YOHANE KEKLEEKLE WOMI Ɔ

1 Nɔ́ nɛ ngɛ kɛ je sisije ɔ, nɛ wa nu, nɛ wa na kɛ wa hɛ ngmɛ, nɛ wa yɔse nɛ waa kɛ wa nine pɛtɛ he, nɛ kɔɔ wami munyu ɔ he 2 (ee, a je wami ɔ kpo, nɛ wa na nɛ wa ngɛ he odase yee, nɛ wa ngɛ nyɛ neneene wami ɔ nɛ jinɛ e kɛ Tsɛ ɔ ngɛ nɛ́ a je lɛ kpo ngɔ tsɔɔ wɔ ɔ he amaniɛ bɔe), 3 nɛ́ wa na nɛ wa nu ɔ he amaniɛ nɛ wa ngɛ nyɛ bɔe ɔ nɛ, konɛ nyɛ hu nyɛɛ kɛ wɔ nɛ ba bɔ huɛ.* Nɛ huɛ bɔmi nɛ ɔ, waa kɛ Tsɛ ɔ kɛ e Bi Yesu Kristo lɛ bɔɔ. 4 Nɛ wa ngɛ ní nɛ ɔmɛ ngmae konɛ wa bua jɔmi ɔ nɛ pi si.

5 Sɛ gbi nɛ wa nu kɛ je e ngɔ nɛ wa ngɛ nyɛ he amaniɛ bɔe ɔ ji nɛ ɔ nɛ: Mawu ji la, nɛ diblii ko kulaa be e mi.* 6 Ke wa de ke, “Waa kɛ lɛ ngɛ huɛ bɔe,” se kɛ̃ ɔ, wa yaa nɔ nɛ wa nyɛɛɔ ngɛ diblii mi ɔ, wa ngɛ lakpa yee nɛ waa kɛ anɔkuale ɔ tsu we ní. 7 Se ke wa ngɛ nyɛɛe ngɛ la a mi kaa bɔ nɛ lɛ nitsɛ hu e ngɛ la a mi ɔ, lɛɛ huɛ bɔmi ngɛ waa kɛ wa sibi wa kpɛti, nɛ e Bi Yesu muɔ ɔ tsuɔ wa he kɛ jeɔ yayamihi tsuo a he.

8 Ke wa de ke, “Yayami be wa he” ɔ, wɔ nitsɛmɛ wa he nɛ wa ngɛ sisie, nɛ anɔkuale ɔ be wa mi. 9 Ke wa jajeɔ wa he yayami ɔmɛ ɔ, e ji anɔkualetsɛ kɛ dalɔ nɛ e kɛ wa he yayami ɔmɛ maa pa wɔ, nɛ e maa tsu wa he kɛ je níhi nɛ dɛ tsuo a he. 10 Ke wa de ke, “Wa pee we yayami” ɔ, lɛɛ wa ngɛ tsɔɔe kaa lakpatsɛ ji lɛ, nɛ e munyu ɔ be wa mi.

2 Ye bimɛ tsɔwi, i ngɛ nyɛ ní nɛ ɔmɛ ngmae konɛ nyɛ ko pee yayami ko. Se kɛ̃ ɔ, ke nɔ ko pee yayami ko po ɔ, wa ngɛ yemi kɛ bualɔ* ko ngɛ Tsɛ ɔ ngɔ, lɛ ji Yesu Kristo, dalɔ ɔ nɛ. 2 Nɛ lɛ ji kpatami afɔle* kɛ ha wa he yayami ɔmɛ, se kɛ̃ ɔ, pi kɛ ha wɔ pɛ, mohu ɔ, kɛ ha je ɔ tsuo hulɔ. 3 Ke wa yaa nɔ nɛ wa yeɔ e kita amɛ a nɔ ɔ, lɔ ɔ lɛ haa nɛ wa yɔseɔ kaa wa ba le lɛ ɔ nɛ. 4 Nɔ nɛ e deɔ ke, “I ba le lɛ,” se kɛ̃ ɔ, e yi e kita amɛ a nɔ ɔ, e ji lakpatsɛ, nɛ anɔkuale ɔ be nɔmlɔ nɛ ɔ mi. 5 Se nɔ fɛɛ nɔ nɛ e yeɔ e munyu ɔ nɔ ɔ, ngɛ anɔkuale mi ɔ, suɔmi nɛ jamɛatsɛ ɔ ngɛ kɛ ha Mawu ɔ pi si. Kɛ gu enɛ ɔ nɔ ɔ, wa leɔ kaa waa kɛ lɛ pee kake. 6 Nɔ nɛ e deɔ ke kake peemi ngɛ e kɛ lɛ a kpɛti ɔ, e ji e blɔ nya ní tsumi kaa e maa ya nɔ maa nyɛɛ kaa bɔ nɛ jamɛ a nɔ ɔ nyɛɛ ɔ.

7 Nihi nɛ i suɔ, pi kita ehe ko nɛ i ngɛ nyɛ ngmae, mohu ɔ, kita momo nɛ nyɛ nine su nɔ kɛ je sisije ɔ. Kita momo nɛ ɔ ji munyu nɛ nyɛ nu ɔ nɛ. 8 Jehanɛ hu ɔ, i ngɛ nyɛ kita ehe ko ngmae, nɛ ngɛ e blɔ fa mi kɛ nyɛ hu nyɛ blɔ fa mi ɔ, e ji anɔkuale, ejakaa diblii ɔ ngɛ bee kɛ yaa, nɛ anɔkuale la a ngɛ kpɛe momo.

9 Nɔ nɛ e deɔ ke e ngɛ la a mi, se kɛ̃ ɔ, e nyɛɔ e nyɛmi ɔ, e ngɛ diblii ɔ mi loloolo. 10 Nɔ nɛ e suɔ e nyɛmi ɔ, e hiɔ la a mi, nɛ nane tɔ̃tɔ̃mi nɔ́ ko be e mi. 11 Se nɔ nɛ e nyɛɔ e nyɛmi ɔ, e ngɛ diblii ɔ mi, nɛ e ngɛ nyɛɛe ngɛ diblii ɔ mi, nɛ e li he nɛ e yaa, ejakaa diblii ɔ yu e hɛ ngmɛ.

12 Bimɛ tsɔwi, i ngɛ nyɛ ngmae, ejakaa e biɛ ɔ he ɔ, a ngɔ nyɛ he yayami ɔmɛ kɛ pa nyɛ. 13 Tsɛmɛ, i ngɛ nyɛ ngmae, ejakaa nyɛ ba le nɔ nɛ e ngɛ kɛ je sisije ɔ. Nihewi, i ngɛ nyɛ ngmae, ejakaa nyɛ ye nɔ yayami ɔ nɔ kunimi. Bimɛ tsɔwi, i ngɛ nyɛ ngmae, ejakaa nyɛ ba le Tsɛ ɔ. 14 Tsɛmɛ, i ngɛ nyɛ ngmae, ejakaa nyɛ ba le nɔ nɛ e ngɛ kɛ je sisije ɔ. Nihewi, i ngɛ nyɛ ngmae, ejakaa nyɛ he wa, nɛ Mawu munyu ɔ ngɛ nyɛ mi, nɛ nyɛ ye nɔ yayami ɔ nɔ kunimi.

15 Nyɛ ko suɔ je ɔ aloo níhi nɛ ngɛ je ɔ mi ɔ. Ke nɔ ko suɔ je ɔ, Tsɛ ɔ suɔmi ɔ be e mi; 16 ejakaa nɔ́ fɛɛ nɔ́ nɛ ngɛ je ɔ mi ɔ—níhi nɛ peeɔ he lo ɔ akɔnɔ kɛ níhi nɛ peeɔ hɛ ngmɛ ɔ akɔnɔ kɛ níhi nɛ nɔ ko ngɛ nɛ e kɛ fĩaa—pi Tsɛ ɔ ngɔ nɛ e je, mohu ɔ, je ɔ mi e je. 17 Jehanɛ se hu ɔ, je ɔ ngɛ bee kɛ yaa, nɛ jã kɛ̃ nɛ e mi níhi nɛ peeɔ nɔ akɔnɔ ɔ hu ngɛ bee kɛ yaa, se nɔ nɛ e peeɔ Mawu suɔmi nya ní ɔ maa hi si kɛ maa ya neneene.

18 Bimɛ tsɔwi, nyagbe ngmlɛfia a ji nɛ ɔ nɛ, nɛ kaa bɔ nɛ nyɛ nu kaa antikristo ɔ ma a, amlɔ nɛ ɔ po ɔ, antikristohi babauu je a he kpo, nɛ anɔkuale nɛ ɔ ha nɛ wa le kaa nyagbe ngmlɛfia a ji nɛ ɔ nɛ. 19 A je wa kpɛti kɛ ho, se kɛ̃ ɔ, pi wa we bi ji mɛ;* ejakaa kaa wa we bi ji mɛ ɔ, jinɛ a kɛ wɔ ko hi si. Se a je kpo konɛ e pee heii kaa pi nihi tsuo ji wa we bi. 20 Nyɛɛ lɛɛ nɔ klɔuklɔu ɔ pɔ nyɛ nu, nɛ nyɛ tsuo nyɛ le. 21 Pi kaa nyɛ li anɔkuale ɔ he je nɛ i ngɛ nyɛ ngmae ɔ, mohu ɔ, akɛnɛ nyɛ le, nɛ́ lakpa ko ji anɔkuale ɔ mi ɔ he je.

22 Anɛ pi nɔ nɛ e kplɛɛ we nɔ kaa Yesu ji Kristo ɔ ji lakpatsɛ ɔ lo? Antikristo ɔ ji nɔ nɛ e kuaa Tsɛ ɔ kɛ Bi ɔ nɛ. 23 Nɔ fɛɛ nɔ nɛ e kuaa Bi ɔ, e be Tsɛ ɔ hulɔ. Se nɔ fɛɛ nɔ nɛ e heɔ Bi ɔ atuu ɔ, e ngɛ Tsɛ ɔ hulɔ. 24 Nyɛɛ lɛɛ, e sa nɛ níhi nɛ nyɛ nu kɛ je sisije ɔ nɛ hi nyɛ mi. Ke níhi nɛ nyɛ nu kɛ je sisije ɔ ngɛ nyɛ mi ɔ, nyɛɛ kɛ Bi ɔ maa pee kake, nɛ nyɛɛ kɛ Tsɛ ɔ hu maa pee kake. 25 Jehanɛ se hu ɔ, nɔ́ nɛ lɛ nitsɛ e wo wɔ he si ɔ ji nɛ ɔ nɛ—wami nɛ ngɛ kɛ yaa neneene ɔ.

26 Nihi nɛ a ngɛ mɔde bɔe kaa a maa sisi nyɛ ɔmɛ a he je nɛ i ngɛ nyɛ ní nɛ ɔmɛ ngmae ɔ nɛ. 27 Nɛ nyɛɛ lɛɛ, nu nɛ e pɔ nyɛ ɔ ngɛ nyɛ mi, nɛ nyɛ hia we nɔ ko nɛ e hi nyɛ ní tsɔɔe; mohu ɔ, nu nɛ e pɔ nyɛ ɔ ngɛ nyɛ níhi tsuo tsɔɔe, nɛ e ji anɔkuale nɛ tsa pi lakpa. Kaa bɔ nɛ e* tsɔɔ nyɛ ɔ, nyɛɛ kɛ lɛ* nɛ pee kake. 28 Enɛ ɔ he ɔ, bimɛ tsɔwi, nyɛɛ ya nɔ nɛ nyɛɛ kɛ lɛ nɛ pee kake nɛ́ ke a je lɛ kpo ɔ, wa nyɛ nɛ waa tu munyu faa konɛ ke e ba a, waa kɛ zo nɛ ko yu wa he ngɛ e he. 29 Ke nyɛ le kaa dalɔ ji lɛ ɔ, nyɛ ná nɛ nyɛɛ le hu kaa nɔ fɛɛ nɔ nɛ peeɔ nɔ́ nɛ da a, a fɔ lɛ kɛ je e mi.

3 Nyɛɛ hyɛ suɔmi sɔuu nɛ Tsɛ ɔ ngɛ kɛ ha wɔ, kaa a ma tsɛ wɔ ke Mawu bimɛ! Nɛ jã nɛ wa ji. Enɛ ɔ he je nɛ je ɔ li wɔ ɔ nɛ, ejakaa je ɔ li lɛ. 2 Nihi nɛ i suɔ, amlɔ nɛ ɔ, wa ji Mawu bimɛ, se bɔ nɛ wa maa hi ha a lɛɛ, a je we kpo ngɔ tsɔɔ we wɔ lolo. Wa le kaa ke a je lɛ kpo ɔ, wa maa pee kaa lɛ, ejakaa wa maa na lɛ kaa bɔ nɛ e ngɛ ɔ pɛpɛɛpɛ. 3 Nɛ nɔ fɛɛ nɔ nɛ e ngɛ hɛ kɛ nɔ fɔmi nɛ ɔ ngɛ e mi ɔ, e peeɔ e he klɔuklɔu kaa bɔ nɛ jamɛ a nɔ ɔ hu ngɛ klɔuklɔu ɔ.

4 Nɔ fɛɛ nɔ nɛ e yaa nɔ nɛ e peeɔ yayami ɔ, e yi mlaa nɔ hulɔ, ejakaa yayami ji mlaa nɔ nɛ a yi. 5 Nyɛ le hu kaa a je lɛ kpo konɛ e ba ngɔ wa he yayami ɔmɛ kɛ ho, nɛ yayami ko be e mi. 6 Nɔ fɛɛ nɔ nɛ e yaa nɔ nɛ e kɛ lɛ peeɔ kake ɔ, jamɛatsɛ ɔ yɛ nɔ nɛ e peeɔ yayami; nɔ nɛ e yaa nɔ nɛ e peeɔ yayami ɔ nɛ lɛ, nɛ e li lɛ hulɔ. 7 Bimɛ tsɔwi, nyɛ ko ha nɛ nɔ ko nɛ e sisi nyɛ; nɔ nɛ e yaa nɔ nɛ e peeɔ nɔ́ nɛ da a ji dalɔ, kaa bɔ nɛ jamɛ a nɔ ɔ hu ji dalɔ ɔ. 8 Nɔ nɛ e yaa nɔ nɛ e peeɔ yayami ɔ je Abosiami mi, ejakaa kɛ je sisije tɔɔ nɛ Abosiami* bɔni yayami peemi. Enɛ ɔ he je nɛ a je Mawu Bi ɔ kpo ɔ nɛ, konɛ e ba puɛ Abosiami ní tsumi ɔmɛ.*

9 Nɔ fɛɛ nɔ nɛ a fɔ lɛ kɛ je Mawu mi ɔ yɛ nɔ nɛ e peeɔ yayami, ejakaa Mawu wu* ngɛ jamɛ a nɔ ɔ mi, nɛ e be nyɛe maa ya nɔ maa hi yayami pee, ejakaa a fɔ lɛ kɛ je Mawu mi. 10 Anɔkuale nɛ ɔ lɛ haa nɛ wa leɔ Mawu bimɛ ɔmɛ kɛ Abosiami bimɛ ɔmɛ a mi tso: Nɔ fɛɛ nɔ nɛ e pee we nɔ́ nɛ da a, pi Mawu mi nɛ e je, nɛ jã nɔuu kɛ̃ nɛ e ji ngɛ nɔ nɛ e sume e nyɛmi ɔ hu blɔ fa mi. 11 Ejakaa enɛ ɔ ji sɛ gbi nɛ nyɛ nu kɛ je sisije ɔ nɛ, kaa e sa nɛ waa suɔ wa sibi; 12 e sɛ nɛ waa pee kaa Kain, nɔ nɛ e je nɔ yayami ɔ mi nɛ e gbe e nyɛmi ɔ. Nɛ mɛni he je nɛ e gbe lɛ ɔ? Ejakaa lɛ nitsɛ e ní tsumi ɔmɛ ji ní tsumi yayamihi, se e nyɛmi ɔ ní ɔmɛ lɛɛ, a ji níhi nɛ da.

13 Nyɛmimɛ, e ko pee nyɛ nyakpɛ kaa je ɔ ngɛ nyɛ nyɛe. 14 Wa le kaa wa po mi kɛ je gbenɔ mi kɛ ba wami mi, ejakaa wa suɔ nyɛmimɛ ɔmɛ. Nɔ nɛ e sume nɔmlɔ ɔ, e maa ya nɔ maa hi gbenɔ mi. 15 Nɔ fɛɛ nɔ nɛ e nyɛɔ e nyɛmi ɔ, e ji nɔmlɔ gbelɔ, nɛ nyɛ le kaa nɔmlɔ gbelɔ ko nɔmlɔ gbelɔ ko be neneene wami ngɛ e mi. 16 Kɛ gu enɛ ɔ nɔ ɔ, wa ba le suɔmi, ejakaa jamɛ a nɔ ɔ ngɔ e wami* kɛ fɔ si ngɛ wa he, nɛ e ji wɔ hu wa blɔ nya ní tsumi kaa wa maa ngɔ wa wami* kɛ fɔ si ngɛ wa nyɛmimɛ a he. 17 Se nɔ fɛɛ nɔ nɛ e ngɛ he lo nya níhi ngɛ je nɛ ɔ mi, nɛ e naa e nyɛmi nɛ e fĩ lɛ, se kɛ̃ ɔ, e mi mi sãa we lɛ ngɛ e he ɔ, mɛni tsɔɔ kaa Mawu suɔmi ɔ ngɛ e mi? 18 Bimɛ tsɔwi, nyɛ ko ha nɛ waa suɔ nɔmlɔ ngɛ munyu tutui mi aloo ngɛ lilɛ nɔ, mohu ɔ, ngɛ ní peepee kɛ anɔkuale mi.

19 Kɛ gu enɛ ɔ nɔ ɔ, wa maa le kaa anɔkuale ɔ mi nɛ wa je, nɛ wa ma tsɔ wa tsui ngɔ fɔ wa mi* ngɛ e hɛ mi 20 ngɛ nɔ́ fɛɛ nɔ́ nɛ wa tsui maa bu wɔ fɔ ngɛ he ɔ mi, ejakaa Mawu kle pe wa tsui ɔ, nɛ e le níhi tsuo. 21 Nihi nɛ i suɔ, ke wa tsui ɔ bui wɔ fɔ ɔ, wa nyɛɔ nɛ waa kɛ Mawu tuɔ munyu faa; 22 nɛ nɔ́ fɛɛ nɔ́ nɛ wa biɔ lɛ ɔ, wa nine suɔ nɔ kɛ jeɔ e ngɔ, ejakaa wa yeɔ e kita amɛ a nɔ, nɛ wa peeɔ níhi nɛ saa e hɛ mi. 23 Niinɛ, e kita a ji nɛ ɔ nɛ: kaa wa ná hemi kɛ yemi ngɛ e Bi Yesu Kristo biɛ ɔ mi, konɛ waa suɔ wa sibi kaa bɔ nɛ e wo wɔ kita a. 24 Jehanɛ se hu ɔ, nɔ nɛ e yeɔ e kita amɛ a nɔ ɔ yaa nɔ nɛ e kɛ lɛ peeɔ kake, nɛ lɛ hu e kɛ jamɛ a nɔ ɔ peeɔ kake. Nɛ kɛ gu mumi ɔ nɛ e ha wɔ ɔ nɔ ɔ, wa le kaa e kɛ wɔ peeɔ kake.

4 Nihi nɛ i suɔ, nyɛ ko he munyu fɛɛ munyu nɛ je mumi mi* ɔ nɛ nyɛɛ ye, mohu ɔ, nyɛɛ ka munyuhi nɛ je mumi mi* ɔ nɛ nyɛɛ hyɛ kaa a je Mawu ngɔ lo, ejakaa lakpa gbali fuu ba je ɔ mi.

2 Enɛ ɔ lɛ ma ha nɛ nyɛ maa le kaa munyu nɛ je mumi mi ɔ je Mawu ngɔ: Munyu fɛɛ munyu nɛ je mumi mi nɛ jajeɔ kaa Yesu Kristo ba ngɛ he lo mi ɔ, e je Mawu ngɔ. 3 Se munyu fɛɛ munyu nɛ je mumi mi nɛ jaje we jã ngɛ Yesu he ɔ, pi Mawu ngɔ nɛ e je. Jehanɛ se hu ɔ, enɛ ɔ ji munyu nɛ je mumi mi, nɛ e je antikristo ɔ nɛ nyɛ nu kaa e ma a ngɔ ɔ nɛ, nɛ amlɔ nɛ ɔ, e ngɛ je ɔ mi momo.

4 Bimɛ tsɔwi, nyɛ je Mawu mi, nɛ nyɛ ye a nɔ kunimi, ejakaa nɔ nɛ e kɛ nyɛ pee kake ɔ kle pe nɔ nɛ e kɛ je ɔ pee kake ɔ. 5 Mɛɛ lɛɛ je ɔ mi nɛ a je; enɛ ɔ he je nɛ je ɔ mi níhi a he munyu nɛ a tuɔ, nɛ je ɔ buɔ mɛ tue ɔ nɛ. 6 Wɔɔ lɛɛ wa je Mawu mi. Nɔ fɛɛ nɔ nɛ e ba le Mawu ɔ buɔ wɔ tue; nɔ fɛɛ nɔ nɛ pi Mawu mi nɛ e je ɔ bui wɔ tue. Enɛ ɔ nɛ waa kɛ naa slɔɔto nɛ ngɛ anɔkuale munyu nɛ je mumi mi kɛ lakpa munyu nɛ je mumi mi ɔ a kpɛti ɔ nɛ.

7 Nihi nɛ i suɔ, nyɛ ha nɛ waa ya nɔ nɛ waa suɔ wa sibi, ejakaa suɔmi je Mawu ngɔ, nɛ nɔ fɛɛ nɔ nɛ e suɔ nɔmlɔ ɔ, a fɔ lɛ kɛ je Mawu mi, nɛ e le Mawu. 8 Nɔ fɛɛ nɔ nɛ e sume nɔmlɔ ɔ, e li Mawu, ejakaa Mawu ji suɔmi. 9 Kɛ gu enɛ ɔ nɔ nɛ suɔmi nɛ Mawu ngɛ kɛ ha wɔ ɔ jeɔ kpo, kaa Mawu tsɔ e Bi kake too ɔ kɛ ba je ɔ mi konɛ kɛ gu e nɔ ɔ, wa nyɛ nɛ wa ná wami. 10 Kikɛ nɛ ɔ ji bɔ nɛ suɔmi ɔ ngɛ, pi wɔ nɛ wa suɔ Mawu, mohu ɔ, lɛ nɛ e suɔ wɔ nɛ e tsɔ e Bi ɔ kɛ ba kaa kpatami afɔle* kɛ ha wa he yayami ɔmɛ.

11 Nihi nɛ i suɔ, ke kikɛ nɛ ɔ ji bɔ nɛ Mawu suɔ wɔ ɔ, lɛɛ e ji wɔ hu wa blɔ nya ní tsumi kaa waa suɔ wa sibi. 12 Nɔ ko nɔ ko nɛ Mawu hyɛ. Ke wa ya nɔ nɛ wa suɔ wa sibi ɔ, Mawu maa hi wa mi, nɛ e suɔmi ɔ maa pi si ngɛ wa mi. 13 Kɛ gu enɛ ɔ nɔ ɔ, wa leɔ kaa kake peemi ngɛ waa kɛ lɛ wa kpɛti, nɛ lɛ hu e kɛ wɔ peeɔ kake, ejakaa e ha wɔ e mumi ɔ. 14 Jehanɛ se hu ɔ, wɔ nitsɛmɛ wa na nɛ wa ngɛ odase yee kaa Tsɛ ɔ tsɔ e Bi ɔ kɛ ba kaa je ɔ yi wami helɔ. 15 Nɔ fɛɛ nɔ nɛ e jajeɔ kaa Yesu ji Mawu Bi ɔ, Mawu kɛ jamɛatsɛ ɔ peeɔ kake, nɛ jamɛatsɛ ɔ hu kɛ Mawu peeɔ kake. 16 Nɛ wa ba le suɔmi nɛ Mawu ngɛ kɛ ha wɔ ɔ, nɛ wa he ye.

Mawu ji suɔmi, nɛ nɔ fɛɛ nɔ nɛ e yaa nɔ nɛ e hiɔ suɔmi mi ɔ, e kɛ Mawu peeɔ kake, nɛ Mawu hu kɛ lɛ peeɔ kake. 17 Ngɛ blɔ nɛ ɔ nɔ ɔ, a ha nɛ suɔmi ɔ pi si ngɛ wa mi konɛ wa nyɛ nɛ waa tu munyu faa ngɛ kojomi ligbi ɔ nɔ, ejakaa kaa bɔ nɛ jamɛ a nɔ ɔ ngɛ ɔ, jã kɛ̃ nɛ wɔ nitsɛmɛ hu wa ngɛ ngɛ je nɛ ɔ mi. 18 Gbeye yemi be suɔmi mi, mohu ɔ, suɔmi nɛ pi si ɔ fieeɔ gbeye yemi kɛ yaa se, ejakaa gbeye yemi tsiɔ wa nya. Ngɛ anɔkuale mi ɔ, nɔ nɛ e yeɔ gbeye ɔ, e pí si ngɛ suɔmi mi. 19 Wa jeɔ suɔmi kpo, ejakaa lɛ nɛ e suɔ wɔ kekle.

20 Ke nɔ ko de ke: “I suɔ Mawu,” se kɛ̃ ɔ, e nyɛɔ e nyɛmi ɔ, lakpatsɛ ji lɛ. Ejakaa nɔ nɛ e sume e nyɛmi nɛ e naa lɛ ɔ, e be nyɛe maa suɔ Mawu, nɔ nɛ e nɛ lɛ ɔ. 21 Nɛ kita nɛ e wo wɔ ji kaa nɔ fɛɛ nɔ nɛ e suɔ Mawu ɔ, e sa nɛ e suɔ e nyɛmi hulɔ.

5 Nɔ fɛɛ nɔ nɛ e heɔ yeɔ kaa Yesu ji Kristo ɔ, a fɔ lɛ kɛ je Mawu mi, nɛ nɔ fɛɛ nɔ nɛ e suɔ nɔ nɛ e ha nɛ a fɔ nɔ ɔ, e suɔ nɔ nɛ a fɔ lɛ ngɛ jamɛ a nɔ ɔ mi ɔ hulɔ. 2 Enɛ ɔ ha nɛ wa leɔ kaa wa suɔ Mawu bimɛ ɔmɛ, ke wa suɔ Mawu nɛ wa yeɔ e kita amɛ a nɔ. 3 Ejakaa enɛ ɔ ji suɔmi nɛ wa suɔ Mawu ɔ nɛ, kaa wa maa ye e kita amɛ a nɔ; nɛ e kita amɛ ɔ, a pi tlomi, 4 ejakaa nɔ fɛɛ nɔ* nɛ a fɔ lɛ kɛ je Mawu mi ɔ yeɔ je ɔ nɔ kunimi. Nɛ nɔ́ nɛ ye je ɔ nɔ kunimi ɔ ji wa hemi kɛ yemi ɔ nɛ.

5 Mɛnɔ ma nyɛ maa ye je ɔ nɔ kunimi? Anɛ pi nɔ nɛ e ngɛ hemi kɛ yemi kaa Yesu ji Mawu Bi ɔ lo? 6 Yesu Kristo ji nɔ nɛ e gu nyu kɛ muɔ mi kɛ ba a nɛ, nɛ pi nyu ɔ mi kɛkɛ, se mohu ɔ, ngɛ nyu ɔ kɛ muɔ ɔ mi. Nɛ mumi ɔ ngɛ odase yee, ejakaa mumi ɔ ji anɔkuale ɔ nɛ. 7 Ejakaa odase yeli etɛ lɛ a ngɛ: 8 mumi ɔ kɛ nyu ɔ kɛ muɔ ɔ; nɛ ní etɛ ɔmɛ kɛ a he kpaa gbi.

9 Ke wa kplɛɛɔ odase nɛ adesa yeɔ ɔ nɔ ɔ, lɛɛ odase nɛ Mawu yeɔ ɔ kle pe lɔ ɔ. Ejakaa odase nɛ Mawu yeɔ ɔ ji odase nɛ e ye ngɛ e Bi ɔ he ɔ nɛ. 10 Nɔ nɛ e náa hemi kɛ yemi ngɛ Mawu Bi ɔ mi ɔ ngɛ odase ngɛ lɛ nitsɛ e mi. Nɔ nɛ e be hemi kɛ yemi ngɛ Mawu mi ɔ ha nɛ Mawu pee lakpatsɛ, ejakaa e ná we hemi kɛ yemi ngɛ odase nɛ Mawu ye ngɛ e Bi ɔ he ɔ mi. 11 Nɛ enɛ ɔ ji odase ɔ nɛ, kaa Mawu ha wɔ neneene wami, nɛ wami nɛ ɔ ngɛ e Bi ɔ mi. 12 Nɔ nɛ e ngɛ Bi ɔ ngɛ wami; nɔ nɛ e be Mawu Bi ɔ be wami nɛ ɔ.

13 Nyɛ nihi nɛ nyɛ ná hemi kɛ yemi ngɛ Mawu Bi ɔ mi ɔ, i ngɛ nyɛ ní nɛ ɔmɛ ngmae konɛ nyɛɛ le kaa nyɛ ngɛ neneene wami. 14 Nɛ enɛ ɔ ji nɔ mi mami nɛ wa ngɛ* ngɛ e mi ɔ nɛ, kaa ke wa bi lɛ nɔ́ ko nɛ e kɛ e suɔmi nya ní peemi kɔ ɔ, e buɔ wɔ tue. 15 Nɛ ke wa le kaa nɔ́ fɛɛ nɔ́ nɛ wa biɔ lɛ ɔ e buɔ wɔ tue ɔ, lɛɛ wa le kaa níhi nɛ wa bi lɛ ɔ, wa nine maa su nɔ, akɛnɛ wa bi lɛ ɔ he je.

16 Ke nɔ ko hɛ ngmɛ gba e nyɛmi nɔ nɛ e ngɛ yayami ko nɛ gbi nɔ pee ɔ, e ma kpa Mawu pɛɛ konɛ e ha lɛ wami, ee, kɛ ha nihi nɛ a peeɔ yayami nɛ e gbi nɔ ɔ. Yayami ko ngɛ nɛ e gbeɔ nɔ. Pi jamɛ a yayami ɔ nɛ i ngɛ dee ke e kpa he pɛɛ ɔ. 17 Níhi tsuo nɛ dɛ ɔ ji yayami, se kɛ̃ ɔ, yayami ko ngɛ nɛ e gbi nɔ.

18 Wa le kaa nɔ fɛɛ nɔ nɛ a fɔ lɛ kɛ je Mawu mi ɔ yɛ nɔ nɛ e peeɔ yayami, mohu ɔ, nɔ nɛ a fɔ lɛ kɛ je Mawu mi* ɔ buɔ e he, enɛ ɔ he ɔ, nɔ yayami ɔ nine be nyɛe maa su e nɔ.* 19 Wa le kaa wa je Mawu mi, se je ɔ tsuo lɛɛ, nɔ yayami ɔ nɛ ngɛ lɛ kudɔe. 20 Se wa le kaa Mawu Bi ɔ ba, nɛ e ha wɔ nɔ́ se kɔmi* konɛ waa le nɔ nɛ e ji anɔkualetsɛ ɔ. Nɛ waa kɛ nɔ nɛ e ji anɔkualetsɛ ɔ pee kake kɛ gu e Bi Yesu Kristo nɔ. Nɔ nɛ ɔ ji anɔkuale Mawu ɔ kɛ wami nɛ ngɛ kɛ yaa neneene ɔ nɛ. 21 Bimɛ tsɔwi, nyɛɛ hyɛ nyɛ he nɔ saminya ngɛ wɔhi a he.