YOHANE WOMI ETƐNE Ɔ

1 Nyumu nɔkɔtɔma* a kɛ ya ha Gayo, nɔ nɛ a suɔ e sane ɔ, nɛ i suɔ lɛ nitsɛnitsɛ ɔ.

2 Mo nɛ i suɔ mo, ye sɔlemi ji kaa ngɛ níhi tsuo a mi ɔ, o hi nɔ yae, nɛ o ná nɔmlɔ tso mi he wami kpakpa, kaa bɔ nɛ o* ngɛ nɔ yae amlɔ nɛ ɔ. 3 Ejakaa ye bua jɔ wawɛɛ nitsɛ benɛ nyɛmimɛ ba nɛ a ba ye anɔkuale ɔ nɛ o hɛɛ mi ɔ he odase, kaa bɔ nɛ o ya nɔ nɛ o ngɛ nyɛɛe ngɛ anɔkuale ɔ nya a. 4 I be bua jɔmi ko nɛ* pe enɛ ɔ: kaa ma nu kaa ye bimɛ ɔmɛ ya nɔ nɛ a ngɛ nyɛɛe ngɛ anɔkuale ɔ nya.

5 Mo nɛ i suɔ mo, ngɛ nibwɔhi nɛ nyɛmimɛ ɔmɛ ji ɔ tsuo se ɔ, o tsɔɔ kaa o yeɔ anɔkuale ngɛ níhi nɛ o peeɔ kɛ haa mɛ ɔ mi. 6 A ba ye o suɔmi ɔ he odase ngɛ asafo ɔ hɛ mi. I kpa mo pɛɛ nɛ o wo mɛ blɔ kɛ ho bɔ nɛ e maa sa Mawu hɛ mi. 7 Ejakaa e biɛ ɔ he je nɛ a je kɛ ho ɔ nɛ, a ngɔɛ nɔ́ ko nɔ́ ko ngɛ nihi nɛ a ngɛ je ma amɛ a mi ɔmɛ a dɛ. 8 Enɛ ɔ he ɔ, e ji wa blɔ nya ní tsumi kaa wa maa pee nihi kaa jã a nibwɔ, konɛ waa piɛɛ a he kɛ tsu ní ngɛ anɔkuale ɔ mi.

9 I ngma nɔ́ ko kɛ ya ha asafo ɔ, se Diotrefe, nɔ nɛ e suɔ kaa e maa ye kekleekle blɔ he ngɛ a kpɛti ɔ bui wɔ, nɛ e kplɛɛ we nɔ́ ko nɔ́ ko nɛ jeɔ wa ngɔ ɔ nɔ. 10 Enɛ ɔ he je nɛ ke i ba a, ma je e ní tsumi ɔmɛ nɛ ji munyuhi nɛ e hii tue kɛ hii wa he guɛ gbee* ɔ kpo ɔ nɛ. Lɔ ɔ kɛkɛ pi ha lɛ, e kɛ bumi he we nyɛmimɛ ɔmɛ atuu; nɛ ni nɛmɛ nɛ a suɔ kaa a ma he mɛ atuu ɔ hu e bɔɔ mɔde kaa e maa tsi mɛ blɔ nɛ e maa fiee mɛ kɛ je asafo ɔ mi.

11 Mo nɛ i suɔ mo, koo kase nɔ́ yayami, mohu ɔ, kase nɔ́ kpakpa. Nɔ nɛ e peeɔ kpakpa a je Mawu mi. Nɔ nɛ e peeɔ yayami ɔ nɛ Mawu. 12 Demetrio lɛɛ, mɛ tsuo a tu e he munyu kpakpa nɛ anɔkuale ɔ nitsɛ hu ye e he odase. Ngɛ anɔkuale mi ɔ, wɔ hu wa ngɛ e he odase yee, nɛ o le kaa odase nɛ wa ye ɔ ji anɔkuale.

13 I ngɛ níhi fuu nɛ ma ngma mo, se i sume nɛ ma ya nɔ nɛ ma ngɔ ningma tso kɛ ní ngmami nyu kɛ hi mo ngmae. 14 I ngɛ blɔ hyɛe kaa e be kɛe nɛ ma na mo, nɛ wa maa tu munyu hɛ mi kɛ hɛ mi.

Tue mi jɔmi ha mo.

Huɛmɛ ɔmɛ ke a biɔ mo. Moo tsua huɛmɛ ɔmɛ a biɛ nɛ o de mɛ ke i biɔ mɛ.