KƐ YA HA TITO

1 Paulo, Mawu nyɔguɛ kɛ Yesu Kristo bɔfo ngɛ nihi nɛ Mawu hla mɛ ɔmɛ a hemi kɛ yemi ɔ kɛ anɔkuale ɔ he nile nitsɛnitsɛ ɔ nɛ e kɛ Mawu jami kɔ 2 nɛ́ e daa si ngɛ neneene hɛ kɛ nɔ fɔmi nɛ Mawu, nɔ nɛ e be nyɛe maa ye lakpa a wo he si blema lokoo ɔ nya; 3 se ngɛ lɛ nitsɛ e be nɛ e to ɔ mi ɔ, e ha nɛ a le e munyu ɔ kɛ gu fiɛɛmi ɔ nɛ e tu ngɔ wo ye dɛ ɔ nɔ, ngɛ wa Yi Wami Helɔ nɛ ji Mawu ɔ fami nya; 4 kɛ ya ha Tito, bi nitsɛnitsɛ ngɛ hemi kɛ yemi ɔ nɛ wa ngɛ ɔ nya:

O nine nɛ su dloomi kɛ tue mi jɔmi nɛ e je Mawu nɛ ji Tsɛ ɔ, kɛ Kristo Yesu, wa Yi Wami Helɔ ɔ ngɔ ɔ nɔ.

5 I je o he ngɛ Kreta bɔ nɛ pee nɛ o dla níhi nɛ a tɔ̃tɔ̃ ɔ, nɛ o hla nikɔtɔmahi ngɛ ma fɛɛ ma mi kaa bɔ nɛ i tsɔɔ mo ɔ: 6 ke nyumu ko ngɛ nɛ sane ko be e he, huno nɛ e ngɛ yo kake, nɛ e ngɛ bimɛ nɛ a he ye nɛ nɔ ko pui a nya kaa a baa a je mi basabasa* aloo a ji atua tsɔli ɔ. 7 Akɛnɛ nɔ hyɛlɔ ji Mawu we nɔ hyɛlɔ he je ɔ, e sa nɛ e pee nɔ ko nɛ sane ko be e he, nɔ ko nɛ e pee we e tsui nya ní, pi nɔ ko nɛ e tsui ngɛ e nguɛ nya, pi dã delɔ, pi awi yelɔ,* pi nɔ ko nɛ e hɛ tsuɔ ngɛ se nami nɛ ngɛ zo he, 8 se mohu nɔ ko nɛ e peeɔ nibwɔ, nɔ ko nɛ e suɔ nɔ́ kpakpa, nɔ ko nɛ e juɛmi mi tsɔ,* dalɔ, nɔ se fĩlɔ, nɔ ko nɛ e yeɔ e he nɔ, 9 nɔ ko nɛ e hɛɛɔ anɔkuale munyu ɔ* mi wawɛɛ ngɛ e ní tsɔɔmi he ga lemi blɔ fa mi, konɛ e nyɛ nɛ e ngɔ tsɔɔmi kpakpa a* kɛ wo nihi he wami,* nɛ e nyɛ nɛ e kã ni nɛmɛ nɛ a teɔ si kɛ woɔ tsɔɔmi ɔ, a hɛ mi.

10 Ejakaa nihi babauu ngɛ nɛ a ji atua tsɔli, nihi nɛ a tuɔ munyuhi nɛ se nami be he, nɔ sisili, titli ɔ, nihi nɛ a fĩ nɔ pomi ɔ se ɔ. 11 E he hia nɛ a ma a nya, ejakaa nyumu nɛ ɔmɛ ngɛ wehi tsuo a hɛ mi plɛe kɛ ngɛ si bue kɛ gu níhi nɛ e sɛ kaa a tsɔɔ nɛ a ngɛ tsɔɔe ngɛ se nami nɛ ngɛ zo he je ɔ nɔ ɔ. 12 A ti nɔ kake nɛ e ji mɛ nitsɛmɛ a gbalɔ ɔ de ke: “Lakpa pɛ nɛ Kreta bi yeɔ, a ji lohwe awi yeli, jiklɔɔtsɛmɛ nɛ a peeɔ hejɔ̃.”

13 Odase yemi nɛ ɔ ji anɔkuale. Enɛ ɔ he ɔ, yaa nɔ nɛ o hi a hɛ mi kãe wawɛɛ konɛ a he nɛ wa ngɛ hemi kɛ yemi ɔ mi, 14 nɛ́ a ko hi Yuda bi a nyaziahi kɛ adesahi nɛ a gba kɛ je anɔkuale ɔ he ɔ, a kitahi tue bue. 15 Níhi tsuo a he tsɔ kɛ ha nihi nɛ a he tsɔ ɔ; se kɛ ha nihi nɛ a ble a he nɛ a be hemi kɛ yemi ɔ lɛɛ, nɔ́ ko nɔ́ ko be nɛ e he tsɔ kɛ ha mɛ, ejakaa a ble a juɛmi kɛ a he nile tsuo. 16 A jajeɔ ngɛ ma hɛ mi kaa a le Mawu, se a kɛ a ní tsumihi kua lɛ, ejakaa a he ngɛ tai nɛ a ji tue gboli, nɛ a sɛ kɛ ha we ní tsumi kpakpa ko kulaa.

2 Se moo lɛɛ yaa nɔ nɛ o hi níhi nɛ a kɛ tsɔɔmi kpakpa a* kɔɔ ɔmɛ a he munyu tue. 2 Ha nɛ nyumu nikɔtɔma amɛ nɛ a pee a ní bɔ nɛ sa, a ha nɛ bumi nɛ hi a he, nɛ a juɛmi mi nɛ tsɔ, nɛ a he nɛ wa ngɛ hemi kɛ yemi mi, ngɛ suɔmi mi, ngɛ si fimi mi. 3 Jã kɛ̃ nɛ ha nɛ yi nikɔtɔma amɛ hu nɛ a ba a je mi kaa nihi nɛ a yeɔ Mawu gbeye, pi nɔ he guɛ gbeli, pi nihi nɛ wai fuu numi ngɔ mɛ nyɔguɛ, se nihi nɛ a tsɔɔ nɔ́ kpakpa, 4 konɛ a wo yihewi ɔmɛ ga* nɛ́ a suɔ a hunomɛ, a suɔ a bimɛ, 5 a ha nɛ a juɛmi mi nɛ tsɔ, a he nɛ tsɔ, a tsu we mi ní tsumihi,* a pee nɔ́ kpakpa, a ngɔ a he kɛ wo mɛ nitsɛmɛ a hunomɛ a sisi, bɔ nɛ pee nɛ nɔ ko nɛ e ko tu Mawu munyu ɔ he munyu yayami.

6 Jã kɛ̃ nɛ yaa nɔ nɛ o hi nihewi ɔmɛ he wami woe kaa a ha nɛ a juɛmi mi nɛ tsɔ, 7 nɛ o ngɔ o he kɛ hi nɔ hyɛmi nɔ́ pee ngɛ ní tsumi kpakpahi a mi ngɛ blɔ fɛɛ blɔ nɔ. O kɛ hɛdɔ tsuo nɛ tsɔɔ níhi nɛ a he tsɔ, 8 tu munyu kpakpahi* nɛ nɔ ko be nyɛe maa tu munyu kɛ si, konɛ zo nɛ gbe nihi nɛ a teɔ si kɛ woɔ wɔ ɔ, nɛ́ a ko na nɔ́ yaya ko nɛ a de ngɛ wa he.* 9 Ha nyɔguɛhi nɛ a ba a he si kɛ ha a nyɔmtsɛmɛ* ngɛ níhi tsuo a mi, nɛ a hi mɔde bɔe kaa a maa sa a hɛ mi, nɛ a kɛ mɛ ko hi nya kanee, 10 a ko hi mɛ jue, mohu ɔ, a ha nɛ a na kaa a ma nyɛ maa fĩa kɛ fɔ a nɔ kɛ pi si, konɛ ngɛ blɔ fɛɛ blɔ nɔ ɔ, a ha nɛ wa Yi Wami Helɔ nɛ ji Mawu ɔ tsɔɔmi ɔ he nɛ pee fɛu.

11 Ejakaa a je Mawu dloomi ɔ kpo heii, nɛ lɔ ɔ ngɔ yi wami hemi kɛ ba ngɛ nimli slɔɔtohi tsuo hae. 12 Lɔ ɔ tsɔseɔ wɔ konɛ wa kua ní peepeehi nɛ sɛ Mawu hɛ mi kɛ je mi akɔnɔhi, nɛ waa kɛ juɛmi nɛ mi tsɔ kɛ dami kɛ Mawu gbeye yemi nɛ hi si ngɛ níhi a blɔ nya tomi* nɛ ɔ mi, 13 be mi nɛ wa ngɛ hɛ kɛ nɔ fɔmi nɛ ngɛ bua jɔmi ɔ kɛ wa Mawu ngua a kɛ wa Yi Wami Helɔ Yesu Kristo a kpo jemi ɔ nɛ hɛ mi ngɛ nyami mlɛe ɔ, 14 nɔ nɛ e ngɔ lɛ nitsɛ e he kɛ ha konɛ waa ye wa he* ngɛ mlaa nɔ tɔmi slɔɔtohi tsuo a mi, konɛ e ha nɛ ni komɛ a he nɛ tsɔ kɛ ha lɛ nitsɛ e he, nihi nɛ a ji lɛ nitsɛ e nihi titli nɛ a hɛ dɔɔ ngɛ ní tsumi kpakpahi a he.

15 Yaa nɔ nɛ o hi ní nɛ ɔmɛ a he munyu tue, nɛ o hi ga woe,* nɛ o hi hɛ mi kãe kɛ he wami tsuo. Ko ha nɛ nɔ ko nɛ e gbe o he guɛ.

3 Yaa nɔ nɛ o hi mɛ kaie kaa a ngɔ a he kɛ wo nɔ yemihi kɛ blɔ nyahi a sisi, nɛ a bu mɛ, nɛ a pee klaalo kɛ ha ní tsumi kpakpa fɛɛ ní tsumi kpakpa, 2 nɛ a ko tu nɔ ko he munyu yayami, a ko pee nihi nɛ a suɔ pɛ, se mohu a pee nihi nɛ a nuɔ nɔ́ sisi, nɛ a he nɛ jɔ wawɛɛ kɛ ha nihi tsuo. 3 Ejakaa wɔ hu jinɛ be ko nɛ be ɔ, wa be juɛmi, wa gbo tue, a ha nɛ wa tla blɔ, nɛ wa pee nyɔguɛhi kɛ ha akɔnɔ slɔɔtohi kɛ níhi nɛ haa nɔ bua jɔmi, wa hɛɛ yayami peemi kɛ hɛkɔ mi, wa he ngɛ tai, wa nyɛ wa sibi.

4 Se benɛ a je wa Yi Wami Helɔ nɛ ji Mawu ɔ mi mi jɔmi ɔ kɛ suɔmi nɛ e suɔ adesahi ɔ kpo heii ɔ, 5 (pi ngɛ dami ní tsumihi nɛ wa tsu ɔ he je, se mohu ngɛ e mɔbɔ nami ɔ he je), e gu he dumi ɔ nɛ e ngɔ wɔ kɛ ba wami mi ɔ nɔ kɛ he wa yi wami, nɛ e gu mumi klɔuklɔu ɔ nɔ kɛ pee wɔ ehe. 6 E plɛ mumi nɛ ɔ babauu kɛ pue wa nɔ kɛ gu Yesu Kristo wa Yi Wami Helɔ ɔ nɔ, 7 bɔ nɛ pee nɛ ke a bu wɔ dali kɛ gu jamɛ a nɔ ɔ dloomi ɔ nɔ ta a, wa ba pee gbosi ní yeli ngɛ neneene wami ɔ he hɛ kɛ nɔ fɔmi nya.

8 Munyu nɛ ɔmɛ ji anɔkuale, nɛ i suɔ nɛ nyɛɛ hi sane nɛ ɔmɛ a nɔ mi mae, bɔ nɛ pee nɛ ni nɛmɛ nɛ a ba he Mawu ye ɔ nɛ́ a ngɔ a juɛmi kɛ ma ní tsumi kpakpahi nɛ a maa hɛɛ mi ɔ nɔ. Ní nɛ ɔmɛ hi nɛ se nami ngɛ a he kɛ ha adesahi.

9 Se koo ngɔ o he kɛ wo kuasiahi a we atsinyɛ jemihi kɛ weku kpahi kɛ nya samihi kɛ kunɔhi nɛ a nɔɔ ngɛ Mlaa a he ɔ mi, ejakaa se nami ko be a he, nɛ a ji yaka níhi. 10 Ngɛ nɔ ko nɛ e toɔ jami kuu ko sisi ɔ blɔ fa mi ɔ, ke o wo lɛ ga* si kake kɛ si enyɔ se ɔ, kua lɛ, 11 ejakaa o le kaa jamɛ a nɔ ɔ gba kɛ je blɔ ɔ nɔ, nɛ e ngɛ yayami pee, nɛ e bu lɛ nitsɛ e he fɔ.

12 Ke i tsɔ Atema aloo Tikiko kɛ ba o ngɔ ɔ, bɔɔ mɔde wawɛɛ nitsɛ nɛ o ba ye ngɔ ngɛ Nikopoli, ejakaa lejɛ ɔ ji he nɛ i to kaa ma ye ahlabata be ɔ ngɛ. 13 Bɔɔ mɔde nɛ o ha Zena, nɔ nɛ e le Mlaa a saminya a, kɛ Apolo níhi tsuo nɛ maa hia mɛ ngɛ a blɔ hiami ɔ mi, konɛ nɔ́ ko nɔ́ ko nɛ e ko hia mɛ. 14 Se ha nɛ wa we bi ɔmɛ hu nɛ a kase kaa a maa hɛɛ ní tsumi kpakpahi a mi, bɔ nɛ pee nɛ a ye bua ngɛ sanehi nɛ a he hia wawɛɛ ɔmɛ a mi, konɛ a ko pee nihi nɛ a wui yiblii.

15 Nihi tsuo nɛ a kɛ mi ngɛ ɔ ke a biɔ mo. De ni nɛmɛ nɛ a suɔ wa sane ngɛ hemi kɛ yemi ɔ mi ɔ ke i biɔ mɛ.

Dloomi ɔ kɛ nyɛ tsuo nɛ hi si.