KEKLEEKLE WOMI KƐ YA HA TIMOTEO

1 Paulo, Kristo Yesu bɔfo ngɛ Mawu nɛ ji wa Yi Wami Helɔ ɔ kɛ Kristo Yesu nɛ ji wa hɛ kɛ nɔ fɔmi ɔ, a fami nya, 2 kɛ ya ha Timoteo,* bi nitsɛnitsɛ ngɛ hemi kɛ yemi ɔ mi ɔ:

O nine nɛ su dloomi kɛ mɔbɔ nami kɛ tue mi jɔmi nɛ je Mawu nɛ ji Tsɛ ɔ kɛ Kristo Yesu wa Nyɔmtsɛ ɔ ngɔ ɔ nɔ.

3 Kaa bɔ nɛ i wo mo he wami kaa o hi si ngɛ Efeso benɛ i yaa Makedonia a, jã kɛ̃ nɛ amlɔ nɛ ɔ hu i ngɛ mo he wami woe nɛ o pee, bɔ nɛ pee nɛ o fã ni komɛ kaa a ko tsɔɔ tsɔɔmi kpa, 4 jã kɛ̃ nɛ a ko ngɔ a juɛmi kɛ ma nyaziahi kɛ weku kpahi a nɔ. Jamɛ a ní ɔmɛ ngɔɛ nɔ́ kpakpa ko kɛ bɛ, mohu ɔ, a haa nɛ nihi kaa a yi mi kɛ tuɔ munyu kɛkɛ pe nɛ a maa ngɔ nɔ́ ko nɛ je Mawu ngɔ nɛ kɔɔ hemi kɛ yemi he kɛ ba. 5 Ngɛ anɔkuale mi ɔ, yi mi tomi nɛ ngɛ blɔ tsɔɔmi* nɛ ɔ se ɔ ji suɔmi nɛ je tsui nɛ mi tsɔ mi kɛ he nile kpakpa kɛ hemi kɛ yemi nɛ osato be mi mi. 6 Akɛnɛ ni komɛ gba kɛ je ní nɛ ɔmɛ a he he je ɔ, a kpale mɛ kɛ ya munyuhi nɛ sisi numi be a he ɔmɛ a he. 7 A suɔ kaa a maa pee mlaa tsɔɔli, se a nui níhi nɛ a ngɛ dee ɔ, aloo níhi nɛ a ngɛ a nɔ mi mae wawɛɛ ɔmɛ a sisi.

8 Jehanɛ ɔ, wa le kaa Mlaa a hi ke nɔ ko kɛ tsuɔ ní saminya,* 9 nɛ e yɔseɔ kaa pi dalɔ he je nɛ a wo mlaa a ngɛ, se mohu nihi nɛ a yi mlaa nɔ kɛ atua tsɔli, kɛ nihi nɛ a yi Mawu gbeye kɛ yayami peeli, kɛ nihi nɛ a jeɔ nɔ se* kɛ nihi nɛ a bleɔ nɔ́ klɔuklɔu, tsɛmɛ a gbeli kɛ nyɛmɛ a gbeli, muɔ si pueli, 10 ajuama bɔli,* nyumuhi nɛ a kɛ nyumuhi náa bɔmi,* nihi nɛ a juɔ nɔmlɔ, kɛ lakpatsɛmɛ, kɛ nihi nɛ a yi a kita nɔ,* kɛ nɔ́ fɛɛ nɔ́ ko nɛ teɔ si kɛ woɔ tsɔɔmi kpakpa a* he je, 11 ngɛ bua jɔmi Mawu ɔ sane kpakpa a nɛ hɛ mi ngɛ nyami ɔ nɛ a tu kɛ wo ye dɛ ɔ nya.

12 I naa Kristo Yesu wa Nyɔmtsɛ ɔ, nɔ nɛ e wo mi he wami ɔ si, ejakaa e bu mi anɔkualetsɛ kɛ gu sɔmɔmi ko nɛ e ngɔ kɛ wo ye dɛ ɔ nɔ, 13 e ngɛ mi kaa be ko nɛ e be ɔ, i ji musu bɔlɔ kɛ yi mi walɔ kɛ nɔ builɔ mohu. Se kɛ̃ ɔ, a na mi mɔbɔ, ejakaa i li nɛ i pee, nɛ i be hemi kɛ yemi hulɔ. 14 Se wa Nyɔmtsɛ ɔ dloomi ɔ hiɛ babauu kɛ be nɔ kɛ piɛɛ hemi kɛ yemi kɛ suɔmi nɛ ngɛ Kristo Yesu mi ɔ he. 15 Munyu nɛ ɔ ji anɔkuale nɛ e sa kaa a kplɛɛ nɔ kɛ pi si: Kristo Yesu ba je ɔ mi konɛ e ba he yayami peeli a yi wami. Ngɛ nimli nɛ ɔmɛ a kpɛti ɔ, imi ji yayami peelɔ kpanaku. 16 Se kɛ̃ ɔ, a na mi mɔbɔ konɛ kɛ gu imi nɛ i ji yayami peelɔ kpanaku ɔ ye nɔ ɔ, Kristo Yesu nɛ e je e tsui si tomi ɔ tsuo kpo kɛ tsɔɔ, nɛ e ngɔ mi kɛ pee nɔ hyɛmi nɔ́ kɛ ha nihi nɛ a maa ngɔ a hemi kɛ yemi ɔ kɛ fɔ e nɔ kɛ ha neneene wami ɔ.

17 Jehanɛ ɔ, a ngɔ bumi kɛ hɛ mi nyami kɛ ha neneene Matsɛ ɔ, nɔ nɛ e puɛ we, nɛ a nɛ lɛ kɛ hɛ ngmɛ, Mawu kake pɛ ɔ kɛ ya neneene kɛ neneene. Amen.

18 Ye bi Timoteo, i ngɔ blɔ tsɔɔmi* nɛ ɔ kɛ ngɛ mo hae ngɛ gbamihi nɛ a gba kɛ kɔ o he ɔ nya kaa kɛ gu ní nɛ ɔmɛ a nɔ ɔ, o maa ya nɔ nɛ o maa hi ta kpakpa a hwue, 19 nɛ o hɛɛ hemi kɛ yemi kɛ he nile kpakpa mi, níhi nɛ ni komɛ tsitsɛɛ kɛ ya se, nɛ lɔ ɔ ha nɛ a hemi kɛ yemi ɔ butu ɔ. 20 Himeneo kɛ Alɛksanda piɛɛ nimli nɛ ɔmɛ a he, nɛ i ngɔ mɛ kɛ wo Satan dɛ bɔ nɛ pee nɛ a gu tsɔsemi nɔ kɛ tsɔɔ mɛ ní konɛ a ko bɔ musu.

2 Lɛɛ kekleekle kulaa a, nɔ́ nɛ i ngɛ he wami woe ngɛ he ji kaa a hɛɛ pɛɛ kpami nɛ mi wa, sɔlemihi, mi damihi, kɛ si namihi a mi ha nimli slɔɔtohi tsuo, 2 kɛ ha matsɛmɛ kɛ nihi tsuo nɛ a hɛɛ blɔ nya nguahi, konɛ wa nyɛ nɛ waa ya nɔ nɛ waa kɛ Mawu jami nɛ pi si kɛ hɛdɔ nɛ hi si kpoo ngɛ he jɔmi mi. 3 Enɛ ɔ hi nɛ e sa wa Yi Wami Helɔ ɔ, nɛ ji Mawu hɛ mi, 4 nɔ nɛ e suɔmi nya ji kaa a he nimli slɔɔtohi tsuo a yi wami nɛ a ba ná anɔkuale ɔ he nile nitsɛnitsɛ ɔ. 5 Ejakaa Mawu kake lɛ ngɛ, kɛ mi dalɔ kake ngɛ Mawu kɛ adesahi a kpɛti, nyumu ko, nɛ ji Yesu Kristo, 6 nɔ nɛ e ngɔ e he kɛ ha kaa kpɔmi nɔ́ nɛ sa pɛpɛɛpɛ kɛ ha nimli slɔɔtohi tsuo ɔ—enɛ ɔ ji nɔ́ nɛ a maa ye he odase ngɛ lɛ nitsɛ e be nɛ sa mi ɔ nɛ. 7 Odase yemi nɛ ɔ he je nɛ a hla mi fiɛɛlɔ kɛ bɔfo ɔ nɛ—anɔkuale nɛ i ngɛ tue ɔ nɛ, pi lakpa nɛ i ngɛ yee—je ma amɛ a tsɔɔlɔ ngɛ sanehi nɛ kɔɔ hemi kɛ yemi kɛ anɔkuale he.

8 Enɛ ɔ he ɔ, i suɔ kaa ngɛ he fɛɛ he ɔ, nyumu ɔmɛ nɛ a ya nɔ nɛ a sɔle, nɛ a wo ninehi nɛ a he tsɔ nɔ, nɛ abofu kɛ atsinyɛ jemi nɛ ko hi mi. 9 Jã kɛ̃ nɛ e sa nɛ yi ɔmɛ nɛ a kɛ humi peemi kɛ juɛmi nɛ mi tsɔ* nɛ dla a he bɔ nɛ sa,* pi kɛ yi gbɔmi slɔɔtohi kɛ sika tsu loo adiagba loo tade nɛ he jua wa saminya, 10 se mohu ngɛ blɔ nɛ e sa yihi nɛ a tsɔɔ kaa a jaa Mawu ɔ nɔ, nɛ lɔ ɔ ji kaa kɛ gu ní tsumi kpakpahi a nɔ.

11 Ha nɛ yo nɛ e pee dii* kɛ kase ní kɛ he si bami nɛ pi si. 12 I ngmɛ́ yo ko blɔ kaa e tsɔɔ ní loo e ye nyumu nɔ, mohu ɔ, e sa nɛ e ya nɔ nɛ e pee dii.* 13 Ejakaa Adam lɛ a bɔ kekle, loko Hawa. 14 Jehanɛ se hu ɔ, pi Adam nɛ a sisi, mohu ɔ, yo ɔ nɛ a sisi saminya nɛ e ba pee mlaa nɔ tɔlɔ. 15 Se a maa baa yo yi kɛ gu bi fɔmi nɔ, ke ji kaa e* yaa nɔ ngɛ hemi kɛ yemi kɛ suɔmi kɛ klɔuklɔu peemi kɛ juɛmi nɛ mi tsɔ* mi.

3 Munyu nɛ ɔ ji anɔkuale: Ke nyumu ko ngɛ mɔde bɔe* kaa e maa pee nɔ hyɛlɔ ɔ, lɛɛ e suɔ wawɛɛ nitsɛ kaa e ma tsu ní tsumi kpakpa. 2 E sa nɛ nɔ hyɛlɔ ɔ nɛ e pee nɔ ko nɛ sé ko be e he, huno nɛ e ngɛ yo kake, nɔ nɛ e peeɔ e ní bɔ nɛ sa, nɔ nɛ e juɛmi mi tsɔ,* nɔ nɛ e toɔ e níhi a blɔ nya saminya, nɔ nɛ e peeɔ nibwɔ, nɔ nɛ e he su nɛ e ma nyɛ maa tsɔɔ ní, 3 pi dã delɔ, pi awi yelɔ,* se mohu nɔ nɛ e nuɔ nɔ́ sisi, pi nɔ nɛ e suɔ pɛ, pi sika suɔlɔ, 4 nyumu nɛ e hyɛɔ lɛ nitsɛ e we mi bimɛ a nɔ ngɛ blɔ kpakpa nɔ, nɛ e bimɛ baa a he si saminya kɛ haa lɛ* 5 (ejakaa ke nyumu ko li bɔ nɛ e maa pee ha kɛ hyɛ lɛ nitsɛ e we mi bimɛ a nɔ ɔ, kɛ e ma plɛ kɛ hyɛ Mawu asafo ɔ nɔ ha kɛɛ?), 6 pi nyumu nɛ e tsake e tsui kɛ we, ejakaa e ma nyɛ maa pee pupuupu, nɛ e maa nɔ kojomi nɛ a kojo Abosiami ɔ mi. 7 Jehanɛ se hu ɔ, e sa nɛ nihi nɛ a ngɛ se ɔ nɛ a ye e he odase kpakpa* bɔ nɛ pee nɛ e hɛ mi nɛ ko pue si nɛ e ko nɔ Abosiami klama ko mi.

8 Jã nɔuu kɛ̃ nɛ e sa nɛ sɔmɔli hu nɛ a pee nihi nɛ a hɛ dɔɔ, pi nya enyɔɔnyɔtsɛmɛ,* pi nihi nɛ a nuɔ wai fuu, pi nihi nɛ a hɛ tsuɔ ngɛ se nami nɛ ngɛ zo he, 9 nihi nɛ a hɛɛɔ hemi kɛ yemi he laami sane nɛ e ngɛ klɔuu ɔ mi kɛ he nile nɛ he tsɔ.

10 Jehanɛ hu ɔ, ha nɛ a ka ni nɛ ɔmɛ kekle nɛ a hyɛ kaa a sa* lo; lɔ ɔ se ɔ, ha nɛ a sɔmɔ kaa sɔmɔli ke sane ko be a he ɔ.

11 Jã nɔuu kɛ̃ nɛ e sa kaa yihi hu nɛ a ha nɛ bumi nɛ hi a he, pi nihi a he guɛ gbeli, a pee nihi nɛ a peeɔ a ní bɔ nɛ sa, nihi nɛ a yeɔ anɔkuale ngɛ níhi tsuo a mi.

12 Ha nɛ sɔmɔli ɔmɛ nɛ a pee hunomɛ nɛ a ngɛ yi kakaakahi, nɛ́ a ngɛ a bimɛ kɛ mɛ nitsɛmɛ a we mi bimɛ a nɔ hyɛe ngɛ blɔ kpakpa nɔ. 13 Ejakaa nyumuhi nɛ a sɔmɔɔ ngɛ blɔ kpakpa nɔ ɔ ngɛ si dami kpakpa náe kɛ ngɛ a he hae nɛ a nyɛɔ nɛ a tuɔ munyu faa nitsɛ ngɛ hemi kɛ yemi ɔ nɛ e ngɛ Kristo Yesu mi ɔ mi hulɔ.

14 I ngɛ mo ní nɛ ɔmɛ ngmae, e ngɛ mi kaa i ngɛ blɔ hyɛe kaa e be kɛe nɛ ma ba o ngɔ mohu, 15 se ke e ba mi kaa i kpɛ se ɔ, konɛ o le bɔ nɛ e sa kaa o ba o je mi ha ngɛ Mawu we ɔ mi, nɛ lɔ ɔ ji Mawu hɛ kalɔ ɔ we asafo ɔ, nɛ ji anɔkuale ɔ titima kɛ e se pimi nɔ́ ɔ nɛ. 16 Niinɛ, laami sane nɛ e ngɛ klɔuu nɛ kɔɔ Mawu jami nɛ ɔ he ɔ kle niinɛ: ‘A je lɛ kpo heii ngɛ he lo mi, a jaje kaa e ji dalɔ ngɛ mumi mi, e je e he kpo kɛ tsɔɔ bɔfohi, a fiɛɛ lɛ ngɛ je ma amɛ a kpɛti, a he lɛ ye ngɛ je ɔ mi, a ngɔ lɛ ngɛ hiɔwe ngɛ hɛ mi nyami mi.’

4 Se munyu nɛ je mumi mi* ɔ de heii kaa ngɛ nyagbe be ɔmɛ a mi ɔ, ni komɛ ma gba kɛ je anɔkuale ɔ he, nɛ a ma ya bu sisimi munyuhi nɛ je mumi mi* kɛ daimoniohi a tsɔɔmihi tue, 2 kɛ gu nihi nɛ a tuɔ lakpa munyuhi ɔ, a we osato peemi ɔ nɔ, nihi nɛ a he nile sã kaa bɔ nɛ a kɛ dade nɛ dɔ la sãa nɔ́ ɔ. 3 A tsiɔ gba si himi nya, nɛ a woɔ nihi kita kaa a yu a he ngɛ niye ní slɔɔtohi nɛ Mawu bɔ kaa nihi nɛ a ngɛ hemi kɛ yemi, nɛ a le anɔkuale ɔ saminya a nɛ a kɛ sina nɛ ye ɔ he. 4 Ejakaa nɔ́ fɛɛ nɔ́ nɛ Mawu bɔ ɔ hi, nɛ nɔ́ ko nɔ́ ko be nɛ e sa kaa a kua ke a kɛ si nami ngɔ, 5 ejakaa a gu Mawu munyu ɔ kɛ sɔlemi nɛ a sɔle pue nɔ ɔ nɔ kɛ ha nɛ e he tsɔ.

6 Ke o wo nyɛmimɛ ɔmɛ ga nɛ ɔ, o maa pee Kristo Yesu sɔmɔlɔ kpakpa, nɔ nɛ a lɛ lɛ kɛ hemi kɛ yemi ɔ he munyu ɔ kɛ tsɔɔmi kpakpa a he munyu ɔ nɛ o nyɛɛ se haa a. 7 Se mo kua nyaziahi nɛ wui Mawu hɛ mi nyami ɔ, kaa ní nɛmɛ nɛ yimowi siaa a. Mohu ɔ, oti nɛ o kɛ ma o hɛ mi ji kaa o kɛ Mawu jami ma tsɔse o he. 8 Ejakaa nɔmlɔ tso ɔ tsɔsemi ɔ,* se nami bɔɔ pɛ lɛ ngɛ he, se Mawu jami he ngɛ se nami kɛ ha níhi tsuo, akɛnɛ e hɛɛ wami nɛ ngɛ amlɔ nɛ ɔ kɛ wami nɛ maa ba a he si womi ɔ he je. 9 Munyu nɛ ɔ ji anɔkuale nɛ e sa kaa a kplɛɛ nɔ kɛ pi si. 10 Enɛ ɔ he je nɛ wa ngɛ ní tsue wawɛɛ nɛ wa ngɛ wa he mɔde bɔe ɔ nɛ, ejakaa wa ngɔ wa hɛ kɛ fɔ Mawu hɛ kalɔ ɔ nɔ, nɔ nɛ e ji nimli slɔɔtohi tsuo, titli ɔ, anɔkualetsɛmɛ ɔmɛ a Yi Wami Helɔ ɔ.

11 Yaa nɔ nɛ o ngɔ kita nɛ ɔmɛ kɛ hi hae nɛ o hi tsɔɔe. 12 Ko ha nɛ nɔ ko nɛ e gbe niheyo nɛ o ji ɔ he guɛ kɔkɔɔkɔ. Mohu ɔ, pee nɔ hyɛmi nɔ́ kɛ ha anɔkualetsɛmɛ ɔmɛ ngɛ munyu tumi mi, ngɛ je mi bami mi, ngɛ suɔmi mi, ngɛ hemi kɛ yemi mi, ngɛ he tsɔmi mi. 13 Kɛ yaa si be nɛ ma ba a, yaa nɔ nɛ o ngɔ o juɛmi kɛ ma ní kanemi ngɛ nihi a hɛ mi, ga womi,* kɛ ní tsɔɔmi nɔ. 14 Koo ngmɛɛ nike ní nɛ ngɛ o mi nɛ a kɛ ha mo kɛ gu gbami nɔ benɛ nikɔtɔmahi a kuu ɔ ngɔ a ninehi ngɔ pue o nɔ ɔ he kɛ fɔ si. 15 Susu ní nɛ ɔmɛ a he wawɛɛ;* ngɔɔ o he kɛ wo a mi kulaa, bɔ nɛ pee nɛ o nɔ yami ɔ nɛ je kpo heii konɛ nihi tsuo nɛ a na. 16 Be fɛɛ be ɔ, hyɛ mo nitsɛ o he nɔ kɛ o ní tsɔɔmi ɔ hu nɔ saminya. Hɛɛ ní nɛ ɔmɛ a peemi mi, ejakaa ke o peeɔ jã a, o ma he mo nitsɛ kɛ nihi nɛ a buɔ mo tue ɔmɛ a yi wami.

5 Koo tu munyu kɛ si nyumu nɔkɔtɔma ko wawɛɛ. Mohu ɔ, tu munyu kɛ tsɔɔ lɛ kaa tsɛ, kɛ tsɔɔ nihewi kaa nyɛminyumuhi, 2 kɛ tsɔɔ yi nikɔtɔmahi kaa nyɛmɛ, kɛ tsɔɔ yihewi kaa nyɛmiyihi ngɛ he tsɔmi tsuo mi.

3 Mo susu* yalɔyihi* nɛ a ji yalɔyihi* nitsɛnitsɛmɛ ɔ* a he. 4 Se ke yalɔyo* ko ngɛ bimɛ loo bibimɛ ɔ, ha nɛ ni nɛ ɔmɛ nɛ a kase Mawu jami ngɛ mɛ nitsɛmɛ a we mi kekle, nɛ a to a fɔli kɛ a namɛ kɛ a nɛnɛmɛ nane mi bɔ nɛ sa mɛ, ejakaa enɛ ɔ saa Mawu hɛ mi. 5 Jehanɛ ɔ, yo nɛ e ji yalɔyo* nitsɛnitsɛ, nɛ e be nɔ ko nɔ ko ɔ ngɔ e hɛ kɛ fɔ Mawu nɔ, nɛ e hɛɛɔ pɛɛ kpami nɛ mi wa kɛ sɔlemi mi nyɔ kɛ pia. 6 Se nɔ nɛ e ngɔɔ e he kɛ haa bɔmi nami akɔnɔ ɔ, e ngɛ mi kaa e ngɛ wami mi mohu lɛɛ, se e gbo. 7 Enɛ ɔ he ɔ, yaa nɔ nɛ o ngɔ blɔ tsɔɔmi* nɛ ɔmɛ kɛ hi hae, bɔ nɛ pee nɛ sé ko nɛ kó hi a he. 8 Ngɛ anɔkuale mi ɔ, ke nɔ ko hyɛ we lɛ nitsɛ e nihi a nɔ ɔ, titli ɔ, ni nɛmɛ nɛ a ji e we mi bimɛ ɔ, lɛɛ e kua hemi kɛ yemi ɔ, nɛ e ji nɔmlɔ yayami kulaa pe nɔ nɛ e be hemi kɛ yemi.

9 Ke o maa ngma yalɔyo* ko biɛ kɛ piɛɛ biɛ ɔmɛ a he ɔ, e ko pee nɔ nɛ e yi jeha 60 lolo, e pee nɔ ko nɛ e gba nyumu kake, 10 nɛ́ e ngɛ biɛ kpakpa ngɛ ní tsumi kpakpahi a mi, ke e lɛ bimɛ, ke e pee nihi nibwɔ, ke e fɔ ni klɔuklɔuhi a nane he, ke e ye bua nihi nɛ e fĩ mɛ, ke e tu e he kɛ ha ní tsumi kpakpa fɛɛ ní tsumi kpakpa.

11 Se koo ngma yalɔyihi* nɛ a wɛ ɔmɛ a biɛ kɛ piɛɛ biɛ ɔmɛ a he, ejakaa ke a bɔmi nami he akɔnɔhi ba sɛ a kɛ Kristo ɔ a kpɛti ɔ, a hlaa kaa a maa gba. 12 Nɛ a maa ngɔ kojomi kɛ ba a nɔ, ejakaa a ngmɛɛ kekleekle hemi kɛ yemi ɔ nɛ a je kpo ɔ* he kɛ fɔ si. 13 Ngɛ jamɛ a be ɔ mi nɔuu hu ɔ, a kase kaa a be nɔ́ ko tsue, nɛ a hii si kpae kɛ jeɔ we kake mi kɛ yaa we kpa mi; ee, pi kaa a tsu we nɔ́ ko pɛ kɛkɛ, se mohu a ji sieku yeli kɛ nihi nɛ a ngɔɔ a he kɛ woɔ ni kpahi a sanehi nɛ kɔ we a he ɔ mi. 14 Enɛ ɔ he ɔ, i suɔ nɛ yalɔyihi* nɛ a wɛ ɔ nɛ a gba, a fɔ bimɛ, a hyɛ we nɔ, a ko ha nɔ nɛ e teɔ si kɛ woɔ nɔ ɔ he blɔ nɛ e tu munyu kɛ si wɔ. 15 Ngɛ anɔkuale mi ɔ, a kpale a ti ni komɛ kɛ ya ngɛ Satan se nyɛɛe momo. 16 Ke yo ko nɛ e heɔ yeɔ ɔ ngɛ weku li nɛ a ji yalɔyihi* ɔ, ha nɛ e ye bua mɛ bɔ nɛ pee nɛ tlomi nɛ ko ba fɔ si ngɛ asafo ɔ nɔ. Kɛkɛ ɔ, asafo ɔ ma nyɛ maa ye bua ni nɛmɛ nɛ a ji yalɔyihi* nitsɛnitsɛmɛ ɔ.*

17 Ha a na nikɔtɔmahi nɛ a hyɛɔ asafo ɔ nɔ ngɛ blɔ kpakpa nɔ ɔ kaa nihi nɛ a sa bumi nɛ e bɔ he si enyɔ, titli ɔ, ni nɛmɛ nɛ a tsuɔ ní wawɛɛ ngɛ munyu tumi kɛ ní tsɔɔmi mi ɔ. 18 Ejakaa ngmami ɔ deɔ ke, “Ke o kɛ na ku ngɛ ngma mi sae ɔ, e sɛ nɛ o fi e nya,” nɛ jehanɛ hu ɔ, “Ní tsulɔ ɔ, e hiɔwo sa lɛ.” 19 Ke a po nyumu nɔkɔtɔma ko* nya a, koo kplɛɛ nɔ, ja odase yeli enyɔ aloo etɛ ye he odase. 20 Ni nɛmɛ nɛ a hii yayami pee ɔ, kã a hɛ mi ngɛ nihi tsuo a hɛ mi konɛ e pee kɔkɔ bɔmi kɛ ha ni nɛmɛ nɛ a piɛ ɔ.* 21 I kɛ hɛdɔ ngɛ mo fãe ngɛ Mawu kɛ Kristo Yesu kɛ hiɔwe bɔfohi nɛ a hla amɛ a hɛ mi kaa o ngɔ blɔ tsɔɔmi nɛ ɔmɛ kɛ tsu ní nɛ́ nɔ he juɛmi yayami nami aloo nɔ mi hlami kó hi mi.

22 O kɛ oya yemi nɛ ko ngɔ o nine kɛ pue nyumu ko nɔ kɔkɔɔkɔ;* nɛ koo piɛɛ ni kpahi a he ngɛ a yayamihi a mi; yaa nɔ nɛ o ha nɛ o he nɛ tsɔ.

23 Koo nu nyu hu,* se mohu nuu wai bɔɔ ngɛ o mi mi ɔ kɛ hiɔ nɛ pɔɔ mo numi kpitikpiti ɔ he je.

24 Ni komɛ a yayamihi jeɔ kpo nɛ nihi leɔ, nɛ lɔ ɔ haa nɛ a kojoɔ mɛ amlɔ nɔuu, se ni kpahi a nɔ́ lɛɛ, pee se loko e jeɔ kpo. 25 Jã nɔuu kɛ̃ nɛ ní tsumi kpakpahi jeɔ kpo nɛ nihi leɔ, nɛ a kɛ ní nɛmɛ nɛ ji kpo ɔ hu be nyɛe maa laa daa.

6 Ha nɛ nihi nɛ a ngɛ nyɔguɛ yemi kuɛpã tso sisi ɔ nɛ a ya nɔ nɛ a na a nyɔmtsɛmɛ ɔmɛ kaa nihi nɛ a sa bumi saminya, bɔ nɛ pee nɛ a ko tu Mawu biɛ ɔ kɛ tsɔɔmi ɔ he munyu yayami ko gblegbleegble. 2 Jehanɛ se hu ɔ, nihi nɛ a ngɛ nyɔmtsɛmɛ nɛ a he ye ɔ nɛ a ko de ke a be mɛ bue akɛnɛ a ji nyɛmimɛ ɔ he je. Mohu ɔ, e sa nɛ a sɔmɔ mɛ saminya, ejakaa nihi nɛ a he ye nɛ a suɔ mɛ lɛ a ngɛ a sɔmɔmi kpakpa a he se náe ɔ nɛ.

Yaa nɔ nɛ o tsɔɔ ní nɛ ɔmɛ nɛ o kɛ ga womi nɛ ɔmɛ nɛ ha. 3 Ke adesa ko tsɔɔ tsɔɔmi kpa nɛ e kplɛɛ we blɔ tsɔɔmi kpakpa* nɛ je wa Nyɔmtsɛ Yesu Kristo ngɔ ɔ nɔ, aloo e kplɛɛ we tsɔɔmi ɔ nɛ kɛ Mawu jami kɔ ɔ nɔ ɔ, 4 e ngɛ pupuupu pee nɛ e nui nɔ́ ko nɔ́ ko sisi. Atsinyɛ jemi kɛ nya sami ngɛ munyunguhi a he ɔ he e juɛmi. Ní nɛ ɔmɛ ngɔɔ hɛkɔ, pɛ, nɔ he guɛ gbemi,* nɔ he juɛmi yayami nami kɛ baa, 5 nɛ a ngɔɔ sane tsɔwitsɔwihi a he nya samihi nɛ yaa nɔ be fɛɛ be kɛ baa kɛ guɔ nyumuhi nɛ a juɛmi puɛ nɛ anɔkuale ɔ bɔ mɛ, nɛ a susuɔ kaa Mawu jami ji blɔ nɛ a guɔ nɔ kɛ náa ní ɔ a nɔ. 6 Ngɛ anɔkuale mi ɔ, ke nɔ ko jaa Mawu nɛ jamɛ a be ɔ mi nɔuu ɔ, e bua hu jɔɔ e níhi a he ɔ,* e ji ní nami agbo. 7 Ejakaa waa kɛ nɔ́ ko nɔ́ ko bɛ je ɔ mi, nɛ jã kɛ̃ nɛ wa be nyɛe maa ngɔ nɔ́ ko nɔ́ ko kɛ je mi hulɔ. 8 Lɔ ɔ he ɔ, ke wa ngɛ niye ní* kɛ tade* ɔ, wa bua maa jɔ ní nɛ ɔmɛ a he.

9 Se nihi nɛ a fiaa a pɛɛ si kaa a ma ná ní kokooko ɔ nɔɔ ka kɛ klama kɛ níhi fuu nɛ juɛmi be mi kɛ akɔnɔhi nɛ a yeɔ nɔ awi nɛ tsɛ̃ɔ adesahi kɛ woɔ hɛ mi kpatami kɛ puɛmi mi ɔ a mi. 10 Ejakaa sika suɔmi ɔ ji ní slɔɔtohi tsuo nɛ a yeɔ nɔ awi ɔmɛ a sipoku, nɛ akɛnɛ ni komɛ ná suɔmi nɛ ɔ he je ɔ, a ha nɛ a tla blɔ kɛ je hemi kɛ yemi ɔ he nɛ a ngɔ piimi babauu kɛ gbɔɔgbɔɔ a he tsuo.

11 Se Oo, mo Mawu nɔmlɔ, tuu ní nɛ ɔmɛ a nya fo. Mohu ɔ, dii dami, Mawu jami, hemi kɛ yemi, suɔmi, si fimi, kɛ he jɔmi se. 12 Moo hwu hemi kɛ yemi ɔ he ta kpakpa a; moo pɛtɛ neneene wami ɔ nɛ lɔ ɔ he nɛ a tsɛ mo ngɛ, nɛ o jaje jajemi kpakpa a ngɛ ma hɛ mi ngɛ odasefohi babauu a hɛ mi ɔ he wawɛɛ.

13 Ngɛ Mawu, nɔ nɛ e baa níhi tsuo a yi ɔ, kɛ Kristo Yesu, nɔ nɛ e jaje jajemi kpakpa a ngɛ ma hɛ mi ngɛ Pontio Pilato hɛ mi kaa odasefo no ɔ a hɛ mi ɔ, i ngɛ mo fae 14 kaa o ye kita a nɔ ngɛ blɔ nɛ mu ko aloo sé ko be he ɔ nɔ kɛ yaa si wa Nyɔmtsɛ Yesu Kristo kpo jemi ɔ, 15 nɔ́ nɛ Nɔ Yelɔ kake pɛ nɛ e ngɛ bua jɔmi ɔ ma je kpo ngɛ be ɔmɛ nɛ a to ɔ nitsɛ mi ɔ. Lɛ ji nihi nɛ a yeɔ nɔ kaa matsɛmɛ ɔ a Matsɛ, kɛ nihi nɛ a yeɔ nɔ kaa nyɔmtsɛmɛ ɔ a Nyɔmtsɛ, 16 lɛ pɛ ji nɔ nɛ e be gboe gblegbleegble, nɛ e hiɔ la nɛ nɔ ko be nyɛe maa su he ɔ mi, nɔ nɛ adesa ko nɛ lɛ hyɛ nɛ́ nɔ ko be nyɛe maa na lɛ hulɔ ɔ. Lɛ nɛ a ngɔ bumi kɛ neneene he wami kɛ ha. Amen.

17 Ngɔɔ blɔ tsɔɔmi* kɛ ha niatsɛmɛ nɛ a ngɛ níhi a blɔ nya tomi* nɛ ngɛ amlɔ nɛ ɔ mi ɔ kaa a ko wo a he nɔ,* nɛ a ko ngɔ a hɛ kɛ fɔ ní nami nɛ e hí si daa a nɔ, mohu ɔ, a ngɔ a hɛ kɛ fɔ Mawu nɛ e haa wɔ níhi tsuo nɛ wa náa a mi ngɔɔmi ɔ nɔ. 18 De mɛ nɛ a pee kpakpa, nɛ a pee niatsɛmɛ ngɛ ní tsumi kpakpahi a mi, nɛ a ha nɔ nɔ́ faa,* nɛ a pee klaalo kaa a ma ha nihi níhi nɛ a ngɛ ɔ eko, 19 nɛ́ a hi sisi tomi kpakpa ko toe slɔkee kɛ hi a he hae kɛ ha hwɔɔ se, konɛ a nyɛ nɛ a pɛtɛ wami nitsɛnitsɛ ɔ he wawɛɛ.

20 Timoteo, buu nɔ́ nɛ a tu kɛ wo o dɛ ɔ he, nɛ́ o je o he kɛ je munyuhi nɛ se nami be a he nɛ a bleɔ nɔ́ nɛ ngɛ klɔuklɔu kɛ lakpa munyuhi nɛ a teɔ si kɛ siɔ a he nɛ a tsɛɔ mɛ ke “nile” ɔ a he. 21 Akɛnɛ ni komɛ ngɔ nile nɛ ɔ kɛ fĩa he je ɔ, a gba kɛ je hemi kɛ yemi ɔ he.

Dloomi ɔ kɛ mo nɛ hi si.