a tsɛɔ ke Lɛ Si Mwɔmi He Jɔjɔɛ, nɛ e kɛ Lasea ma a he kɛ we ɔ.

9 Be saii ba be, nɛ amlɔ nɛ ɔ, wo nɔ blɔ hiami ba pee oslaa, ejakaa Kpatami Ligbi ɔ nɔ hwɔ hami ɔ po be momo, enɛ ɔ he ɔ, Paulo wo mɛ ga 10 ke: “Nyumuhi, i na kaa wa ma gbo dengme, nɛ níhi hu ma bɔ wɔ ngɛ blɔ hiami nɛ ɔ mi, pi mele ɔ mi níhi kɛ mele ɔ kɛkɛ, se mohu wa wami* hulɔ.” 11 Se ta buli a nɔkɔtɔma a bu mele kudɔlɔ ɔ kɛ meletsɛ ɔ tue mohu pe nɔ́ nɛ Paulo ngɛ dee ɔ. 12 Akɛnɛ melehi a si dami he ɔ hí nɛ a be nyɛe maa ye ahlabata be ɔ ngɛ lejɛ ɔ he je ɔ, a ti nihi fuu wo ga ke a hia kɛ je lejɛ ɔ nɛ a hyɛ kaa a ma nyɛ ma ya su Fonise, Kreta melehi a si dami he ɔ nɛ e hɛ mi tsɔɔ yiti je ngɛ puje he blɔ kɛ woyi je ngɛ puje he blɔ ɔ lo, konɛ a ya ye ahlabata be ɔ ngɛ lejɛ ɔ.

13 Benɛ woyi je kɔɔhiɔ ɔ bɔni fiami blɛuu ɔ, a susu kaa a yi mi tomi ɔ ba mi, nɛ a wo osɛkɛ ɔ nɔ, nɛ a hia kɛ nyɛɛ wo ɔ nɔ kɛ be ngɛ Kreta wo ɔ nya haa. 14 Se e kɛ we kulaa nɛ kɔɔhiɔ nɛ nya wa ko nɛ a tsɛɔ ke Yurokilo* ɔ hia kɛ ba kpee mele ɔ. 15 Benɛ kɔɔhiɔ ɔ sɛ mele ɔ mi wawɛɛ nɛ mele ɔ nyɛ we nɛ e ya e hɛ mi hu ɔ, wa ngmɛɛ wa he kɛ ha kɔɔhiɔ ɔ nɛ e kɛ wɔ ho. 16 Kɛkɛ nɛ waa kɛ fo ya gu he ko, nɛ zugba kpɔ nyafii ko nɛ nyu bɔle lɛ nɛ a tsɛɔ ke Kauda a po wa he piɛ kɛ je kɔɔhiɔ ɔ he, nɛ dengmedengme loko wa nyɛ nɛ wa nu ahima* a nɛ ngɛ mele ɔ supa je ɔ kɛ da si. 17 Nɛ benɛ a wo nɔ kɛ ba mele ɔ mi ɔ, a kɛ níhi fĩ mele ɔ, nɛ akɛnɛ a ngɛ gbeye yee kaa eko ɔ, e ma ya sa Sɛɛtis* zia kpɔ ɔ nɔ he je ɔ, a gbe abalaa a, nɛ kɔɔhiɔ ɔ kɛ wɔ ho. 18 Akɛnɛ kɔɔhiɔ nɛ nya wa a ngɛ wɔ fiae kɛ ngɛ yae kɛ ngɛ bae he je ɔ, e nɔ jena a, a bɔni níhi nɛ ngɛ mele ɔ mi ɔ jemi kɛ bɔni wo ɔ mi womi. 19 Nɛ ligbi etɛne ɔ nɔ ɔ, a ngɔ mɛ nitsɛmɛ a ninehi kɛ je mele ɔ he ní ɔmɛ ngɔ pue he.

20 Benɛ wa nɛ pu loo dodoehi ligbihi fuu, nɛ́ kɔɔhiɔ nɛ nya wa ngɛ wɔ kpee ɔ,* hɛ kɛ nɔ fɔmi tsuo nɛ wa ngɛ kaa a ma he wa yi wami ɔ bɔni tami. 21 Benɛ a yi ní be saii ɔ, Paulo te si kɛ da si ngɛ a kpɛti, nɛ e de ke: “Nyumuhi, jinɛ e sa kaa nyɛ ko bu ga nɛ i wo nyɛ ɔ tue, nɛ wa ko nɔɛ wo ɔ nɔ kɛ ji Kreta kɛ bɛ, nɛ wa ko ba gbo we dengme nɛ ɔ, nɛ wa ní ɔmɛ hu a hɛ mi ko ba kpataa we kikɛ nɛ ɔ. 22 Se kɛ̃ ɔ, amlɔ nɛ ɔ, i ngɛ nyɛ he wami woe kaa nyɛ ná kã, ejakaa nyɛ ti nɔ kake ngmelu po* be laae, mele ɔ pɛ nɛ e ma puɛ. 23 Nyɔ nɛ ɔ mi ɔ, Mawu, nɔ nɛ e nɔ ji mi, nɔ nɛ i sɔmɔɔ lɛ ngɛ blɔ klɔuu nɔ ɔ bɔfo ko ba da si ngɛ ye kasa nya 24 nɛ e de ke: ‘Paulo, koo ye gbeye. E sa nɛ o ya da si ngɛ Kaisare hɛ mi, nɛ hyɛ! Mawu ngɔ nihi tsuo nɛ a piɛɛ o he ngɛ mele ɔ mi ɔ kɛ ke mo.’ 25 Lɔ ɔ he ɔ, nyumuhi, nyɛ ná kã, ejakaa i heɔ Mawu yeɔ kaa e maa ba mi kaa bɔ nɛ a de mi ɔ pɛpɛɛpɛ. 26 Se kɛ̃ ɔ, e sa nɛ wa ya sa si ngɛ zugba kpɔ nɛ nyu bɔle lɛ ko nɔ.”

27 Jehanɛ ɔ, benɛ nyɔ nɛ ji nyɔngma kɛ eywiɛ ɔ ba su nɛ wa ngɛ yae nɛ wa ngɛ bae ngɛ Adria Wo ɔ nɔ ɔ, nyɔ mi kpɛti ɔ, mele ɔ mi ní tsuli ɔmɛ bɔni susumi kaa a ngɛ zugba ko he sue. 28 A ngmɛɛ susumi kpa a he ngɔ wo wo ɔ mi, nɛ a ná gugue 20,* enɛ ɔ he ɔ, a ya a hɛ mi bɔɔ, nɛ a kpale ngmɛɛ susumi kpa a he ngɔ wo wo ɔ mi, nɛ a ná gugue 15.* 29 Nɛ akɛnɛ a ngɛ gbeye yee kaa eko ɔ, wa ma ya sa tɛ sahi a nɔ he je ɔ, a fɔ osɛkɛ eywiɛ ngɛ lɛ ɔ supa je, nɛ a ná nɛ je na mla. 30 Se benɛ mele ɔ mi ní tsuli ɔmɛ bɔni mɔde bɔmi kaa a maa tu fo kɛ je mele ɔ mi, nɛ a ngɛ ahima* a si kplee ngɔ fɔ wo ɔ nɔ, nɛ a bua pee kaa a yaa fɔ̃ osɛkɛ ɔmɛ ngɛ lɛ ɔ yi je ɔ, 31 Paulo de ta buli a nɔkɔtɔma a kɛ ta buli ɔmɛ ke: “Ke nyumu nɛ ɔmɛ hí mele ɔ mi ɔ, lɛɛ a be nyɛe ma he nyɛ yi wami.” 32 Kɛkɛ nɛ ta buli ɔmɛ poo ahima a he kpa amɛ nɛ a ha nɛ e nɔ si.

33 Jehanɛ ɔ, benɛ e piɛ bɔɔ nɛ je maa na a, Paulo wo mɛ tsuo he wami kaa a ye nɔ́ ko, nɛ e de ke: “Mwɛnɛ ɔ ji ligbi nyɔngma kɛ eywiɛ sɔuu nɛ nyɛ pee yeyeeye kɛ ngɛ mlɛe, nɛ nyɛ yi nɔ́ ko nɔ́ ko. 34 Enɛ ɔ he ɔ, i ngɛ nyɛ he wami woe kaa nyɛɛ ye ní; lɔ ɔ lɛ ma ha nɛ nyɛ yi ma ná wami, ejakaa nyɛ ti nɔ ko nɔ ko yi bwɔmi kake ngmelu po hɛ mi be kpatae.” 35 Benɛ e de nɔ́ nɛ ɔ, e ngɔ abolo, nɛ e na Mawu si ngɛ mɛ tsuo a hɛ mi, nɛ e ku mi, nɛ e bɔni yemi. 36 Kɛkɛ nɛ mɛ tsuo a ná kã nɛ mɛ hu a bɔni ní yemi. 37 Wɔ nihi* nɛ wa ngɛ mele ɔ mi ɔ tsuo wa yibɔ ji 276. 38 Benɛ a ye ní ɔ nɛ a tɔ ɔ, a sake ngma nɛ a wo ɔ ngɔ pue wo ɔ mi konɛ mele ɔ nɛ pee huyɛhuyɛ.

39 Benɛ je na a, a nyɛ we nɛ a yɔse zugba kpɔ ɔ, mohu ɔ, a na wo nya kɔkɔɔ mi he ko kɛ e nya zia, nɛ a to a yi mi kaa ke a ma nyɛ ɔ, a ma ha nɛ mele ɔ nɛ ya sa si ngɛ lejɛ ɔ. 40 Enɛ ɔ he ɔ, a po osɛkɛ ɔmɛ, nɛ a ha nɛ a nɔ wo ɔ mi, nɛ jamɛ a be ɔ mi nɔuu ɔ, a pɛne kudɔɔ ɔ he kpa amɛ; nɛ benɛ a wo abalaa a nɛ ngɛ mele ɔ yi je ɔ nɔ kɛ kpee kɔɔhiɔ ɔ, a plɛ mele ɔ yi kɛ tsɔɔ wo ɔ nya blɔ. 41 Benɛ a ya hɛ zia kpɔ ko ngɛ wo ɔ kpɛti ɔ, a ha nɛ mele ɔ ya sa si nɛ e yi je ɔ ya pu zu nɛ e nyɛ we nɛ e je, se oslɔke ɔ bɔni mele ɔ supa je ɔ ywiami wɔtsɔwɔtsɔ. 42 Kɛkɛ nɛ ta buli ɔmɛ to a yi mi kaa a maa gbe nihi nɛ a wo mɛ tsu ɔ konɛ nɔ ko nɔ ko nɛ e ko sle kɛ ho nɛ e ba tu fo kɛ je. 43 Se ta buli a nɔkɔtɔma a fia e pɛɛ si kaa e maa baa Paulo yi, nɛ e ngmɛ́ mɛ blɔ nɛ a tsu a yi mi tomi ɔ he ní. E fã nihi nɛ a le slemi ɔ kaa a tu ngɔ fɔ wo ɔ mi nɛ a sle kɛ ya kpo kekle, 44 nɛ ni nɛmɛ nɛ a piɛ ɔmɛ a ti ni komɛ maa bu gbegbelihi a nɔ, nɛ ni komɛ hu maa bu mele ɔ he ní ɔmɛ a nɔ kɛ nyɛɛ a se. Enɛ ɔ he ɔ, a ngɔ mɛ tsuo kɛ ba su kpo slɔkee.

28 Benɛ wa ba su slɔkee ɔ, wa ná le kaa a tsɛɔ zugba kpɔ nɛ nyu bɔle lɛ ɔ ke Mɔlta. 2 Nɛ nihi nɛ a tuɔ ma se gbi ɔ je mi mi himi nɛ e se be kpo kɛ tsɔɔ wɔ. A slɛ la nɛ a he wɔ tsuo atuu, ejakaa hiɔmi ngɛ nɛe nɛ fĩɛ hu ngɛ yee. 3 Se benɛ Paulo bua lɛ tsɔwi nya nɛ e kɛ pue la a mi ɔ, la a ha nɛ sinɔ duɔtsɛ ko je kpo nɛ e mimlaa e nine. 4 Benɛ nihi nɛ a tuɔ ma se gbi ɔ a hɛ ngmɛ gba lohwe duɔtsɛ ɔ nɔ nɛ e ngɛ bɛlee ngɛ e nine he ɔ, a bɔni a sibi demi ke: “Ngɛ anɔkuale mi ɔ, nɔmlɔ gbelɔ ji nyumu nɛ ɔ, nɛ e ngɛ mi kaa e je wo ɔ mi kɛ ba slɔkee mohu lɛɛ, se Dami Sane Yemi* ngmɛ́ lɛ blɔ kaa e ya nɔ nɛ e hi je mi.” 5 Se e huanya lohwe ɔ ngɔ fɔ la a mi nɛ lohwe ɔ yi lɛ awi. 6 Se a ngɛ blɔ hyɛe kaa e maa fuu aloo e ma tsɔ kɛ fia si tlukaa nɛ e ma gbo. Benɛ a mlɛ hluu nɛ nɔ́ ko pee we lɛ ɔ, a tsake a juɛmi nɛ a bɔni demi ke mawu ko ji lɛ.

7 Jehanɛ ɔ, nyumu ko ngɛ zugba kpɔ nɛ nyu bɔle lɛ ɔ nɔ nɛ a buɔ lɛ saminya. A tsɛɛ lɛ ke Pɔbliyo, nɛ e ngɛ zugbahi ngɛ lejɛ ɔ ní ɔmɛ a mi. E nya wa he, nɛ e pee wɔ nibwɔ ligbi etɛ sɔuu. 8 Nɛ e ba mi kaa asla bu Pɔbliyo tsɛ ɔ si nɛ e ngɛ muɔ hu nyaae, nɛ Paulo ya e ngɔ nɛ e ya sɔle, nɛ e ngɔ e ninehi kɛ pue e nɔ, nɛ e tsa lɛ. 9 Benɛ nɔ́ nɛ ɔ ya nɔ ɔ, nihi nɛ a ngɛ zugba kpɔ nɛ nyu bɔle lɛ ɔ nɔ nɛ a be he wami ɔ hu bɔni e ngɔ bami, nɛ e tsa mɛ. 10 A ke wɔ níhi fuu kɛ wo wa hɛ mi nyami, nɛ benɛ wa ngɛ mele mi sɛe kɛ maa je lejɛ ɔ, a ngɔ nɔ́ fɛɛ nɔ́ nɛ e he maa hia wɔ ɔ kɛ ba wo mele ɔ mi.

11 Nyɔhiɔ etɛ se ɔ, wa sɛ mele ko nɛ a to e he so ke, “Zeo Binyumu Ɔmɛ” ɔ mi kɛ je lejɛ ɔ. Mele ɔ je Alɛksandria, nɛ e ba ye ahlabata be ɔ ngɛ zugba kpɔ nɛ nyu bɔle lɛ ɔ nɔ. 12 Benɛ wa ba su Sirakuse melehi a si dami he ɔ, wa hi lejɛ ɔ ligbi etɛ; 13 benɛ wa je lejɛ ɔ, wa tsa nɔ nɛ wa ba su Rejio. Ligbi kake se ɔ, woyi je kɔɔhiɔ ko te si, nɛ ngɛ ligbi enyɔne ɔ nɔ ɔ, wa ba su Puteoli. 14 Wa ba na nyɛmimɛ ngɛ hiɛ ɔ, nɛ a kpa wɔ pɛɛ kaa waa ye ligbi kpaago ngɛ a ngɔ, nɛ lɔ ɔ se ɔ, wa pue Roma blɔ. 15 Benɛ nyɛmimɛ ɔmɛ nɛ a ngɛ lejɛ ɔ nu wa he ɔ, a ba kpee wɔ ngɛ Apios Jua a nɔ kɛ He Jɔɔmi He Etɛ ɔ tɔɔ. Benɛ Paulo hɛ ngmɛ gba a nɔ ɔ, e na Mawu si, nɛ e ná kã. 16 Nyagbenyagbe ɔ, benɛ wa sɛ Roma ma a mi ɔ, a ngmɛ Paulo blɔ kaa lɛ pɛ nɛ e hi si, konɛ ta bulɔ nɛ e bu e he.

17 Se ligbi etɛ se ɔ, e tsɛ Yuda bi ɔmɛ a kpɛti nyumuhi nɛ a hɛɛ blɔ nya a kpe. Benɛ a ba bua a he nya a, e de mɛ ke: “Nyumuhi, nyɛmimɛ, e ngɛ mi kaa i pee we nɔ́ yayami ko kɛ si we ni ɔmɛ aloo wa nɛmɛ ɔmɛ a kusumi ɔmɛ mohu lɛɛ, se a ngɔ mi kɛ wo Roma bi ɔmɛ a dɛ mi kɛ je Yerusalɛm kaa nɔ ko nɛ a wo lɛ tsu. 18 Nɛ benɛ a bi ye nya mi ɔ, jinɛ a suɔ kaa a maa ngmɛɛ ye he, ejakaa a nɛ nɔ́ ko nɛ a maa da nɔ kɛ gbe mi. 19 Se benɛ Yuda bi ɔmɛ kplɛɛ we ɔ, nɔ́ kpa ko be nɛ ma pee hu kaa ja i ngɔ ye sane ɔ kɛ ha Kaisare, se pi kaa i ngɛ nɔ́ ko nɛ ma de kɛ po ye ma a nya. 20 Enɛ ɔ he je nɛ i bi kaa ma na nyɛ konɛ i kɛ nyɛ nɛ tu munyu ɔ nɛ, ejakaa Israel hɛ kɛ nɔ fɔmi ɔ he je nɛ a wo mi kɔsɔkɔsɔ nɛ ɔ nɛ.” 21 A de lɛ ke: “Wa nine sui sɛ womihi a nɔ kɛ ji Yudea ngɛ o he, nɛ nyɛmimɛ ɔmɛ nɛ a je lejɛ ɔ kɛ ba a hu a ti nɔ ko nɔ ko ba bɔɛ wɔ o he sane ko aloo o he munyu yayami ko. 22 Se wa susu kaa e hi kaa wa maa bu mo tue konɛ waa le o susumi, ejakaa ngɛ anɔkuale mi ɔ, wa le kaa jami kuu nɛ ɔ lɛɛ, a tuɔ munyu kɛ siɔ lɛ ngɛ he fɛɛ he.”

23 Jehanɛ ɔ, a to ligbi nɛ a kɛ lɛ maa kpe, nɛ a he hiɛ babauu po pe kekle ɔ kɛ ba e ngɔ ngɛ he nɛ e ngɛ ɔ. Nɛ kɛ je mɔtu kɛ ya si gbɔkuɛ ɔ, e tsɔɔ mɛ sane ɔ nya, nɛ e je Mose Mlaa a kɛ Gbali ɔmɛ tsuo a mi kɛ ye Mawu Matsɛ Yemi ɔ he odase kɛ pi si konɛ e plɛ a yi mi ngɛ Yesu he. 24 A ti ni komɛ bɔni nɔ́ nɛ e ngɛ dee ɔ he pɛtɛmi; ni komɛ hu he we yi. 25 Enɛ ɔ he ɔ, akɛnɛ a juɛmi pee we kake he je ɔ, a bɔni jemi, nɛ Paulo tu munyu kake nɛ ɔ:

“E da blɔ kaa mumi klɔuklɔu ɔ gu gbalɔ Yesaya nɔ kɛ tu munyu kɛ tsɔɔ nyɛ nɛmɛ ɔmɛ, 26 nɛ e de ke: ‘Yaa nimli nɛ ɔmɛ a ngɔ nɛ o ya de ke: “Ngɛ anɔkuale mi ɔ, nyɛ maa nu, se nyɛ be sisi nue kɔkɔɔkɔ, nɛ ngɛ anɔkuale mi ɔ, nyɛ maa hyɛ, se nyɛ be nae kɔkɔɔkɔ. 27 Ejakaa nimli nɛ ɔmɛ a tsui kplii, a nu kɛ a tue, se a pee we he nɔ́ ko, nɛ a ma a hɛ ngmɛ bɔ nɛ pee nɛ a ko hyɛ kɛ a hɛ ngmɛ nɛ a kó nu kɛ a tue nɛ́ a tsui hu nɛ ko nu sisi, konɛ a kpale a se nɛ ma tsa mɛ.”’ 28 Enɛ ɔ he ɔ, nyɛ ná nɛ nyɛɛ le kaa a tsɔ konɛ a ngɔ yi wami hemi nɛ ɔ nɛ e je Mawu ngɔ ɔ kɛ ya ha je ma amɛ; nɛ bɔ fɛɛ bɔ nɛ e ji ɔ, mɛɛ lɛɛ a maa bu tue.” 29 ——

30 Enɛ ɔ he ɔ, e hi lejɛ ɔ jeha enyɔ sɔuu ngɛ we ko nɛ lɛ nitsɛ e hai ɔ mi, nɛ e kɛ bua jɔmi heɔ nihi tsuo nɛ a baa e ngɔ ɔ, 31 nɛ e fiɛɛɔ Mawu Matsɛ Yemi ɔ kɛ tsɔɔ mɛ, nɛ e tuɔ munyu faa nitsɛnitsɛ kɛ tsɔɔ mɛ Nyɔmtsɛ Yesu Kristo he ní, nɛ nɔ́ ko nɔ́ ko tsi we lɛ blɔ.