KƐ YA HA HEBRI BI ƆMƐ

1 Blema lokoo ɔ, Mawu kɛ wa nɛmɛ ɔmɛ tu munyu kɛ gu gbali ɔmɛ a nɔ si abɔ ngɛ blɔhi fuu a nɔ. 2 Amlɔ nɛ ɔ ngɛ ligbi nɛ ɔmɛ a nyagbe ɔ, e gu Bi ko, nɔ nɛ e hla lɛ kaa gbosi ní yelɔ ngɛ níhi tsuo a nɔ ɔ nɔ nɛ e kɛ wɔ tu munyu, nɛ e nɔ lɛ e gu kɛ pee níhi a blɔ nya tomi* ɔmɛ. 3 Lɛ ji Mawu hɛ mi nyami ɔ kpɛmi ɔ kɛ bɔ nɛ e ngɛ ha tutuutu ɔ henɔ pɛpɛɛpɛ, nɛ e baa níhi tsuo a yi kɛ guɔ e he wami munyu ɔ nɔ. Nɛ benɛ e gbe he tsukɔmi nya kɛ ha wa he yayami ɔmɛ ɔ, e hi si ngɛ Agboje ɔ hiɔ nɔ ngɛ hiɔwe. 4 Enɛ ɔ he ɔ, e ba hi pe bɔfo ɔmɛ hluu po kaa e ná biɛ ko nɛ hɛ mi ngɛ nyami kulaa pe a nɔ́ ɔ.

5 Kaa nɔ hyɛmi nɔ́ ɔ, bɔfo ɔmɛ a kpɛti mɛnɔ lɛ Mawu de lɛ hyɛ ke: “Ye bi ji mo; mwɔnɛ ɔ, i ba pee o tsɛ”? Kɛ jehanɛ se hu: “Ma pee e tsɛ, nɛ e maa pee ye binyumu”? 6 Se benɛ e kpale ngɔ e Kekleekle Bi ɔ kɛ ba zugba a nɔ he nɛ nimli ngɛ ɔ, e de ke: “Nɛ ha nɛ Mawu bɔfo ɔmɛ tsuo nɛ a wo e hɛ mi nyami.”*

7 Jehanɛ se hu ɔ, e deɔ ngɛ e bɔfo ɔmɛ a he ke: “E pee e bɔfo ɔmɛ mumihi, kɛ e sɔmɔli ɔmɛ* la lilɛ.” 8 Se e de ngɛ Bi ɔ he ke: “Mawu ji o matsɛ sɛ kɛ yaa neneene kɛ neneene, o Matsɛ Yemi ɔ he matsɛ tso ɔ ji dami* matsɛ tso. 9 O suɔ dami, nɛ o hiɔ mlaa nɔ tɔmi. Enɛ ɔ he je nɛ Mawu, nɛ ji o Mawu ɔ ngɔ bua jɔmi nu kɛ pɔ mo nu pe o huɛmɛ ɔmɛ ɔ nɛ.” 10 Nɛ: “Ngɛ sisije ɔ, Oo Nyɔmtsɛ, o to zugba a sisi, nɛ o nine nya ní tsumihi ji hiɔwe ɔmɛ. 11 A hɛ mi ma kpata, se moo lɛɛ o maa hi si; nɛ kaa bɔ nɛ tade peeɔ ɔ, mɛ tsuo a kpa mi ma gbɔjɔ, 12 o ma koklo mɛ kaa tade klɔii, kaa tade, nɛ a ma tsake mɛ. Se moo lɛɛ o ngɛ kaa bɔ nɛ o ngɛ ɔ, nɛ o jeha amɛ be nyagbe bae gblegbleegble.”

13 Se bɔfo ɔmɛ a kpɛti mɛnɔ lɛ e de ngɛ e he hyɛ ke: “Hii si ngɛ ye hiɔ nɔ kɛ yaa si ma ngɔ o he nyɛli ɔmɛ kɛ pee nɔ́ nɛ o kɛ o nane maa ma nɔ” ɔ? 14 Anɛ pi mumihi ji mɛ tsuo kɛ ha sɔmɔmi klɔuklɔu* nɛ́ a tsɔ mɛ kɛ ho kaa a ya sɔmɔ nihi nɛ a ma ná yi wami hemi ɔ lo?

2 Lɔ ɔ he je nɛ e he hia kaa waa ngɔ wa juɛmi kɛ ma níhi nɛ wa nu ɔmɛ a nɔ wawɛɛ pe bɔ nɛ wa peeɔ daa a nɛ, konɛ wa ko gba kɛ je a he kɔkɔɔkɔ. 2 Ejakaa ke munyu nɛ a tu kɛ gu hiɔwe bɔfohi a nɔ ɔ ma si kpɛii, nɛ mlaa nɔ tɔmi fɛɛ mlaa nɔ tɔmi kɛ tue gbomi ní peepee ná tue gblami ngɛ dami sane yemi nya a, 3 lɛɛ ke wa ma wa hɛ kɛ fɔ yi wami hemi ngua kaa kikɛ nɛ ɔ nɔ ɔ, kɛ wa ma plɛ kɛ tu nya fo kɛɛ? Ejakaa a bɔni e he munyu tumi kɛ gu wa Nyɔmtsɛ ɔ nɔ, nɛ ni nɛmɛ nɛ a nu kɛ je e nya a ma nɔ mi kɛ ha wɔ, 4 be mi nɛ Mawu hu piɛɛ he kɛ ngɛ odase yee kɛ okadihi kɛ nyakpɛ níhi* kɛ he wami ní tsumi slɔɔtohi kɛ mumi klɔuklɔu ɔ nɛ a gba ngɛ e suɔmi nya a.

5 Ejakaa pi hiɔwe bɔfohi a sisi nɛ e ngɔ zugba nɛ nimli maa hi nɔ nɛ maa ba nɛ wa ngɛ he munyu tue ɔ kɛ wo. 6 Se ngɛ he ko ɔ, odasefo no ko de ke: “Mɛnɔ ji adesa nɛ o susuɔ e he, aloo nɔmlɔ bi nɛ o hyɛɔ e nɔ? 7 O ha nɛ e ba si bɔɔ pɛ pe hiɔwe bɔfohi; o ngɔ hɛ mi nyami kɛ bumi kɛ bu lɛ jlasi, o ngɔ lɛ kɛ da o nine nya ní tsumihi a nya. 8 O ngɔ níhi tsuo kɛ wo e nane si.” Akɛnɛ Mawu ngɔ níhi tsuo kɛ wo e sisi he je ɔ, Mawu si we nɔ́ ko nɛ e ngɔɛ kɛ wui e sisi. Se amlɔ nɛ ɔ, wa nɛ kaa níhi tsuo ngɔ a he kɛ wo e sisi lolo. 9 Se amlɔ nɛ ɔ, wa naa Yesu, nɔ nɛ a ha nɛ e ba si bɔɔ pɛ pe hiɔwe bɔfo ɔmɛ ɔ, kaa a ngɔ hɛ mi nyami kɛ bumi kɛ bu lɛ jlasi akɛnɛ e gbo ɔ he je, konɛ kɛ gu Mawu dloomi ɔ nɔ ɔ, e sa e nya gbenɔ kɛ ha nɔ fɛɛ nɔ.

10 Ejakaa ke nɔ nɛ níhi tsuo ngɛ kɛ ha lɛ nɛ́ e nɔ lɛ ní ɔmɛ tsuo gu kɛ ba a ngɔ bimɛ babauu kɛ ngɛ hɛ mi nyami mi bae ɔ, lɛɛ e da blɔ kaa e sa nɛ e ha nɛ a yi wami hemi ɔ he Hɛ Mi Nyɛɛlɔ Kpanaa a nɛ e ye mluku kɛ gu amanehluhi a nɔ. 11 Ejakaa nɔ nɛ e ngɛ nihi klɔuklɔu pee ɔ kɛ nihi nɛ a ngɛ mɛ klɔuklɔu pee ɔ tsuo je nɔ kake mi, nɛ enɛ ɔ he ɔ, e pee we lɛ zo kaa e ma tsɛ mɛ ke nyɛmimɛ, 12 kaa bɔ nɛ e deɔ ɔ: “Ma jaje o biɛ ɔ kɛ tsɔɔ ye nyɛmimɛ ɔmɛ; ma la kɛ je o yi ngɛ asafo ɔ mi.” 13 Nɛ e deɔ hu ke: “Ma ngɔ ye hɛ kɛ fɔ e nɔ.” Nɛ e deɔ hu ke: “Hyɛ! I kɛ bimɛ tsɔwi ɔmɛ nɛ Yehowa* ha mi ɔ.”

14 Enɛ ɔ he ɔ, akɛnɛ “bimɛ tsɔwi” ɔmɛ ná muɔ kɛ he lo a mi blɔ fa mi nɔ́ he je ɔ, lɛ hu e ná ní nɛ ɔmɛ nɔuu a mi blɔ fa mi nɔ́, konɛ kɛ gu e gbenɔ ɔ nɔ ɔ, e nyɛ nɛ e kpata nɔ nɛ e ma nyɛ maa gbe nɔ, nɛ ji Abosiami ɔ hɛ mi 15 konɛ e ha nɛ nihi tsuo nɛ gbenɔ he gbeye yemi ngɔ mɛ nyɔguɛ a wami be tsuo ɔ nɛ a ye a he. 16 Ejakaa tsa pi hiɔwe bɔfohi nɛ e ngɛ ye buae ɔ, mohu ɔ, Abraham nina a* nɛ e ngɛ ye buae ɔ nɛ. 17 Enɛ ɔ he ɔ, e sa nɛ e ba pee kaa e “nyɛmimɛ” ɔmɛ nɔuu ngɛ blɔhi tsuo a nɔ, konɛ e nyɛ nɛ e pee osɔfo nɔkɔtɔma pe kulaa nɛ e naa nɔ mɔbɔ nɛ e yeɔ anɔkuale, bɔ nɛ pee nɛ e ngɔ kpatami afɔle* kɛ ha ngɛ ni ɔmɛ a he yayami ɔmɛ a he. 18 Akɛnɛ lɛ nitsɛ e na nɔ́ benɛ a ngɛ lɛ kae ɔ he je ɔ, e ma nyɛ ma ba ye bua nihi nɛ a ngɛ mɛ kae ɔ.

3 Lɔ ɔ he ɔ, nyɛmimɛ nɛ a ngɛ klɔuklɔu, nihi nɛ a ná hiɔwe tsɛmi* ɔ mi blɔ fa mi nɔ́, nyɛ susu bɔfo ɔ kɛ osɔfo nɔkɔtɔma pe kulaa a nɛ wa jajeɔ ɔ he—Yesu. 2 E ye Nɔ nɛ e hla lɛ ɔ anɔkuale, kaa bɔ nɛ Mose hu pee ngɛ jamɛ a Nɔ ɔ we ɔ tsuo mi ɔ. 3 Ejakaa a bu lɛ* kaa e sa hɛ mi nyami babauu pe Mose, ejakaa nɔ nɛ e maa we ɔ, e hɛ mi ngɛ nyami pe we ɔ nitsɛ. 4 Ngɛ anɔkuale mi ɔ, we fɛɛ we ɔ, nɔ ko lɛ e ma, se nɔ nɛ e pee níhi tsuo ɔ ji Mawu. 5 Jehanɛ ɔ, Mose ye anɔkuale kaa tsɔlɔ ngɛ jamɛ a Nɔ ɔ we ɔ tsuo mi kaa níhi nɛ a ma ba tu a he munyu pee se ɔmɛ a he odase yelɔ,* 6 se Kristo lɛɛ e ye anɔkuale kaa bi ngɛ Mawu we ɔ nɔ. Ke niinɛ nɛ wa yaa nɔ nɛ wa tuɔ munyu faa, nɛ wa hɛɛ wa hɛ kɛ nɔ fɔmi ɔ nɛ wa fĩaa ngɛ he ɔ mi wawɛɛ kɛ ya si nyagbe ɔ, lɛɛ wa ji Mawu we.

7 Enɛ ɔ he ɔ, kaa bɔ nɛ mumi klɔuklɔu ɔ deɔ ɔ, “Mwɔnɛ ɔ, ke nyɛ nu e gbi ɔ, 8 nyɛ ko kplii nyɛ tsui kaa bɔ nɛ e ba ngɛ mi mi la womi nɛ nya wa be ɔ mi, kaa bɔ nɛ e ba ngɛ ka ligbi ɔ mi ngɛ nga a nɔ 9 he nɛ nyɛ nɛmɛ ɔmɛ tsɔ̃ ye nya nɛ a ka mi ngɛ ɔ, pohu a na ye ní tsumi ɔmɛ jeha 40 sɔuu. 10 Enɛ ɔ he je nɛ yi nɔ nɛ ɔ he pee mi tai nɛ i de ke: ‘Be fɛɛ be ɔ, a tlaa blɔ ngɛ a tsui mi, nɛ a ba li ye blɔ ɔmɛ’ ɔ nɛ. 11 Lɔ ɔ he ɔ, i kɛ abofu kã kita ke: ‘A be ye he jɔɔmi ɔ mi sɛe.’”

12 Nyɛɛ hyɛ nɛ hi, nyɛmimɛ, konɛ nyɛ ti nɔ ko nɛ e ko ba ná tsui yaya nɛ he we yi kɛ gu e he nɛ e maa hi jee kɛ je Mawu hɛ kalɔ ɔ he ɔ nɔ; 13 mohu ɔ, nyɛɛ ya nɔ nɛ nyɛɛ hi nyɛ sibi he wami woe daa ligbi, ligbi fɛɛ ligbi nɛ a ma tsɛ ke “Mwɔnɛ ɔ,” konɛ yayami he wami nɛ sisiɔ nɔ ɔ nɛ ko kplii nyɛ ti nɔ ko tsui. 14 Ejakaa ja wa hɛɛ hɛ kɛ nɔ fɔmi ɔ nɛ wa ná kɛ je sisije ɔ mi wawɛɛ kɛ ya si nyagbe loko ngɛ anɔkuale mi ɔ, wa ma ná Kristo mi blɔ fa mi nɔ́.* 15 Kaa bɔ nɛ a de ɔ, “Mwɔnɛ ɔ, ke nyɛ nu e gbi ɔ, nyɛ ko kplii nyɛ tsui kaa bɔ nɛ e ba ngɛ mi mi la womi nɛ nya wa be ɔ mi ɔ.”

16 Ejakaa mɛnɔmɛ lɛ a nu, se kɛ̃ ɔ, a wo e mi mi la wawɛɛ ɔ? Ngɛ anɔkuale mi ɔ, anɛ pi nihi tsuo nɛ a je kpo kɛ je Ijipt ngɛ Mose sisi ɔ lo? 17 Jehanɛ se hu ɔ, mɛnɔmɛ nɛ a he pee Mawu tai* jeha 40 sɔuu ɔ? Anɛ pi nihi nɛ a pee yayami nɛ a gbo pue si ngɛ nga a nɔ ɔ lo? 18 Nɛ mɛnɔmɛ nɛ e kã mɛ kita kaa a be e he jɔɔmi ɔ mi sɛe ɔ? Anɛ pi nihi nɛ a gbo tue ɔ lo? 19 Enɛ ɔ he ɔ, wa na kaa a nyɛ we nɛ a sɛ mi, ejakaa a be hemi kɛ yemi.

4 Lɔ ɔ he ɔ, be abɔ nɛ e he jɔɔmi ɔ mi sɛmi he si womi ngɛ loloolo nɛ ɔ, nyɛ ha nɛ waa hyɛ wa he nɔ saminya,* konɛ e ko pee kaa nɔ́ nɛ nyɛ ti nɔ ko sui he. 2 Ejakaa wɔ hu a jaje sane kpakpa a kɛ tsɔɔ wɔ kaa bɔ nɛ e ji ngɛ a blɔ fa mi ɔ; se a ná we munyu ɔ nɛ a nu ɔ he se, ejakaa a kɛ ni nɛmɛ nɛ a nu ɔ pee we kake ngɛ hemi kɛ yemi mi. 3 Ejakaa wɔ nihi nɛ wa he ye ɔ, wa sɛɔ he jɔɔmi ɔ mi kaa bɔ nɛ e de ke: “Lɔ ɔ he ɔ, i kɛ abofu kã kita ke, ‘A be ye he jɔɔmi ɔ mi sɛe’” ɔ, pohu e gbe e ní tsumi ɔmɛ a nya kɛ je be nɛ a to je ɔ sisi ɔ. 4 Ejakaa ngɛ he ko ɔ, e tu ligbi kpaagone ɔ he munyu kaa bɔ nɛ e nyɛɛ se nɛ ɔ: “Nɛ Mawu jɔɔ e he ngɛ ligbi kpaagone ɔ nɔ kɛ je e ní tsumi ɔmɛ tsuo a mi,” 5 nɛ hiɛ ɔ hu ɔ, e de ke: “A be ye he jɔɔmi ɔ mi sɛe.”

6 Enɛ ɔ he ɔ, akɛnɛ loloolo ɔ, e ngɛ kɛ ha ni komɛ kaa a maa sɛ mi, nɛ́ ni nɛmɛ nɛ a jaje sane kpakpa a kɛ tsɔɔ mɛ kekle ɔ sɛ we mi ngɛ tue gbomi he he je ɔ, 7 e kpale to ligbi ko kɛ gu demi nɛ e de be babauu se ngɛ David la a mi ke “Mwɔnɛ ɔ” nɔ; kaa bɔ nɛ a de kɛ sɛ hlami ɔ, “Mwɔnɛ ɔ, ke nyɛ nu e gbi ɔ, nyɛ ko kplii nyɛ tsui.” 8 Ejakaa kaa Yoshua nyɛɛ a hɛ mi kɛ ya he jɔɔmi he ko ɔ, jinɛ pee se ɔ, Mawu ko tu we ligbi kpa ko he munyu hu. 9 Enɛ ɔ he ɔ, he jɔɔmi ligbi ko ngɛ kɛ ha Mawu we bi ɔmɛ. 10 Ejakaa adesa nɛ e sɛ Mawu he jɔɔmi ɔ mi ɔ, e jɔɔ e he kɛ je lɛ nitsɛ e ní tsumi ɔmɛ a mi hulɔ, kaa bɔ nɛ Mawu hu jɔɔ e he kɛ je lɛ nitsɛ e ní tsumi ɔmɛ a mi ɔ.

11 Enɛ ɔ he ɔ, nyɛ ha nɛ waa bɔ mɔde wawɛɛ nɛ waa sɛ jamɛ a he jɔɔmi ɔ mi, bɔ nɛ pee nɛ nɔ ko nɛ e ko ya nyɛɛ jamɛ a tue gbomi blɔ ɔ nɔuu nɔ. 12 Ejakaa Mawu munyu ɔ hɛ ngɛ, nɛ e ngɛ he wami, nɛ e nya ba pe klaate nya enyɔtsɛ, nɛ e gbuu* kɛ sɛɔ mi nɛ e gbaa susuma* kɛ mumi* mi, kɛ kpɔji nya amɛ kɛ jeɔ wu mi zɔ ɔ he, nɛ e nyɛɔ nɛ e jeɔ juɛmihi kɛ tsui mi susumihi kpo. 13 Nɛ adebɔ nɔ́ ko nɔ́ ko be nɛ e laa ngɛ e hɛ mi, mohu ɔ, níhi tsuo fɔɔ si ngmengmlee nɛ a nɔ bli heii ngɛ nɔ nɛ e sa kaa waa bu akɔtaa kɛ ha lɛ ɔ hɛ mi.

14 Enɛ ɔ he ɔ, akɛnɛ wa ngɛ osɔfo nɔkɔtɔma ngua pe kulaa nɛ e gblee hiɔwe mi, Yesu nɛ ji Mawu Bi ɔ he je ɔ, nyɛ ha nɛ waa hɛɛ jajemi nɛ wa jajeɔ lɛ ngɛ ma hɛ mi ɔ mi. 15 Ejakaa osɔfo nɔkɔtɔma pe kulaa nɛ wa ngɛ ɔ, pi nɔ ko nɛ e be nyɛe maa nu wa gbɔjɔmi ɔmɛ a he ha wɔ, mohu ɔ, nɔ nɛ wa ngɛ ɔ, a ka lɛ ngɛ blɔhi tsuo a nɔ kaa wɔ nɔuu, se yayami be e he. 16 Enɛ ɔ he ɔ, nyɛ ha nɛ waa kɛ munyu nɛ a tuɔ faa nɛ hɛ wɔ kɛ su dloomi matsɛ sɛ ɔ he, bɔ nɛ pee nɛ wa nine nɛ su mɔbɔ nami nɔ konɛ wa ná dloomi nɛ maa ye bua wɔ ngɛ be nɛ sa mi.

5 Ejakaa osɔfo nɔkɔtɔma pe kulaa fɛɛ osɔfo nɔkɔtɔma pe kulaa nɛ a hla lɛ ngɛ adesahi a kpɛti ɔ, a ngɔ lɛ kɛ da a nane mi ngɛ Mawu níhi a blɔ fa mi, konɛ e ngɔ nike níhi kɛ ha nɛ e sã afɔlehi ngɛ a he yayami ɔmɛ a he je. 2 E nyɛɔ nɛ e kɛ nihi nɛ a li nɔ́ ko kɛ nihi nɛ a tɔ̃ɔ ɔ* hiɔ si ngɛ mi mi sami* mi, akɛnɛ lɛ hu e ngɛ lɛ nitsɛ e gbɔjɔmi ɔ* he je, 3 nɛ lɔ ɔ he je ɔ, e sa nɛ e ngɔ nike ní kɛ ha ngɛ lɛ nitsɛ e yayami ɔmɛ a he kaa bɔ nɛ e peeɔ ngɛ ni ɔmɛ a yayami ɔmɛ a he ɔ nɔuu.

4 Adesa ko ngɔɛ hɛ mi nyami nɛ ɔ ngɛ lɛ nitsɛ e suɔmi nya, mohu ɔ, ja Mawu tsɛ lɛ pɛ loko e nine suɔ nɔ kaa bɔ nɛ a tsɛ Aaron ɔ. 5 Jã kɛ̃ nɛ Kristo ɔ hu wui lɛ nitsɛ e hɛ mi nyami kaa e ma ba pee osɔfo nɔkɔtɔma pe kulaa, se mohu a wo e hɛ mi nyami kɛ gu Nɔ nɛ e de lɛ ke: “Ye bi ji mo; mwɔnɛ ɔ, i ba pee o tsɛ” ɔ nɔ. 6 Kaa bɔ nɛ e de ngɛ he kpa hu ke, “Osɔfo ji mo kɛ yaa neneene ngɛ Melkizedɛk blɔ ɔ nɔ” ɔ.

7 Be mi nɛ Kristo ngɛ wami mi* ngɛ zugba a nɔ ɔ, e kɛ ngmlaa kpami nɛ nya wa kɛ vo nyu ngɔ pɛɛ kpamihi nɛ a mi wa kɛ ní bimihi hu kɛ pue Nɔ nɛ e nyɛ nɛ e he e yi wami kɛ je gbenɔ dɛ mi ɔ hɛ mi, nɛ a bu lɛ tue ngɛ e Mawu gbeye yemi ɔ he je. 8 E ngɛ mi kaa e ji bi mohu lɛɛ, se e kase tue bumi kɛ je amanehluhi nɛ e na a mi. 9 Nɛ benɛ a ha nɛ e ye mluku se ɔ, e ba pee nɔ nɛ e dɛ mi lɛ nihi tsuo nɛ a buɔ lɛ tue ɔmɛ a neneene yi wami hemi ngɛ, 10 ejakaa Mawu hla lɛ kaa osɔfo nɔkɔtɔma pe kulaa ngɛ Melkizedɛk blɔ ɔ nɔ.

11 Wa ngɛ níhi babauu nɛ wa ma de ngɛ e he, nɛ a nya tsɔɔmi yee, akɛnɛ nyɛ ba pee nihi nɛ a tue mi ti ɔ he je. 12 Ejakaa nyɛ nɛ jinɛ be nɛ ɔ mi ɔ,* e sa kaa nyɛɛ pee tsɔɔli ɔ, nyɛ kpale hia nɔ ko nɛ e je sisi nɛ e tsɔɔ nyɛ Mawu sɛ gbi klɔuklɔu ɔmɛ a sisije ní ɔmɛ, nɛ nyɛ kpale ba pee nihi nɛ a hia nyɔ nyu, se pi niye ní nɛ he wa. 13 Ejakaa nɔ fɛɛ nɔ nɛ e yaa nɔ nɛ e nuɔ nyɔ nyu ɔ, e li dami munyu ɔ, ejakaa e ji jokuɛ nyafii. 14 Se nihi nɛ a wa a, a nɔ́ ji niye ní nɛ he wa, mɛɛ lɛɛ a tsɔse a juɛmi nɛ a kɛ kɔɔ nɔ́ se ɔ kɛ gu ní nɛ a kɛ tsuɔ ɔ nɔ, konɛ a le slɔɔto nɛ ngɛ nɔ́ nɛ da kɛ nɔ́ nɛ dɛ tsuo a kpɛti.

6 Enɛ ɔ he ɔ, amlɔ nɛ ɔ nɛ wa be Kristo ɔ he sisije tsɔɔmi ɔ he nɛ ɔ, nyɛ ha nɛ waa ya wa hɛ mi konɛ waa wa nɛ wa ko hi sisi tomi ko toe hu, lɔ ɔ ji tsui tsakemi kɛ je ní tsumi gbogboehi a he kɛ hemi kɛ yemi ngɛ Mawu mi, 2 baptisimihi a he tsɔɔmi kɛ ninehi nɛ a kɛ pueɔ nɔ nɔ, gbogboehi a si tlemi ɔ kɛ neneene kojomi. 3 Nɛ wa maa pee nɔ́ nɛ ɔ, ke Mawu ngmɛ blɔ niinɛ.

4 Ejakaa nihi nɛ be ko nɛ be ɔ, a ha nɛ a hɛ mi ba tsɔ, nɛ a sa a nya hiɔwe nike ní nɛ a kɛ haa faa a, nɛ a ba ná mumi ɔ mi blɔ fa mi nɔ́, 5 nɛ a sa a nya Mawu munyu nɛ e hi ɔ kɛ níhi a blɔ nya tomi* nɛ ma a he wami ɔmɛ, 6 se a gbee si ɔ, a be nyɛe maa tsɛ̃ɛ mɛ ekohu kɛ ha tsui tsakemi, ejakaa a kpale ka Mawu Bi ɔ kɛ wo tso he kɛ ha mɛ nitsɛmɛ a he, nɛ a pue e hɛ mi si ngɛ ma hɛ mi. 7 Ejakaa zugba a náa jɔɔmi kɛ jeɔ Mawu ngɔ ke e miɔ* hiɔmi nɛ nɛɔ kɛ pueɔ nɔ kpitikpiti ɔ, nɛ e haa nɛ níhi nɛ a he ngɛ se nami kɛ ha nihi nɛ a peeɔ ngmɔ ɔ kɛ haa a puɛɔ. 8 Se ke miohi kɛ zezlehi puɛɔ ngɛ nɔ ɔ, a kuaa lɛ nɛ e kɛ gbiɛmi he kɛ we, nɛ nyagbe ɔ, a sãa lɛ.

9 Se nihi nɛ a suɔ, e ngɛ mi kaa wa ngɛ munyu tue ngɛ blɔ nɛ ɔ nɔ mohu lɛɛ, se ngɛ nyɛɛ lɛɛ nyɛ blɔ fa mi ɔ, wa ngɛ nɔ mi mami ngɛ ní kpakpahi a he, níhi nɛ kɔɔ yi wami hemi he. 10 Ejakaa Mawu ɔ, pi nɔ nɛ e dɛ ji lɛ nɛ e hɛ maa je nyɛ ní tsumi kɛ suɔmi nɛ nyɛ je kpo ngɛ e biɛ ɔ he kɛ gu sɔmɔmi nɛ nyɛ ngɛ ni klɔuklɔu ɔmɛ sɔmɔe nɛ nyɛ ya nɔ nɛ nyɛ ngɛ mɛ sɔmɔe ɔ nɔ. 11 Se wa suɔ wawɛɛ kaa nyɛ ti nɔ fɛɛ nɔ nɛ e kɛ hɛ mi wami nɛ tsu ní jã nɔuu, konɛ e ná nɔ mi mami nɛ pi si ngɛ hɛ kɛ nɔ fɔmi ɔ mi kɛ ya si nyagbe, 12 bɔ nɛ pee nɛ nyɛ ko ba pee hejɔtsɛmɛ, mohu ɔ, nyɛɛ kase nihi nɛ kɛ gu hemi kɛ yemi kɛ tsui si tomi nɔ ɔ, a nine su si womi ɔmɛ a nɔ ɔ.

13 Ejakaa benɛ Mawu wo Abraham si ɔ, akɛnɛ e be nyɛe maa ngɔ nɔ ko nɛ e nɔ kuɔ pe lɛ kɛ kã kita he je ɔ, e ngɔ lɛ nitsɛ e he kɛ kã kita, 14 nɛ e de ke: “Ma jɔɔ mo kokooko, nɛ ma ha nɛ o he maa hiɛ kokooko.” 15 Lɔ ɔ he ɔ, benɛ Abraham to e tsui si ɔ, e nine su si womi nɛ ɔ nɔ. 16 Ejakaa adesahi ngɔɔ nɔ ko nɛ e nɔ kuɔ pe mɛ kɛ kãa kita, nɛ a kita a ji nya sami fɛɛ nya sami nyagbe, ejakaa lɔ ɔ nɛ a kɛ maa sane nɔ mi ngɛ mlaa nya. 17 Ngɛ blɔ nɛ ɔ nɔuu nɔ ɔ, benɛ Mawu mwɔ e yi mi kpɔ kaa e ma je e yi mi tomi* nɛ tsakee we ɔ kpo heii kɛ tsɔɔ si womi ɔ he gbosi ní yeli ɔmɛ ɔ, e ngɔ kita kami kɛ ma nɔ mi,* 18 bɔ nɛ pee nɛ kɛ gu níhi enyɔ nɛ a tsakee we nɛ Mawu be nyɛe maa ye lakpa ngɛ a mi ɔ nɔ ɔ, wɔ nihi nɛ wa tu fo kɛ ya wesa he ɔ, wa ma ná he wami womi nɛ mi wa kɛ pɛtɛ hɛ kɛ nɔ fɔmi nɛ a kɛ ma wa hɛ mi ɔ he wawɛɛ. 19 Wa hɛ kɛ nɔ fɔmi nɛ ɔ ngɛ kaa osɛkɛ kɛ ha susuma a,* e ngɛ gbugbuugbu nɛ e pi si kpɛii hulɔ, nɛ e gu tsu mi pomi bo ɔ mi kɛ sɛ mi, 20 lejɛ ɔ nɛ wa hlami sɛlɔ nɛ ji Yesu sɛ ngɛ wa nane mi, nɔ nɛ e ba plɛ osɔfo nɔkɔtɔma pe kulaa ngɛ Melkizedɛk blɔ ɔ nɔ kɛ yaa neneene ɔ.

7 Ejakaa benɛ Abraham ya kpata matsɛmɛ ɔmɛ a hɛ mi nɛ e kpale kɛ ma a, Melkizedɛk nɛ ɔ, nɛ ji Salem matsɛ ɔ, Mawu Hiɔwe Lokoo No ɔ we osɔfo ɔ kɛ lɛ ba kpe nɛ e jɔɔ lɛ, 2 nɛ Abraham ha lɛ nɔ́ fɛɛ nɔ́ mi mi dlami nyɔngma mi kakaaka. Kekleekle ɔ, a tsɔɔ e biɛ ɔ sisi ke “Dami He Matsɛ,” kɛ jehanɛ se hu ɔ, Salem matsɛ, nɛ ji, “Tue Mi Jɔmi He Matsɛ.” 3 Akɛnɛ e be tsɛ, nɛ e be nyɛ, nɛ e be weku kpa, nɛ e be ligbihi a sisije aloo wami nyagbe hulɔ, se mohu a pee lɛ kaa Mawu Bi ɔ he je ɔ, e hiɔ si kaa osɔfo be fɛɛ be.*

4 Hyɛ bɔ nɛ nyumu nɛ ɔ he kle ha, nɔ nɛ Abraham nɛ e ji wekuyi* ɔ ha lɛ ta yibu ní kpakpa amɛ a mi mi dlami nyɔngma mi kakaaka a. 5 Ngɛ anɔkuale mi ɔ, ngɛ Mlaa a nya a, a wo Levi bi ɔmɛ nɛ a nine suɔ osɔfo yemi ní tsumi ɔ nɔ ɔ kita kaa a ngɔ mi dlami nyɔngma mi kakaaka ngɛ ni ɔmɛ nɛ ji a nyɛmimɛ ɔmɛ a dɛ, pohu Abraham bimɛ ji nimli nɛ ɔmɛ.* 6 Se nyumu nɛ ɔ nɛ e kɛ mɛ be weku kpa ko ɔ ngɔ mi dlami nyɔngma mi kakaaka ngɛ Abraham dɛ, nɛ e jɔɔ nɔ nɛ e ná si womi ɔ. 7 Jehanɛ ɔ, atsinyɛ jemi ko be he kaa nɔ nɛ e nɔ kuɔ ɔ jɔɔ nɔ nɛ e ba si ɔ. 8 Nɛ ngɛ sane kake ɔ mi ɔ, adesahi nɛ a ngɛ gboe ɔ lɛ a nine suɔ mi dlami nyɔngma mi kakaakahi a nɔ, se ngɛ sane kpa a mi ɔ, nɔ nɛ a ye e he odase ɔ nɛ e hiɔ si. 9 Nɛ a ma nyɛ ma de ke Levi po nɛ e nine suɔ mi dlami nyɔngma mi kakaakahi a nɔ ɔ wo mi dlami nyɔngma mi kakaakahi kɛ gu Abraham nɔ, 10 ejakaa e ngɛ e nɛnɛ ɔ se tso mi loloolo be mi nɛ e nɛnɛ ɔ kɛ Melkizedɛk ba kpe ɔ.

11 Ke niinɛ nɛ a nyɛɔ nɛ a náa mluku yemi kɛ guɔ Levi bi ɔmɛ a we osɔfo yemi ɔ nɔ ɔ (ejakaa e ji Mlaa a nɛ a kɛ ha ni ɔmɛ ɔ mi nɔ́ ko), lɛɛ mɛni he je mɔ nɛ e he pa ba hia kaa osɔfo kpa ko hu nɛ e te si nɛ a tsɔɔ kaa e ji osɔfo ngɛ Melkizedɛk blɔ ɔ nɔ, se pi ngɛ Aaron blɔ ɔ nɔ ɔ? 12 Ejakaa ke a ngɛ osɔfo yemi ɔ tsakee ɔ, lɛɛ e he ba hia nɛ a tsake Mlaa a hulɔ. 13 Ejakaa nyumu ɔ nɛ a de ní nɛ ɔmɛ ngɛ e he ɔ je wɛtso kpa mi, wɛtso nɛ nɔ ko ji mi kɛ sɔmɔ we hyɛ ngɛ afɔle sami la tɛ ɔ he. 14 Ejakaa e ngɛ heii kaa wa Nyɔmtsɛ ɔ je Yuda mi kɛ ba, se kɛ̃ ɔ, Mose de we nɔ́ ko nɛ tsɔɔ kaa osɔfohi maa je jamɛ a wɛtso ɔ mi kɛ ba.

15 Nɛ enɛ ɔ ba pee heii po pe kekle ɔ, benɛ osɔfo kpa ko te si nɛ e ngɛ kaa Melkizedɛk, 16 nɔ nɛ e ba pee jã, pi ngɛ mlaa nya nɔ́ ko nɛ daa si ngɛ he lo nya weku kpa ko nɔ ɔ nya, se mohu ngɛ wami ko nɛ a be nyɛe ma kpata hɛ mi ɔ he wami ɔ nya. 17 Ejakaa a de kɛ ye e he odase ke: “Osɔfo ji mo kɛ yaa neneene ngɛ Melkizedɛk blɔ ɔ nɔ.”

18 Lɛɛ enɛ ɔ he ɔ, a tsɛ̃ kita momo ɔ kɛ ya se, ejakaa e gbɔjɔ nɛ e hí kɛ ní tsumi. 19 Ejakaa Mlaa a ha we nɛ nɔ́ ko nɛ e ye mluku, se hɛ kɛ nɔ fɔmi nɛ hi pe kekle nɔ́ ɔ bami ɔ lɛɛ e pee jã, lɔ ɔ nɔ nɛ wa gu kɛ ngɛ hɛe kɛ ngɛ Mawu he sue ɔ nɛ. 20 Jehanɛ hu ɔ, kaa bɔ nɛ a pee we enɛ ɔ nɛ kita kami be mi ɔ, 21 (ejakaa niinɛ, nyumuhi ngɛ nɛ a ba pee osɔfohi nɛ kita kami be mi, se nɔ nɛ ɔ lɛɛ e ba pee osɔfo ngɛ kita nɛ a kã ngɛ e blɔ fa mi kɛ gu Nɔ nɛ e de ke: “Yehowa* kã kita nɛ e be e juɛmi tsakee,* ‘Osɔfo ji mo kɛ yaa neneene’” ɔ nɔ), 22 jã kɛ̃ nɛ Yesu hu ba pee somi ko nɛ hi pe kekle nɔ́ ɔ he nɔ mi mami nɔ́.* 23 Jehanɛ se hu ɔ, e sa nɛ nihi babauu nɛ a ba ye osɔfohi a se, ejakaa gbenɔ ha we nɛ a nyɛ nɛ a ye osɔfo daa, 24 se akɛnɛ e ngɛ wami mi kɛ yaa neneene he je ɔ, e we osɔfo yemi ɔ be se yeli. 25 Enɛ ɔ he ɔ, e ma nyɛ ma he nihi nɛ a guɔ e nɔ kɛ hɛɛ mɛ kɛ suɔ Mawu he ɔmɛ a yi wami kɛ pi si hulɔ, ejakaa e ngɛ wami mi be fɛɛ be konɛ e kpa pɛɛ kɛ ha mɛ.

26 Ejakaa e sa saminya kaa wa ná osɔfo nɔkɔtɔma pe kulaa ko kaa jã, nɔ nɛ e fĩɔ nɔ se, sane ko be e he, mu ko be e he, a je lɛ kɛ je yayami peeli a he, nɛ a wo e nɔ kɛ be hiɔwe he. 27 Lɛɛ lɛɛ e he hia we nɛ e sã afɔlehi daa ligbi, kekleekle ɔ, kɛ ha lɛ nitsɛ e he yayamihi, nɛ lɔ ɔ se ɔ, kɛ ha ni ɔmɛ a he yayamihi kaa bɔ nɛ jamɛ a osɔfo nɔkɔtɔma pe kulaa kpa amɛ peeɔ ɔ, ejakaa e pee enɛ ɔ si kake nyɔngloo benɛ e ngɔ e he kɛ ha a. 28 Ejakaa Mlaa a hlaa nyumuhi nɛ a ngɛ gbɔjɔmihi nɛ a woɔ mɛ osɔfo nɔkɔtɔma pe kulaa, se kita nɛ a kã ngɛ Mlaa a se ɔ hla Bi ko, nɔ nɛ a ha nɛ e ye mluku kɛ yaa neneene ɔ.

8 Jehanɛ ɔ, oti ɔ nɛ ngɛ nɔ́ nɛ wa ngɛ dee ɔ mi ɔ ji nɛ ɔ nɛ: Wa ngɛ osɔfo nɔkɔtɔma pe kulaa kaa kikɛ nɛ ɔ, nɛ e hi si ngɛ Agboje ɔ matsɛ sɛ ɔ hiɔ nɔ ngɛ hiɔwe, 2 lɛ ji he klɔuklɔu ɔ kɛ bo tsu nitsɛnitsɛ ɔ nɛ Yehowa* ma se pi adesa nɛ e ma a mi sɔmɔlɔ.* 3 Ejakaa osɔfo nɔkɔtɔma pe kulaa fɛɛ osɔfo nɔkɔtɔma pe kulaa a, a hla lɛ konɛ e ngɔ nike níhi kɛ ha, nɛ e sã afɔlehi hulɔ; lɔ ɔ he ɔ, nɔ nɛ ɔ hu e he hia nɛ e ná nɔ́ ko nɛ e kɛ ha. 4 Kaa e ngɛ zugba a nɔ ɔ, jinɛ e ko yi osɔfo, akɛnɛ nyumuhi ngɛ nɛ a ngɔɔ nike níhi kɛ haa ngɛ Mlaa a nya momo ɔ he je. 5 Nyumu nɛ ɔmɛ ngɛ sɔmɔe ngɛ blɔ klɔuu nɔ kaa hiɔwe ní ɔmɛ a henɔ tutuutu kɛ a nini; kaa bɔ nɛ a ngɔ Mawu fami kɛ ha Mose benɛ e maa ma bo tsu ɔ: Ejakaa Mawu de ke: “Hyɛ nɛ o pee níhi tsuo kaa a henɔhi nɛ a je kɛ tsɔɔ mo ngɛ yoku ɔ nɔ ɔ pɛpɛɛpɛ.” 6 Se amlɔ nɛ ɔ, Yesu nine su sɔmɔmi* nɛ hi kulaa pe kekle nɔ́ ɔ nɔ, ejakaa e ji mi dalɔ hulɔ ngɛ somi ko hu nɛ e hi pe kekle nɔ́ ɔ nɛ a kɛ da si womihi nɛ a hi pe kekle ní ɔmɛ a nɔ ngɛ mlaa nya a mi.

7 Kaa tɔmi ko be kekle somi ɔ he ɔ, jinɛ enyɔne he ko hia we. 8 Ejakaa e na tɔmi ngɛ ni ɔmɛ a he benɛ e de ke: “Yehowa* de ke, ‘Hyɛ! Ligbi ɔmɛ ma nɛ i kɛ Israel we ɔ kɛ Yuda we ɔ maa so somi ehe ko. 9 E be hie kaa somi ɔ nɛ i kɛ a nɛmɛ ɔmɛ so ligbi ɔ nɛ i pɛtɛ a nine he nɛ i je mɛ kɛ je Ijipt zugba a nɔ ɔ, ejakaa a yɛ nɔ nɛ a hi ye somi ɔ mi, enɛ ɔ he ɔ, i jɔɔ a nɔ hyɛmi,’ Yehowa* lɛ de.

10 “Yehowa* de ke, ‘Ejakaa somi ɔ nɛ i kɛ Israel we ɔ maa so ngɛ jamɛ a ligbi ɔmɛ a se ɔ ji nɛ ɔ nɛ. Ma ngɔ ye mlaa amɛ kɛ wo a juɛmi mi, nɛ ma ngma mɛ ngɛ a tsui mi. Nɛ ma ba pee a Mawu, nɛ a ma ba pee ye we bi.

11 “‘Nɛ nɔ ko be e ma mi no kɛ e nyɛmi tsɔɔe hu ke: “Moo le Yehowa!”* Ejakaa mɛ tsuo a maa le mi, kɛ je nɔ nyafii pe kulaa nɔ kɛ ya si nɔ ngua pe kulaa nɔ. 12 Ejakaa ma na mɛ mɔbɔ ngɛ níhi nɛ dɛ nɛ a peeɔ ɔ he, nɛ i be a yayami ɔmɛ kaie hu.’”

13 “Somi ehe ko” nɛ e de ɔ tsɔɔ kaa e ha nɛ blema nɔ́ ɔ be be. Jehanɛ ɔ, e be kɛe nɛ nɔ́ nɛ e be be nɛ e ngɛ momo pee ɔ, maa laa gbidigbidi.

9 Ngɛ blema somi ɔ mi ɔ, jinɛ a ngɛ níhi nɛ a hlaa ngɛ mlaa nya kɛ ha sɔmɔmi ngɛ blɔ klɔuu nɔ ɔ kɛ e he klɔuklɔu ɔ ngɛ zugba a nɔ. 2 Ejakaa a ma kekleekle bo tsu nɛ a po mi ɔ, nɛ lɔ ɔ mi nɛ kane tso ɔ, kɛ okplɔɔ ɔ, kɛ abolo nɛ a kɛ maa Mawu hɛ mi ɔ ngɛ; nɛ a tsɛ lɛ ke He Klɔuklɔu. 3 Se ngɛ bo tsu ɔ mi ɔ, a tsɛɛ tsu mi pomi bo enyɔne ɔ se tsu ɔ ke He Klɔuklɔu Pe Kulaa. 4 Sika tsu tsopa kɛ e he via sami nɔ́ kɛ somi daka a ngɛ lejɛ ɔ, nɛ a ngɔ sika tsu kɛ kpa he tsuo, lɔ ɔ mi nɛ sika tsu buɛ ɔ kɛ e mi mana a, kɛ Aaron tso ɔ nɛ e tsɛ̃ ɔ, kɛ somi tɛ tɛtlɛɛ ɔmɛ hi; 5 nɛ ngɛ e yi nɔ ɔ, kerubihi nɛ a hɛ mi ngɛ nyami bu kpatami nya nɔ́* ɔ nɔ. Se pi be nɛ e sa kaa waa tu ní nɛ ɔmɛ a he munyu fitsofitso ji nɛ ɔ.

6 Benɛ a ma ní nɛ ɔmɛ ngɛ blɔ nɛ ɔ nɔ ta a, osɔfo ɔmɛ sɛɔ bo tsu ɔ kekleekle tsu ɔ mi daa nɛ a ya tsuɔ sɔmɔmi nɛ e ngɛ klɔuu ɔ he ní tsumi ɔmɛ; 7 se osɔfo nɔkɔtɔma pe kulaa a lɛɛ, lɛ nɔ kake too pɛ e sɛɔ tsu enyɔne ɔ mi si kake daa jeha, nɛ e yɛ lejɛ ɔ be mi nɛ e hɛɛ we muɔ, nɔ́ nɛ e kɛ haa ngɛ lɛ nitsɛ e he kɛ yayamihi nɛ ni ɔmɛ pee nɛ a li ɔ he ɔ. 8 Enɛ ɔ he ɔ, mumi klɔuklɔu ɔ ha nɛ e pee heii kaa a je we blɔ ɔ nɛ a kɛ yaa he klɔuklɔu ɔ kɛ tsɔɔ we lolo be mi nɛ blema bo tsu ɔ maa si ɔ. 9 Bo tsu nɛ ɔ ji nɔ́ he tomi nɔ́ kɛ ha mwɔnɛ ɔ be ɔ, nɛ ngɛ blɔ nya tomi nɛ ɔ nya a, a ngɔɔ nike níhi kɛ haa nɛ a sãa afɔlehi hulɔ. Se ní nɛ ɔmɛ nyɛ we nɛ a ha nɛ adesa nɛ e ngɛ sɔmɔe ngɛ blɔ klɔuu nɔ ɔ he nile ɔ nɛ ye mluku. 10 Ní nɛ ɔmɛ kɔɔ niye ní slɔɔtohi kɛ níhi nɛ a nuɔ kɛ kusumi nya he fɔmihi* pɛ a he. A ji níhi nɛ a hlaa ngɛ mlaa nya ngɛ nɔmlɔ tso ɔ he, nɛ a ngɔ kɛ fĩ nihi a nɔ kɛ yaa si be nɛ a to nɛ a kɛ ma dla níhi tlɔmɔɔ ɔ maa su.

11 Se benɛ Kristo ba kaa ní kpakpa amɛ nɛ a ya nɔ momo ɔmɛ a he osɔfo nɔkɔtɔma pe kulaa a, e gu bo tsu nɛ kle pe blema nɔ́ ɔ nɛ e ye mluku hu pe blema nɔ́ ɔ mi, lɔ ɔ lɛɛ pi ninehi nɛ a kɛ ma, nɛ tsɔɔ kaa pi adebɔ nɛ ɔ mi nɔ́. 12 Pi apletsihi kɛ na ku nyafiihi a muɔ nɛ e kɛ sɛ he klɔuklɔu ɔ, se mohu e ngɔ lɛ nitsɛ e muɔ ɔ kɛ sɛ mi si kake nyɔngloo, nɛ e ná neneene kpɔmi ɔ kɛ ha wɔ. 13 Ejakaa ke apletsihi kɛ na kuhi a muɔ, kɛ na bimɛ a la zu nɛ a fĩaa kɛ pueɔ ni nɛmɛ nɛ a ble a he ɔmɛ a nɔ ɔ fɔɔ a he, nɛ he lo ɔ he tsɔɔ ɔ, 14 lɛɛ anɛ Kristo ɔ, nɔ nɛ kɛ gu neneene mumi nɔ ɔ, e ngɔ lɛ nitsɛ e he nɛ mu ko be he ɔ kɛ ha Mawu ɔ, e muɔ ɔ be wa he nile ɔ he fɔe kɛ je ní tsumi gbogboehi a he po pe jã konɛ wa sɔmɔ Mawu hɛ kalɔ ɔ ngɛ blɔ klɔuu nɔ lo?

15 Enɛ ɔ he je nɛ e ji mi dalɔ ngɛ somi ehe ko mi ɔ nɛ, ejakaa nɔ ko gbo kaa kpɔmi nɔ́ konɛ e kɛ je mɛ kɛ je mlaa nɔ tɔmihi a mi ngɛ blema somi ɔ sisi, bɔ nɛ pee nɛ ni nɛmɛ nɛ a tsɛ mɛ ɔ nɛ a ná neneene gbosi ní ɔ nɛ a wo he si ɔ. 16 Ejakaa he nɛ somi ko ngɛ ɔ, e he hia nɛ adesa nɛ e so somi ɔ nɛ e gbo kɛ ma nɔ mi, 17 ejakaa ja adesa nɛ e so somi ɔ gbo loko somi ɔ jeɔ e ní tsumi sisi, ejakaa ke e ngɛ wami mi ɔ, somi ɔ ji e ní tsumi sisi. 18 Enɛ ɔ he je ɔ, a ha we nɛ blema somi ɔ hu nɛ e tsu ní* nɛ́ muɔ piɛɛ we he. 19 Ejakaa benɛ Mose tu Mlaa a mi kita fɛɛ kita he munyu kɛ tsɔɔ ni ɔmɛ ɔ, e ngɔ na ku nyafiihi kɛ apletsihi a muɔ, kɛ nyu, kɛ lohwe he bwɔmi nɛ hɛɛ alamua tu su, kɛ hisopo, kɛ fĩa womi* ɔ kɛ ni ɔmɛ tsuo a nɔ, 20 nɛ e de ke: “Somi ɔ nɛ Mawu fã nyɛ ke nyɛɛ ye nɔ ɔ muɔ ɔ ji nɛ ɔ nɛ.” 21 Jã nɔuu kɛ̃ nɛ e ngɔ muɔ ɔ kɛ fĩa bo tsu ɔ kɛ níhi tsuo nɛ a kɛ tsuɔ ní tsumi klɔuklɔu* ɔ a nɔ. 22 Ee, ngɛ Mlaa a nya a, lɔ ɔ ji kaa muɔ fɔɔ níhi tsuo a he, nɛ ke a plɛ we muɔ kɛ pue we si ɔ, yayami pami be.

23 Enɛ ɔ he ɔ, e he ba hia kaa a tsu hiɔwe ní ɔmɛ a henɔhi tutuutu ɔ he ngɛ blɔ nɛ ɔmɛ a nɔ, se hiɔwe ní ɔmɛ hia afɔlehi nɛ a hi kulaa pe enɛ ɔmɛ. 24 Ejakaa pi he klɔuklɔu ko nɛ a kɛ nine pee nɛ e ji nɔ́ nitsɛ ɔ henɔ ɔ mi nɛ Kristo sɛ ɔ, se mohu hiɔwe nitsɛ e sɛ ɔ nɛ, nɛ amlɔ nɛ ɔ, e ya je kpo ngɛ Mawu hɛ mi ha wɔ. 25 E pee we enɛ ɔ konɛ e ngɔ lɛ nitsɛ e he kɛ ha si abɔ kaa bɔ nɛ osɔfo nɔkɔtɔma pe kulaa a ngɔɔ muɔ nɛ pi lɛ nitsɛ e nɔ́ kɛ sɛɛ he klɔuklɔu ɔ daa jeha a. 26 Kaa jã a, jinɛ e ko hi nɔ́ nae kpamkpam kɛ je be nɛ a to je ɔ sisi ɔ. Se amlɔ nɛ ɔ, e je e he kpo heii si kake nyɔngloo ngɛ níhi a blɔ nya tomi* ɔmɛ a nyagbe be ɔ mi, konɛ kɛ gu lɛ nitsɛ e he nɛ e kɛ sã afɔle ɔ nɔ ɔ, e je yayami kɛ je. 27 Nɛ kaa bɔ nɛ e fɔɔ si kɛ ha adesahi kaa a ma gbo si kake nyɔngloo, se ngɛ lɔ ɔ se ɔ, a nine maa su kojomi nɔ ɔ, 28 jã nɔuu kɛ̃ nɛ a ngɔ Kristo ɔ hu kɛ ha si kake nyɔngloo, konɛ e tloo nihi babauu a he yayamihi; nɛ benɛ e maa ba si enyɔne ɔ, pi yayami he nɛ e maa ba ngɛ,* nɛ nihi nɛ a je a tsui mi kɛ ngɛ lɛ hlae ngɛ a yi wami hemi he ɔ maa na lɛ.

10 Ejakaa akɛnɛ Mlaa a ngɛ ní kpakpahi nɛ maa ba a he nini, se pi ní ɔmɛ nitsɛnitsɛmɛ he je ɔ, e* be nyɛe maa gu jamɛ a afɔle ɔmɛ nɔuu nɛ a yaa nɔ nɛ a hii sãe jeha fɛɛ jeha a nɔ kɛ ha nɛ ni nɛmɛ nɛ a hɛɛ mɛ kɛ suɔ he ɔ nɛ a ye mluku gblegbleegble. 2 Kaa jã a, anɛ jinɛ a ko kpa we afɔle ɔmɛ nɛ a hii sãe akɛnɛ ni nɛmɛ nɛ a ngɛ sɔmɔe ngɛ blɔ nɛ ngɛ klɔuu nɔ ɔ a he tsɔ momo, nɛ a yi mi kojo we mɛ ngɛ yayamihi a he hu ɔ he je lo? 3 Se afɔle nɛ ɔmɛ nɛ a sãa jeha fɛɛ jeha a ji yayamihi a he kaimi nɔ́, 4 ejakaa na kuhi kɛ apletsihi a muɔ be nyɛe ma je yayamihi kɛ je.

5 Enɛ ɔ he ɔ, benɛ e ba je ɔ mi ɔ, e deɔ ke: “‘O sume afɔle kɛ níhi nɛ a kɛ haa, mohu ɔ, o dla nɔmlɔ tso ko kɛ ha mi. 6 O kplɛɛ we sami bɔhi kɛ yayami afɔlehi a nɔ.’ 7 Kɛkɛ nɛ i de ke: ‘Oo Mawu, hyɛ! i ba (a ngma ngɛ ye he ngɛ womi kpo ɔ mi) konɛ ma ba pee o suɔmi nya ní.’” 8 Benɛ e de kekleekle ke: “O sume, nɛ jã kɛ̃ nɛ o kplɛɛ we afɔlehi, kɛ níhi nɛ a kɛ haa, kɛ sami bɔhi, kɛ yayami afɔlehi a nɔ ɔ” se ɔ—afɔlehi nɛ a sã ngɛ Mlaa a nya— 9 kɛkɛ nɛ e de ke: “Hyɛ! i ba konɛ ma ba pee o suɔmi nya ní.” E je kekle nɔ́ ɔ kɛ je bɔ nɛ pee nɛ e to enyɔne ɔ sisi. 10 Kɛ gu “suɔmi nya ní” nɛ ɔ nɔ ɔ, a ha nɛ wa he tsɔ kɛ gu Yesu Kristo nɔmlɔ tso ɔ nɛ e kɛ ha si kake nyɔngloo ɔ nɔ.

11 Jehanɛ se hu ɔ, daa ligbi ɔ, osɔfo fɛɛ osɔfo ya daa e blɔ he, nɛ e tsuɔ e sɔmɔmi klɔuklɔu* ɔ he ní, nɛ e sãa afɔle nɛ ɔ nɔuu nɛ́ e be nyɛe ma je yayami kɛ je kulaa a kpamkpam. 12 Se nyumu nɛ ɔ lɛɛ, e sã yayamihi a he afɔle kake si kake nyɔngloo, nɛ e ya hi si ngɛ Mawu hiɔ nɔ, 13 kɛ je jamɛ a be ɔ mi kɛ ma a, e ngɛ mlɛe kɛ yaa si be nɛ a maa ngɔ e he nyɛli ɔmɛ kɛ pee nɔ́ nɛ e kɛ e nane maa ma nɔ. 14 Ejakaa kɛ gu afɔle sami kake nɔ ɔ, e ha nɛ nihi nɛ a ha nɛ a he ngɛ tsɔe ɔ ye mluku si kake nyɔngloo. 15 Jehanɛ se hu ɔ, mumi klɔuklɔu ɔ hu yeɔ odase kɛ tsɔɔ wɔ, ejakaa lɔ ɔ se ɔ, e de ke: 16 “Yehowa* de ke, ‘Enɛ ɔ ji somi nɛ i kɛ mɛ maa so ngɛ jamɛ a ligbi ɔmɛ a se ɔ nɛ. Ma ngɔ ye mlaa amɛ kɛ wo a tsui mi, nɛ ma ngma mɛ ngɛ a juɛmi mi.’” 17 Kɛkɛ nɛ e de ke: “Nɛ i be a he yayami ɔmɛ kɛ a mlaa nɔ tɔmi ní peepee ɔmɛ kaie hu.” 18 Jehanɛ ɔ, he nɛ a ngɔɔ ní nɛ ɔmɛ kɛ paa ngɛ ɔ, yayami he afɔle sami ko be hu.

19 Lɔ ɔ he ɔ, nyɛmimɛ, be mi nɛ wa ngɛ kã nɛ waa kɛ maa gu blɔ ɔ nɛ a kɛ sɛɛ he klɔuklɔu ɔ mi kɛ gu Yesu muɔ ɔ 20 nɛ bli blɔ kɛ ha wɔ kaa blɔ ehe nɛ hɛ ngɛ kɛ gu tsu mi pomi bo ɔ, nɛ ji e he lo ɔ nɔ, 21 nɛ jehanɛ se hu akɛnɛ wa ngɛ osɔfo ngua ngɛ Mawu we ɔ nɔ he je ɔ, 22 nyɛ ha nɛ waa hɛ wɔ kɛ su e he kɛ tsui nɛ mi tsɔ, kɛ hemi kɛ yemi nɛ pi si, akɛnɛ a fĩa wa tsui ɔ nɔ nɛ a ha nɛ e he tsɔ kɛ je he nile yaya he nɛ a kɛ nyu nɛ mi tsɔ du wa nɔmlɔ tso ɔmɛ a he ɔ he je. 23 Nyɛ ha nɛ waa hɛɛ wa hɛ kɛ nɔ fɔmi ɔ jajemi ngɛ ma hɛ mi ɔ mi wawɛɛ nɛ wa ko mimiɛɛ, ejakaa nɔ nɛ e wo si ɔ ji anɔkualetsɛ. 24 Nyɛ ha nɛ wa susu wa sibi a he* konɛ wa ha nɛ wa sibi a nɔ gbagba nɛ e te kɛ ha suɔmi kɛ ní tsumi kpakpahi, 25 nɛ́ wa ko kua wa he nya nɛ wa hii buae ɔ, kaa bɔ nɛ ni komɛ pɔɔ peemi ɔ, mohu ɔ, waa hi wa sibi he wami woe, nɛ waa hi jã pee wawɛɛ nitsɛ be mi nɛ nyɛ na kaa ligbi ɔ ngɛ sue ɔ.

26 Ejakaa ke wa jeɔ blɔ nɛ wa peeɔ yayami be mi nɛ wa ná anɔkuale ɔ he nile nitsɛnitsɛ ɔ se ɔ, yayamihi a he afɔle sami ko be hu, 27 mohu ɔ, nɔ́ nɛ e sa kaa waa hyɛ blɔ ji kojomi kɛ mi mi la nɛ ngɛ tsoe nɛ ngɛ gbeye ko nɛ maa sã nihi tsuo nɛ a teɔ si kɛ woɔ Mawu ɔ. 28 Nɔ fɛɛ nɔ nɛ e kuaa Mose Mlaa a, e gboɔ ngɛ nihi enyɔ loo nihi etɛ a we odase yemi nya, nɛ nɔ ko mi mi sɛ lɛ ngɛ e he. 29 Lɛɛ anɛ nyɛ susuu we kaa nɔ nɛ e naa Mawu Bi ɔ nɔ, nɛ e bu somi ɔ muɔ ɔ nɛ a kɛ ha nɛ e he tsɔ ɔ kaa nɔ́ gu ko kɛkɛ, nɛ́ e gbe dloomi mumi ɔ he guɛ kɛ wo e* mi mi la a maa sa tue gblami wawɛɛ pe jã lo? 30 Ejakaa wa le nɔ nɛ e de ke: “Ye nɔ́ ji lue yemi; ma to nane mi” ɔ. Nɛ e de hu ke: “Yehowa* maa kojo e we bi ɔmɛ.” 31 E ji gbeye nɔ́ wawɛɛ kaa nɔ ko maa nɔ Mawu hɛ kalɔ ɔ dɛ mi.

32 Se nyɛɛ ya nɔ nɛ nyɛɛ hi blema ligbi ɔmɛ, be nɛ a ha nɛ nyɛ hɛ mi tsɔ se ɔ, nɛ́ nyɛ fĩ si ngɛ nyagba nguahi kɛ amanehluhi a mi ɔ kaie. 33 Be komɛ ɔ, a ngɔɔ nyɛ kɛ baa ma hɛ mi* konɛ nyɛ hɛ mi nɛ pue si, nɛ nyɛɛ na amanehluhi hulɔ, nɛ be komɛ ɔ, nyɛɛ kɛ nihi nɛ mɛ hu a ngɛ jamɛ a ní ɔmɛ nae ɔ náa mi blɔ fa mi nɔ́. 34 Ejakaa nyɛ mi mi sã nyɛ ngɛ nihi nɛ a wo mɛ tsu ɔmɛ a he, nɛ nyɛɛ kɛ bua jɔmi kplɛɛ nyɛ níhi nɛ a ha a nɔ, akɛnɛ nyɛ le kaa nyɛ ngɛ weto ní nɛ hi pe lɔ ɔ nɛ e hiɔ si daa a he je.

35 Enɛ ɔ he ɔ, nyɛ ko sake kã* nɛ nyɛ peeɔ nɛ a maa jɔɔ nyɛ babauu ngɛ he ɔ kɛ fɔ he. 36 Ejakaa nyɛ hia si fimi bɔ nɛ pee nɛ ke nyɛ pee Mawu suɔmi nya ní ta a, nyɛ nine nɛ su si womi ɔ mi bami ɔ nɔ. 37 Ejakaa e “piɛ bɔɔ pɛ” nɛ́ “nɔ nɛ e ma a ma ba su, nɛ e be se kpɛe.” 38 “Se ye dalɔ ɔ maa hi wami mi ngɛ hemi kɛ yemi he je,” nɛ “ke e kpale e se ɔ, ye* bua be e he jɔe.” 39 Jehanɛ ɔ, wɔɔ lɛɛ pi ni nɛmɛ nɛ a kpaleɔ a se kɛ yaa hɛ mi kpatami mi ji wɔ, mohu ɔ, wa ji ni nɛmɛ nɛ a ngɛ hemi kɛ yemi kɛ ha wa wami* yi baami.

11 Hemi kɛ yemi ji nɔ́ nɛ a ngɔ hɛ kɛ fɔ nɔ nɛ a ngɛ blɔ hyɛe ɔ nɔ mi mami, níhi nɛ a ngɛ nitsɛnitsɛ nɛ a nɛ ɔmɛ a he odase nɛ ngɛ heii.* 2 Ejakaa kɛ gu lɔ ɔ nɔ ɔ, a ye blema bi ɔmɛ* a he odase.

3 Hemi kɛ yemi lɛ haa nɛ wa yɔseɔ kaa Mawu munyu ɔ nɛ a kɛ to níhi a blɔ nya ngɛ níhi a blɔ nya tomi* nɛ ɔmɛ a mi ɔ nɛ, lɔ ɔ he ɔ, nɔ́ nɛ a naa kɛ hɛ ngmɛ ɔ je nɔ́ nɛ a nɛ kɛ hɛ ngmɛ ɔ mi kɛ ba si himi mi.

4 Hemi kɛ yemi lɛ ha nɛ Habɛl sã afɔle nɛ he jua wa pe Kain nɔ́ ɔ kɛ ha Mawu ɔ nɛ, nɛ kɛ gu jamɛ a hemi kɛ yemi ɔ nɔ ɔ, a ye e he odase kaa e ji dalɔ, ejakaa Mawu kplɛɛ e nike ní ɔmɛ a nɔ,* nɛ e ngɛ mi kaa e gbo mohu lɛɛ, se loloolo ɔ, e tuɔ munyu kɛ guɔ e hemi kɛ yemi ɔ nɔ.

5 Hemi kɛ yemi lɛ ha nɛ a je Enɔk kɛ ho konɛ e ko na gbenɔ ɔ nɛ, nɛ a nɛ lɛ ngɛ he ko he ko, ejakaa Mawu je lɛ kɛ ho; ejakaa loko a ma je lɛ kɛ ho ɔ, a ye e he odase kaa e sa Mawu hɛ mi saminya. 6 Jehanɛ se hu ɔ, ke nɔ ko be hemi kɛ yemi ɔ, e be nyɛe maa sa Mawu hɛ mi saminya, ejakaa nɔ fɛɛ nɔ nɛ e hɛɛ lɛ kɛ suɔ Mawu he ɔ, e sa kaa e he ye kaa e ngɛ, nɛ e ba peeɔ nihi nɛ a ngɛ e se blɔ hlae wawɛɛ ɔmɛ a hiɔ wolɔ.

7 Hemi kɛ yemi lɛ ha nɛ benɛ Mawu bɔ Noa kɔkɔ ngɛ níhi nɛ a nɛ lolo ɔmɛ a he ɔ, e tsɔɔ kaa e yeɔ Mawu gbeye nɛ e kpɛ daka konɛ e kɛ he e we mi bimɛ ɔmɛ a yi wami ɔ nɛ; nɛ kɛ gu hemi kɛ yemi nɛ ɔ nɔ ɔ, e bu je ɔ fɔ, nɛ e ba pee dami nɛ jeɔ hemi kɛ yemi mi kɛ baa a he gbosi ní yelɔ.

8 Hemi kɛ yemi lɛ ha nɛ benɛ a tsɛ Abraham ɔ, e bu tue, nɛ e je kpo kɛ ho he ko nɛ e ma ba pee e gbosi ní ɔ ya a nɛ; e pue nɔ kɛ ho, pohu e li he nɛ e yaa a. 9 Hemi kɛ yemi lɛ ha nɛ e hi si kaa ma se no ngɛ si womi zugba a nɔ kaa bɔ nɛ a hiɔ ma se zugba nɔ ɔ nɛ, e kɛ Isak kɛ Yakɔb nɛ mɛ hu a ji si womi nɛ ɔ nɔuu he gbosi ní yeli ɔ hi bo tsuhi a mi. 10 Ejakaa e ngɛ ma a nɛ e ngɛ sisi tomihi nitsɛnitsɛ ɔ nɛ e tɛnilɔ* kɛ e polɔ ji Mawu ɔ mlɛe.

11 Hemi kɛ yemi lɛ ha nɛ Sara hu ná he wami kɛ ngɔ nina* hɔ, benɛ e be fɔmi nya po ɔ nɛ, ejakaa e bu Nɔ nɛ e wo si ɔ kaa e ji anɔkualetsɛ. 12 Enɛ ɔ he je ɔ, a je nyumu kake, nɛ e ngɛ kaa nɔ nɛ e gbo momo ɔ mi kɛ fɔ bimɛ nɛ a he hiɛ babauu kaa hiɔwe dodoehi, nɛ a ngɛ kaa wo nya zia nɛ hí kanemi ɔ nɛ.

13 Hemi kɛ yemi mi nɛ nimli nɛ ɔmɛ tsuo gbo ngɛ, e ngɛ mi kaa a nine sui si womi ɔmɛ a mi bami ɔ nɔ mohu; se a na mɛ ngɛ lokoo, nɛ a nya a he nɛ a jaje ngɛ ma hɛ mi kaa a ji nibwɔhi kɛ ma se bi ngɛ zugba a nɔ. 14 Ejakaa ni nɛmɛ nɛ a tuɔ munyu ngɛ blɔ kaa kikɛ nɛ ɔ nɔ ɔ ha nɛ e pee heii kaa a kɛ hɛdɔ ngɛ mɛ nitsɛmɛ a sihi he ko hlae. 15 Se kɛ̃ ɔ, kaa a ya nɔ nɛ a ngɛ he nɛ a je ɔ kaie ɔ, jinɛ a ko ná he blɔ nɛ a ko kpale a se. 16 Se amlɔ nɛ ɔ, a ngɛ a he mɔde bɔe konɛ a ná he ko nɛ e hi pe lɔ ɔ, nɛ ji hiɔwe nɔ́ ɔ. Enɛ ɔ he ɔ, a he pee we Mawu zo kaa a ma tsɛ lɛ ke a Mawu, ejakaa e dla ma ko kɛ to ha mɛ.

17 Hemi kɛ yemi lɛ ha nɛ benɛ a ka Abraham ɔ, e ngɛ kaa nɔ́ nɛ e ngɔ Isak kɛ ha momo ɔ nɛ—nyumu ɔ nɛ e kɛ bua jɔmi ná si womi ɔmɛ ɔ ka kaa e maa ngɔ e bi kake too ɔ kɛ ha— 18 pohu a de lɛ ke: “Nɔ nɛ a ma tsɛ lɛ ke o nina a* maa gu Isak nɔ kɛ ba.” 19 Se e susu kaa Mawu ma nyɛ ma tle lɛ si kɛ je gbeje po, nɛ e nine su e nɔ kɛ je lejɛ ɔ niinɛ kaa nɔ hyɛmi nɔ́.

20 Hemi kɛ yemi lɛ ha nɛ Isak hu jɔɔ Yakɔb kɛ Esau ngɛ níhi nɛ maa ba amɛ a he ɔ nɛ.

21 Hemi kɛ yemi lɛ ha nɛ benɛ Yakɔb miɔ nɛ e ma gbo ɔ, e jɔɔ Yosɛf binyumu ɔmɛ a ti nɔ fɛɛ nɔ, nɛ e ja Mawu be mi nɛ e kpla e dɛma tso ɔ nɔ ɔ nɛ.

22 Hemi kɛ yemi lɛ ha nɛ benɛ Yosɛf gbenɔ be* ngɛ sue ɔ, e tu Israel binyumu ɔmɛ a blɔ hiami ɔ he munyu, nɛ e ngɔ blɔ tsɔɔmihi* kɛ ha ngɛ e wu ɔmɛ a* he ɔ nɛ.

23 Hemi kɛ yemi lɛ ha nɛ Mose fɔli ɔmɛ ngɔ lɛ kɛ laa nyɔhiɔ etɛ ngɛ e fɔmi se ɔ nɛ, ejakaa a na kaa jokuɛ wayo ɔ he ngɛ fɛu, nɛ a yi matsɛ ɔ fami ɔ gbeye. 24 Hemi kɛ yemi lɛ ha nɛ benɛ Mose wa a, e kplɛɛ we nɛ a tsɛ lɛ ke Farao biyo ɔ binyumu ɔ nɛ, 25 mohu ɔ, e hla kaa e kɛ Mawu we bi ɔmɛ maa na amanehlu pe nɛ e maa ye yayami mi ngɔɔmi nɛ se kɛ we ɔ, 26 ejakaa e bu Kristo ɔ he guɛ gbemi ɔ kaa ní nami ngua pe Ijipt juetli ɔmɛ, akɛnɛ e hyɛ hiɔwo nɛ e ma ná a totooto ɔ he je. 27 Hemi kɛ yemi lɛ ha nɛ e je Ijipt ɔ nɛ, se e yi matsɛ ɔ mi mi fumi ɔ gbeye, ejakaa e ya nɔ nɛ e fĩ si kaa nɔ́ nɛ e ngɛ Nɔ nɛ a nɛ lɛ kɛ hɛ ngmɛ ɔ hyɛe. 28 Hemi kɛ yemi lɛ ha nɛ e ye He Tsɔmi ɔ nɛ e ngɔ muɔ ɔ kɛ fĩa sinya tso ɔmɛ a he ɔ nɛ, bɔ nɛ pee nɛ hɛ mi kpatalɔ ɔ nɛ ko kpata a kekleekle bi ɔmɛ a hɛ mi.*

29 Hemi kɛ yemi lɛ ha nɛ a gu Wo Tsu ɔ mi kaa nɔ́ nɛ zugba gbigbli nɔ nɛ a nyɛɛ ɔ nɛ, se benɛ Ijipt bi ɔmɛ ka kaa a maa nyɛɛ mi ɔ, wo ɔ mii mɛ.

30 Hemi kɛ yemi lɛ ha nɛ Yɛriko gbogbo ɔmɛ hule kɛ pue si benɛ ni ɔmɛ si ako kɛ bɔle gbogbo ɔmɛ si kpaago se ɔ nɛ. 31 Hemi kɛ yemi lɛ ha nɛ Rahab yaholɔ* ɔ hɛ mi kpataa we kɛ piɛɛ we ni nɛmɛ nɛ a gbo tue ɔmɛ a he ɔ nɛ, ejakaa e he slaali ɔmɛ ngɛ tue mi jɔmi mi.

32 Nɛ mɛni ma kpale de kɛ piɛɛ he? Ejakaa be be mi blɔ ngmɛe nɛ ma tu Gideon, Barak, Samsin, Yefta, David, Samuɛl kɛ gbali kpa amɛ a he munyu. 33 Kɛ gu hemi kɛ yemi nɔ ɔ, a ye matsɛ yemihi a nɔ kunimi, a ha nɛ dami je kpo heii, a nine su si womihi a nɔ, a ma jatahi a nya, 34 a gbe la he wami ɔ, a je klaate nya slɔkee, a ha nɛ a he ba wa benɛ a gbɔjɔ ɔ, a he ba wa ngɛ ta hwumi mi, a fiee tabohi nɛ a ma mɛ tuami ɔ kɛ je. 35 Yihi a nine su a nihi nɛ a gbo ɔmɛ a nɔ kɛ gu gbogboehi a si tlemi nɔ, se nyumu kpa komɛ lɛɛ a pii mɛ akɛnɛ a kplɛɛ we nɛ a gu kpɔmi nɔ́ ko nɔ kɛ ngmɛɛ a he ɔ he je, bɔ nɛ pee nɛ a nine nɛ nyɛ nɛ su gbogboehi a si tlemi nɛ e hi saminya a nɔ. 36 Ee, ni kpahi lɛɛ a ye a he fɛu nɛ a fiaa mɛ kpa kɛ ka mɛ, niinɛ, nɔ́ nɛ pe jã a, a ka mɛ kɛ gu kɔsɔkɔsɔhi kɛ tsu womihi a nɔ. 37 A fiaa mɛ tɛ, a ka mɛ, a kɛ sau poo a mi enyɔɔnyɔ,* a kɛ klaate jajaa ni komɛ, a nyɛɛ kɛ ya kɛ ba kɛ a he jijɔhi a he womi, kɛ apletsihi a he womi, be mi nɛ a ngɛ fimi mi, a ngɛ amanehlu mi, a pee mɛ nisɛ níhi; 38 nɛ je ɔ sɛ mɛ. A wo lalaalo ngɛ nga kplanaahi kɛ yokuhi a nɔ, kɛ tɛ puɔhi a mi, kɛ zugba a nɔ muɔhi a mi.

39 Se kɛ̃ ɔ, nimli nɛ ɔmɛ tsuo ɔ, e ngɛ mi kaa a ye a he odase kpakpa ngɛ a hemi kɛ yemi ɔ he je mohu lɛɛ, se a nine sui si womi ɔ mi bami ɔ nɔ, 40 ejakaa Mawu sɛ hlami nɛ e na nɔ́ kpakpa ko kɛ ha wɔ, bɔ nɛ pee nɛ a ko je wa se nɛ a ha nɛ a ye mluku.

12 Lɛɛ enɛ ɔ he ɔ, akɛnɛ wa ngɛ odasefohi babauu nitsɛnitsɛ kaa bɔku nɛ bɔle wɔ kaa kikɛ nɛ ɔ he je ɔ, nyɛ ha nɛ wɔ hu wa sake nɔ́ fɛɛ nɔ́ nɛ e jiɔ kɛ yayami ɔ nɛ e fĩɔ wɔ ngɛ blɔ nɛ e yi kulaa nɔ ɔ kɛ fɔ he, nɛ nyɛ ha nɛ waa kɛ hɛ mi miami nɛ tu fo ɔ nɛ e fɔɔ si ngɛ wa hɛ mi ɔ, 2 be mi nɛ wa hyɛɔ wa hemi kɛ yemi ɔ he Hɛ Mi Nyɛɛlɔ Kpanaa a kɛ Mluku Yelɔ ɔ, nɛ ji Yesu ɔ totooto ɔ. Ejakaa bua jɔmi nɛ a ngɔ kɛ ma e hɛ mi ɔ he je ɔ, e fĩ si ngɛ sɛumi tso* ɔ nɔ, nɛ zo pee we lɛ, nɛ e ya hi si ngɛ Mawu matsɛ sɛ ɔ hiɔ nɔ. 3 Niinɛ, nyɛ susu nɔ nɛ e fĩ si ngɛ munyu yayamihi nɛ yayami peeli tu kɛ si lɛ kɛ ye mɛ nitsɛmɛ a he awi ɔ he wawɛɛ, konɛ pɔ nɛ ko tɔ nyɛ he nɛ nyɛ kɔni mi hu nɛ ba wo nyu.

4 Ngɛ ta nɛ nyɛ ngɛ hwue kɛ ngɛ jamɛ a yayami ɔ sie ɔ mi ɔ, nyɛ hwui ta a kɛ ya sui he nɛ a ma plɛ nyɛ muɔ kɛ pue si ɔ lolo. 5 Nɛ nyɛ hɛ je he wami womi munyu nɛ a tu kɛ tsɔɔ nyɛ kaa bimɛ ɔ nɔ kulaa: “Ye bi, koo bu tsɔsemi nɛ jeɔ Yehowa* ngɔ ɔ kaa nɔ́ ko nyafii, nɛ jã kɛ̃ nɛ ke e gbla o tue ɔ, o kɔni mi nɛ ko wo nyu; 6 ejakaa ni nɛmɛ nɛ Yehowa* suɔ mɛ ɔ, mɛ lɛ e tsɔseɔ, ngɛ anɔkuale mi ɔ, e fiaa nɔ fɛɛ nɔ nɛ e ngɔɔ lɛ kɛ peeɔ e bi ɔ kpa.”*

7 E he hia nɛ nyɛ fĩ si, ejakaa lɔ ɔ piɛɛ nyɛ tsɔsemi* ɔ he. Mawu kɛ nyɛ ngɛ kaa bimɛ. Ejakaa bi te nɛɛ lɛ e tsɛ tsɔse we lɛ? 8 Se ke nyɛ tsuo nyɛ ná we tsɔsemi nɛ ɔ mi blɔ fa mi nɔ́ ɔ, lɛɛ nyɛ ji plã bimɛ se pi bimɛ nitsɛmɛ. 9 Jehanɛ se hu ɔ, jinɛ wa tsɛmɛ nɛ a ji adesahi ɔ* gblaa wa tue, nɛ wa buɔ mɛ. Anɛ e sɛ kaa waa je wa tsui mi nɛ waa ngɔ wa he kɛ wo wa mumi mi wami ɔ Tsɛ ɔ sisi po pe jã konɛ waa hi wami mi lo? 10 Ejakaa mɛɛ a gbla wa tue be kpiti ko kɛkɛ bɔ nɛ sa a hɛ mi, se lɛɛ lɛɛ e peeɔ jã konɛ e hi kɛ ha wɔ, bɔ nɛ pee nɛ wa ná e klɔuklɔu peemi ɔ mi blɔ fa mi nɔ́. 11 Ngɛ anɔkuale mi ɔ, tsɔsemi ko be nɛ amlɔ nɔuu ɔ, wa naa lɛ kaa e ji bua jɔmi nɔ́, mohu ɔ, e yeɔ* nɔ; se pee se ɔ, e woɔ tue mi jɔmi yiblii nɛ ji dami kɛ haa ni nɛmɛ nɛ a gu nɔ kɛ tsɔɔ mɛ ní ɔ.

12 Enɛ ɔ he ɔ, nyɛ ha nɛ ninehi nɛ a mi jɔ kɛ nakutsohi nɛ a mi jɔ ɔ, a mi nɛ wa, 13 nɛ nyɛɛ ya nɔ nɛ nyɛɛ hi blɔ tlɔmɔɔ pee kɛ hi nyɛ nanehi hae, konɛ nane ɔ nɛ e mi jɔ ɔ nɛ e ko kplɔ kɛ je kpɔji nya a nya, mohu ɔ, a tsa lɛ. 14 Nyɛɛ di tue mi jɔmi se ngɛ bɔ nɛ nyɛɛ kɛ nihi tsuo hiɔ si ha a mi, nɛ nyɛɛ di klɔuklɔu peemi nɛ́ ke nɔ ko je se ɔ, e be nyɛe maa na Nyɔmtsɛ ɔ hu se. 15 Nyɛɛ hyɛ nɛ hi saminya konɛ Mawu dloomi ɔ nɛ ko bɔ nɔ ko, bɔ nɛ pee nɛ sipoku duɔtsɛ ko nɛ kó ba puɛ̃ nɛ e ngɔ nyagba kɛ ba nɛ e ba ble nihi fuu; 16 nɛ nyɛɛ hyɛ nɛ hi konɛ ngɛ nyɛ kpɛti ɔ, nɔ ko nɛ e ko pee e he ajuama bɔlɔ,* aloo nɔ ko nɛ e bua jɔɛ ní klɔuklɔuhi a he kaa bɔ nɛ Esau pee ɔ, nɔ nɛ e ngɔ e blɔ nya kaa kekleekle bi ɔ kɛ tsake si kake niye ní ɔ. 17 Ejakaa nyɛ le kaa pee se benɛ e ngɛ hlae kaa a jɔɔ lɛ ɔ, a kua lɛ; ejakaa e ngɛ mi kaa e bɔ mɔde wawɛɛ kaa e maa ngɔ vo nyu kɛ tsake e juɛmi* mohu lɛɛ, se kulaa pee yaka.*

18 Ejakaa nɔ́ nɛ nyɛ ba su he ɔ, pi nɔ́ ko nɛ nyɛ ma nyɛ maa pɛtɛ he kɛ nɔ́ ko nɛ a mɛ he la, kɛ bɔku yumu ko, kɛ diblii kpii ko, kɛ kɔɔhiɔ nɛ nya wa wawɛɛ ko, 19 kɛ titimati ko pɛmi, kɛ gbi ɔ nɛ ngɛ munyuhi tue ɔ, nɔ́ nɛ benɛ ni ɔmɛ nu ɔ, a kpa pɛɛ kaa a ko de mɛ nɔ́ ko hu ɔ. 20 Ejakaa a nyɛ we nɛ a da kita nɛ ɔ nya: “Ke lohwe po he sa yoku ɔ he ɔ, e sa nɛ a fiaa lɛ tɛ.” 21 Jehanɛ se hu ɔ, nɔ́ nɛ e je kpo ɔ ngɛ gbeye hluu po kaa Mose de ke: “I ngɛ gbeye yee nɛ ye he ngɛ doe blibliibli.” 22 Se nyɛɛ lɛɛ nyɛ ba su Zion Yoku ko kɛ Mawu hɛ kalɔ ɔ e ma ko he, hiɔwe Yerusalɛm kɛ bɔfo akpe nyɔngmahi abɔ 23 a kpe ngua a, kɛ kekleekle bi ɔ asafo ɔ nɛ a ngma e biɛ ngɛ hiɔwe ɔ, kɛ Mawu nɛ ji níhi tsuo a Kojolɔ ɔ, kɛ dali nɛ a ha nɛ a ye mluku ɔmɛ a mumi mi wami ɔ, 24 kɛ Yesu nɛ ji somi ehe ɔ mi dalɔ ɔ, kɛ muɔ ɔ nɛ a fĩa nɛ e tuɔ munyu ngɛ blɔ nɛ hi pe Habɛl muɔ ɔ nɔ ɔ.

25 Nyɛɛ hyɛ nɛ hi nɛ nyɛ ko kua ke nyɛ be nɔ nɛ e ngɛ munyu tue ɔ tue bue.* Ejakaa ke ni nɛmɛ nɛ a kua ke a be nɔ nɛ e ngɔ Mawu kɔkɔ bɔmi ɔ kɛ ngɛ hae ngɛ zugba a nɔ ɔ tue bue ɔ yi a he ɔ, lɛɛ ke wɔ hu wa kpale kɛ je nɔ nɛ e tuɔ munyu kɛ jeɔ hiɔwe ɔ se ɔ, wa be wa he yee kɔkɔɔkɔ! 26 Ngɛ jamɛ a be ɔ mi ɔ, e gbi ɔ mimiɛɛ zugba a, se amlɔ nɛ ɔ lɛɛ e wo si ke: “Se si kake ekohu ɔ, ma kpale mimiɛɛ níhi, pi zugba a pɛ kɛkɛ, se hiɔwe ɔ hulɔ.” 27 Jehanɛ ɔ, munyu nɛ ji “si kake ekohu” ɔ tsɔɔ kaa a ma je níhi nɛ a mimiɛɛ ɔ, níhi nɛ a pee ɔ, konɛ níhi nɛ a mimiɛɛ we mɛ ɔ nɛ a hi si. 28 Enɛ ɔ he ɔ, akɛnɛ wa na kaa wa nine maa su Matsɛ Yemi nɛ a be nyɛe ma mimiɛɛ lɛ ɔ nɔ he je ɔ, nyɛ ha nɛ waa ya nɔ nɛ wa ná dloomi, lɔ ɔ nɔ nɛ wa maa gu nɛ waa kɛ Mawu gbeye yemi kɛ bumi nɛ mi kuɔ ma sɔmɔ Mawu ngɛ blɔ nɛ ngɛ klɔuu nɔ ɔ nɛ. 29 Ejakaa wa Mawu ɔ ji la nɛ sãa nɔ́ pɛsɛpɛsɛ.

13 Nyɛ ha nɛ nyɛ nyɛmi suɔmi ɔ nɛ ya nɔ. 2 Nyɛ hɛ nɛ ko je nibwɔ peemi nɔ,* ejakaa kɛ gu lɔ ɔ nɔ nɛ ni komɛ pee hiɔwe bɔfohi nibwɔ nɛ a li tete. 3 Nyɛ juɛmi nɛ hi nihi nɛ a wo mɛ tsu ɔ* a nɔ, kaa nɔ́ nɛ nyɛɛ kɛ mɛ lɛ a wo tsu ɔ nɛ, kɛ nihi nɛ a ngɛ mɛ nisɛ ní pee ɔ, akɛnɛ nyɛ nitsɛmɛ hu nyɛ ngɛ nɔmlɔ tso ɔ mi ɔ he je.* 4 Ha gba hɛ mi nɛ ba nyami ngɛ nihi tsuo a kpɛti, nɛ ko ha nɛ a ble gba sa a, ejakaa Mawu maa kojo ajuama bɔli* kɛ gba puɛli. 5 Nyɛ ko ha nɛ sika suɔmi nɛ hi nyɛ si himi mi, be mi nɛ níhi nɛ nyɛ ngɛ amlɔ nɛ ɔ hiɛ kɛ ha nyɛ ɔ. Ejakaa e de ke: “I be mo sie gblegbleegble, nɛ i be mo kuae gblegbleegble hulɔ.” 6 Bɔ nɛ pee nɛ wa nɔ gbagba nɛ te, nɛ wa de ke: “Yehowa* ji ye yemi kɛ bualɔ; i be gbeye yee. Mɛni adesa ma nyɛ maa pee mi?”

7 Nyɛ kai ni nɛmɛ nɛ a ngɛ hɛ mi nyɛɛe ngɛ nyɛ kpɛti ɔ, nihi nɛ a tu Mawu munyu ɔ kɛ tsɔɔ nyɛ ɔ, nɛ be mi nɛ nyɛ ngɛ nɔ́ nɛ je a je mi bami ɔ mi kɛ ba a hyɛe ɔ, nyɛɛ kase a hemi kɛ yemi ɔ.

8 Bɔ nɛ Yesu Kristo ngɛ ha hiɛ ɔ, jã nɔuu nɛ e ngɛ mwɔnɛ ɔ, nɛ e ngɛ jã kɛ yaa neneene.

9 Nyɛ ko ha nɛ tsɔɔmi slɔɔtohi kɛ tsɔɔmihi nɛ a ngɛ nyakpɛ nɛ ha nɛ nyɛɛ tla blɔ, ejakaa e maa hi saminya kaa dloomi ɔ nɛ́ e wo tsui ɔ he wami mohu pe niye ní slɔɔtohi,* níhi nɛ ni nɛmɛ nɛ a tsuɔ he ní ɔ ná we he se ko ɔ.

10 Wa ngɛ afɔle sami la tɛ ko nɛ ni nɛmɛ nɛ a sɔmɔɔ ngɛ blɔ nɛ ngɛ klɔuu nɔ ngɛ bo tsu ɔ mi ɔ be he blɔ nɛ a yeɔ nɔ ní. 11 Ejakaa a sãa lohwe ɔmɛ nɛ osɔfo nɔkɔtɔma pe kulaa a ngɔɔ a muɔ kɛ yaa he klɔuklɔu ɔ kaa yayami afɔle ɔ, a nɔmlɔ tso ɔmɛ ngɛ sito he ɔ se. 12 Enɛ ɔ he ɔ, Yesu hu na amanehlu ngɛ ma a agbo ɔ se, konɛ e ngɔ lɛ nitsɛ e muɔ ɔ kɛ ha nɛ ni ɔmɛ a he nɛ tsɔ. 13 Enɛ ɔ he ɔ, nyɛ ha nɛ waa ya e ngɔ ngɛ sito he ɔ se nɛ wa ya tloo hɛ mi si puemi ɔ nɛ e tloo ɔ, 14 ejakaa wa be ma ko nɛ maa hi si daa ngɛ hiɛ ɔ, se waa kɛ hɛdɔ ngɛ nɔ́ nɛ maa ba a hlae. 15 Nyɛ ha nɛ waa gu e nɔ kɛ sã yi jemi afɔle ha Mawu be fɛɛ be, lɔ ɔ ji yiblii nɛ wa nya woɔ nɛ e jajeɔ e biɛ ɔ ngɛ ma hɛ mi ɔ nɛ. 16 Jehanɛ se hu ɔ, nyɛ hɛ nɛ ko je kpakpa peemi kɛ níhi nɛ nyɛ ngɛ nɛ nyɛɛ kɛ ni kpahi maa dla a nɔ, ejakaa jamɛ a afɔle sami ɔmɛ saa Mawu hɛ mi saminya.

17 Nyɛɛ bu ni nɛmɛ nɛ a ngɛ hɛ mi nyɛɛe ngɛ nyɛ kpɛti ɔ tue nɛ nyɛɛ ba nyɛ he si ha mɛ, ejakaa a ngɛ nyɛ* he bue kaa ni nɛmɛ nɛ a maa bu akɔtaa, bɔ nɛ pee nɛ a pee enɛ ɔ kɛ bua jɔmi, se pi kɛ hmm hmm peemi,* ejakaa lɔ ɔ ma nyɛ maa ye nyɛ awi.

18 Nyɛɛ hi sɔlee ha wɔ, ejakaa wa ngɛ nɔ mi mami kaa wa ngɛ he nile kpakpa, akɛnɛ wa suɔ kaa wa maa ba wa je mi ngɛ anɔkuale yemi mi ngɛ nɔ́ fɛɛ nɔ́ mi ɔ he je. 19 Se i ngɛ nyɛ pɛɛ kpae wawɛɛ kaa nyɛɛ sɔle, bɔ nɛ pee nɛ a kpale ngɔ mi kɛ ha nyɛ ngɛ be kpiti mi.

20 Amlɔ nɛ ɔ, tue mi jɔmi Mawu ɔ, nɔ nɛ e ngɔ jijɔ ɔmɛ a nɔ hyɛlɔ ngua a, nɛ ji wa Nyɔmtsɛ Yesu kɛ je gbeje kɛ ba a, nɛ́ e ngɔ neneene somi ɔ muɔ ɔ 21 kɛ dla nyɛ kɛ pi si kɛ nɔ́ kpakpa fɛɛ nɔ́ kpakpa, konɛ nyɛɛ pee e suɔmi nya ní, nɛ́ e gu Yesu Kristo nɔ kɛ pee nɔ́ nɛ sa e hɛ mi saminya ngɛ wa mi. Lɛ nɛ a ngɔ hɛ mi nyami kɛ ha kɛ ya neneene kɛ neneene. Amen.

22 Jehanɛ ɔ, nyɛmimɛ, i ngɛ nyɛ pɛɛ kpae kaa nyɛɛ to nyɛ tsui si kɛ bu he wami womi munyu nɛ ɔ tue, ejakaa i ngma nyɛ sɛ womi kpiti. 23 I suɔ nɛ nyɛɛ le kaa a ngmɛɛ wa nyɛminyumu Timoteo he. Ke e ba mla a, e maa piɛɛ ye he kɛ ba na nyɛ.

24 Nyɛ de nihi tsuo nɛ a ngɛ hɛ mi nyɛɛe ngɛ nyɛ kpɛti ɔ kɛ ni klɔuklɔu ɔmɛ tsuo ke i biɔ mɛ. Ni nɛmɛ nɛ a ngɛ Italia a ke a biɔ nyɛ.

25 Dloomi ɔ kɛ nyɛ tsuo nɛ hi si.