PETRO WOMI ENYƆNE Ɔ

1 Simon Petro, Yesu Kristo nyɔguɛ kɛ e bɔfo, kɛ ya ha ni nɛmɛ nɛ a ná hemi kɛ yemi nɛ he jua wa kaa wa nɔ́* ɔ kɛ gu wa Mawu ɔ dami ɔ kɛ Yi Wami Helɔ Yesu Kristo nɔ ɔ:

2 Dloomi kɛ tue mi jɔmi nɛ hiɛ kɛ ha nyɛ kɛ gu Mawu kɛ Yesu nɛ ji wa Nyɔmtsɛ ɔ he nile nitsɛnitsɛ ɔ nɔ, 3 ejakaa e Mawu he wami ɔ ngɔ níhi tsuo nɛ yeɔ bua wami kɛ Mawu jami kɛ ha wɔ* kɛ gu Nɔ nɛ e tsɛ wɔ ɔ he nile nitsɛnitsɛ ɔ nɔ ngɛ lɛ nitsɛ e hɛ mi nyami kɛ e su ɔ mi. 4 Kɛ gu ní nɛ ɔmɛ a nɔ ɔ, e ngɔ si womi nguanguahi nɛ a he jua wa kɛ ha wɔ,* konɛ kɛ gu ní nɛ ɔmɛ a nɔ ɔ, nyɛ ba pee nihi nɛ a ma ná Mawu su ɔ mi blɔ fa mi nɔ́, ejakaa nyɛ tu je ɔ puɛmi ɔ nɛ akɔnɔ yayami ngɔɔ kɛ baa a nya fo.

5 Enɛ ɔ tutuutu he je ɔ, nyɛɛ bɔ mɔde wawɛɛ nitsɛ nɛ nyɛɛ ngɔ su kpakpa kɛ piɛɛ nyɛ hemi kɛ yemi ɔ he, nɛ nyɛɛ ngɔ nile kɛ piɛɛ nyɛ su kpakpa a he, 6 nyɛɛ ngɔ he nɔ yemi kɛ piɛɛ nyɛ nile ɔ he, nyɛɛ ngɔ si fimi kɛ piɛɛ nyɛ he nɔ yemi ɔ he, nyɛɛ ngɔ Mawu jami kɛ piɛɛ nyɛ si fimi ɔ he, 7 nyɛɛ ngɔ nyɛmimɛ a sane suɔmi kɛ piɛɛ nyɛ Mawu jami ɔ he, nyɛɛ ngɔ suɔmi kɛ piɛɛ nyɛ nyɛmimɛ a sane suɔmi ɔ he. 8 Ejakaa ke ní nɛ ɔmɛ ngɛ nyɛ mi nɛ a hiɛ kɛ be nɔ ɔ, a be hae nɛ nyɛɛ pee nihi nɛ a tsu we ní aloo nihi nɛ a wui yiblii ngɛ wa Nyɔmtsɛ Yesu Kristo he nile nitsɛnitsɛ ɔ blɔ fa mi.

9 Ejakaa ke ní nɛ ɔmɛ be nɔ ko mi ɔ, jamɛatsɛ ɔ hɛ ngmɛ yu nɛ e ma e hɛ ngmɛ kɛ wo la a,* e ba pee nɔ nɛ e hɛ je nɔ kaa a fɔ e blema lokoo yayami ɔmɛ ngɛ e he. 10 Lɔ ɔ he ɔ, nyɛmimɛ, nyɛɛ bɔ mɔde wawɛɛ nitsɛ pe kekle ɔ konɛ nyɛ nitsɛmɛ nyɛ ná nyɛ tsɛmi ɔ kɛ nyɛ hlami ɔ nɔ mi mami nɛ pi si, ejakaa ke nyɛ yaa nɔ nɛ nyɛ peeɔ ní nɛ ɔmɛ ɔ, nyɛ be si gbee kɔkɔɔkɔ. 11 Ngɛ anɔkuale mi ɔ, blɔ nɛ ɔ nɔ nɛ a maa gu kɛ ha nyɛ he blɔ babauu nitsɛ kɛ sɛ wa Nyɔmtsɛ kɛ Yi Wami Helɔ Yesu Kristo neneene Matsɛ Yemi ɔ mi ɔ nɛ.

12 Enɛ ɔ he je ɔ, i toɔ ye yi mi kaa be fɛɛ be ɔ, ma kai nyɛ ní nɛ ɔmɛ, e ngɛ mi kaa nyɛ le mɛ nɛ nyɛ nane pi si ngɛ anɔkuale ɔ nɛ a ngɔ kɛ ha nyɛ ɔ mi mohu. 13 Se i susu kaa e da blɔ kaa be abɔ nɛ i ngɛ bo tsu nɛ ɔ* mi ɔ, ma ngɔ kaimihi kɛ wo nyɛ he wami, 14 ejakaa i le kaa e be kɛe nɛ a ma je ye bo tsu ɔ, kaa bɔ nɛ wa Nyɔmtsɛ Yesu Kristo hu ha nɛ e mi tɛ̃ kɛ ha mi ɔ. 15 Be fɛɛ be ɔ, ma bɔ mɔde wawɛɛ nitsɛ konɛ ke i je ɔ, nyɛ nitsɛmɛ nyɛ nyɛ nɛ nyɛ kai ní nɛ ɔmɛ.*

16 Ohoo, pi nyaziahi nɛ a gu ga blɔ nɔ kɛ sia a nɔ nɛ wa gu kɛ ha nɛ nyɛ le wa Nyɔmtsɛ Yesu Kristo he wami ɔ kɛ e bami ɔ, mohu ɔ, wa na e we agbo jemi ɔ kɛ wa hɛ ngmɛ. 17 Ejakaa e nine su bumi kɛ hɛ mi nyami nɔ kɛ je Mawu nɛ ji Tsɛ ɔ ngɔ benɛ gbi nɛ ɔ pɛ ngɛ hɛ mi nyami kpetekpleenyɛ ɔ mi kɛ tsɔɔ lɛ ɔ: “Ye Bi nɛ i suɔ lɛ, nɛ imi nitsɛ ye bua jɔ e he ji nɛ ɔ nɛ.” 18 Ee, wa nu munyu nɛ ɔmɛ kɛ je hiɔwe be mi nɛ waa kɛ lɛ ngɛ yoku klɔuklɔu ɔ nɔ ɔ.

19 Lɔ ɔ he ɔ, a ma gbami munyu ɔ nɔ mi kɛ ha wɔ wawɛɛ nitsɛ pe kekle ɔ, nɛ nyɛ ngɛ mɔde bɔe kaa nyɛ ngɔ nyɛ juɛmi kɛ ngɛ nɔ mae kaa kane nɛ ngɛ kpɛe ngɛ he nɛ diblii wo ngɛ (kɛ ya siɔ makɛ be nɛ nɔkɔ teɔ si) ngɛ nyɛ tsui mi. 20 Ejakaa nyɛ le enɛ ɔ kekle kaa Ngmami ɔ mi gbami ko ji nɔ ko nitsɛ e níhi a sisi tsɔɔmi mi kɛ bɛ hyɛ. 21 Ejakaa gbami ko bɛ hyɛ ngɛ adesa ko suɔmi nya, mohu ɔ, mumi klɔuklɔu lɛ e kudɔ* adesahi nɛ a tu munyu kɛ je Mawu ngɔ.

2 Se lakpa gbali hu ba ni ɔmɛ a kpɛti kaa bɔ nɛ lakpa tsɔɔli hu maa ba nyɛ kpɛti ɔ. Nimli nɛ ɔmɛ maa ju si nɛ a maa ngɔ hɛ mi kpatami kuuhi kɛ ba nyɛ kpɛti, nɛ a ma kua nɔtsɛ ɔ nɛ e he mɛ ɔ po, nɛ a maa ngɔ hɛ mi kpatami kɛ ba mɛ nitsɛmɛ a nɔ mla. 2 Jehanɛ se hu ɔ, nihi fuu maa nyɛɛ a nɔ buimi ngmlikiti* ɔ se, nɛ a he ɔ, nihi maa tu anɔkuale blɔ ɔ he munyu yayami. 3 Jehanɛ se hu ɔ, a kɛ hɛ tsumi maa sisi nyɛ kɛ abisinia munyuhi. Se kojomi nɛ a maa kojo mɛ nɛ a ma nya si blema lokoo ɔ, pi nɛ e ma blɛuu, nɛ a hɛ mi kpatami ɔ hu pi nɛ e ngɛ mahe hwɔe.

4 Niinɛ, Mawu ngɔɛ hiɔwe bɔfo ɔmɛ nɛ a pee yayami ɔmɛ a he kɛ ki mɛ, se mohu e sake mɛ ngɔ wo Tatarɔs* mi, e ngɔ mɛ kɛ wo diblii kpii kɔsɔkɔsɔhi* a mi ngɔ to kɛ ha kojomi. 5 Nɛ e ngɔɛ blema je ko he kɛ ki lɛ, mohu ɔ, benɛ e ngɔ nyu kpekpemi ko kɛ ba nihi nɛ a yi Mawu gbeye a je ko nɔ ɔ, e baa Noa nɛ ji dami fiɛɛlɔ ɔ kɛ ni kpaago kpa komɛ a yi. 6 Nɛ kɛ gu Sodom kɛ Gomora ma amɛ nɛ e ha nɛ a pee la zu ɔ nɔ ɔ, e bu mɛ fɔ, nɛ e kɛ lɔ ɔ pee níhi nɛ maa ba a he nɔ hyɛmi nɔ́ kɛ ha nihi nɛ a yi Mawu gbeye ɔ. 7 Nɛ e kpɔ̃ dalɔ Lɔt, nɔ nɛ nihi nɛ a yi mlaa nɔ ɔmɛ a nɔ buimi ngmlikiti* ɔ ha nɛ e ye tsui wawɛɛ ɔ— 8 ejakaa daa ligbi ɔ, dalɔ nɛ ɔ ngɛ e susuma* nɛ e da a piie ngɛ mlaa nɔ nɛ a yi ní peepeehi nɛ e na nɛ e nu be mi nɛ e ngɛ a kpɛti ɔ he. 9 Lɔ ɔ he ɔ, Yehowa* le bɔ nɛ e peeɔ kɛ kpɔ̃ɔ nihi nɛ a jaa Mawu ɔ kɛ jeɔ ka mi ha, se e le bɔ nɛ e ngɔɔ nihi nɛ a dɛ ɔ kɛ toɔ konɛ e kpata a hɛ mi* ngɛ kojomi ligbi ɔ nɔ ha, 10 titli ɔ, ni nɛmɛ nɛ a hlaa kaa a ma ble ni kpahi a he lo nɛ a bui blɔ nya a.*

Nihi nɛ a yi nɔ́ ko gbeye nɛ a peeɔ a tsui nya ní, nɛ a yi gbeye kaa a maa tu nihi nɛ a hɛ mi ngɛ nyami ɔmɛ a he munyu yayami, 11 be mi nɛ hiɔwe bɔfohi nɛ e ngɛ mi kaa a ngɛ nyɛmi kɛ he wami babauu ɔ po kɛ jɛmi munyu pui a nya, ngɛ bumi nɛ a ngɛ kɛ ha Yehowa* a he je.* 12 Se nimli nɛ ɔmɛ nɛ a ngɛ kaa lohwehi nɛ a susuu we nɔ́ he nɛ he numi nɔ lɛ a daa kɛ peeɔ a níhi, nɛ́ a fɔ mɛ konɛ a nuu mɛ nɛ a kpata a hɛ mi ɔ, a tuɔ níhi nɛ a li he nɔ́ ko ɔ a he munyu yayami. Mɛ nitsɛmɛ a hɛ mi kpatami blɔ ɔ maa ngɔ hɛ mi kpatami kɛ ba a nɔ, 13 nɛ hiɔwo nɛ a ma ná ngɛ mɛ nitsɛmɛ a blɔ yayami ɔmɛ a he ɔ ji nɔ́ nami.

A buɔ lɛ kaa e ji bua jɔmi nɔ́ kaa a kɛ a he maa wo ngɔɔmi yemi mi piani katakata po. Mutsɛmɛ kɛ nihi nɛ a he ngɛ tai nɛ a ngɔɔ a he kɛ woɔ a nɔ sisimi tsɔɔmi ɔmɛ a mi vii kɛ bua jɔmi, be mi nɛ a kɛ nyɛ bla kɛ ngɛ ní yee ɔ. 14 A hɛ ngmɛ hyi tɔ kɛ gba puɛmi nɛ a nyɛ we nɛ a jeɔ a he kɛ jeɔ yayami he, nɛ a sisiɔ nihi* nɛ́ a yi mi peeɔ mɛ enyɔɔnyɔ ɔ. Tsui nɛ a tsɔse lɛ ngɛ hɛkɔ mi lɛ ngɛ a mi. A ji bimɛ nɛ a gbiɛ mɛ. 15 A je blɔ tlɔmɔɔ ɔ nɔ, a ha nɛ a tla blɔ. A ya nyɛɛ Beyɔ binyumu Baalam blɔ ɔ nɔ, nɔ nɛ e suɔ yayami peemi he hiɔwo ɔ, 16 se a kã e hɛ mi ngɛ nɔ́ nɛ da nɛ lɛ nitsɛ e pee we ɔ he je. Lohwe nɛ e tu we munyu nɛ a tlooɔ lɛ tlomi ɔ ngɔ adesa gbi kɛ tu munyu kɛ tsi godo blɔ nɛ gbalɔ ɔ hia a nya.

17 Nimli nɛ ɔmɛ ji nyu hɛ ngmɛhi nɛ nyu be a mi kɛ afua nɛ kɔɔhiɔ nɛ nya wa kudɔɔ lɛ, nɛ a dla diblii nɛ mi ti pe kulaa ngɔ to kɛ ha mɛ. 18 A tuɔ munyu nguanguahi nɛ se nami ko be a he. Kɛ gu he lo ɔ we akɔnɔhi a nya níhi nɛ a peeɔ kɛ nɔ buimi ngmlikiti* ní peepeehi a nɔ ɔ, a sisiɔ nihi nɛ piɔ pɛ nɛ a tu fo kɛ je ni nɛmɛ nɛ a ngɛ yayami mi ɔmɛ a he ɔ. 19 Be mi nɛ a ngɛ mɛ si woe kaa a ma ha nɛ a ye a he ɔ, mɛ nitsɛmɛ lɛɛ a ji puɛmi nyɔguɛhi; ejakaa ke nɔ ko ye nɔ ko nɔ ɔ, nɔ nɛ a ye e nɔ ɔ ba peeɔ nyɔguɛ kɛ haa lɛ.* 20 Ngɛ anɔkuale mi ɔ, ke be mi nɛ a tu fo kɛ je je ɔ mi níhi nɛ a bleɔ nɔ ɔmɛ a he kɛ gu Nyɔmtsɛ ɔ kɛ Yi Wami Helɔ Yesu Kristo he nile nitsɛnitsɛ ɔ nɔ ɔ se, nɛ a kpale ngɔ a he kɛ ya wo jamɛ a ní ɔmɛ nɔuu a mi nɛ jamɛ a ní ɔmɛ ye a nɔ ɔ, a nyagbe si himi ɔ ba puɛɔ kulaa pe kekle ɔ. 21 Afani nɛ a ba li dami blɔ ɔ saminya pe nɛ be mi nɛ a ba le se ɔ, a ma plɛ a se ngɔ wo kita klɔuklɔu ɔ nɛ a nine su nɔ ɔ. 22 Nɔ́ nɛ anɔkuale abɛ ɔ de ɔ ba mi ngɛ a blɔ fa mi: “Gbe ɔ kpale kɛ ho lɛ nitsɛ e vie ɔ he ya, nɛ kpotoo ɔ nɛ a du ha lɛ ɔ ya ngɛ si wuwluae ngɛ mɔsɔ ɔ mi.”

3 Nihi nɛ i suɔ, enɛ ɔ ji sɛ womi enyɔne nɛ i ngɛ nyɛ ngmae, nɛ kaa bɔ nɛ e ji ngɛ kekle nɔ́ ɔ mi ɔ, i ngɛ nyɛ juɛmi nɛ nyɛɛ kɛ susuɔ níhi a he heii ɔ tsɛ̃ɛ̃e kɛ gu kaimi nɔ, 2 kaa e sa nɛ nyɛ kai munyuhi nɛ a gu gbali klɔuklɔu ɔmɛ a nɔ kɛ tu be ko nɛ be* ɔ, kɛ Nyɔmtsɛ ɔ nɛ ji Yi Wami Helɔ ɔ kita a nɛ e kɛ ha kɛ gu nyɛ bɔfo ɔmɛ a nɔ ɔ. 3 Kekleekle ɔ, nyɛɛ le enɛ ɔ, kaa ngɛ nyagbe ligbi ɔmɛ a mi ɔ, he fɛu yeli maa ba kɛ a nɔ he fɛu yemi, nɛ a maa pee níhi ngɛ mɛ nitsɛmɛ a we akɔnɔhi a nya, 4 nɛ a maa hi dee ke: “Jije e bami ɔ he si womi nɛ ɔ ngɛ? Hyɛ, kɛ je ligbi ɔ nɛ wa nɛmɛ ɔmɛ nɔ gbenɔ mahe mi ɔ, níhi tsuo ngɛ nɔ yae kaa bɔ nɛ a ngɛ kɛ je adebɔ sisije ɔ pɛpɛɛpɛ.”

5 Ejakaa a je blɔ nɛ a ma a hɛ ngɔ fɔ anɔkuale nɛ ɔ nɔ, kaa kɛ je blema lokoo ɔ, kɛ gu Mawu munyu ɔ nɔ ɔ, hiɔwe ɔ ngɛ, nɛ zugba je kpo ngɛ nyu mi kɛ ba ma si kpɛii, nɛ e ngɛ nyu kpɛti; 6 nɛ kɛ gu jamɛ a blɔ ɔmɛ a nɔ ɔ, je ɔ nɛ ngɛ jamɛ a be ɔ mi ɔ hɛ mi kpata benɛ nyu kpekpemi ba ha nɔ ɔ. 7 Se kɛ gu jamɛ a munyu ɔ nɔuu nɔ ɔ, a ngɔ hiɔwe kɛ zugba nɛ ngɛ amlɔ nɛ ɔ kɛ to kɛ ha la, nɛ a ngɔ mɛ kɛ to kɛ yaa si kojomi ligbi ɔ kɛ nimli nɛ a yi Mawu gbeye ɔmɛ a hɛ mi kpatami ligbi ɔ.

8 Se kɛ̃ ɔ, nihi nɛ i suɔ, nyɛ hɛ nɛ ko je nɔ́ nɛ ɔ nɔ, kaa ngɛ Yehowa* hɛ mi ɔ, ligbi kake ngɛ kaa jeha akpe, nɛ jeha akpe ngɛ kaa ligbi kake. 9 Pi nɛ Yehowa* ngɛ e nane si gblae ngɛ e si womi ɔ he kaa bɔ nɛ ni komɛ susuɔ ngɛ nane si gblami he ɔ, se e ngɛ e tsui si toe ha nyɛ, ejakaa e sume nɛ a kpata nɔ ko nɔ ko hɛ mi, mohu ɔ, e suɔ kaa nihi tsuo nɛ a tsake a tsui. 10 Se Yehowa* ligbi ɔ maa ba kaa bɔ nɛ julɔ baa a, lɔ ɔ mi nɛ hiɔwe ɔ kɛ huãmi* maa be kɛ ho, se sisije ní ɔmɛ nɛ a dɔ la wawɛɛ ɔ ma fɔ*, nɛ a ma je zugba a kɛ e mi ní tsumi ɔmɛ kpo.

11 Akɛnɛ ní nɛ ɔmɛ tsuo ma fɔ* ngɛ blɔ nɛ ɔ nɔ he je ɔ, nyɛ susu nimli tutuutu nɛ e sa kaa nyɛ ji ngɛ je mi bami klɔuklɔu ní peepeehi kɛ Mawu jami mi ní peepeehi a mi ɔ he, 12 be mi nɛ nyɛ ngɛ Yehowa* ligbi ɔ bami ɔ mlɛe nɛ́ nyɛ juɛmi ngɛ nɔ* wawɛɛ ɔ, lɔ ɔ nɔ nɛ a maa gu kɛ kpata hiɔwe ɔ hɛ mi ngɛ la nɛ e ngɛ tsoe gegeege mi, nɛ sisije ní ɔmɛ maa sile ngɛ la dɔmi nɛ nya wa mi! 13 Se ngɛ e si womi ɔ nya a, wa ngɛ hiɔwe ehe kɛ zugba ehe ko blɔ hyɛe, nɛ lɔ ɔmɛ a mi nɛ dami maa hi.

14 Enɛ ɔ he ɔ, nihi nɛ i suɔ, akɛnɛ wa ngɛ ní nɛ ɔmɛ mlɛe he je ɔ, nyɛɛ bɔ mɔde wawɛɛ konɛ nyagbenyagbe ɔ, e ba na nyɛ kaa nihi nɛ mu kɛ piami ko be a he ngɛ tue mi jɔmi mi. 15 Jehanɛ se hu ɔ, nyɛɛ bu wa Nyɔmtsɛ ɔ tsui si tomi ɔ kaa yi wami hemi, kaa bɔ nɛ wa nyɛminyumu Paulo, nɛ wa suɔ lɛ ɔ hu ngma nyɛ ngɛ juɛmi nɛ a ngɔ kɛ ha lɛ ɔ nya, 16 nɛ e tuɔ ní nɛ ɔmɛ a he munyu kaa bɔ nɛ e peeɔ ngɛ e sɛ womi ɔmɛ tsuo a mi ɔ. Se a mi munyu ɔmɛ ekomɛ a sisi numi yee, nɛ nihi nɛ a li nɔ́ ko* nɛ a yi mi peeɔ mɛ enyɔɔnyɔ ɔ ngɛ ní nɛ ɔmɛ kpɛ̃e, kaa bɔ nɛ a peeɔ ngɛ Ngmami ɔ mi ní kpahi hu a he, kɛ ha mɛ nitsɛmɛ a hɛ mi kpatami ɔ.

17 Enɛ ɔ he ɔ, nyɛ nihi nɛ i suɔ, akɛnɛ nyɛ ná nile nɛ ɔ momo he je ɔ, nyɛɛ hyɛ nyɛ he nɛ hi konɛ a ko gu nihi nɛ a yi mlaa nɔ ɔmɛ a tɔmi ɔ nɔ nɛ a ha nɛ nyɛɛ kɛ mɛ nɛ tla blɔ nɛ nyɛ ba je nyɛ nitsɛmɛ nyɛ si dami gbugbuugbu* ɔ mi kɛ nɔ si. 18 Ohoo, mohu ɔ, nyɛɛ ya nɔ nɛ nyɛɛ hi wae ngɛ wa Nyɔmtsɛ ɔ nɛ ji Yi Wami Helɔ Yesu Kristo he nile ɔ mi. A ngɔ hɛ mi nyami kɛ ha lɛ amlɔ nɛ ɔ kɛ yaa si ligbi ɔ nɛ be nyagbe ɔ tsuo. Amen.