KƐ YA HA KOLOSE BI ƆMƐ

1 Paulo, Kristo Yesu bɔfo ngɛ Mawu suɔmi nya, kɛ wa nyɛminyumu Timoteo, 2 kɛ ya ha ni klɔuklɔu ɔmɛ nɛ a ngɛ Kolose nɛ a ji anɔkualetsɛmɛ nɛ a kɛ Kristo Yesu pee kake ɔ:

Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ ngɔ ɔ nɔ.

3 Ke wa ngɛ sɔlee ha nyɛ ɔ, wa naa Mawu, wa Nyɔmtsɛ Yesu Kristo Tsɛ ɔ si be fɛɛ be, 4 ejakaa wa nu hemi kɛ yemi nɛ nyɛ ngɛ ngɛ Kristo Yesu mi kɛ suɔmi nɛ nyɛ ngɛ kɛ ha ni klɔuklɔu ɔmɛ tsuo ɔ he 5 ngɛ hɛ kɛ nɔ fɔmi nɛ a kɛ to ha nyɛ ngɛ hiɔwe ɔ he je. Nyɛ nu hɛ kɛ nɔ fɔmi nɛ ɔ he be ko nɛ be ɔ kɛ gu sane kpakpa a he anɔkuale sɛ gbi ɔ 6 nɛ e ba su nyɛ ngɔ ɔ nɔ. Kaa bɔ nɛ sane kpakpa a ngɛ yiblii woe nɛ e ngɛ hɛ mi yae ngɛ je ɔ mi tsuo ɔ, jã kɛ̃ nɛ e ngɛ pee ngɛ nyɛ kpɛti kɛ je ligbi ɔ nɛ nyɛ nu nɛ nyɛ le Mawu dloomi ɔ saminya ngɛ anɔkuale mi ɔ. 7 Lɔ ɔ ji nɔ́ nɛ nyɛ kase kɛ je wa nyɛmi nyɔguɛ Epafra nɛ wa suɔ lɛ ɔ ngɔ ɔ nɛ, nɔ nɛ e ji Kristo sɔmɔlɔ anɔkualetsɛ ngɛ wa nane mi ɔ. 8 Lɛ hu e ha nɛ wa le nyɛ suɔmi ɔ ngɛ mumi mi.

9 Enɛ ɔ hu he je nɛ kɛ je ligbi ɔ nɛ wa nu he ɔ, wa kpa we sɔlemi kɛ nyɛ hami gblegbleegble, nɛ wa biɔ kaa nyɛ hyi tɔtɔɔtɔ kɛ e suɔmi nya ní ɔ he nile nitsɛnitsɛ, ngɛ juɛmi tsuo kɛ mumi mi níhi a sisi numi mi ɔ nɛ, 10 konɛ nyɛɛ nyɛɛ bɔ nɛ sa Yehowa* nɛ́ nyɛɛ sa e hɛ mi kɛ pi si, be mi nɛ nyɛ ngɛ nɔ yae nɛ nyɛ ngɛ yiblii woe ngɛ ní tsumi kpakpa fɛɛ ní tsumi kpakpa mi, nɛ́ Mawu he nile nitsɛnitsɛ ɔ nɛ nyɛ ngɛ ɔ ngɛ hiɛe ɔ; 11 nɛ a ngɔ he wami tsuo kɛ waje nyɛ ngɛ e he wami ngua a nɛ hɛ mi ngɛ nyami ɔ he je, konɛ nyɛɛ kɛ tsui si tomi kɛ bua jɔmi nɛ fĩ si saminya, 12 be mi nɛ nyɛ naa Tsɛ ɔ si, nɔ nɛ e ha nɛ nyɛ he su konɛ nyɛɛ kɛ ni klɔuklɔu ɔmɛ nɛ dla gbosi ní ngɛ la a mi ɔ.

13 E kpɔ̃ wɔ kɛ je diblii ɔ mi he wami ɔ mi, nɛ e ngɔ wɔ kɛ ba wo e Bi nɛ e suɔ lɛ ɔ matsɛ yemi ɔ mi, 14 nɔ nɛ e he je nɛ a ngmɛɛ wa he kɛ gu kpɔmi nɔ́ ɔ nɔ, nɛ ji wa he yayami ɔmɛ nɛ a kɛ pa wɔ ɔ. 15 Lɛ ji Mawu nɛ a nɛ lɛ ɔ henɔ, kekleekle bi ngɛ bɔ níhi tsuo a kpɛti; 16 ejakaa e nɔ nɛ a gu kɛ bɔ ní kpahi tsuo nɛ ngɛ hiɔwe kɛ zugba a nɔ ɔ nɛ, níhi nɛ a naa kɛ hɛ ngmɛ, kɛ níhi nɛ a nɛ kɛ hɛ ngmɛ, matsɛ sɛhi jio, nyɔmtsɛ yemihi jio, nɔ yemihi jio, blɔ nyahi jio. E nɔ nɛ a gu kɛ bɔ ní kpahi tsuo, nɛ lɛ nɛ a bɔ mɛ ngɔ ha. 17 Jehanɛ se hu ɔ, e ngɛ loko ní kpahi tsuo ba, nɛ e nɔ lɛ a gu kɛ ha nɛ ní kpahi tsuo ba si himi mi, 18 nɛ lɛ ji nɔmlɔ tso ɔ, nɛ ji asafo ɔ yi. Lɛ ji sisije ɔ, kekleekle bi kɛ je gbogboehi a kpɛti, konɛ e ba pee kekleekle nɔ ngɛ níhi tsuo mi; 19 Ejakaa e sa Mawu hɛ mi kaa e ma ha nɛ hyimi tsuo nɛ hi e mi, 20 nɛ Mawu maa gu e nɔ kɛ dla e kɛ níhi tsuo a kpɛti, níhi nɛ a ngɛ zugba a nɔ jio, níhi nɛ a ngɛ hiɔwe jio, konɛ kɛ gu e muɔ ɔ nɛ e plɛ kɛ pue sɛumi tso* ɔ nɔ ɔ nɔ ɔ, e ha nɛ tue mi jɔmi nɛ ba.

21 Niinɛ, nyɛ nɛ be ko nɛ be ɔ, nyɛ tsɔ nyɛ he, nɛ nyɛ ji he nyɛli akɛnɛ nyɛ juɛmi ngɛ ní tsumi yayamihi a nɔ ɔ he je ɔ, 22 amlɔ nɛ ɔ, e gu jamɛ a nɔ ɔ he lo nɔmlɔ tso ɔ gbenɔ ɔ nɔ kɛ dla nyɛɛ kɛ lɛ nyɛ kpɛti, konɛ e ngɔ nyɛ kɛ da si ngɛ e hɛ mi kaa nihi nɛ a ngɛ klɔuklɔu nɛ mu ko kɛ sane ko be a he— 23 se ngɛ anɔkuale mi ɔ, ja nyɛ ya nɔ ngɛ hemi kɛ yemi ɔ mi, nɛ nyɛ pi si ngɛ sisi tomi ɔ nɔ nɛ nyɛ mimiɛɛ we, nɛ nyɛ je we nyɛ he kɛ ji sane kpakpa a nɛ nyɛ nu nɛ a fiɛɛ ngɛ adebɔ níhi tsuo nɛ a ngɛ hiɔwe sisi ɔ a kpɛti ɔ he hɛ kɛ nɔ fɔmi ɔ he. Sane kpakpa nɛ ɔ he nɛ imi Paulo i ba pee sɔmɔlɔ ngɛ ɔ nɛ.

24 Amlɔ nɛ ɔ, i ngɛ nyae ngɛ amanehlu ɔmɛ nɛ i ngɛ nae ngɛ nyɛ he ɔ he je, nɛ i ngɛ níhi nɛ e piɛ ngɛ Kristo ɔ amanehlu ɔmɛ a mi ngɛ ye he lo ɔ mi ɔ mi gblee ngɛ e nɔmlɔ tso ɔ nane mi, nɛ lɔ ɔ ji asafo ɔ nɛ. 25 I ba pee asafo nɛ ɔ sɔmɔlɔ ngɛ we nɔ hyɛmi ní tsumi ɔ nɛ e je Mawu ngɔ nɛ a kɛ ha mi ngɛ nyɛ nane mi konɛ ma fiɛɛ Mawu munyu ɔ kɛ pi si ɔ nya, 26 laami sane nɛ e ngɛ klɔuu ɔ nɛ a ngɔ kɛ laa kɛ je blema níhi a blɔ nya tomi* ɔmɛ kɛ yi nɔ ɔmɛ nɛ a be ɔ mi ɔ. Se amlɔ nɛ ɔ, e je kpo ngɔ tsɔɔ e ni klɔuklɔu ɔmɛ, 27 nihi nɛ e sa Mawu hɛ mi kaa e ma ha nɛ a le laami sane nɛ e ngɛ klɔuu nɛ ɔ hɛ mi nyami babauu ɔ ngɛ je ma amɛ a kpɛti ɔ, nɛ ji Kristo nɛ e kɛ nyɛ pee kake ɔ e hɛ mi nyami ɔ he hɛ kɛ nɔ fɔmi ɔ. 28 Lɛ ji nɔ nɛ wa ngɛ jajee, nɛ wa ngɛ nɔ fɛɛ nɔ ga woe, nɛ wa ngɛ nɔ fɛɛ nɔ ní tsɔɔe ngɛ juɛmi tsuo mi, konɛ waa ngɔ nɔmlɔ fɛɛ nɔmlɔ kɛ da si kaa nɔ nɛ e hi kɛ pi si ngɛ Kristo mi. 29 Enɛ ɔ he ɔ, ngɛ anɔkuale mi ɔ, i ngɛ ní tsue wawɛɛ, i kɛ e he wami ɔ nɛ ngɛ ní tsue wawɛɛ ngɛ ye mi ɔ ngɛ ye he mɔde bɔe wawɛɛ.

2 Ejakaa i suɔ nɛ nyɛ yɔse dengme nɛ i ngɛ gboe wawɛɛ ngɛ nyɛ he, kɛ ni nɛmɛ nɛ a ngɛ Laodikea a kɛ nihi tsuo nɛ a nɛ mi hɛ mi kɛ hɛ mi* hyɛ ɔmɛ a he ɔ. 2 I ngɛ jã pee konɛ a to a tsui nɔ nine, nɛ a tsa pɛpɛɛpɛ kɛ pee kake ngɛ suɔmi mi, nɛ a ná ní nami ɔmɛ tsuo nɛ jeɔ a nɔ́ sisi numi ɔ he nɔ mi mami nɛ pi si ɔ mi ɔ, konɛ a ná Mawu laami sane nɛ e ngɛ klɔuu ɔ he nile nitsɛnitsɛ ɔ, lɔ ɔ ji Kristo. 3 A ngɔ juɛmi kɛ nile juetlihi tsuo kɛ laa ngɛ e mi saminya. 4 I ngɛ enɛ ɔ dee konɛ nɔ ko nɛ ko ngɔ yi mi plɛmi munyuhi kɛ sisi nyɛ. 5 E ngɛ mi kaa i be nyɛ ngɔ ngɛ he lo mi, se i kɛ nyɛ ngɛ ngɛ mumi mi, nɛ i ngɛ nyae kaa i na nyɛ blɔ nya tomi kpakpa a kɛ bɔ nɛ hemi kɛ yemi nɛ nyɛ ngɛ ngɛ Kristo mi ɔ mi wa ha a.

6 Enɛ ɔ he ɔ, kaa bɔ nɛ nyɛ pɛtɛ Kristo Yesu, nɛ ji Nyɔmtsɛ ɔ he ɔ, nyɛɛ ya nɔ nɛ nyɛɛ nyɛɛ ngɛ e mi, 7 konɛ nyɛ sipoku nɛ ya zu mi, nɛ a fia nyɛ kɛ ma si ngɛ e mi, nɛ nyɛ he nɛ wa wawɛɛ ngɛ hemi kɛ yemi ɔ mi, kaa bɔ nɛ a tsɔɔ nyɛ nɛ nyɛ ngɛ nɔ bee babauu kɛ si nami ɔ.

8 Nyɛɛ hyɛ nyɛ he nɛ hi nɛ nɔ ko nɛ ko ngɔ je mi nile kɛ yaka sisimi kɛ ngɔ nyɛ nyɔguɛ ngɛ adesa kusumihi nya, ngɛ je ɔ mi sisije níhi a nya, se pi ngɛ Kristo blɔ fa mi; 9 ejakaa e mi nɛ Mawu su ɔ hyimi ɔ tsuo hiɔ ngɛ nɔmlɔ tso su mi. 10 Lɔ ɔ he ɔ, nyɛ gu nɔ nɛ e ji yi kɛ ha nɔ yemi kɛ blɔ nya tsuo ɔ nɔ kɛ ná hyimi. 11 Ngɛ huɛ bɔmi nɛ ngɛ nyɛɛ kɛ lɛ nyɛ kpɛti ɔ he je ɔ, nyɛ hu a po nyɛ kɛ Kristo nɔ pomi ɔ, nɛ ji nɔ pomi nɛ pi nine nɛ a kɛ poɔ kɛ gu he lo nɔmlɔ tso ɔ nɛ a je kɛ fɔ he ɔ nɔ. 12 Ejakaa a pu nyɛɛ kɛ lɛ ngɛ e baptisimi ɔ mi, nɛ kɛ gu huɛ bɔmi nɛ ngɛ nyɛɛ kɛ lɛ nyɛ kpɛti ɔ nɔ ɔ, a tle nyɛ hu si kɛ bla kɛ gu nyɛ hemi kɛ yemi ngɛ Mawu, nɔ nɛ e tle lɛ si kɛ je gbeje ɔ he wami ní tsumi ɔ mi ɔ nɔ.

13 Jehanɛ se hu ɔ, e ngɛ mi kaa jinɛ nyɛ gbo ngɛ nyɛ tɔmi ɔmɛ kɛ mɔmlɔtɔtsɛmɛ nɛ nyɛ ji ngɛ he lo mi ɔ mi mohu, se Mawu ha nɛ nyɛɛ kɛ lɛ tsuo nyɛ ba wami mi. E je mi mi jɔmi mi nɛ e ngɔ wa tɔmi ɔmɛ tsuo kɛ pa wɔ 14 nɛ e tsu* famihi nɛ a kɛ ninehi ngma nɛ teɔ si kɛ woɔ wɔ ɔ. E je lɔ ɔ kɛ je blɔ mi kɛ gu kami nɛ e ka kɛ wo sɛumi tso* ɔ he ɔ nɔ. 15 E kpɔ nɔ yemi ɔmɛ kɛ blɔ nya amɛ a he níhi tsuo ngɛ a he nɛ e ngɔ mɛ kɛ tsɔɔ ngɛ ma hɛ mi kaa nihi nɛ a ye a nɔ kunimi, nɛ e gu lɔ ɔ* nɔ kɛ nyɛɛ a hɛ mi ngɛ kunimi yemi he ako simi mi.

16 Enɛ ɔ he ɔ, nyɛ ko ha nɛ nɔ ko nɛ kojo nyɛ ngɛ nɔ́ nɛ nyɛ yeɔ kɛ nɔ́ nɛ nyɛ nuɔ aloo ngɛ gbijlɔ ko aloo nyɔhiɔ ehe ɔ aloo he jɔɔmi ligbi ko yemi he. 17 Jamɛ a ní ɔmɛ ji níhi nɛ maa ba amɛ a nini, se nɔ́ ɔ nitsɛnitsɛ ɔ ji Kristo ɔ nɛ. 18 Nyɛ ko ha nɛ adesa ko nɛ e bua jɔɔ lakpa he si bami kɛ bɔfohi a jami henɔ ko he, nɔ nɛ níhi nɛ e na amɛ a nɔ “nɛ e daa”* a, nɛ́ e ha nɛ kunimi yemi jlasi ɔ nɛ bɔ nyɛ. Ngɛ anɔkuale mi ɔ, e he lo ɔ juɛmi ɔ ha nɛ e pee pupuupu nɛ́ sisi numi be he, 19 nɛ e hɛɛ we yi ɔ mi kpɛii, nɔ nɛ a guɔ e nɔ kɛ haa nɔmlɔ tso ɔ tsuo níhi, nɛ e tsaa pɛpɛɛpɛ kɛ peeɔ kake kɛ guɔ e kpɔji nya amɛ kɛ wu nya pani ɔmɛ a nɔ, nɛ e haa nɛ e waa kɛ wami nɛ jeɔ Mawu ngɔ ɔ.

20 Ke nyɛɛ kɛ Kristo tsuo gbo ngɛ je ɔ mi sisije ní ɔmɛ a blɔ fa mi ɔ, lɛɛ mɛni he je nyɛ hiɔ si kaa nihi nɛ loloolo ɔ, a piɛɛ je ɔ he kɛ gu nyɛ he nɛ nyɛ yaa nɔ nɛ nyɛɛ kɛ woɔ fami ɔmɛ a sisi: 21 “Koo pɛtɛ he, nɛ koo sa o nya, nɛ koo ta he hulɔ,” 22 nɛ́ e kɔɔ níhi nɛ ke a kɛ ngɛ ní tsue nɛ a puɛɔ ngɛ adesahi a kitahi kɛ a tsɔɔmihi a nya a he ɔ? 23 E ngɛ mi kaa nɔ́ nɛ juɛmi ngɛ jamɛ a ní ɔmɛ a mi ngɛ jami henɔ ko nɛ mɛ nitsɛmɛ a ngɔ kɛ fɔ a nɔ, kɛ lakpa he si bami, nɔmlɔ tso ɔ yi mi wami ɔ mi mohu, se a he be se nami, nɛ a kɛ be nyɛe maa tsi níhi nɛ he lo ɔ suɔ ɔmɛ a nya.

3 Se ke a tle nyɛ si kɛ piɛɛ Kristo ɔ he ɔ, nyɛɛ ya nɔ nɛ nyɛɛ hi níhi nɛ a ngɛ hiɔwe ɔ hlae, he nɛ Kristo ɔ hii si ngɛ ngɛ Mawu hiɔ nɔ ɔ. 2 Nyɛɛ ngɔ nyɛ juɛmi kɛ ma ní ɔmɛ nɛ a ngɛ hiɔwe ɔ nɔ, se pi ní ɔmɛ nɛ a ngɛ zugba a nɔ ɔ nɔ. 3 Ejakaa nyɛ gbo nɛ a ngɔ nyɛ wami ɔ kɛ laa kɛ piɛɛ Kristo ɔ he ngɛ Mawu mi. 4 Ke a je Kristo ɔ, nɛ ji wa wami ɔ kpo heii ɔ, kɛkɛ a ma je nyɛ hu nyɛɛ kɛ lɛ kpo heii ngɛ hɛ mi nyami mi.

5 Enɛ ɔ he ɔ, nyɛɛ gbe nyɛ nɔmlɔ tso ɔ he ní ɔmɛ nɛ a ngɛ zugba a nɔ ngɛ ní nɛ ɔmɛ a he, ajuama bɔmi,* mu ní tsumi, bɔmi nami he akɔnɔ nɛ́ e nɔ hí yemi, akɔnɔ nɛ yeɔ nɔ awi, kɛ hɛkɔ, nɛ e ji wɔ jami ɔ. 6 Jamɛ a ní ɔmɛ a he je nɛ Mawu mi mi fumi ɔ ma a nɛ. 7 Be ko nɛ e be ɔ, jã ji bɔ nɛ nyɛ hu nyɛ ba nyɛ je mi* ngɛ nyɛ blema je mi bami ɔ mi.* 8 Se amlɔ nɛ ɔ, e sa nɛ nyɛ je ní nɛ ɔmɛ tsuo kɛ je nyɛ he kɛ pue he: mi mi fumi, mi mi la, yayami peemi, jɛmi munyu, yakayaka munyu nɛ jeɔ nyɛ nya mi. 9 Nyɛ ko ye nyɛ sibi lakpa. Nyɛ je su* momo ɔ kɛ e ní peepee ɔmɛ ngɛ nyɛ he, 10 nɛ nyɛɛ wo su ehe ɔ, nɔ́ nɛ kɛ gu nile nitsɛnitsɛ nɔ ɔ, a ngɛ lɛ pee ehe ngɛ Nɔ nɛ e bɔ lɛ ɔ henɔ ɔ nɔ ɔ, 11 he nɛ Hela no aloo Yuda no be, he nɛ nɔ nɛ a po lɛ aloo mɔmlɔtɔtsɛ, ma se no, Sikiti no,* nyɔguɛ, aloo nɔ nɛ e ye e he be ɔ; mohu ɔ, Kristo ji níhi tsuo ngɛ kulaa mi.

12 Enɛ ɔ he ɔ, akɛnɛ nyɛ ji nihi nɛ Mawu hla, nɛ nyɛ ngɛ klɔuklɔu nɛ a suɔ nyɛ he je ɔ, nyɛɛ wo mi mi sami nɛ mi kuɔ, mi mi jɔmi, he si bami,* he jɔmi, kɛ tsui si tomi. 13 Ke nɔ ko ngɛ nɔ́ ko nɛ e maa da nɔ kɛ tu munyu kɛ si nɔ kpa ko po ɔ, nyɛɛ ya nɔ nɛ nyɛ ná nyɛ sibi a he tsui nɛ nyɛɛ ngɔ kɛ pa nyɛ sibi faa. Kaa bɔ nɛ Yehowa* ngɔ kɛ pa nyɛ faa a, e sa nɛ nyɛ hu nyɛɛ pee jã nɔuu. 14 Ngɛ ní nɛ ɔmɛ tsuo a se ɔ, nyɛɛ wo suɔmi, ejakaa e haa nɛ kake peemi nɛ ye mluku baa.

15 Jehanɛ se hu ɔ, nyɛ ha nɛ Kristo ɔ tue mi jɔmi ɔ nɛ ye tsɛ ngɛ nyɛ tsui mi,* ejakaa a tsɛ nyɛ kɛ ba jamɛ a tue mi jɔmi ɔ he ngɛ nɔmlɔ tso kake mi. Nɛ nyɛɛ pee nyɛ he nihi nɛ a le sina. 16 Nyɛ ha nɛ Kristo ɔ munyu ɔ nɛ hi nyɛ mi babauu ngɛ juɛmi tsuo mi. Nyɛɛ ya nɔ nɛ nyɛɛ hi ní tsɔɔe, nɛ nyɛɛ hi nyɛ sibi he wami woe* kɛ lahi, Mawu yi jemi lahi, mumi mi lahi nɛ a kɛ bua jɔmi* laa, nɛ nyɛɛ hi lae ngɛ nyɛ tsui mi kɛ ha Yehowa.* 17 Nɔ́ fɛɛ nɔ́ nɛ nyɛ peeɔ ngɛ munyu tumi mi aloo ní peepee mi ɔ, nyɛɛ pee kulaa ngɛ Nyɔmtsɛ Yesu biɛ ɔ mi, nɛ nyɛɛ gu e nɔ kɛ na Mawu nɛ ji Tsɛ ɔ si.

18 Nyɛ yigbayi, nyɛɛ ba nyɛ he si kɛ ha nyɛ hunomɛ* kaa bɔ nɛ e sa ngɛ Nyɔmtsɛ ɔ mi ɔ. 19 Nyɛ hunomɛ, nyɛɛ ya nɔ nɛ nyɛɛ suɔ nyɛ yi ɔmɛ nɛ nyɛ mi mi nɛ ko fu mɛ wawɛɛ.* 20 Nyɛ bimɛ, nyɛɛ bu nyɛ fɔli ɔmɛ tue ngɛ nɔ́ fɛɛ nɔ́ mi, ejakaa enɛ ɔ saa Nyɔmtsɛ ɔ hɛ mi saminya. 21 Nyɛ tsɛmɛ, nyɛ ko hi nyɛ bimɛ ɔmɛ a mi mi la woe,* konɛ a kɔni mi nɛ ko jɔ̃. 22 Nyɛ nyɔguɛhi, nyɛɛ bu nyɛ nyɔmtsɛmɛ ɔmɛ nɛ a ji adesahi ɔ* tue ngɛ nɔ́ fɛɛ nɔ́ mi, pi be mi nɛ a ngɛ nyɛ hyɛe pɛ, konɛ nyɛ kɛ sa adesahi a hɛ mi* kɛkɛ, se mohu kɛ tsui nɛ mi tsɔ, kɛ Yehowa* gbeye yemi. 23 Nɔ́ fɛɛ nɔ́ nɛ nyɛ ngɛ tsue ɔ, nyɛ tsu kɛ nyɛ susuma* tsuo kaa Yehowa* nɛ nyɛ ngɛ pee ha, se pi adesahi, 24 ejakaa nyɛ le kaa Yehowa* ngɔ nɛ nyɛ nine maa su gbosi ní ɔ nɔ kɛ je kaa hiɔwo. Nyɛ sɔmɔ Nyɔmtsɛ ɔ, nɛ ji Kristo. 25 Ngɛ anɔkuale mi ɔ, nɔ nɛ e peeɔ nɔ́ nɛ dɛ blɔ ɔ ma ná níhi nɛ dɛ blɔ nɛ e peeɔ ɔ he hiɔwo, nɛ nɔ mi hlami ko be mi.

4 Nyɛ nyɔmtsɛmɛ, nyɛɛ kɛ nyɛ nyɔguɛ ɔmɛ nɛ hi si saminya ngɛ blɔ nɛ da nɔ, akɛnɛ nyɛ le kaa nyɛ hu nyɛ ngɛ Nyɔmtsɛ ngɛ hiɔwe ɔ he je.

2 Nyɛɛ hɛɛ sɔlemi mi, nyɛ ko hwɔ mahe ngɛ mi, nɛ nyɛɛ hi si nae. 3 Ngɛ jamɛ a be ɔ mi nɔuu hu ɔ, nyɛɛ sɔle kɛ ha wɔ hulɔ, konɛ Mawu nɛ e bli sinya ko kɛ ha munyu ɔ, bɔ nɛ pee nɛ wa nyɛ nɛ waa jaje Kristo ɔ he laami sane nɛ e ngɛ klɔuu ɔ, nɛ́ lɔ ɔ he je nɛ a wo mi tsu ɔ, 4 konɛ ma jaje lɛ heii kaa bɔ nɛ e sa kaa ma pee ɔ.

5 Nyɛɛ ya nɔ nɛ nyɛɛ nyɛɛ ngɛ juɛmi mi ngɛ ni nɛmɛ nɛ a ngɛ se ɔmɛ a kpɛti, nɛ nyɛɛ kɛ nyɛ be nɛ tsu ní ngɛ blɔ nɛ hi pe kulaa nɔ.* 6 Be fɛɛ be ɔ, nyɛ ha nɛ nyɛ munyuhi nɛ ngɔ, nɛ ngo nɛ hi mi, konɛ nyɛɛ le bɔ nɛ e sa kaa nyɛ ha nɔ fɛɛ nɔ heto ha.

7 Tikiko, ye nyɛminyumu nɛ i suɔ lɛ kɛ sɔmɔlɔ anɔkualetsɛ kɛ ye nyɛmi nyɔguɛ ngɛ Nyɔmtsɛ ɔ mi ɔ ma de nyɛ sanehi tsuo nɛ kɔɔ ye he. 8 I ngɛ lɛ nyɛ ngɔ tsɔe konɛ nyɛɛ le bɔ nɛ wa ngɛ ha bɔ nɛ pee nɛ e to nyɛ tsui nɔ nine. 9 E kɛ Onesimo, ye nyɛmi anɔkualetsɛ nɛ i suɔ, nɛ e je nyɛ kpɛti ɔ lɛ maa ba; a ma ba de nyɛ níhi tsuo nɛ ngɛ nɔ yae ngɛ hiɛmɛ nɛ ɔ.

10 Aristako, ye nyɛmi nyɔguɛ ɔ ke e biɔ nyɛ, nɛ Maako, Banaba weku no* ɔ hu ke e biɔ nyɛ (nɔ nɛ nyɛ nine su blɔ tsɔɔmi nɔ ngɛ e he kaa ke e ba nɛ nyɛ he lɛ atuu ɔ), 11 kɛ Yesu nɛ a tsɛɛ lɛ ke Yusto ɔ, nihi nɛ a je ni nɛmɛ nɛ a po mɛ ɔmɛ a kpɛti ɔ. Nimli nɛ ɔmɛ pɛ ji ye nyɛmimɛ nɛ i kɛ mɛ tsuɔ ní kɛ haa Mawu Matsɛ Yemi ɔ, nɛ a ba pee nihi nɛ i náa bua* womi kɛ jeɔ a ngɔ wawɛɛ nitsɛ. 12 Epafra, Kristo Yesu nyɔguɛ nɛ e je nyɛ kpɛti ɔ hu ke e biɔ nyɛ. Be fɛɛ be ɔ, e bɔɔ mɔde wawɛɛ nɛ e sɔleɔ kɛ haa nyɛ, konɛ nyagbenyagbe ɔ, nyɛɛ da si kaa nihi nɛ a ye mluku nɛ a ngɛ nɔ mi mami nɛ mi wa ngɛ Mawu suɔmi nya ní ɔ tsuo mi. 13 Ejakaa i yeɔ e he odase kaa e gboɔ dengme wawɛɛ ngɛ nyɛɛ kɛ ni nɛmɛ nɛ a ngɛ Laodikea kɛ Hirapoli ɔmɛ a he je.

14 Luka, tsopatsɛ nɛ wa suɔ lɛ ɔ ke e biɔ nyɛ, nɛ Dema hu ke e biɔ nyɛ. 15 Nyɛ de nyɛmimɛ nɛ a ngɛ Laodikea a ke i biɔ mɛ, nɛ i biɔ Nimfa* kɛ asafo ɔ nɛ ngɛ e we ɔ mi ɔ hulɔ. 16 Nɛ ke nyɛ kane sɛ womi nɛ ɔ ngɛ nyɛ kpɛti ta a, nyɛɛ to blɔ nya nɛ a ya kane ngɛ Laodikea asafo ɔ mi hulɔ, nɛ nyɛ hu nyɛɛ kane nɔ́ nɛ je Laodikea a. 17 Jehanɛ se hu ɔ, nyɛ de Akipo ke: “O hɛ nɛ hi sɔmɔmi ɔ nɛ o kplɛɛ nɔ ngɛ Nyɔmtsɛ ɔ mi ɔ nɔ, konɛ o tsu kɛ gbe nya.”

18 Imi Paulo nɛ i kɛ imi nitsɛ ye nine ngma sɛ womi nɛ ɔ ke i biɔ nyɛ. Nyɛ ha nɛ tsuhi nɛ a wo mi ɔ nɛ hi nyɛ juɛmi mi. Dloomi ɔ kɛ nyɛ nɛ hi si.